Кануна Пешьн

Гава әм жь бо гӧнәкʹарийа хԝә рʹасти чәтьнайа тен, әм заньн ԝәки Иса рʹьнд мә фәʹм дькә у әм гәләк дьлгәрм дьбьн. Чахе Иса сәр әʹрде бу, әԝ «тʹәви йед ша дьбьн» ша дьбу у «тʹәви йед дьгьрин» дьгьрийа (Рʹом. 12:15). Мәсәлә, чахе 70 шагьрт ша вәгәрʹийан, чьмки хьзмәтийа ԝана рʹьнд дәрбаз бьбу, һьнге Иса «бь рʹӧһʹе пироз ша бу» (Луԛа 10:17-21). Ле щарәкә дьн чахе Иса дит кӧ мьрьна Лазар мәрьвед ԝийи незикрʹа дәрдәки чьԛас мәзьн анийә, «кʹәсәра кʹур һате у дьле ԝи ешийа» (Йуһʹн. 11:33). Ле чаԝа мәрьве беԛьсур, дькарьбу һьндава мәрьвед гӧнәкʹарда ӧса рʹәʹм у дьлшәԝат бә? Бәре әʹԝльн, Иса мәрьв һʹьз дькьрьн. Әшԛа ԝи «әԝләдед инсен бу» (Мәтʹлк. 8:31). Һʹьзкьрьн һьндава мәрьва ԝи һелан дькьр, ԝәки хәйсәт у фькьред мәрьва бьзаньбә. Йуһʹәннайе шанди гот, ԝәки Иса «дьле мәрьва заньбу» (Йуһʹн. 2:25). ԝ19.03 20 ¶1-2

Шәйтʹан һәбук у бәрдәстийед Ибо ле станд, у наве ԝи жи әʹрде хьст. Шәйтʹан ӧса жи пәй нәфәред Ибо кʹәт, у дәһ зарʹед ԝи кӧшт. Паше, әԝ пәй Ибо кʹәт, ԝи нәхԝәш хьст, у ӧса кьр кӧ сәр тʹәмамийа бәдәна ԝи, жь пәʹнийа ньга һʹәта сәре ԝи, тʹьжә пʹьзьк бун. Жьна Ибо жь тʹәвһәвбуне у дәрде гьран, готә ԝи кӧ ньфьра Хԝәде бькә у бьмьрә. Рʹаст ә Ибо хԝәха жи хԝәрʹа мьрьн дьхԝәст, ле йәкә әԝи диса хԝә ль беԛьсуртийа хԝә дьгьрт. Паши ве йәке, Шәйтʹан ида бь методәкә дьн Ибо щерʹьбанд, әԝи се һәвалед Ибо да хәбате. Әԝана сәр чәнд рʹожа чун тʹәсәлийа Ибо кьрьн, ле ԛә дьлбини нәданә ԝи. Дәԝсе, ԝана ломә ԝи дькьрьн у бӧхдан дьавитьнә ԝи. Ԝана дьгот, ԝәки йанчь Хԝәде әԝ бәла анийә сәре ԝи у беԛьсуртийа Ибо бәр чʹәʹве ԝи пʹучʹ ә. Ԝана һәла һе жи дьгот, кӧ Ибо мәрьвәки хьраб ә у һежайи ве йәке йә чь кӧ һатә сәре ԝи (Иб. 1:13-22; 2:7-11; 15:4, 5; 22:3-6; 25:4-6). ԝ19.02 4 ¶7-8

Чахе әм дьтьрсьн кӧ дьле Йаһоԝа бешиньн, әԝ хԝәдехофи кʹаре мәрʹа тинә. Һәрге Адәм у Һеԝайе әԝ щурʹә тьрс нав хԝәда пешда бьанийана, әԝана ԝе мьԛабьли Йаһоԝа дәрнәкʹәтана. Ле йазьх ӧса нибу, ԝана пьшта хԝә да Хԝәде. Чахе ԝана ӧса кьр, чʹәʹве ԝана вәбун у ԝана бь тʹәмами фәʹм кьр, ԝәки әԝана бунә гӧнәкʹар. Ԝана тʹәне дькарьбу гӧнә у мьрьне дәрбази зарʹед хԝә кьн. Ԝана фәʹм кьр кӧ кʹәтьнә чь һали, чьмки гӧрʹа Хԝәде нәкьрьн. У ԝана шәрм кьр кӧ тәʹзи нә, ләма бәдәна хԝә дадан (Дәстп. 3:7, 21). Бәле, әм гәрәке жь Хԝәде бьтьрсьн, ԝәки дьле ԝи нәешиньн, ле жь тьрса мьрьне әм гәрәке нәләрьзьн. Йаһоԝа рʹе мәрʹа вәкьрийә, ԝәки әм жийина һʹәта-һʹәтайе бьстиньн. Һәрге әм гӧнә бькьн, ле һʹәлал гӧне хԝә бьдьнә рʹуйе хԝә, Йаһоԝа ԝе шашийед мә бьбахшинә. Әԝ ԝе мә бьбахшинә сәр һʹиме баԝәрийа мә һьндава ԛӧрбана Кӧрʹе ԝи. Йа пешьн, кӧ ча әм баԝәрийа хԝә дьдьнә кʹьфше, әԝ ә, кӧ әм әʹмьре хԝә тʹәсмили Хԝәде дькьн у тенә ньхӧмандьне (1 Пәт. 3:21). ԝ19.03 5-6 ¶12-13

Гәләк тьшт һәбун чь кӧ Исраелийа гәрәке ԛимәт кьрана. Йаһоԝа Дәһә Бәла ани сәре Мьсьрийа у Исраели жь дилтийе аза кьрьн. Паше Хԝәде тʹәмамийа ордийа Мьсьрийа Бәʹра Сорда кʹӧта кьр у ӧса щьмәʹта хԝә хьлаз кьр. Әԝана ӧса рʹази бун бона ве йәке, кӧ сәва шькьрдайине бьдьнә Йаһоԝа, кʹьлама сәркʹәтьне стьран. Ле гәло әԝана ӧса шекьрдар ман? Чахе Исраели рʹасти чәтьнайед дьн һатьн, ԝана бир кьр һʹәму ԛәнщи, кӧ Йаһоԝа бона ԝан кьр. Әԝана бунә бешекьр (Зәб. 106:7). Ле жь чь әԝ һатә кʹьфше? «Тʹәмамийа щьвина зарʹед Исраел бәрʹийеда, һьндава Муса у Һарунда бина хԝә тәнг кьрьн», ле бь рʹасти ԝана бина хԝә һьндава Йаһоԝада тәнг дькьрьн (Дәркʹ. 16:2, 8). Йаһоԝа һерс кʹәт сәр бешекьрийа щьмәʹта хԝә. У паше әԝи ԝанрʹа пешда әʹлам кьр, кӧ тʹәмамийа рькʹьнйата Исраеле ԝе бәрʹийеда бьмьрә, хенщи Йешу у Кʹаләб (Жьмар 14:22-24). ԝ19.02 17 ¶12-13

