Щотмәһ

Әм мина Йаһоԝа у Иса нькарьн дьла бьвиньн, ле йәкә әм дькарьн фәʹм бькьн, кӧ мәри чь тʹәхмин дькьн у чьда ԝанрʹа аликʹари лазьмә (2 Корн. 11:29). Әԝ дьнйа хԝәһʹьз ә, ле әм дьхԝазьн нә кӧ «тʹәне ль кʹара хԝә» бьгәрʹьн, ле «кʹара һәвале хԝә» (Фили. 2:4). Гәләк фәрз ә ԝәки рʹуспийед щьвате дьлшәԝат бьн. Әԝана заньн ԝәки щабдар ьн кӧ мьԛати пәзед Йаһоԝа бьн (Ибрн. 13:17). Рʹуспи сәва кӧ аликʹарийе бьдьнә хушк-бьра, гәрәке фәʹмкʹар бьн. Ле әԝана ча дькарьн дьлшәԝатийе бьдьнә кʹьфше? Рʹуспийе дьлшәԝат бона хушк-бьред хԝәйә щьвате ԝәʹдә дьвинә. Әԝ пьрса дьдә ԝан, паше бь сәбьр гӧһ дьдә ԝан. Әԝ йәк илаһи фәрз ә, чахе хушк йан бьра кʹәла дьле хԝә дьхԝазә бьрʹежә, ле ньзанә ча бежә (Мәтʹлк. 20:5). Чахе рʹуспи бона хушк-бьра ԝәʹдә дьвинә, әԝ йәк итʹбари, һәвалти у һʹьзкьрьна ԝан һьндава ԝида һе ԛәԝи дькә (Кʹар. Шанд. 20:37). ԝ19.03 17 ¶14-17

Рʹазибун йане шекьрандьн мина хԝарьнәкә хԝәш ә, кʹижан кӧ һе хԝәш дьбә, чахе тʹәви кәсәки дьхԝи. Бәле, чахе әм тʹәхмин дькьн, кӧ мәрьв кьред мә дьшекьриньн, әм ша дьбьн, ле чахе әм мәрьварʹа дьдьнә кʹьфше, кӧ ԝана ԛимәт дькьн, әм ԝана бәхтәԝар дькьн у ша дькьн. Чахе мәрьв дьвинә ԝәки әм кьред ԝи дьшекьриньн, әԝ фәʹм дькә ԝәки щәфе ԝи бадиһәԝа нибу, ле әԝи бь рʹасти али мә кьр. Бь сайа ве йәке, ортʹа мә у ԝи мәрьвида һәвалти һе ԛәԝи дьбә. Чахе әм мәрьварʹа пе гьлийа рʹазибуна хԝә дьдьнә кʹьфше, ԛимәта ԝан гьлийа мәзьн ә, чаԝа кӧ рʹеза иройинда те готьне. Бьдьнә бәр чʹәʹве хԝә, кӧ сева зерʹ сәр зив ԛашкьри чьԛас бәдәԝ ә! У бьфькьрьн кӧ әԝ чьԛас ԝе ԛимәт бә. Ле һуне чь тʹәхмин кьн, һәрге пʹешкʹешәкә ӧса бьдьнә ԝә? Бьдьнә һʹәсабе хԝә, гьлийед шекьрандьне мина ве йәке гәләк ԛимәт ьн. Бь рʹасти сева зерʹ гәләк ԝәхт дьминә. Ӧса жи чахе һун пе гьлийа рʹазибуна хԝә кәсәкирʹа дьдьнә кʹьфше, әԝ дькарә тʹәмамийа әʹмьре хԝә гьлийед ԝә бир нәкә у ԛимәт кә. ԝ19.02 15 ¶5-6

Чахе Адәм у Һеԝайе бәре дара ԛәнщи у хьраби наскьрьне хԝарьн, бь ве йәке ԝана әшкәрә да кʹьфше, ԝәки итʹбарийа хԝә Йаһоԝа у ԛанунед ԝи найньн. Ԝана хԝәст ԝәки хԝәха сафи кьн чь ԛәнщ ә у чь хьраб ә. Ле дина хԝә бьдьне, ԝана чь ӧнда кьр. Ԝана достийа хԝә тʹәви Йаһоԝа у жийина һʹәта-һʹәтайе ӧнда кьрьн, у ӧса жи гӧнә у мьрьн дәрбази зарʹед хԝә кьрьн (Рʹом. 5:12). Бәрамбәр кьн, Адәм у Һеԝайе ча хԝә данә кʹьфше, ле нәмере Әтʹйопи хԝә ча да кʹьфше, чахе Филипо жерʹа мьзгини шьровәкьр. Әԝи нәмери кьред Йаһоԝа у Иса һьндава хԝә, ӧса ԛимәт кьр, кӧ дәрберʹа һатә ньхӧмандьне (Кʹар. Шанд. 8:34-38). Чахе әм хԝә тʹәсмили Хԝәде дькьн у мина мәрьве Әтʹйопи тенә ньхӧмандьне, әм әшкәрә әʹйан дькьн, ԝәки дьшекьриньн ԝан тьшта, чь кӧ Йаһоԝа у Иса бона мә кьрьнә. Әм ӧса жи нишан дькьн, кӧ итʹбарийа хԝә Йаһоԝа тиньн у баԝәр дькьн, ԝәки тʹәне һʹӧкӧме ԝи һәйә ԛануна дайнә кӧ чь ԛәнщ ә у чь хьраб ә. ԝ19.03 2 ¶1-2

