Нисан

Дәрһәԛа хԝә әм чь дькарьн бежьн? Гәло фькьред мә мина йед Хԝәде нә, йан мина ве дьнйайе? Фәʹмдари йә, әм һәр тьшти дькьн сәва пе шьхӧлед хԝә дьле Хԝәде ша кьн. Ле фькьред мә чь щурʹәйи нә? Гәло әм фькьр у ньһерʹандьна хԝә дькьнә анәгори йед Йаһоԝа? Бона ве йәке лазьм ә әм гәләк сәр хԝә бьхәбьтьн. Бь рʹасти мәрьв һеса дькарә мина ве дьнйайе бьфькьрә, чьмки рʹӧһʹе ве дьнйайе дор бәре мә йә (Әфәс. 2:2). Һьн жи, рʹӧһʹе ве дьнйайе мәрьва һелан дькә кӧ хԝәһʹьз бьн, ләма жи әԝ фькьр дькарьн дьле гәләка бен. Бәле, чәтьн ә мина Йаһоԝа бьфькьрьн, ле гәләк һеса йә мина мәрьвед ве дьнйайе бьфькьрьн. Ле һәрге әм бьһельн, кӧ әв дьнйа һʹӧкӧми сәр фькьред мә кә, әме бьбьнә хԝәһʹьз у бьхԝазьн хԝә сәри хԝә бьн, кӧ хԝәха сафи кьн чь рʹаст у чь хьраб ә (Марԛ. 7:21, 22). Ләма жи гәләк фәрз ә кӧ «фькьред» мә мина йед Хԝәде бьн, нә кӧ йед мәрьва. ԝ18.11 18 ¶1; 19 ¶3-4

Иса чьԛас дьлша бу гава хԝәха Йаһоԝа се щара жь әʹзмана ԛәбулкьрьна хԝә жерʹа да кʹьфше. Һәма паши ньхӧмандьна Иса, Йаһоԝа гьлийед жоре гот. Ча те кʹьфше, тʹәне Йуһʹәннайе Ньхӧмдар әԝан гьлийа бьһист. Паше, ԝәкә саләк пешийа мьрьна Иса, се шандийа дәнге Йаһоԝа бьһистьн чахе әԝи гот: «Әв ә Кӧрʹе мьни дәлал, кӧ әз же рʹази мә. Гӧһдарийа ԝи бькьн!» (Мәт. 17:5) Чәнд рʹож пешийа мьрьна Иса жи, Йаһоԝа тʹәви Кӧрʹе хԝә жь әʹзмана хәбәр да (Йуһʹн. 12:28). Рʹаст ә Иса заньбу кӧ ԝе бь мьрьна шәрми бьмьрә, чаԝа бӧхданбеж, ле әԝи дӧа кьр ԝәки ԛьрара Йаһоԝа бе сери, нә кӧ йа ԝи (Мәт. 26:39, 42). Әԝи стуна щәфе һьлда, «шәрм бәр тьштәки һʹәсаб нәкьр», у тʹӧ щар һӧрмәт у ԛәбулкьрьна жь ве дьнйайе нәдьхԝәст, ле йа жь Баве хԝә (Ибрн. 12:2). ԝ18.07 10-11 ¶15-16

Һәма паши ве йәке ча Иса Евара Биранине саз кьр, әԝи мерхасийа мәзьн да кʹьфше. Чаԝа? Иса заньбу ԝәки әԝ ԝе бе гьртьне у ԝе шәрʹа бавежьне кӧ кʹьфри кьрийә. Ле йәкә әԝи ԛьрара Баве хԝә ԛәбул кьр (Мәт. 26:65, 66). Иса бь тʹәмами Хԝәдерʹа амьн ма, сәва наве Йаһоԝа һӧрмәт-рʹумәт кә, пьштгьрийа сәрԝертийа Хԝәде бькә, у рʹе вәкә сәва мәрьвед кӧ тʹобә бькьн, жийина һʹәта-һʹәтайе бьстиньн. Һьн жи, Иса шагьртед хԝә һазьр кьр, чьмки әԝана жи ԝе рʹасти чәтьнайа бьһатана. Иса ӧса жи мерхасийа мәзьн да кʹьфше бь ве йәке, кӧ хәмед хԝә да алики у кʹәтә һʹәйра һʹәԝщед шандийед хԝәйи амьн. Әԝ шива сьвьк, кӧ Иса паши чуйина Щьһуда саз кьр, ԝе бькьра бира ԝан йед кӧ бьбуна бьжартийед ԝи, дәрһәԛа кʹара хуна Иса, кӧ һатә рʹетьне, у дәрһәԛа пәймана тʹәви ԝи (1 Корн. 10:16, 17). ԝ19.01 22 ¶7-8

Һьнге Иса бьһист ча Баве ԝи жь әʹзмана щаба дӧайе ԝи да, гот: «Мьн бьльнд кьр у әзе диса бьльнд кьм». Иса гәләк бәрхԝә дькʹәт, чьмки щабдарийа мәзьн сәр стуйе ԝи бу, әԝ гәрәке Йаһоԝарʹа амьн бьма. Иса заньбу, ԝәки әԝ гәрәке щәфе гьран бькʹьшинә у берʹәʹмти бе кӧштьне (Мәт. 26:38). Ле йа лапә фәрз бона Иса әԝ бу, кӧ наве Баве ԝи бе рʹумәткьрьне. Иса кʹьфьрийеда нәһәԛ дькьрьн у әԝ зәʹф бәрхԝә дькʹәт, чьмки нәдьхԝәст ԝәки мьрьна ԝи наве Хԝәде беһӧрмәт кә. Әм жи мина Иса дьбәкә бәрхԝә дькʹәвьн, ԝәки наве Йаһоԝа нәйе беһӧрмәткьрьне. Дьԛәԝьмә мә нәһәԛ дькьн у бӧхдана давежьнә мә. Йан жи дьбәкә дьле мә нәрʹьһʹәт ә, чьмки әм дәрһәԛа хԝә тьштед ԛәлп дьбьһен, кӧ дьжмьнед мә бәла дькьн. Һьнге дькарә фькьред ӧса бенә һʹьше мә, ԝәки әԝ дәрәԝи наве Йаһоԝа хьраб дькьн. Ле дәрәщед ӧсада гьлийед Йаһоԝа рʹасти жи бәрдьликә мәзьн дьдьнә мә. Наве Йаһоԝа ԝе тʹьме һӧрмәт-рʹумәт бә (Зәб. 94:22, 23; Иша. 65:17). ԝ19.03 11-12 ¶14-16

