Пʹехәмбәре Дил Ахьрийе Дьвинә

ДАНИЙЕЛЕ щаһьл кӧ амьн бу, һе пешийа һьлшандьна Оршәлиме, бьрьнә Бабилоне ча дил. Ԝирʹа у чәнд гәдед Ибранирʹа, йед кӧ дил һьлдабун жь пʹадшатийа Щьһуда, жь дилед дьн, зедәтьр азабун дан. Әʹмьре Данийели дьрежда Бабилонеда, Хԝәде әԝ гәләк кʹәрәм дькьр, һʹәта әԝ жь мьрьне жи хьлаз кьр, чахе әԝ авитьбунә ль бире нава шера. Данийел жь Хԝәде дитьнок дит дәрһәԛа ахьрийа дур. Пʹехәмбәртийед Данийелә лапи фәрз, дәрһәԛа Мәсиһ у сәрԝертийа ԝи бун.

Данийел педьһʹәсә кӧ кʹәнге Мәсиһ ԝе бе. Данийел пʹехәмбәррʹа һатьбу готьне, ԝәки щьмәʹта Хԝәде дькарә һивийа һатьна Мәсиһ бә, у ԝәки әԝ ԝе һьнге бе, чахе фәрмана дәрһәԛа авакьрьна Оршәлиме бе дайине у паши ве фәрмане 69 һʹәфтийед сала дәрбаз бьн. Әв фәрман дәркʹәт сала 455-да Б.Д.М., паши мьрьна Данийел. Һʹәфтек һʹәфт рʹож ьн, ле һʹәфтийед сала, 7 сал ьн. Һʹәфт дәрба 69, дькә 483, демәк жь сала 455 Б.Д.М., 483 сал дәрбаз бә дьгьһижә сала 29 Д.М. Ле чь ԛәԝьми ԝи чахи әме паше пебьһʹәсьн. Данийел ӧса жи пʹехәмбәрти кьр, ԝәки Мәсиһ ԝе бе кӧштьне сәва афукьрьна гӧнед мәрийа (Данийел 9:24-26).

Мәсиһ ль сәр әʹзмана ԝе бьбә Пʹадша. Данийелрʹа дитьнокәкә әʹщеб, дәрһәԛа Мәсиһ һатьбу дайине. Әԝи дит кӧ ль сәр әʹзмана «йәки мина лаԝе мәрьв», дьһат бәр тʹәхте Йаһоԝа Хԝәде. Хԝәде «сәрԝери у мәзьнайи» у пʹадшати дабу дәсте ԝи. Әв Пʹадшати гәрәке һʹәта-һʹәтайе буйа. Данийел пʹехәмбәр ӧса жи пеһʹәсийа, ԝәки әв Пʹадша ԝе тʹәне пʹадшатийе нәкә, тʹәви ԝи диса ԝе һьнә кәс һәбьн, навед кʹижана «пирозед Йе Бьльнд» ьн (Данийел 7:13, 14, 27).

Пʹадшати ԝе һʹәму сәрԝертийед ве дьнйайе һьлшинә. Хԝәде али Данийел пʹехәмбәр кьр, ԝәки әԝ хәԝна Нәбукәднәсәр пʹадшайе Бабилоне шьровәкә. Хәԝнеда пʹадша һʹәйкәләки мәзьн дит. Сәре ԝи жь зерʹ бу, синг у дәст жь зив бун, зьк у ԛорʹьк жь сьфьр, ньг жь һʹәсьн, пәʹнийеда һʹәта печʹийа жи, жь һʹәсьн у халийа сор тʹәвхьсти бун. Паше жь чʹийе кәвьр ԛәтийа, пәʹнийед ԝийә сьст кʹәт у һʹәйкәл һур-һури кьр. Пʹехәмбәр шьровәкьр, ԝәки һәр кӧдӧрʹәки һʹәйкәле те һʹәсабе империйед һʹәмдьнйайе, йе кӧ һәвдӧ дьгӧһезьн, дәстпебуйи жь Бабилоне, йе кӧ дьһатә һʹәсабе сәре һʹәйкәле жь зерʹ. Данийел пешда гот, ԝәки ԝәʹде сәрԝертийед дәԝләтед пашьнә зӧлм, Пʹадшатийа Хԝәде ԝе дәстпекә һʹӧкӧм кә. Әв Пʹадшати һʹәму сәрԝертийед дьнйайе ԝе һьлшинә, ле хԝәха һʹәта-һʹәтайе бьминә (Данийел, сәре 2).

Данийел пʹехәмбәр каләмертийа хԝәда, кʹәтьна Бабилоне бь чʹәʹве хԝә дит. Ча пʹехәмбәра пʹехәмбәрти кьрьбун, ӧса жи ԛәԝьми, демәк Корәш пʹадша шәһәрәки ԛәԝи алт кьр. Зутьрәке паши ве йәке, Ибрани жь дилтийе аза бун, һәма ԝәʹдәда демәк паши 70 сала әԝана вәгәрʹийанә сәр әʹрде хԝәйи ԝеранкьри. Бьн рʹебәрийа сәрԝера, кʹәшиша у пʹехәмбәра кӧ Хԝәдерʹа амьн бун, ԝана Оршәлим тʹәзә кьр, у пʹарьстгәһа Йаһоԝа жи тʹәзәда ава кьрьн. Ԝәрен әм пебьһʹәсьн кʹа чь ԛәԝьми чахе 483 сал дәрбаз бун, дәрһәԛа чь жи жоре һатьбу готьне.

​—Сәр һʹиме кʹьтеба Данийел.