Чьлә

Чахе Муса нәфәре сәрԝере Мьсьре бу, һьнге әԝ йәки шкәсти нибу. Әԝ ӧса зу һерс дькʹәт, ԝәки һәла һе жи мәрьвәк кӧшт, сәр кʹижани дьфькьри кӧ нәһәԛийе дькә. Муса тʹьре Йаһоԝа ԝе әԝан кьред ԝи бәгәм кә. Ле бь рʹасти Йаһоԝа 40 сала али Муса дькьр, ԝәки әԝ фәʹм кә кӧ жерʹа хенщи мерхасийе ӧса жи шкәстибун лазьм ә, сәва рʹебәрийа Исраеле бькә. У сәва әԝ бьбуйа мәрьвәки шкәсти, әԝ гәрәке ӧса жи мьлук, гӧһдар у нәрм буйа. Муса бь рʹасти һатә гӧһастьне у бу рʹебәрәки гәләк баш (Дәркʹ. 2:11, 12; Кʹар. Шанд. 7:21-30, 36). Иро малхед мале у рʹуспи гәрәке чʹәʹв бьдьнә Муса. Чахе кәсәк һьндава ԝә беԛәдьр ә, һерскʹәтьнеда ләз нәкʹәвьн. Ӧса жи бь мьлукти шашийед хԝә биньн сәр хԝә (Ԝаиз 7:9, 20). Гӧрʹа рʹебәрийа Йаһоԝа бькьн чахе чәтьнайа сафи дькьн. У һәр гав бь нәрми щаба мәрьва бьдьн (Мәтʹлк. 15:1). Малхед мале у рʹуспийед кӧ ӧса дькьн, дьле Йаһоԝа ша дькьн, әʹдьлайе тиньн, у мәсәла баш дьһельн. ԝ19.02 8 ¶1; 10 ¶9-10

Дина хԝә бьдьне, мәʹни чь бу кӧ гӧне Иса ль ԝан мәрьва һат. Әԝи дит ԝәки әԝ мәрьв «мина пәзед бе шьван бун». Дьбәкә Иса дит кӧ һьнәк жь ԝан кʹәсиб ьн у хәбата гьран дькьн сәва әʹбура нәфәред хԝә бькьн. Һьнәк жи дьбәкә дьлшкәсти бун, чьмки мәрьвед хԝәйи незик ӧнда кьрьбун. Һәрге бь рʹасти нава ԝан мәрьвада йед ӧса һәбун, Иса дькарьбу ԝана рʹьнд фәʹм кьра, чьмки әԝ хԝәха рʹасти чәтьнайед ӧса дьһат. Иса бона ԝан мәрьва хәм дькьр, у әԝи бь дьл дьхԝәст дьлбинийе бьдә ԝан (Иша. 61:1, 2). Әм жь мәсәла Иса чь һин дьбьн? Дор бәре мә жи мәрьв «мина пәзед бе шьван» ьн у гәләк проблемед ԝан һәнә. Ԝанрʹа лазьм ә әԝ йәк, чь кӧ бал мә һәйә, демәк мьзгинийа Падшатийе (Әʹйан. 14:6). Ләма әм чәв дьдьнә Ахайе хԝә, кӧ әм ԝанрʹа мьзгинийе бәла дькьн, чьмки дьле мә сәр «бетʹаԛәт у кʹәсиба дьшәԝьтә» (Зәб. 72:13). Гӧне мә ԝан мәрьва те, у әм дьхԝазьн чьԛас дькарьн али ԝан бькьн. ԝ19.03 21-22 ¶6-7

Гәләк мәʹнийед мә һәнә, кӧ Йаһоԝа һʹьз бькьн. Хенщи кӧ әԝ һәр рʹож тьштед баш дьдә мә сәва әм ша бьн, әԝ ӧса жи дәрһәԛа хԝә у ԛьрара хԝә рʹастийе мә һин дькә (Йуһʹн. 8:31, 32). Әԝи щьвата Мәсиһити дайә мә, сәва рʹебәрийе мә бькә у аликʹарийе бьдә мә. Әԝ ӧса жи али мә дькә, ԝәки әм бәр чәтьнайа тәйах кьн, у һевийе дьдә мә кӧ әм бьжин һʹәта-һʹәтайе сәр әʹрде (Әʹйан. 21:3, 4). Чахе әм дьфькьрьн кӧ Йаһоԝа ча әйан дькә, ԝәки әԝ мә һʹьз дькә, дьле мә бь һʹьзкьрьне тʹьжи дьбә. У чахе әм Йаһоԝа һʹьз дькьн, әм һин дьбьн тьрса рʹаст нав хԝәда пешда биньн. Әм дьтьрсьн ԝәки дьле Ԝи кәси нәешиньн, кʹижани әм зәʹф һʹьз дькьн, демәк дьле Йаһоԝа. Һәрге һун тʹьме бьфькьрьн, кӧ чаԝа рʹебәрийа Йаһоԝа ԝәрʹа кʹаре тинә, һʹьзкьрьна ԝә һьндава ԝи у принсипед ԝи ԝе һе мәзьн бә. Паше чь жи Шәйтʹан бькә, һуне хьзмәтийа хԝә Йаһоԝарʹа, нәдьнә сәкьнандьне. Бьдьнә бәр чʹәʹве хԝә әʹмьре паши һʹәзар сали. Һуне фәʹм бькьн, ԝәки сафикьрьна ԝә кӧ бенә ньхӧмандьне, әʹмьре ԝәда сафикьрьнәкә лапә баш бу! ԝ19.03 6 ¶14; 7 ¶19

Чахе нәфәр һәв ԛимәт дькьн у рʹазибуна хԝә дьдьнә кʹьфше, әԝана бәхтәԝар дьбьн. Мер у жьн чьԛас зәʹф шьхӧлед һәв дьшекьриньн, һаԛас әԝана һе зәʹф незики һәв дьбьн. Әԝ йәк ӧса жи али ԝан дькә, кӧ шашийед һәв бьбахшиньн. Мер кӧ жьна хԝә ԛимәт дькә, нә тʹәне дина хԝә дьдә гьлийед ԝейә баш йан кьред ԝе, ле ӧса жи «пәсьне ԝе дьдә» (Мәтʹлк. 31:28). У жьна сәрԝахт жи мере хԝәрʹа дьдә кʹьфше, кӧ бона чь әԝ ԝи ԛимәт дькә у жь ԝи рʹази йә. Де-бавно, һун ча дькарьн зарʹед хԝә һин кьн ԝәки шекьрдар бьн? Бир нәкьн, ԝәки зарʹед ԝә хәбәрданеда у шьхӧлада чʹәʹв дьдьнә ԝә. Ләма жи мәсәла баш бьн бона ԝан, у чахе әԝана бона ԝә тьштәки дькьн, бежьн кӧ һун жь ԝан рʹази нә. Ӧса жи заред хԝә һин кьн, ԝәки бежьн зәʹф рʹази мә, чахе кәсәк бона ԝан тьштәки дькә. Али зарʹа бькьн, ԝәки фәʹм кьн кӧ әԝана гәрәке жь дьле хԝә шекьрдар бьн у кӧ гьлийед ԝани рʹазибуне дькарьн гәләк кʹаре бьдьнә мәрьва. ԝ19.02 17 ¶14-15

