Адар

Чахе әм дӧ сәред пешьн жь кʹьтеба Дәстпебун дьхуньн, әм педьһʹәсьн азайа Адәм у Һеԝайе чь щурʹәйи бу. Иро мәрьв һәма азайа ԝи щурʹәйи дьхԝазьн, ле дәст ԝан накʹәвә. Кемасийа жьн  у мере пешьн тӧ тьштида тʹӧнә бу, нә тьрс нә жи зорбәти һәбу. Ԝана бона хԝарьне, хәбате, нәхԝәшийа у мьрьне, дәрд нәдькʹьшандьн (Дәстп. 1:27-29; 2:8, 9, 15). Гәләк фәрз ә әм бир нәкьн ԝәки тʹәне азайа Йаһоԝа Хԝәде бесинор ә. Чьрʹа? Чьмки әԝ ә Әʹфьрандаре һәр тьшти у Сәрԝере һьмзор (1 Тимтʹ. 1:17; Әʹйан. 4:11). Рʹаст ә азайа һʹәму әʹфьринед сәр әʹзмана у сәр әʹрде жи һәйә, ле йәкә азайа ԝан синоркьри йә. Әм гәрәке рʹьнд фәʹм кьн ԝәки тʹәне һʹӧкӧм у изьна Йаһоԝа Хԝәде һәйә, кӧ сафи кә кʹижан синор рʹаст, лазьм, у аԛьлайи нә. Бь рʹасти Йаһоԝа жь дәстпека әʹфьрандьна мәрьва әв синор данин. ԝ18.04 4 ¶4, 6

Ве дьнйайеда, әм тʹәне пе аликʹарийа Йаһоԝа сәбьр дькьн у ԛәԝи дьминьн (2 Корн. 4:7, 8). Ле ньһа бьфькьрьн, ԝәки әԝ мәрьвед кӧ Йаһоԝа нас накьн, ве дьнйайеда бей аликʹарийа ԝи ча дьжин. Мина Иса, дьле мә жи бона ԝан дьшәԝьтә, у әм дьхԝазьн «мьзгинийа ԛәнщийе» ԝанрʹа гьли кьн. Һьндава ԝанда бь сәбьр бьн, тʹәви кʹижана һинбуна Кʹьтеба Пироз дәрбаз дькьн. Бир нәкьн, кӧ әԝ мәрьв дьбәкә һьнә рʹастийед Кʹьтеба Пироз рʹьнд ньзаньн йан жи ԛә ньзаньн. Ле гәләк мәрьв баԝәрийа хԝә һʹьз дькьн у әԝ йәк кʹур нав ԝанда рʹуньштийә. Әԝана һʹәсаб дькьн, ԝәки баԝәрийа ԝан йәктийе дькә нава малбәт, мьләт у мәрьвед ԝан. Һʹәта кӧ мәрьварʹа бежьн, ԝәки баԝәрийа хԝәйә «кәвьн» кӧ гәләк ԛимәт дькьн, бьтʹәрькиньн, әм пешийе гәрәке али ԝан бькьн пебьһʹәсьн у һʹьз кьн растийед «тʹәзә», кʹижан кӧ әԝана ньзаньн. Тʹәне паши ве йәке әԝана ԝе һазьр бьн бьтʹәрькиньн баԝәрийа хԝәйә бәре. Сәва мәрьв ԝан гӧһастьна бькә, ԝәʹдә лазьм ә (Рʹом. 12:2). ԝ19.03 23 ¶10, 12; 24 ¶13

Йаһоԝа бь ԝан гьлийа һʹьзкьрьн у ԛәбулкьрьна хԝә да кʹьфше, у ве йәкеда мәрʹа мәсәлә һишт. Әм жи гәрәке тʹьме дьл бьдьнә мәрьва (Йуһʹн. 5:20). Әм әшԛ у ша дьбьн чахе кәсәк жь ԝан, бона кʹижана әм хәм дькьн, мәрʹа һʹьзкьрьне дьдә кʹьфше у бона кьред мәйи ԛәнщ пʹайе мә дьдә. Ӧса жи хушк-бьред мәйи щьвате, у нәфәред мә һʹәԝще һʹьзкьрьн у дьлдайине нә. Чахе әм пʹайе ԝан дьдьн, әм баԝәрийа ԝан ԛәԝи дькьн у али ԝан дькьн бь амьни Йаһоԝарʹа хьзмәт кьн. Де-бав илаһи гәрәке дьл бьдьнә заред хԝә. Чахе де-бав пʹайе зарʹед хԝә дьдьн у һʹьзкьрьна хԝә дьдьнә кʹьфше, әԝана али зарʹед хԝә дькьн, ԝәки гәш бьн у ԛәԝи бьн. Гьли, «Әз жь тә рʹази мә», дьдьнә кʹьфше, ԝәки Йаһоԝа Исада дӧдьли нибу, кӧ әԝ ԝе бь амьни ԛьрарʹа Баве хԝә бинә сери. Һәрге Йаһоԝа Кӧрʹе хԝәда дӧдьли нинә, әм жи гәрәке итʹбарийа хԝә Иса биньн, кӧ әԝ ԝе һʹәму созед Йаһоԝа бинә сери (2 Корн. 1:20). Чахе әм дәрһәԛа мәсәла Иса дьфькьрьн, әм һе зедә дьхԝазьн жь ԝи һин бьн у чʹәʹв бьдьнә ԝи (1 Пәт. 2:21). ԝ19.03 8 ¶3; 9 ¶5-6

Чахе кәсәк мәрʹа пʹешкʹешәкә бьһа дьдә, әм дьшекьриньн у жь ԝи гәләк рʹази дьбьн. Ле Исраелийа азайа хԝә ԛимәт нәкьрьн чахе Йаһоԝа ԝана жь хӧламтийа Мьсьре аза кьр. Чахе әԝана аза бун, паши чәнд мәһа, ԝана бира хԝарьна Мьсьре дькьрьн, у сәр хԝарьна кӧ Йаһоԝа дьда ԝан, дькьрьнә чʹурә-чʹур. Ԝана һәла һе жи дьхԝәстьн диса вәгәрʹьнә Мьсьре. Бьдьнә һʹәсабе хԝә, бона ԝан «хийар, зәвәш, пивазок, пиваз у сир» дьһа фәрз бу, нә кӧ азайи кӧ Хԝәдейе рʹаст, Йаһоԝа да ԝан. Ләма жи әʹщебмайи нинә кӧ һьнге һерса Йаһоԝа рʹабу сәр щьмәʹта ԝи (Жьмар 11:5, 6, 10; 14:3, 4). Әԝ дәрсәкә гәләк фәрз ә бона мә! Паԝлосе шанди һʹәму Мәсиһи ширәт кьрьн, ԝәки бьшекьриньн ве азайе кӧ Йаһоԝа дьдә бь сайа Кӧрʹе хԝә Иса Мәсиһ (2 Корн. 6:1). ԝ18.04 9-10 ¶6-7