Иса тӧ щар хԝә ԛӧрә нәдькьр, у нә жи дәрбазкьрьна биранина мьрьна хԝә гьран кьр. Дәԝсе, әԝи готә шандийед хԝә, ԝәки сале щарәке бь шивәкә гәләк сьвьк ԝи биньн бира хԝә (Йуһʹн. 13:15; 1 Корн. 11:23-25). Әԝ шива сьвьк ле фәрз, дьдә кʹьфше кӧ Иса мәрьвәки ԛӧрә нибу. Әм рʹасти жи дькарьн ша бьн, кӧ Пʹадшайе мәйи әзмана гәләк мьлук ә (Фили. 2:5-8). Ле әм чаԝа дькарьн чʹәʹв бьдьнә мьлуктийа Иса? Әм гәрәке пешийе кʹара мәрьвед майин бьгәрʹьн, нә кӧ кʹара хԝә (Фили. 2:3, 4). Бьфькьрьн дәрһәԛа ве евара пашьн йа әʹмьре Иса сәр әʹрде. Иса заньбу, ԝәки зутьрәке ԝе бьчәрчьрә у бьмьрә; йәкә әԝ бона шандийед хԝәйи амьн гәләк бәрхԝә дькʹәт, йед кӧ зутьрәке ԝе шина ԝи бькьрана. Ләма әԝи әԝ евара пашьн тʹәви ԝан дәрбаз кьр сәва ԝана ширәт кә, дьл бьдә ԝан у ԝана ԛәԝи кә (Йуһʹн. 14:25-31). Иса дькʹәтә һʹәйра һʹалхԝәшийа мәрьвед майин, нә кӧ һʹәйра хԝә. Рʹасти жи әԝи мәсәләкә чьԛас мәзьн мәрʹа һишт! ԝ19.01 21 ¶5-6

Бал ԝә ӧса дьбә кӧ һун дьхԝазьн дәсте хԝә бьльнд кьн сәва щаба хԝә бьдьн, ле дьле ԝә ԛайим дькʹӧтә? Һәрге әре, һун тʹәне ниньн. Гәләк жь мә һьнәки дьтьрсьн чахе щаба хԝә дьдьн. Бь рʹасти, һәрге һун бона ве йәке дьтьрсьн, әԝ нишанәкә баш ә, чьмки әв дьдә кʹьфше кӧ һун мьлук ьн у хԝә сәр мәрьварʹа нагьрьн. Йаһоԝа мәрьвед мьлук һʹьз дькә (Зәб. 138:6; Фили. 2:3). Ле Йаһоԝа ӧса жи дьхԝазә кӧ һун пәсьна бьдьнә ԝи у щьватеда хушк-бьред хԝә ԛәԝи кьн (1 Тʹеслн. 5:11). Әԝ ԝә һʹьз дькә у ԝе мерхасийе бьдә ԝә. Дина хԝә бьдьнә сәр һьнә принсипед жь Кʹьтеба Пироз. Кʹьтеба Пироз дьбежә, ԝәки һәр кәс жь мә хәбәрданеда шашийа дькә (Аԛуб 3:2). Йаһоԝа жь мә дәԝа накә кӧ беԛьсур бьн, нә жи жь хушк-бьред мә (Зәб. 103:12-14). Әԝана нәфәред малбәта мәйә рʹӧһʹани нә, у мә һʹьз дькьн (Марԛ. 10:29, 30; Йуһʹн. 13:35). Әԝана фәʹм дькьн, ԝәки щара әм щабед хԝәда тьштәки ӧса дькарьн бежьн, чь кӧ мә нәдьхԝәст. ԝ19.01 8 ¶3; 10-11 ¶10-11

Әԝ йәк дьнйа иройинда һеса нинә, ле йәкә дьбә. Йаһоԝа дьхԝазә һун әʹмьре хԝәда пешдачуйи бьн у ләзәте бьстиньн. Пе аликʹарийа Хԝәде һун дькарьн нә тʹәне щаһьлтийа хԝәда бәхтәԝар у пешдачуйи бьн, ле тʹәмамийа әʹмьре хԝәда. Ԝәрә әм шеԝьр кьн мәсәла Исраелийа, гава әԝана Әʹрде Создайи зәфт кьрьн. Чахе Исраели незики Әʹрде Создайи бун, Хԝәде ԝанрʹа нә гот, ԝәки бона шәрʹ хԝә һазьр кьн (Ԛан. Дщр. 28:1, 2). Дәԝсе әԝи ԝанрʹа гот, ԝәки гӧрʹа тʹәмийед ԝи бькьн у итʹбарийа хԝә ԝи биньн (Йешу 1:7-9). Бь ньһерʹандьна мәрьва әԝ ширәт бекер бу! Ле бь рʹасти әԝ ширәтәкә гәләк баш бу. Йаһоԝа али щьмәʹта хԝә кьр, ԝәки шәрʹе тʹәви Кәнанийада сәркәвьн (Йешу 24:11-13). Бәле, сәва гӧрʹа Хԝәде бькьн баԝәрийа ԛәԝи лазьм ә, у әԝ баԝәри тʹьме кʹаре тинә. Әԝ йәк тʹьме ӧса бу у иро жи ӧса йә. ԝ18.12 25 ¶3-4

Һьнәк лькʹӧмин, чахе фәʹмкьрьна һьнә рʹезед Кʹьтеба Пироз һатьнә гӧһастьне. Һьнәк жи алийе рʹабәра гьртьн, йан жи пьшта ԝан гьртьн йед кӧ мьԛабьли рʹастийе нә. Ахьрийа ве йәке әԝ бу, кӧ һьнәка жь ԝан, һʹәмде хԝә пьшта хԝә данә Йаһоԝа у щьвате (Ибрн. 3:12-14). Ле ԝе чьԛас баш буйа, һәрге ԝана мина Пәтрус баԝәрийа хԝә хԝәй кьрана у итʹбарийа хԝә Иса бьанйана. Һьнәк жи һеди-һеди жь рʹастийе чун у һаш жь хԝә жи тʹӧнәбун кӧ әԝ йәк ча ԛәԝьми. Әԝ мәрьве кӧ ӧса жь рʹастийе дур дькʹәвә, мина ԝе ԛәйьке йә, кӧ һеди-һеди жь бәр дәве чʹем дур дькʹәвә. Кʹьтеба Пироз әԝе дуркʹәтьне, нав дькә ча хальфандьн (Ибрн. 2:1). Мәрьве кӧ һеди-һеди жь рʹастийе дур дькʹәвә, әԝе йәке һʹәмде хԝә накә, ле йәкә әԝ мәрьв һәләԛәтийа хԝә тʹәви Йаһоԝа сьст дькә у ахьрийеда дькарә ӧнда кә жи. ԝ18.11 9 ¶5-6