Шагьртед Иса нькарьбун баԝәр кьрана чь кӧ әԝана жь ԝи бьһистьн. Ԝана тʹьре кӧ Иса гәрәке пʹадшатийа Исраелийа вәгәрʹанда, ле әԝи ԝанрʹа гот кӧ гәрәке зутьрәке бьчәрчьрә у бьмьрә. Пәтрус дәрберʹа ԝи бьрә алики у жерʹа гот: «Һьндава хԝәда ԛәнщ бә, Хӧдан! Әԝ тьшт ԝе тʹӧ щар нәйе сәре тә!». Ле Иса ԝи вәгәрʹанд у гот: «Дури мьн һәрә, Шәйтʹан! Тӧ кәвьр и пешийа мьн, чьмки әԝ фькьред тә нә жь Хԝәде нә, ле жь мәрьва нә» (Мәт. 16:22, 23, ДТʹ; Кʹар. Шанд. 1:6). Бь ԝан гьлийа Иса да кʹьфше фьрԛийа ортʹа фькьред кӧ жь Хԝәде тен у фькьред кӧ жь ве дьнйа Шәйтʹан тен (1 Йуһʹн. 5:19). Пәтрус һьнге ньһерʹандьна ве дьнйайе да кʹьфше, кʹижан кӧ мәрьва һелан дькә тʹәне бона хԝә бьфькьрьн у хԝә нәдьнә щәфе. Ле Иса заньбу ԝәки Баве ԝи щурʹәки майин дьфькьрә. Иса пе щаба хԝә Пәтрусрʹа әшкәрә да кʹьфше, ԝәки әԝ ньһерʹандьна Йаһоԝа ԛәбул дькә, ле ньһерʹандьна ве дьнйайе инкʹар дькә. ԝ18.11 18 ¶1-2

Бьдьн бәр чʹәʹве хԝә кӧ Йаһоԝа чь дьвинә, чахе нав тʹәмамийа дьнйайеда бь милйона мәрьв сәр Шива Хӧдан тʹоп дьбьн. Әԝ нә кӧ тʹәне әʹлаләтәкә мәзьн дьвинә, ле дина хԝә дьдә һәр кәси жь ԝан. Бәʹса хәбәре, әԝ ԝан мәрьва дьвинә, кʹе кӧ һәр сал те сәр Биранине. Нава ԝан мәрьвада һәнә йед ӧса жи, кӧ тен һәла һе һьнге жи, гава рʹасти пәйкʹәтьнед гьран тен. Һьнә мәрьв жи щара найенә щьвате, ле сәр Евара Биранине тʹьме тен, чьмки фәʹм дькьн ԝәки әԝ рʹожәкә гәләк фәрз ә у гәрәке әʹсә бен. Йаһоԝа ӧса жи дина хԝә дьдә ԝан мәрьва, йед кӧ щара пешьн тен, чьмки дьхԝазьн бьвиньн әԝ чь щьвин ә. Бәле, Йаһоԝа ша дьбә чахе дьвинә, кӧ гәләк мәрьв тенә сәр Евара Биранине (Луԛа 22:19). Ле әԝ һе зедә дина хԝә дьдә ве йәке кӧ жь бо чь нети әԝана тен. Бона ԝи дьһа фәрз ә, чь ԝана һелан дькә кӧ бенә сәр Биранине. Гәло хԝәстьна мә һәйә кӧ алийе Йаһоԝада у тʹәшкиләта ԝида кӧ әԝ дьдә хәбате, бенә һинкьрьне? (Иша. 30:20; Йуһʹн. 6:45) ԝ19.01 26 ¶1-3

Иса һазьр бу нә тʹәне әʹмьре хԝә бьдә бона шагьртед хԝә, ле һәр рʹож бькʹәвә һʹәйра ԝан, нә кӧ йа хԝә. Мәсәлә, әԝи һьнге жи бона шагьртед хԝә ԝәʹдә дьдит, гава ԝәстийайи йан жи гәләк дьлтәнг бу (Луԛа 22:39-46). Әԝ мәрʹд бу һьндава мәрьва, у һивийе нибу кӧ жь ԝана кʹаре бьстинә (Мәт. 20:28). Әм пʹара бьратийа Мәсиһийед рʹаст ьн, у әм шабуне дьстиньн гава мәрьвед тʹәзә тʹәглиф дькьн, ԝәки бьбьнә пʹара бьратийа мә. Ле әм дьхԝазьн илаһи али ԝан бькьн, йед кӧ «нәфәред мала Хԝәде» нә, демәк хушк-бьред мә, ле рʹӧһʹанида сьст бунә (Галт. 6:10). Әм һʹьзкьрьна хԝә ԝанрʹа әʹйан дькьн гава дьл дьдьнә ԝан кӧ бенә щьвате, илаһи сәр Евара Биранине. Мина Йаһоԝа у Иса, әм гәләк ша дьбьн чахе хушк йан бьра кʹижан кӧ рʹӧһʹанида кʹәтьнә, диса вәдьгәрʹьн бал Йаһоԝа (Мәт. 18:14). ԝ19.01 29 ¶12, 14; 30 ¶15-16

Иса чахе евара Биранина мьрьна хԝә саз кьр, тʹәне нане шкәва у шәрава Щәжьна Дәрбазбуне да хәбате, кʹижан кӧ ида сәр сьфре һәбун. Иса готә шандийед хԝә, ԝәки әԝ дӧ тьштед сәрәкә, бь симболик бәдәна ԝийә беԛьсур у хуна ԝи дьһатьнә һʹәсабе, кʹижан кӧ әԝи зутьрәке гәрәке бона ԝан ԛӧрбан кьра. Шанди дьбәкә нә жи әʹщебмайи ман, кӧ Иса әв шива тʹәзәйә мәхсус, ӧса сьвьк дәрбаз кьр. Ле чьрʹа? Чәнд мәһ пешийа ве йәке, Иса тʹәсәлийа Лазар, Мәртʹа у Мәрйәме кьр, йед кӧ һәвалед ԝийи незик бун у дәстпекьр ԝана һин кә. Мәртʹа жи ԝедәре бу, ле әԝ педа кʹәтьбу нава һазьркьрьна гәләк хԝарьна, бона меванәки хԝәйи ԛимәт. Чахе Иса әԝ йәк дит, әԝи бь нәрми Мәртʹа ширәт кьр, сәва али ԝе бькә кӧ әԝ фәʹм кә, ԝәки тʹьме нәлазьм ә щурʹә-щурʹә хԝарьн чекә (Луԛа 10:40-42). Ԝәʹдә шунда, чахе чәнд сьһʹәт мабу кӧ Иса әʹмьре хԝә ԛӧрбан кьра, әԝи хԝәха әв ширәт да хәбате. Әԝи шива Биранине сьвьк дәрбаз кьр у шагьртед хԝәрʹа мәсәлә һишт кӧ ча гәрәке дәрбаз кьн. ԝ19.01 20-21 ¶3-4