Әԝ гьли әшкәрә дьдьнә кʹьфше, ԝәки рʹаст ә Шәйтʹан бӧхдан авитә Ибо, ле Ибо мьԛәрм хԝә ль беԛьсуртийа хԝә дьгьрт. Әм жи дькарьн ве йәкеда чʹәʹв бьдьнә ԝи. Шәйтʹан әԝан бӧхдана давежә һәр кәси. Ле чь щурʹәйи? Әԝ дьбежә ԝәки һун бь рʹасти Йаһоԝа Хԝәде һʹьз накьн, һуне тәнгасийада жерʹа хьзмәт нәкьн, у кӧ беԛьсуртийа ԝә ԛәлп ә (Иб. 2:4, 5; Әʹйан. 12:10). Һун чь сәр хԝә тʹәхмин дькьн жь бо ван бӧхдана? Әԝ йәк дьле ԝә дешинә, ӧса нинә? Ле һәла бьфькьрьн дәрһәԛа ве йәке: Йаһоԝа ӧса итʹбарийа хԝә ԝә тинә, кӧ мәщаләкә мәхсус дьдә ԝә. Әԝ дьһелә ԝәки Шәйтʹан беԛьсуртийа ԝә бьщерʹьбинә. Ле Йаһоԝа дӧдьли набә кӧ һун дькарьн беԛьсуртийа хԝә хԝәй кьн, у избат кьн кӧ Шәйтʹан дәрәԝин ә. У Йаһоԝа соз дьдә, кӧ ве йәкеда ԝе али ԝә бькә (Ибрн. 13:6). Бьдьнә һʹәсабе хԝә әԝ ԛәдьрәки чьԛас мәзьн ә, кӧ Хԝәйе тʹәмамийа гәрдуне итʹбарийа хԝә мә тинә! Һун дьвиньн чьԛас фәрз ә беԛьсур бьн? Чахе әм беԛьсур дьминьн, әм әшкәрә дькьн кӧ Шәйтʹан дәрәԝин ә у әм наве Баве хԝәйи ԛәнщ пироз дькьн у пьштгьрийа щурʹе сәрԝертийа ԝи дькьн. ԝ19.02 5 ¶9-10

Иса готә шандийед хԝә, кӧ әԝана ԝе рʹасти тәнгасийа бен. Паше әԝи дина ԝан да сәр мәсәла хԝә у готә ԝан «мерхас бьн» (Йуһʹн. 16:1-4а, 33). Гәләк сал дәрбаз бун, шагьртед Иса диса жи чʹәʹв дьданә ԝи, кӧ кʹара хԝә нәдьгәрʹийан у мерхас бун. Ԝана али һәвдӧ дькьр һьнге жи, гава хԝәха дькарьбун зьраре кʹәтана (Ибрн. 10:33, 34). Иро әм жи мерхасийеда чʹәʹв дьдьнә Иса. Бәʹса хәбәре мәрʹа мерхаси лазьм ә сәва али ԝан хушк-бьра бькьн, йед кӧ бона баԝәрийа хԝә тенә зерандьне. Щара дьԛәԝьмә кӧ хушк-бьред мә бь нәһәԛи дькьнә кәле. Ԝи ԝәʹдәйи әм гәрәке чь дәсте мә те, бона ԝан бькьн, демәк ӧса жи ԝана бәр диԝане бьпарезьн (Фили. 1:14; Ибрн. 13:19). Әм ӧса жи мерхасийе дьдьнә кʹьфше, гава бәрдәԝам дькьн бь «меркʹими» мьзгинийе бәла дькьн (Кʹар. Шанд. 14:3). Һәрге жи мәрьв мьԛабьли мә нә у пәй мә дькʹәвьн, йәкә әм мина Иса бәрдәԝам дькьн мьзгинийа Пʹадшатийе бәла кьн. ԝ19.01 22-23 ¶8-9

Чь ԝе али ԝә бькә, кӧ пе щабед хԝә хушк-бьра дьлгәрм кьн? Тьште лапә фәрз әԝ һәйә бона щьвата һазьр бьн. Чахе һун пешда хԝә рʹьнд һазьр кьн, һуне хԝәда һе баԝәр бьн у кем бьтьрсьн кӧ щаба хԝә бьдьн (Мәтʹлк. 21:5). Ле чь дькʹәвә нава һазьркьрьне? Пешийа кӧ дәстпекьн хԝә һазьр кьн, дӧа бькьн Йаһоԝарʹа, ԝәки рʹӧһʹе хԝәйи пироз бьдә ԝә (Луԛа 11:13; 1 Йуһʹн. 5:14). Паше, чәнд дәԛа кʹьфш кьн, ԝәки бь тʹәмами дәрсе бьньһерʹьн, демәк нава, бьнсәрийа, шькла, чаргоша у пьрсед ԝәкʹьландьне. Чахе һун һәр абзасәке һазьр дькьн, чьԛас дькарьн һʹәму рʹеза бьхуньн. Һун чь жи дьхуньн, сәр бьфькьрьн, у дина хԝә бьдьн сәр фькьред кӧ һун дьхԝазьн щаба хԝә бьдьн. Һун чьԛас хԝә рʹьнд һазьр кьн, һуне һаԛас кʹаре бьстиньн у ԝәрʹа ԝе даһа һеса бә щаба хԝә бьдьн (2 Корн. 9:6). ԝ19.01 9 ¶6; 11-12 ¶13-15

