Гӧлан

Ԝан салед пашԝәхтийеда, гәләк ԝәлатада мәрьвед хәриб зедә бунә, йед кӧ рʹәви нә. Ԝе баш бә һун сәр зьмане ԝан сьлаве һин бьн. Хенщи ве йәке, һун дькарьн чәнд щӧмла жи һин бьн, кʹижан кӧ дькарьн али ԝә бькьн ԝәки тʹәви ԝан хәбәрдане дәстпекьн. Паше һун дькарьн дина ԝан бьдьн сәр малпәра мә jԝ.org, сәва кӧ видео у әʹдәбйәтед сәр зьмане ԝан нишани ԝан кьн. Йаһоԝа тʹьме ԝан тьшта дьдә мә, чь кӧ мәрʹа лазьм ьн сәва хьзмәтийеда пешда һәрʹьн у һе щерʹьбанди бьн. Бәʹса хәбәре, щьватеда әм Бәрнама Щьвине «Мина Иса Бьжин» дәрбаз дьбьн, кʹижан кӧ али мә дькә һазьр бьн чахе сәрледанед дӧбарә дькьн у һинбунед Кʹьтеба Пироз дәрбаз дькьн. Де-бавно али зарʹед хԝә бькьн, ԝәки әԝана һин бьн пе гьлийед хԝә щаба хԝә бьдьн. Һьнә мәрьв һатьнә сәр рʹийа рʹаст, гава дитьнә кӧ ча зарʹ пе щабед хԝәйә бь дьл, баԝәрийа хԝә дьдьнә кʹьфше (1 Корн. 14:25). ԝ18.06 22-23 ¶7-9

Әм гәрәке бир нәкьн, ԝәки бәре әм «хәриб бун», демәк жь Хԝәде дур бун (Әфәс. 2:12). Ле Йаһоԝа әм незики хԝә кьрьн, «бь ԛәйдькед әвинева жь хԝәрʹа кʹьшанд» (Һос. 11:4; Йуһʹн. 6:44). У Иса Мәсиһ жи мә бь дьл ԛәбул кьрийә. Әԝи ча бежи дәри мәрʹа вәкьр, сәва әм бькарьбьн бьбьнә нәфәред малбәта Хԝәде. Һәрге Иса әм, демәк мәрьвед гӧнәкʹар, бь дьл ԛәбул кьрийә, гәрәке ԛә сәре мәрʹа жи дәрбаз нәбә кӧ кәсәки һʹьз нәкьн йан жи ԛәбул нәкьн. Дӧтирәти, фьрԛийа ортʹа мәрьва, у дьжмьнати ве дьнеда иро һе бәлабуйи дьбә, чьмки хьлазийа ве дьнйа хьраб ида бәр шемике йә (Галт. 5:19-21; 2 Тимтʹ. 3:13). Ле әм хьзмәткʹаред Йаһоԝа, дьхԝазьн чʹәʹв бьдьнә биланийа Хԝәде, кʹижан кӧ али мә дькә, ԝәки әм фьрԛийе нәкьнә ортʹа мәрьва у әʹдьлайе хԝәй кьн (Аԛуб 3:17, 18). Әм гәләк ша дьбьн  чахе тʹәви мәрьвед жь щурʹә-щурʹә ԝәлата һәвалтийе дькьн, у наньһʹерьн кӧ әʹрф-әʹдәтед мә мина һәв ниньн, у һәла һе жи дьԛәԝьмә әм зьмане ԝан жи һин дьбьн. Чахе әм ве йәке дькьн, әʹдьлайи мина чʹәʹм дькʹьшә, һәԛи жи мина пʹелед бәʹре (Иша. 48:17, 18). ԝ18.06 12 ¶18-19

Әскәре Рʹоме һәрге сол пʹенәкьра, ԝе нькарьбуйа бьчуйа шәрʹ. Әԝ сол, кӧ мина чарьха бун, жь тʹелед чʹәрм бун кӧ ньгва гьредайи бун у бь сайа ве йәке әскәр рʹьнд рʹерʹа дьчу. Әв сол ӧса дьһатә чекьрьне, ԝәки ԛәԝи у рʹьһʹәт бьн. Әв солед әскәред Рʹоме али ԝан дькьр, ԝәки шәрʹ рʹьнд бьвьн, ӧса жи бь симболик солед кӧ Мәсиһи пʹедькьн, али ԝан дькьн мьзгинийа әʹдьлайе бәла кьн (Иша. 52:7; Рʹом. 10:15). Ле мерхаси жи лазьм ә, ԝәки әм мьзгинийе бәла кьн. Боу кӧ 20 сали йә, дьбежә: «Әз дьтьрсийам һәвалдәрсханед хԝәрʹа шәʹдәтийе бьдьм. Мьн шәрм дькьр. Ньһа әз фәʹм дькьм кӧ нәлазьм бу мьн шәрм кьра, у әз гәләк ша мә кӧ щаһьлед дьнрʹа шәʹдәтийе дьдьм». Гәләк щаһьл дьбежьн кӧ чахе әԝана сәва шәʹдәтийе рʹьнд һазьр дьбьн, әԝана һе хԝәда баԝәр дьбьн. ԝ18.05 29 ¶9-11

Иса готә шандийед хԝә: «Әз . . . әʹдьлайийа хԝә дьдьмә ԝә» (Йуһʹн. 14:27). Ле чаԝа әԝ пʹешкʹеш, демәк әʹдьлайа ԝи, али мә дькә кӧ бәр биньн? Чахе әм бь сәбьр ьн, дьле хԝәда әм әʹдьлайе тʹәхмин дькьн, чьмки заньн ԝәки Йаһоԝа у Иса мә ԛәбул дькьн (Зәб. 149:4; Рʹом. 5:3, 4; Колс. 3:15). Паши ве йәке чахе Иса готә шандийед хԝә кӧ дьхԝазә шабуна ԝан «тʹәмам бә», әԝи ԝанрʹа шьровәкьр, ԝәки чьԛас фәрз ә һʹьзкьрьна һʹәлал бьдьнә кʹьфше (Йуһʹн. 15:11-13). Паше әԝи гот: «Мьн һун дост һʹәсаб кьрьн». Рʹасти жи әԝ пʹешкʹешәкә чьԛас ԛимәт ә кӧ бьбьнә достед Иса! Ле шандийа чь гәрәке бькьрана, ԝәки достийа ԝида бьмана? Иса ԝанрʹа гот: «Һәрʹьн бәр бьдьн» (Йуһʹн. 15:14-16). Ԝәкә 2 сал пешда, Иса рʹебәри да шандийед хԝә: «Гава һун һәрʹьн, даннасин кьн у бежьн: ‹Пʹадшатийа Әʹзмана незик буйә›» (Мәт. 10:7). Ле ве евара хьлазийе, пешийа мьрьна хԝә, Иса ԝана ԛәԝи кьр, ԝәки әԝана ԝи шьхӧле кӧ ԝана дәстпекьр, бь сәбьр бәрдәԝам кьн (Мәт. 24:13; Марԛ. 3:14). ԝ18.05 20-21 ¶15-16