Һәр кәс жь мә дьхԝазә, ԝәки мә һʹьз бькьн у һьндава мәда һәԛ бьн. Ле һәрге әм һьндава хԝәда һʹьзкьрьне у һәԛийе навиньн, әм хԝә хьраб у беһеԝи тʹәхмин дькьн. Йаһоԝа занә ԝәки әм һʹәԝще һʹьзкьрьне нә у дьхԝазьн мәрьв һьндава мәда һәԛ бьн (Зәб. 33:5). Әм гәрәке дӧдьли нәбьн кӧ Хԝәдейе мә гәләк мә һʹьз дькә у нахԝазә кӧ кәсәк һьндава мә нәһәԛийе бькә. Әԝ хәйсәте Йаһоԝа, Ԛанунеда рʹьнд те кʹьфше, кӧ әԝи бь сайа Муса да щьмәʹта Исраеле. Чахе әм Ԛануна Муса леколин дькьн, әм теда һʹьзкьрьна Йаһоԝайә мәзьн дьвиньн (Рʹом. 13:8-10). Әм дькарьн тедәрхьн, ԝәки Ԛануна Муса сәр һʹиме һʹьзкьрьне бу, чьмки һʹьзкьрьн Йаһоԝа һелан дькә һәр тьшти бькә (1 Йуһʹн. 4:8). Йаһоԝа әԝ һʹәму ԛанун кьрә дӧ тʹәмийед сәрәкә, әԝ һәйә Хԝәде һʹьз бькьн, у мәрьва һʹьз бькьн (Ԛан. Кʹаһ. 19:18; Ԛан. Дщр. 6:5; Мәт. 22:36-40). Һәр йәк жь 600 ԛануна у тʹәмийед дьн, кӧ дькʹәвьнә Ԛануне, мә дәрһәԛа һʹьзкьрьна Йаһоԝа һин дькьн. ԝ19.02 20-21 ¶1-4

Ибо гәләк фәсал бу һьндава жьнада (Иб. 31:1). Әԝи заньбу кӧ нәрʹаст ә һәрге әԝ хенщи кʹӧлфәта хԝә, сәр жьнәкә дьн бьньһерʹә. Иро әм дьжин дьнйакә ӧсада, кʹижанеда һәр гав намусийа мә те щерʹьбандьне. Гәло әме жи мина Ибо чʹәʹве хԝә хԝәй кьн, кӧ тʹӧ щар сәр кәсәки дьн нәньһерʹьн, хенщи жьн йан мере хԝә? Гәло әме инкʹар кьн кӧ бьньһерʹьн һәр щурʹә шьклед нәщайиз йан жи шьклед порнографи? (Мәт. 5:28) Һәрге әм һәр рʹож хԝә бьгьрьн, әме мьԛәрм беԛьсуртийа хԝә хԝәй кьн. Ибо ӧса жи ве йәкеда гӧрʹа Йаһоԝа дькьр, кӧ сәр һәбуке рʹаст дьньһерʹи. Әԝи фәʹм дькьр, кӧ һәрге әԝ итʹбарийа хԝә һәбука хԝә бинә, әԝе гӧнәки гьран бькә у һежайи щәзакьрьне бә (Иб. 31:24, 25, 28). Иро әм дьжин дьнйа пʹәрәһʹьзда. Һәрге әм сәр пʹәра у һәбуке ӧса дьньһерʹьн ча Кʹьтеба Пироз ширәте дьдә, әме һе ԛайим беԛьсуртийа хԝә хԝәй кьн (Мәтʹлк. 30:8, 9; Мәт. 6:19, 20). ԝ19.02 6 ¶13-14

Иса һәр тьштида һʹьзкьрьна Йаһоԝа һьндава мә да кʹьфше (1 Йуһʹн. 4:8-10). Хенщи ве йәке, йа лапә фәрз әԝ ә, кӧ Иса бь рʹәзәдьли бона мә әʹмьре хԝә да. Фьрԛи тʹӧнә әм бьжарти нә йан на, йәкә әм гьшк ләзәте дьстиньн жь һʹьзкьрьна Йаһоԝа у Кӧрʹе ԝи, кʹижан кӧ ԝана бь ве ԛӧрбане данә кʹьфше (Йуһʹн. 10:16; 1 Йуһʹн. 2:2). Һьн жи бьфькьрьн дәрһәԛа ԝан тьшта, кӧ ԝәʹде шива Биранине тенә хәбьтандьне. Ве йәкеда жи һʹьзкьрьна Иса у хәмкьрьна ԝи һьндава шагьртед ԝида те кʹьфше. Иса һʹьзкьрьна хԝә һьндава бьжартийед хԝә бь ве йәке да кʹьфше, кӧ дәрбазкьрьна биранине ԝанрʹа чәтьн нәкьр. Ԝәʹдә дәрбаз дьбу, у әԝ бьжартийед ԝи гәрәке ида һәр сал Биранин дәрбаз кьрана һʹәму дәрәщада, һәла һе кәледа жи (Әʹйан. 2:10). Гәло ԝана гӧрʹа Иса кьр? Бәле! Һʹәта рʹожа иро, Мәсиһийед рʹаст һәр тьшти дькьн, сәва биранина мьрьна Иса дәрбаз кьн. ԝ19.01 24 ¶13-15

Әԝ азайи ӧса жи һәйә азайа жь религийа ԛәлп, нәзанийе, у һинкьрьнед ԛәлп. Һьн жи, әме ахьрийеда «тʹәви азайи у рʹумәта зарʹед Хԝәде бьн» (Рʹом. 8:21). Һәрге һун сәр һинкьрьна Иса бьминьн, һәла һе ньһа жи һун дькарьн әве азайе тәм кьн (Йуһʹн. 8:31). Ԝи щурʹәйи һуне нә кӧ тʹәне «рʹастийе нас кьн», ле анәгори ве бьжин. Ве дьнйайеда, әԝ жийин кӧ мәрьв һʹәсаб дькьн жийина лапә баш, ԝәʹдәлу йә. Әм ньзаньн сьбе ԝе чь бьԛәԝьмә (Аԛуб 4:13, 14). Ләма жи аԛьлайи йә кӧ рʹийа Хԝәдеда бьминьн, кʹижан кӧ ахьрийеда ԝе мәрʹа «жийина кӧ рʹасти жийин ә» бьдә, демәк жийина һʹәта-һʹәтайе (1 Тимтʹ. 6:19). Ле Хԝәде тʹӧ щар зоре мә накә рʹийа ԝида һәрʹьн. Әм хԝәха гәрәке ве йәке бьжберьн. Ләма жи щаһьлно, Йаһоԝа бькьн «пʹара» хԝә (Зәб. 16:5). Бьшекьриньн ԝан тьштед ԛәнщ кӧ әԝ дьдә ԝә (Зәб. 103:5). У дӧдьли нәбьн, ԝәки әԝ дькарә «һʹәта-һʹәтайе хер у хԝәши» у «шабунәкә мәзьн» бьдә ԝә (Зәб. 16:11). ԝ18.12 28 ¶19, 21