Йаһоԝа Һәбаԛуԛрʹа гот, ԝәки дәрһәԛа ве тәнгасийа хԝә бьньвисә, чьмки бь ве йәке Йаһоԝа дьхԝәст мә һин кә, әве дәрса фәрз: Әм гәрәке нәтьрсьн дәрһәԛа хәмед хԝә у дӧдьлибуна хԝә Жерʹа гьли кьн. Бь рʹасти Йаһоԝа хԝәха мә тʹәглиф дькә, кӧ дӧада дьле хԝә жерʹа вәкьн (Зәб. 50:15; 62:8). Һәбаԛуԛ итʹбарийа хԝә Йаһоԝа дьани, чаԝа Дост у Баве хԝә у незики ԝи дьбу. Әԝ нәдькʹәтә һәма тʹәне дәрде хԝә у нә жи итʹбарийа хԝә һʹьше хԝә дьани. Дәԝсе, әԝи дәрд-кӧла хԝә дӧада Хԝәдерʹа гьли кьр, у ве йәкеда әԝи мәсәла баш мәрʹа һиштийә. Йаһоԝа, йе кӧ дӧа дьбьһе, дьхԝазә, ԝәки әм итʹбарийа хԝә ԝи биньн у дӧада хәмед хԝә жерʹа гьли кьн (Зәб. 65:2). Һәрге әм ӧса бькьн, әме бьвиньн чаԝа Йаһоԝа щаба дӧайед мә дьдә. Ӧса әме хԝә һʹәмеза ԝида тʹәхмин кьн, кӧ әԝ ча бәр дьле мәда те у рʹебәрийе дьдә мә (Зәб. 73:23, 24). Фьрԛи тʹӧнә әм кʹижан чәтьнайеда бьн жи, әԝ ԝе али мә бькә кӧ әм фәʹм кьн, ԝәки әԝ ча дьньһерʹә сәр дәрәща мә. Гава әм бь дьл Йаһоԝарʹа дӧа дькьн, бь ве йәке әм нишан дькьн, ԝәки баԝәрийа хԝә ԝи тиньн. ԝ18.11 13 ¶2; 14 ¶5-6

Даԝьд тʹәне тʹәви йед ԝәкә хԝә һәвалти нәдькьр. Те бира ԝә бона ԝи һәваләки лапи баш кʹе бу? Наве ԝи Йонатʹан бу. Һәвалтийа ԝан йәк жь һәвалтийед лапи баш ә, кӧ Кʹьтеба Пирозда ньвисар ьн. Ле ԝә заньбу ԝәки Йонатʹан ԝәкә 30 сали жь Даԝьд мәстьр бу? Ле гәло чьрʹа әԝана һәвалед ӧса баш бун? Чьмки әԝана һәрдӧ жи Хԝәде баԝәр дькьрьн, ԛәдьре һәвдӧ дьгьртьн у мерхасийа һәвдӧ дьдитьн гава тʹәви дьжмьнед Хԝәде шәрʹ дькьрьн (1 Сам. 13:3; 14:13; 17:48-50; 18:1). Мина Даԝьд у Йонатʹан, әм жи ша дьбьн, гава тʹәви ԝан мәрьва һәвалтийе дькьн, йед кӧ Йаһоԝа һʹьз дькьн у баԝәрийа хԝә ԝи тиньн. Киера, йа кӧ гәләк сал ә Хԝәдерʹа хьзмәт дькә, дьбежә: «Мьн хԝәрʹа нав тʹәмамийа дьнйайеда һәвал дитьнә, йед кӧ жь щурʹә-щурʹә мьләта нә у әʹдәтед ԝан щурʹә-щурʹә нә». Чахе һун жи ӧса бькьн, һуне әшкәрә бьвиньн кӧ чаԝа Кʹьтеба Пироз у рʹӧһʹе пироз мә дькә малбәтәкә ԛәԝи. ԝ18.12 26 ¶11-13

Гьли «ԛави» те һʹәсабе гӧнед сексуали ортʹа ԝан, йед кӧ тʹәви һәв зәԝащеда ниньн, мәсәлә бенамуси, һәләԛәтийа сексуали ортʹа мәрьвед кӧ зәԝащеда ниньн, һомосексуали, у һәрʹьмандьна тʹәви һʹәйԝана. Бәʹса хәбәре, һәрге мере зәԝьщи бенамусийе дькә, жьна ԝи дькарә сафи кә йан жь ԝи бьԛәтә йан нәԛәтә. Ле дина хԝә бьдьне, Иса нә гот кӧ һәрге жьн йан мере кәсәки бенамусийе бькә, әԝ гәрәке же бьԛәтә. Мәсәлә, жьн дьбәкә сафи кә, ԝәки зәԝаща хԝә хԝәй кә у жь мере хԝә нәԛәтә. Дьбәкә әԝ диса жи ԝи һʹьз дькә, у һазьр ә бьбахшинә ԝи у тʹәви ԝи зәԝаща хԝә ԛәԝи кә. Ле һәрге әԝ жь ԝи бьԛәтә у мер нәкә, әԝ ԝе рʹасти чәтьнайа бе. Мәсәлә, әԝе ча әʹбура хԝә бькә у һʹәԝщед сексуалида ԝе ча бә? Әԝе бькарьбә тʹәне бьминә? Әԝ йәк ԝе ча сәр зарʹа һʹӧкӧм бә? (1 Корн. 7:14) Бәле, әшкәрә йә жьна бемер йан мере бежьн, ԝе рʹасти чәтьнайед мәзьн бе. ԝ18.12 12 ¶10-11

Хьраби бәр чʹәʹве Йаһоԝа рʹәш ә (Иша. 61:8). Әԝ занә ԝәки әм гӧнәкʹар ьн у ләма мәрʹа һеса нинә хԝә жь хьрабийе дур бьгьрьн. Ле йәкә әԝ дьхԝазә, ԝәки әм чʹәʹв бьдьнә ԝи, у хьрабийе нәфьрʹәт кьн. Чахе әм бьфькьрьн кӧ чьрʹа хьраби бәр чʹәʹве Йаһоԝа рʹәш ә, әме жи мина ԝи сәр ве йәке бьньһерʹьн, у ԛәԝате бьстиньн сәва хԝә жь һәр нәрʹастийе дур бьгьрьн. Һәрге әм сәр хьрабийе пе чʹәʹве Йаһоԝа бьньһерʹьн, әԝ йәк ԝе али мә бькә тедәрхьн ԝан тьштед нәрʹаст жи, дәрһәԛа кʹижана Кʹьтеба Пирозда рʹастә-рʹаст найе готьне. Мәсәлә, иро ве дьнйайеда гәләк бәлабуйи йә рʹәԛаса сәр чокед мәрьва, чь кӧ бенамуси, робәти у һʹәрам ә. Һьнәк хԝә һәԛ дәрдьхьн дьбежьн, кӧ нә әԝ һәма секс нинә. Ле гәло Йаһоԝа жи ӧса дьньһерʹә сәр ве йәке? На! Бәр чʹәʹве Йаһоԝа һәр хьраби рʹәш ә. Ләма ԝәрә әм жи жь һәр хьрабийе дур бьн, хԝәгьрти бьн у нәфьрʹәт кьн ԝан тьшта чь кӧ Йаһоԝа хԝәш найен (Рʹом. 12:9). ԝ18.11 25 ¶11-12

