Сьбат

Иса һьндава мәрьвада гәләк рʹәʹм бу, ләма жи ԝана һʹьзкьрьна ԝи һьндава хԝәда тʹәхмин дькьрьн у гӧһ дьданә мьзгинийа Пʹадшатийе. Әм жи чьԛас һе зедә дьлшәԝат бьн, һаԛас һе зедә мәрьв ԝе гӧһ бьдьнә мьзгинийа мә. Чь дькарә али мә бькә, ԝәки һьндава ԝан мәрьвада дьлшәԝат бьн, йед кӧ хьзмәтийеда рʹасти мә тен? Әм гәрәке хԝә дайньн дәԝса ԝан мәрьва у һьндава ԝанда ӧса бьн, чаԝа мәйе бьхԝәста һьндава мәда буна (Мәт. 7:12). Дина хԝә бьдьнә һʹәԝще һәр кәси башԛә. Хьзмәтийеда һьндава һʹәмуйа методәке нәдьнә хәбате, ле дәԝсе һьлдьн һʹәсаб дәрәщә у ньһерʹандьнед һәр кәси башԛә. Пьрса бьдьнә ԝи сәва дәрһәԛа ԝи у баԝәрийа ԝи тьштәки пебьһәсьн (Мәтʹлк. 20:5). Чахе әм мәрьва дьдьн хәбәрдане, ԝи щурʹәйи әм дьһельн, ԝәки әԝана мәрʹа бежьн, кӧ чьрʹа әԝана һʹәԝще мьзгинийе нә. Чахе әм дәрһәԛа ԝана һьнәки заньн, әм ида һʹәԝщед ԝан фәʹм дькьн у дькарьн аликʹарийе бьдьнә ԝан, чаԝа кӧ Иса али мәрьва дькьр (Бәрамбәр кьн 1 Корьнтʹи 9:19-23). ԝ19.03 20 ¶2; 22 ¶8-9

Адәм у Һеԝайе данә кʹьфше, ԝәки нәшекьрандьн әԝ һʹәму тьштед ԛәнщ, чь кӧ Йаһоԝа бона ԝан кьрьбу. Ле әм гьшк дькарьн избат кьн, ԝәки мина ԝан бешекьр ниньн. Чахе әм тенә ньхӧмандьне, әм Йаһоԝарʹа дьдьнә кʹьфше, ԝәки әм баԝәр дькьн кӧ тʹәне һʹӧкӧме ԝи һәйә бона мә ԛануна дайнә, кӧ чь ԛәнщ ә у чь хьраб ә. Ӧса әм избат дькьн, ԝәки әм Баве хԝә һʹьз дькьн у итʹбарийа хԝә ԝи тиньн. Паши ньхӧмандьне әм гәрәке бәрдәԝам кьн, һәр рʹож пе ԛанун у принсипед Йаһоԝа бьжин, нә кӧ хԝә сәри хԝә бьн. Бь милйона хьзмәткʹаред Хԝәде ӧса дьжин. Һун жи дькарьн мина ԝан бьн, һәрге кʹур фәʹм бькьн Хәбәра Хԝәде, һәртʹьм тʹәви хушк-бьра һәвалтийе бькьн, у бь хирәт мәрьварʹа гьли кьн чь кӧ һун дәрһәԛа Баве хԝәйи һʹьзкьрьн педьһʹәсьн (Ибрн. 10:24, 25). Чахе һун сафикьрьна дькьн, гӧһ бьдьнә ширәта Йаһоԝа, кʹижан кӧ әԝ бь сайа Хәбәра хԝә у тʹәшкиләта хԝә дьдә ԝә (Иша. 30:21). Һьнге, һуне һәр шьхӧле хԝәда пешдачуйи бьн (Мәтʹлк. 16:20). ԝ19.03 7 ¶17-18

Йаһоԝа пʹьрʹ зәʹф хԝарьна рʹӧһʹани дьдә мә. Мәсәлә, әм бь сайа щьвата, журнала, у малпәред мә, ширәта у рʹебәрийа дьстиньн. Ԛә ӧса буйә кӧ ԝә готарәк бьһистийә йан жи хԝәндийә, йан жи видеок ньһерʹийә у ԝә готийә: «Әва һәма бона мьн бу, у мьнрʹа гәләк лазьм бу»? Ле ча әм дькарьн рʹазибуна хԝә Йаһоԝарʹа бьдьнә кʹьфше? (Колс. 3:15) Мәсәлә, һәр гав дӧада бона ԝан пʹешкʹеша шькьрийе бьдьнә ԝи. Әм ӧса жи дькарьн Йаһоԝарʹа рʹазибуна хԝә бьдьнә кʹьфше, чахе щийе һʹәбандьне тʹәмьз у тʹәрбәт хԝәй дькьн. Әм тʹьме Ода Щьвата хԝә тʹәмьз дькьн у чахе лазьм ә тʹәзә дькьн, ӧса жи әм мьԛати һащәтед әләктроник дьбьн, кʹижан кӧ щьватеда әм дьдьнә хәбате. Һәрге әм Ода Щьвата хԝә у тьштед теда рʹьнд хԝәй кьн, әԝана ԝе һе гәләк ԝәхт бьминьн у ԝе һьндьк тьшт бенә тʹәзәкьрьн. Ԝи щурʹәйи, әме пʹәра кем хәрщ кьн, у дәԝсе Одед Щьвата ава кьн йан жи тʹәзә кьн. ԝ19.02 18 ¶17-18

Ибо ԝәʹдә хԝәрʹа башԛә дькьр, сәва сәр әʹфьринед Йаһоԝайи пʹьрʹ баш у һʹәԝас бьфькьрә (Иб. 26:7, 8). Әԝ мәтʹал дьма чахе дьфькьри дәрһәԛа әʹрде, әʹзман, әʹԝьр у бьруске, у әԝи фәʹм дькьр кӧ әԝ чьԛас бьчʹук ә бәр ԝан чекьрьнед дәсте Хԝәде. Ибо ӧса жи хәбәред Йаһоԝа ԛимәт дькьр. Әԝи гот: «Готьнед дәве ԝи вәшартьм» (Иб. 23:12). Ибо әʹщебмайи дьма сәр Йаһоԝа у бь дьл у щан ԛәдьре ԝи дьгьрт. Әԝи Баве хԝә һʹьз дькьр у дьхԝәст дьле ԝи ша кә, ләма жи һе мьԛәрм хԝә ль беԛьсуртийе дьгьрт. Иро әм дәрһәԛа әʹфьринед Хԝәде һе зедә заньн, нә кӧ мәрьвед ԝәʹде Ибо. У һьн жи Кʹьтеба Пироз бал мә һәйә, бь сайа кʹижане әм дькарьн Йаһоԝа һе незик нас кьн. Һʹәму тьштед кӧ әм жь ве кʹьтебе педьһʹәсьн, али мә дькьн кӧ хофа Хԝәде дьле мәда пешда бе. Хԝәдехофи у ԛәдьр һьндава ԝи, нав мәда һʹьзкьрьне пешда тинә, у әм һе зедә гӧрʹа ԝи дькьн у хԝә мьԛәрм ль беԛьсуртийа хԝә дьгьрьн (Иб. 28:28). ԝ19.02 5 ¶12