Һʹәму Мәсиһи гәрәке зәԝаще һӧрмәт кьн, чаԝа Йаһоԝа у Иса. Ле йәкә һьнәкарʹа чәтьн ә сәр зәԝаще ӧса бьньһерʹьн, чьмки һʹәму мәрьв гӧнәкʹар ьн (Рʹом. 7:18-23). Ләма әм әʹщебмайи наминьн, ԝәки ԛьрʹна йәкеда, зәԝаща һьнә Мәсиһийада чәтьнайи һәбун. Рʹаст ә Паԝлос ньвиси ԝәки «жьн жь мер нәԛәтә», ле йәкә щара әԝ йәк дьԛәԝьми (1 Корн. 7:10). Паԝлос шьровәнәкьр кӧ чьрʹа жьн-мер жь һәв башԛә дьбун. Ле әм заньн кӧ проблем ве йәкеда нибу, мәсәлә ԝәки мер бенамуси бькьра, у ида изьна жьне һәбуйа жь ԝи бьԛәтә у диса мер кә. Паԝлос ньвиси ԝәки жьн кʹижан кӧ жь мере хԝә башԛә буйә, гәрәке «мер нәкә йан жи мере хԝәрʹа ль һәв бе». Әԝ йәк ӧса бу, чьмки бәр чʹәʹве Хԝәде әԝана һәр дӧ жи диса йәк бун. Паԝлос ширәт да, ԝәки һәрге зәԝащеда бенамуси нәһатийә кьрьне, чь чәтьнайи жи һәбә нета башԛәбуне гәрәке диса һәвһатьн бә. У әԝана һәрдӧ дькарьн жь рʹуспийа аликʹарийе бьхԝазьн. ԝ18.12 13 ¶14-15

Иро ԛьрара Хԝәде һьндава щьмәʹта ԝи әԝ ә, кӧ достийе тʹәви ԝи бькьн у һʹәта ԝан һәйә шьхӧле бәлакьрьна мьзгинийеда кʹар бькьн (Мәт. 28:19, 20; Аԛуб 4:8). Мәрьв бь дьле хԝәйи сах дькарьн мә жь шьхӧле Хԝәде дур хьн. Мәсәлә, һуне чь бькьн һәрге мәзьне хәбата ԝә, ԝәрʹа хәбата һе баш дьдә, кʹидәре һуне пʹәре мәзьн бьстиньн, ле әԝ хәбат ԝе ԝәʹдә жь ԝә бьстинә у һуне кем һәрʹьнә щьвате у хьзмәтийе? Йан жи һәрге мәкʹтәбеда ԝәрʹа мәщала дьдьн кӧ дәрбази щики дьн бьн, сәва һе зедә хԝәндьне бьстиньн? Һәрге һун рʹасти дәрәщед ӧса бен, һьнге ԝе ԝәрʹа лазьм бә дӧа бькьн, леколина бькьн, йан жи пешийа сафикьрьне тʹәви мәрьвед дьн хәбәр дьн. Ле һе баш нинә ида ньһада леколина бькьн, у пебьһʹәсьн Йаһоԝа ча дьньһерʹә сәр ԝан пьрса у чʹәʹв бьдьнә ньһерʹандьна ԝи? Һәрге һун ӧса бькьн, һуне нәкʹәвьнә щерʹьбандьна гава рʹасти ԝан дәрәща бен, чьмки ԝә дьле хԝәда ида пешда сафи кьрийә, кӧ дьхԝазьн һʹьш-аԛьле хԝә бьдьнә сәр хьзмәтийа Йаһоԝа. ԝ18.11 27 ¶18

Сьлеман щаһьлтийеда бу пʹадше Исраеле. Дәстпека пʹадшатийа ԝи, Йаһоԝа хәԝнеда жерʹа хӧйа бу у гот: «Бьхԝазә, тӧ чь дьхԝази кӧ әз бьдьмә тә». Сьлеман щаба хԝә да: «Әз щаһьл ьм у нәщерʹьбанди мә . . . Ләма жи дьле гӧһдар бьдә хьзмәткʹаре хԝә, сәва диԝана щьмәʹта тә бькьм» (1 Пʹадш. 3:5-10, ДТʹ). Рʹасти жи әԝ чьԛас мьлук бу, кӧ «дьле гӧһдар» жь Хԝәде хԝәст, ләма жи әʹщебмайи нинә кӧ Йаһоԝа Сьлеман һʹьз дькьр (2 Сам. 12:24). Әԝ хԝәстьна ԝи ӧса дьле Хԝәде һат, ԝәки әԝи Сьлеманрʹа «дьле бь занйари у бь фәʹмкари» да (1 Пʹадш. 3:12). Һʹәта кӧ Сьлеман Хԝәдерʹа амьн бу, әԝи гәләк кʹәрәм дьстанд. Жерʹа ԛәдьрәки ӧса һатә дайине, ԝәки әԝи «бона наве Йаһоԝа Хԝәдейе Исраеле» пʹарьстгәһ ава кьр (1 Пʹадш. 8:20, ДТʹ). Әԝ пе биланийа хԝә кӧ Хԝәде дабу ԝи, бу мәрьвәки гәләк нав у дәнг. У готьнед ԝи һатьнә ньвисаре се кʹьтебед Кʹьтеба Пирозда. Йәк жь ԝан кʹьтеба Мәтʹәлок ә. ԝ19.01 14 ¶1-2

Һьнә мәрьва хԝәш найе, ԝәки кәсәк сәр фькьрандьн у ньһерʹандьна ԝан һʹӧкӧм кә. Әԝана дьбежьн: «Әва ише мьн ә, әз хԝә сәри хԝә мә». Бь ԝи щурʹәйи әԝана дьбәкә нишан дькьн, кӧ дьхԝазьн хԝәха сафикьрьнед хԝә бькьн, у бь рʹасти әԝ йәк гәрәке ӧса бә. Әԝ мәрьв нахԝазьн кәсәк ԝана контрол кә, йан жи зоре бькә кӧ мина мәрьвед дор бәре хԝә бьн. Ле һәрге әм мина Йаһоԝа бьфькьрьн, әԝ найе һʹәсабе ԝәки фькьред мәйә шәхси тʹӧнә у әм нькарьн бь һʹьше хԝә дьшьрмиш бьн. Әм 2 Корьнтʹи 3:17-да дьхуньн: «Хӧдан ль кʹӧ дәре бә, ль ԝе дәре жи азайи һәйә». Бәле, азайа мә һәйә кӧ бьбьнә мәрьве ӧса, чаԝа әм дьхԝазьн. Бал мә һәнә тьштед ӧса кӧ мә хԝәш тен у мәра һʹәԝас ьн. Бь рʹасти Йаһоԝа мә бь ве азайе әʹфьранд. Ле йәкә ве азайеда синор һәнә (1 Пәт. 2:16). Чахе әм гәрәке бьжберьн кӧ чь рʹаст у чь нәрʹаст ә, әм гәрәке пе рʹебәрийа Хәбәра ԝи һәрʹьн, кʹидәре Хԝәде мәрʹа дәрһәԛа фькьред хԝә әʹйан дькә. ԝ18.11 19 ¶5-6

