Мьждар

Чахе әм Йаһоԝарʹа хьзмәт дькьн, һевийа мә һәйә, ԝәки әме дьнйа тʹәзәда һʹәму тьштед кӧ Адәм у Һеԝайе ӧнда кьрьнә, бьстиньн у ӧса жи һʹәта-һʹәтайе бьжин. Адәм у Һеԝайе нәхԝәстьн Йаһоԝарʹа хьзмәт кьн, чьмки һʹьзкьрьна хԝә һьндава ԝи ԛәԝи нәкьрьн. Ле йәкә Йаһоԝа изьн да ԝан, кӧ дьреж бьжин у зарʹед ԝан һәбьн, у хԝәха сафи кьн чаԝа зарʹед хԝә хԝәй кьн. Ахьрийа сафикьрьна Адәм у Һеԝайе, демәк кӧ хԝә сәри хԝә бьн, зутьрәке да кʹьфше ԝәки ԝана нәаԛьлайи кьр. Кӧрʹе ԝани мәзьн бьре хԝәйи нәнәһәԛ кӧшт, у паши ве йәке зорбәти у хԝәһʹьзи нава мәрьвада бәла бу (Дәстп. 4:8; 6:11-13). Ле йәкә Йаһоԝа чʹарә кьр, ԝәки һʹәму заред Адәм у Һеԝайе, йед кӧ бьхԝазьн жерʹа хьзмәт кьн, хьлаз кә (Йуһʹн. 6:38-40, 57). Чахе һун пебьһʹәсьн кӧ Йаһоԝа ча бь сәбьр у һʹьзкьрьн ә, һʹьзкьрьна ԝә һьндава ԝи ԝе мәзьн бә. Һуне нәхԝазьн мина Адәм у Һеԝайе бьжартьна нәрʹаст бькьн, ле әʹмьре хԝә тʹәсмили Йаһоԝа бькьн. ԝ19.03 2 ¶3; 4 ¶9

Сәва дьлшәԝат бьн, кʹур бьфькьрьн сәва фәʹм кьн, кӧ нәфәред ԝә у хушк-бьред ԝә рʹасти чь чәтьнайа тен. Щьватеда бона щаһьла, нәхԝәша, мәрьвед әʹмьрда мәзьн у йед кӧ мәрьвед хԝә ӧнда кьрьнә, ԝәʹдә бьвиньн у бьпьрсьн һәла әԝана чаԝа ньн. Чахе әԝана дьле хԝә ԝәрʹа вәкьн, рʹьнд гӧһ бьдьнә ԝан. Бьра әԝана тʹәхмин кьн, кӧ һун һʹале ԝана бь рʹасти фәʹм дькьн. У чьԛас дәсте ԝә те, али ԝан бькьн. Һәрге әм һʹәму жи ӧса бькьн, әме һʹьзкьрьна һʹәлал бьдьнә кʹьфше (1 Йуһʹн. 3:18). Чахе дьхԝазьн али кәсәки бькьн, әм гәрәке фәсал бьн. Чьрʹа? Чьмки чәтьнайада һʹәму мәрьв мина һәв хԝә надьнә кʹьфше. Һьнәк дьхԝазьн кӧла дьле хԝә бьрʹежьн, һьнәк жи нахԝазьн дәрһәԛа чәтьнайед хԝә хәбәр дьн. Ләма жи чахе әм дьхԝазьн али ԝан бькьн, гәрәке пьрсед гәләк шәхси нәдьнә ԝан (1 Тʹеслн. 4:11). Һәрге жи әԝана дьле хԝә мәрʹа вәдькьн, щара дьԛәԝьмә әм гьлийед ԝанрʹа ԛайил нибьн. Ле әм гәрәке фәʹм бькьн, кӧ чьрʹа әԝана хԝә ӧса тʹәхмин дькьн. Әм гәрәке бьһистьнеда сәрхԝә бьн, ле хәбәрданеда ләз нәкʹәвьн (Мәт. 7:1; Аԛуб 1:19). ԝ19.03 19 ¶18-19

Дьԛәԝьмә һун дьтьрсьн дәрһәԛа рʹастийе бәр гәләк мәрьва хәбәр дьн. Биньн бира хԝә Нәһәмийа. Әԝи ԛәсьра пʹадшаки ԛәԝида ԛӧльх дькьр. Нәһәмийа гәләк бәрхԝә дькʹәт, чьмки диԝар у дәргәһед Оршәлиме һьлшанди бун (Нәһәм. 1:1-4). Бьдьнә бәр чʹәʹве хԝә, дьле ԝи ча дькʹӧта, гава пʹадша жь ԝи пьрси, кӧ әԝ чьрʹа ӧса мәʹдәкьри йә. Нәһәмийа дәрберʹа Йаһоԝарʹа дӧа кьр у паше щаба пʹадше да. Пʹадша чахе щаба ԝи бьһист, аликʹарийа мәзьн да щьмәʹта Хԝәде (Нәһәм. 2:1-8). Ӧса жи бьфькьрьн дәрһәԛа Уньс. Чахе Йаһоԝа ԝирʹа гот кӧ һәрʹә тʹәви бьнәлийед Нинәԝайе хәбәр дә, Уньс гәләк тьрсийа у чу шәһәрәки майин (Унс. 1:1-3). Ле пе аликʹарийа Йаһоԝа, әԝ чу у шьхӧле кӧ Хԝәде дабу ԝи, кьр. У бь рʹасти гьлийед ԝи кӧ Нинәԝайарʹа гот, гәләк баш сәр ԝана һʹӧкӧм бун (Унс. 3:5-10). Жь сәрһатийа Нәһәмийа әм дәрсәкә фәрз һин дьбьн, кӧ пешийа щаба хԝә бьдьн лазьм ә дӧа бькьн. Ле жь Уньс әм педьһʹәсьн, кӧ Йаһоԝа дькарә али мә бькә, ԝәки жерʹа хьзмәт кьн, һәрге жи әм жь тьштәки дьтьрсьн. ԝ19.01 11 ¶12