Чь щурʹәйи хьзмәткʹаред Хԝәде беԛьсуртийе дьдьнә кʹьфше? Әԝана бь тʹәмамийа дьле хԝә Йаһоԝа һʹьз дькьн у жерʹа амьн дьминьн, у тʹьме пе кьред хԝә дьле ԝи ша дькьн. Кʹьтеба Пирозда хәбәра кӧ һатийә ԝәлгәрʹандьне «беԛьсур», те һʹәсабе «тʹам» йан жи «бекемаси». Бәʹса хәбәре, чахе Йаһоԝарʹа һʹәйԝан ԛӧрбан дькьрьн, гәрәке һʹәйԝан бекемаси буна (Ԛан. Кʹаһ. 22:21, 22). Щьмәʹта Хԝәдерʹа изьн тʹӧнә бу, ԝәки һʹәйԝанед ӧса ԛӧрбан кьрана, кʹижан мәсәлә, беньг, бегӧһ, бечʹәʹв буна, йан нәхԝәш буна. Бона Йаһоԝа гәләк фәрз бу, ԝәки әԝ һʹәйԝан тʹам у сах-сьламәт буна (Малх. 1:6-9). Әм дькарьн Йаһоԝа фәʹм кьн, кӧ чьрʹа бона ԝи әԝ йәк фәрз бу. Чахе әм дьхԝазьн тьштәки бькʹьрьн, мәсәлә емиш, кʹьтеб, йан жи һащәтәке, әм нахԝазьн кемасийа ԝи тьшти һәбә, йан ԛӧл йан жи хьраббуйи бә. Әм дьхԝазьн әԝ тьшт тʹам у рʹьнд бә. Йаһоԝа жи дьхԝазә, ԝәки һʹьзкьрьн у амьнийа мә һьндава ԝида, тʹам у бекемаси бә. ԝ19.02 3 ¶3

Сәва дьле хԝә хԝәй кьн, әм гәрәке нә кӧ тʹәне хԝә жь һʹӧкӧме хьраб хԝәй кьн, ле ӧса жи тьштед керһати ԛәбул кьн. Бәре бәр дәргәһед шәһәр дәргәван чахе дьжмьн дьдит, дәргәһед шәһәр дадьда, ле ԝәʹде дьн әԝи дәргәһ вәдькьрьн, сәва хԝарьн у тьштед лазьм бькʹәвьн шәһәр. Һәрге дәргәһед шәһәр тʹӧ щар вәнәкьрана, бьнәлийед шәһәр ԝе бьрчина бьмьрана. Әм жи мина ве йәке гәрәке дьле хԝә вәкьн, сәва фькьред Хԝәде тʹьме сәр мә һʹӧкӧм кьн. Кʹьтеба Пирозда һәнә фькьр у ньһерʹандьнед Йаһоԝа, ләма жи һәр гав чахе әм Кʹьтеба Пироз дьхуньн, әм дьһельн ԝәки фькьред ԝи сәр һʹьш, емосийа у кьред мә һʹӧкӧм кьн. Ле чаԝа һе зедә кʹаре бьстиньн жь хԝәндьна Кʹьтеба Пироз? Дӧа гәләк фәрз ә, чьмки әԝ али мә дькә ԝәки әм Хәбәра ԝида кʹәрәмәтед ԝи бьвиньн (Зәб. 119:18). Әм ӧса жи гәрәке бьфькьрьн сәр хԝәндьне. Һәрге әм дӧа бькьн, бьхуньн у сәр бьфькьрьн, Хәбәра Хԝәде ԝе бьгьһижә дьле мә у әме фькьред Йаһоԝа һʹьз бькьн (Мәтʹлк. 4:20-22). ԝ19.01 18 ¶14-15

Йаһоԝа занә кӧ фәрәсәт у дәрәщед мә һәр кәси жь һәв щӧдә дьбьн, у әԝ ԛимәт дькә чахе чьԛас жи дәсте мә те әм дькьн, сәва ԛӧрбане ԝирʹа бьдьн. Бьфькьрьн дәрһәԛа ԝе йәке, кӧ Йаһоԝа жь Исраелийа кʹижан ԛӧрбан ԛәбул дькьрьн. Дәсте һьнә Исраелийада һәбу сәва пәз йан бьзьн ԛӧрбан кьн. Ле Исраелийед кӧ дәсттәнг бун, дькарьбун «дӧ фатьмока йан жи дӧ щущукед кәԝа» ԛӧрбан кьн. У һәрге кәсәки нькарьбу әԝ дӧ чʹьвик жи бьанийа, Йаһоԝа ԛәбул дькьр ԝәки әԝана «пʹарәкә ефайе жь дәһа йәк аре хас», ԛӧрбан кьрана (Ԛан. Кʹаһ. 5:7, 11). Рʹаст ә ар дьһа әрзан бу, ле һәрге әԝ ар баш бу, Йаһоԝа ԛимәт дькьр әԝ ԛӧрбан. Хԝәдейе мәйи ԛәнщ иро һьндава мәда жи ӧса нә. Чахе әм щаба хԝә дьдьн, әԝ дәʹԝа накә ԝәки әм бәʹса хәбәре мина Аполо готьнбежед баш бьн, йан жи мина Паԝлос хәбәрданеда һостә бьн (Кʹар. Шанд. 18:24; 26:28). Йаһоԝа дьхԝазә ԝәки әм һәр тьшти бькьн, сәва щабед баш бьдьн, ле әԝ жь мә дәʹԝа накә һаԛас чьԛас әм нькарьн бькьн. Биньн бира хԝә жьнәбикә бәләнгаз, йа кӧ дӧ пол ԛӧрбан кьр. Әԝ жьнәби бәр чʹәʹве Йаһоԝа ԛимәт бу, чьмки бәләнгазийа хԝәда йа лапә баш ԛӧрбан кьр (Луԛа 21:1-4). ԝ19.01 8-9 ¶3-5