Чахе әм тʹәзә рʹастийе пеһʹәсийан, мә фәʹм кьр, ԝәки нетед рʹӧһʹани һе ԛимәт ьн, нә кӧ һәбук у пʹәрә. У әм бәхтәԝар бун чахе мә тьштед материали, бона рʹастийе ԛӧрбан кьр. Ле ԝәʹдә дәрбаз дьбә, у әм дьвиньн ԝәки мәрьвед дьн хԝәрʹа тьштед әләктроник йед тʹәзә дькьрьн, йан жи пʹәре хԝә сәр тьштед майин хәрщ дькьн. Һьнге әм дькарьн бькʹәвьнә тʹәльке, чьмки дьбәкә бьфькьрьн, ԝәки әм тьшта жь хԝә кем дькьн. Паши ве йәке, әме ида рʹази нәбьн ԝан тьштава кӧ бал мә һәнә, әме ӧса жи нетед рʹӧһʹани бьдьнә алики дьн у пәй пʹәра у һәбуке кәвьн. Әԝ йәк тʹәви Димас ԛәԝьми. Әԝи «дьнйа һʹьз кьр» у бона ве йәке пьшта хԝә да хьзмәтийа тʹәви Паԝлосе шанди. Ле чьрʹа әԝи Паԝлос һишт? Рʹаст ә Кʹьтеба Пироз навежә, ле дьбәкә әԝи һәбук йан пʹәрә һе зәʹф һʹьз кьр, нә кӧ шьхӧлед рʹӧһʹани, йан жи дьбәкә әԝи ида нәдьхԝәст хԝә бьдә щәфе сәва тʹәви Паԝлос хьзмәт кә. Әм жь сәрһатийа ԝи дәрсе хԝәрʹа һин дьбьн. Әм тʹӧ щар гәрәке диса пәй һәбуке нәкʹәвьн у нәһельн, ԝәки әԝ йәк һʹьзкьрьна мә һьндава рʹастийе сар кә. ԝ18.11 10 ¶9

Шәйтʹан пе нета хьраб дәрәԝи кьр. Әԝи заньбу, ԝәки һәрге Һеԝа гьлийед ԝи баԝәр кә у бәре даре бьхԝә, әԝе әʹсә бьмьрә. Һеԝайе у Адәм гӧрʹа тʹәмийа Йаһоԝа нәкьрьн у ахьрийеда мьрьн (Дәстп. 3:6; 5:5). Хенщи ве йәке, сәва ԝи гӧнәйи, «мьрьн сәр һʹәму мәрьва бәла бу». Ләма жи мьрьне «һʹӧкӧм кьр, һәта сәр ԝан жи, йед кӧ мина Адәм гӧрʹа Хԝәде дәрнәкʹәтьн» (Рʹом. 5:12, 14). Ләма иро мәрьв дәԝса кӧ чаԝа Хԝәде дьхԝәст, әʹмьре хԝәйи беԛьсурра ша бьн у һʹәта-һʹәтайе бьжин, рʹожед әʹмьре ԝан «һʹәфте сал ьн, һәгәр бь сьһʹәт-ԛәԝат һʹәйште сал». Һьн жи әʹмьре мәрьва бь «зәмәт у кʹәдәр» тʹьжә йә (Зәб. 90:10). Рʹасти жи әԝ дәрәԝийа Шәйтʹан ахьрикә чьԛас хьраб ани! Чахе Иса бәса кьред Шәйтʹан кьр, әԝи гот: «[Әԝ] тʹӧ щар хԝә рʹастийе нәгьртийә» (Йуһʹн. 8:44). Шәйтʹан ньһа жи хԝә рʹастийе нагьрә, чьмки әԝ диса бәрдәԝам дькә «тʹәмамийа дьне» пе дәрәԝийед хԝә бьхальфинә (Әʹйан. 12:9). Әм нахԝазьн, ԝәки Шәйтʹан мә бьхальфинә. ԝ18.10 6-7 ¶1-4

Чахе әм алийе хԝәда һәр тьшти дькьн сәва әʹдьлайе хԝәй кьн, әм бәхтәԝар дьбьн. Аԛуб ньвиси: «Бәре рʹастийе жь алийе йе кӧ бь әʹдьлайийе дьчинә те чьнине» (Аԛуб 3:18). Чахе һәләԛәтийа мә ортʹа хушк йан бьра, йан жи ортʹа нәфәра хьраб дьбә, әм дькарьн аликʹарийе жь Хԝәде һиви кьн, ԝәки али мә бькә әм әʹдьлайе хԝәй кьн. Ӧса рʹӧһʹе Йаһоԝайи пироз ԝе али ԝә бькә хԝә рʹаст бьдьн кʹьфше, у һуне бәхтәԝар бьн. Иса әʹйан кьр кӧ сәва әʹдьлайе хԝәй кьн чьԛас фәрз ә, ԝәки пешийе әм гава бавежьн. Әԝи гот: «Һәгәр тӧ һәдийа хԝә бини сәр горигәһе у ль ԝьр бе бира тә, кӧ дьле бьре тә жь тә майә, һәдийа хԝә ԝе дәре ль бәр горигәһе бьһелә у пешийе һәрә бьре хԝәрʹа ль һәв ԝәрә у паше ԝәрә һәдийа хԝә бьдә» (Мәт. 5:23, 24). ԝ18.09 21 ¶17

Иса шәва хԝәйә пашьнда, шагьртед хԝәрʹа ԝәкә 30 щара бәʹса һʹьзкьрьне кьр. Әԝи готә ԝан, ԝәки гәләк фәрз ә әԝана «һәвдӧ һʹьз бькьн» (Йуһʹн. 15:12, 17). Әԝ һʹьзкьрьна ԝан гәрәке бьбуйа нишана ве йәке, кӧ әԝана шагьртед ԝийи рʹаст ьн (Йуһʹн. 13:35). Әԝ щурʹе һʹьзкьрьне тʹәне емосийа нинә. Әԝ һʹьзкьрьна ӧса йә, кӧ кʹара хԝә нагәрә у һазьр ә ԛӧрбана бькә. Иса гот: «Тʹӧ һʹьзкьрьн сәр ԝе һʹьзкьрьнера тʹӧнә, кӧ йәк әʹмьре хԝә бәр достед хԝәва бьдә. Һун достед мьн ьн, һәгәр һун ԝан тʹәмийед кӧ әз дьдьмә ԝә хԝәй дькьн» (Йуһʹн. 15:13, 14). Һʹьзкьрьна һʹәлал у йәктийа нава хьзмәткʹаред Хԝәде, ԝана әʹйан дькә ча щьмәʹта ԝи (1 Йуһʹн. 3:10, 11). Әм рʹасти жи гәләк рʹази нә, ԝәки һʹьзкьрьна ԝи щурʹәйи нава хьзмәткʹаред Йаһоԝада һәйә, у фьрԛи тʹӧнә кʹе жь кʹижан мьләти йан бәрәки йә, йан жи сәр чь зьмани хәбәр дьдә! ԝ18.09 12 ¶1-2