Щаһьлно, бьра әʹмьре ԝәда йа лапә фәрз әԝ бә, кӧ дьле Йаһоԝа ша кьн у нетед рʹӧһʹани дайньн щийе фәрз. Ле гәләк щаһьлед ԝәкә ԝә, һʹьш-аԛьле хԝә датиньн тʹәне сәр рʹьһʹәтийе у ԝәʹдәдәрбазкьрьне, у дьбәкә ԝә жи бәрбь ве йәке һелан дькьн. Зу йан дәрәнг, һун гәрәке бьдьнә кʹьфше кӧ нет у бьжартьнед ԝә чь нә. Нәкʹәвьнә бәр байе щаһьлед дьн. Һәнә гәләк тьшт кӧ дькарьн али ԝә бькьн нәкʹәвьнә бәр байе ԝан. Бәʹса хәбәре, дур бьн жь ԝан дәрәща кʹидәреда һун дькарьн бенә щерʹьбандьне (Мәтʹлк. 22:3). Ӧса жи бир нәкьн кӧ ахьрийа чьԛас хьраб мәрьв дьстинә, гава кьред хьрабда чʹәʹв дьдә мәрьвед дьн. Хенщи ве йәке, бь мьлукти биньн сәр хԝә, ԝәки ԝәрʹа ширәт лазьм ьн. Әԝ мьлукти ԝе али ԝә бькә гӧһ бьдьнә ширәтед де-бава у ӧса жи хушк-бьред рʹӧһʹани (1 Пәт. 5:5, 6). Ле тӧ ӧса мьлук и, ԝәки ширәтед баш ԛәбул ки? ԝ18.04 28-29 ¶14-16

Иса әʹламәтийа хԝәда чәнд щьватед Асйа Бьчʹукра да кʹьфше, ԝәки шьхӧлед шагьртед хԝә ԛимәт дькә. Бәʹса хәбәре, әԝи щьвата Тийатирайерʹа әʹламәтийа хԝә бь ԝан гьлийа дәстпекьр: «Әз һаш жь кьред тә, һʹьзкьрьна тә, баԝәрийа тә, хьзмәткʹари у сәбьра тә һәмә. Әз заньм кӧ кьред тәйә пашԝәхтийе жь йед пешийе зедәтьр ьн» (Әʹйан. 2:19). Бәле, Иса нә тʹәне бәʹса шьхӧлед ԝан кьр, ле әԝи пʹайе ԝан да бона һʹӧнӧред ԝани баш, бь сайа кʹижана ԝана әԝ кьред ԛәнщ дькьрьн. Рʹаст ә Иса ӧса жи һьнәкед жь Тийатирайе ширәт кьр, ле әԝи әʹламәтийа хԝә пе дьлдайине дәстпекьр у хьлаз кьр (Әʹйан. 2:27, 28). Бьфькьрьн дәрһәԛа һʹӧкӧме Иса, әԝ сәре һʹәму щьвата йә. Әԝ борщдар нинә, ԝәки рʹазибуна хԝә мәрʹа бьдә кʹьфше, сәва шьхӧлед кӧ әм бона ԝи дькьн. Ле йәкә әԝ пе мәсәла хԝә дьдә кʹьфше, ԝәки фәрз ә шекьрдар бьн. Рʹасти жи Иса бона рʹуспийа мәсәләкә мәзьн һиштийә. ԝ19.02 16 ¶10

Кʹома рʹебәрийе йа ԛьрʹна йәке, канийа дьлдайинәкә мәзьн бу чаԝа бона бьред щабдар, ӧса жи бона Мәсиһийа бь тʹәмами. Ԝана Пәтрус у Йуһʹәнна шандьн, ԝәки бона баԝәрмәндед тʹәзә дӧа бькьн, сәва әԝана рʹӧһʹе пироз бьстиньн (Кʹар. Шанд. 8:5, 14-17). Филипо у әԝ хушк-бьред тʹәзә гәләк ԛәԝи бун кӧ кʹома рʹебәрийе пьштгьрийа ԝан кьр. Иро, Кʹома Рʹебәрийе дьл дьдә бәр әндәмед Бәйтʹәле, бәр хьзмәткʹаред һәртʹьм, у ӧса жи бь тʹәмами бьратийа һʹәмдьнйайе. Ча ԛьрʹна йәкеда Мәсиһи ша дьбун, ӧса жи иро әм ша дьбьн бона ве дьлдайине! Хенщи ве йәке, сала 2015-да Кʹома Рʹебәрийе брошура бь наве «Вәгәрʹә щәм Йаһоԝа» дәрхьстьн, кʹижан кӧ нав тʹәмамийа дьнйайе бь рʹасти дьлдайинәкә мәзьн да гәләка. ԝ18.04 19 ¶18-20

Мәрьв дькарьн бьфькьрьн кӧ азайа ԝан чьԛас зедә һәбә, һаԛас баш ә. Ле бь рʹасти азайа бесинор әԝ ча шурәки туж ә. Һәла бьдьнә бәр чʹәʹве хԝә дьнйа ԝе чь һʹалида буйа, һәрге синор ԛә тʹӧнәбуна. Әнсиклопедийәкеда дәрһәԛа ве йәке те готьне: «Ԛанунед һәр дәԝләтәке гәләк чәтьн ьн, чьмки әԝ ԛанун гәрәке һьн мәрьва хԝәй кьн, һьн жи азайа ԝан бь синор кьн». Рʹасти жи тʹьме һеса нинә ԝан ԛануна биньн сери. Мәрьва гәләк ԛанун дәрхьстьнә, у ләма гәләк ԛанунзан у һʹакьм һәнә, йед кӧ ԝан ԛануна шьровәдькьн у рʹебәрийе дьдьн кӧ ча ԝана бьдьнә хәбате. Бь гьлийед Иса те кʹьфше, кӧ сәва азайа рʹаст бьстиньн, дӧ тьшт лазьм ә бькьн: Йа пешийе, рʹастийа кӧ Иса һин кьр, ԛәбул кьн, йа дӧда, бьбьнә шагьртед ԝи. Һәрге әм ӧса бькьн, әме бь рʹасти аза бьн. Ле жь чь әме аза бьн? Иса шьровәкьр: «Кәсе кӧ гӧна дькә, әԝ хӧламе гӧна йә. . . . Һәгәр Кӧрʹе Хԝәде ԝә аза кә, һуне рʹасти аза бьн» (Йуһʹн. 8:34, 36). ԝ18.04 6-7 ¶13-14