Паԝлосе шанди нәʹмед хԝәда се щара бәʹса ве рʹезе кьр (Рʹом. 1:17; Галт. 3:11; Ибрн. 10:38). Чь тәнгаси жи рʹасти мә бен, һәрге әм баԝәрийа хԝә Йаһоԝа биньн у жерʹа амьн бьминьн, әме бьвиньн ча созед Йаһоԝа тенә сери. Йаһоԝа дьхԝазә ԝәки чʹәʹве мә сәр ве ахьрийа баш бә, кӧ һивийа мә йә. Әм рʹожед ахьрийеда дьжин, у кʹьтеба Һәбаԛуԛ дәрсәкә ԛәԝи дьдә мә. Йаһоԝа жийина һʹәта-һʹәтайе соз дьдә һәр мәрьвәки рʹаст, йе кӧ итʹбарийа хԝә ԝи тинә. Ԝәрә әм бәрдәԝам кьн һәр щурʹә чәтьнайи у тәнгасийеда, баԝәри у итʹбарийа хԝә һьндава Хԝәде ԛәԝи кьн. Йаһоԝа бь сайа кʹьтеба Һәбаԛуԛ мәрʹа дьбежә, ԝәки Әԝ ԝе али мә бькә у мә хьлаз кә. Әԝ бь нәрми һиви мә дькә, ԝәки әм бь сәбьр һивийа ԝәʹде ԝийи кʹьфшкьри бьн, гава тʹәмамийа әʹрде бьн Пʹадшатийа ԝида, бь хьзмәткʹаред бәхтәԝар у мьлук тьжи бә (Мәт. 5:5; Ибрн. 10:36-39). ԝ18.11 16-17 ¶15-17

Ԛьрʹна йәкеда һьнә мәрьвед кӧ һинкьрьнед Иса ԛәбул кьрьн, паше ида рʹастийеда нәдьчун у расти фьрʹотьн. Мәсәлә, чахе щарәке Иса бь кʹәрәмәт әʹлаләтәкә мәзьн тʹер кьр, әԝ әʹлаләт паше пәй ԝи чу һʹәта алийе дьнә йа Бәʹра Щәлиле. Ԝедәре Иса тьштәки ӧса гот, кӧ әԝана мәтʹал ман. Әԝи гот: «Һʹәта кӧ һун бәдәна Кӧрʹе Инсан нәхԝьн у хуна ԝи вәнәхԝьн, жийине нава ԝәда тʹӧнәбә». Ԝана дәԝса кӧ жь Иса бьпьрсийана, кӧ бь ԝан гьлийа әԝи чь дьхԝәст бьгота, әԝана жь бо гьлийед ԝи лькʹӧмин у готьн: «Әв чь хәбәрнә гьран ьн! Кʹи дькарә гӧһдарийа готьнед ԝи бькә?» Ахьрийеда, «шагьртед ԝи гәләк пашда чун у иди тʹәви ԝи нәдьгәрийан» (Йуһʹн. 6:53-66). Сәд һʹәйф иро һьнә мәрьва пьшта хԝә данә рʹастийе. Һьнәк лькʹӧмин, чьмки хәйдин жь бьраки навдар, сәва гьли йан кьре ԝи. Ле һьнәк жи хәйдин, чьмки ԝанрʹа ширәт сәр һʹиме Кʹьтеба Пироз һатә дайине, йан жи әԝана жь рʹастийе чун, чьмки щьватеда ортʹа ԝан у кәсәкида дәʹԝ-доз пешда һат. ԝ18.11 9 ¶3-5

Щара әм бь тʹәмами фәʹм накьн ԝан гӧһастьна, кӧ тʹәшкиләта Хԝәдеда тенә кьрьне. Һәрге ӧса нә, ԝе баш бә әм бьфькьрьн, кӧ чаԝа бәре Мәсиһ рʹебәри дькьр. Чаԝа ԝәʹде Йешу у ԛьрʹна йәкеда жи, Мәсиһ тʹьме рʹебәрийед билан дьдә, сәва щьмәʹта Хԝәде хԝәй кә, баԝәрийа ԝан ԛәԝи кә, у йәкти нав ԝанда ӧнда нәбә (Ибрн. 13:8). Рʹебәрийед кӧ «хӧламе амьн у сәрԝахт» мәрʹа дьдә, әʹйан дькьн, кӧ Иса ча бона рʹӧһʹанийа мә хәм дькә (Мәт. 24:45). Бәле, чахе әм дьвиньн, Иса ча рʹебәрийе мә дькә, әм фәʹм дькьн ԝәки әԝ али мә дькә, сәва әм баԝәрийеда ԛәԝи бьн. Мәсиһ ӧса жи али мә дькә, ԝәки һʹьш-аԛьле мә сәр бәлакьрьна мьзгинийе бә, демәк сәр ԝи шьхӧле һәри мәзьн у фәрз, кӧ нав дьнйайеда те кьрьне (Марԛ. 13:10). ԝ18.10 25 ¶13-16

Мәсәла лапә баш кӧ ча хԝәгьртьне нишан кьн, чахе кәсәк һерса мә тинә, 2 Самуйел 16:5-13-да ньвисар ә. Даԝьд у бәрдәстийед ԝи сәбьр кьрьн, гава Шимәи мәрьве Шаԝул Падша, әԝана беһӧрмәт кьрьн у мьԛабьли ԝан дәркʹәт. Рʹаст ә ԛәԝата Даԝьд һәбу ԝәки ԝи бьдә сәкьнандьне, ле йәкә әԝи бәр ве йәке тәйах кьр. Ле чь али Даԝьд кьр ԝәки әԝи хԝә гьрт у һерса хԝә тәмьранд? Дәстпека Зәбура сьсийа дьдә кʹьфше, ԝәки Даԝьд әԝ Зәбур һьнге ньвисийә, чахе «жь бәр кӧре хԝә Абшалом рʹәви». Рʹеза 1 у 2 әʹйан дькә ԛәԝьмандьнед жь кʹьтеба 2 Самуйел сәре 16. Паши ԝан рʹеза Зәбур 3:4-да Даԝьд итʹбарийа хԝә һьндава Хԝәде дьдә кʹьфше: «Мьн дәнг һьлда, ль Хӧдан кьр гази, Әԝи щаб да». Бәле, әм жи дькарьн Хԝәдерʹа дӧа бькьн, чахе кәсәк мьԛабьли мә дәрте. Һьнге Йаһоԝа рʹӧһʹе хԝәйи пироз дьдә мә, сәва әм бькарьбьн бәр ве йәке тәйах кьн. Бьфькьрьн, һәла кʹижан дәрәщада ԝәрʹа лазьм ә һе зәʹф хԝә бьгьрьн, йан жи бь дьл бьбахшиньн ԝан, кʹе һьндава ԝә һʹәмде хԝә нәһәԛи дькә? Һун баԝәр ьн ԝәки Йаһоԝа дьвинә әԝе нәһәԛийе, у ԝе әʹсә али ԝә бькә у ԝә кʹәрәм кә? ԝ18.09 6-7 ¶16-17