Чахе әм дәстпедькьн анәгори рʹастийа Кʹьтеба Пироз бьжин, һәләԛәтийа мә тʹәви һәвал у мәрьвед мәйи незик дькарә бе гӧһастьне. Ле чьрʹа? Иса дәрһәԛа ве йәке гот, чахе бона шагьртед хԝә дӧа кьр: «Ԝан бь рʹастийа хԝә бӧһӧртижьбарә кә. Хәбәра тә рʹасти йә» (Йуһʹн. 17:17). Әв гьли «бӧһӧртижьбарә кә», дькарә ӧса жи бе һʹәсабе «ԝана башԛә кә». Бәле, чахе әм рʹастийе ԛәбул дькьн, әм жь ве дьнйайе башԛә дьбьн, чьмки ида накʹәвьнә бәр байе ԝе. Мәрьв сәр мә щурʹәки майин дьньһерʹьн, чьмки әм ида пе принсипед Кʹьтеба Пироз дьжин. Һьнә һәвал у нәфәред мә жи дьбәкә хԝә жь мә дур бьгьрьн, йан һәла һе жи мьԛабьли баԝәрийа мәйә тʹәзә бьн. Ле әм әʹщебмайи наминьн чахе әԝ йәк дьԛәԝьмә. Иса гот: «Дьжмьнед мерьв ԝе жь мала ԝи бьн» (Мәт. 10:36). Ле Иса ӧса жи соз да кӧ чь жи әм бона рʹастийе ӧнда кьн, әме һе зедә тьшт дәԝсе ԛазанщ кьн. ԝ18.11 6 ¶11

Паԝлосе шанди хушк-бьред хԝә ԛимәт дькьр, у әԝ йәк пе гьлийед ԝи те кʹьфше. Әԝ тʹьме дӧайед хԝәда жь Хԝәде рʹази бу бона ԝан. Әԝи ӧса жи пе нәʹмед хԝә ԝанрʹа дьда кʹьфше, кӧ ԝана ԛимәт дькә. Рʹомайи сәре 16-да, 15 рʹезед пешьнда Паԝлос бәʹса 27 хушк-бьра дькә бь наве ԝан. Әԝи илаһи Прьскила у Әкила ани бира хԝә, йед кӧ бона ԝи «дәст жь әʹмьре хԝә» кʹьшандьн, ӧса жи бәʹса Фойбәйе кьр, йа кӧ «хԝәйити гәләка» у ӧса жи Паԝлос дькьр. Әԝи пʹайе ԝан хушк-бьред дәлал да, бона щәфед ԝан (Рʹом. 16:1-15). Паԝлос фәʹм дькьр, ԝәки әԝ хушк-бьра гӧнәкʹар ьн, ле әԝи дина хԝә дьда сәр һʹӧнӧред ԝани баш. Бьдьнә бәр чʹәʹве хԝә, кӧ әԝ хушк-бьра ча ша бун у ԛәԝи бун, чахе щьватеда нәʹма ԝи хԝәндьн, кʹидәре әԝ пʹайе ԝан дьдә. Бешьк, әԝе йәке һәвалтийа ԝан тʹәви Паԝлос һе ԛәԝи кьрийә. Ле һун тʹьме рʹазибуна хԝә дьдьнә кʹьфше хушк-бьрарʹа, бона гьли у кьред ԝани баш? ԝ19.02 16 ¶8-9

Гәло сәва беԛьсур бьн, әм гәрәке бегӧнә бьн? Нә әм гәләк шашийа дькьн у кемасийед мә һәнә! Ле Йаһоԝа дина хԝә надә сәр шашийед мә. Хәбәра ԝи дьбежә: «Хӧдан, һәгәр дина Хԝә бьди гӧнәйед мә, ки ԝе бькарьбә бәр Тә бьсәнә, Хԝәйо?» (Зәб. 130:3) Әԝ занә ԝәки әм гӧнәкʹар ьн у кемасийед мә һәнә, ле йәкә әԝ бь мәрʹдани мә дьбахшинә (Зәб. 86:5). Ӧса жи Йаһоԝа занә синоред мә, у әԝ жь мә һаԛас дәԝа накә чьԛас әм нькарьн (Зәб. 103:12-14). Сәва хьзмәткʹаред Йаһоԝа беԛьсур бьн, һʹьзкьрьн гәләк фәрз ә. Һʹьзкьрьна мә у амьнийа мә һьндава Баве мәйи әзмана, гәрәке тʹам у бекемаси бә. Һәрге ԝәʹде щерʹьбандьна у тәнгасийа әм һʹьзкьрьна хԝә һьндава ԝи ӧнда накьн, әԝ те һʹәсабе ԝәки әм беԛьсур ьн (1 Дир. 28:9; Мәт. 22:37). Әм принсипед Йаһоԝайи рʹаст заньн, у һʹьш-аԛьле мә тʹәне сәр ве йәке йә, кӧ дьле Баве хԝәйи әзмана ша кьн. Һʹьзкьрьна мә һьндава Хԝәде, ԛәԝате дьдә мә, ԝәки ԝи сәр һʹәму тьштирʹа бьгьрьн. Ԝи щурʹәйи әм избат дькьн, ԝәки беԛьсур ьн. ԝ19.02 3 ¶4-5

Һәр щар чахе әм дьвиньн кӧ чьԛас кʹар ә тьштед рʹаст бькьн, баԝәрийа мә һе ԛәԝи дьбә (Аԛуб 1:2, 3). Дьле мә ша дьбә, ԝәки Йаһоԝа мәрʹа фьрнаԛ дьбә кӧ мә нав дькә зарʹе хԝә, у әм һе зедә дьхԝазьн дьле ԝи ша кьн (Мәтʹлк. 27:11). Паше, һәр щерʹьбандьн мәрʹа дьбә мәщал кӧ жерʹа нишан кьн, ԝәки әм бь рʹасти дьхԝазьн Баве хԝәрʹа хьзмәт кьн (Зәб. 119:113). Әм Йаһоԝарʹа избат дькьн, ԝәки әм бь тʹәмамийа дьле хԝә ԝи һʹьз дькьн (1 Пʹадш. 8:61). Ле әм гӧнәкʹар ьн, ләма жи щара шашийа дькьн. Һәрге мә шаши кьрийә, әм гәрәке биньн бира хԝә Һьзԛийа Пʹадша. Әԝи жи шаши кьрьн, ле гӧне хԝә ани рʹуйе хԝә у бәрдәԝам кьр Йаһоԝарʹа бь тʹәмамийа дьле хԝә хьзмәт кә (Иша. 38:3-6; 2 Дир. 29:1, 2; 32:25, 26). Ԝәрә әм инкʹар кьн һәр тьштед кӧ фькьре Шәйтʹан дькарә бькә һʹьше мә. Ԝәрә әм тʹьме дӧа бькьн, ԝәки Хԝәде «дьле гӧһдар» бьдә мә у Йаһоԝарʹа амьн бьминьн (1 Пʹадш. 3:9; Зәб. 139:23, 24). ԝ19.01 18-19 ¶17-18