Нава тʹәмамийа тʹәрихийеда сәрԝер пәй щьмәʹта Йаһоԝа дькʹәвьн. Әԝана щурʹә-щурʹә хьрабийеда мә нәһәԛ дькьн, ле бь рʹасти әԝана пәй мә дькәвьн, чьмки әм «гӧрʹа Хԝәде» дькьн ча сәрԝере хԝә, нә кӧ гӧрʹа мәрьва (Кʹар. Шанд. 5:29). Дьбәкә ԛәрфа мә бькьн, мә бькьнә кәле йан жи бькӧтьн. Йәкә әме пе аликʹарийа Йаһоԝа нәбьнә мәрьвед һерс у зӧлм, ле нава һʹәму щерʹьбандьнада рʹьһʹәт бьминьн. Ԝәрә биньн бира хԝә мәсәла се Ибранийа, кӧ дилтийеда бун, Һананйа, Мишаел, Азарйа, у бьвиньн кӧ сәрһатийа ԝан чь мә һин дькә. Ԝана бь нәрми падшарʹа шьровәкьр, кӧ әԝана ԝе сәре хԝә бәр ви пʹутʹи кӧ әԝ чекьр, данәйньн. Ԝана ньзаньбу кӧ ве дәрәщеда Йаһоԝа ԝе ԝана хьлаз кә йан на, ле әԝана һазьр бун, ԝәки чь жи бе сәре ԝан, йәкә Хԝәдерʹа амьн бьминьн (Дан. 3:1, 8-28). Ле чахе амьнийа мә һьндава Хԝәде те щерʹьбандьне, ча әм дькарьн чʹәʹв бьдьнә ԝан се Ибранийа? Әм бь мьлукти итʹбарийа хԝә Йаһоԝа тиньн, кӧ әԝ ԝе мә хԝәй кә у али мә бькә (Зәб. 118:7). Ӧса жи әм бь нәрми у бь ԛәдьр щаба ԝан дьдьн, йед кӧ нәһәԛийе мә дькьн (1 Пәт. 3:15). У әм ӧса жи һәр тьшти чь жи дькарә достийа мә тʹәви Баве мәйи һʹьзкьри хьраб кә, инкʹар дькьн. ԝ19.02 10-11 ¶11-13

Һәрге әм тʹьме бьфькьрьн дәрһәԛа һевийа хԝә, кʹижан кӧ бь сайа ԛӧрбана Мәсиһ бал мә һәйә, әме дьһа мерхас бьн (Йуһʹн. 3:16; Әфәс. 1:7). Чәнд һʹәфтийед пешийа Биранине, мәщала мәйә мәхсус һәйә, кӧ һе зедә бьшекьриньн ԛӧрбана Иса. Ԝи ԝәʹдәйи ԝе баш бә пәй бәрнама хԝәндьна Кʹьтеба Пироз һәрьн, кʹижан кӧ пешийа у паши Биранине те дайине, у бьфькьрьн дәрһәԛа ԛәԝьмандьнед кӧ мьрьна Исава гьредайи нә. Паше ида рʹожа Шива Евара Хӧдан, әме бь тʹәмами фәʹм бькьн кӧ чьԛас фәрз ьн симболед Биранине у әԝ симбол ԛӧрбанәкә ча ԛимәт тенә һʹәсабе. Чахе әм фәʹм бькьн кӧ Иса у Йаһоԝа чь бона мә кьрьн у әԝ йәк чьԛас кʹаре һьн мәрʹа һьн жи мәрьвед мәйи һʹьзкьрирʹа тинә, баԝәрийа мә ԝе һе ԛәԝи бә. Ӧса жи әме ԛәԝате бьстиньн, ԝәки һʹәта хьлазийа ве дьнйайе бь мерхасийе сәбьр кьн (Ибрн. 12:3). Рʹасти жи әм чьԛас гәрәке рʹази бьн, кӧ Иса Сәрәккʹаһине мәйи әзмана, йе кӧ бона мә лава-навчетийе дькә, һʹәта ньһа бәрдәԝам дькә әԝан һʹӧнӧра бьдә кʹьфше (Ибрн. 7:24, 25). Сәва рʹазибуна хԝә бьдьнә кʹьфше, әм биранина мьрьна Иса дәрбаз кьн, чаԝа кӧ әԝи тʹәми да (Луԛа 22:19, 20). ԝ19.01 22 ¶8; 23-24 ¶10-11

Йаһоԝа мә һʹәмушкарʹа ԛәдьрәки ӧса да, ԝәки пәсьна бьдьнә ԝи. Чахе әм щьватеда щаба хԝә дьдьн, әԝ һәйә пʹарәкә «ԛӧрбана пәсьндайине», у тʹӧ кәс нькарә дәԝса мә әԝе ԛӧрбане бьдә (Ибрн. 13:15). Гәло Йаһоԝа дәʹԝа дькә, ԝәки әм гьшк мина һәв әԝе ԛӧрбане бьдьн? Тʹӧ щар на! Сәр щьвате ӧса бьньһерʹьн ча сәр нанхԝарьна тʹәви һәвалед незик. Бьдьнә бәр чʹәʹве хԝә, һәвалед жь щьвата ԝә тʹоп дьбьн бона нанхԝарьне, сәва тʹәвайи ԝәʹдә дәрбаз кьн, у ԝәрʹа дьбежьн кӧ һун жи хԝарьнәке һазьр кьн. Һуне чь бькьн? Дьбәкә һун һьнәки бәрхԝә кʹәвьн, ле йәкә һуне бь дьл у щан хԝарьнәкә баш чекьн, ԝәки гьшка хԝәш бе. Әм меванед Йаһоԝа нә, у әԝ щьватеда мәрʹа сьфьрәкә мәзьн вәдькә (Зәб. 23:5; Мәт. 24:45). У әԝ ша дьбә чахе әм жи тʹәви хԝә пʹешкʹешәкә бьчʹук тиньн, йа лапә баш чь кӧ әм дькарьн бьдьн. Ләма жи хԝә рʹьнд һазьр кьн бона щьвате, у бь дьл у щан щаба хԝә бьдьн. Паше һуне щьватеда жь сьфьра Йаһоԝа нә кӧ тʹәне бьхԝьн, ле ӧса жи пʹешкʹеше биньн. ԝ19.01 8 ¶3; 13 ¶20