Әм бәр чʹәʹве ве дьне рʹәш ьн, чьмки әм шагьртед Иса нә. Иса пʹехәмбәрти кьр ԝәки рʹожед ахьрийеда, шагьртед ԝи ԝе бенә зерʹандьне (Мәт. 24:9; Йуһʹн. 15:20). Ишайа пʹехәмбәрти кьр, ԝәки дьжмьн ԝе мә нә кӧ тʹәне нәфрʹәт кьн, ле ӧса жи щурʹә-щурʹә чʹәк мьԛабьли мә бьдьнә хәбате. Һьнә чʹәк әԝ ьн: ԛәлпи, бӧхдан, у зерандьна бехԝәдети һьндава мә (Мәт. 5:11). Йаһоԝа ԝе ԝан дьжмьна нәдә сәкьнандьне, кӧ әԝан чʹәка мьԛабьли мә нәдьнә хәбате (Әфәс. 6:12; Әʹйан. 12:17). Ле йәкә әм гәрәке нәтьрсьн. Йаһоԝа гот ԝәки тӧ «чʹәк» кӧ мьԛабьли мә бе хәбьтандьне, «ԝе жь тʹӧ кʹарира нәбә» (Иша. 54:17). Мина диԝаред кӧ мә жь ԛәԝата ба-багәре хԝәй дькьн, Йаһоԝа жи мә хԝәй дькә жь «һьлма зордара, ДТʹ» (Иша. 25:4, 5). Дьжмьнед мә ԝе тӧ щар нькарьбьн рʹе мә бьгьрьн, кӧ әм жийина һʹәта-һʹәтайе бьстиньн (Иша. 65:17). Һʹәму дьжмьнед щьмәʹта Хԝәде «ԝе нә тʹӧ тьшт бьн у ԛьрʹ бьн» (Иша. 41:11, 12, ДТʹ). ԝ19.01 6-7 ¶13-16

Щаһьлно, Йаһоԝа азайе һʹьз дькә у кьрийә дьле мәда жи, ԝәки азайе һʹьз бькьн. Ле йәкә әԝ ӧса жи дьхԝазә ԝәки һун азайа хԝә рʹаст бьдьнә хәбате, ԝәки нәкʹәвьнә ԛәзийе. Дьбәкә һун ԝан мәрьва нас дькьн, йед кӧ порнографийайе дьньһерʹьн, бенамусийе дькьн, спортед хофва мьжул дьбьн, йан наркотика у щьхаре дькʹьшиньн. Бь рʹасти әԝана жь ԝан тьшта ԝәʹдәлу ләзәте дьстиньн, ле паше әԝ йәк сәр ԝан бьһа рʹудьне. Мәсәлә, дьбәкә нәхԝәш дькʹәвьн, тьштед хьрабва тенә гьредане, йан жи дьмьрьн (Галт. 6:7, 8). Бәле, «азайа» ԝан дәрәԝ ә у әԝана хԝәха хԝә дьхапиньн (Тито 3:3). Бәʹса хәбәре, һун чьԛас мәри нас дькьн, йед кӧ жь бо ве йәке нәхԝәш кʹәтьнә, чьмки пе принсипед Кʹьтеба Пироз нәжитьнә? Әʹйан ә, кӧ чахе әм гӧрʹа Йаһоԝа дькьн, әм кʹаре дьстиньн, сьһʹәт-ԛәԝата мә жи баш ә у азайа мә жи һәйә (Зәб. 19:7-11). Һьн жи чахе һун азайа хԝә бь билани дьдьнә хәбате, демәк ԛанун у принсипед Хԝәде һьлдьдьнә һʹәсаб, һун мәщале дьдьн Хԝәде у де-бавед хԝә, ԝәки итʹбарийа хԝә ԝә биньн у һе зедә азайе бьдьнә ԝә (Рʹом. 8:21). ԝ18.12 22-23 ¶16-17

Әм гьшк заньн ԝәки сәва гӧне Адәм гәләк тьшт һатьнә гӧһастьне. Мәсәлә, мьрьн дәрбази сәр һʹәму мәрьва бу у әԝ йәк сәр зәԝаще жи һʹӧкӧм бу. Паԝлосе шанди Мәсиһийарʹа шьровәкьр, ԝәки мьрьн зәԝаще дьдә сәкьнандьн у кӧ тʹәне паши ве йәке мер йан жьна кӧ тʹәне дьминә, дькарә тʹәзәда бьзәԝьщә йан мер кә (Рʹом. 7:1-3). Ԛануна дәрһәԛа зәԝаще кӧ Хԝәде дабу щьмәʹта Исраел, тьштед һур гьли дькьр. Мәсәлә, Ԛануне изьн дьда кӧ чәнд жьнед мерәки һәбьн. Ле синор һәбун ве йәкеда, тӧ кәси гәрәке әв Ԛанун бона кʹара хԝә нәда хәбате. Мәсәлә, һәрге мерәки Исраели хԝәрʹа хӧлам жьнти бьстанда у паше жьна дӧда жи бьстанда, әԝи гәрәке тӧ щар жь жьна пешийе хԝарьн, кʹьнщ у борще зәԝаще кем нәкьра. Хԝәде дәԝа дькьр, ԝәки әԝ ле хԝәй кә у хԝәйитийе ле бькә (Дәркʹ. 21:9, 10). Рʹаст ә әм бьн ве Ԛанунеда ниньн, ле әм дьвиньн ԝәки бәр чʹәʹве Йаһоԝа зәԝащ ԛимәт ә. Занәбуна ве йәке али мә дькә, ԝәки мина Хԝәде зәԝаще һӧрмәт кьн. ԝ18.12 10 ¶3; 11 ¶5-6