Әм кʹаре дьстиньн чахе щаба хԝә дьдьн сәр щьвате (Иша. 48:17). Чаԝа? Йа пешьн, чахе әм нете датиньн кӧ щаба хԝә бьдьн, әм һелан дьбьн бона щьвате хԝә һазьр кьн. Гава әм хԝә рʹьнд һазьр дькьн, әм дәстпедькьн Хәбәра Хԝәде кʹур фәʹм кьн. У әм чьԛас кʹур фәʹм дькьн, һаԛас баш әм дькарьн бьдьнә хәбате чь кӧ педьһʹәсьн. Йа дӧда, әм даһа шабуне жь щьвате дьстиньн, чьмки әм хԝәха жи щьватеда щаба хԝә дьдьн. Йа сьсийа, чахе әм щаба хԝә дьдьн, әв фькьр даһа рʹьнд бира мәда дьминьн. Чахе әм пе щабед хԝә баԝәрийа хԝә әйан дькьн, әм ӧса жи дьле Йаһоԝа ша дькьн. Әм гәрәке дӧдьли нәбьн, ԝәки Йаһоԝа мә дьбьһе у гәләк ԛимәт дькә кӧ әм сәр щьвата щаба хԝә дьдьн (Малх. 3:16). Әԝе йәке Хԝәде мәрʹа дьдә кʹьфше чахе мә кʹәрәм дькә, чьмки әм һәр тьшти дькьн сәва дьле ԝи ша кьн (Малх. 3:10). Әшкәрә йә ԝәки мәʹнийед мәйә фәрз һәнә, сәва щьватеда щаба хԝә бьдьн. ԝ19.01 8 ¶3; 9-10 ¶7-9

Йаһоԝа биланийе дьдә кʹьфше һьндава хьзмәткʹаред хԝә. Әԝи нә кӧ гәләк ԛанун дайә мә, ле бь сәбьр мә һин дькә сәва әм ԛануна һʹьзкьрьне биньн сери. Әԝ дьхԝазә әм бьжин пе принсипед ԝи у хьрабийе нәфьрʹәт кьн. Иса ԝәʹде хьзмәтийа хԝәйә сәр чʹийе, һин кьр кӧ хьраби жь кʹидәре дәстпедьбә (Мәт. 5:27, 28). Мәсиһ чаԝа Пʹадша Пʹадшатийа Хԝәдеда, ԝе бәрдәԝам кә мә дьнйа тʹәзәда жи һин кә, сәва кӧ ньһерʹандьна мә һьндава рʹастийе у хьрабийе бь тʹәмами мина йа ԝи бә (Ибрн. 1:9). Әԝ ӧса жи ԝе сьһʹәт-ԛәԝата бекемаси бьдә мә. Бьдьнә бәр чʹәʹве хԝә, ԝәки әме тӧ щар кӧл-дәрдед кӧ жь гӧнә әм дькʹьшиньн, иди нәвиньн. Паше әме ве азайерʹа ша бьн, кӧ Йаһоԝа соз дьдә мә (Рʹом. 8:21). Һьлбәт, азайа мә ԝе тʹьме бь синор бә. У әме бь рʹасти һьнге аза бьн, чахе чʹәʹв бьдьнә һʹьзкьрьна Хԝәде (1 Йуһʹн. 4:7, 8). ԝ18.12 23 ¶19-20

Ԛанунеда дьһатә готьне, ԝәки мере Исраели дькарә жьна хԝә бәрʹдә тʹәне һьнге, һәрге ԝеда тьштәки нәщайиз бьвинә. Ле Ԛанунеда нәдьһатә готьне чь дькʹәвә нава тьште нәщайиз. Ча те кʹьфше әԝ тьштәки шәрми у мәзьн бу, нә кӧ кемасикә бьчʹук (Ԛан. Дщр. 23:14). Ле йазьх, ԝәʹде Исада гәләк Щьһу «бона һәр мәʹнике» жьнед хԝә бәрʹдьдан (Мәт. 19:3). Әм тӧ щар нахԝазьн чʹәʹв бьдьнә ньһерʹандьна ԝан. Малахи пʹехәмбәр мина Хԝәде сәр һәвԛәтандьне дьньһерʹи. Ԝәде ԝида тьштәки бәлабуйи бу, кӧ мер нәһәԛи «жьна щаһьлтийа» хԝә бәрʹдә, дьбәкә сәва жьнәкә ԝе щаһьлтьр бьстинә, кӧ пʹутпʹарьст бу. Малахи дәрһәԛа ньһерʹандьна Хԝәде сәр һәвԛәтандьне, ньвиси: «Һәвԛәтандьне әз нәфьрʹәт дькьм» (Малх. 2:14-16, ДТʹ). Әԝ гьли ль горʹа Хәбәра Хԝәде нә, кʹидәре дәрһәԛа зәԝаща пешьн те готьне: «[Мерʹ ԝе] хԝә ль жьна хԝә бьгьрә у бьбьнә бәдәнәк» (Дәстп. 2:24). Иса жи пьштгьрийа ньһерʹандьна Баве хԝә дькьр у әԝ йәк те кʹьфше жь ԝан гьлийед ԝи: «Әԝед кӧ Хԝәде кьрьнә йәк, бьра мәрьв жь һәвдӧ нәԛәтинә» (Мәт. 19:6). ԝ18.12 11 ¶7-8

Дәрәща һьнә хушк-бьра мәщал да ԝан, ԝәки дәрбази щийе дур бьн. Ньһерʹандьна ԝан жи мина йа Ишайа пʹехәмбәр ә. Чахе Йаһоԝа жь ԝи пьрси кӧ «Әз ки бьшиньм у ԝе бо мә ки һәрә?», Ишайа щаба Йаһоԝа да: «А вай әз, мьн бьшинә!» (Иша. 6:8). Ле һун дьхԝазьн аликʹарийе бьдьнә тʹәшкиләта Йаһоԝа? Дәрәща ԝә дьһелә ве йәке бькьн? Иса дәрһәԛа бәлакьрьна мьзгинийе у һазьркьрьна шагьрта гот: «Аԝа һиви жь хԝәйе дьруне бькьн, ԝәки пʹала нандьруна хԝәрʹа бьшинә» (Мәт. 9:38). Һун дькарьн щийе кӧ һʹәԝщәти һәйә хьзмәт кьн, мәсәлә ча пешәнг? Йан жи дьԛәԝьмә ве йәкеда һун дькарьн али кәсәки бькьн. Гәләк хушк-бьра дитьн, кӧ сәва һʹьзкьрьна хԝә Хԝәдерʹа у мәрьварʹа нишан кьн, щурʹе лапә баш әԝ ә кӧ хьзмәт кьн ча пешәнг ԝан щийада, кʹидәре һʹәԝщәтийа мьзгинвана һәйә. Һәрге мәщале ԝә һәнә, бьдьнә хәбате сәва хьзмәтийеда һе зедә бькьн. Һәрге һун ӧса бькьн, һуне шабунәкә мәзьн бьстиньн. ԝ18.08 27 ¶14-15