Йаһоԝа жь мә дәʹԝа дькә, ԝәки әм мьԛати нәфәред хԝә бьн. Мәсәлә, дьбәкә һун дьхәбьтьн сәва әʹбура нәфәред хԝә бькьн. Гәләк де малда дьминьн, сәва мьԛати зарʹед хԝәйә бьчʹук бьн. Һьнә зарʹед мәзьн жи де-бавед хԝәйә әʹмьрда мәзьн хԝәй дькьн. Бәле, әԝ шьхӧл гәләк фәрз ьн. Һәрге нәфәред ԝә стуйед ԝәда ньн, дьбәкә һун ида нькарьн шьхӧле Йаһоԝа гәләки бькьн. Ле бәрхԝә нәкʹәвьн, дьле Йаһоԝа ша дьбә гава һун хәм дькьн бона нәфәред хԝә (1 Корн. 10:31). Һәрге малда щабдарийед ԝәйә мәзьн тʹӧнә нә, һун дькарьн аликʹарийе бьдьнә хушк-бьра. Мәсәлә, али ԝан кьн йед кӧ һʹәԝщә нә, мьԛати нәхԝәша дьбьн, йед кӧ сьст ьн, йан жи әʹмьрда мәзьн ьн. Щьватеда дина хԝә бьдьне кӧ кʹерʹа аликʹари лазьм ә. Чахе һун ӧса дькьн, һун тʹәви Йаһоԝа һәвкʹарийе дькьн, чьмки әԝ бь сайа ԝә, щаба дӧайед ԝан хушк-бьра дьдә (1 Корн. 10:24). ԝ18.08 24 ¶3, 5

Ԝәрә шеԝьр кьн сәрһатийа Усьв. Баве Усьв жь һʹәму кӧрʹед хԝә, гьшка зәʹфтьр ԝи һʹьз дькьр. Жь бо ве йәке бьред ԝи һʹәвсуди ԝи дькьрьн, у чахе әԝ  ԝәкә 17 сали бу, ԝи дилти фьротьн (Дәстп. 37:2-4, 23-28). Ԝәкә 13 сала Усьв Мьсьреда хӧламтийеда у кәледа бу. Һьн жи әԝ жь баве хԝә гәләк дур бу, кʹижани әԝ зәʹф һʹьз дькьр. Ԝи һʹале хԝәда әԝи дькарьбу нета әʹмьре хԝә ӧнда кьра у бьбуйа йәки һерс. Ле чь али Усьв кьр, ԝәки нәбу йәки ӧса? Чахе Усьв кәледа бу, әԝ дьбәкә кʹур дьфькьри кӧ чаԝа Йаһоԝа али ԝи дькьр (Дәстп. 39:21; Зәб. 105:17-19). Дьԛәԝьмә әԝ ӧса жи дьфькьри сәр хәԝнед пʹехәмбәртийе, кʹижан кӧ әԝи щаһьлтийеда дитьбу. Әԝе йәке баԝәрийа ԝи ԛәԝи дькьр, кӧ Йаһоԝа ԝи ԛәбул дькә (Дәстп. 37:5-11). Ӧса жи әԝи дьбәкә гәләк дӧа дькьр у дьле хԝә Йаһоԝарʹа вәдькьр (Зәб. 145:18). Сәр дӧайед ԝийи дьлсах, Йаһоԝа щаба Усьв да сәва әԝ дӧдьли нәбә, ԝәки чь жи әʹмьре ԝида бьԛәԝьмә, Әԝ ԝе тʹьме «тʹәви ԝи» бә. ԝ18.10 28 ¶3-4.

Ньһерʹандьна мә һьндава мәрьва дькарә сәр һʹиме ве йәке пешда бе, кӧ әԝана дәԝләти нә йан жи кʹәсиб ьн. Ле чаԝа кʹәсиббун йан жи дәԝләтибуна кәсәки, дькарә сәр ньһерʹандьна мә һьндава ԝи мәрьви һʹӧкӧм бә? Пе рʹебәрийа рʹӧһʹе пироз, Сьлеман дәрһәԛа кемасийа мәрьвед гӧнәкʹар ньвиси, кӧ рʹеза иройинда әм дьхуньн. Әԝ мәтʹәлок чь мә һин дькә? Һәрге әм фәсал нибьн, әме бьхԝазьн тʹәне тʹәви ԝан хушк-бьра һәвалтийе бькьн, йед кӧ дәԝләти нә, ле жь йед кʹәсиб хԝә дур бьгьрьн. Ле чьрʹа хоф ә жь бо һәбуне мәрьва ԛимәт кьн? Бь ве йәке әме йәктийа щьвате бькьнә бьн хофе. Чаԝа Аԛуб гот, әԝ проблем ԛьрʹна йәкеда жи һәбу у щьват парʹәвәдькьр (Аԛуб 2:1-4). Әм гәрәке фәсал бьн, ԝәки әԝ ньһерʹандьн нав щьвата мәда тʹӧнә бә у анәгори дитьна чʹәʹве хԝә диԝане нәкьн. ԝ18.08 10 ¶8-10

Әԝ йәк кӧ әм ча ньн һьндава хушк-бьра дьдә кʹьфше, ԝәки әм чьԛас ԛимәт дькьн достийа хԝә тʹәви Йаһоԝа. Әԝана жи пʹара Йаһоԝа нә, у һәрге әм ве йәке бир нәкьн, әме тʹьме хушк-бьрарʹа һʹәйф у бь һʹьзкьрьн бьн (1 Тʹеслн. 5:15). Иса готә шагьртед хԝә: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹн. 13:35). Малахи гот ԝәки Йаһоԝа гӧһ дьдә у дьбьһе кӧ чаԝа щьмәʹта Ԝи тʹәви һәв хәбәр дьдьн (Малх. 3:16). Бәле, Йаһоԝа «йед парʹа хԝә нас дькә» (2 Тимтʹ. 2:19). Әԝ һаш жь һәр кьред мә у гьлийед мә һәйә (Ибрн. 4:13). Чахе әм хушк-бьрара һʹәйф ниньн, Йаһоԝа әве йәке дьвинә у мә дьбьһе. Ле әԝ ӧса жи дьвинә гава әм һьндава ԝанда меванһʹьз, дәствәкьри у һʹәйф ьн у ӧса жи һәвдӧ дьбахшиньн (Ибрн. 13:16). ԝ18.07 26 ¶15, 17