Әм хԝә баш тʹәхмин дькьн нава ԝан мәрьвада, йед кӧ һьндава мәда шәԝат ьн у бона һʹалхԝәшийа мә хәм дькьн. Әԝана хԝә датиньн дәԝса мә, сәва фәʹм бькьн әм чь тʹәхмин дькьн у чь дьфькьрьн. Әԝана тедәрдьхьн чь мәрʹа лазьм ә у али мә дькьн, щара һәла һе һьнге жи, гава мә аликʹари жь ԝана нәхԝәстийе. Әм мәрьвед кӧ һьндава мәда шәԝат ьн, гәләк ԛимәт дькьн. Әм һʹәму Мәсиһи дьхԝазьн дьлшәԝат бьн һьндава мәрьва. Ле йәкә һеса нинә әԝи һʹӧнӧри бьдьнә кʹьфше. Чьрʹа? Бәре әʹԝльн, чьмки әм гӧнәкʹар ьн (Рʹом. 3:23). Мәрʹа хәйсәт ә хԝәһʹьз бьн, ләма әм гәрәке сәр хԝә бьхәбьтьн, ԝәки бона мәрьва хәм кьн. Ӧса жи бона мә һьнәка чәтьн ә шәԝат бьн, чьмки әм щурʹәки майин һатьнә мәзьнкьрьне, йан жи ԛәԝьмандьнед кӧ әʹмьре мәда ԛәԝьминә, сәр мә һʹӧкӧм бунә. Һьн жи әм рʹожед ахьрийеда дьжин у мәрьвед дорбәре мә жи сәр мә һʹӧкӧм дькьн, чьмки хԝәһʹьз ьн у накʹәвьнә һʹәйра мәрьва (2 Тимтʹ. 3:1, 2). Һәрге әм чʹәʹв бьдьнә Йаһоԝа у Кӧрʹе ԝи Иса Мәсиһ, әме дьһа шәԝат бьн у бькʹәвьнә һʹәйра мәрьва. ԝ19.03 14 ¶1-3

Тʹәмийа пашьн жь Дәһә Тʹәмийа, дьлһавьжикьрьн ԛәдәхә дькьр, демәк чʹәʹве хԝә нәдьн сәр һәбука хәлԛе (Ԛан. Дщр. 5:21; Рʹом. 7:7). Йаһоԝа әԝ ԛанун да щьмәʹта хԝә сәва ԝана дәрсәкә фәрз һин кә. Ԝана гәрәке дьле хԝә хԝәй кьрана, демәк мьԛати фькьр у емосийед хԝә буна. Йаһоԝа занә ԝәки кьред хьраб, жь фькьр у емосийед хьраб дәстпедьбьн. Мәсәла Даԝьд Пʹадша әве йәке әшкәрә дьдә кʹьфше. Бь рʹасти әԝ мәрьвәки һʹәйф бу, ле щарәке әԝи чʹәʹв бәрʹда жьна мәрьвәки дьн. Әԝ хԝәстьна ԝийә нәрʹаст, ԝи бьрә бәрбь гӧнә (Аԛуб 1:14, 15). Даԝьд тʹәви ԝе бенамуси кьр, у һьн жи хԝәст мере ԝе бьхапанда, ле чьмки нәһатә стандьне, әԝи мере жьньке кӧшт (2 Сам. 11:2-4; 12:7-11). Йаһоԝа мәрьва тʹәне рʹува наньһерʹә, әԝ дьвинә дьле мә, демәк әм бь рʹасти чь щурʹәйи нә (1 Сам. 16:7). Әм нькарьн тʹӧ фькьр, емосийа у шьхӧләки жь ԝи вәшерьн. Әԝ нав мәда һʹӧнӧред баш дьгәрʹә у дьхԝазә әм ԝан һʹӧнӧра бал хԝә зедә кьн. Ле әԝ ӧса жи дьхԝазә, ԝәки әм контрол кьн у тедәрхьн ԝан фькьред нәрʹаст, кʹижан кӧ дькарьн мә бьвьн бәрбь кьред хьраб (2 Дир. 16:9; Мәт. 5:27-30). ԝ19.02 21 ¶9; 22 ¶11

Кʹьтеба Пироз сәр Муса дьбежә, ԝәки әԝ «мәрьвәки гәләки шкәсти бу, жь һʹәму мәрьвед ль сәр рʹуйе әʹрде» (Жьмар 12:3). Ле гәло әԝ те һʹәсабе, ԝәки әԝ мәрьвәки сьст у тьрсонәк бу, нькарьбу сафикьрьна бькә, у дьтьрсийа гава мьԛабьли ԝи дәрдькʹәтьн? Һьнә мәрьв дьбежьн ԝәки мәрьвед шкәсти ӧса ньн. Ле әԝ нәрʹаст ә. Муса хьзмәткʹарәки ԛәԝи бу, йәки сәр хԝә у мерхас бу. Әԝ пе аликʹарийа Йаһоԝа, мьԛабьли сәрԝере Мьсьрейи ԛәԝат дәркʹәт. Әԝи һьн жи бәрʹийеда рʹебәри ԝәкә 3 000 000 Исраелийа дькьр, у али ԝан дькьр ԝәки дьжмьнед хԝә алт кьн. Иро әм рʹасти ԝан чәтьнайа найен, рʹасти кʹижана Муса һат, ле әм һәр рʹож рʹасти ԝан мәрьва у дәрәща тен, жь бо кʹижана мәрʹа чәтьн дьбә шкәсти бьн. Ле һәйә тьштәки ӧса, кӧ мә ԛайим һелан дькә әви һʹӧнӧри нав хԝәда пешда биньн, әԝ һәйә созе Йаһоԝа кӧ мәрьвед шкәсти у мьлук ԝе «әʹрде ԝар бьн» (Зәб. 37:11). Ле һун хԝә һʹәсаб дькьн ча мәрьве шкәсти? Мәрьв дәрһәԛа ԝә чь дьбежьн? ԝ19.02 8 ¶1-2

Хԝәде жь дәстпека әʹфьрандьна инсанәте исаф дайә мәрьва. Мәсәлә, чахе Адәм у Һеԝайе ԛануна Йаһоԝа тәрʹьбандьн, ԝана хԝә вәшарт у әԝ йәк дьдә кʹьфше ԝәки исафе әԝана дьчәрчьрандьн. Әԝ мәрьве кӧ исафа ԝи рʹьнд һинкьри нинә, мина ве гәмийе йә, кʹижан кӧ пе компаса хьраббуйи дьчә. Рʹеԝитийа пе компаса нәрʹаст, гәләк хоф ә. Ба у ава океане, дькарьн һеса гәмийе бьвьнә щики нәрʹаст. Ле компаса кӧ рʹаст дьхәбьтә дькарә али гәмиван бькә, сәва гәмийе алийе рʹастрʹа бьвә. Исафа мә жи мина компасе йә. Исаф дьле мәда ча рʹебәр ә, бь сайа кʹижани әм дькарьн рʹасти у нәрʹастийе һәвдәрхьн. У әԝ йәк али мә дькә рийа растрʹа һәрʹьн. Ле сәва исафа мә рʹебәре баш бә, лазьм ә әԝ рʹаст һинкьри бә. Һәрге исафа мә нәрʹаст һинкьри йә, әԝе нькарьбә мә бьгьрә йан жи пешда әʹлами мә бькә кӧ кьред хьраб нәкьн (1 Тимтʹ. 4:1, 2). Әԝ исаф дькарә һәла һе жи мә һелан кә кӧ хьрабийе һʹәсаб кьн ча ԛәнщи. ԝ18.06 16 ¶1-3