Ԝәʹде бәре, гәләк щар бенамуси дькʹәтә нава һʹәбандьна ԛәлпда (Һос. 4:13, 14). Гәләк мәрьва хԝәш дьһат әԝ һʹәбандьна ԛәлп, чьмки дькарьбун хԝәстьнед хԝәйә бәдәне рʹази кьн. Ле гәло әԝе йәке әԝана бәхтәԝар дькьрьн? Тʹӧ щар на! Чаԝа Даԝьд гот, әԝед кӧ пәй ԝан хӧдана дькʹәтьн, тʹәне кӧл у дәрд хԝәрʹа зедә дькьрьн. Ԝана ӧса жи ԛьрʹа гәләк зарʹа дьанин, сәва ча ԛӧрбан ԝан хӧданарʹа бьдьн (Иша. 57:5). Әԝ берʹәʹмти бәр чʹәʹве Йаһоԝа рʹәш бу! (Йерәм. 7:31) Иро жи һʹәбандьна ԛәлп гәләк щар бенамусийе ԛәбул дькә, һәла һе һомосексуалийе жи. Ле ахьрийа ве йәке бәред гәләк хьраб тинә, чьмки әԝана йанчь азайе дьстиньн, ле бь рʹасти тӧ кʹаре настиньн (1 Корн. 6:18, 19). Мәрьв «дәрд у кӧлед хԝә зедә дькьн», у дьбәкә һун хԝәха жи ве йәке дьвиньн. Ләма щаһьлно, гӧһ бьдьнә Баве хԝәйи әʹзмана. Дӧдьли нәбьн ԝәки һәрге һун гӧрʹа ԝи бькьн, әԝ йәк ԝе бона кʹара ԝә бә. Кʹур бьфькьрьн кӧ әԝ ләзәта ԝәʹдәлу кʹижан мәрьв дьстинә, гава пәй хԝәстьнед хԝәйә бәдәне дькʹәвә, ахьрийа чьԛас хьраб тинә (Галт. 6:8). ԝ18.12 27-28 ¶16-18

Һәрге жьн йан мере Мәсиһи бенамусийе бькә, әԝ бәр сафикьрьне дьсәнә. Анәгори готьна Иса, әԝ дькарә ле бьԛәтә у ида ԝе аза бә бьзәԝьщә йан мер кә (Мәт. 19:9). Ле әԝ ӧса жи дькарә бьбахшинә жьн йан мере хԝә. Ве йәкеда тьштәки нәрʹаст тʹӧнә йә. Һосәйа Гомәр пашда ани. Чахе әԝи ле пашда ани, әԝе гәрәке ида ԛави нәкьра. У ԝәʹдәки һәләԛәтийа Һосәйа тʹәви Гомәре тʹӧнә бу (Һос. 3:1-3). Ле ԝәʹдә дәрбаз бу, дьԛәԝьмә Һосәйа һәләԛәтийа хԝә тʹәви ԝе бәрдәԝам кьр, демәк диса ча жьн-мер дьжитьн. Бь ве йәке Һосәйа чʹәʹв да бахшандьна Хԝәде, чьмки Хԝәде щьмәʹта хԝә диса ԛәбул кьр у һәләԛәтийа хԝә тʹәви ԝан бәрдәԝам кьр (Һос. 1:11; 3:4, 5). Әԝ йәк дәрһәԛа зәԝаще чь мә һин дькә? Һәрге кәсәк сафи дькә, ԝәки зәԝаща хԝә хԝәй кә, у диса ча жьн-мер дьжин у бәрдәԝам дькьн борще зәԝаще биньн сери, әԝ дьдә кʹьфше кӧ әԝ кәс бахшандийә жьн йан жи мере хԝә (1 Корн. 7:3, 5). Бь ве йәке ида мәʹнийа һәвԛәтандьне тʹӧнә йә. Паши ве йәке ида мер-жьн гәрәке сәр хԝә бьхәбьтьн, ԝәки пе чʹәʹве Хԝәде сәр зәԝаще бьньһерʹьн. ԝ18.12 13 ¶13

Чахе әм ньһерʹандьна Йаһоԝа леколин дькьн, әԝ йәк али мә дькә ахьрийеда сафикьрьнед билан бькьн. У гава әм бькʹәвьнә дәрәщәкә ӧса кӧ әм гәрәке зузу сафикьрьне бькьн, әме ида бьзаньбьн чь у ча бькьн. Чахе жьна Потифар дьхԝәст Усьв тʹәви ԝе разе, Усьв дәрберʹа инкʹар кьр. Бь ве йәке һатә кʹьфше, кӧ әԝ пешда дьфькьри сәр ньһерʹандьна Йаһоԝа дәрһәԛа амьнийа һьндава мер у жьн (Дәстп. 39:8, 9). Һьн жи щаба Усьв жьна Потифаррʹа дьдә кʹьфше, кӧ фькьред ԝи мина фькьред Йаһоԝа бун. Әԝи ԝерʹа гот: «Әзе чаԝа ве хьрабийа мәзьн бькьм у ль бәр Хԝәде гӧнә бькьм?». Ле әм ча дьньһерʹьн сәр бенамусийе? Бәʹса хәбәре, һуне чь бькьн һәрге һәвалхәбатчийед ԝә тʹәви ԝә дәстпедькә флирте бькә? Йан жи һәрге кәсәк пе тʹеле гьлийед бенамуси ԝәрʹа дьньвисә йан жи шькла дьшинә? Һәрге мә ньһерʹандьна Йаһоԝа сәр ԝан тьшта пешда леколин кьрийә у әм жи пе чʹәʹве ԝи сәр ԝан тьшта дьньһерʹьн, һьнге ԝе мәрʹа дьһа һеса бә жерʹа амьн бьминьн. ԝ18.11 25 ¶13-14