Дьбәкә һун дьхԝазьн һе зедә бенә һинкьрьне, сәва һе рʹьнд Йаһоԝарʹа хьзмәт кьн. Һәрге ӧса нә, нете хԝәрʹа дайньн, ԝәки Мәкʹтәба сәва Мьзгинванед Пʹадшатийе дәрбаз бьн. Ԝедәре тенә һинкьрьне хушк-бьред рʹӧһʹанида ԛәԝи кӧ хьзмәткʹаред һәртʹьм ьн, йед кӧ дьхԝазьн у дькарьн шьхӧле хьзмәтийеда һе зедә бькьн. Әԝед кӧ дьхԝазьн әԝе мәкʹтәбе дәрбаз бьн, гәрәке һазьр бьн, ԝәки чахе мәкʹтәбе хьлаз дькьн, һәр щурʹә кʹьфшкьрьн ԛәбул кьн. Ле һун һазьр ьн бона Йаһоԝа ԝи щурʹәйи һе зедә бькьн? (1 Корн. 9:23) Әм щьмәʹта Йаһоԝа нә, у ләма дьхԝазьн һәр рʹож мәрʹданийе бьдьнә кʹьфше, ԛәнщийе бькьн у бь һʹьзкьрьн бьн тʹәви мәрьва. Чахе әм ве йәке дькьн, әм шабуне, әʹдьлайе у ләзәте дьстиньн (Галт. 5:22, 23). Фьрԛи тʹӧнә дәрәща ԝә чь щурʹәйи йә, йәкә һун дькарьн бәхтәԝар бьн кӧ чʹәʹв бьдьнә мәрʹданийа Йаһоԝа у бьбьнә һәвалхәбаткʹаред ԝийә ԛимәт! (Мәтʹлк. 3:9, 10) ԝ18.08 27 ¶16-18

Һьнәк дьбәкә пьрсе дьдьн: «Чь мәʹни һәйә кӧ изьне дьдә Мәсиһи, ԝәки жь һәв бьԛәтьн у тʹәзәда бьзәԝьщьн?» Иса гот: «Кʹи кӧ жьна хԝә бәрʹдә у йәкә дьн бьстинә, һьндава ԝеда зьнекʹарийе дькә у һәгәр жьн жи мере хԝә бәрʹдә у йәки дьн бьстинә, зьнекʹарийе дькә» (Марԛ. 10:11, 12; Луԛа 16:18). Әшкәрә йә, ԝәки Иса зәԝащ һӧрмәт дькьр у дьхԝәст йед дьн жи чʹәʹв бьдьнә ԝи. Мере кӧ мәʹни бьгьрта сәва жьна хԝәйә амьн бәрʹда (йан жьн жь мере хԝәйи амьн бьԛәтийа), у паше тʹәзәда кәсәки дьн бьстанда, ԛави дькьр. Әԝ ӧса йә, чьмки бе мәʹни һәв бьԛәтьн, зәԝаще кʹӧта накә. Бәр чʹәʹве Хԝәде әԝ һәр дӧ жи диса «бәдәнәк» ьн. Хенщи ве йәке, Иса гот ԝәки чахе мер жьна хԝәйә амьн бәрʹдьдә, әԝ йәк ԝерʹа дьбә мәʹни кӧ ԛавийе бькә. Ле чь щурʹәйи? Жьна кӧ бемер дьма мәщбур дьбу кӧ кәсәки дьн бьстинә, сәва әʹбура хԝә бькә. Әԝ зәԝаща тʹәзә ида дьһатә һʹәсабе чаԝа ԛави. ԝ18.12 11 ¶8-9

Дьле Һәбаԛуԛ рʹьһʹәт бу, чахе әԝи тʹәви Йаһоԝа хәбәр да. Әԝи хԝәрʹа сафи кьр, ԝәки бь сәбьр һивийе бә, һʹәта Йаһоԝа тьштәки бькә. Һәбаԛуԛ нә кӧ һәма дәмәке ӧса хԝә да кʹьфше, ле әԝи гот кӧ әԝе «бь бедәнгийе ль бәнда . . . рʹожа тәнгасийе» бә (Һәбԛ. 3:16). Гәло жь ньһерʹандьна Һәбаԛуԛ әм чь һин дьбьн? Йа пешьн, фьрԛи тʹӧнә әм чь тәнгасийада ньн, әм гәрәке һәр гав Йаһоԝарʹа дӧа бькьн. Йа дӧда, әм гәрәке гӧһ бьдьнә гьлийед Йаһоԝа, кʹижан әԝ бь сайа Хәбәра хԝә у тʹәшкиләта хԝә мәрʹа дьбежә. Йа сьсийа, әм гәрәке бь сәбьр һивийа Йаһоԝа бьн, у бь тʹәмами итʹбарийа хԝә ԝи биньн, кӧ әԝ ԝе ԝәʹдәда дәрде мә дәрман кә. Һәрге әм тʹьме тʹәви Йаһоԝа хәбәр дьн у мина Һәбаԛуԛ бь дьл һивийа ԝи бьн, әме жи дьлрʹьһәтийе бьстиньн, кʹижан кӧ ԝе али мә бькә сәбьр кьн. Баԝәри һьндава Хԝәде, ԝе ԛәԝате бьдә мә ԝәки тәйах кьн, у әԝ йәк ԝе али мә бькә ԝәʹде чәтьнайа шабуна хԝә ӧнда нәкьн. Бәле, баԝәри дьл дьдә мә кӧ Баве мәйи әʹзмана ԝе әʹсә чʹарәке бькә (Рʹом. 12:12). ԝ18.11 15-16 ¶11-12

Гәло Йаһоԝа ча дьньһерʹә сәр ԝан кәса кʹижан кӧ мәрьва дьлькʹӧминьн? Иса гот: «Кʹи кӧ жь ван бьчʹука йәки, йе кӧ баԝәрийа хԝә мьн тинә жь рʹе дәрхә, ԝирʹа һе ԛәнщ ә, кӧ бәрашәк стуйе ԝива бе гьредане у бе авитьне нава бәʹре» (Марԛ. 9:42). Әшкәрә те кʹьфше, Иса сьвьк нәдьньһерʹи сәр ве йәке! Әм заньн ԝәки Иса бь тʹәмами хәйсәте Баве хԝә әйан кьр, у ләма әм дӧдьли набьн, ԝәки Йаһоԝа жи ӧса дьньһерʹә сәр һәр кәси, кʹе кӧ пе кьред хԝә шагьртед Иса дьлькʹӧминә (Йуһʹн. 14:9). Ле гәло ве йәкеда ньһерʹандьна мә жи мина йа Йаһоԝа у Иса йә? Әм жи мина ԝан дьфькьрьн? Гәло кьред мә чь әʹйан дькьн? Бәʹса хәбәре, мә хԝәш те стиләкә кʹьнщхԝәкьрьне йан жи щурʹәки хәмьландьне, кʹижан кӧ щьватеда хушк-бьра әʹщьз дькә, йан жи нав мәрьвада тәме хьраб у фькьред хьраб пешда тинә. Гәло һʹьзкьрьна һьндава хушк-бьра ԝе мә һелан кә жь стилед ӧса хԝә дур бьгьрьн? ԝ18.11 25 ¶9-10