Фәрз ә кӧ әм тедәрхьн у инкʹар кьн фькьред ве дьнйайе һьнге жи, гава әԝ фькьр әшкәрә найенә кʹьфше. Мәсәлә, нучада тьштед ӧса дьбежьн, чь кӧ пьштгьрийа ньһерʹандьна политика дькә. Йан жи һәнә сәрһатийед ӧса, кӧ бәрбь нетед ве дьнйайе һелан дькьн. Һьнә филм у кʹьтеб жи әве ньһерʹандьне бәла дькьн кӧ мәрьв хԝәһʹьз бьн, у малбәта хԝә сәр һәр тьштирʹа бьгьрьн. Гәләк мәрьв дьфькьрьн, ԝәки әԝ йәк аԛьлайи йә, баш ә у рʹаст ә жи. Ле Кʹьтеба Пироз һин дькә, ԝәки мәрьв гәрәке һʹьзкьрьна Йаһоԝа сәр һʹәму тьштирʹа бьгьрә, у тʹәне һьнге әԝ у малбәта ԝи бь рʹасти дькарә бәхтәԝар бә (Мәт. 22:36-39). Ле әв һʹәму тьшт найе һʹәсабе, ԝәки нәрʹаст ә һәрге әм ԝәʹдәдәрбазкьрьна баш ԛәбул кьн. Йәкә әм гәрәке пьрсед ӧса бьдьнә хԝә: «Гәло әз дәрберʹа һинкьрьнед ве дьнйайе тедәрдьхьм, һәла һе йед кӧ әшкәрә найен кʹьфше? Гәло әз хԝә у зарʹа хԝә хԝәй дькьм, ԝәки хԝә дур бьгьрьн жь телевисйона йан жи хԝәндьна ԝан тьшта, кӧ фькьред ве дьнйайе бәла дькьн? Гәло әм инкʹар дькьн фькьред ве дьнйайе кӧ әм дьбьһен, у али зарʹед хԝә дькьн, ԝәки мина Йаһоԝа бьньһерʹьн сәр тьшта?» ԝ18.11 22 ¶18-19

Йаһоԝа мәрʹа дьбежә, ԝәки әԝ тʹәви мә йә, чʹәʹве ԝи сәр мә йә у мә һʹьз дькә. Дина хԝә бьдьне Йаһоԝа ча әве һʹьзкьрьна хԝәйә мәзьн һьндава мә дьдә кʹьфше, әԝ дьбежә: «Тӧ чʹәʹве мьнда ԛимәт и. Тӧ һати һӧрмәткьрьне. Әз тә һʹьз дькьм» (Иша. 43:4, ДТʹ). Тʹӧ кәс, нә жи тʹӧ тьшт, нькарә әве һʹьзкьрьна Йаһоԝа һьндава хьзмәткʹаред ԝи сар кә. Амьнийа ԝи һьндава мә тӧ щар сьст набә (Иша. 54:10). Йаһоԝа соз надә, ԝәки әме рʹасти чәтьнайа у тәнгасийа нәйен. Ле әԝ ԝе тʹӧ щар нәһелә, ԝәки чәтьнайед кӧ мина «чʹәм» ьн, мә бьхәньԛиньн, йан жи әԝ тәнгасийед кӧ мина «агьр» ьн, зийанәкә мәзьн у дьреж бьдьн мә. Әԝ соз дьдә, ԝәки ԝе тʹәви мә бә у али мә бькә чахе тәʹли-тәнгийарʹа «дәрбаз бьн». Ле чь щурʹәйи Йаһоԝа ԝе али мә бькә? Әԝе дьле мә рʹьһʹәт кә, ԝәки әм нәтьрсьн у бькарьбьн амьнийа хԝә жерʹа хԝәй кьн, һәла һе жи һәрге мьрьн бәр чʹәʹве мә йә (Иша. 41:13; 43:2). Һәрге әм итʹбарийа хԝә ԝи созе Хԝәде биньн, кӧ дьбежә «әз тʹәви тә мә», әме жи ԝәʹде тәʹли-тәнгасийа мерхас бьн у ԛәԝи бьн. ԝ19.01 3 ¶4-6

Щаһьлно, дьбәкә дәрсдар йан мәрьвед дьн ԝәрʹа дьбежьн, ԝәки хԝәрʹа нете дайньн кӧ хԝәндьна бьльнд бьстиньн, йан жи хәбатәкә ӧса хԝәрʹа бьвиньн, кӧ гәләк пʹәрә ԛазанщ кьн. Ле Йаһоԝа ширәтед майин дьдә ԝә. Бәле, әԝ дьхԝазә ԝәки мәкʹтәбеда һун рʹьнд һин бьн, сәва паше бькарьбьн әʹбура хԝә бькьн (Колс. 3:23). Ле әԝ ширәт у принсип дьдә ԝә, сәва рʹебәри бьдә ԝә у али ԝә бькә ԝәʹде ԝан рʹожед ахьрийеда ӧса бьжин, чаԝа кӧ дьле ԝи хԝәш те (Мәт. 24:14). Йаһоԝа занә ахьрийеда ԝе чь бьԛәԝьмә, у занә ԝәки ахьрийа ве дьнйайе ԝе чь бә, у әв дьнйа ԝе зутьрәке кʹӧта бә (Иша. 46:10; Мәт. 24:3, 36). Әԝ ӧса жи занә ԝәки чь дькарә бь рʹасти ԝә бәхтәԝар кә у ләзәте бьдә ԝә, у чь дькарә ԝә дьлшькәсти у бебәхт кә. Ләма жи чьԛас аԛьлайи жи мәрʹа ширәтед мәрьва бенә кʹьфше, йәкә һәрге әԝана ль гора Хәбәра Хԝәде ниньн, әԝ ширәт нькарьн билани бьн. ԝ18.12 19 ¶1-2

Дәԝса ԝан «мьлуке әʹрде ԝар бьн, хер-хԝәшийева ԝе хьне бьн у ша бьн». Даԝьд ӧса жи пе рʹебәрийа Хԝәде пʹехәмбәрти кьр: «Рʹасте ль әʹрде ԝар бьн у һәр-һәйе ԝе сәр бьжин» (Зәб. 37:11, 29; 2 Сам. 23:2). Бь тʹәхмина ԝә, әԝ соз ԝе ча һʹӧкӧм буйа сәр ԝан мәрьва, йед кӧ дьхԝәстьн ԛьрара Хԝәде биньн сери? Мәʹнийа ԝан һәбу, ԝәки һивийа ԝи ԝәʹдәйи бьн, чахе тʹәне мәрьвед рʹаст сәр әʹрде бьжин, у һьнге Щьнәта мина бахче Едене диса һәбә. Ԝәʹдә дәрбаз бу, у һʹәчʹи зәʹф Исраелийа йед кӧ йанчь Йаһоԝарʹа хьзмәт дькьрьн, пьшта хԝә данә ԝи. Бона ве йәке, Хԝәде һишт ԝәки Бабилонийа щьмәʹта ԝи һьлдьнә бьн дәсте хԝә, ԝәлате ԝан кʹӧта кьн у жь ԝан гәләка дилти бьвьн (2 Дир. 36:15-21; Йерәм. 4:22-27). Пʹехәмбәре Хԝәде ӧса жи пʹехәмбәрти кьр, ԝәки паши 70 сала, щьмәʹта ԝи ԝе пашда вәгәрʹьнә ԝәлате хԝә. У һәма ӧса жи бу. Ле әԝ пʹехәмбәрти бона мә жи фәрз ьн, чьмки әм һивийа щьнәта сәр әʹрде нә. ԝ18.12 4 ¶9-10