Чахе әм шәʹдәтийе дьдьн, фәрз ә әм тʹьме фькьред мәрьва һьлдьн һʹәсаб у һьндава ԝанда бь ԛәдьр бьн. Сәва ве йәке лазьм ә әм мәрьвед мьһала хԝәда рʹьнд нас бькьн. Бир нәкьн кӧ чахе әм дьчьн мал бь мал хьзмәт кьн, мәрьв һивийа мә ниньн. Ләма жи чьԛас фәрз ә, ԝәки һьнге һәрʹьнә мала ԝан, чахе әԝана ԝе һазьр бьн гӧһ бьдьн (Мәт. 7:12). Мәсәлә, дьбәкә мьһала ԝәда мәрьв Шәми у Ләʹде һʹьз дькьн гәләк разен. Һьнге һун дькарьн шәбәԛе дәстпекьн дәрва хьзмәт бькьн, йан щийед кӧ гәләк мәрьв топ дьбьн, йан жи һәрьн сәрледана дӧбарә бькьн, кʹижан кӧ һун заньн, ԝәки әԝана рʹазайи нибьн у ԝе бькарьбьн гӧһ бьдьнә ԝә. Гәләк мәрьв бәтал ниньн, чьмки шьхӧлед ԝан зәф ә. Ләма жи ԝе баш бә һун дәстпекеда хәбәрдана хԝә зу хьлаз кьн (1 Корн. 9:20-23). Чахе мәрьв дьвиньн кӧ әм дькʹәвьнә һʹәйра ԝан, чьмки гәләк шьхӧлед ԝан һәйә, әԝана ԝе щарәкә дьн диса гӧһ бьдьнә мә. Бәре рʹӧһʹе Хԝәдейи пироз гәрәке хьзмәтийа мәда әшкәрә бе кʹьфше. Гава әм ве йәке нишан дькьн, әм дьбьнә һәвалхәбаткʹаред Хԝәде. Йаһоԝа һәла һе жи бь аликʹарийа мә дькарә мәрьва бинә сәр рийа рʹастийе (1 Корн. 3:6, 7). ԝ18.09 32 ¶15-17

Һәрге әм шкәсти нә, әм ча дькарьн бәхтәԝар бьн? Мәрьвед кӧ рʹастийе педьһʹәсьн, тенә гӧһастьне. Пешийа ве йәке, дьбәкә әԝана һерс, шәрʹуд у сәрт бун, ле ньһа әԝана «мәрьве ну» ль хԝә кьрьнә у «дьлшәԝатийе, ԛәнщийе, мьлуктийе, бәрбьһерийе у сәбьре» дьдьнә кʹьфше (Колс. 3:9-12). Ләма әԝана әʹдьлайеда ньн, һәләԛәтийа баш тʹәви мәрьва хԝәй дькьн у бәхтәԝар ьн. Хенщи ве йәке, Хәбәра Хԝәде соз дьдә ԝан мәрьва, ԝәки «дьнйайе пʹара ԝан бә» (Зәб. 37:8-10, 29). Ле чь щурʹәйи «дьнйайе пʹара» шкәстийа бә? Дьнйа ԝе бьбә пʹара Мәсиһийед бьжарти, чахе әԝана сәрԝертийа әʹрде бькьн чаԝа пʹадша у кʹаһин (Әʹйан. 20:6). Бь милйона мәрьвед дьн кӧ ԝе сәр әʹрде бьжин, дьнйа ԝе пʹара ԝан бә жи бь ԝи щурʹәйи, кӧ ԝе сәр әʹрде һʹәта-һʹәтайе бьжин. Әԝана ԝе беԛьсур бьн, у әʹдьлайе у бәхтәԝарийеда бьжин. ԝ18.09 19 ¶8-9

Ве йәкеда Йаһоԝа хԝәха мәсәләкә баш һиштийә (Дәстп. 18:32; Йешу 10:14). Бьфькьрьн кӧ әм чь дькарьн һин бьн жь ве дәрәще, йа кӧ ньвисар ә кʹьтеба Дәркʹәтьнда 32:11-14. Йаһоԝа мәщал да Муса ԝәки фькьред хԝә бежә, ле Әԝи дькарьбу нәһишта жи. Ле һуне бькарьбьн гӧһ бьдьнә фькьред ԝи мәрьви, кʹижан кӧ ньһерʹандьна нәрʹаст да кʹьфше, у паше жи пәй гьлийед ԝи һәрьн? Йаһоԝа йәкә тʹьме бь сәбьр  гӧһ дьдә ԝан мәрьва, йед кӧ бь баԝәрийе жера дӧа дькьн. Ԝе баш бә һәр кәс хԝә бьщерьбинә у ԝан пьрса бьдә хԝә: «Һәрге Йаһоԝа хԝә мьлук дькә һьндава щьмәʹта хԝә у гӧһ дьдә ԝан, мәсәлә чаԝа әԝи гӧһ дьда Бьраһим, Раһел, Муса, Йешу, Маноаһ, Елйас у Һьзԛийа, ле әз гәрәке ӧса нәкьм? Әз ча дькарьм һе зәʹф ԛәдьре хушк-бьред хԝә бьгьрьм, ԝана ԛимәт кьм, гӧһ бьдьмә фькьр у ширәтед ԝан, у һәла һе жи ширәтед ԝани баш биньм сери? Щьвата хԝәда йан жи малбәтеда, лазьм ә әз һе зедә дина хԝә бьдьмә сәр кʹе? Әз чь гәрәке бькьм бона ԝан?» (Дәстп. 30:6; Һʹакьм. 13:9; 1 Пʹадш. 17:22; 2 Дир. 30:20) ԝ18.09 6 ¶14-15

Һеса нинә ве дьнеда мәрʹд бьн, чьмки мәрьв дор бәре мә тʹәне дәрһәԛа хԝә дьфькьрьн. Ле Иса гот ԝәки дӧ тʹәмийед һәри мәзьн әԝ ьн, кӧ Йаһоԝа бь тʹәмамийа дьле хԝә, щанийа хԝә, һʹьше хԝә у ԛәԝата хԝә һʹьз бькьн, у ӧса жи һәвале хԝә ԝәкә хԝә һʹьз бькьн (Марԛ. 12:28-31). Әԝед кӧ Йаһоԝа һʹьз дькьн, чʹәʹв дьдьнә ԝи. Йаһоԝа у Иса мәрʹд ьн, у әԝана мә жи һелан дькьн кӧ мәрʹд бьн, чьмки әԝ йәк мә бәхтәԝар дькә. Һәрге әм һьндава Хԝәде у һьн жи һьндава мәрьва бь дьл мәрʹд бьн, әме шькьрийе бьдьнә Йаһоԝа у ча хԝәрʹа ӧса жи мәрьварʹа кʹаре биньн. Бешьк, һун ида мәрʹданийе дьдьнә кʹьфше, илаһи хушк-бьрара (Галт. 6:10). Һәрге һун бәрдәԝам кьн ӧса бькьн, мәрьв ԝе жь ԝә рʹази бьн у ԝә һʹьз бькьн, у ахьрийеда һуне бәхтәԝар бьн. ԝ18.08 22 ¶19-20