Чьрʹа гәләк фәрз ә, ԝәки һәр кәс жь мә беԛьсур бә? Мәрʹа әԝ йәк лазьм ә, чьмки Шәйтʹан бӧхдан авитә Йаһоԝа у мә. Әԝ мьлйакʹәте рʹабәр наве Йаһоԝа әʹрде хьст, чьмки гьлийед ԝи ӧса дәрдькʹәт, кӧ Хԝәде Сәрԝере хьраб, хԝәһʹьз у ԛәлп ә. Ле йазьх, Адәм у Һеԝайе алийе Шәйтʹан гьртьн, у мьԛабьли Йаһоԝа дәркʹәтьн (Дәстп. 3:1-6). Бь рʹасти жийин бахче Әдәнеда беһʹәсаб мәщал дьда ԝан, сәва һʹьзкьрьна хԝә һьндава Йаһоԝа һе ԛәԝи кьн. Ле ԝи ԝәʹдәйи чахе Шәйтʹан ԝана щерʹьбанд, һʹьзкьрьна ԝан нәтʹам у ԛьсур бу. Ньһа пьрсәкә дьн пешда те: Гәло ԛә мәрьв дькарә жь һʹьзкьрьне Йаһоԝа Хԝәдерʹа амьн бьминә? Бь гьлийед майин бежьн, ԛә мәрьв дькарә беԛьсур бә? Щаба ве пьрсе сәрһатийа Ибо нишан дькә (Иб. 1:8-11). Әԝ жи мина мә мәрьвәки гӧнәкʹар бу у шаши дькьр. Ле Йаһоԝа Ибо һʹьз дькьр бона беԛьсуртийа ԝи. ԝ19.02 3-4 ¶6-7

Иса гьли кьр мәсәла базьрган, кʹижан кӧ дӧрʹед рʹьнд дьгәрʹийа, у щарәке дӧрʹәки гәләк ԛимәт дит. Әԝи әԝ мәсәлә ани сәва бьдә кʹьфше, кӧ рʹастийа Пʹадшатийа Хԝәде гәрәке чьԛас ԛимәт бә бона ԝан, йед кӧ әԝ рʹасти дитьнә (Мәт. 13:45, 46). Бәле, әм жи чахе рʹастийа дәрһәԛа Пʹадшатийа Хԝәде у диса рʹастийед дьнә ԛимәт пеһʹәсийан, мә ӧса ԛимәт кьр, кӧ әм һазьр бун тʹәрка һәр тьшти бьдьн, тʹәне сәва рʹастийе ԛазанщ кьн. Әм гәрәке тʹьме әԝе рʹастийе ԛимәт кьн у мьԛат бьн, ԝәки тʹӧ щар нәфьрошьн (Мәтʹлк. 23:23). Йазьх, ле һьнә хьзмәткʹаред Хԝәде нәшекьрандьн у һәла һе жи пьшта хԝә данә рʹастийе. Бьра әԝ йәк тʹӧ щар тʹәви мә нәԛәԝьмә! Бона ԝе йәке әм гәрәке бь дьл у щан рʹастийе ԛимәт кьн у рʹастийеда һәрʹьн (3 Йуһʹн. 2-4). Рʹастийеда һәрʹьн әԝ те һʹәсабе кӧ әм гәрәке әве рʹастийе дайньн сәр щийе пешьн у анәгори ԝе йәке бьжин. ԝ18.11 9 ¶3

Хенщи ве йәке, Исраелийарʹа тʹәми һатьбу дайине, ԝәки тʹәви Әриһайе шәрʹ нәкьн, дәԝсе шәш рʹожа, рʹоже щарәке дора ԝи шәһәри бьзвьрьн, ле рʹожа һʹәфта һʹәфт щара. Дьԛәԝьмә әскәр хԝәрʹа дьфькьрин: «Әԝ йәк ԝе бадиһәԝа ԝәʹдә у ԛәԝате жь мә бьстинә!» Ле Рʹебәре Исраелийа, демәк Йаһоԝа, рʹьнд заньбу әԝ чь дькә. Исраелийа Әриһа зәфт кьрьн, чьмки пәй рʹебәрийед ԝи чун. У гава ԝана дит кӧ чьԛас аԛьлайи бу пәй ԝан рʹебәрийа һәрʹьн, баԝәрийа ԝана гәләк ԛәԝи бу (Йешу 6:2-5). Жь ве сәрһатийе әм чь һин дьбьн? Щара әм бь тʹәмами фәʹм накьн кӧ чьрʹа тʹәшкиләта Йаһоԝа фьлан гӧһастьн кьрийә. Мәсәлә, пешийе дьбәкә әм дьфькьрин, ԝәки чьрʹа һащәтед әләктроники бьдьнә хәбате ԝәʹде һинбуна шәхси, хьзмәтийе, йан жи сәр щьвата. Ле ԝәʹдә дәрбаз бу у ньһа әм фәʹм дькьн кӧ чьԛас кʹар ә, гава әм ԝан һащәта дьдьнә хәбате. Чахе әм дьвиньн кӧ гӧһастьнед ԝи щурʹәйи чьԛас бәред баш тиньн, баԝәри у йәктийа мә дьшьдә. ԝ18.10 23 ¶8-9