Паши ве йәке кӧ Һәбаԛуԛ хәм у дәрдед хԝә да дәсте Йаһоԝа, дьбәкә әԝ дьфькьри кӧ Йаһоԝа ньһа ԝе чь бькә. Чаԝа Баве дьлшәԝат, Йаһоԝа ԝи сущдар нәкьр бона ахә-аха ԝи. Әԝи фәʹм дькьр кӧ Һәбаԛуԛ жь еша дьле хԝә дьчәрчьрә у дьлтәнг ә, ләма аликʹарийе жь ԝи дьхԝазә. Ле Йаһоԝа готә ԝи, ԝәки әԝ ԝе ахьрийеда чь бькә һьндава Щьһуйед нәамьн. Дьԛәԝьмә, Һәбаԛуԛ мәрьве пешьн бу, кʹижанира Йаһоԝа әʹйан кьр кӧ зутьрәке ԝе ԝан мәрьвед зӧлм щәза бькә. Йаһоԝа Һәбаԛуԛрʹа да кʹьфше, ԝәки әԝ һазьр ә ида тьштәки бькә. Щәзакьрьна ве рькʹьнийата зӧлм у хьраб, ида незик бу. Чахе Йаһоԝа гот ԝәки «рʹоже ԝәда» әԝ йәк ԝе бьбә, да кʹьфше кӧ ԝе ԝәʹде жийина Һәбаԛуԛда бьԛәԝьмә, йан жи ԝәʹде ԝан Исраелийа кӧ һьнге дьжитьн. Бәле, щаба Йаһоԝа ӧса нибу чаԝа Һәбаԛуԛ дьфькьри. Чь кӧ Йаһоԝа жерʹа гот, дьһатә һʹәсабе ԝәки щьмәʹта Щьһуда ԝе бе щәзакьрьне. ԝ18.11 15 ¶7-8

Һун ча дьньһерʹьн сәр ԝан мәрьва, йед кӧ һе рʹастийе пенәһʹәсийанә? Паԝлосе шанди кʹьништада ԝан Щьһуйарʹа мьзгини бәла дькьр, йед кӧ ида дәрһәԛа Хԝәде заньбун. Мәсәлә, ԝәʹде рʹеԝитийа Паԝлосә мисйонерти йа пешьн, мәрьвед Лукайони ԝи у Барнабас һʹәсаб кьрьн жь әʹзман һати у нав кьрьн Зәԝс у Һәрмес дьлԛе мәрьвада, йед кӧ хӧданед ԝани ԛәлп бун. Ле гәло әԝ йәк дьле Паԝлос у Барнабас һат, кӧ ԝана ӧса һӧрмәт у бьльнд кьрьн? Нә пешийа ԝе йәке, әԝана жь бо хьзмәтийе шәһәред дьнда һатьбунә зерандьне? Гәло дьбәкә әԝана фькьрин, ԝәки сәва мьзгинийе бәла кьн, әԝ мәщаләкә баш ә, кӧ Лукайонийа ԝана бь щурʹәки мәхсус ԛәбул кьрьн? На! Әԝ йәк ԝана хԝәш нәһат, ԝана дәрберʹа кʹьнще сәр хԝә ԛәлашт у кьрьнә ԛарʹини: «Һун чьма ве йәке дькьн? Әм жи бьнйатʹа хԝәда мәринә мина ԝә нә» (Кʹар. Шанд. 14:8-15). ԝ18.09 4-5 ¶8-9

Сәва рʹастийе ԛәбул кьн у бьжин ль горʹа принсипед Кʹьтеба Пироз, әм гәрәке һазьр бьн фькьр у рʹабун-рʹуньштьна хԝә бьгӧһезьн. Дина хԝә бьдьне Пәтрус дәрһәԛа ван гӧһастьна чь гот: «Мина зарʹед гӧһдар бьн, нәбьнә мина ԝи ԝәхте дьлхԝәстьнед хԝәйә нәзанийа хԝәда. Ле . . . пироз бьн нава һʹәму рʹабун-рʹуньштьна хԝәда» (1 Пәт. 1:14, 15). Мәрьвед кӧ Корьнтʹида дьжитьн, гәрәке әʹмьре хԝәда гӧһастьнед мәзьн бькьрана сәва рʹасти бькʹьрийана, чьмки әԝ шәһәр бь бенамусийе тʹьжи бу. Иро жи гәләка бона рʹастийе пьшта хԝә данә кьред кӧ Хԝәде хԝәш найен. Пәтрус готә Мәсиһийед кӧ ԝәʹде ԝида дьжитьн: «Бәси ԝә йә, кӧ ԝә ԝәхте жийина хԝәйә бьһӧрида ль горʹа хԝәстьна пʹутпʹарьста дәрбаз кьрийә, һун пәй һʹәрамийе, тәʹмхԝәстьнед хьраб, пәй-вәхԝарьне, кучʹьксантийе, сәрхԝәшийе у пʹутпʹарьстийа кʹьрет кʹәтьбун» (1 Пәт. 4:3). ԝ18.11 6 ¶13

Әм ча дькарьн тедәрхьн, һәла кʹе һазьр ә мьзгинийе ԛәбул кә? Чаԝа ԛьрʹна йәкеда, иро жи әм дькарьн ԝан мәрьва бьвиньн, гава шәʹдәтийе бьдьн. Иса готә шагьртед хԝә: «Чь бажар йан гӧнде кӧ һун бькʹәвьне, маләкә һежа бьбиньн» (Мәт. 10:11). Әм һивийе ниньн ԝәки мәрьвед дӧрʹу, ԛӧрʹә, йан жи йед кӧ нафькьрьн дәрһәԛа һәләԛәтийа хԝә тʹәви Хԝәде, ԝе гӧһ бьдьнә мьзгинийе. Әм мәрьвед дьлсах, мьлук у рʹӧһʹанида бьрчи дьгәрʹьн. Әԝе йәке әм дькарьн бәрамбәри пеше Иса бькьн. Мәсәлә, чаԝа нәщар, пешийе әԝи гәрәке дарәки баш бьжбарта, сәва тьштед навмал, дәри, нир, йан жи тьштед дьн чекьра. Гава әԝи дар ида дьжбарт, ԛӧтʹийа һащәтед хԝә һьлдьда, занәбуна хԝә дьда хәбате у дәстпедькьр тьшта чекә. Әм жи пешийе мәрьвед дьлсах дьгәрʹьн, паше ида һащәт, фәрәсәт у занәбуна хԝә дьдьнә хәбате, сәва али ԝан бькьн, кӧ бьбьнә шагьрт (Мәт. 28:19, 20). ԝ18.10 12 ¶3-4