Һьнә зандар дьфькьрьн, ԝәки әԝ рʹез рʹастә-рʹаст ӧса те һʹәсабе: «Әзе шабуна Хӧданда банздьм; Әзе шабуна Хԝәдеда бьрʹәԛьсьм». Рʹасти жи жь гьлийед Һәбаԛуԛ әм гәләк ԛәԝи дьбьн! Йаһоԝа нә кӧ тʹәне созед баш дайә мә, ле әԝ мә дьдә баԝәркьрьне, ԝәки әԝ ньһада кʹаре хԝә дькә, сәва ԛьрара хԝә бинә сери. Дәрсәкә гәләк фәрз кӧ әм жь Һәбаԛуԛ һин дьбьн, әԝ ә кӧ тʹӧ щар Йаһоԝада дӧдьли нәбьн (Һәбԛ. 2:4). Һәрге һәләԛәтийа мә тʹәви Йаһоԝа ԛәԝи бә, әме итʹбарийа хԝә һьндава ԝи ӧнда нәкьн. Сәва ве йәке әм гәрәке 1) бона һʹәму хәм у шькед хԝә, һәр гав Йаһоԝарʹа дӧа бькьн, 2) гӧһ бьдьнә Хәбәра Йаһоԝа у һʹәму рʹебәрийед кӧ әм жь тʹәшкиләта ԝи дьстиньн, у 3) бь амьни у бь сәбьр һивийа Йаһоԝа бьн. Һәбаԛуԛ һәма ӧса жи дькьр. Рʹаст ә әԝи кʹьтеба хԝә бь ахинийе дәстпекьр, ле хьлазийеда бь баԝәрийа ԛәԝи у шабуне хьлаз кьр. Ԝәрә әм жи чʹәʹв бьдьнә Һәбаԛуԛ у хԝә һʹәмеза Баве хԝә Йаһоԝада тʹәхмин кьн! Ве дьнйа хьрабда, бәрдьликә ӧса мәзьн, әм тʹӧ щики нькарьн бьвиньн! ԝ18.11 17 ¶18-19

Диса мәʹник һәйә, кӧ әм чьрʹа гәрәке һʹьзкьрьна Йаһоԝада дӧдьли нәбьн. «Хԝәде ӧса дьнйа һʹьз кьр, кӧ Кӧрʹе хԝәйи тайе тʹәне бәрва да, ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹн. 3:16). Иса жи һʹьзкьрьнәкә мәзьн да кʹьфше, кӧ әʹмьре хԝә да бона мә! Әԝ һʹьзкьрьна ԝи рʹасти жи чьԛас мә дьшьдинә! Хәбәра Хԝәде дьбежә кӧ һәла һе «дәрд-кӧл» у «тәʹли-тәнги» жи, нькарә «һʹьзкьрьна Хԝәде сәр мә сар кә» (Рʹом. 8:35, 38, 39). Щара әм рʹасти чәтьнайед ӧса тен, кӧ әм физикида, емосийалида йан жи рʹӧһʹанида ԛӧдум дькʹәвьн у шабуна хԝә ӧнда дькьн. Һьнге лазьм ә әм биньн бира хԝә, ԝәки Мәсиһ чьԛас мә һʹьз дькә, у әԝ йәк дькарә ԛәԝате бьдә мә сәва бәр ԝан чәтьнайа тәйах кьн (2 Корн. 5:14). Һʹьзкьрьна Иса ԛәԝата мәзьн дьдә мә, ԝәки әм дәстед хԝә сьст нәкьн у ԛәԝи бьминьн чахе әм рʹасти тәнгасийа тен, мәсәлә тʹәшԛәлед тʹәбийәте, пәйкʹәтьн, дьлшькәстибун у бәрхԝәкʹәтьн. ԝ18.09 14 ¶8-9

Сәва рʹастийеда һәрʹьн, әм гәрәке һʹәму готьнед Йаһоԝа ԛәбул кьн у һәр тьштида гӧрʹа ԝи бькьн. Әʹмьре мәда рʹасти гәрәке сәр щийе пешьн бә у әм гәрәке анәгори принсипед Кʹьтеба Пироз бьжин. Мина Даԝьд, әм жи гәрәке дьле хԝәда сафи кьн ԝәки рʹастийа Хԝәдеда һәрʹьн. Һәрге әм ӧса нәкьн, әме дәстпекьн бьфькьрьн дәрһәԛа ԝан тьшта, кʹижан мә бона рʹастийе тʹәрькандийә у дьбәкә жи бьхԝазьн ԝан тьшта пашда вәгәрʹиньн. Дәԝса ԝе йәке, әм гәрәке бь тʹәмами хԝә ль рʹастийе бьгьрьн. Әм ӧса жи гәрәке фәʹм кьн, кӧ әм нькарьн тʹәне һьнә рʹастийа ԛәбул кьн, һьнәка жи пьшт гӧһе хԝәва бавежьн. Әм гәрәке бь тʹәмами нава рʹастийеда бьн (Йуһʹн. 16:13). Сәва жь рʹастийе дур нәкʹәвьн, әм гәрәке ԝәʹде хԝә бь билани хәрщ кьн. Һәрге әм ве йәкеда фәсал нибьн, әме дәстпекьн гәләк ԝәʹде хԝә хәрщ кьн сәр һесабуне, сәр шьхӧлед кӧ әм һʹьз дькьн, бәр интернете йан жи бәр телевизоре. Рʹаст ә ԝан тьштада тьштәки хьраб тʹӧнә, ле йәкә әԝ тьшт дькарьн ԝәʹдә жь мә бьстиньн, кʹижан кӧ әм гәрәке хәрщ кьн сәр леколинкьрьна шәхси у шьхӧлед рʹӧһʹанийә дьн. ԝ18.11 10 ¶7-8

Чахе әʹмьре мәда ньшкева тьштәк дьԛәԝьмә, дьбәкә тьрс дькʹәвә дьле мә у әм дькʹәвьнә стресе (Мәтʹлк. 12:25). Щарʹа мәрʹа һәла һе жи чәтьн ә ԝан гӧһастьна ԛәбул кьн. Ле әм ча дькарьн ԝан дәрәщада дьлрʹьһʹәт бьминьн? (Зәб. 131:1-3) Нава тәнгасийед гьранда әм дькарьн «әʹдьлайийа Хԝәде» бьстиньн, кʹижан кӧ һʹьш-аԛьле мә хԝәй дькә у мә дьлрʹьһʹәт дькә (Фили. 4:6, 7). Чахе әм дьлтәнг дьбьн у гәләк бәрхԝә дькʹәвьн, әʹдьлайа Хԝәде дькарә мә ԛәԝи кә, сәва әм дәсте хԝә сьст нәкьн у бәрдәԝам кьн Йаһоԝарʹа хьзмәт кьн. Рʹӧһʹе Хԝәдейи пироз дькарә һьн дьле мә рʹьһʹәт кә, һьн жи бинә бира мә ԝан рʹезед жь Кʹьтеба Пироз, кʹижан ԝе али мә бькьн кӧ әм фәʹм кьн әʹмьре мәда чь йа лапә фәрз ә (Йуһʹн. 14:26, 27). ԝ18.10 27 ¶2; 28 ¶5, 8