Гәләк ширәт у ньһерʹандьна ве дьнйайе, бь тʹәмами мьԛабьли һинкьрьнед Кʹьтеба Пироз ьн. Ле гәло дькарә ӧса бә кӧ һьнә ширәтед ве дьнйайе иро һе керһати бьн, нә кӧ ширәтед Кʹьтеба Пироз? Иса гот: «Сәрԝахти бь әмәлед хԝә кʹьфш дьбә» (Мәт. 11:19). Әԝ дьнйа алийе техноложида гәләк пешда чуйә, ле йәкә әԝ нькарә проблемед мәзьн сафи кә, сәва мәрьв бәхтәԝар бьжин, мәсәлә шәрʹ, расизм у зорбәтийе нькарә бьдә һьлдане. Хенщи ве йәке, әԝ дьнйа бенамусийе ԛәбул дькә. Гәләк мәрьв фәʹм дькьн, ԝәки бенамуси нәфәра жь һәв дьԛәтинә, нәхԝәшийа пешда тинә у диса тьштед хьраб. Ле Йаһоԝа ԝан тьштада чь ширәта дьдә? Мәсиһийед кӧ мина Йаһоԝа сәр ԝан тьшта дьньһерʹьн, малбәтеда бәхтәԝар ьн, сьһʹәт-ԛәԝата ԝан һе баш ә, чьмки нав-намус дьжин, у нава бьратийа һʹәмдьнйайеда әʹдьлайи жи һәйә (Иша. 2:4; Кʹар. Шанд. 10:34, 35; 1 Корн. 6:9-11). Бәле, әԝ йәк әшкәрә дьдә кʹьфше, ԝәки фькьред Йаһоԝа жь фькьред ве дьнйайе гәләк бьльндтьр ьн. ԝ18.11 20 ¶8-10

Рʹаст ә әм дьхԝазьн һәләԛәтийа мә тʹәви нәфәред мә баш бә, у әм ԝанрʹа тʹьме һʹәйф бьн, ле әм ӧса жи гәрәке фәсал бьн, ԝәки бона хатре ԝан, принсипед Йаһоԝа нәтʹәрьбиньн. Һәләԛәти у һәвалтийа мәйә незик гәрәке тʹәне тʹәви ԝан һәбә, йед кӧ Йаһоԝа һʹьз дькьн. Һәр кәс кӧ рийа рʹастийеда дьчә, гәрәке пироз бә (Иша. 35:8; 1 Пәт. 1:14-16). Чахе әм һатьнә сәр рийа рʹаст, мә гьшка гӧһастьн кьр, сәва ль гора принсипед Кʹьтеба Пироз бьжин. Һьнәка жь мә гӧһастьнед мәзьн кьрьн. Чь жи һәбә, әм гәрәке тʹьме мьԛати хԝә бьн, ԝәки әԝ жийина пироз у тʹәмьз, тʹәви һʹәрами у бенамусийа ве дьнйайе нәгӧһезьн. Ле чаԝа хԝә жь бенамусийе хԝәй кьн? Кʹур бьфькьрьн, кӧ Йаһоԝа һәԛе чьԛас мәзьн у ԛимәт да, сәва әм бәр чʹәʹве ԝи пироз бьн. Әԝ һәԛ, хуна Кӧрʹе ԝийи тайе тʹәне бу, йа Иса Мәсиһ (1 Пәт. 1:18, 19). Сәва әм бәр чʹәʹве Йаһоԝа тʹәмьз бьминьн, ԛӧрбана Иса гәрәке һʹьш у дьле мәда гәләк ԛимәт у фәрз бә. ԝ18.11 11 ¶10-11

Гәләк хьзмәткʹаред һәртʹьм тʹәхмин кьрьн, кӧ чахе әԝана һʹьш-аԛьле хԝә датиньн сәр хьзмәтийе, әԝ йәк али ԝан дькә, ԝәʹде гӧһастьна шабуне ӧнда нәкьн у дьлрʹьһʹәт бьминьн. Чаԝа мәсәла ԝан нишан кьрьн, һәрге ԝәʹде гӧһастьна, әм алийе хԝәда һәр тьшти дькьн у бь сәбьр һивийа Йаһоԝа нә, әме дьлрʹьһʹәтийе ӧнда нәкьн. Һьнге әме фәʹм кьн, ԝәки чахе әм һини гӧһастьна дьбьн, һәләԛәтийа мә тʹәви Йаһоԝа ԛәԝи дьбә. Һәрге әʹмьре ԝәда тьштәк ньшкева те гӧһастьне, мәсәлә, кʹьфшкьрьна ԝә, йан сьһʹәт-ԛәԝата ԝә, йан жи малда щабдарийед ԝәйи тʹәзә зедә дьбьн, дӧдьли нәбьн ԝәки Йаһоԝа ԝә һʹьз дькә у ԝе ԝәʹдәда али ԝә бькә (Ибрн. 4:16; 1 Пәт. 5:6, 7). Ԝи ԝәʹдәйи, алийе хԝәда чь дәсте ԝә те бькьн. Бь дӧа незики Баве хԝәйи әзмана бьн, у һин бьн хԝә бькьнә бьн пʹәре ԝи. Бь ԝи щурʹәйи, чь жи бьԛәԝьмә у бе гӧһастьне, һуне дьлрʹьһʹәтийе ӧнда нәкьн. ԝ18.10 30 ¶17; 31 ¶19, 22