Филипойе мьзгиндар мәсәләкә баш һишт ве йәкеда, кӧ ԝәʹде гӧһастьна, хьзмәтийеда хирәта хԝә ӧнда нәкьр. Оршәлимеда әԝи щабдарийа тʹәзә станд, ле паше ньшкева тьштәк ԛәԝьми. Стәйфан һатә кӧштьне, у паши ве йәке Оршәлимеда мьԛабьли Мәсиһийа зерʹандьнәкә гьран дәстпебу (Кʹар. Шанд. 6:1-6). Жь бо ве йәке, Мәсиһи жь ԝедәре рʹәвин у һәв бәла бун. Ле һʹьш-аԛьле Филипо диса жи сәр хьзмәтийе бу, ләма әԝ чу Самәрйайе, сәва мьзгинийе бәла кә ԝан мәрьварʹа, йед кӧ мьзгини һе нәбьһистьбун (Мәт. 10:5; Кʹар. Шанд. 8:1). Филипо һазьр бу һәрә һʹәму щийа, кʹидәре кӧ рʹӧһʹе Хԝәдейи пироз рʹебәри ԝи бькьра. Ләма Йаһоԝа ԝи да хәбате сәва ԝедәре мьзгинийе бәла кә, кʹидәре мәрьва һе нәбьһистьбун. Щьһу мәрьвед Самәри бәр тьштәкива һʹәсаб нәдькьрьн у һьндава ԝанда нәбаш бун. Ле Филипо фьрԛи нәдькьрә ортʹа мәрьва у әԝ йәк дьле Самәрийа дьһат. Кʹьтеба Пироз дьбежә, ԝәки әʹлаләте «бь дьл» гӧһ дьда Филипо (Кʹар. Шанд. 8:6-8). Филипо йәкә хирәта хԝә ӧнда нәкьр, у ләма Йаһоԝа ԝи у малбәта ԝи гәләк кʹәрәм кьр (Кʹар. Шанд. 21:8, 9). ԝ18.10 30 ¶14-16

Щарәке чахе Иса региона Декаполиседа бу, щьмәʹте «мәрьвәки кәр у лал анинә щәм ԝи» (Марԛ. 7:31-35). Иса әԝ мәрьв бәр щьмәʹте ԛәнщ нәкьр, ле «әԝ мәрьв жь әʹлаләте ԛәтанд», паше ԛәнщ кьр. Чьрʹа әԝи ӧса кьр? Әԝи мәрьви ԝе хԝә нава әʹлаләтеда хьраб тʹәхмин кьра, чьмки кәр-лал бу. Ләма дьбәкә Иса ԝи башԛә ԛәнщ кьр. Рʹаст ә әм мина ԝи нькарьн кʹәрәма бькьн, ле әм гәрәке бона һʹәԝщед хушк-бьра хәм бькьн у бькʹәвьнә һʹәйра ԝан. Иса фәʹм дькьр кӧ әԝ мәрьве кәр-лал ча хԝә тʹәхмин дькьр у анәгори ве йәке һьндава ԝида нәрм у ԛәнщ бу. Әм жи бона йед әʹмьрда мәзьн у йед нәхԝәш гәрәке хәм бькьн. Щьвата Мәсиһити әʹйан ә пе һʹьзкьрьна ӧса, кӧ накʹәвә һʹәйра хԝә (Йуһʹн. 13:34, 35). Әԝ һʹьзкьрьн мә һелан дькә алийе хԝәда һәр тьшти бькьн, сәва али хушк-бьред әʹмьрда мәзьн у йед сәԛәт бькьн, ԝәки әԝана бенә сәр щьвата у хьзмәтийе. Һәрге жи тʹаԛәта ԝан тʹӧнә гәләк тьшт бькьн, йәкә әм бь һʹьзкьрьне али ԝан дькьн (Мәт. 13:23). ԝ18.09 29-30 ¶7-8

Һәр хьзмәткʹарәки Йаһоԝа ԛимәт ә бона ԝи у Иса, йе кӧ әʹмьре хԝә да ча кʹьрин сәва мә (Галт. 2:20). Әм хушк-бьред хԝәйә рʹӧһʹани гәләк һʹьз дькьн у дьхԝазьн бона ԝан бь дьл у щан хәм бькьн. Сәва кӧ ԝана гәш кьн, әм гәрәке «һьндава һәвда сәр нета әʹдьлайийе у баԝәри авакьрьне бьн» (Рʹом. 14:19). Әм гьшк гәләк һивийа ԝи ԝәʹдәйи нә чахе дьнйа бьбә Щьнәт, у әме тӧ щар ида бона тʹӧ тьшти дьлтәнг нәбьн! Ԝедәре нә нәхԝәши, нә шәрʹ, нә мьрьн, нә пәйкʹәтьн, нә чәтьнайед малбәтеда, нә жи дьлшькәстибун ԝе тʹӧнәбә. Чахе Һʹәзарсалийа Пʹадшатийа Иса дәрбаз бә, инсанәт ԝе бьгьһижә кʹамьлбуне. Әԝед кӧ щерʹьбандьна хьлазийеда амьн бьминьн, ԝе бьбьнә зарʹед Йаһоԝа Хԝәде сәр әʹрде у «тʹәви азайи у рʹумәта зарʹед Хԝәде бьн» (Рʹом. 8:21). Ләма ԝәрә әм гьшк пе һʹьзкьрьне һәвдӧ бьшьдиньн у али һәвдӧ бькьн бьгьһижьнә нета баш кӧ кʹәрәма тинә. ԝ18.09 14 ¶10; 16 ¶18