Чь инсанәтерʹа зийана лапә мәзьн анийә? Әԝ һәйә дәрәԝи! Дәрәԝи әԝ ә чахе кәсәк нәрʹастийе дьбежә, ԝәки кәсәки дьн бьхапинә у бьхальфинә. Ле гәло кʹе дәрәԝа пешьн гот? Иса Мәсиһ гот ԝәки әԝ «Мирещьна» бу, йе кӧ «баве дәрәԝа» йә (Йуһʹн. 8:44). Ле кʹәнге әԝи щара пешьн дәрәԝ кьр? Әԝ ԛәԝьми бь һʹәзара сала пешда, бахче Еденеда. Адәм у Һеԝа әʹмьре хԝәрʹа ша дьбун Щьнәта бәдәԝда, кʹидәре кӧ Хԝәде ԝана щиԝар кьрьбу. Шәйтʹан заньбу, ԝәки Хԝәде тʹәми да Адәм у Һеԝайе, кӧ жь «дара ԛәнщи у хьраби наскьрьне» нәхԝьн, чьмки бона нәгӧһдарикьрьне әԝана ԝе бьмьрьн. Ле йәкә Шәйтʹан бь сайа мәʹр готә Һеԝайе: «На, һун тʹӧ щар намьрьн [әԝ бу дәрәԝа лапә пешьн], ле Хԝәде занә, ԝе рʹожа гава һун жь ԝе бьхԝьн, чʹәʹвед ԝәйе вәбьн у бьбьнә мина Хԝәде, ԛәнщи у хьрабийе жь һәв дәрхьн» (Дәстп. 2:15-17; 3:1-5). ԝ18.10 6 ¶1-2

Сәва әм дьле хԝә паԛьж, демәк тʹәмьз хԝәй кьн, гәрәке фькьр у хԝәстьнед мә тʹәмьз бьн. Әԝ йәк гәләк фәрз ә, чьмки ԝи щурʹәйи әм дькарьн бәр чʹәʹве Йаһоԝа тʹәмьз бьн, сәва әԝ хьзмәтийа мә ԛәбул кә (2 Корн. 4:2; 1 Тимтʹ. 1:5). Ле чь щурʹәйи мәрьвед дьлпаԛьж ԝе «Хԝәде бьбиньн», нә мәрьв нькарә [Хԝәде] бьбинә у сах бьминә? (Дәрк. 33:20) Хәбәра Йунани кӧ һатә ԝәлгәрʹандьне ча «бьвиньн», дькарә ӧса жи бе һʹәсабе «бь һʹьш бьвиньн, фәʹм кьн, бьзаньбьн». Әԝед кӧ Хԝәде дьвиньн бь чʹәʹве дьле хԝә, бь рʹасти ԝи нас дькьн у һʹӧнӧред ԝи ԛимәт дькьн (Әфәс. 1:18). Хенщи кӧ һʹӧнӧред Хԝәде нас бькьн, хьзмәткʹаред рʹаст дькарьн Хԝәде «бьвиньн» чахе әʹмьре хԝәда дәсте ԝи дьвиньн (Иб. 42:5). Әԝана ӧса жи һʹьш-аԛьле хԝә дьдьн сәр кʹәрәмед Хԝәде. Бәле, әԝ кʹәрәм һивийа ԝан ә, йед кӧ хԝә тʹәмьз хԝәй дькьн у бь амьни Йаһоԝарʹа хьзмәт дькьн. ԝ18.09 20 ¶13, 15-16

Чахе әм заньн чь рʹаст ә у ве йәке дькьн, әм гәләк кʹәрәма дьстиньн. Рʹаст ә сәрԝахти сәр һʹиме занәбуне йә, ле әԝ те кʹьфше пе шьхӧла у сафикьрьна. Һәла һе мурстанг жи сәрԝахтийе дьдьнә кʹьфше. Биланийа ԝана те кʹьфше ве йәкеда, кӧ һавине хԝәрʹа хӧрәк тʹоп дькьн (Мәтʹлк. 30:24, 25). «Сәрԝахтийа Хԝәде», демәк Мәсиһ, тʹьме тьштед ӧса дькә, кӧ Баве ԝи хԝәш те (1 Корн. 1:24; Йуһʹн. 8:29). Хԝәде дьхԝазә ԝәки әм нә кӧ тʹәне бьжартьнед рʹаст бькьн, ле ӧса жи ль гора ԝан бьжартьна бькьн. Йед кӧ бь мьлукти сәбьр дькьн у ԝан тьшта дькьн чь кӧ заньн рʹаст ә, Йаһоԝа ԝана кʹәрәм дькә (Мәт. 7:21-23). Ләма жи ԝәрә әм сәр хԝә бьхәбьтьн, ԝәки мьлук бьминьн. Һәрге әм ӧса бькьн, әме дьл бьдьнә хушк-бьра, ԝәки әԝана жи бь мьлукти Йаһоԝарʹа хьзмәт кьн. Бәле, лазьм ә ԝәʹдә у сәбьр сәва кӧ әм ԝан тьшта биньн сери, чь кӧ әм заньн рʹаст ьн, ле әԝ йәк мьлуктийа мә дьдә кʹьфше, кʹижан кӧ мә бәхтәԝар дькә һьн ньһа, һьн жи ахьрийеда ԝе бәхтәԝар кә. ԝ18.09 7 ¶18

Йаһоԝа мәрьв әʹфьранд, әԝи дьхԝәст ԝәки әԝана бьбьнә һәвалхәбаткʹаред ԝи. Һәла һе иро мәрьвед гӧнәкʹар жи, йед кӧ жерʹа амьн ьн, дькарьн һәр рʹож тʹәви Йаһоԝа бьхәбьтьн. Мәсәлә, әм «тʹәвайи бона Хԝәде дьхәбьтьн» чахе мьзгинийа Пʹадшатийе бәла дькьн у шагьрта һазьр дькьн (1 Корн. 3:5-9). Бьфькьрьн кӧ әԝ ԛәдьрәки чьԛас мәзьн ә, кӧ Әʹфьрандаре һьмзор әм һежа һʹәсаб кьрьн сәва тʹәви ԝи шьхӧләкә лапә мәзьнда һәвкʹарийе бькьн! Ле хенщи ԝи шьхӧли, әм ӧса жи щурʹәки майин дькарьн тʹәви Йаһоԝа бьхәбьтьн. Әм ве йәке дькьн чахе аликʹарийе дьдьнә нәфәред хԝә у хушк-бьра, меванһʹьзийе дьдьнә кʹьфше, бь рʹәзәдьли щурʹә-щурʹә проектада шьхӧл дькьн, у һе зедә хьзмәт дькьн (Колс. 3:23). Ле хԝә бәрамбәри кәсәки нәкьн, кӧ кʹе чьԛас бона Йаһоԝа дькә. Бир нәкьн кӧ әʹмьрда, сьһʹәт-ԛәԝатеда, дәрәщада у фәрәсәтда әм нә мина һәв ьн. ԝ18.08 23 ¶1-2

