Сәрһати 39
Шьвдара Һарун Бь Кӧлирка Шин Дьбә
БЬНЬҺЕРʹӘ ль сәр ве шьвдаре, йе кӧ бь кӧлирка шин буйә. Әв шьвдара Һарун ә. Бьдә һʹәсаве хԝә кӧ әв шьвдар нава шәвәки ӧса шин буйә! Гәло чьрʹа әв йәк ԛәԝьми? Кʹа әм пебьһʹәсьн.
Щьмәʹта исраели ида гәлә ԝәхт дь бәрʹийеда бун. Дәрбәки мерәк, наве кʹижани Ԛорах бу, тʹәв Датʹан, Аԝирам у 250 меред мәзьн дь щьмәʹтеда, дьшьрмиш бун кӧ Муса гәрәке нав ԝанда сәркʹартийе нәкә, у Һарун жи гәрәке кʹаһине пешьн нибә. Ләма жи әԝана һʹәмушк һатьн бал Муса у готьн: «Чьрʹа тә хԝә ча сәркʹар ль сәр мә кʹьвш кьрийә?»
Муса готә Ԛорах у һәвале ԝи: «Бьхурданед хԝә тʹәви бьхуре һьлдьн у сьбе зу ԝәрьнә бәрбь коне Хԝәде. Әме бьньһерʹьн Йаһоԝа ԝе кʹе бьжберә».
Рʹожа майин Ԛорах тʹәви 250 һәвалед хԝә һатә бәр Кона Пироз. Мәрийед дьн жи һатьбун бәр чадьред Ԛорах, Датʹан у Аԝирам кӧ пьшта ԝан бьгьрьн. Ԝи чахи Йаһоԝа гәлә һерс кʹәт, у Муса готә ԝан мәрийа: «Жь чадьред ԝан мәрийед хьрав дур кʹәвьн. Дәсте хԝә нәдьнә тʹӧ тьшти, йе кӧ йе ԝан ьн». Щьмәʹте гӧрʹа Муса кьрьн у жь чадьред у һәбунед Ԛорах Датʹан у Аԝирам дур кʹәтьн.
Муса дьвежә: «Чахе әʹрд ԝе ортʹеда вәбә у һʹәму мәрийед хьрав ԝе теда чʹәлбьн, ԝи чахи һуне фәʹм бькьн, Хԝәде кʹе дьжберә».
Гава Муса хәвәрдана хԝә хьлаз кьр, әʹрд дь ортʹеда вәбу. Чадьре Ԛорах бь һәбуна ԝи, ӧса жи Датʹан Аԝирам у һʹәму мәри йе кӧ пьшта ԝан дьгьртьн, кʹәтьнә һьндӧрʹе әʹрде у пәй ԝанрʹа әʹрд һатә дадане. Чахе мәрийа ԛарʹә-ԛарʹа ԝан бьһист, гәлә тьрсийан у дьготьн: «Бьрʹәвьн! Йане әʹрд ԝе мә жи даԛӧрчʹинә!»
Ԛорах тʹәви 250 һәвалед хԝә һе бәр кона Хԝәде сәкьни бун. Ԝи чахи Йаһоԝа агьр шандә ль сәр ԝан у ԝана һʹәмушка шәԝьтанд. Паше Йаһоԝа готә Әләазәре кӧрʹе Һарун, ԝәки әԝ бьхурданед ԝан мәрийа һьлдә у жь ԝан дәвлика чекә, сәва кӧ горигәһе дадә. Әван дәвликед горигәһе дьанинә бира исраелийа, кӧ хенщи Һарун у кӧрʹед ԝи изьна тʹӧ кәси тʹӧнә, ԛӧльх кьн ча кʹаһин.
Ле Йаһоԝа дьхԝәст һе әʹйанкьра кӧ кʹаһине жьбарти Һарун у кӧрʹед ԝи нә. Ләма жи әԝи Мусарʹа гот: «Бьра һәр сәрԝерәк жь бәрәкед Исраеле шьвдаре хԝә биньн, у жь бәрәке Леԝи жи бьра Һарун бинә. Паше, ван шьвдара дь кона пирозда бәр сьндоԛа пәймане дайньн. Шьвдара ԝи мәрьви, кʹи ԝе бе жьбартьне, бь кӧлирка ԝе шин бә».
Гәло шьвдара кʹе ԝе шин бә? Рʹожа майин Муса һат бәрбь коне у дит кӧ шьвдара Һарун бь кӧлирка шин буйә! Аһан, ньһа тӧ фәʹм дьки чьрʹа шьвдара Һарун бь кӧлирка шин бу?
Жьмар 16:1-49; 17:1-11; 26:10.