Щьһу, мина шагьртед Иса, дьфькьрин ԝәки Мәсиһ ԝе чәтьнайед ԝан сафи кә, у дьбәкә ләма щьмәʹта жь Щәлиле дьхԝәстьн Иса бькьнә пʹадше хԝә. Дьԛәԝьмә ԝана дьда бәр чʹәʹве хԝә, ԝәки Иса ԝе сәрԝере лапи баш бә, чьмки Иса һьн хәбәрданеда йәки сәрԝахт бу, һьн дькарьбу нәхԝәш ԛәнщ кьрана, у һәла һе жи йед бьрʹчи тʹер кьра. Паши ве йәке чахе Иса ԝәкә 5 000 мәрьв тʹер кьр, әԝи нета дьле ԝан фәʹм кьр. «Иса пе һʹәсийа кӧ әԝе бен у ԝи бь зоре бьбьн бькьнә пʹадша, диса әԝ тʹәне һьлкʹьшийа чʹийе» (Йуһʹн. 6:10-15). Рʹожәкә дьн чахе дьбәкә әʹлаләт сәԛьрибу, Иса ԝанрʹа шьровәкьр кӧ нета һатьна ԝи чь йә. Әԝи готә ԝан, ԝәки әԝ һатийә сәва рʹӧһʹанида али щьмәʹте бькә, нә кӧ һʹәԝщед ԝани физикида. Әԝи готә ԝан: «Бона хԝарьна пʹучʹ нәхәбьтьн, ле бона ԝе хԝарьне бьхәбьтьн, йа кӧ жийина һʹәта-һʹәтайеда дьминә» (Йуһʹн. 6:25-27). ԝ18.06 4 ¶4-5

Иса мәрьв һʹьз дькьрьн у ләма һьндава ԝанда дьлшәԝат бу. Әԝ һьндава мәрьвед дьлшкәсти у йед сьст, кӧ мина ԛамише пʹәрчʹьԛи у пʹьлта чʹьруси бун, бь дьлшәԝати у бь сәбьр бу. Әԝи ԝана фәʹм дькьр у бона ԝан хәм дькьр (Марԛ. 10:14). Рʹаст ә әм мина Иса нькарьн мәрьва фәʹм кьн у ԝана һин кьн, ле әм дькарьн у һьн жи гәрәке хәм бькьн бона мәрьвед мьһала хԝәда. Әԝ те һʹәсабе кӧ әм бьзаньбьн ча, кʹәнге, у чьԛас дьреж тʹәви ԝан хәбәр дьн. Иро гәләк мәрьв жь дәсте мәрьвед хԝәйиһʹӧкӧм, кӧ пʹәрәһʹьз у дьлсар ьн, ӧса жи жь дәсте политик у сәрԝеред религийа, дьчәрчьрьн у «бәлабуйи» нә (Мәт. 9:36). Ләма жи әԝ мәрьв ида итʹбарийа хԝә кәсәки найньн у бе һеви нә. Чьԛас фәрз ә һьндава ԝанда һʹәйф у дьлшәԝат бьн, нә тʹәне бь гьлийед хԝә, ле ӧса жи бь дәнге хԝә! Бь рʹасти гәләк мәрьв мьзгинийа мә ԛәбул дькьн, нә тʹәне бона занәбуна мәйә Кʹьтеба Пироз йан жи шеԝьркьрьна мә тʹәви ԝан, ле ӧса жи әԝана дьвиньн кӧ әм бона ԝан хәм дькьн у ԛәдьре ԝан дьгьрьн. ԝ18.09 31-32 ¶13-14

Гәло әм ча дькарьн бьдьнә кʹьфше, ԝәки әм фәʹм дькьн кӧ һʹәԝщәтийа мәйә рʹӧһʹани һәйә? Ве йәке әм дьдьнә кʹьфше, гава хԝарьна рʹӧһʹани дьхԝьн, фәʹм дькьн ԝәки гәрәке Хԝәде нас кьн у ӧса жи аликʹари у рʹебәрийа ԝи дьгәрʹьн. Һәрге әм ӧса бькьн, әме һе бәхтәԝар бьн. Баԝәрийа мә жи ԝе һе ԛәԝи бә һьндава созед Хԝәде (Тито 2:13). Сәва әм бәхтәԝар бьминьн, гәләк фәрз ә һәләԛәтийа мә тʹәви Йаһоԝа ԛәԝи бә. Паԝлосе шанди ньвиси: «Тʹьме пе Хӧдан [Йаһоԝа] ша бьн, диса дьбежьм тʹьме ша бьн!» (Фили. 4:4). Сәва әм достийа хԝәрʹа тʹәви ԝи ша бьн, әм гәрәке биланийа жь Хԝәде ԛазанщ кьн (Мәтʹлк. 3:13, 18). Ле сәва бәхтәԝар бьминьн, бәс нинә тʹәне Хәбәра Хԝәде бьхуньн, фәрз ә биньн сери ԝан тьшта чь кӧ әм педьһʹәсьн. Иса да кʹьфше кӧ әԝ йәк гәләк фәрз ә, чахе гот: «Һәгәр һун ве йәке заньн, һуне хԝәзьли бьн гава бьԛәдиньн» (Йуһʹн. 13:17; Аԛуб 1:25). Бәле, әԝ йәк гәләк фәрз ә һәрге әм дьхԝазьн рʹӧһʹанида һʹәԝщәтийа хԝә рʹази кьн у бәхтәԝар бьминьн. ԝ18.09 18 ¶4-6

Епафрас хушк-бьра рʹьнд нас дькьр, у бона ԝан гәләк хәм дькьр. Дәрәща ԝи жи мина йа Паԝлос бу, әԝ жи «гьрти» бу. Ле әԝ йәк рʹе ԝи нәдьгьрт, ԝәки бона рʹӧһʹанийа ԝана хәм бькә (Фьльмн. 23). Әԝи бона хушк-бьра дӧа дькьр у һәла һе жи дӧада наве ԝан һьлдьда. Әм жи дькарьн ве йәкеда чʹәʹв бьдьнә ԝи. Ԛәԝата дӧайед ӧса гәләк мәзьн ә, илаһи гава әм дӧада наве хушк-бьра һьлдьдьн (2 Корн. 1:11; Аԛуб 5:16). Бьфькьрә дәрһәԛа ԝан мәрьва, бона кʹижана тӧйе дӧа ки у дӧада наве ԝан һьлди. Мина Епафрас, гәләк хушк-бьред мә жи дӧа дькьн бона ԝан, йед кӧ щьвата ԝанда ньн, бона малбәтед кӧ рʹасти чәтьнайа тен, йан жи бона ԝан, йед кӧ рʹасти сафикьрьнед чәтьн йан жи щерʹьбандьна тен. Хенщи ве йәке, ԝе баш бә һәрге әм дәрһәԛа ԝан жи дӧа кьн, кʹижана мәрьве хԝәйи незик ӧнда кьрьнә, йан жи йед кӧ рʹасти чәтьнайед гьран у шәрʹа һатьнә, у йед кӧ тʹӧнәбунеда ньн. Бәле, гәләк хушк-бьред мә һәнә, дәрһәԛа кʹижана әм дькарьн дӧа кьн у бь ԝе йәке кʹаре ԝанрʹа биньн. ԝ18.09 5-6 ¶12-13