Йаһоԝа Иса ӧса хәлат кьр кӧ ԝи «бьльнд кьр», у жерʹа кʹәрәмәкә ӧса да, кӧ пешийа ԝи тӧ кәс нәсьтандьбу. Әԝ һәйә жийина нәмьри (Фили. 2:9; 1 Тимтʹ. 6:16). Рʹасти жи бона амьнийа хԝә Иса чьԛас һатә кʹәрәмкьрьне у һʹӧрмәткьрьне! Чь ԝе али мә бькә ԝәки әм ԛәбулкьрьна ве дьнйайе нәгәрʹьн? Әм гәрәке бир нәкьн кӧ Йаһоԝа тʹьме дьшекьринә, ԛәбул дькә у кʹәрәм дькә хьзмәткʹаред хԝәйи амьн у гәләк щар әԝ кʹәрәмед ӧса дьдә ԝан, кӧ әԝана нә жи һивийе нә. Рʹасти жи кʹе занә кʹижан кʹәрәм һивийа мә нә? Ле иро, чахе әм тәнгасийа у щерʹьбандьнада сәбьр дькьн, ԝәрә тʹӧ щар бир нәкьн, ԝәки әԝ дьнйа ԝе кʹӧта бә (1 Йуһʹн. 2:17). Баве мәйи Әʹзмана Йаһоԝа сәр нәһәԛийе нинә, ԝәки кьред мә у әԝ һʹьзкьрьна кӧ әм бона наве ԝи дьдьнә кʹьфше, бир бькә (Ибрн. 6:10). ԝ18.07 11 ¶17-18

Иса ԝәʹде шива хԝәйә пашьн, бона йәктийа шандийед хԝә хәм дькьр. Чахе әԝи тʹәви ԝан дӧа кьр, һьнге дӧада гот ԝәки әԝ дьхԝазә кӧ һʹәму шагьртед ԝи бьбьнә йәк, чаԝа әԝ тʹәви Баве хԝә йәк ьн. Йәктийа ԝан ԝе шәʹдәтикә мәзьн бьда, у избат кьра ԝәки Йаһоԝа Иса шандә сәр әʹрде сәва ԛьрара ԝи бинә сери. Һʹьзкьрьн гәрәке бьбуйа нишанәкә шагьртед Исайә рʹаст. У әԝе һʹьзкьрьне ԝе ԝана бькьра йәктийе (Йуһʹн. 13:34, 35). Әʹщебмайи нинә кӧ Иса ве еваре дәрһәԛа йәктийе хәбәр да, чьмки тʹәхмин кьр ԝәки нава шандийада тʹьфаԛи кем ә. Әԝана чәнд щара һәврʹа кʹәтьнә дәʹԝе кӧ нав ԝанда «кʹижан ԝе йе һәри мәзьн бе һʹәсабе» (Луԛа 22:24-27; Марԛ. 9:33, 34). Щарәке жи, Аԛуб у Йуһʹәнна жь Иса һиви кьрьн, ԝәки әԝ Пʹадшатийа хԝәда щийед бьльнд бьдә ԝан (Марԛ. 10:35-40). ԝ18.06 8 ¶1-2

Йаһоԝа дьхԝазә ԝәки жьн-мер ӧса ԛайим һәв һʹьз бькьн, ԝәки һʹьзкьрьна ԝан һʹәта-һʹәтайе бә (Мәт. 19:3-6). Ԛави әԝ һәйә йәк жь хьрабийед лапә мәзьн, кʹижан кӧ мәрьве беһʹьзкьрьн дькә. Ләма жь Дәһә Тʹәмийа йа һʹәфта зьни ԛәдәхә дькьр (Ԛан. Дщр. 5:18). Әԝ «ль бәр Хԝәде» гӧнә йә у һьндава жьн йан жи мерда хьрабикә бехԝәдети йә (Дәстп. 39:7-9). Әԝед кӧ рʹасти ве хьрабийе тен, дькарьн һәла һе жи бь дәһа сала әви дәрди кӧ нәмами ԝан кьрьн, бир нәкьн. Йаһоԝа ӧса жи гәләк хәм дькә бона һʹалхԝәшийа зарʹа. Йаһоԝа тʹәми да де-бава, ԝәки нә тʹәне һʹәԝщед физикида али зарʹа бькьн, ле алийе рʹӧһʹанида жи. Де-бав гәрәке һәр мәщал бьдана хәбате, сәва али зарʹа бькьрана кӧ әԝана Ԛануна Йаһоԝа фәʹм кьрана, ԛимәт кьрана, у Хԝәде һʹьз кьрана (Ԛан. Дщр. 6:6-9; 7:13). Де-бава гәрәке ӧса һʹәсаб нәкьрана кӧ зарʹед ԝан ьн у ча бьхԝәстана ӧса буна һьндава ԝанда, ле гәрәке ԝана фәʹм кьрана, кӧ зарʹ һәнә ча мьлкʹ, демәк пʹешкʹеш жь Йаһоԝа, кʹижан гәрәке ԛимәт кьрана у хԝәй кьрана (Зәб. 127:3). ԝ19.02 21 ¶5, 7