Һәмьки, ԝе бь билани бә кӧ әм хԝә ль Йаһоԝа бьгьрьн. Тʹӧ кәс ӧса ԛәԝат, билан у бь һʹьзкьрьне нинә чаԝа Хԝәдейе мә! Бәле, әм тʹьме дьхԝазьн ԝирʹа амьн бьн у алийе ԝи бьгьрьн (Зәб. 96:4-6). Ле йазьх һьнә хьзмәткʹаред Хԝәде чахе рʹасти дәрәщед ӧса тен кӧ гәрә алийе ԝи бьгьрьн, мьԛәрм ве йәке накьн. Бьфькьрьн дәрһәԛа мәсәла Ԛайин. Әԝи хӧдане ԛәлп нәдьһʹәбанд, ле йәкә Йаһоԝа хьзмәткьрьна ԝи ԛәбул нәкьр. Ле чьрʹа? Чьмки дьле ԝида хьраби кʹур рʹуньштьбу (1 Йуһʹн. 3:12). Йаһоԝа Ԛайинрʹа гот: «Һәгәр тӧ рʹастийе бьки, гәло те сәре хԝә бьльнд нәки? Ле ԝәки тӧ рʹастийе нәки ва йә гӧнә ль бәр дери кʹәтийә у хԝәха жи һʹәйра тәда йә, ле бькә кӧ тӧ һʹӧкӧми ль сәр бьки» (Дәстп. 4:6, 7). Демәк, Йаһоԝа пешда готә Ԛайин, кӧ һәрге әԝ тʹобә бькә у алийе Йаһоԝа бьгьрә, һьнге Әԝ жи ԝе алийе ԝи бә. Ле Ԛайин ширәта Йаһоԝа ԛәбул нәкьр. ԝ18.07 17 ¶1, 3; 18 ¶4

Чахе әм мьзгинийе бәла дькьн у али мәрьва дькьн кӧ бьбьнә шагьрт, ӧса әм пе рʹонайа хԝә шәԝԛ дьдьн (Мәт. 28:19, 20). Хенщи ве йәке, әм дькарьн пе рʹабун-рʹуньштьна хԝә жи пәсьна бьдьнә Йаһоԝа. Ԝәʹде хьзмәтийа мал бь мал у дәрва, мәрьв дина хԝә дьдьнә рʹабун-рʹуньштьна мә. Бәшәра мә у сьлава мәйә бь дьл у щан, ԝанрʹа дьдьнә кʹьфше кӧ әм кʹе нә у кʹижан Хԝәдейирʹа хьзмәт дькьн. Иса шагьртед хԝәрʹа гот: «Гава һун һәрʹьнә мале, сьлаве бьдьн» (Мәт. 10:12). Ԝан щийада кʹидәре кӧ Иса у шандийед ԝи хьзмәт дькьрьн, әʹдәт бу кӧ хәриба йан жи мәрьвед нәнас тʹәглифи мала хԝә кьн. Иро гәләк щийада әԝ йәк ԛәйдә нинә. Ле һәрге һун пе бәшәра хԝәш у нәрм хԝәйе малерʹа шьровәкьн мәʹнийа һатьна хԝә, ԝанрʹа ԝе һеса бә ԝә ԛәбул кьн у жь ԝә әʹщьз нәбьн. Щара бона хәбәрдане дәстпекьн, сьлавәкә бь дьл жи баш ә, у әԝ ӧса жи керһати йә ԝәʹде хьзмәтийа пе стенде. Дьбәкә һун хԝәха дьвиньн кӧ бәшәра ԝәйә хԝәш у сьлавед ԝә, мәрьва хԝәш тен. ԝ18.06 22 ¶4-5

Пәтрусе шанди һини ве йәке бьбу, кӧ тʹәне тʹәви Щьһуйа хәбәр дә у һәвалтийе бькә. Ле паше чахе Хԝәде әшкәрә да кʹьфше, кӧ Мәсиһи гәрәке фьрԛийе нәкьнә ортʹа мәрьва, Пәтрус Корнелйорʹа, кӧ әскәре Рʹомайи бу, мьзгини гьли кьр (Кʹар. Шанд. 10:28, 35). Паши ве йәке, Пәтрус тʹәви хушк-бьред жь мьләтед дьн нан дьхԝар у ԝәʹдә дәрбаз дькьр. Ле сал дәрбаз бун, Пәтрус Әнтакйайеда дӧрʹути кьр гава тʹәви Мәсиһийед нәщьһу сәр нанхԝарьне бу, рʹабу у жь ԝан дур кʹәт (Галт. 2:11-14). Чахе Паԝлос әв йәк дит, әԝи сәрт Пәтрус ширәт кьр. Те кʹьфше кӧ Пәтрус ширәта ԝи ԛәбул кьр, чьмки чахе әԝи нәʹма хԝәйә пешьн Щьһуйарʹа у Мәсиһийед мьләте майинрʹа ньвиси, әԝи лекьр кӧ чьԛас фәрз ә һʹәму хушк-бьра һʹьз бькьн (1 Пәт. 1:1; 2:17). Әʹйан ә кӧ шанди жь Иса һин бун ԝәки «һʹәмуйа» һʹьз бькьн (Йуһʹн. 12:32; 1 Тимтʹ. 4:10). Рʹаст ә, ԝәʹдә ԝанрʹа лазьм бу, ле ԝана ньһерʹандьна хԝә гӧһаст. Бәле, Мәсиһийед ԛьрʹна йәкеда, «мәрьве ну» ль хԝә кьрьбун, ԝана фьрԛи нәдькьрьнә ортʹа мәрьва, чьмки чʹәʹв дьданә Хԝәде (Колс. 3:10, 11). ԝ18.06 11 ¶15-16