Йаһоԝа Һәбаԛуԛрʹа гот, кӧ әԝ ԝе әʹсә щаба пьрсед хԝә бьстинә у жь дәрдед хԝә аза бә. Ча бежи Хԝәде жерʹа ӧса гот: «Бь сәбьр бә у итʹбарийа хԝә мьн бинә. Әзе әʹсә щаба дӧайе тә бьдьм, һәрге жи тәрʹа бе кʹьфше кӧ дәрәнги дькʹәвә!». Йаһоԝа ани бира ԝи, ԝәки Әԝи ԝәʹдә ида кʹьфш кьрийә, кӧ кʹәнге созед хԝә бинә сери. Әԝи дьл да Һәбаԛуԛ, ԝәки бәрдәԝам кә һивийе бә. Ԝи щурʹәйи, әԝ пʹехәмбәр ида ԝе дьлшькәсти нибуйа. Әм жи гәрәке бь сәбьр һивийа Йаһоԝа бьн у гӧһ бьдьнә ԝи. Әԝ йәк ԝе али мә бькә ԝида дӧдьли нибьн у ԝәʹде чәтьнайи у кӧл-дәрда, дьлрʹьһʹәт бьн. Иса мәрʹа да кʹьфше кӧ әм гәрәке һʹьш-аԛьле хԝә данәйньнә сәр «ԝәхт у зәмана», кʹижан кӧ Хԝәде мәрʹа әʹйан нәкьрийә (Кʹар. Шанд. 1:7). Ләма жи ԝәрә әм тʹӧ щар дәстед хԝә сьст нәкьн, ле дәԝсе бь мьлукти, баԝәри у сәбьре һивийа ԝи бьн. Ԝи ԝәʹдәйи ӧса жи әм гәрәке ԝәʹде хԝә бь аԛьлайи хәрщ кьн у чьԛас дәсте мә те Йаһоԝарʹа хьзмәт кьн (Марԛ. 13:35-37; Галт. 6:9). ԝ18.11 16 ¶13-14

Мина Щьһуйед дьн, Пәтрус жи жь бьчʹуктайе дьһатә һинкьрьне, ԝәки мьләтед хәриб һʹәрам ьн. Ле паше тьштед ӧса ԛәԝьмин, кӧ әԝи фәʹм кьр ԝәки гәрәке ида ньһерʹандьна хԝә бьгӧһезә. Мәсәлә, Пәтрус хәԝн-хәйаләки мәхсус дит (Кʹар. Шанд. 10:9-16). Мина Пәтрус, әм гәрәке рʹьнд хԝә бьщерʹьбиньн у аликʹарийе ԛәбул кьн, сәва һәр фькьре нәрʹаст, кӧ дьле мәда майә, дәрхьн. Ле диса чь дькарә али мә бькә? Һәрге әм дьле хԝә фьрʹә кьн, демәк гьшка ԛәбул кьн, дьле мәда һʹьзкьрьн ԝе шин бә у ида ԝе щи тʹӧнә бә сәва әм фьрԛийе бькьнә ортʹа мәрьва (2 Корн. 6:11-13). Дьԛәԝьмә һун һʹьз дькьн һәвалтийе бькьн тʹәне тʹәви мьләт йан бәрәке хԝә, йан жи тʹәви йед кӧ сәр зьмане ԝә хәбәр дьдьн? Ԝәки ӧса нә, дьле хԝә фьрʹә кьн. Мәсәлә, хушк-бьред жь щурʹә-щурʹә мьләта тʹәглиф кьн сәр хьзмәтийе, йан жи сәр нанхԝарьне мала хԝәда (Кʹар. Шанд. 16:14, 15). Һәрге һун ӧса бькьн, һуне дьле хԝә бь һʹьзкьрьне тʹьжи кьн у ида фьрԛийе нәкьнә ортʹа мәрьва. ԝ18.08 9 ¶3, 6; 10 ¶7

Һәнә хушк-бьра, кӧ хԝә ӧса дьдьнә кʹьфше, ча мәрьвед ве дьнйайе. Мәсәлә, чахе әԝана ԝәʹде хԝә дәрбаз дькьн, рʹәԛас у рʹабунрʹуньштьна ԝан ӧса нә, кӧ нәщайиз ьн бона Мәсиһийа. Әԝана шькле хԝә дькьн интернете у теда тьштед ӧса дьньвисьн, кӧ те кʹьфше ԝәки әԝана мәрьвнә рʹӧһʹани ниньн. Ләма әԝана дькарьн хьраб һʹӧкӧм бьн сәр ԝан хушк-бьра, йед кӧ дьхԝазьн рʹабун-рʹуньштьна хԝә тʹәмьз хԝәй кьн, чаԝа щьмәʹта Хԝәдерʹа дькʹәвә (1 Пәт. 2:11, 12). Һәр тьшт ве дьнйайеда мәрьва һелан дькьн бәрбь «дьлһавьжи, чʹәʹвһавьжи» у кʹӧбар-бабахийе (1 Йуһʹн. 2:16). Ле әм пʹара Йаһоԝа нә, у ләма жи әм чʹәʹв надьнә ве дьнйайе. Әм гәрәке «нәпʹакийе у дьлһавьжийед дьнйайе инкʹар кьн» у «аԛьлда гьран, бь рʹастийе у хԝәденасийе бьжин ль ве дьне» (Тито 2:12). Әм ча хәбәр дьдьн, ча дьхԝьн-вәдьхьн, ча ль хԝә дькьн, дьхәмьлиньн, у дьхәбьтьн, әԝ һәр тьшт гәрәке мәрьварʹа әʹйан нишан кә, ԝәки әм тʹәсмилбуйед Йаһоԝа нә. ԝ18.07 25 ¶13-14