Ибо ӧса жи беԛьсуртийа хԝә бь ԝи щурʹәйи хԝәй кьр, кӧ бир нәдькьр, ԝәки Хԝәде ԝе ахьрийеда ԝи кʹәрәм кә. Әԝи баԝәр дькьр, кӧ Хԝәде беԛьсуртийа ԝи ԛимәт дькә. Нава тәʹли-тәнгийада жи, Ибо баԝәр дькьр, кӧ ахьрийеда Йаһоԝа ԝе ԝи хәлат кә. Әԝе баԝәрийе бешьк али ԝи кьр, кӧ әԝи беԛьсуртийа хԝә ӧнда нәкьр. Рʹаст ә Ибо гӧнәкʹар бу, ле Йаһоԝа беԛьсуртийа ԝирʹа ша дьбу у һе зедә кʹәрәм сәрда баранд (Иб. 42:12-17; Аԛуб 5:11). У кʹәрәмед һе мәзьн ахьрийеда һивийа Ибо нә. Хԝәдайе мә найе гӧһастьне (Малх. 3:6). Һәрге әм бир нәкьн, ԝәки беԛьсуртийа мә бәр чʹәʹве Йаһоԝа ԛимәт ә, әме бькарьбьн баԝәрийа хԝә һьндава ахьрийе дьле хԝәда сах хԝәй кьн (1 Тʹеслн. 5:8, 9). Щара дьбәкә һун хԝә тʹәне тʹәхмин кьн, жь бо ве йәке кӧ бьфькьрьн, ԝәки дор бәре ԝә тʹӧ кәс хԝә беԛьсуртийе нагьрә. Ле бь рʹасти һуне тʹӧ щар тʹәне нибьн. Һуне нава бь милйона мәрьвед нав тʹәмамийа дьнйайеда бьн, йед кӧ бь амьни беԛьсуртийа хԝә хԝәй дькьн. Ӧса жи һуне нава ԝан мәрьвада бьн, йед кӧ һена бәре беԛьсуртийа хԝә хԝәй кьрьнә, һәла һе жи чахе мьрьн пешийа ԝан буйә (Ибрн. 11:36-38; 12:1). ԝ19.02 7 ¶15-16

Рʹожа Биранине ида незик дьбә, у ԝе баш бә әм ԝан пьрса бьдьнә хԝә: «Әз ча дькарьм һʹьзкьрьнеда һе зедә чʹәʹв бьдьмә Иса? Әз һе зедә дькʹәвьмә һʹәйра хԝә, йан һʹәйра хушк-бьред хԝә? Гәло дьбәкә әз жь хушк-бьред хԝә гәләк дәԝа дькьм, йан әз фәʹм дькьм әԝана чь дькарьн у чь нькарьн?» Ԝәрә әм һәр гав чʹәʹв бьдьнә Иса у «сәр һәв шәԝат бьн». Дәрбазкьрьна Евара Биранина Мьрьна Иса, ида ԝе гәләк ԝәхт нәкʹьшинә. Чахе Иса ԝәʹде тәнгасийа мәзьн «бе», әԝе бьжартийед хԝә кӧ ль сәр әʹрде манә, ль әʹзмана тʹоп кә, у Биранин ԝе ида нәйе дәрбазкьрьне (1 Корн. 11:26; Мәт. 24:31). Һәла һе чахе Биранин ида ԝе нәйе дәрбазкьрьне, йәкә әм дӧдьли ниньн, ԝәки щьмәʹта Йаһоԝа ԝе бь дьл у щан бинә бира хԝә әԝ шива сьвьк, кʹижан кӧ мьлукти, мерхаси у һʹьзкьрьна мәзьн дьдә кʹьфше, кӧ нава тʹәрихийа инсанәтеда тʹӧ кәси нәдайә кʹьфше. ԝ19.01 25 ¶17-19

Ԝәрә әм дина хԝә бьдьн мәсәләкә дәрһәԛа сьһʹәт-ԛәԝата мәрьва, кӧ дьдә кʹьфше ԝәки гәләк фәрз ә һаш жь хԝә һәбьн кӧ әм һӧндӧрʹда мәрьвнә чь щурʹәйи нә. Йа пешьн, сәва кӧ сьһʹәт-ԛәԝата мә баш бә, әм гәрәке хԝарьнәкә керһати бьхԝьн, у щар-щара спортева мьжул бьн. Сәва әм рʹӧһʹанида жи сьһʹәт-ԛәԝат бьн, әм гәрәке хԝарьна рʹӧһʹани бьхԝьн у тʹьме пе әʹмьре хԝә избат кьн, кӧ баԝәрийа хԝә Йаһоԝа тиньн. Әԝ баԝәрийа мә те кʹьфше, чахе әм ԝан тьшта тиньн сери чь кӧ педьһʹәсьн у дәрһәԛа баԝәрийа хԝә гьли дькьн (Рʹом. 10:8-10; Аԛуб 2:26). Йа дӧда, чахе бәдәна мә рʹува баш те хане, әм дьбәкә дьфькьрьн, ԝәки сьһʹәт-ԛәԝат ьн, ле йәкә навдьле мә нәхԝәш ә. Ԝи щурʹәйи, чахе әм шьхӧлед рʹӧһʹани дькьн, дьбәкә әм дьфькьрьн ԝәки баԝәрийа мә ԛәԝи йә, ле дьле мәда хԝәстьнед хьраб дьбәкә шин дьбьн (1 Корн. 10:12; Аԛуб 1:14, 15). Әм гәрәке тʹӧ щар бир нәкьн, ԝәки Шәйтʹан дьхԝазә фькьред мә мина йед ԝи бьн. ԝ19.01 15 ¶4-5

Дьбәкә әм жи пьрсе бьдьнә хԝә: «Ле әз мина ԝи мәрьве Самәри дьлшәԝат ьм? (Луԛа 10:30-35) Әз дькарьм һе зедә рʹәʹм бьм у ԛәнщийе бькьм ԝан мәрьварʹа, йед кӧ тәнгасийеда ньн? Мәсәлә, әз дькарьм аликʹарийе бьдьм хушк-бьред әʹмьрда мәзьн, жьнәбийа, йан ԝан зарʹа де-баве кʹижана нәбаԝәр ьн? Әз дькарьм дьл бьдьмә бәр ԝан мәрьва, йед кӧ дьлшкәсти нә у депресийеда ньн?» (1 Тʹеслн. 5:14; Аԛуб 1:27) Чахе әм һьндава мәрьва рʹәʹм ьн, әм бәхтәԝар дьбьн, чьмки мәрʹданийе дьдьнә кʹьфше. Хенщи ве йәке, әм заньн, ԝәки әм ӧса дьле Йаһоԝа ша дькьн (Кʹар. Шанд. 20:35; Ибрн. 13:16). Даԝьд дәрһәԛа мәрьве дьлрʹәʹм, гот: «Хӧдане ԝи хԝәй кә у әʹмьр бьдә, әԝе ль сәр дьне хԝәзьли бә» (Зәб. 41:1, 2). Чахе әм дьлшәԝат ьн һьндава мәрьва, Йаһоԝа жи ԝе һьндава мәда рʹәʹм бә у һʹәта-һʹәтайе бәхтәԝарийе бьдә мә (Аԛуб 2:13). ԝ18.09 19 ¶11-12