Кʹьтеба Пирозда гәләк сәрһати һәнә, кʹидәре те кʹьфше ча Йаһоԝа бона хьзмәткʹаред хԝә хәм дькә. Мәсәлә, дина хԝә бьдьн, Хԝәде чь щурʹәйи али Самуйел кьр, ԝәки әԝ Әли Сәрәккʹаһинрʹа дәрһәԛа диԝане әʹлам кә, чаԝа кӧ кʹьтеба 1 Самуйел 3:18-да те гьликьрьне. Ԛануна Йаһоԝа тʹәми дьда зарʹа, ԝәки ԛәдьре йед әʹмьрда мәзьн бьгьрьн, илаһи йед кӧ хԝәйиһʹӧкӧм бун (Дәркʹ. 22:28; Ԛан. Кʹаһ. 19:32). Һун ԛә дькарьн баԝәр кьн, кӧ Самуйеле бьчʹук шәбәԛе зу рʹабә у хԝәха бь мерхаси Әлирʹа диԝана Хԝәде әʹлам кә? Фәʹмдари йә, әԝи ԝе ӧса нәкьра. Кʹьтеба Пироз дьбежә, ԝәки Самуйел «тьрсийа кӧ хәԝн у хәйале Әлирʹа бежә». Ле Хԝәде Әлирʹа әйан кьр, ԝәки Әԝ гази Самуйел дькә. Әли әв йәк фәʹм кьр, ләма жи готә Самуйел ԝәки тьштәки вәнәшерә, ле һʹәму тьштед кӧ ԝирʹа һатә готьнә, бежә. Самуйел гӧрʹа ԝи кьр у һʹәму тьшт жерʹа гьли кьр, у әԝ гьлийед ԝи ль гора ве әʹламәтийе бу, кӧ пешда жерʹа һатә готьне (1 Сам. 2:27-36). Әԝ ԛәԝьмандьн кӧ тʹәви Самуйел у Әли ԛәԝьми, дьдә кʹьфше ԝәки Йаһоԝа ча һәр тьшти һьлдьдә һʹәсаб у чьԛас билан ә. ԝ18.09 23 ¶2; 24 ¶4-5

Дәрәԝи буйә тьштәки тʹәбийәти. Ньвискʹарәк бь наве И. Бхатачарщи, готара хԝәда йа бь наве «Чьрʹа Әм Дәрәԝа Дькьн», ньвиси ԝәки «дәрәԝи нав хәйсәте мәрьвада гәләк кʹур рʹуньштийә». Мәрьв дәрәԝа дькьн һʹәчʹи зәʹф сәва ве йәке, кӧ хԝә хԝәй кьн йан жи пешдачуйи бьн. Әԝана пе дәрәԝийе шашийед хԝә йан жи кьред хԝәйи хьраб вәдьшерьн. Ӧса жи әԝана дәрәԝа дькьн, ԝәки пʹәра хԝәрʹа ԛазанщ кьн йан жи кʹарәкә дьн бьстиньн. Чаԝа ве готареда һатә готьне, һәнә мәрьвед ӧса кӧ хԝәрʹа кьрьнә хәйсәт ԝәки «мәрьвед нәнасрʹа, һәвалхәбатчийед хԝәрʹа, у мәрьвед хԝәйи незикрʹа» дәрәԝа бькьн, фьрԛи тʹӧнә тьштед бьчʹукда йан мәзьнда. Ле ахьрийа дәрәԝа чь йә? Итʹбари у һәләԛәтийа баш дькарә ӧнда бә. Зәбурбеж Йаһоԝарʹа дӧа кьр: «Тӧ рʹастийе дьле мьнда дьхԝази» (Зәб. 51:6). Даԝьд заньбу, ԝәки мәрьве һʹәлал жь дьле хԝә һʹәлал ә. Бәле, Мәсиһи гәрәке һәр гав «һәвдӧрʹа рʹастийе бежьн» (Зәкәр. 8:16, ДТʹ). ԝ18.10 7 ¶4; 8 ¶9-10; 10 ¶19

Чахе сала 1513 Б.Д.М., Исраелийа Мьсьр һиштьн, әԝана дьбәкә һьнге ԝәкә се милйона зедәтьр бун. Нава ԝанда зарʹ, кал-пир у дьбәкә ӧса жи йед нәхԝәш у сәԛәт жи һәбун. Фәʹмдари йә, ԝанрʹа лазьм бу Рʹебәре фәʹмкʹар, кʹижани кӧ бона ԝан хәм кьра. Йаһоԝа бь сайа Муса буйә һәма рʹебәрәки ӧса. Ләма чахе Исраелийа малед хԝә һиштьн у чун, дьлрʹьһʹәт бун у хԝә хԝәйкьри тʹәхмин дькьрьн (Зәб. 78:52). Ле чь щурʹәйи Йаһоԝа али щьмәʹта хԝә кьр, ԝәки дьлрʹьһʹәт бьн у нәтьрсьн? Әԝи бь организә щьмәʹта хԝә «сильһкьри» жь Мьсьре дәрхьст (Дәркʹ. 13:18). Әԝе йәке ԝе әʹсә Исраелийа ԛәԝи кьра, чьмки әԝана дьдитьн кӧ чʹәʹве Хԝәдейе ԝан сәр ԝан ә у рʹебәрийа ԝан дькә. Хенщи ве йәке, Йаһоԝа ӧса кьр, ԝәки әԝана баԝәр бьн кӧ әԝ тʹәви ԝан ә, «рʹоже пе әʹԝьр», ле «шәве пе рʹонайийа егьр» (Зәб. 78:14). Бь ве йәке Йаһоԝа ча бежи ԝанрʹа дьгот: «Нәтьрсьн, чьмки әз тʹәви ԝә мә. Әзе ԝә хԝәй кьм у рʹебәрийе бьдьмә ԝә». ԝ18.09 26 ¶11-12

Ԝәʹде бәре жи, һьнә хьзмәткʹаред Хԝәде жь бо тәнгасийа, хԝәрʹа мьрьн дьхԝәстьн. Мәсәлә, Ибо ӧса бин тәнг бьбу ԝәки гот: «Әз жь жийана хԝәва дькәрьһьм: һʹәта-һʹәтайе жийане нахԝазьм» (Иб. 7:16). Уньс жи чахе гәләк дьлшькәсти бу, гот: «Ньһа йа Хӧдан, рʹәща дькьм рʹӧһʹе мьн жь мьн бьстинә, чьмки мьрьна мьн жь жийина мьн четьр ә» (Унс. 4:3). Пʹехәмбәре амьн Елйас жи ӧса хԝә бетʹаԛәт тʹәхмин кьр, ԝәки гот: «Бәс ә, йа Хӧдан, ньһа щане мьн бьстинә» (1 Пʹадш. 19:4). Ле Йаһоԝа ԝан хьзмәткʹаред амьн һʹьз дькьр у дьхԝәст ԝәки әԝана бьжин. Әԝи бона ве йәке тӧ щар ԝана нәһәԛ нәдькьр, дәԝсе али ԝан дькьр, ԝәки әԝана бьхԝазьн диса бьжин. Йаһоԝа бь һʹьзкьрьн ԝана дьшьданд, сәва әԝана бәрдәԝам кьн бь амьни жерʹа хьзмәт кьн. ԝ18.09 13 ¶4