Һәрге чʹәʹве мә сәр Йаһоԝа дьминә, әме тʹӧ щар жь бо кьред мәрьвед майин нәбьнә мәрьвед һерс у ӧса жи һәләԛәтийа хԝә тʹәви Йаһоԝа хьраб нәкьн. Әԝ йәк гәләк фәрз ә илаһи һәрге тʹәшкиләта Хԝәдеда щабдарийед мә һәнә. Бәле, әм гьшк жи гәрәке «бона хьлазбуна хԝә бь хоф у тьрс бьхәбьтьн», ле әм ӧса жи гәрәке бир нәкьн кӧ һәр гав гӧрʹа Йаһоԝа бькьн (Фили. 2:12). Чьԛас һе зәʹф щабдарийа мә һәйә, һаԛас һе зедә жь мә те хԝәстьне у әм бәр Хԝәде щабдар ьн (Луԛа 12:48). Ле һәрге әм бь рʹасти Йаһоԝа һʹьз дькьн, тʹӧ тьшт ԝе мә нәлькʹӧминә у жь һʹьзкьрьна Йаһоԝа нәԛәтинә (Зәб. 119:165; Рʹом. 8:37-39). Ԝан рʹожед гәләк чәтьнда, чʹәʹве мә бьра һәр гав ль Йаһоԝа бә, «йе ль әʹзмен рʹуньшти», сәва кӧ ԛьрара ԝи фәʹм кьн (Зәб. 123:1). Ԝәрә әм тʹӧ щар нәһельн, ԝәки кьред мәрьва һәләԛәтийа мә тʹәви Йаһоԝа хьраб кьн. ԝ18.07 16 ¶19-20

Дьле мә бь шабуне тʹьжә дьбә чахе әм педьһʹәсьн кӧ щьмәʹта Йаһоԝа ча пешда дьчә! Әшкәрә йә, хьзмәткʹаред Хԝәде пе рʹонайа хԝә шәԝԛ дьдьн! Сала 2017-да мә 10 000 000 зедәтьр һинбунед Кʹьтеба Пироз дәрбаз кьрийә. Ӧса жи бь милйона мәрьвед тʹәзә һатьнә сәр Евара Биранине у пеһʹәсийан, ԝәки Хԝәде бона мә Кӧрʹе хԝә кьрә ԛӧрбан у бь ве йәке һʹьзкьрьна хԝәйә мәзьн да кʹьфше (1 Йуһʹн. 4:9). Нав тʹәмамийа дьнйайе зьмане щьмәта Йаһоԝа щурʹә-щурʹә йә. Ле әԝ йәк рʹе мә нагьрә, ԝәки бь йәктийе пәсьне Баве хԝә Йаһоԝа бьдьн (Әʹйан. 7:9). Фьрԛи тʹӧнә әм сәр чь зьмани хәбәр дьдьн йан кʹидәре дьжин, әм гьшк жи дькарьн «мина рʹонайед әʹзмана» ве дьнйайеда шәԝԛ бьдьн (Фили. 2:15). Хьзмәтийа мә, йәктийа мә у әԝ йәк кӧ әм һʹьшйар дьминьн, пәсьне дьдә Йаһоԝа. ԝ18.06 21 ¶1-3

Иса рʹаст ә бьрчи бу, ле йәкә хԝәст бәрдәԝам кә тʹәви жьнька Самәри дәрһәԛа тьштед рʹӧһʹани хәбәр дә, у әԝи бь ве йәке дәрс да шагьртед хԝә. Әԝи фәʹм дькьр ԝәки Баве ԝи дьхԝазә әԝ мьзгинийе бәла кә, һәла һе ԝе жьнка Самәрирʹа жи. Бона ԝи, ԛьрара Баве хԝә бинә сери, ча хԝарьн бу (Йуһʹн. 4:32-34). Ле Аԛуб у Йуһʹәнна әԝ дәрса фәрз бь тʹәмами фәʹм нәкьрьн. Чахе әԝана тʹәви Иса рʹийа Самәрийайерʹа дәрбаз дьбун, шагьрта гӧндәки Самәрида щи дьгәрʹийан сәва шәв бьминьн. Ле мәрьвед Самәри ԝана ԛәбул нәкьрьн, ләма Аԛуб у Йуһʹәнна жь һерсе готьнә Иса, ԝәки әԝана жь әʹзмана агьр бьхԝазьн сәва ԛьрʹа ԝан Самәрийа бе. Иса бона ве йәке сәрт ԝан һьлат (Луԛа 9:51-56). Һәрге Аԛуб у Йуһʹәнна шәһәре хԝә Щәлиледа рʹасти ве дәрәще бьһатана, дьԛәԝьмә әԝана ӧса һерс нәкʹәтана, чьмки ԝедәре мьләте ԝан бун. Те кʹьфше ԝәки ԝана фьрԛи дькьрә ортʹа мьләта, ләма ӧса һерса ԝан рʹабу. Ԝәʹдә дәрбаз бу, Йуһʹәннайе шанди чахе Самәрийарʹа мьзгини бәла дькьр у ԝана гӧһ дьда ԝи, дьԛәԝьмә әԝи шәрм дькьр, ԝәки әԝи хԝә ӧса дабу кʹьфше (Кʹар. Шанд. 8:14, 25). ԝ18.06 10-11 ¶12-13

Чахе рʹастийа Кʹьтеба Пироз бь симболик мәва йә, әме һелан бьн ль гора ве йәке бьжин у тʹьме рʹастийе бежьн. Ле чьрʹа әм гәрәке хԝә жь дәрәԝийе дур бьгьрьн? Чьмки дәрәԝ әԝ һәйә ԛьрмәкә ԛәԝи дәсте Шәйтʹанда. Дәрәԝи һьн ԝанрʹа зийане тинә йед кӧ дәрәԝа дькьн, һьн жи ԝанрʹа, кʹе кӧ ԝан дәрәԝа баԝәр дькә (Йуһʹн. 8:44). Ләма жи сәва кӧ хԝә жь ве йәке хԝәй кьн, әм гәрәке хԝә жь дәрәԝийе дур бьгьрьн (Әфәс. 4:25). Ле әԝ йәк һеса нинә. Абигаил йа кӧ 18 сали йә, дьбежә: «Нә һәртʹьм дькарә дәст бьдә, рʹастийе хәбәр ди, илаһи һәрге дәрәԝи дькарә тә жь дәрәща чәтьн хьлаз кә». Ле һәрге ӧса нә, чьрʹа әм гәрәке тʹьме рʹастийе хәбәр дьн? Викториа кӧ 23 сали йә, дьбежә: «Чахе тӧ рʹастийе дьбежи у баԝәрийеда ԛайим дьсәкьни, дьбәкә мәрьвед дьн ԛәрфа тә бькьн. Ле тӧ йәкә тʹьме кʹаре дьстини: Тӧ хԝәда баԝәр дьби, хԝә һе незики Йаһоԝа тʹәхмин дьки, у мәрьве кӧ тә һʹьз дькьн, һе ԛәдьре тә дьгьрьн». Рʹасти жи, һежа йә әм һәр гав «рʹастийе мина кʹәмбәре ль пьшта хԝә бьшьдиньн». ԝ18.05 28 ¶3, 5