Кʹьтеба Пирозда әм зәлал дьвиньн ньһерʹандьна Йаһоԝа сәр дәԝләтибуне у һәбуке. Йаһоԝа бона Кӧрʹе хԝә, де-бавәки ӧса бьжарт жь мәрьва, йед кӧ нәдәԝләти бун (Ԛан. Кʹаһ. 12:8; Луԛа 2:24). Чахе Иса һатә буйине, Мәрйәме «әԝ пʹечʹәкеда пʹечʹа у афьрʹда дани, чьмки меванханеда бона ԝан щи тʹӧнәбу» (Луԛа 2:7). Һәрге Йаһоԝа бьхԝәста, дькарьбу ӧса бькьра, ԝәки Иса щики һе башда бьһата буйине. Ле бона Йаһоԝа йа лапә фәрз әԝ бу, ԝәки Кӧрʹе ԝи малбәтәкә ӧсада мәзьн бә, бона кʹижана Хԝәде щийе пешьн дьгьрт. Жь ве сәрһатийе әм педьһʹәсьн кӧ чаԝа Йаһоԝа дьньһерʹә сәр һәбуке. Һьнә де-бав зарʹед хԝә һелан дькьн, ԝәки пәй тьштед лапи баш кәвьн, һәрге жи әԝ йәк рʹӧһʹанида ԝанрʹа зийане бинә. Ле әшкәрә йә кӧ бона Йаһоԝа йа лапә фәрз рʹӧһʹанийа мә йә, демәк һәләԛәтийа мә тʹәви ԝи. Ле ньһерʹандьна ԝә жи мина йа Йаһоԝа йә? Пе кьред ԝә чь те кʹьфше? ԝ18.11 24 ¶7-8

Йаһоԝа Канийа бәхтәԝарийе йә, ләма әԝ дьхԝазә әм бәхтәԝар бьн у әԝ гәләк мәʹни дьдә мә ԝәки әм ша бьн (Ԛан. Дщр. 12:7; Ԝаиз 3:12, 13). Ле йәкә ве дьнйайеда чәтьн ә бәхтәԝар бьминьн у шабуна хԝә ӧнда нәкьн. Чьрʹа? Чахе әм дькʹәвьнә тәнгасийа, мәсәлә һәрге мәрьве мәйи незик мьрийә, йан жи мәрьвәки мә жь щьвате һатийә дәрхьстьне, йан әм жь мер йан жьна хԝә ԛәтийанә, йан жи мә хәбата хԝә ӧнда кьрийә, әԝ йәк дькарә шабуне жь мә бьстинә. Ӧса жи чәтьн ә бәхтәԝар бьминьн чахе малда әʹдьлайи тʹӧнә, чьмки һәр гав шәрʹ-дәʹԝ ә. Һьн жи чахе сәр хәбате йан мәкʹтәбеда ԛәрфа мә дькьн, пәй мә дькʹәвьн, йан мә дькьнә кәле, чәтьн ә бәхтәԝар бьн. Хенщи ве йәке, сьһʹәт-ԛәԝата хьраб, нәхԝәшийед кʹроники, у депресийа жи сәр мә хьраб дькарә һʹӧкӧм бә. Ле Иса Мәсиһ һʹьз дькьр, ԝәки бәр дьле мәрьвада бе у ԝана бәхтәԝар кә (1 Тимтʹ. 6:15; Мәт. 11:28-30). Иса ԝәʹде Даннасинкьрьна хԝәйә сәр Чʹийе, бәʹса ԝан һʹӧнӧра кьр, кʹижан кӧ дькарьн али мә бькьн кӧ әм бәхтәԝар бьминьн ве дьнйа Шәйтʹанда, кӧ бь тәнгасийа тʹьжә йә. ԝ18.09 17-18 ¶1-3

Сәва рʹастийе бькʹьрьн дьбәкә тьштед лапә чәтьн кӧ әм гәрәке бьтʹәрькиньн, әԝ һәнә әʹдәт у шьхӧлед кӧ Хԝәде хԝәш найен (Мәтʹлк. 23:23). Һьнәкарʹа гәләк чәтьн ә ве йәке бькьн, чьмки бәрхԝә дькʹәвьн кӧ нәфәр, һәвалхәбатчи у һәвалед ԝани незик ԝе чь бежьн. Илаһи чәтьн ә бьтʹәрькиньн ԝан әʹдәта, кʹижан кӧ бона мьрийа дькьн. Мәсәлед ԝан мәрьва кӧ бь мерхаси әԝ гӧһастьн кьрьнә, дькарьн али мә жи бькьн. Гәло Әфәседа әԝед кӧ кʹочʹәкти дькьрьн у паше бунә Мәсиһи, чь кьрьн сәва рʹастийе бькʹьрьн? Кʹьтеба Пироз дьбежә: «[Ԝана] кʹьтебед хԝә тʹоп дькьрьнә щики у ль бәр һʹәмуйа дьшәԝьтандьн. Ԛимәте ԝан һʹәсаб кьрьн, пенщи һʹәзар зив дәркʹәт (Кʹар. Шанд. 19:19, 20). Әԝ Мәсиһийед амьн ԛӧрбанед мәзьн кьрьн у кʹәрәмед пʹьрʹ ԛимәт ԛазанщ кьрьн. ԝ18.11 7 ¶15-16

Зутьрәке паши ве йәке, чахе Исраели чʹәме Урдӧнерʹа дәрбаз бун, Йешу рʹасти мерәки һат, дәсте кʹижанида шур һәбу. Әԝ сәроке ордийа Йаһоԝа бу, кʹижани кӧ гәрәке щьмәʹта Хԝәде хԝәй кьра (Йешу 5:13-15). Йешу жь ԝи мәләки рʹебәрийед зәлал станд, кӧ чаԝа Әриһайе һьлдә бьн дәсте хԝә. Жь ԝан рʹебәрийа һьнәк дьбәкә дьһатьнә кʹьфше кӧ нәлазьм у нәаԛьлайи нә. Мәсәлә, Йаһоԝа тʹәми да ԝан, ԝәки һʹәму мер бенә сьнәткьрьне. Әԝ дьһатә һʹәсабе, ԝәки чәнд рʹож әԝ мер ԝе беԛәԝат буна (Дәстп. 34:24, 25; Йешу 5:2). Дьԛәԝьмә әԝ мер дьфькьрин, кӧ әԝана ԝе чаԝа малбәтед хԝә хԝәй кьн, һәрге дьжмьн бькʹәвьнә зома ԝан. Ле ньшкева, әԝана пеһʹәсийан, ԝәки жь тьрса Исраелийа дәрен Әриһайе «зәхми [ԛайим] һатьбун гьртьн» (Йешу 6:1). Чахе Исраели әԝ йәк пеһʹәсийан, һьлбәт итʹбарийа ԝан һьндава рʹебәрийа Хԝәде һе мәзьн бу. ԝ18.10 23 ¶5-7

