ПʹАРА 13

Пʹадшед Ԛәнщ у йед Хьраб

Исраел дьбә дӧ пʹара. Гәләк пʹадшед Исраеле гӧһдарийа Хԝәде накьн. Бабилонийа, Оршәлиме һьлдьшиньн

ПАШИ ԝе йәке кӧ Сьлеман Йаһоԝа инкʹар кьр, Исраел бу дӧ пʹара, ча жи Йаһоԝа пешда готьбу. Кӧрʹе Сьлеман Рʹәһобоԝам пʹадшаки берʹәʹм бу. Ләма жи дәһә бәрәкед Исраелийа мьԛабьли ԝи дәркʹәтьн, у пʹадшатийа Исраелейә Бакӧре саз кьрьн. Ле дӧ бәрәкед дьне, тʹәхте Даԝьдрʹа, йе кӧ Оршәлимеда бу, амьн ман, у пʹадшатийа Щьһудайе Башуре саз кьрьн.

Һʹале Исраеле у Щьһудайе баш нибу, чьмки пʹадшед ԝан Хԝәдерʹа амьн нибун у гӧрʹа ԝи нәдькьрьн. Ле һʹале пʹадшатийа Бакӧре дьһа хьраб бу, чьмки пʹадшед ԝан һе серида хьзмәткьрьна ԛәлп пешда дьанин. Рʹаст ә ԝан чаха пʹехәмбәред ӧса хьзмәт дькьрьн ча Елйас у Елиша, йед кӧ шьхӧлед мәзьн дькьрьн у һәла һе мьри жи сах дькьрьн, ле йәкә щьмәʹт рʹийа хьрабда дьчу. Ахьрийеда, Йаһоԝа һишт ԝәки Асурийа, пʹадшатийа Бакӧре һьлшинә.

Жь сәд сали һьнәк зедә дәрбаз бу, пʹадшатийа Щьһуда жи кʹәтә ве рʹоже, у щәзакьрьна Хԝәде станд. Тʹәне чәнд пʹадшед Щьһудайе гӧһ дьданә пʹехәмбәред Хԝәде, у дьхԝәстьн ԝәки щьмәʹте вәгәрʹиньн щәм Йаһоԝа. Мәсәлә, Йошийа пʹадша дәстпекьр Щьһуда жь ԛӧльхкьрьна ԛәлп тʹәмьз кә, у пʹарьстгәһа Йаһоԝа тʹәзә кә. Чахе әԝ кʹьтеба, кӧ Ԛанунед Хԝәде дабу Муса теда һатьбун ньвисаре, һатә дитьне, Йошийа гәләк әʹщебмайи ма у дәстпекьр һе бь дьл-щан у бь хирәт ԛӧльхкьрьна ԛәлп кʹӧта кә.

Ле йазьх, ԝәки паши Йошийа кʹи кӧ ль сәр тʹәхте пʹадшатийе рʹуньштьн, пәй мәсәла ԝийә баш нәчун. Ләма жи Йаһоԝа һишт кӧ Бабилонийа, Щьһуда зәфт кьн, бажаре Оршәлиме у пʹарьстгәһе жи һьлшиньн. Ле йед кӧ сах бьминьн, ԝана бьбьнә Бабилоне ча дил. Хԝәде пешда готьбу ԝәки дилтийа ԝан, 70 сал ԝе бькʹьшинә у Щьһуда ԝе ԝеран бьминә һʹәта һьнге, чахе щьмәʹт изьне бьстинә вәгәрʹә ль Оршәлиме сәр әʹрде хԝәйи һʹәлал.

Ле кәсәк жь рʹькʹьнийата Даԝьд ида ԝе нәбә пʹадша, һʹәта Хьлазкʹаре создайи, демәк Мәсиһе кӧ пешда дәрһәԛа ԝи һатьбу готьне, бе сәр тʹәхт. Мәсәлед гәләк пʹадша, йед кӧ ль сәр тʹәхте Даԝьд рʹуньштьбун, избат кьрьн ԝәки мәрьвед гӧнәкʹар нькарьн сәрԝертийе бькьн. Тʹәне Мәсиһ һежайи ве йәке йә. Ләма жи Йаһоԝа дәрһәԛа Мәсиһ гьлийе ӧса гот: «Әԝе һʹәта-һʹәтайе пʹадшатийе сәр мала Аԛуб бькә у хьлазийа Пʹадшатийа ԝи ԝе тʹӧнәбә» (Луԛа 1:33).

—Сәр һʹиме кʹьтебед 1 у 2 Пʹадшати; 2 Дирок сәре 10 һʹәта 36; Йерәмйа 25:8-11.

УНЬС

Ԝи чахи, чахе пʹадшати бу дӧ пʹара, Йаһоԝа Хԝәде, Уньс пʹехәмбәр шандә Нинәԝайа дур, ԝәки әԝ щьмәʹта ви шәһәре зӧлмкʹаррʹа әʹлам кә, дәрһәԛа хәзәбе. Ле Уньс кʹәтә гәмикә кӧ лап алики дьнда дьчу. Һьнге Хԝәде кʹәрәмәт кьр. Әԝи ӧса кьр ԝәки мәʹсийе мәзьн, демәк һʹут, Уньс даԛӧрчʹанд. Чахе Уньс зьке мәʹсида бу, әԝи Йаһоԝарʹа дӧа кьр у Йаһоԝа ӧса кьр, ԝәки мәʹси кьрә һоԛин у Уньс авитә дәве бәʹре. Һьнге Уньс ида һазьр бу бьԛәдинә әԝ шьхӧле кӧ Хԝәде ԝирʹа дабу.

Паши ԝе йәке чахе Хԝәде дәрс да Уньс у һин кьр кӧ әԝ гӧһдар бә, Уньс диса шаши бәрʹда. Әԝи мәрьвед Нинәԝайерʹа ԛьрара Хԝәде әʹлам кьр, ԝана гӧһдари кьр у тʹобә кьр. Һьнге ԛә Уньс хԝәш нәһат, кӧ чьрʹа Йаһоԝа һьндава ԝан дьлрʹәʹм бу, бахшандә ԝан у әԝана щәза нәкьрьн. Чахе һун әве кʹьтеба һʹәԝас бьхуньн, һуне бьвиньн ԝәки ча Йаһоԝа кʹәрәмәта дӧда кьр у бь ве йәке Уньс һин кьр дьлрʹәʹм бә.