Щурʹәк зьрьһʹа әскәре Рʹомайи жь кӧдоред һʹәсьн бу, әԝ кӧдор дьрежошки бун, у пе чʹәрм һәвва гьредайи бун. Бона кʹьнщед ԝи щурʹәйи лазьм бу әскәр тʹьме бьньһерʹийа һәла әԝ һәвгьредана һʹәсьнед зьрьһʹ сьст нәбунә, чьмки әԝ зьрьһʹ дьл у навдьле әскәр жь шур у тира хԝәй дькьр. Бәле, принсипед Йаһоԝайи һәԛ жи мина зьрьһʹ, дьле мәйи симболик хԝәй дькьн (Мәтʹлк. 4:23). Әскәр тʹӧ щар зьрьһʹа жь һʹәсьн сәр металәкә сьст нәдьгӧһаст. Әм жи гәрәке тʹӧ щар принсипед Йаһоԝа нәгӧһезьн тʹәви ԝан тьшта, чь кӧ әм хԝәха һʹәсаб дькьн кӧ рʹаст ә. Мәрьв һаԛас билан ниньн, ԝәки дьле хԝә хԝәха хԝәй кьн (Мәтʹлк. 3:5, 6). Һе баш ә әм һәр гав зьрьһʹа хԝәйә симболик кӧ Йаһоԝа дайә мә, рʹьнд бьдьнә сәр дьле хԝә. У чьԛас зәʹф әм рʹастийед Хԝәде һʹьз бькьн, һаԛас ԝе мәрʹа һеса бә «зьрьһʹе» хԝә кьн, демәк ль гора принсипед Хԝәде бьжин (Зәб. 111:7, 8; 1 Йуһʹн. 5:3). ԝ18.05 28 ¶3-4, 6-7

Рʹаст ә Муса гәләк ԝәхт бь дьл у щан рʹебәрийа щьмәʹта Исраел дькьр, йәкә ԝана нә тʹәне бона аве дькьрьнә чʹурә-чʹур, ле ӧса жи сәр Муса, тебежи әԝ нәһәԛ бу, ԝәки ав тʹӧнә бу (Жьмар 20:1-5, 9-11). Сәр ве йәке, һерса Муса рʹабу у әԝи ида нәрмбуна хԝә ӧнда кьр. Дәԝса кӧ ча Йаһоԝа тʹәми да ԝи, бь баԝәрийе ԛәйерʹа хәбәр дә, Муса тʹәви щьмәʹте һерсә-һерс хәбәр да у гот ԝәки әԝ ԝе кʹәрәмәте бькә. Паше, әԝи дӧ щара ԛәйе хьст у гәләк ав кьшийа. Әԝи жь ԛӧрәбуне у һерсе шашикә мәзьн бәрʹда (Зәб. 106:32, 33). Сәва ве йәке, кӧ Муса ԝәʹдәки шкәсти нәма, Хԝәде нәһишт ԝәки әԝ бькʹәвә Әʹрде Создайи (Жьмар 20:12). Жь ве дәрәще әм дәрсед фәрз һин дьбьн. Йа пешьн әм гәрәке тʹьме сәр хԝә бьхәбьтьн, ԝәки һәр гав шкәсти бьн. Һәрге әм сәр ԝәʹдәки жи мьԛати хԝә нәбьн, әме ԛӧрʹә бьн у тьштед беаԛьлайи хәбәр дьн у бефәʹмтийе бькьн. Йа дӧда, стрес дькарә мә сьст кә, у ләма әм гәрәке чь дәсте мә те бькьн сәва шкәсти бьминьн, илаһи чахе сәр мә һʹӧкӧм дькьн. ԝ19.02 12-13 ¶19-21

Гәло бәлакьрьна мьзгинийе барәки гьран ә? Тʹӧ щар на. Чахе Иса гьли кьр мәсәла дәрһәԛа кʹола тьрийе, әԝи гот кӧ жь бәлакьрьна мьзгинийе әме шабунәкә мәзьн бьстиньн (Йуһʹн. 15:11). Бь рʹасти әԝи гот кӧ шабуна ԝи дькарә дьле мәда бә жи. Ле ча? Иса хԝә бәрамбәри кʹола тьрийе кьр, ле шагьртед хԝә бәрамбәри чьԛьла кьр (Йуһʹн. 15:5). Кʹола тьрийе чьԛьла хԝәй дькә. Һʹәта кӧ әԝ чьԛьл кʹола тьрийева ньн, әԝана ав у тьштед дьн дькʹьшиньнә хԝә. Ӧса жи әм, һʹәта кӧ тʹәви Мәсиһ йәктийеда ньн у пәй ԝи дьчьн, әм шабунәкә мәзьн дьстиньн, чаԝа әԝ дьстинә чахе ԛьрара Баве хԝә тинә сери (Йуһʹн. 4:34; 17:13; 1 Пәт. 2:21). Хушкәкә мә бь наве Һана, йа кӧ 40 сали зедәтьр пешәнг ә, дьбежә: «Әԝ шабуна кӧ әз хьзмәтийеда дьстиньм, һелане дьдә мьн ԝәки бәрдәԝам кьм Йаһоԝарʹа хьзмәт кьм». Бәле, шабун ԛәԝате дьдә мә, ԝәки бәрдәԝам кьн мьзгинийе бәла кьн, һәрге жи һьндьк мәрьв гӧһ дьдьнә мә (Мәт. 5:10-12). ԝ18.05 17 ¶2; 20 ¶14

Ԛьрʹна йәкеда, Паԝлосе шанди мәсәләкә мәзьн һишт, чьмки дьл дьда бәр хушк-бьра. Паԝлос пе рʹӧһʹе пироз һатә шандьне ԝәки мьзгини бәла кә Йунанийарʹа, Рʹомайарʹа у мәрьвед дьнрʹа, йед кӧ гәләк хӧданед ԛәлп дьһʹәбандьн (Галт. 2:7-9). Паԝлос дьчу щийед дур хьзмәт дькьр, кʹидәре кӧ иро Тʹьркийа йә, ӧса жи әԝ дьчу Йунаньстане у Италйайе. Әԝи ԝедәре нәщьһуйара мьзгини бәла дькьр у щьватед Мәсиһи саз кьр. Әԝ Мәсиһийед тʹәзә, «щәфа дәсте мьләте хԝәда кʹьшандьн» у ләма ԝанрʹа дьлдайин лазьм бу (1 Тʹеслн. 2:14). Незики сала 50 Д.М., Паԝлос щьвата Тʹесалоникира кʹижан кӧ тʹәзә саз бу, ньвиси: «Әм һәр гав бона ԝә һʹәмуйа рʹазибуна хԝә дьдьнә Хԝәде, нава дӧайед хԝәда тʹьме ԝә бир тиньн. Әм кьред баԝәрийа ԝә, хәбата ԝәйә жь һʹьзкьрьне у сәбьра [ԝә] . . . тиньнә бира хԝә» (1 Тʹеслн. 1:2, 3). Әԝи ӧса жи ԝана ширәт кьр кӧ һәвдӧ ԛәԝи кьн у бьшьдиньн у готә ԝан: «Дьл бьдьнә һәв у аликʹарийа һәвдӧ бькьн» (1 Тʹеслн. 5:11). ԝ18.04 18-19 ¶16-17