Хушкәкә амьн кӧ наве ԝе Йошико йә, жь һʹәкима хԝә әʹламәтийа хьраб пеһʹәсийа. Һʹәким жерʹа гот, ԝәки әԝ ԝе тʹәне чәнд мәһа бьжи. Ле Йошико чь кьр чахе әԝ йәк бьһист? Әԝе һьнге рʹезәкә Кʹьтеба Пироз кӧ гәләк һʹьз дькьр, ани бира хԝә, әԝ һәбу рʹеза ве рʹоже. Паше әԝе рʹьһʹәт һʹәкима хԝәрʹа гот, ԝәки әԝ натьрсә, чьмки Йаһоԝа дәсте ԝе дьгьрә. Гьлийед жь ве рʹезе али ԝе хушке кьрьн, кӧ әԝе бь тʹәмами итʹбарийа хԝә Йаһоԝа ани. Әԝ рʹез ԝе али мә жи бькә ԝәʹде тәнгасийед гьран дьлрʹьһʹәтийе ӧнда нәкьн. Йаһоԝа әԝ гьли бь Ишайа да ньвисаре, пешийе сәва дьлбинийе бьдә ԝан Щьһуйед кӧ ԝе бькʹәтана дилтийа Бабилоне. Ле Йаһоԝа әԝ гьли да хԝәйкьрьне нә тʹәне бона кʹара ԝан Щьһуйа, ле ӧса жи бона һʹәму щьмәʹта хԝә һʹәта рʹожа иро (Иша. 40:8; Рʹом. 15:4). Иро әм зәманед хьрабда дьжин, ләма илаһи ньһа мәрʹа гәләк лазьм ә әԝ бәрдьли, кӧ кʹьтеба Ишайада ньвисар ә (2 Тимтʹ. 3:1). ԝ19.01 2 ¶1-2

Чахе жьн-мер ве дәрәщеда жь һәв башԛә дьбьн, әԝана йәкә диса жи зәԝащеда ньн. Һәрге жи әԝана жь һәв башԛә бьжин, йәкә һәрдӧ жи ԝе рʹасти чәтьнайа бен. Паԝлосе шанди гот кӧ чьрʹа баш ә жьн-мер тʹәвайи бьминьн: «Мере нәбаԝәр бь жьна баԝәрмәнд һʹәлал дьбә у жьна нәбаԝәр жи бь мере баԝәрмәнд һʹәлал дьбә. Һәгәр ӧса нибуйа, зарʹед ԝәйе һʹәрам буна, ле ньһа һʹәлал ьн» (1 Корн. 7:14). Гәләк Мәсиһийед амьн, чәтьнайед гьранда жи тʹәви мер йан жьна хԝәйә нәбаԝәр манә. У әԝана гәләк ша бунә, гава дитьнә ԝәки әԝ ԛӧрбанкьрьн һежа бу, чьмки ахьрийеда йе нәбаԝәр бу хьзмәткʹаре Йаһоԝа (1 Корн. 7:16; 1 Пәт. 3:1, 2). Иро нав тʹәмамийа дьнйайеда щьватед мәда тʹьжә зәԝащед бәхтәԝар һәнә. Щьвата ԝәʹда жи ԝе һәбьн жьн-мер кӧ зәԝаща хԝәда бәхтәԝар ьн. Әԝ бьред амьн кӧ жьна хԝә һʹьз дькьн у әԝ жьнед кӧ мере хԝә һʹьз дькьн, нишан дькьн ԝәки те стандьне кӧ зәԝаще һӧрмәт кьн (Ибрн. 13:4). ԝ18.12 14 ¶18-19

Еден те һʹәсабе «Ләзәт», у рʹасти жи әԝи бахчәйи ләзәт дьани. Әԝ щики гәләк бәдәԝ у хԝәш бу, бь хԝарьне тʹьжә бу у ӧса жи ортʹа мәрьва у һʹәйԝанада әʹдьлайи һәбу (Дәстп. 1:29-31). Хәбәра Ибрани «бахчә», сәр зьмане Йунани һатә ԝәлгәрʹандьне ча «парадеисос». Әнсиклопедйаке («Thе Cyclopaеdia by M’Clintock and Strong»), дәрһәԛа ве хәбәра «парадеисос» дьбежә: «Парка мәзьн, жь зийане хԝәйкьри, бь тʹәбйәте у бь бахед бәдәԝ, сәр кʹижана гәләк емиш һәнә, у те авдане пе ава тʹәмьз жь әʹрде, кʹидәре кәрийед бьзьнед ԛәйа у пәз дьчʹерьн». Рʹеԝийе Йунан чахе әв хәбәр «парадеисос» дьбьһист, әԝ тьшт дьһатьнә һʹьше ԝи. Әԝ шьровәкьрьн али мә дькә кӧ фәʹм кьн, ԝәки бахче Едене бь рʹасти щьнәт бу (Бәрамбәр кьн Дәстпебун 2:15, 16). Хԝәде Адәм у Һеԝа щьнәта ԝи щурʹәйида щиԝар кьр, ле әԝана ԝедәре нәман, чьмки ԝана гӧрʹа Хԝәде нәкьр, ләма жи һьн әԝана һьн жи рʹькʹьнйата ԝан нькарьбун щьнәтеда бьжитана (Дәстп. 3:23, 24). Рʹаст ә паши ве йәке ԝедәре ида тӧ кәс нәдьжит, ле ча те кʹьфше әԝ бахчә һʹәта Селава ԝәʹде Нӧһ һе һәбу. ԝ18.12 3-4 ¶3-5

Де-бав чахе зарʹед хԝә мәзьн дькьн, тьштед ԛәнщ һин дькьн у ширәт дькьн. Һәрге зарʹ бьжин ӧса чаԝа де-бав әԝана һинкьрьнә, ԝе әʹмьре хԝәда сафикьрьнед ӧса бькьн, кӧ паше пʹошман нәбьн. Ԝи щурʹәйи зарʹ ԝе хԝә жь гәләк проблема у дьлтәнгбуне хԝәй кьн. Мина бавәки ԛәнщ, Йаһоԝа дьхԝазә ԝәки зарʹед ԝи бь әʹмьрәки бәхтәԝар бьжин (Иша. 48:18). Бона ве йәке, әԝи принсипед дәрһәԛа намусийе у рʹабун-рʹуньштьне дайә мә у ӧса жи ширәт кӧ ча бьн һьндава мәрьва. Әԝ дьхԝазә ԝәки әм сәр ԝан тьшта мина ԝи бьфькьрьн у анәгори ве йәке бьжин. Әв йәк мә нә кӧ дькә синора, ле мә аԛьл дькә, һин дькә рʹаст бьфькьрьн у тьшта бьщерʹьбиньн (Зәб. 92:5; Мәтʹлк. 2:1-5; Иша. 55:9). Әԝ йәк ԝе али мә бькә сафикьрьнед ӧса бькьн, кʹижан кӧ ԝе мә бәхтәԝар кьн у хәйсәт-һʹӧнӧред мә баш кьн (Зәб. 1:2, 3). Бәле, чахе әм мина Йаһоԝа дьфькьрьн, әм гәләк тьштада кʹаре дьстиньн. ԝ18.11 19-20 ¶7-8