Әм ча дькарьн мьлуктийеда чʹәʹв бьдьнә Паԝлос? Бәре әʹԝльн, әм гәрәке тӧ щар һивийе нибьн, ԝәки мә һӧрмәт-рʹумәт кьн, йан жи бьльнд кьн сәва шьхӧлед мә, кʹижан кӧ әм бь сайа ԛәԝата Йаһоԝа дькьн. Ԝе баш бә әм ԝан пьрса бьдьнә хԝә: «Әз дәрһәԛа ԝан мәрьва чь дьфькьрьм, кʹижанарʹа мьзгинийе гьли дькьм? Гәло әз фьрԛийе дькьмә ортʹа мәрьва?» Шәʹдед Йаһоԝа нав тʹәмамийа дьнйайеда ԝан мәрьва дьгәрʹьн, йед кӧ һʹәԝще мьзгинийа Хԝәде нә. Щара бона ԝе йәке мәрʹа лазьм ә зьман у әʹйд-ԛәйде ԝан мәрьва һин бьн, кʹижан алийе гәләк мәрьвада тенә ньмьзкьрьне. Әм тӧ щар нафькьрьн кӧ ԝан мәрьва баштьр ьн, кʹера мьзгинийе гьли дькьн. Ле дәԝсе, әм һʹәму тьшти дькьн сәва ԝана фәʹм кьн, ԝәки али ԝан бькьн, кӧ мьзгинийа дәрһәԛа Пʹадшатийе бьгьһижә дьле ԝан. ԝ18.09 5 ¶9, 11

Рʹомайа Щьһуда кӧштьн. Ле хенщи Щьһуда у екстремистед майин, Щьһуйед дьн жи гәләк һивийа Мәсиһ бун, у ԝана тʹьре Мәсиһ ԝе ԝана жь һʹӧкӧмәтийа Рʹоме аза кә у мьләте ԝан бькә щьмәʹтәкә ԛәԝи (Луԛа 2:38; 3:15). Һьнәк жи дьфькьрин ԝәки Мәсиһ ԝе пʹадшатийа хԝә сәр әʹрде Исраеле саз кә. У һәрге ӧса буйа, бь милйона Щьһуйед кӧ бәла бьбун ль щурʹә-щурʹә ԝәлата, ԝе бькарьбуна вәгәрʹийана ԝәлате хԝә. Биньн бира хԝә, Йуһʹәннайе Ньхӧмдар щарәке жь Иса пьрси: «Тӧ әԝ и, йе кӧ гәрәке бьһата, йан әм һивийа йәки дьн бьн?» (Мәт. 11:2, 3). Йуһʹәнна дьбәкә дьхԝәст пебьһʹәсийа, гәло дьбәкә кәсәки дьн ԝе хԝәстьнед ԝан Щьһуйа бинә сери. Дӧ шагьрт жи, йед кӧ сәр рийа Әмԝасе рʹасти Иса һатьн чахе әԝ жь мьрьне рʹабу, дьфькьрин ԝәки Иса йә әԝ кәс йе кӧ ԝе Исраеле аза кә (Луԛа 24:21). Зутьрәке паши ве йәке, шандийед Иса жи жь ԝи пьрсин: «Хӧдан, ви зәманида те Пʹадшатийа Исраеле ль ԝан вәгәрʹини?» (Кʹар. Шанд. 1:6) ԝ18.06 4 ¶3-4

Әм гәрәке илаһи һьнге фәсал бьн, гава дәрһәԛа щьмәʹта Йаһоԝа әʹламәтийа дьбьһен. Тӧ щар бир нәкьн, ԝәки Шәйтʹан бӧхдана давежә хьзмәткʹаред Хԝәде (Әʹйан. 12:10). Ләма жи Иса пешда шагьртед хԝәрʹа гот, ԝәки мәрьвед мьԛабьл ԝе «һәр щурʹә бӧхдан» бавежьнә мә (Мәт. 5:11). Һәрге әм гьлийе ԝи пьшт гӧһе хԝәва нәвежьн, әме зәндәгьрти нәминьн һәрге дәрһәԛа щьмәʹта Йаһоԝа тьштед әʹщеб жи бьбьһен. Дьбәк һун һʹьз дькьн пе емаиле у тʹеле тьшта бьшиньн һәвалед хԝәрʹа. Һәрге ӧса нә, дьԛәԝьмә чахе һун сәрһати йан дәнг у бәʹса дьбьһен, дьхԝазьн әве йәке пешийе һун бәла кьн. Ле һʹәта кӧ һун әԝе нәʹме пе тʹеле йан жи пе емаиле бьшиньн, пьрсе бьдьнә хԝә: «Гәло әз ньһа чь кӧ дьхԝазьм бәла кьм, әԝ информасийа рʹаст ә? Гәло әз һәр тьшти рʹаст заньм у избаткьрьнед мьн һәнә?». Һәрге һун дӧдьли нә, ле йәкә дьхԝазьн бьшиньн, һуне нава хушк-бьрада әʹламәтийа ԛәлп бәла кьн. Һе баш ә дәԝса бьтькиньн у бьшиньн, бьтькиньн кӧ тʹәмьз кьн. ԝ18.08 3 ¶3; 4 ¶6-7