Щаһьле кӧ һʹьш-аԛьле хԝә дьдә сәр ве йәке, ԝәки дьле Йаһоԝа ша кә, сәр хьзмәтийе гәләк фәрз дьньһʹерә. Бәле, бәлакьрьна мьзгинийе шьхӧләкә гәләк фәрз ә, у әԝ гәрәке әʹмьре мәда щийе фәрз бьгьрә. Ле тӧ дькари хԝәрʹа нете дайни, ԝәки һе зедә хьзмәт ки? Йан жи тӧ дькари бьби пешәнг? Ле һәрге тӧ хьзмәтийеда шабуне һьндьки дьстини? Чаԝа тӧ дькари һе рʹьнд шәʹдәтийе бьди? Дӧ гавед фәрз ԝе али тә бькьн: Хԝә рʹьнд һазьр кә у хԝә нәгьрә ԝәки мәрьвед дьнрʹа гьли ки кӧ тӧ чь зани. Тӧйе ахьрийеда дьбәкә әʹщебмайи жи бьмини кӧ хьзмәтийеда чьԛас шабунәкә мәзьн бьстини. Мәсәлә, тӧ дькари хԝәрʹа щаба ве пьрсе леколин бьки, кʹижан кӧ дьбәкә һәвалдәрсханед тә гәләк щар дьдьн, бәʹса хәбәре: «Чьрʹа тӧ баԝәр дьки кӧ Хԝәде һәйә?». Сәр малпәра мә һәнә готар кӧ бона щаһьла һатьнә дәрхьстьне, сәва әԝана леколин бькьн кӧ чаԝа щаба ве пьрсе бьдьн. Ԝедәре һәйә схема хәбате бь наве «Әз Чьма Баԝәр Дькьм кӧ Хԝәде Һәйә?». Әв схема ԝе али тә бькә хԝә рʹьнд һазьр ки бона щаба ве пьрсе. ԝ18.04 27 ¶10-11

Азайа Адәм у Һеԝайе һәбу, ле йәкә әԝ азайи бь синора бу. Һьнә синор тʹәбийәти бун, демәк һьнә тьшт ԝана бь инстинкте дькьр. Бәса хәбәре, әԝана һәрдӧ жи заньбун, ԝәки сәва бьжин лазьм ә бина хԝә бькʹьшиньн, бьхԝьн, рʹазен у диса тьштед дьн. Ле гәло жь бо ван тьшта азайа ԝан ӧнда дьбу? На, Йаһоԝа заньбу кӧ әԝана ԝе жь ԝан тьшта шабун у ләзәте бьвиньн (Зәб. 104:14, 15; Ԝаиз 3:12, 13). Йаһоԝа тʹәми да Адәм у Һеԝайе, ԝәки әʹрде тʹьжә кьн у хԝәйитийе ле бькьн. Ле гәло әве тʹәмийе азайа ԝан ӧнда дькьр? Тʹӧ щар на! Әԝ тʹәми мәщал да ԝан кӧ әʹрде бькьнә щьнәт, сәва мәрьв һʹәта-һʹәтайе бьжин. Әԝ йәк ԛьрара Хԝәде бу (Зәб. 127:3; Иша. 45:18). Һәрге Адәм у Һеԝайе гӧһ бьдана Йаһоԝа, әԝана ԝе бькарьбуна зәԝащ у малбәта хԝәрʹа һʹәта-һʹәтайе шабуна. ԝ18.04 4-5 ¶7-8

Һәрге әм хьзмәтийеда тʹәви мәрьва бь сәбьр бьн, әме һивийе нибьн кӧ әԝана һәма ча рʹастийа Кʹьтеба Пироз пебьһʹәсьн, дәрберʹа фәʹм бькьн йан жи ԛәбул кьн. Дина хԝә бьдьн мәсәле, кӧ чаԝа әм дькарьн тʹәви мәрьва шеԝьр кьн дәрһәԛа жийина һʹәта-һʹәтайе щьнәтеда сәр әʹрде. Гәләк мәрьв баԝәр дькьн, ԝәки мьрьн хьлазийа һәр тьшти йә, йан жи дьфькьрьн ԝәки һʹәму мәрьвед ԛәнщ дьчьн сәр әʹзмана. Бьрак гьли дькә кӧ әԝ ча дәрһәԛа ве йәке мәрьварʹа шьровәдькә. Бәре әʹԝльн, әԝ ԝанрʹа Дәстпебун 1:28 дьхунә. Паше әԝ жь хԝәйе мале дьпьрсә, кӧ бь тʹәхмина ԝи Хԝәде дьхԝәст ԝәки мәрьв кʹидәре у чаԝа бьжин. Гәләк мәрьв щаба хԝә ӧса дьдьн: «Сәр әʹрде бәхтәԝарийеда бьжин». Паше, бьра дьхунә Ишайа 55:11, у дьпьрсә кӧ гәло нета Хԝәде һатийә гӧһастьне йан на. Гәләк щар хԝәйе мале дьбежьн на. Паши ве йәке, әԝ бьра ԝанрʹа Зәбур 37:10, 11 дьхунә у дьпьрсә кӧ ахьрийа инсанәте ԝе ча бә. Бь сайа шеԝьркьрьна пе Кʹьтеба Пироз, әԝи али чәнд мәрьва кьр фәʹм бькьн, кӧ Хԝәде дьхԝазә ԝәки мәрьвед ԛәнщ щьнәтеда һʹәта-һʹәтайе сәр әʹрде бьжин. ԝ19.03 24 ¶14-15; 25 ¶19

Йаһоԝа әшкәрә да кʹьфше, ԝәки әԝ дьхԝазә кӧ әм гӧһ бьдьнә гьлийед Кӧрʹе ԝи у гӧрʹа ԝи бькьн. Иса бь һʹьзкьрьн шагьртед хԝә һин кьр, ԝәки чаԝа мьзгинийе бәла кьн, у гәләк щар дьани бира ԝан, ԝәки һʹьшйар бьминьн (Мәт. 24:42; 28:19, 20). Әԝи ӧса жи әԝана ширәт кьрьн, ԝәки бьщәдиньн кӧ дәре тәнгрʹа бькʹәвьнә һьндӧр, у дьл да ԝан ԝәки сьст нәбьн (Луԛа 13:24). Иса да кʹьфше кӧ гәләк фәрз ә шагьртед ԝи һәв һʹьз бькьн, йәктийеда бьминьн, у тʹәмийед ԝи биньн сери (Йуһʹн. 15:10, 12, 13). Әԝ ширәт һʹәта иро гәләк фәрз ә. Иса гот: «Һәр кәсе кӧ жь алийе рʹастийе йә, гӧһ дьдә дәнге мьн» (Йуһʹн. 18:37). Әме нишан кьн, ԝәки гӧһ дьдьнә дәнге ԝи, һәрге бәрдәԝам кьн «ль һәв сәбьр кьн у ль һәв бьбахшиньн» (Колс. 3:13; Луԛа 17:3, 4). Хенщи ве йәке, әм гӧһ дьдьнә дәнге ԝи, чахе бь хирәт мьзгинийе бәла дькьн ԝәхте баш у ԝәхте чәтьнда жи (2 Тимтʹ. 4:2). ԝ19.03 10 ¶9-10