Һәвалхәбаткʹаред Хԝәде пе меванһʹьзийе әʹйан ьн. Кʹьтеба Пирозда хәбәра Йунани кӧ һатийә ԝәлгәрʹандьне «меванһʹьзи», рʹастә-рʹаст те һʹәсабе «ԛәнщи хәрибарʹа» (Ибрн. 13:2). Хәбәра Хԝәдеда әм гәләк сәрһати дьхуньн, кӧ мә һин дькьн чаԝа меванһʹьз бьн (Дәстп. 18:1-5). Әм һьн дькарьн у һьн жи гәрәке мәщала бьвиньн сәва меванһʹьзийе нишан кьн һʹәмуйарʹа, фьрԛи тʹӧнә әԝана хушк-бьред мә нә, йан на (Галт. 6:10). Һун дькарьн тʹәви Йаһоԝа бьхәбьтьн бь ве йәке жи, гава һьндава хьзмәткʹаред һәртʹьм, кӧ тʹәсәлийа щьвата ԝә дькьн, меванһʹьзийе бьдьн кʹьфше (3 Йуһʹн. 5, 8). Әԝ йәк мәщале дьдә кӧ «дьл бьдьн бәр һәв» (Рʹом. 1:11, 12). Хәбәра Хԝәде бьра һелан дькә, ԝәки тʹәви Йаһоԝа бьхәбьтьн бь ве йәке, кӧ щьватеда щабдарийа һьлдьнә сәр хԝә (1 Тимтʹ. 3:1, 8, 9; 1 Пәт. 5:2, 3). Әԝед кӧ ӧса дькьн, дьхԝазьн щурʹә-щурʹә тьштада у ӧса жи рʹӧһʹанида аликʹарийе бьдьнә хушк-бьра (Кʹар. Шанд. 6:1-4). Бьред кӧ ԝан тьштада аликʹарийе дьдьн, ԝе ԝәрʹа гьли кьн кӧ әԝана чьԛас шабуне дьстиньн. ԝ18.08 24 ¶6-7; 25 ¶10

Рʹаст ә һʹӧкӧме Тимотʹейо сәр ԝан бьред әʹмьрда мәзьн һәбу, ле йәкә әԝ һьндава ԝанда дьлшәԝат у бь ԛәдьр бу. Ле һәрге мәрьве әʹмьрда мәзьн һʹәмде хԝә гӧнә дькә, йан тьштәки ӧса дькә кӧ Йаһоԝа хԝәш найе, гәло гәрәке әм чʹәʹве хԝә дадьн сәр ве йәке? Йаһоԝа тӧ щар гӧнәкʹара һәԛ дәрнахә, һәрге жи әԝ әʹмьрда мәзьн ьн. Дина хԝә бьдьнә принсипа жь Ишайа 65:20: «Гӧнәкʹар ԝе бе ньфьрʹкьрьне, һәрге жи әԝ сәд сали бә, ДТʹ». Хәԝн-хәйала Һәзәԛелда жи әм дьвиньн принсипа ԝи щурʹәйи (Һәзԛл. 9:5-7). Бона мә йа лапә фәрз гәрәке әԝ бә, кӧ ԛәдьре ԝи бьгьрьн, йе кӧ «Рʹожед ԝи Кәвьн ьн, ДТʹ», демәк ԛәдьре Йаһоԝа Хԝәде (Дан. 7:9, 10, 13, 14). Һәрге әм ӧса бькьн, әме нәтьрсьн кәсәки ширәт кьн у рʹаст кьн чахе лазьм ә, фьрԛи тʹӧнә әԝ чәнд сали бә (Галт. 6:1). ԝ18.08 11 ¶13-14

Әм Мәсиһийед рʹаст гәрәке һин бьн, ԝәки һәр информасийа, кӧ әм педьһʹәсьн, бьщерʹьбиньн һәла рʹаст ә йан на, сәва кӧ һәр тьшти рʹаст бьзаньбьн (Мәтʹлк. 3:21-23; 8:4, 5). Ле һәрге әм ӧса нәкьн, Шәйтʹанрʹа у дьнйа ԝирʹа ԝе һеса бә һʹьш-аԛьле мә хьраб кьн (Әфәс. 5:6; Колс. 2:8). Ләма жи лазьм ә избаткьрьна пебьһʹәсьн, сәва әм нәхапьн. Иро һʹәму алийава мәрьв щурʹә-щурʹә информасийа у әʹламәтийа дьстиньн. Интернетеда, телевисйонеда, у медийайеда тʹьжә информасийа те бәлакьрьне. Хенщи ве йәке, әм ӧса жи пе емаиле, пе тʹеле у жь һәвала щурʹә-щурʹә әʹламәтийа у тьшта дьстиньн. Ле әм гәрәке гәләк фәсал бьн у тьштед кӧ әм дьбьһен у педьһʹәсьн бьщерʹьбиньн, һәла рʹаст ьн йан на. Чьрʹа? Чьмки иро һәр дәра информасийа кӧ бәла дькьн, дәрәԝ ьн йан жи нә бь тʹәмами рʹаст ьн. ԝ18.08 3 ¶1, 3

Йаһоԝа ԛизькәкә мьлук Мәрйәм бьжарт, сәва әԝ бьбә дийа Кӧрʹе ԝи, демәк Иса. Мәрйәм шәһәре бьчʹукда Ньсрәтеда дьжит, кʹижан кӧ дури Оршәлиме у пʹарьстгәһа ԝийә мәзьн бу (Луԛа 1:26-33). Пе гьлийед Мәрйәме, кӧ тʹәви мәрьва хԝә Елизабете хәбәр дьда, те кʹьфше кӧ әԝ йәкә рʹӧһʹани бу у Хԝәде гәләк һʹьз дькьр (Луԛа 1:46-55). Бәле, Йаһоԝа дина хԝә дьда Мәрйәме, у бона амьнийа ԝе ле кʹәрәм кьр кӧ ԛәдьрәки ӧса жерʹа да, кʹижан кӧ әԝе нә жи дькарьбу бьда бәр чʹәʹве хԝә. Йаһоԝа һӧрмәт нәда мәрьвед навдәнг, мәсәлә сәрԝеред Оршәлиме йан Бәйтʹләһме, кӧ дәрһәԛа буйина Иса ԝанрʹа әʹлам кьра. Мьлйакʹәт шьванед мьлукрʹа әйан бун, йед кӧ жь Бәйтʹләһм дәр чоле бун бәр кәре пез бун (Луԛа 2:8-14). Әԝ шьван паше чун у зарʹа тʹәзәбуйи дитьн, демәк Иса (Луԛа 2:15-17). Мәрйәм у Усьв рʹасти жи ԝе чьԛас ша буна, кӧ Иса ԝи щурʹәйи һатә һӧрмәткьрьне! ԝ18.07 9-10 ¶11-12