Леколинкьрьна Хәбәра Хԝәде, тʹәне хԝәндьна сәра-бәра у кʹьфшкьрьна щабед пьрса нинә. Чахе әм леколина дькьн, әм педьһʹәсьн дәрһәԛа Йаһоԝа, рʹейед ԝи у фькьред ԝи. Паше, әм дьхԝазьн тедәрхьн у фәʹм кьн, чьрʹа Йаһоԝа фьлан тʹәмийе дьдә йан жи фьлан тьшти ԛәдәхә дʹькә. Әм ӧса жи дьфькьрьн, кӧ гәрәке әʹмьр у фькьред хԝәда чь гӧһастьна бькьн. Рʹаст ә ԝәʹде леколинкьрьне дьбәкә әме һәма щарʹәкерʹа нькарьбьн сәр ԝан һʹәму тьшта бьфькьрьн, ле йәкә әме кʹаре бьстиньн, һәрге ԝәʹде леколине ниве ԝәʹдә хәрщ кьн, сәва бьфькьрьн сәр хԝәндьна хԝә (1 Тимтʹ. 4:15). Чахе әм тʹьме сәр Хәбәра Хԝәде дьфькьрьн, әм дәстпедькьн фәʹм кьн у дӧдьли нәбьн, ԝәки фькьр у ньһерʹандьна Йаһоԝа сәр тьшта беԛьсур ә. Әм ида сәр тьшта пе чʹәʹве ԝи дьньһерʹьн у ньһерʹандьна ԝи ԛәбул дькьн. Һʹьш-аԛьле мә «ну» дьбә у щурʹе фькьрандьна мә те гӧһастьне (Рʹом. 12:2). Ӧса һеди-һеди фькьред Йаһоԝа дьбьнә фькьред мә. ԝ18.11 24 ¶5-6

Ԛьрʹна йәкеда Паԝлос сәр хԝә у сәр һьнә Мәсиһийа гот, ԝәки әԝана һәвалхәбаткʹаред Хԝәде нә, чьмки ԝана дадьчьканд у авдьдан тʹохьмед Пʹадшатийе (1 Корн. 3:6). Иро әм жи «бона Хԝәде дьхәбьтьн», чьмки бь мәрʹдани ԝәʹде хԝә, тьшт у ԛәԝата хԝә дьдьнә хәбате, сәва шьхӧле ԝи биньн сери. Әԝ рʹасти жи бона мә ԛәдьрәки мәзьн ә! Чахе әм бь мәрʹдани ԛәԝат у ԝәʹде хԝә бона хьзмәтийе хәрщ дькьн, әм шабунәкә мәзьн дьстиньн. Гәләк хушк-бьра әԝе йәке тʹәхмин дькьн у кʹәрәма дьстиньн, илаһи чахе тʹәви кәсәки һинбуна Кʹьтеба Пироз дәрбаз дькьн. Әԝана бәхтәԝар дьбьн чахе дьвиньн кӧ шагьрт чаԝа ша дьбьн, гава рʹастийед Кʹьтеба Пироз фәʹм дькьн, баԝәрийеда ԛәԝи дьбьн, гӧһастьна дькьн у мәрьвед дьнрʹа жи дәрһәԛа рʹастийе гьли дькьн. Иса ӧса жи шабунәкә мәзьн станд чахе 70 мьзгинван, кӧ чунә мьзгинийе бәла кьн, «бь әшԛ у ша вәгәрийан», чьмки хьзмәтийеда ԛәԝьмандьнед гәләк баш һәбун (Луԛа 10:17-21). ԝ18.08 20 ¶11-12

Һәрге әм дәстпекьн итʹбарийа хԝә һʹьш-аԛьле хԝә у фәʹмкарийа хԝә биньн, әм дькарьн бькʹәвьнә тʹәльке. Һьнге әм ида дькарьн бьфькьрьн, ԝәки әм фьлан дәрәще рʹьнд заньн у һәр тьшти фәʹм дькьн, һәрге жи һʹәму избаткьрьнед мә тʹӧнә нә. Ӧса жи чахе щьватеда кәсәк мә дьдә хәйдандьне, һьнге жи әм дькарьн шашийе бәрʹдьн у информасийа нәрʹаст баԝәр кьн. Һәрге әм хәйде дьле хԝәда хԝәй кьн у тʹьме сәр ве йәке бьфькьрьн, әм дькарьн ида бь шьке бьньһерʹьн сәр ԝе хушке йан жи бьра. Һьн жи һәрге кәсәк мәрʹа дәрһәԛа ԝи мәрьви, кʹижани әм данә хәйдандьне, тьштед нәбаш бежә, әм дькарьн дәрберʹа баԝәр кьн. Ле чь дәрс ве дәрәщеда лазьм ә әм һин бьн? Һәрге әм бьһельн ԝәки дьле мә бьминә сәр хушк-бьред мә, әм дькарьн ида бей избаткьрьн тьштед нәрʹаст дәрһәԛа ԝан баԝәр кьн (1 Тимтʹ. 6:4, 5). Әм гәрәке тӧ щар нәһельн ԝәки дьле мәда һʹәвсуди у кʹӧмрәши һәбә. Әм гәрәке дәрберʹа тьштед хьраб жь дьле хԝә дәрхьн, у бир нәкьн ԝәки Йаһоԝа жь мә дәԝа дькә, кӧ әм хушк-бьра һʹьз бькьн у бь дьл бьбахшиньнә ԝан (Колс. 3:12-14). ԝ18.08 6 ¶15; 7 ¶18

Һʹәму мәрьв йед Йаһоԝа нә, чьмки әԝи әԝана әʹфьрандьн (Зәб. 100:3; Әʹйан. 4:11). Ле йәкә нава тʹәмамийа тʹәрихийа инсанәтеда, Хԝәде һьнә мәрьв башԛә кьрьнә, йед кӧ бь щурʹе мәхсус пʹара ԝи нә. Мәсәлә, Зәбура 135-да сәр хьзмәткʹаред Йаһоԝа ԝәʹде Исраела бәре, те готьне ча «мьлкʹе» ԝи (Зәб. 135:4). Ӧса жи кʹьтеба Һосәйада һатьбу пʹехәмбәртикьрьне, ԝәки мәрьвед жь нә мьләте Исраели жи ԝе бьбьнә щьмәʹта Йаһоԝа (Һос. 2:23). Әԝ пʹехәмбәртийа Һосәйа һатә сери чахе Йаһоԝа мәрьвед жь нә мьләте Щьһу бьжарт, сәва тʹәви Иса пʹадшатийе бькьн (Кʹар. Шанд. 10:45; Рʹом. 9:23-26). Әԝ «мьләте бӧһӧрти» мьлкʹе Йаһоԝайи мәхсус ә. Әԝана бь рʹӧһʹе пироз кʹьфшкьри нә у һатьнә бьжартьне бона жийина сәр әзмана (1 Пәт. 2:9, 10). Ле әм чь дькарьн бежьн дәрһәԛа Мәсиһийед иройин, йед кӧ һивийа жийина һʹәта-һʹәтайе сәр әʹрде нә? Йаһоԝа ԝана жи һʹәсаб дькә ча щьмәʹта хԝә у бьжартийед хԝә (Иша. 65:22). ԝ18.07 22 ¶1-2