Паԝлос тʹәне дәрһәԛа тьштед материали нә дьгот. Әԝи ӧса жи дьгот дәрһәԛа дьлдайине, ширәта, у аликʹарийе бона ԝан, йед кӧ һʹәԝщә нә (Кʹар. Шанд. 20:31-35). Пе хәбәрдан у кьред хԝә, Паԝлос һин кьр, ԝәки бь мәрʹданийе ԝәʹдә у ԛәԝата хԝә хәрщ кьн, бькʹәвьнә һʹәйра мәрьва у һʹьзкьрьна хԝә бьдьнә кʹьфше. Леколинкʹаред кӧ рʹабун-рʹуньштьна мәрьва леколин дькьн, тедәрхьстьн ԝәки чахе мәрьв мәрʹд ә, әԝ бәхтәԝар дьбә. Ль гора готарәке, «мәрьв гәләк ша дьбьн, гава кәсәкирʹа ԛәнщийе дькьн». Ӧса жи леколинкʹара готьн, ԝәки аликʹари мәрьварʹа, нете дьдә әʹмьре мә. Һьнә експерт жи ширәте дьдьнә мәрьва, ԝәки бь рʹәзәдьли шьхӧл бькьн, сәва сьһʹәт-ԛәԝат у бәхтәԝар бьн. Әԝ йәк бона мә тьштәки тʹәзә нинә, чьмки Әʹфьрандаре мә Йаһоԝа, дәрһәԛа ве йәке Хәбәра хԝәда бь һʹьзкьрьне ида мәрʹа пешда гот (2 Тимтʹ. 3:16, 17). ԝ18.08 22 ¶17-18

Пʹехәмбәртийа Ишайа дәрһәԛа Иса, мә дьлгәрм дькә у ԛәԝи дькә. Әԝи пʹехәмбәрти кьр, ԝәки Иса ԝе «тʹәне ль гора дитьна чʹәʹвед хԝә диԝане нәкә, у тʹәне ль горʹа бьһистьна гӧһед хԝә ширәт нәкә». Әԝе «бь һәԛийе диԝана бәләнгаза бькә» (Иша. 11:3, 4, ДТʹ). Чьрʹа әԝ йәк дьл дьдә мә? Чьмки ве дьнйайеда мәрьв фьрԛийе дькьнә ортʹа һәвдӧ. Ле әм һивийа ԝи Һʹакьме беԛьсур ьн, демәк Иса, йе кӧ ԝе тʹӧ щар бь дитьна чʹәʹве хԝә диԝана мә нәкә! Һәр рʹож әм фькьред хԝә дәрһәԛа мәрьва дьбежьн. Ле әм гӧнәкʹар ьн, ләма жи әм нькарьн мина Иса бь тʹәмами һәр тьшти рʹаст фәʹм кьн. Гәләк щар сәр мә һʹӧкӧм дькә әԝ йәк чь жи әм дьвиньн. Ле чахе Иса сәр әʹрде бу, әԝи тʹәмикә ӧса да мә кӧ «анәгори дитьна чʹәʹвед хԝә» диԝане нәкьн, ле анәгори «рʹастийе диԝане бькьн». Әшкәрә йә, ԝәки Иса дьхԝазә әм чʹәʹв бьдьнә ԝи у фьрԛийе нәкьнә ортʹа мәрьва анәгори дитьна хԝә. ԝ18.08 8 ¶1-2

Рʹаст ә әԝ жь әзмана мәрʹа хәбәр надә, ле әԝи Хәбәра хԝә, демәк Кʹьтеба Пироз дайә мә, бь сайа кʹижани әԝ рʹебәрийе дьдә мә. Хенщи ве йәке, рʹӧһʹе Йаһоԝа рʹебәрийе «ԝәкʹилхәрще амьн» дькә, сәва хԝарьна рʹӧһʹани бьдә хьзмәткʹаред Ԝи (Луԛа 12:42). Иро әм беһʹәсаб хԝарьна рʹӧһʹани дьстиньн, демәк әʹдәбйәтед нәшьркьри у йед онлайн, ӧса жи видео у аудийо! Бьра әԝ гьлийед Хԝәде кӧ Кʹьтеба Пирозда һатьнә ньвисаре, баԝәрийа мә ԛәԝи кьн ве йәкеда, кӧ һʹәму тьшт бьн контрола ԝида нә, у әԝ ԝе һʹәму зийан кӧ Шәйтʹан у дьнйа ԝийә хьраб анин, кʹокева бьдә һьлдане. Ԝәрә әм хԝәрʹа ԛьрар кьн, кӧ тʹьме рʹьнд гӧһ бьдьнә дәнге Йаһоԝа. Һәрге әм ӧса бькьн, әме ԛәԝи бьминьн ԝан чәтьнайада кӧ иро һәнә у йед кӧ ԝе рʹасти мә бен. Кʹьтеба Пироз мәрʹа дьбежә: «Ԝәрʹа сәбьр лазьм ә кӧ һун әʹмьре Хԝәде биньнә сери у бьгьһижьнә созе ԝи» (Ибрн. 10:36). ԝ19.03 13 ¶17-18

Муса гәләк сала рʹебәре Исраелийа бу, у ләма фәʹмдари йә кӧ Йешу дьбәкә бәрхԝә дькʹәт, кӧ гәло щьмәʹта Хԝәде ԝе ча ԝи ԛәбул кә (Ԛан. Дщр. 34:8, 10-12). Кʹьтебәкеда дәрһәԛа рʹеза жь Йешу 1:1, 2, те готьне: «Чаԝа бәре, ӧса жи иро гава сәрԝер йан һʹӧкӧмәти те гӧһастьне, бона щьмәʹте әԝ ԝәʹдәки лапи чәтьн ә». Фәʹмдари йә, ԝәки Йешу бәрхԝә дькʹәт, ле йәкә әԝи итʹбарийа хԝә Йаһоԝа ани, у дәрберʹа пәй рʹебәрийа ԝи чу (Йешу 1:9-11). Бадиһәԝа нибу кӧ әԝи баԝәрийа хԝә Хԝәде дьани. Кʹьтеба Пироз нишан дькә, ԝәки Йаһоԝа пе мәләке хԝә, рʹебәри Йешу у щьмәʹта хԝә дькьр. Әм дькарьн бежьн ԝәки әԝ мәләк, Хәбәр бу, демәк Кӧрʹе Хԝәдейи тайе тʹәне (Дәркʹ. 23:20-23; Йуһʹн. 1:1). Пе аликʹарийа Йаһоԝа, Исраели һини ве гӧһастьне бун, кӧ дәԝса Муса ида Йешу рʹебәрийа ԝан дькьр. ԝ18.10 22-23 ¶1-4