Иса жи дьхԝазә әм бәхтәԝар бьн, ләма һелан кьр кӧ әм мәрʹд бьн. Гәләк мәрьв мәрʹданийе дьшекьриньн. Рʹаст ә нә һʹәмушк ԝе бьшекьриньн, ле йед кӧ бьшекьриньн, дьбәкә хԝәха жи һелан бьн мәрʹд бьн. Ләма жи фьрԛи тʹӧнә мәрьв сәва мәрʹданийа мә рʹази бьн йан на, әм гәрәке бәрдәԝам кьн дәствәкьри бьн. Һун ньзаньн һәла һе мәрʹданийа бьчʹук жи, дькарә чьԛас тьштед баш бькә. Мәрьвед кӧ дьлда бь рʹасти мәрʹд ьн, ԝе һивийе нибьн ԝәки ԛәнщийа ԝан вәгәрʹиньн. Иса гот: «Гава тӧ хԝарьнәке датини, гази фәԛир, сәԛәт, йед дькӧльн у кора кә. Һьнге те хԝәзьли би, чьмки әԝана нькарьн ԛәнщийа тә ль тә вәгәрʹиньн» (Луԛа 14:13, 14). Ӧса жи Кʹьтеба Пирозда те готьне: «Дӧайе ль мәрʹд бе кьрьне». Зәбурда жи те готьне: «Хԝәзи ль ԝи кӧ хәм дькә бона йе кʹәсиб» (Мәтʹлк. 22:9; Зәб. 41:1). Бәле, гава әм мәрʹданийе дьдьнә кʹьфше кӧ али мәрьва дькьн, әм бәхтәԝар дьбьн. ԝ18.08 21-22 ¶15-16

Бәле, иро гәләк чәтьн ә информасийа рʹаст пебьһʹәсьн, у бьщерʹьбиньн. Ле чьрʹа? Чьмки иро информасийа һʹәчʹи зәʹф йан нәрʹаст ьн йан жи нивида рʹаст ьн, у һьн жи гӧнәкʹарийа мә жи дьбә проблем. Ле ԝан дәрәщада чь ԝе али мә бькә? Әм гәрәке принсипед Кʹьтеба Пироз бьзаньбьн у бьдьнә хәбате. Бәʹса хәбәре, принсипәк әԝ ә кӧ һәрге әм щаба хԝә дьдьн пешийа кӧ избаткьрьна пебьһʹәсьн, әԝ йәк нәаԛьлайи у шәрми йә (Мәтʹлк. 18:13). Принсипәкә дьн жи али мә дькә, ԝәки әм һәр тьшти дәрберʹа баԝәр нәкьн, ле бьщерʹьбиньн һәла әԝ рʹаст ә йан на (Мәтʹлк. 14:15). У принсипа хьлазийе әԝ ә, кӧ фьрԛи тʹӧнә әм чьԛас ԝәхт Мәсиһи нә, әм гәрәке фәсал бьн, ԝәки итʹбарийа хԝә һʹьш-аԛьле хԝә нәйньн. Принсипед Кʹьтеба Пироз ԝе мә хԝәй кьн, һәрге әм избаткьрьнед рʹаст пебьһʹәсьн у сафикьрьнед аԛьлайи бькьн. ԝ18.08 7 ¶19

Пе ньхӧмандьне әм гьшкарʹа шәʹдәтийе дьдьн, ԝәки әм пʹара Йаһоԝа нә у кӧ әм һазьр ьн тʹьме гӧрʹа ԝида бьн. Чахе Иса һатә ньхӧмандьне, әԝи жи тьштәки ӧса кьр. Дькарьн бежьн әԝи Йаһоԝарʹа гот: «Әз дьхԝазьм хԝәстьна Тә бьԛәдиньм йа Хԝәде» (Зәб. 40:7, 8). Йаһоԝа ча ньһерʹи сәр ньхӧмандьна Иса? Кʹьтеба Пироз дьбежә: «Һәма чаԝа Иса һатә ньхӧмандьне у жь аве дәркʹәт, әʹзман вәбун у әԝи дит кӧ рʹӧһʹе Хԝәде мина кәвоткәке һатә хԝаре у сәр ԝи дани. У дәнгәки жь әзмана гот: ‹Әв ә Кӧрʹе мьни дәлал, кӧ әз жь ԝи рʹази мә›» (Мәт. 3:16, 17). Рʹаст ә Иса ида пʹара Баве хԝәйи әʹзмана бу, йәкә дьле Йаһоԝа гәләк ша бу, чахе дит кӧ Кӧрʹе ԝи дьхԝазә у һазьр ә әʹмьре хԝәда ԛьрара Ԝи бинә сери. Чахе әм хԝә тʹәсмили Йаһоԝа дькьн, һьнге жи дьле ԝи ша дьбә, у әԝ ԝе әʹсә мә кʹәрәм кә (Зәб. 149:4). ԝ18.07 23 ¶4-5

Чахе Муса гот «әм», дьԛәԝьмә әԝи сәр хԝә у Һарун дьгот. Әԝ гьлийед Муса дьданә кʹьфше, ԝәки ԛәдьр у һӧрмәт Йаһоԝарʹа нәда кʹьфше, демәк Ԝирʹа, кʹе кӧ әԝ кʹәрәмәт кьр. Әве йәке әм дьвиньн жь Зәбур 106:32, 33: «Ԝан Хӧдан һерс хьстьн ль бәр авед Мерибане, рʹуйе ԝанда сәре Муса бәржер бу. Ԝана дьле ԝи ешандьн у ԝи бь дәве хԝә зедәзьмани кьр» (Жьмар 27:14). Чь жи һәбу, кьред Муса һӧрмәт нәданә Йаһоԝа, йе кӧ һежа бу. Чахе Йаһоԝа тʹәви Муса у Һарун хәбәр да, әԝи ԝанрʹа гот: «Готьнед мьн инкʹар кьрьн» (Жьмар 20:24). Бь рʹасти жи әԝ гӧнәки гәләк гьран бу! Пешийа ве йәке, Йаһоԝа изьн нәда тʹәмамийа рʹькьнйатʹа Исраел кӧ бькʹәвьнә Әʹрде Создайи, чьмки әԝана мьԛабьли ԝи рʹабун (Жьмар 14:26-30, 34). Ләма жи әв йәк лайиԛ у рʹаст бу, кӧ Йаһоԝа Муса жи щәза кьр бона кьред ԝийи нәрʹаст. Бәле, Йаһоԝа изьн нәда Муса кӧ бькʹәвә Әʹрде Создайи. ԝ18.07 14 ¶9, 12; 15 ¶13