Йаһоԝа тӧ раса, мьләт, бәрәк йан жи зьман, башԛә накә. Әԝ һәр мәрьви ԛәбул дькә, кʹижан кӧ хԝәдехоф ә у тьштед рʹаст дькә  (Галт. 3:26-28; Әʹйан. 7:9, 10). Әԝ йәк бона мә тьштәки тʹәзә нинә. Ле дьԛәԝьмә һун ԝәлатәки йан жи маләкә ӧсада мәзьн бунә, кʹидәре кӧ фьрԛийе дькьнә ортʹа мәрьва. Дьбәкә һун дьфькьрьн, ԝәки һун мәрьва башԛә накьн, ле тедәрнахьн кӧ әԝ ньһерʹандьна нәрʹаст кʹур нава ԝәда майә. Биньн бира хԝә, Пәтрус мәрьварʹа әʹйан кьр, ԝәки Йаһоԝа фьрԛийе накә ортʹа мәрьва. Әԝ йәк бона Пәтрус ԛәдьрәки мәзьн бу, ле һәла һе әԝи жи щарәке дӧрʹути кьр (Галт. 2:11-14). Ле чаԝа нәкʹәвьнә ве тʹәльке кӧ анәгори дитьна чʹәʹвед хԝә диԝане нәкьн? Сәва тедәрхьн һәла әм фьрԛийе дькьнә нава мәрьва йан на, әм гәрәке ль гора Хәбәра Хԝәде хԝә кʹур бьщерʹьбиньн (Зәб. 119:105). Әм ӧса жи дькарьн жь һәвала йан жь ԝан кʹе мә рʹьнд нас дькә, бьпьрсьн һәла нав мәда һәйә тьштәки ӧса, кӧ әм хԝәха навиньн (Галт. 2:11, 14). Щара ӧса дьԛәԝьмә кӧ әԝ фькьр кʹур нав мәда ӧса рʹуньштьнә, ԝәки әм нә жи һаш пе һәнә. ԝ18.08 9 ¶5-6

Хԝә бьпьрсьн: «Гәло мәрьварʹа әʹйан ә ԝәки әз бь тʹәмами Йаһоԝарʹа амьн ьм? Гәло әз фьрнаԛ дьбьм гава дьвежьмә мәрьва кӧ әз Шәʹде Йаһоԝа мә?» Дьле Йаһоԝа ԝе бешә һәрге паши ԝе йәке чахе әԝи әм бьжартьн ча щьмәта хԝә, әм шәрм бькьн мәрьварʹа бежьн кӧ әԝ хԝәйе мә йә (Зәб. 119:46; Марԛ. 8:38). Йазьх, ле һәла һе һьнә Шәʹдед Йаһоԝа жи чʹәʹв дьдьнә «рʹӧһʹе ве дьнйайе». Бона ԝе йәке зәлал ида найе кʹьфше фьрԛийа ортʹа хьзмәткʹаре Хԝәде у йе кӧ хьзмәткʹаре Хԝәде нинә (1 Корн. 2:12). Рʹӧһʹе ве дьнйайе мәрьва һелан дькә пәй «дьлһавьжийед бьнйата мәрьвайе» кʹәвьн (Әфәс. 2:3). Мәсәлә, рʹаст  ә гәләк ширәт мәрʹа тенә дайинә дәрһәԛа кʹьнщхԝәкьрьн у хәмьландьне, йәкә һьнәк диса жи нәщайиз хԝә дькьн. Әԝана кʹьнще тәнг у вәкьри хԝә дькьн, һәла һе сәр щьвате жи. Һьнәк жи пе пʹоре хԝә дина мәрьва дькʹьшиньнә сәр хԝә (1 Тимтʹ. 2:9, 10). Ләма жи чахе әԝана нав мәрьвада ньн, ида чәтьн ә тедәрхьн кӧ кʹе йә хьзмәткарʹе Йаһоԝа у кʹе йә һәвале дьнйайе (Аԛуб 4:4). ԝ18.07 24-25 ¶11-12

Әм һʹәму бьра нә, чьмки әм гьшк зӧрʹәта Адәм ьн (Кʹар. Шанд. 17:26). Ле нә тʹәне әԝ йәк мә дькә йәктийе. Иса шьровәкьр ԝәки шагьртед ԝи хушк-бьред һәв ьн, чьмки Йаһоԝа һʹәсаб кьрьнә ча Баве хԝәйи әʹзмана (Мәт. 12:50). Хенщи ве йәке, әԝана бунә нәфәред малбәта рʹӧһʹани, у һʹьзкьрьн у баԝәри ԝана дькә йәк. Ләма чахе шандийа нәʹмед хԝә дьньвисин, гәләк щар сәр шагьрта дьготьн «хушкбьрано» (Рʹом. 1:13; 1 Пәт. 2:17; 1 Йуһʹн. 3:13). Чахе Иса зәлал нишан кьр, ԝәки әм гәрәке һәвдӧ ча хушк-бьра һʹәсаб кьн, әԝи гот кӧ мьлукти гәләк фәрз ә (Мәт. 23:11, 12). Ԝәʹдәке тʹьфаԛа шандийа кем бу, чьмки ԛӧрʹәбуне рʹе ԝан дьгьрт. У һьнге ԛӧрʹәбуна бона мьләте хԝә жи, дькарьбу бьбуйа проблем. Щьһу дьԛәԝьмә фьрнаԛ дьбун бь ве йәке кӧ зӧрʹәтед Бьраһим бун у һʹәсаб дькьрьн, ԝәки әԝана жь йед майин баштьр ьн. Ле Йуһʹәннайе Ньхӧмдар готә ԝан: «Хԝәде жь ван кәвьра жи дькарә зарʹа Бьраһимрʹа дәрхә» (Луԛа 3:8). ԝ18.06 9-10 ¶8-9

