Сәрһати 44

Рʹәхаб Щәʹсуса Вәдшерә

МЕРЕД кӧ ль сәр ви шькьли тенә кʹьвше щәʹсусе исраели нә. Әԝана кʹәтьнә тʹәльке у гәрәке жь ԝе дәре бьрʹәвьн, йане ԝе бенә кӧштьне. Ле әв жьн, йа кӧ али ԝан дькә, әԝ Рʹәхаб ә. Рʹәхаб дь шәһәре Әриһайеда дьжит. Мала ԝе һәма дь диԝаре шәһәрда бу. Кʹа әм пебьһʹәсьн чьрʹа әв щәʹсус кʹәтьнә тʹәльке.

Щьмәʹта Исраеле ида һазьр бу кӧ дәрбази чʹәме Урдӧне бьн у бькʹәвьнә әʹрде Кәнане. Ле пешийа ве йәке Йешу дӧ щәʹсус шандә ԝе дәре. Йешу готә ԝан: «Һәрʹьн әʹрде ԝан у шәһәре Әриһайе бьньһерʹьн у щәʹсусийе бькьн».

Щәʹсус һатьн шәһәре Әриһайе, у һәма мала Рʹәхаб кʹәтә бәр чʹәʹве ԝан у ԝана ԛьрар кьр кӧ һәрʹьнә мала ԝе. Ԝи чахи кәсәк дьчә бал пʹадше Әриһайе у ԝирʹа дьвежә: «Дӧ мере исраели ишәв һатьнә вьр, кӧ щәʹсусийе әʹрде мә бькьн». Чахе пʹадша әв йәк бьһист, әԝи мер шандә мала Рʹәхабе. Ԝана жи фәрман данә Рʹәхабе: «Ван щәʹсуса йе кӧ һатьнә мала тә, дәрхә дәрва!» Ле Рʹәхабе ван щәʹсуса дь банийе хԝәда вәшартьбу, у әԝе готә ԝан: «Чәнд мер һатьбун мала мьн, ле әз һаш пе тʹӧнә бум әԝ кʹи нә у жь кʹидәре нә. Әԝана чун чахе тәʹри дькʹәтә әʹрде, у һʹәта дәре шәһәр һе вәкьри бу. Һәрге һун ләз кʹәвьн, һуне бькарьбьн ԝана бьгьрьн!» У ӧса әв мер рʹәвин пәй щәʹсуса.

Чахе әԝана чун, Рʹәхаб ләзә-ләз рʹәви ль сәр банийа мала хԝә. Әԝе готә щәʹсуса: «Әз заньме кӧ әви әʹрди Йаһоԝа ԝе бьдә ԝә. Мә бьһистьбу ча Хԝәдайе ԝә, чахе һун жь Мьсьре рʹәвин Бәʹра Сор ортʹеда вәкьр, у ча Йаһоԝа пʹадше Сиһон у Ог кӧшт. Мьн ԝәрʹа ԛәнщи кьр, ләма жи һиви ԝә дькьм һун жи мьнрʹа ԛәнщийе бькьн. Де-баве мьн у хушк бьред мьн хьлаз кьн».

Щәʹсуса соз данә Рʹәхабе, кӧ ԝе ӧса жи бькьн, ле Рʹәхаб жи гәрәке тьштәк бькьра. Ԝана готә ԝе: «Ви бәне сор һьлдә у пʹәнщәрева гьредә. Нәфәред мала хԝә тʹәмами дь мала хԝәда тʹоп кә. Чахе әм бен кӧ Әриһайе һьлдьн, әме ви бәне сор ль сәр пʹәнщәре бьвиньн у тʹӧ кәс дь мала тәда ԝе найе кӧштьне». Чахе щәʹсус вәгәрʹийан, ԝана һʹәму тьшт, чь кӧ сәре ԝан ԛәԝьмин, Йешурʹа гьли кьрьн.

Йешуа 2:1-24; Ибрани 11:31.