Чьрʹа һерса Йаһоԝа рʹабу сәр Сьлеман? Кʹьтеба Пироз дьбежә: «Чьмки дьле ԝи жь Йаһоԝа дур кʹәтьбу . . . , йе кӧ дӧ щара хԝә ԝирʹа әʹйан кьрьбу у ԝи ширәт кьрьбу, ԝәки әԝ пәй хӧданед дьн нәчә. Ле Сьлеман тʹәмийа Йаһоԝа хԝәй нәкьр». Ахьрийеда, әԝи ԛәбулкьрьн у кʹәрәма Хԝәде ӧнда кьр. Зӧрʹәтед Сьлеман һʹӧкӧмтийа сәр тʹәмамийа Исраеле ӧнда кьрьн, у бь сәда сала гәләк хәзәб дьдитьн (1 Пʹадш. 11:9-13, ДТʹ). Жь сәрһатийа Сьлеман әшкәрә те кʹьфше, ԝәки чьԛас хоф ә тʹәви ԝан мәрьва һәвалтийе бькьн, йед кӧ фәʹм накьн йан жи ԛәдьре принсипед Йаһоԝа нагьрьн. Һьнәк жь ԝан дьԛәԝьмә щьватеда ньн, ле рʹӧһʹанида сьст ьн. Һьнәк жи дьбәкә мәрьвед незик ьн, щинар ьн, һәвалхәбатчи нә, һәвалдәрсханед ԝан ьн, йед кӧ хьзмәткʹаре Йаһоԝа ниньн. Фьрԛи тʹӧнә кʹе жи һәбә, һәрге әԝ мәрьв ԛайим хԝә ль принсипед Йаһоԝа нагьрьн, ахьрийеда әм дькарьн сәва ԝан ԛәбулкьрьна Хԝәде ӧнда кьн. ԝ18.07 19 ¶9-10

Шәйтʹан занә ԝәки мәрьв һʹьз дькьн щурʹә-щурʹә сәрһатийа бьбьһен, у ләма әԝ филм у шоу йед телевисйоне, дьдә хәбате, сәва фькьр у ньһерʹандьна хԝә бәла кә. Әԝ занә ԝәки әԝ тьшт нә кӧ тʹәне һʹәԝасе мәрьварʹа тиньн, ле ӧса жи һин дькьн кӧ чаԝа бьфькьрьн, чь тʹәхмин кьн у бькьн. Иса әԝ метода һинкьрьне бона кʹара мәрьва дьда хәбате, бәʹса хәбәре, әԝи мәтʹәлока дәрһәԛа мәрьве Самәри у ӧса жи кӧрʹе ӧндабуйи мәрьварʹа гьли кьр (Мәт. 13:34; Луԛа 10:29-37; 15:11-32). Ле әԝ мәрьв йед кӧ ида кʹәтьнә бьн һʹӧкӧме Шәйтʹан, щурʹә-щурʹә сәрһатийа дькарьн бьдьнә хәбате, сәва дьле мә хьраб бә. Ләма әм гәрәке фәсал бьн. Рʹаст ә мәрʹа һʹәԝас ә филм у TV шоу бьньһерʹьн, ле әм гәрәке фәсал бьн ԝәки һʹьш-аԛьле мә хьраб нәбә. Чахе әм дьхԝазьн тьштәкива мьжул бьн у һеса бьн, әм гәрәке пьрсе бьдьнә хԝә: «Дьбә кӧ әԝ филм йан жи TV шоу мьн һин дькә, ԝәки тьштәки хьраб ве йәкеда тʹӧнә, һәрге әз бькʹәвьмә һʹәйра хԝәстьнед хԝә?» (Галт. 5:19-21; Әфәс. 2:1-3) Һәрге һун тʹәхмин дькьн, ԝәки бәʹса хәбәре фьлан програм фькьред Шәйтʹан бәла дькә, һун чь гәрәке бькьн? Дәрберʹа инкʹар кьн, чаԝа кӧ һун хԝә хԝәй дькьн жь нәхԝәшийа кӧ дәрбази мәрьва дьбә. ԝ19.01 15-16 ¶6-7

Чаԝа кʹӧмзьрьһʹ мәжийе әскәр хԝәй дькә, ӧса жи баԝәри у һеԝийа сәр «хьлазбуне» фькьр у һʹьш-аԛьле мә хԝәй дькә (1 Тʹеслн. 5:8; Мәтʹлк. 3:21). Ле чаԝа Шәйтʹан дькарә ӧса бькә кӧ әм кʹӧмзьрьһʹ жь сәре хԝә дәрхьн? Дина хԝә бьдьне, Шәйтʹан ча ве йәкеда дьхԝәст Иса бьщерʹьбинә. Бешьк, Шәйтʹан заньбу ԝәки ахьрийеда Иса ԝе сәрԝертийе инсанәте бькә. Ле Иса гәрәке һивийа ԝи ԝәʹдәйи буйа кӧ Йаһоԝа кʹьфш кьр. У пешийа ве йәке әԝи гәрәке щәфа бькʹьшанда у бьмьра. Ләма жи Шәйтʹан соз да кӧ һәрге Иса сәре хԝә бәр ԝи дайнә, әԝ ԝе һәма ве дәме бьбә сәрԝере дьнйайе (Луԛа 4:5-7). Иро жи Шәйтʹан занә, ԝәки Йаһоԝа ԝе һәр тьшт дьнйа тʹәзәда бьдә мә. Бәле, әм гәрәке һивийа ԝи ԝәʹдәйи бьн, ле һʹәта һьнге әм дькарьн рʹасти тәнгасийа жи бен. Ләма жи Шәйтʹан һәр тьшти дькә сәва әм пәй жийина баш кәвьн, кӧ ньһа рʹьһʹәт у баш бьжин. Әԝ дьхԝазә ԝәки әʹмьре мәда һәбук сәр щийе пешьн бә, ԝәки әм пәй кʹәвьн сәва ньһа ԛазанщ кьн. Әԝ ӧса дькә, ԝәки әʹмьре мәда Пʹадшатийа Хԝәде щийе пешьн нәгьрә (Мәт. 6:31-33). ԝ18.05 30-31 ¶15-17

Щаһьлно, Йаһоԝа дьхԝазә һун дьлша бьн. Сәва дьлша бьн лазьм ә нетед рʹӧһʹани дайньн пешийа хԝә у һʹәму нет-мәрәм у сафикьрьнада, ширәтед Йаһоԝа һьлдьнә һʹәсаб. Чьԛас зу һун дәстпекьн ве йәке бькьн, һаԛас зу һуне рʹебәри, хԝәйкьрьн у кʹәрәмед Йаһоԝа бьвиньн. Бьфькьрьн дәрһәԛа һʹәму ширәтед ԝи кӧ Кʹьтеба Пирозда һәнә у дьле хԝәда хԝәй кьн әве ширәте: «Әʹфьрандаре хԝәйи Һьмзор щаһьлтийа хԝәда бинә бира хԝә» (Ԝаиз 12:1, ДТʹ). Щаһьлед щьватеда һежайи пʹайа нә, чьмки әԝана һʹьш-аԛьле хԝә дьдьнә сәр хьзмәтийа Йаһоԝарʹа. Әԝана нетед рʹӧһʹани датиньн пешийа хԝә у хьзмәти әʹмьре ԝанда щийе гәләк фәрз дьгьрә. Хенщи ве йәке, әԝана накʹәвьнә бәр байе ве дьнйайе. Әԝ щәфе ԝан пʹучʹ нинә. Әԝана аликʹарийе жь хушк-бьра дьстиньн, у чахе әԝана шьхӧлед хԝә дьдьнә дәсте Йаһоԝа, дьгьһижнә нет-мәрәме хԝә. ԝ18.04 29 ¶17, 19