Йаһоԝа ԝана нас дькә йед кӧ бь дьл жерʹа хьзмәт дькьн, у наве ԝан «кʹьтеба биранинеда, ДТʹ» дьньвисә. Ле сәва кӧ наве мә кʹьтеба Йаһоԝайә биранинеда ньвисар бә, у әм нава щьмәʹта ԝида бьн, әм борщдар ьн тьштәки бькьн. Малахи рʹастә-рʹаст гот, ԝәки әм гәрәке жь Йаһоԝа бьтьрсьн у дәрһәԛа наве ԝи бьфькьрьн. Һәрге әм хенщи Йаһоԝа хԝә тʹәсмили кәсәки йан тьштәки дькьн, ахьрийеда наве мә ԝе кʹьтеба ԝийә жийинеда бе һьлдане (Дәркʹ. 32:33; Зәб. 69:28). Бәс нинә тʹәне соз бьдьнә Йаһоԝа кӧ әме ԛьрара ԝи бьԛәдиньн, у бенә ньхӧмандьне. Әԝе йәке әм тʹәне щарәке дькьн, ле паше ида тʹәмамийа әʹмьре хԝә жерʹа хьзмәт дькьн. Әԝ йәк кӧ әм алийе Йаһоԝа нә чаԝа щьмәʹта ԝи, әм гәрәке тʹьме пе жийина хԝә избат кьн. Әм гәрәке ча иро ӧса жи ахьрийеда, у һʹәта кӧ әм сах ьн, гӧрʹа ԝида бьн (1 Пәт. 4:1, 2). ԝ18.07 23-24 ¶7-9

Һʹәму Мәсиһи гәрәке сәр хԝә бьхәбьтьн, ԝәки «һинбунед пешьнә сәр Мәсиһ алики бьһельн», у «бенә сәр һинбуна гьһишти». Ле әԝ йәк хԝәха найе стандьн. Әм гәрәке гьһиштибунеда тʹьме һе пешда һәрʹьн. Бона ве йәке, әм гәрәке занәбун у фәʹмкʹарийа хԝә һе зедә кьн. Ве йәкеда ԝе али мә бькә хԝәндьна Кʹьтеба Пирозә һәррʹожи (Зәб. 1:1-3). Ле ԝә хԝәрʹа нет данийә ԝәки һәр рʹож Кʹьтеба Пироз бьхуньн? Һәрге һун ӧса бькьн, һуне һе кʹур фәʹм кьн ԛанун у принсипед Йаһоԝа. Ԛанунәкә лапә мәзьн бона Мәсиһийа әԝ һәйә ԛануна һʹьзкьрьне. Иса готә шагьртед хԝә: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹн. 13:35). Аԛуб сәр һʹьзкьрьне гот «ԛануна Пʹадшатийе» (Аԛуб 2:8). Ле Паԝлос гот: «Һʹьзкьрьн сәре Ԛануне дьгьрʹә» (Рʹом. 13:10). Әԝ гьлийед ԛәԝи дәрһәԛа һʹьзкьрьне лайиԛ ьн, чьмки Кʹьтеба Пироз дьбежә кӧ «Хԝәде һʹьзкьрьн ә» (1 Йуһʹн. 4:8). ԝ18.06 19 ¶14-15

Рʹаст ә Исраелийа һьнге һерса Йаһоԝа дьанин, ле дәԝсе Муса һерс кʹәт. Әԝи хԝә нәгьрт у гьлийед зедә хәбәр да, у нә жи фькьри кӧ хәбәрдана ԝи ԝе чь ахьрийе бинә. Щара пешьн Муса хԝә рʹаст да кʹьфше чахе щьмәʹт мьԛабьл рʹабу. Ле щара дӧда әԝи ида чʹәʹве хԝә сәр Йаһоԝа һьлда, чьмки кьред мәрьвед дьн сәр ԝи һʹӧкӧм бун (Дәркʹ. 7:6). Дьԛәԝьмә әԝ һаԛас гәләк сал тʹәви ԝан Исраелед рʹабәр бу, кӧ ида жь ԝана вәстийа у әʹщьз бу. Дьԛәԝьмә Муса дәԝса кӧ һӧрмәте бьдә Йаһоԝа, һьнге тʹәне дәрһәԛа хԝә дьфькьри. Һәрге мәрьвәки ӧса амьн ча Муса һʹьш-аԛьле хԝә да сәр тьштед дьн у гӧнә кьр, әм жи дькарьн бькʹәвьнә ве тʹәльке. Мина Муса, әм жи бәр шемика дьнйа тʹәзә сәкьнинә, кʹижан кӧ Йаһоԝа соз дайә (2 Пәт. 3:13). Фәʹмдари йә тӧ кәс жь мә нахԝазә әве мәщале ӧнда кә. Ләма жи әм гәрәке итʹбарийа хԝә Йаһоԝа биньн, ԝәки чʹәʹве мә сәр ԝи бә у тʹьме ԛьрара ԝи биньн сери (1 Йуһʹн. 2:17). ԝ18.07 15 ¶14-16

Шәйтʹан нькарә зоре мәрьва бькә кӧ мьԛабьли хԝәстьна хԝә һәрʹьн (Аԛуб 1:14). Гәләк мәрьв бь нәзанийа хԝә, нә жи тедәрдьхьн ԝәки алийе Шәйтʹан дьгьрьн. Ле чахе әԝана рʹастийе педьһʹәсьн, һәр кәс жь ԝан хԝәха дьжберә кʹера хьзмәт кә (Кʹар. Шанд. 3:17; 17:30). Һәрге мә дьле хԝәда сафи кьрийә кӧ ԛьрара Хԝәде биньн сери, Шәйтʹан тʹӧ тьшти нькарә бькә сәва амьнийа мә һьлшинә (Иб. 2:3; 27:5). Диса һәнә тьштед ӧса кӧ Шәйтʹан у щьнед ԝи нькарьн бькьн. Мәсәлә, Кʹьтеба Пирозда тʹӧ щики найе готьне, ԝәки әԝана дькарьн һʹьше мә у дьле мә бьхуньн, тʹәне Йаһоԝа у Иса дькарьн (1 Сам. 16:7; Марԛ. 2:8). Һәрге хәбәрдан у кьред мә ль гора ԛьрара Хԝәде нә, әм гәрәке дӧдьли нәбьн кӧ Йаһоԝа ԝе нәһелә, ԝәки Мире-щьна зийанәкә ӧса бьдә мә, кӧ жийина һʹәта-һʹәтайе нәстиньн (Зәб. 34:7). Әм гәрәке дьжмьне хԝә рʹьнд нас бькьн, ле әм гәрәке тʹӧ щар жь ԝи нәтьрсьн. Пе аликʹарийа Йаһоԝа һәла һе мәрьвед гӧнәкʹар жи дькарьн шәрʹе мьԛабьли Шәйтʹанда сәркʹәвьн. Һәрге әм мьԛабьли ԝи бьсәкьньн, әԝ ԝе жь мә бьрʹәвә (Аԛуб 4:7; 1 Пәт. 5:9). ԝ18.05 26 ¶15-17