Сәва рийа рʹастийеда бьминьн, әм гәрәке нәкʹәвьнә бәр байе мәрьва. Чахе мә тʹәзә дәстпекьр рʹастийеда һәрʹьн, һәләԛәтийа мә тʹәви нә Шәʹдед Йаһоԝа у нәфәред мә һатә гӧһастьне. Һьнәка ԛәдьре баԝәрийа мә гьртьн, һьнәк жи мьԛабьли мә дәркʹәтьн. Нәфәред мә, һәвалхәбатчийед мә, у һәвалдәрсханед мә дьбәкә мә тʹәглиф дькьн сәр щурʹә-щурʹә щәжьна. Ле чаԝа әм нәкʹәвьнә бәр байе ԝан, у тʹәви ԝан әʹдәт у щәжьна нәбьн, кʹижан кӧ Йаһоԝа һӧрмәт накьн? Әм гәрәке тӧ щар бир нәкьн ньһерʹандьна Йаһоԝа сәр ԝан тьшта. Бона ве йәке лазьм ә, әм әʹдәбйәтед мәда леколина бькьн у пебьһʹәсьн, кӧ әԝ щәжьн жь кʹидәре һатьнә. Чахе әм дькьнә бира хԝә ԝан мәʹнийед сәр һʹиме Кʹьтеба Пироз, ԝәки чьрʹа әм ԝан щәжьна дәрбаз накьн, әм дӧдьли набьн кӧ әм ве рʹеда дьчьн, кʹижан «Хӧдан хԝәш те» (Әфәс. 5:10). Һәрге әм итʹбарийа хԝә Йаһоԝа у Хәбәра ԝи тиньн, «тьрса мерьв» ԝе сәр мә тʹӧнә бә (Мәтʹлк. 29:25). ԝ18.11 11 ¶10, 12

Чахе әʹмьре мәда ньшкева тьштәк те гӧһастьне, әм дькарьн дәстпекьн бона ахьрийе гәләк бәрхԝә кʹәвьн у һʹьш-аԛьле хԝә педа бьдьнә сәр проблема хԝә. Әԝ йәк дькарьбу тʹәви Усьв жи бьԛәԝьмийа. Ле дәԝсе әԝи һәр тьшт дькьр, сәва һʹале хԝәда чьԛас дькарә сәбьр кә, у бь ве йәке әԝи мәщал да Йаһоԝа кӧ щәфе ԝи кʹәрәм кә. Чаԝа бал Потифар Усьв рʹьнд дьхәбьти, әԝи кәледа жи һәр шьхӧл кӧ сәрԝере кәле дьда ԝи, рʹьнд дьани сери (Дәстп. 39:21, 22). Мина Усьв, әм жи щара дәрәща хԝә нькарьн бьгӧһезьн йан жи әм нькарьн проблема хԝә сафи кьн. Ле йәкә һәрге әм сәбьр дькьн у ве дәрәщеда алийе хԝәда һәр тьшти дькьн, әм мәщале дьдьнә Йаһоԝа, ԝәки мә кʹәрәм кә (Зәб. 37:5). Бәле, щара әм сьст дьбьн у дьԝәстьн, ле әм тʹӧ щар бечʹарә наминьн (2 Корн. 4:8). Әԝ гьлийед Паԝлос жь ве рʹезе, ԝе сәр мә бенә сери, илаһи һәрге әм хьзмәтийеда хирәта хԝә ӧнда нәкьн. ԝ18.10 29 ¶11, 13

Ԝәйе ча хԝә тʹәхмин кьра һәгәр мәрьве кӧ һун нас дькьн у ԛәдьре ԝи дьгьрьн, наве ԝә бир кьра, йан һәла һе жи һун ԛә нәһатана бира ԝи? Әԝ йәк ԝе дьле ԝә нәһата, ӧса нинә? Ле чьрʹа? Чьмки бал мә һәр кәси һәйә хԝәстьнәкә тʹәбийәти, әм дьхԝазьн ԝәки мә ԛәбул кьн. Хенщи ве йәке, әм дьхԝазьн ԝәки мәрьв ӧса жи бьзаньбьн әм мәрьвнә чь щурʹәйи нә у кьред мә бьшекьриньн (Жьмар 11:16; Иб. 31:6). Ле һәрге әм фәсал нибьн, әԝ хԝәстьна мә ԝәки мәрьв мә ԛимәт кьн, дькарә алийе нәрʹастда һәрә, чьмки әм гӧнәкʹар ьн. Әм дькарьн бьхԝазьн ԝәки мәрьв мә бьльнд кьн у мәрʹа фьрнаԛ бьн. Дьнйа Шәйтʹан мәрьва һелан дькә ԝәки пәй навдарийе у һӧрмәте кәвьн. Чахе мәрьв дькʹәвьнә бәр байе ве йәке, әԝана бир дькьн кӧ кʹе бь рʹастийе һежайи һӧрмәте у һʹәбандьне йә, демәк Баве мәйи әʹзмана, Йаһоԝа Хԝәде (Әʹйан. 4:11). ԝ18.07 7 ¶1-2