Әм чаԝа Мәсиһи ӧса жи чʹәʹв дьдьнә Иса, кʹижан кӧ мәрʹданийеда мәрʹа мәсәла мәзьн һиштийә (Мәт. 20:28). Ԝе баш бә һәр кәс жь мә пьрсе бьдә хԝә: «Гәло әз дькарьм һе зедә чʹәʹв бьдьмә Иса?» (1 Пәт. 2:21) Йаһоԝа хԝәш те чахе әм чʹәʹв дьдьнә ԝи у Кӧрʹе ԝи, гава хәм дькьн бона һʹалхԝәшийа мәрьва, у мәщала дьгәрьн сәва али ԝан бькьн. Гава Иса мәтʹәлока дәрһәԛа Самәри ани, әԝи да кʹьфше кӧ чьԛас фәрз ә али мәрьва бькьн, фьрԛи тʹӧнә әԝана кʹе нә у жь кʹидәре нә (Луԛа 10:29-37). Те бира ԝә чьрʹа Иса әԝ мәтʹәлок гьли кьр? Щьһуки пьрс да ԝи: «Һәвале мьн ки йә?» Щаба Иса дьдә кʹьфше кӧ һәрге әм дьхԝазьн ԝәки Йаһоԝа жь мә рʹази бә, әм гәрәке мина ԝи мәрьве Самәри бь дьл мәрʹд бьн. ԝ18.08 19 ¶5-6

Гәло Йаһоԝа диса ча Мәрйәмерʹа да кʹьфше ԛәбулкьрьна хԝә сәва ве йәке, кӧ әԝе Кӧрʹе ԝи бь амьни хԝәй дькьр у мәзьн дькьр? Хԝәде кьред ԝе у гьлийед ԝе Хәбәра Хԝәда дайә ньвисаре. Дьбәкә Мәрйәме нькарьбу тʹәви Иса рʹеԝити бькьра ԝәʹде хьзмәтийа ԝи, кӧ се сал нива кʹьшанд. Дьԛәԝьмә әԝ һьнге жьнәби бу у Ньсрәтеда ма. Рʹаст ә әԝе нькарьбу тʹәви ԝи һәрә, ле әԝ ԝәʹде мьрьна Иса ԝедәре бу (Йуһʹн. 19:26). Паше, Мәрйәм тʹәви шагьртед дьн Оршәлимеда бу, гава рʹӧһʹе пироз һатә сәр ԝан (Кʹар. Шанд. 1:13, 14). Әԝе жи дьбәкә рʹӧһʹе пироз станд, чахе ԝедәре бу. Һәрге әԝ йәк ӧса бу, әԝ те һʹәсабе ԝәки әԝе диса жи ԛәдьрәки мәзьн станд, демәк ԝе тʹәви Иса һʹәта-һʹәтайе сәр әʹзмана бә. Рʹасти жи Хԝәде бона хьзмәтийа ԝейә амьн чьԛас ԝе кʹәрәм кьр! ԝ18.07 9 ¶11; 10 ¶14

Иса ԝәʹде хьзмәтийа хԝә принсип дьданә хәбате, сәва шагьртед хԝә һин кә, ԝәки әԝана фәʹм кьн, кӧ фькьр у шьхӧл чь ахьрийе дькарьн биньн. Бәʹса хәбәре, әԝи гот кӧ һерс дькарә мерьв бәрбь зорбәтийе бьвә, ле тәме хьраб, демәк фькьред бенамуси мерьв бәрбь бенамусийе бьвьн (Мәт. 5:21, 22, 27, 28). Сәва кӧ исафа мә рʹаст бьхәбьтә, әм гәрәке бьһельн, ԝәки принсипед Хԝәде рʹебәрийе мә бькьн, у ӧса әме пе кьред хԝә шькьрийе бьдьнә Хԝәде. Рʹаст ә исафа Мәсиһийа пе Кʹьтеба Пироз һинкьри йә, ле ньһерʹандьна һәр кәси сәр һьнә тьшта дькарә жь һәв щӧдә бә. Мәсәлә, дәрһәԛа ичʹкәвәхԝарьне. Кʹьтеба Пироз ичʹкәвәхԝарьне ԛәдәхә накә, ле дьбежә ԝәки хԝә дур бьгьрьн жь гәләк ичʹкәвәхԝарьне у сәрхԝәшибуне (Мәтʹлк. 20:1; 1 Тимтʹ. 3:8). Ле гәло әв те һʹәсабе, ԝәки Мәсиһийе кӧ ичʹке һьндьки вәдьхԝә, гәрәке хәма ԝи сәр тьштәки дьн нибә? На. Дьбәкә исаф ԝи начәрчьринә, ле әԝ ӧса жи гәрәке исафа мәрьвед дьн һьлдә һʹәсаб. ԝ18.06 18 ¶10-11

