Йаһоԝа бь Сайа Пʹехәмбәред Хԝә Хәбәр Дьдә

ԜӘʹДЕ пʹадшед Исраеле у Щьһуда, Йаһоԝа мера дьжберә, демәк пʹехәмбәра, йед кӧ бь наве ԝи пʹехәмбәрти дькьрьн. Әван мәрийа ԛьрара Хԝәде бәла дькьрьн, у әʹйан дьбун бь баԝәрийа хԝәйә ԛайим у бь мерхасийе. Ньһа әме пебьһʹәсьн дәрһәԛа чар тʹема, йед кӧ пʹехәмбәртийед ԝанда әʹйандьбун.

1. Һьлшандьна Оршәлиме. Гәләк ԝәхт пешийа һьлшандьна Оршәлиме, пʹехәмбәред Хԝәде, Ишайа у Йерәмйа пешда дьготьн, ԝәки шәһәр ԝе бе һьлшандьне у ԝеран бьминә. Ԝана ӧса жи шьровәдькьр кӧ чьрʹа Хԝәде ԝе хәзәба хԝә бьшинә сәр Оршәлиме. Оршәлим нә һежайи бу ԝәки наве Хԝәде ль сәр бә, чьмки ԝедәре һʹәбандьна ԛәлп пешда дьбьрьн, һьм жи бенамуси у зӧлми дькьрьн (2 Пʹадшати 21:10-15; Ишайа 3:1-8, 16-26; Йерәмйа 2:1-3:13).

2. Тʹәзәкьрьна һʹәбандьна рʹаст. Паши дилтийа 70 сали, щьмәʹта Хԝәде ԝе жь Бабилоне бе азакьрьне. Әԝана ԝе вәгәрʹьн сәр әʹрде хԝәйә ԝеранкьри, у пʹарьстгәһа Йаһоԝа Оршәлимеда тʹәзәда ава кьн (Йерәмйа 46:27; Амос 9:13-15). Ишайа пʹехәмбәр ԝәкә 200 сал пешда, пʹехәмбәрти кьр дәрһәԛа наве ԝи мәрьви, йе кӧ ԝе Бабилон зәфт кьра, у изьн бьда щьмәʹта Хԝәде кӧ һʹәбандьна рʹаст пешда бьбьн. Наве ԝи Корәш бу. Ишайа пʹехәмбәртийа хԝәда ӧса жи һур бь һур шьровәдькә, ԝәки чь щурʹәйи Корәш гәрәке Бабилоне зәфт кә (Ишайа 44:24-45:3).

3. Һатьна Мәсиһ у әʹмьре ԝи. Мәсиһ шәһәре Бәйтләһʹмеда ԝе бе буйине (Миха 5:2). Әԝе сәр щәʹшьке сийарбуйи бькʹәвә Оршәлиме, у бь ве йәке мьлуктийа ԝи ԝе бе кʹьфше (Зәкәрйа 9:9). Рʹаст ә, әԝ ԝе мьлаһим у ԛәнщ бә, ле йәкә гәләк мәри ԝе ԝи инкʹар кьн (Ишайа 42:1-3; 53:1, 3). Мәсиһ бь мьрьнәкә чәтьн ԝе бьмьрә, ле әʹмьре ԝи бь ве йәке хьлаз нәбә. Бь сайа ԛӧрбанбуна ԝи, гӧнед гәләка ԝе афу бьн (Ишайа 53:4, 5, 9-12). Әв йәк ԝе бьԛәԝьмийа тʹәне паши сахбуна ԝи.

4. Сәрԝертийа Мәсиһ сәр әʹрдерʹа. Сәрԝертийа мәрьвед гӧнәкʹар, нькарә әʹдьлайе мәрийарʹа бинә, ле Пʹадшайе Создайи ԝе бе навкьрьне, ча Мире Әʹдьлайе (Ишайа 9:6, 7; Йерәмйа 10:23). Бьн сәрԝертийа ԝи һʹәму мәри тʹәви һәв у тʹәви һʹәму һʹәйԝана, әʹдьлайеда ԝе бьжин (Ишайа 11:3-7). Нәхԝәши ида ԝе тʹӧнә бьн (Ишайа 33:24). Һʹәта мьрьн жи, ԝе һʹәта-һʹәтайе бе кʹӧтакьрьне (Ишайа 25:8). Ԝәʹде пʹадшатийа Иса Мәсиһ әԝед кӧ мьрьнә, сәва жийина ль сәр әʹрде ԝе бенә сахкьрьне (Данийел 12:13).

​—Сәр һʹиме кʹьтебед Ишайа, Йерәмйа, Данийел, Амос, Миха, у Зәкәрйа.