Чахе тьштәк мә әʹщьз дькә, йан жи кьред кәсәки мә һерс  дьхьн, гәло әм дькарьн зьмане хԝә у һерса хԝә бьгьрьн? (Мәтʹлк. 10:19; Мәт. 5:22) Гава кәсәк һʹәмде хԝә дьле мә дешинә, әм гәрәке  «щи бьдьнә һерса» Йаһоԝа (Рʹом.  12:17-21). Һәрге чʹәʹве мә ль Йаһоԝа йә, әме ԛәдьре ԝи бьгьрьн бь ве йәке кӧ щи бьдьнә һерса ԝи, демәк бь сәбьр һивийе бьн һʹәта әԝ ԝәʹде лазьмда чәтьнайа мә сафи кә. Ле һәрге әм щурʹәки майин бькьн у һʹәйфе һьлдьн, әԝ ԝе бе һʹәсабе кӧ әм ԛәдьре Йаһоԝа нагьрьн. Чахе Йаһоԝа рʹебәрийед тʹәзә дьдә мә, гәло әм дәрберʹа пәй ԝан рʹебәрийа дьчьн? Һәрге әре, әме сәр хԝә итбар нибьн, у ӧса нәкьн чаԝа мә бәре дькьр. Әме дәрберʹа пәй рʹебәрийа тʹәзә һәрʹьн кӧ Йаһоԝа бь тʹәшкиләта хԝә дьдә мә (Ибрн. 13:17). Әме ӧса жи мьԛати хԝә бьн, ԝәки «жь ньвисаре дәрнәйен» (1 Корн. 4:6). Ӧса әме нишан кьн кӧ чʹәʹве мә сәр Йаһоԝа йә. ԝ18.07 15-16 ¶17-18

Чахе һун бьбьнә Мәсиһийед гьһишти, һуне фәʹм кьн ԝәки принсипед Хԝәде бона ԝә һе фәрз у ԛимәт ьн. Ԛанун бона дәрәщед конкрет ьн, ле принсип бона щурʹә щурʹә дәрәща дькарьн бьдьнә хәбате. Мәсәлә, һәрге щаһьл фәʹм накә кӧ чьԛас хоф ә тʹәви мәрьвед нәбаш һәвалтийе бькә, де-бавед сәрԝахт ԝе синора ԝирʹа дайньн ԝәки ԝи хԝәй кьн (1 Корн. 15:33). Ле гава зарʹ дьбә гьһишти, һʹьш-аԛьле ԝи те гӧһастьне у әԝ ида дькарә принсипед Кʹьтеба Пироз фәʹм кә у һьлдә һʹәсаб. Ӧса әԝ ԝе сафикьрьнед билани бькә кӧ һәвалед рʹаст хԝәра бьжберә (1 Корн. 13:11; 14:20). Чахе әм дьфькьрьн сәр принсипед Хԝәде, исафа мә дьбә рʹебәре һе рʹаст у баш, кʹижан кӧ ль гора ньһерʹандьна Хԝәде йә. Бал мә һʹәму тьшт һәйә чь кӧ лазьм ә сәва әм сафикьрьнед ӧса бькьн кӧ Йаһоԝа хԝәш тен. Ԛанун у принсипед жь Хәбәра Хԝәде, али мә дькьн «бона һʹәму кьрьнед ԛәнщ һазьр сәкьни» бьн (2 Тимтʹ. 3:16, 17). ԝ18.06 19 ¶14; 20 ¶16-17

Иса бь ве йәке нишан кьр ԝәки мәрьве Самәри дькарьбу Щьһуйа һин кьра, кӧ чаԝа һьндава һʹәму мәрьва һʹьзкьрьне бьдьнә кʹьфше (Луԛа 10:25-37). Шагьртед Иса сәва кӧ щабдарийа хԝә бь тʹәмами бьанийана сери, ԝана гәрәке ԛӧрʹәбун жь хԝә дурхьстана у фьрԛи нәкьрана ортʹа мәрьва. Иса пешийа кӧ бьчуйа сәр әʹзмана, тʹәми да ԝан ԝәки ль «тʹәмамийа Щьһустане, Самәрйайе у һʹәта сәре дьне жи» шәʹдәтийе бьдьн (Кʹар. Шанд. 1:8). Иса пешийа ве йәке ида бона ԝи шьхӧли әԝана һазьр кьрьбун. Әԝи дина ԝан дабу сәр хәйсәт-һʹӧнӧред баш нав мәрьвед жь мьләтед дьнда. Бәʹса хәбәре, әԝи пʹайе сәрсәде нәщьһу да, бона баԝәрийа ԝийә ԛәԝи (Мәт. 8:5-10). Иса ӧса жи шәһәре хԝә Ньсрәтеда шьровәкьр, кӧ чаԝа Йаһоԝа али хәриба кьр, мәсәлә аликʹари да жьнәбикә жь Сәрәптайе у Нәмане кʹоти жь Сурйайе (Луԛа 4:25-27). Һьн жи Иса нә кӧ тʹәне жьнькәкә Самәрирʹа мьзгини гьли кьр, ле әԝ дӧ рʹожа Самәрийайеда ма, чьмки дит ԝәки ԝедәре щьмәʹте дьхԝәст гӧһ бьдә мьзгинийа ԝи (Йуһʹн. 4:21-24, 40). ԝ18.06 10 ¶10-11

Паԝлосе шанди Мәсиһи бәрамбәри әскәра кьр, йед кӧ шәрʹда ньн. Бәле, әм бь рʹасти шәрʹе рʹӧһʹанида ньн, ле дьжмьнед мә реали нә. Шәйтʹан у щьнед ԝи шәрʹда щерʹьбанди у ԛәԝи нә. Аликива дькарә бе кʹьфше, ԝәки ԝи шәрʹида әм нькарьн сәркʹәвьн, илаһи Мәсиһийед щаһьл. Ле гәло щаһьл ԛә дькарьн ви шәрʹе тʹәви дьжмьнед зӧлмда сәркʹәвьн? Бь рʹасти әԝана дькарьн сәркʹәвьн у сәрдькʹәвьн жи! Ле чаԝа? Әԝана «йәктийа Хӧданда ԛәԝат» дьбьн, демәк ԛәԝате жь Хԝәде дьстиньн. Хенщи ве йәке, әԝана мина әскәред һинкьри, «һәр чʹәке Хԝәде» ль хԝә дькьн (Әфәс. 6:10-12). Чахе Паԝлос дәрһәԛа ве мәсәле хәбәр дьда, дьԛәԝьмә әԝи һьнге чʹәкед әскәред Рʹоме дьда бәр чʹәʹве хԝә (Кʹар. Шанд. 28:16). ԝ18.05 27 ¶1-2