Зәман һе хьраб дьбә, ләма жи әм гьшк гәрәке һʹьшйар бьминьн. Рʹожа Йаһоԝа ԝе ԝәʹдәда бе (Мәт. 24:42-44). Әм гәрәке сәбьр кьн у илаһи ньһа гәрәке алийе рʹӧһʹанида мьԛати хԝә бьн. Һәр рʹож Хәбәра Хԝәде бьхуньн у һәр гав Йаһоԝарʹа дӧа бькьн (1 Пәт. 4:7). Чʹәʹв бьдьнә ԝан хушк-бьра, йед кӧ бь сала Йаһоԝарʹа хьзмәт дькьн, һʹьшйар дьминьн у шабуна хԝә ӧнда накьн. Тʹьме нава шьхӧле Йаһоԝада бьн, мәрьварʹа ԛәнщийе бькьн у тʹәви хушк-бьра һәвалтийе бькьн. Әԝ йәк ԝе ԝәрʹа шабуне бинә, у бона ԝә ԝәʹдә ԝе зу дәрбаз бә (Әфәс. 5:16). Әм чьԛас ша дьбьн кӧ Йаһоԝа наньһерʹә сәр гӧнәкʹарийа мә у дьһелә әм жерʹа хьзмәт кьн. Әԝи мәрʹа «пʹешкʹеш бь щурʹе мәрьва» дайә, демәк рʹуспийед щьвате (Әфәс. 4:8, 11, 12). Ләма жи гава рʹуспи тʹәсәлийа ԝә бькьн, әве мәщале бьдьнә хәбате сәва жь билани у ширәтед ԝан һин бьн. ԝ18.06 24-25 ¶15-18

Иса готә шагьртед хԝә, ԝәки әԝана нә кӧ тʹәне һʹьзкьрьна ԝида бьн, ле ӧса жи һʹьзкьрьна ԝида бьминьн. Ле гәло чьрʹа әԝи ӧса гот? Чьмки әԝи заньбу шагьртед ԝира сәбьр лазьм ә, ԝәки бьжин чаԝа Мәсиһийед рʹаст. Йуһʹәнна 15:4-10-да Иса гәләк щар хәбәра «бьминьн» да хәбате сәва бьдә кʹьфше, ԝәки шагьртед ԝирʹа ԝе сәбьр лазьм бә. Ле әм ча дьдьнә кʹьфше кӧ дьхԝазьн һʹьзкьрьна Исада бьминьн у ԛәбулкьрьна ԝи ӧнда нәкьн? Әм гәрәке тʹәмийед ԝи биньн сери, демәк гӧрʹа ԝи бькьн. Иса хԝәст кӧ әм ве йәке бькьн, чь кӧ әԝи хԝәха дькьр. Әԝи гот: «Мьн тʹәмийед Баве хԝә хԝәй кьрьн у һʹьзкьрьна ԝида дьминьм». Бәле, ԝе йәкеда Иса мәрʹа мәсәлә һишт (Йуһʹн. 13:15). Чахе әм әве тʹәмийа Иса тиньн сери, әм ӧса жи һʹьзкьрьна хԝә һьндава Йаһоԝа дьдьнә кʹьфше (Мәт. 17:5; Йуһʹн. 8:28). Чахе әм һʹьзкьрьна хԝә һьндава Йаһоԝа у Иса дьдьн кʹьфше, әԝана жи мә нава һʹьзкьрьна хԝәда хԝәй дькьн. ԝ18.05 18 ¶5-7

Щаһьл гәрәке сафи кьн кӧ кʹижан һинбуне бьстиньн, кʹижан хәбате бьжберьн у диса тьштед дьн. Чахе һун заньн нетед ԝә чь нә, ԝәрʹа ԝе һе һеса бә сафикьрьнед аԛьлайи бькьн. Чьԛас зу һун нета дайньн пешийа хԝә, һаԛас зу һуне пешда һәрьн. Бь һʹәзара щаһьл нав тʹәмамийа дьнйайеда һежайи пʹайа нә. Әԝана әʹмьре хԝәда Йаһоԝа у нетед рʹӧһʹани датиньн щийе пешьн. Әԝ щаһьл әʹмьре хԝәрʹа ша дьбьн у ӧса жи һин дьбьн һәр тьштида пәй рʹебәрийа Йаһоԝа һәрʹьн, мәсәлә зәԝащеда. Сьлеман ньвиси: «Бь тʹәмамийа дьле хԝә хԝә бьсперә Хӧдан. . . . Һʹәму рʹийед хԝәда тӧ Хԝәде нас кә у Әԝе һʹәму шьвәрийед тә рʹаст-дуз кә» (Мәтʹлк. 3:5, 6). Щаһьлед щьвата Мәсиһитида бәр чʹәʹве Йаһоԝа гәләк ԛимәт ьн, әԝ ԝана һʹьз дькә, хԝәй дькә, рʹебәри у кʹәрәма дьдә. ԝ18.04 26 ¶7; 27 ¶9

Йуһʹәннайе шанди стуна щьвата Мәсиһити бу. Әԝи ньвиси дәрһәԛа хьзмәтийа Иса, у кʹьтеба ԝи дьл дьда Мәсиһийед һьнге, ӧса жи мә дьшьдинә у ԛәԝи дькә. Мәсәлә, тʹәне кʹьтеба ԝида әм дьхуньн гьлийед Иса, чахе әԝи гот кӧ шагьртед ԝийи рʹаст, ԝе пе һʹьзкьрьне әʹйан бьн (Йуһʹн. 13:35). Хьзнед рʹастийе се нәʹмед Йуһʹәннада жи гәләк ԛимәт ьн. Чахе әм бона шашийед хԝә дьлшкәсти дьбьн, у гава әм дьхуньн кӧ «хуна Иса . . . мә жь һʹәму гӧна паԛьж» дькә, әм гәләк дьлрʹьһʹәт дьбьн (1 Йуһʹн. 1:7). Ле дьԛәԝьмә дьле мә бәрдәԝам дькә мә сущдар дькә, ле чахе әм дьхуньн кӧ «Хԝәде жь дьле мә мәстьр ә», жь рʹазибуне кʹәла мә тʹьжә дьбә у чʹәʹвед мә тʹьжә һесьр дьбьн (1 Йуһʹн. 3:20). Кʹьтеба Пирозда тʹәне Йуһʹәнна ньвисийә кӧ «Хԝәде һʹьзкьрьн ә» (1 Йуһʹн. 4:8, 16). Нәʹма ԝийә дӧда у сьсийада пʹайе ԝан Мәсиһийа те дайине, йед кӧ бәрдәԝам дькьн «нава рʹастийеда дьжин» (2 Йуһʹн. 4; 3 Йуһʹн. 3, 4). ԝ18.04 18 ¶14-15