Һәрге һун дьхԝазьн тьштәки бькьн у заньн изьна ԝә һәйә, ле фәʹм дькьн кӧ бь ве йәке хушк йан бьрак дькарә бьлькʹӧмә, гәло һуне хԝә бьгьрьн жь ве йәке? Бешьк, һуне хԝә бьгьрьн, ԝәки әԝ хушк йан бьра нәлькʹӧмә. Һьнә бьред мә пешийа кӧ бьһатана сәр рʹийа рʹаст, гәләк ичʹкә вәдьхԝарьн, ле ньһа тʹәрка ичʹке данә. Фәʹмдари йә әме тьштәки ӧса нәкьн, ԝәки бьбьнә мәʹни кӧ әԝ бьра диса вәгәрʹә сәр хәйсәте хԝәйи бәре (1 Корн. 6:9, 10). Һәрге әԝ бьра меванти бе мала мә, әме тӧ щар зоре ԝи нәкьн ԝәки ичке вәхԝә, илаһи һәрге әԝи сафи кьрийә кӧ ида вәнәхԝә. Чахе Тимотʹейо щаһьл бу, әԝ ԛайил бу ԝәки ԝи сьнәт кьн. Рʹаст ә әԝи ԝе ешәкә чәтьн бькʹьшанда, ле йәкә әԝ ԛайил бу ве йәкерʹа, ԝәки Щьһу, кʹижанарʹа әԝ мьзгинийе бәла кә, нәлькʹӧмьн. Тимотʹейо жи мина Паԝлос нәдьхԝәст дьле кәсәки бешинә (Кʹар. Шанд. 16:3; 1 Корн. 9:19-23). Ле тӧ жи һазьр и, бона кʹара мәрьвед майин ԛӧрбана бьки? ԝ18.06 18-19 ¶12-13

Йаһоԝа мала хԝәйә рʹӧһʹанида ԝан мәрьва незики хԝә дькә, нав кʹижанада әԝи тьштед баш дитийә у йед кӧ дьлсах ьн (Йуһʹн. 6:44). Чахе һун щара пешьн насийа хԝә дьдьн мәрьве кӧ рʹастийеда нинә, һун гәләк тьшт дәрһәԛа ԝи ньзаньн ӧса нинә? Һун хенщи наве ԝи у рʹәнг-рʹуйе ԝи, дьбәкә ԛә тьштәки жи ньзаньн. Ле чахе һун щара пешьн рʹасти кәсәки тен, кӧ Йаһоԝа нас дькә у ԝи һʹьз дькә, һун дәрһәԛа ԝи ида гәләк тьшт заньн. Һәрге жи әԝ кәс жь ԝәлатәки хәриб ә, йан бәрәк у әʹдәтед ԝи жь йед ԝә щӧдә нә, һун йәкә ида епʹещә дәрһәԛа ԝи заньн у әԝ жи дәрһәԛа ԝә занә. Мәсәлә, чахе һун рʹасти Шәʹдеки Йаһоԝа тен, ида заньн ԝәки әԝ сәр зьмане «паԛьж» хәбәр дьдә, демәк сәр зьмане рʹастийе. Һәрге жи әԝ сәр зьманәки хәриб хәбәр дьдә, йәкә һун заньн әԝ чь баԝәр дькә у ча дьжи, мәсәлә һун һәрдӧ жи Хԝәде баԝәр дькьн, нав-намус дьжин, у баԝәрийа ԝә һьндава ахьрийеда һәйә. Әԝ тʹәне һьнә тьшт ьн. Хенщи ве йәке, занәбуна ве йәке али ԝә дькә, ԝәки итʹбарийа хԝә һәвдӧ биньн у һәвалтийа баш у дьреж ԛазанщ кьн. ԝ18.12 21 ¶9-10

Пе рʹебәрийа Мәсиһ, кʹома рʹебәрийе әйан кьр, ԝәки нәлазьм ә Мәсиһийед нә жь мьләте Щьһу, бенә сьнәткьрьне (Кʹар. Шанд. 15:19, 20). Ле йәкә паши ве сафикьрьне жи, гәләк Мәсиһийед Щьһу бәрдәԝам дькьрьн зарʹед хԝә сьнәт кьн. Дьбәкә бал мә пьрс пешда те: «Чьрʹа Иса һаԛас ԝәхт әԝ пьрс нәсафикьри һишт? Нә паши мьрьна ԝи Ԛануна Муса һатә һьлдане?» (Колс. 2:13, 14) Һьнәкарʹа ԝәʹдә лазьм ә сәва һини фәʹмкьрьна тʹәзә бьн. Һьнә Щьһуйед Мәсиһирʹа лазьм бу ԝәʹдә, ԝәки фәʹм кьн кӧ әԝана ида бьн Ԛанунеда ниньн (Йуһʹн. 16:12). Ԝанрʹа чәтьн бу ԛәбул кьн ве йәке, кӧ һәләԛәтийа ԝанә мәхсус тʹәви Хԝәде, ида сьнәткьрьнева гьредайи нинә (Дәстп. 17:9-12). Һьнәк жи дьтьрсийан, ԝәки ԝе бенә зерандьне алийе Щьһуйед дьнда, чьмки бь ве йәке ԝе жь ԝана щӧдә бьн (Галт. 6:12). Ле һьнә ԝәʹдә дәрбаз бу, у Мәсиһ бь сайа нәʹмед Паԝлос һе зедә рʹебәри да (Рʹом. 2:28, 29; Галт. 3:23-25). ԝ18.10 24-25 ¶10-12

Ԛәйафа ниве шәве әскәр шандьн кӧ Иса бьгьрьн. Иса заньбу кӧ шеԝьра кӧштьна ԝи кьрьнә, ләма әԝи ԝәʹде шива пашьн, готә шандийед хԝә кӧ тʹәви хԝә шур һьлдьн. Ԝана дӧ шур һьлдан, у әв бона Иса бәс бу ԝәки дәрсәкә фәрз ԝана һин кә (Луԛа 22:36-38). Паше ида шәв, чахе Пәтрус дит кӧ бь нәһәԛийе Иса дьгьрьн, һерс кʹәт у пе шур мәрьвәк бьриндар кьр (Йуһʹн. 18:10). Ле Иса готә Пәтрус: «Шуре хԝә бькә щи. Ки кӧ шур һьлтинә, әԝе бь шур һәрʹә» (Мәтта 26:52, 53). Әԝ дәрсәкә мәзьн, ль гора дӧайе Иса бу, кӧ ве еваре гот ԝәки әԝана гәрәке нә жь ве дьнйайе бьн (Йуһʹн. 17:16). Тʹәне изьна Хԝәде һәйә кӧ бона нәһәԛийе шәрʹ кә. Ләма жи әм нав һәвда әʹдьлайе хԝәй дькьн у йәктийеда дьминьн. Чахе Йаһоԝа ве дьнйа бетʹьфаԛда йәктийа нав щьмәʹта хԝәда дьвинә, дьле ԝи гәләк ша дьбә (Сефн. 3:17). ԝ18.06 7 ¶13-14, 16