Мәʹнийа лапә мәзьн кӧ чьрʹа әм шьхӧле бәлакьрьна мьзгинийе дькьн әԝ ә, кӧ бәр инсанәте пәсьн бьдьнә Йаһоԝа у наве ԝи пироз кьн (Йуһʹн. 15:1, 8). Ле бь рʹасти наве Хԝәде бь тʹәмами пироз ә, зедә әм нькарьн наве ԝи пироз кьн. Ле дина хԝә бьдьне, Ишайа пʹехәмбәр гот, кӧ әм гәрәке пирозийа Йаһоԝа ԛәбул кьн (Иша. 8:13). Әм наве Хԝәде пироз дькьн бь ԝе йәке, кӧ наве ԝи нава һʹәму навада башԛә дькьн у чахе али мәрьва дькьн, ԝәки әԝана жи ԛәбул кьн кӧ наве ԝи пироз ә. Бәʹса хәбәре, чахе әм дәрһәԛа һʹӧнӧред Йаһоԝа у ԛьрара ԝи һьндава инсанәте мәрьвара гьли дькьн, бь ве йәке избат дькьн, кӧ гьлийед Шәйтʹан дәрһәԛа Хԝәде дәрәԝ у ԛәлп ьн (Дәстп. 3:1-5). Ӧса жи, чахе әм мьһала хԝәда али мәрьва дькьн, ԝәки әԝана бьвиньн кӧ тʹәне Йаһоԝа һежа йә «рʹумәт, һӧрмәте у ԛәԝате» бьстинә, бь ве йәке жи әм наве ԝи пироз дькьн (Әʹйан. 4:11). ԝ18.05 18 ¶3-4

Мәʹнийа сәрәкә кӧ чьрʹа әм нетед рӧʹһʹани датиньн пешийа хԝә, әԝ ә, кӧ ӧса әм рʹазибуна хԝә Йаһоԝарʹа дьдьнә кʹьфше бона һʹьзкьрьн у кьред ԝи һьндава мә. Щаһьлно, бьфькьрьн дәрһәԛа һʹәму тьшта кӧ Йаһоԝа дайә ԝә. Әԝи әʹмьр, баԝәри, Кʹьтеба Пироз, щьват, у ӧса жи һевийа жийина һʹәта-һʹәтайе дайә ԝә. Чахе һун нетед рʹӧһʹани датиньн пешийа хԝә, һун бь ве йәке нишан дькьн, ԝәки ван кʹәрәмед Хԝәде дьшекьриньн у һун һе незики ԝи дьбьн. Чахе һун дьгьһижнә нетед рʹӧһʹани, һун бәр чʹәʹве Йаһоԝа шьхӧлед баш дькьн. Ԝи щурʹәйи һун һе незики ԝи дьбьн. Паԝлосе шанди гот: «Хԝәде сәр нәһәԛийе нинә, ԝәки кьред ԝә у әԝ һʹьзкьрьна кӧ ԝә бона наве ԝи да кʹьфше бир бькә» (Ибрн. 6:10). Сәва нетед рʹӧһʹани дайньн пешийа хԝә, нәфькьрьн кӧ һе зу йә. Ле нетед ԝәйә рʹӧһʹани һәнә кӧ һун дьхԝазьн бьгьһижьн? (Фили. 1:10, 11) ԝ18.04 26 ¶5-6

Щьмәʹта Империйа Ромеда, кʹидәре кӧ Мәсиһи жи дьжитьн, гәләк ԛӧрʹә дьбун чьмки ԝәлате ԝанда ԛанун, система һʹакьмтийе, у азайи һәбу. Ле йәкә һʹәчʹи зәʹф бь сайа хӧлама бу кӧ ԝәлат ӧса нав у дәнг бу. Ԝәʹдәке, ԝедәре жь бьнәлийа ԝәкә 30 сәләф хӧлам бун. Фәʹмдари йә, ԝәки щьмәʹта ԝедәре у ӧса жи Мәсиһи, гәләк щар дәрһәԛа азайе у хӧламтийе хәбәр дьдан. Паԝлос нәʹмед хԝәда гәләк щар бәʹса азайе дькьр. Ле нета ԝи әԝ нибу кӧ бькʹәвә нав политикайе чаԝа мәрьвед дьн, йед кӧ дьхԝәстьн проблемед дәԝләтеда сафи кьн у һʹале дьнйайе баш кьн. Дәԝсе, Паԝлос у Мәсиһийед дьн аликʹари дьданә мәрьва, сәва мьзгинийа дәрһәԛа Пʹадшатийа Хԝәде у ԛимәте ԛӧрбана Иса Мәсиһ пебьһʹәсьн. Паԝлос дина хушк-бьра да сәр Канийа азайа рʹаст. ԝ18.04 8 ¶1-2

Иса шәв пешийа мьрьна хԝә, ԝан гьлийед жорʹе готә Пәтрус. Пәтрус избат кьр кӧ әԝ стуна щьвата Мәсиһити бу (Галт. 2:9). Әԝи ԝәʹде Рʹожа Пенщийе һʹәсабе у паши ве йәке жи пе мерхасийа хԝә дьл дьда бьра. Незики хьлазийа хьзмәтийа хԝәйә дьреж, әԝи хушк-бьрара ньвиси: «Мьн . . . ԝәрʹа ньвиси, дьл дьдьмә ԝә у шәʹдәтийе дьдьм, кӧ әв ә кʹәрәма Хԝәдейә рʹаст. Веда һун ԛәԝин бьсәкьньн» (1 Пәт. 5:12). Нәмед Пәтрус бь ԛьрʹна дьл дьдьнә Мәсиһийа һʹәта рʹожа иройин. Рʹасти жи әм чьԛас һʹәԝще ве дьлдайине нә, чьмки әм һивийа созед Йаһоԝа нә (2 Пәт. 3:13). ԝ18.04 17 ¶12-13

Һʹәму щийада мәрьв дьхԝазьн аза бьжин. Ле сәва кӧ азайа ӧса бьстиньн, мәрьв щурʹә-щурʹә тьшта дькьн. Мәсәлә, әԝана протеста дькьн, шәрʹ-дәʹԝа пешда тиньн у һәла һе револусийа жи дькьн. Ле гәло әԝана бь ве йәке дьгьһижьнә мәрәма хԝә? На, йазьх әԝана гәләк щар бона ве йәке кӧл-дәрда дькʹьшиньн у һәла һе жи әʹмьре хԝә ӧнда дькьн. Әԝ йәк рʹастийа гьлийед Сьлеман Пʹадша избат дькә: «Сәрԝерийа зьламәки, ль сәр йәки дьн, бь хәсара [зийана] ԝи йә» (Ԝаиз 8:9). Рʹеза иройинда Аԛуб шьровәкьр кӧ ча мәрьв дькарә бь рʹастийе бәхтәԝар бә у ләзәте бьвинә. Йаһоԝа кӧ хԝәха әв ԛануна кʹамьл дайә, һе рʹьнд занә чь лазьм ә мәрьварʹа сәва бәхтәԝар бьжин у әʹмьре хԝәрʹа ша бьн. Әԝи мер у жьна пешьнрʹа һәр тьшт, демәк азайи жи да, сәва әԝана бәхтәԝар бьжин. ԝ18.04 3 ¶1-3