Бьдьнә бәр чʹәʹве хԝә һун дьчьнә щийе дур сәр щьвинәкә фәрз у һун гәрәке бькʹәвьнә отобусе сәва бьгьһижьнә ԝи щийи. Сәр щийе сәкьнандьна отобуса гәләк отобус сәкьнинә. Ԝәрʹа әԝ отобус лазьм ә, кʹижан дьчә щийе кӧ ԝәрʹа лазьм ә. Фәʹмдари йә һуне нәкʹәвьнә отобусәкә дьн, чьмки һун заньн кӧ әԝе ԝә бьвә щики дьн. Иро щаһьл рʹасти дәрәща мина ве тен. Бь рʹасти чахе мәрьв мәзьн дьбә, әʹмьре ԝи мина рʹеԝитийе йә. Щара щаһьл дькарьн тʹәвһәв бьн, чьмки әʹмьрда рʹасти гәләк бьжартьн у сафикьрьна тен. Щаһьлно, һәрге һун заньн кʹижан рʹе бьжберьн, һьнге ԝәрʹа ԝе дьһа һеса бә сафикьрьнед рʹаст бькьн. Ле һуне әʹмьре хԝәда һʹьш-аԛьле хԝә дайньн сәр ве йәке, кӧ дьле Йаһоԝа ша кьн? Әԝ те һʹәсабе ԝәки һʹәму сафикьрьнед хԝәда, бәʹса хәбәре һинбунеда, хәбатеда, зәԝащеда у сафикьрьнед дьнда, ширәт у рʹебәрийа Йаһоԝа һьлдьнә һʹәсаб. Әԝ ӧса жи те һʹәсабе ԝәки нетед рʹӧһʹани дайньн пешийа хԝә. Щаһьлед кӧ һʹьш-аԛьле хԝә датиньн сәр хьзмәтийа Йаһоԝарʹа, гәрәке дӧдьли нәбьн ԝәки Йаһоԝа ԝе ԝана кʹәрәм кә у али ԝан бькә кӧ пешдачуйи бьн. ԝ18.04 25 ¶1-3

Йәфтаһ сонда хԝә ани сери у ԛиза хԝә шандә коне пироз, сәва әԝ тʹәмамийа әʹмьре хԝә ԝедәре хьзмәт кә (Һʹакьм. 11:30-35). Бәле, Йәфтаһрʹа чәтьн бу, ле ԛиза ԝирʹа һе чәтьн бу. Ле йәкә әԝе пьштгьрийа созе баве хԝә кьр (Һʹакьм. 11:36, 37). Әԝ һазьр бу сәва ве ԛӧрбане, кӧ мер нәкә, зарʹед ԝе тʹӧнә бьн, у рʹькʹьнийатʹа малбәта ԝан жи дьреж нәбә. Һьнге жерʹа бь рʹасти бәрдьли у ԛәԝикьрьн лазьм бу. Кʹьтеба Пироз дьбежә: «Исраеледа бу ԛәйдә: Һәр сал, сале чар рʹожа кәчʹькед Исраеле дьчун сәва пʹайе ԛиза Йәфтаһе Гиләади бьдьн» (Һʹакьм. 11:39, 40, ДТʹ). Иро жи гәләк щаһьлед кӧ азәп дьминьн у һʹьш-аԛьле хԝә датиньн сәр кьред кӧ «ль Хӧдан хԝәш» тен, һежайи пʹайа у дьлдайине нә (1 Корн. 7:32-35). ԝ18.04 17 ¶10-11

Гәләк мьлйакʹәт тʹәви рʹабәрибуна Шәйтʹан бунә йәк. Пешийа Селаве, Шәйтʹан һьнә жь ԝан мьлйакʹәта һелан кьр, ԝәки тʹәви жьна бенамусийе бькьн. Кʹьтеба Пирозда дәрһәԛа зийа, демәк Шәйтʹан, те готьне ԝәки әԝи жь се пʹара пʹарәкә стәйркед әʹзмен тʹәви хԝә кʹьшанд (Дәстп. 6:1-4; Әʹйан. 12:3, 4). Чахе әԝан мьлйакʹәта пьшта хԝә данә малбәта Хԝәде, ԝана алийе Шәйтʹан гьрт у хԝә кьрьн бьн һʹӧкӧме ԝи. Әԝ рʹабәр нә кӧ тʹәне әв кʹом ә, йа кӧ чәтьнайа пешда тинә, ле Шәйтʹан чʹәʹв дайә Пʹадшатийа Хԝәде, у сәрԝертийа хԝә кӧ найе дитьн, саз кьрийә. Ве сәрԝертийеда әԝ ә пʹадша, у әԝи һʹӧкӧм дайә щьна жи ԝәки сәрԝертийе сәр дьнйайе бькьн (Әфәс. 6:12). Шәйтʹан бь сайа сәрԝертийа хԝәйә кӧ найе дитьн, һʹӧкӧм дькә сәр һʹәму сәрԝертийед мәрьва. ԝ18.05 23 ¶5-6

Чаԝа баве һʹьзкьри, Хԝәде мә ширәт у рʹаст дькә. Даԝьд ширәткьрьна Хԝәде дьшекьранд. Әԝи дьшьрмиш дьбу сәр фькьред Хԝәде, чʹәʹв дьда ньһерʹандьна ԝи у изьн дьда ԝи, ԝәки ԝи рʹаст кә у алийе башда бьгӧһезә. Һәрге һун жи ӧса бькьн, һʹьзкьрьна ԝә жи һьндава Хԝәде ԝе мәзьн бә у һуне бьхԝазьн гӧрʹа ԝи бькьн. Хенщи ве йәке, һуне рʹӧһʹанида жи бьгьһижьн. Хушкәкә мә бь наве Кристин гот: «Чахе әз леколин дькьм у сәр хԝәндьна хԝә дьфькьрьм, әз ӧса тʹәхмин дькьм те бежи Йаһоԝа хут бона мьн әԝ тьшт дайә ньвисаре!» Һәрге һун рʹӧһʹанида мәзьн бьн, һуне ида сәр ве дьнйайе у ахьрийа ԝе, пе чʹәʹве Хԝәде бьньһерʹьн. Һьн жи Йаһоԝа ԝе занәбун у сәрԝахтийа мәзьн бьдә ԝә. Ле чьрʹа? Чьмки әԝ дьхԝазә һун әʹмьре хԝәда тьштед фәрз дайньн щийе пешьн, сафикьрьнед аԛьлайи бькьн, у бь баԝәрийе сәр ахьрийе бьньһерʹьн (Иша. 26:3). ԝ18.12 26 ¶9-10