Әм мәтʹал наминьн чахе Шәйтʹан у щьнед ԝи мәрьвед хԝәйиһʹӧкӧм һелан дькьн кӧ «дәрәԝ» бежьн (1 Тимтʹ. 4:1, 2). Сәрԝеред религийа кӧ дәрәԝа дькьн, илаһи гәләк нәһәԛ ьн, чьмки әԝана дәрәԝед ӧса бәла дькьн, кӧ әʹмьре мәрьва дькьнә бьн хофе. Чь щурʹәйи? Һәрге кәсәк һинкьрьнед ԛәлп баԝәр бькә у тьштед ӧса бькә, кӧ Хԝәде ԛәдәхә дькә, әԝ мәрьв дькарә әʹмьре һʹәта-һʹәтайе нәстинә (Һос. 4:9). Иса заньбу ԝәки сәрԝеред религийа кӧ ԝәʹде ԝида дьжитьн, дәрәԝийеда нәһәԛ бун. Әԝи рʹастә-рʹаст ԝанрʹа гот: «Ԝәй ль ԝә ԛанунзан у ферьсийа! Дӧрʹуно! Һун бәр у бәже ль һәв дьдьн, кӧ йәки нәбаԝәр биньн сәр рʹийа хԝә. Гава мәрәме ԝә дьбә, һун әԝи жь хԝә дӧ щара зедәтьр дькьнә пʹара гәәна [ԛьрʹкьрьна һʹәта-һʹәтайе]» (Мәт. 23:15, ДТʹ). Иса ԝан сәрԝеред религийа гәләк сәрт сущдар кьр. Әԝана рʹасти жи жь баве хԝә Мире-щьна бун, йе кӧ ԛәтʹьл ә (Йуһʹн. 8:44). ԝ18.10 7 ¶5-6

Бь ԝан гьлийа Иса чь дьхԝәст бьгота? Әԝи гот: «Әшԛ у ша бьн, чьмки һәԛе ԝә ль әзмана гәләк ә. Бь ви щурʹәйи пʹехәмбәред кӧ бәри ԝә һәбун, зерандьн» (Мәт. 5:12). Чахе шанди һатьнә кʹӧтане у ԝанрʹа һатә готьне ԝәки ида хьзмәт нәкьн, әԝана «жь щьвина гьрәгьра чун, ша дьбун». Фәʹмдари йә, әԝана кʹӧтанерʹа ша нәдьбун, ле ша дьбун, чьмки «бона наве Иса һежайи рʹәзилкьрьне бунә» (Кʹар. Шанд. 5:41). Ԝәʹде мәда жи, щьмәʹта Йаһоԝа бь шабуне сәбьр дькә, гава бона наве Иса те зерандьне йан жи чахе рʹасти чәтьнайа те (Аԛуб 1:2-4). Мина шандийа, әм жи ԝан тәнгасийарʹа ша набьн, ле чахе әм ԝәʹде ԝан чәтьнайа амьнийа хԝә Хԝәдерʹа хԝәй дькьн, Йаһоԝа али мә дькә әм сәбьр кьн у ԛәԝи бьминьн. Һәрге жи пәй мә дькʹәвьн йан жи нәфәред мә мьԛабьли мә нә, ле «Хԝәдейе хԝәзьли» мә ԛәбул дькә, йәкә әм дькарьн бәхтәԝар бьн (1 Тимтʹ. 1:11). ԝ18.09 21 ¶18-20

Әм дьжин «зәманед» хьрабда, ләма жи әʹмьр «бь зәмәт» у «кʹәдәр» тʹьжә йә, у гәләк мәрьв емосийалида сьст дьбьн у дькʹәвьнә депресийе (2 Тимтʹ. 3:1-5). Гәләк мәрьв ӧса дьԝәстьн, кӧ ида нахԝазьн бьжин. Һʹәсаб нишан дькьн, ԝәки һәр сал 800 000 мәрьва зедәтьр хԝә дькӧжьн, дәрте кӧ һәр 40 сәнида ԝәкә мәрьвәк дьмьрә. Йазьх, һәла һе һьнә Мәсиһи жи, йед кӧ емосийалида сьст бьбун, хԝә кӧштьн. Иро гәләк хушк-бьред мә рʹасти гәләк чәтьнайа у стресе тен, у ләма ԝанрʹа һʹьзкьрьна мә лазьм ә. Һьнәк бона баԝәрийе рʹасти пәйкʹәтьна тен йан жи мәрьв ԛәрфа ԝан дькьн. Һьнәк жи сәр хәбате бәр бӧхдан у гәвәстийе тәйах дькьн. Бал һьнәка жи малда проблем һәнә, мәсәлә мер йан жьна нәбаԝәр тʹьме ԝан беһӧрмәт дькә. Сәва ԝан проблема, гәләк хушк-бьра һьн физикида һьн жи емосийалида сьст дьбьн у дьԝәстьн. ԝ18.09 13 ¶3, 5

Де-бав кӧ Мәсиһи нә, тʹәви Йаһоԝа һәвкʹарийе дькьн, чахе али зарʹед хԝә дькьн кӧ нетед рʹӧһʹани дайньн пешийа хԝә. Гәләка кӧ ӧса зарʹед хԝә һелан дькьрьн, ахьрийеда зарʹед ԝан бунә хьзмәткʹаред һәртʹьм. Мәсәлә, һьнәк бунә мисйонер, һьнәк ча пешәнг хьзмәт дькьн щийед кӧ һʹәԝщәти һәйә, һьнәк жи Бәйтʹәледа хьзмәт дькьн. Чахе де-бав жь зарʹа дур ьн, тʹьме найе стандьн ԝәки һәв бьвиньн. Ле йәкә әԝ де-бав дьл дьдьнә зарʹед хԝә, ԝәки кʹьфшкьрьна хԝәда бьминьн. Ле чьрʹа? Чьмки дьле ԝан ша дьбә у әԝана дьлрʹьһʹәт ьн, кӧ зарʹед ԝан шьхӧле Хԝәде датиньн щийе пешьн. Дьбәкә гәләк жь ԝан де-бава мина Һаннайе хԝә тʹәхмин дькьн, чахе әԝе гот кӧ кӧрʹе хԝә Самуйел «пʹешкʹеши» Йаһоԝа дькә. Де-бав әԝе йәке ча ԛәдьрәки мәхсус һʹәсаб дькьн, чьмки ԝи щурʹәйи тʹәви Йаһоԝа һәвкʹарийе дькьн (1 Сам. 1:28). ԝ18.08 24 ¶4