Шәйтʹан хенщи тʹәлька, ӧса жи дьхԝазә мә бьдә тьрсандьне, сәва әм Йаһоԝарʹа амьн нәминьн. Мәсәлә, әԝ дькарә сәрԝера бьдә хәбате, ԝәки әԝана шьхӧле мәйи бәлакьрьна мьзгинийе ԛәдәхә бькьн. Йан жи әԝ дькарә һәвалхәбатчи йан жи һәвалдәрсханед мә бьдә хәбате, сәва әԝана ԛәрфа мә бькьн, чьмки әм пе принсипед Кʹьтеба Пироз дьжин (1 Пәт. 4:4). Әԝ ӧса жи дькарә нәфәред мала мә бьдә хәбате, сәва әԝана рʹе мә бьгьрьн әм нәчьн щьвата (Мәт. 10:36). Ле ча әм дькарьн ԝан дәрәщада ԛәԝи бьсәкьньн? Йа пешьн, әм гәрәке әʹщебмайи нәминьн чахе дькʹәвьнә ԝан дәрәща, чьмки әм фәʹм дькьн ԝәки Шәйтʹан тʹәви мә шәрʹ дькә (Әʹйан. 2:10). Ӧса жи әм гәрәке бир нәкьн әв пьрса лапә фәрз: Шәйтʹан дьбежә ԝәки әм Йаһоԝарʹа хьзмәт дькьн, тʹәне һьнге гава мәрʹа дәст дьдә, ле тәнгасийада әме пьшта хԝә бьдьнә Хԝәде (Иб. 1:9-11; 2:4, 5). Әм гәрәке тʹьме ԛәԝате жь Йаһоԝа бьхԝазьн, гава рʹасти щерʹьбандьна тен. Тӧ щар әм гәрәке бир нәкьн, ԝәки Хԝәде ԝе мә нәһелә (Ибрн. 13:5). ԝ18.05 26 ¶14

Һәрге жи әм дьвиньн ԝәки мьзгинийа кӧ әм бәла дькьн нагьһижә дьле мәрьва, әм гәрәке нәфькьрьн кӧ шьхӧле мә бадиһәԝа йә. Рʹаст ә гәләк мәрьв гӧһ надьнә мә, ле йәкә әԝана дина хԝә дьдьнә мә. Әԝана дина хԝә дьдьн кʹьнщхԝәкьрьна мәйә лайиԛ, рʹабун-рʹуньштьна мә у бәшәра мәйә хԝәш. Ԝәʹдә дәрбаз дьбә, у рʹабун-рʹуньштьна мә дькарә чʹәʹвед ԝан вәкә у фькьред нәрʹаст һьндава мә бьгӧһезә. Сержио у Олинда, йед кӧ пешәнг ьн, гьли дькьн: «Әм жь бо нәхԝәшийе, ԝәʹдәке нәдьчунә мәйдане. Ле чахе әм вәгәрʹийан, мәрьвед кӧ бәр мәрʹа дәрбаз дьбун, жь мә дьпьрсин: ‹Һʹәму тьшт баш ә? Мә бира ԝә кьрийә›». Рʹасти жи, һʹәта кӧ әм рʹьһʹәтийе надьнә дәсте хԝә кӧ тʹохьме Пʹадшатийе бьчиньн, әм шьхӧләки ԛимәт дькьн, чьмки «һʹәму мьләтарʹа» шәʹдәтийе дьдьн (Мәт. 24:14). Хенщи ве йәке, әм дьлша нә, чьмки заньн ԝәки Йаһоԝа ԛәбул дькә у һʹьз дькә ԝана, йед кӧ «бь сәбьр бәре хԝә дьдьн»! (Луԛа 8:15) ԝ18.05 16 ¶16-18

Йаһоԝа Хԝәдейе дьлдайине йә. Чахе инсанәт кʹәтә нава гӧнә у бунә гӧнәкʹар, Хԝәде һьнгеда нишан кьр ԝәки әԝ һәйә кәсе кӧ бәрдьлийе дьдә. Паши рʹабәрибуна Әдәнеда, әԝи дәрберʹа бь пʹехәмбәртийе мерхаси у баԝәри да зӧрʹәта Адәм, кʹижан кӧ ԝе паше бьһата дьне. Әв пʹехәмбәрти ньвисар ә Дәстпебун 3:15-да, кʹидәре кӧ Хԝәде соз дайә, ԝәки ԝе «мәʹре бәре», демәк Шәйтʹан у ӧса жи һʹәму кьред ԝийи хьраб кʹӧта кә (Әʹйан. 12:9; 1 Йуһʹн. 3:8). Нӧһ, хьзмәткʹаре Йаһоԝа, дьнйакә зӧлмда дьжит, кʹидәре кӧ тʹәне нәфәред ԝи Йаһоԝа дьһʹәбандьн. Дор бәре ԝи һʹәму мәрьв зӧлм у бенамус бун у ләма әԝ дькарьбу дьлтәнг буйа (Дәстп. 6:4, 5, 9, 11; Щьһуд. 6). Ле Йаһоԝа готә Нӧһ, ԝәки әԝ дьхԝазә ԛьрʹа ве дьнйайе бинә, у рʹебәри да ԝи, кӧ әԝ чь бькә сәва нәфәред хԝәва хьлаз бә (Дәстп. 6:13-18). Бәле, Йаһоԝа бона Нӧһ Хԝәдейе дьлдайине бу. ԝ18.04 15 ¶1-2

Дьԛәԝьмә мәрʹа чәтьн ә бәр дьле кʹәсәкида бен у ԝи ԛәԝи кьн, ле бь рʹасти гәләк тьшт нәлазьм ә сәва ве йәке. Мәсәлә, әм дькарьн бь бәшәра хԝәш кәсәки сьлав кьн. Ле һәрге әԝ мәрьв мәрʹа накʹәнә, дьԛәԝьмә проблемед ԝи һәнә, у жерʹа лазьм ә гӧһ бьдьне, ӧса әме бәр дьле ԝида бен (Аԛуб 1:19). Һәр кәс жь мә дькарә бәр дьле мәрьвада бе. Сьлеман Пʹадша ньвиси: «Чьԛас хԝәшә һәр хәбәр ԝәхте хԝәда! Рʹонайа чʹәʹва дьл ша дькә, мьзгинийа хер жи һәстуйа дьшьдинә» (Мәтʹлк. 15:23, 30). Паԝлос гот кӧ һәла һе жи чахе әм тʹәвайи кʹьламед Пʹадшатийе дьстьрен, ӧса әм һәвдӧ дьлгәрм дькьн (Кʹар. Шанд. 16:25; Колс. 3:16). Әм дьвиньн кӧ рʹожа Йаһоԝа гәләк «незик дьбә», мәрʹа ԝе һе зедә лазьм бә дьл бьдьнә һәвдӧ у һәв бьшьдиньн (Ибрн. 10:25). ԝ18.04 23 ¶16; 24 ¶18-19