Иса нәгот кӧ әԝ йәк найе стандьн. Әԝи йәкә ӧса жи гот: «Хԝәзи ль ԝә фәԛира, чьмки Пʹадшатийа Хԝәде йа ԝә йә» (Луԛа 6:20). Ле бәле, әԝ нәдьһатә һʹәсабе, ԝәки һʹәму мәрьвед кʹәсиб ԝе бьһатана кʹәрәмкьрьне у һинкьрьнед Иса ԛәбул кьрана. Гәләк кʹәсиб нәбунә шагьртед Иса. Фькьра сәрәкә әԝ ә, кӧ әм гәрәке тʹӧ щар мәрьва сущдар нәкьн сәр һʹиме һәбука ԝан, чьмки һәләԛәтийа ԝан тʹәви Йаһоԝа, һәбука ԝанва гьредайи нинә. Бона мә кʹәрәм ә кӧ гәләк хушк у бьред мә һәнә, йед кӧ бь тʹәмамийа дьле хԝә Йаһоԝарʹа хьзмәт дькьн, фьрԛи тʹӧнә әԝана дәԝләти нә йан кʹәсиб ьн. Кʹьтеба Пироз йед дәԝләти ширәт дькә кӧ итʹбарийа хԝә нә кӧ «һәбука пʹучʹә дәрәԝ» биньн, ле Хԝәде (1 Тимтʹ. 6:17-19). Хәбәра Хԝәде ӧса жи һʹәму хьзмәткʹаред Хԝәде ширәт дькә, һьн йед дәԝләти һьн жи йед кʹәсиб, ԝәки фәсал бьн кӧ пʹәрәһʹьз нибьн (1 Тимтʹ. 6:9, 10). Һәрге әм сәр хушк-бьра ӧса бьньһерʹьн ча Йаһоԝа дьньһерʹә, һьнге әме тʹӧ щар ԝана башԛә нәкьн жь бо ве йәке, кӧ дәсте ԝанда һәйә йан на. ԝ18.08 10-11 ¶11-12

Бешьк, әм дьхԝазьн Йаһоԝарʹа нишан кьн, ԝәки дьшекьриньн ԝи ԛәдьри кӧ әм нава щьмәʹта ԝи нә. Әм заньн ԝәки әԝ сафикьрьнәкә билан бу кӧ мә хԝә тʹәсмили ԝи кьрийә. Әм хԝә жь һәр хьрабийе дур дьгьрьн. У әм хушк-бьред хԝә һʹьз дькьн у ԛәдьре ԝан дьгьрьн, чьмки әԝана жи пʹара Йаһоԝа нә (Рʹом. 12:10). Кʹьтеба Пироз соз дьдә: «Хӧдан щьмәʹта Хԝә жь бәр Хԝә навежә» (Зәб. 94:14). Бәле, чь жи әʹмьре мәда бьԛәԝьмә, Йаһоԝа ԝе тʹьме тʹәви мә бә. Һәла һе мьрьн жи нькарә мә жь һʹьзкьрьна Йаһоԝа бьԛәтинә (Рʹом. 8:38, 39). «Аԝа һәгәр әм бьжин йан бьмьрьн, пʹара Хӧдан ьн» (Рʹом. 14:8). Әм гьшк гәләк һивийа ве рʹоже нә, гава Йаһоԝа һʹәму достед хԝәйә амьн йед кӧ мьрьнә, жь мьрьне рʹакә (Мәт. 22:32). Ле әм иро жи гәләк кʹәрәмед ԝи дьвиньн. Чаԝа кӧ Кʹьтеба пироз дьбежә, «хԝәзи ль ԝи мьләти, Хԝәдейе кʹижани Йаһоԝа йә у ль ԝе щьмәʹте, кʹижан бьжарт кьрә ԝаре Хԝә» (Зәб. 33:12, ДТʹ). ԝ18.07 26 ¶18-19

Һьнәк дьфькьрьн, кӧ һьнә бьжартьн, мәсәлә хԝәндьна бьльнд, хәбат, йан жи карйера, сафикьрьнед шәхси нә, у һәрге исафа ԝан дьһелә, азайа ԝан һәйә чь дьхԝазьн ве бьжберьн. Дьбәкә әԝана әв гьлийед Паԝлос дьбежьн: «Чьма гәрәке азайийа мьн бона . . . исафа йәки майин бе ломәкаркьрьне?» (1 Корн. 10:29) Әв рʹаст ә кӧ азайа мә һәйә ԝан бьжартьнед шәхси бькьн, ле әм гәрәке ӧса жи бир нәкьн, ԝәки азайа мә бь синор ә у һʹәму сафикьрьнед мә сәр әʹмьре мә һʹӧкӧм дьбьн. Әԝ йәк Паԝлос рʹьнд да кʹьфше рʹеза ве рʹожеда. Әв рʹез рʹьнд нишан дькә ԝәки йа лапә фәрз хԝәстьнед мә ниньн чахе әм әʹмьре хԝәда бьжартьна дькьн, чьмки һәнә тьштед һе фәрз кӧ әм гәрәке һьлдьнә һʹәсабе хԝә. ԝ18.04 10 ¶10

Иро Мәсиһи дьбәкә Йаһоԝарʹа хьзмәт кә, ле тьштед ӧса бькә кӧ бәр чʹәʹве Хԝәде рʹәш ьн (Щьһуд. 11). Әԝ дькарә хьзмәтийеда хирәт бә у тʹьме бе сәр щьвате жи. Ле әԝ ӧса жи тьштед нәщайиз дькарә бькә, мәсәлә дьбәкә сәр тьштед бенамуси бьфькьрә у бьдә бәр чʹәʹве хԝә, у дьле хԝәда тьма бә, йан хушк-бьра нәфрʹәт кә (1 Йуһʹн. 2:15-17; 3:15). Әԝ тьшт дькарьн Мәсиһи бәрбь кьред хьраб бьвьн, демәк бәрбь гӧнә. Бәр мәрьва әм дькарьн фькьр у кьред хԝә вәшерьн, ле жь Йаһоԝа әм тʹӧ тьшти нькарьн вәшерьн. Чахе әм бь тʹәмамийа дьле хԝә алийе ԝи ниньн, әԝ занә, чьмки әԝ һәр тьшти дьвинә (Йерәм. 17:9, 10). Ле Йаһоԝа ләз накʹәвә дәрберʹа мә инкʹар кә. Чахе әԝ дьвинә ԝәки әм дькʹәвьнә тʹәльке у жь ԝи дур дькʹәвьн, әԝ мә ширәт дькә: «Вәгәрʹьн мьн». Чахе әм тʹәви кемасийед хԝә шәрʹ дькьн, Йаһоԝа дьхԝазә ԝәки әм мьԛәрм мьԛабьли хьрабийе бьн (Иша. 55:7). Һәрге әм ӧса бькьн, Йаһоԝа ԝе рʹӧһʹанида у емосийалида али мә бькә, у ԛәԝате бьдә мә ԝәки әм «һʹӧкӧми ль сәр» хԝәстьнед хьраб бькьн (Дәстп. 4:7). ԝ18.07 18 ¶5-6