Иса шагьртед хԝә ширәт кьр, ԝәки әԝана жь һәвиртʹьршк, демәк жь һинкьрьна Ферьсийа, Садуԛийа у пәйчуйе Һеродәс, хԝә дур бьгьрьн (Мәт. 16:6, 12). Һʹәԝас ә кӧ Иса әԝ ширәт да шагьртед хԝә, паши ве йәке чахе щьмәʹте дьхԝәст ԝи бькьнә пʹадше хԝә. Чахе религийа тʹәви политике дьбә йәк, гәләк щар әԝ дьбә мәʹнийа зорбәтийе. Ле Иса шагьртед хԝә ширәт кьр, кӧ әԝана гәрәке бь тʹәмами тʹәвнәбуйине хԝәй кьн. Әԝ йәк бу мәʹни кӧ сәрәккʹаһин у Ферьсийа шеԝьра кӧштьна Иса кьрьн. Иса бона ԝан ча конкурент бу, әԝана дьтьрсийан кӧ жь бо ԝи һʹӧкӧм у щийе хԝә ӧнда кьн. Ԝана дьгот: «Һәгәр әм ԝи аһа бьһельн, һʹәму ԝе баԝәрийа хԝә ԝи биньн у рʹомайи жи ԝе бен, щийе мәйи пироз ԝеран кьн у кʹока мьләте мә жи биньн» (Йуһʹн. 11:48). Ләма паше Ԛәйафа Сәрәккʹаһин рʹебәри кьр, ԝәки Иса бе кӧштьне (Йуһʹн. 11:49-53; 18:14). ԝ18.06 6-7 ¶12-13

Тʹәлькәкә Шәйтʹан кӧ гәләк мәрьв дькʹәвьне, әԝ һәйә сербази. Иро хенщи религийед ԛәлп, Шәйтʹан ӧса жи щурʹә-щурʹә ԝәʹдәдәрбазкьрьна дьдә хәбате, сәва мәрьварʹа һʹәԝас бә дәрһәԛа щьна пебьһʹәсьн. Мәсәлә, филм, листькед әләктроники, медийа, сербазийе у кʹочәктийе әʹйан дькьн ча тьштәки баш. Ле ча әм дькарьн хԝә хԝәй кьн сәва нәкʹәвьнә ве тʹәльке? Тʹәшкиләта Хԝәдеда әм гәрәке һивийе нибьн, кӧ мәрʹа ԝе бе готьне кʹижан ԝәʹдәдәрбазкьрьн щайиз ә кʹижан на. Һәр кәс жь мә гәрәке ль гора принсипед Хԝәде исафа хԝә һин кә (Ибрн. 5:14). Ле әме бьжартьнед билан бькьн, һәрге ширәта Паԝлосе шанди, кӧ рʹеза иройинда ньвисар ә, бьдьнә хәбате. Әм дькарьн пьрсе бьдьнә хԝә: «Гәло бьжартьнед мьн бона ԝәʹдәдәрбазкьрьне ԝе нишан кьн, ԝәки әз дӧрʹу ниньм? Һәрге әԝ мәрьв, тʹәви кʹижани әз һинбуна Кʹьтеба Пироз дәрбаз дькьм, йан жи сәрледана дӧбарә дькьм, бьвиньн әз кʹижан ԝәʹдәдәрбазкьрьне дьжберьм, ԝе чь бьфькьрьн?» Кьред мә чьԛас анәгори хәбәрдана мә бьн, һаԛас ԝе мәрʹа һеса бә нәкʹәвьнә тәлькед Шәйтʹан (1 Йуһʹн. 3:18). ԝ18.05 25 ¶13

Ча әм дькарьн чʹәʹв бьдьнә Паԝлос? Йа пешьн, әм гәрәке бь дьл бьхԝазьн мәрьвед ӧса бьвиньн, йед кӧ «бона жийина һʹәта-һʹәтайе кʹьфшкьри» нә. Йа дӧда, әм бь дӧа жь Йаһоԝа һиви дькьн, ԝәки дьле мәрьвед һʹәлал вәкә (Кʹар. Шанд. 13:48; 16:14). Хушкәкә мә бь наве Силвиана, йа кӧ ԝәкә 30 сала пешәнг ә, дьбежә: «Әз пешийа кӧ һәрʹьм мал бь мал хьзмәт кьм, әз Йаһоԝарʹа дӧа дькьм сәва ньһерʹандьна позитив бьдә мьн». Ӧса жи әм Хԝәдерʹа дӧа дькьн, ԝәки мьлйакʹәтед ԝи рʹебәрийе мә бькьн кӧ әм мәрьвед дьлсах бьвиньн (Мәт. 10:11-13; Әʹйан. 14:6). Дина хԝә бьдьне, бьраки мә бь наве Роберт кӧ 30 сала зедәтьр ча пешәнг ә, чь дьбежә: «Һәвкʹари тʹәви мьлйакʹәтед кӧ һаш жийина хԝәйед мала һәнә, рʹасти жи тьштәки мәхсус у һʹәԝас ә. Йа сьсийа, әм гәрәке нав мәрьвада тьштед баш бьвиньн. Бьраки мә бь наве Карл кӧ рʹуспи йә, дьбежә: «Әз дина хԝә дьдьмә һәр нишанәкә бьчʹук жи кӧ дькарә әʹйан кә мәрьве һʹәлал, бәʹса хәбәре дьԛәԝьмә бәшәра ԝийи хԝәш, йан жи пьрсәкә һʹәлал». Бәле, мина Паԝлос әм жи дькарьн бь сәбьр бәр бьдьн. ԝ18.05 15 ¶13; 16 ¶15

Әм гәләк ша дьбьн чахе педьһʹәсьн, ԝәки әԝ мәрьвед кӧ мә али ԝан кьрийә, амьн дьминьн. Йуһʹәннайе шанди ньвиси: «Шабуна мьнә жь ве мәстьр тʹӧнә, чахе дьбьһем кӧ зарʹед мьн нава рʹастийеда дьжин» (3 Йуһʹн. 4). Гәләк пешәнг зәʹф ԛәԝи дьбьн, чахе педьһʹәсьн кӧ әԝ мәрьв, кʹижанарʹа ԝана аликʹари дайә кӧ бенә сәр рийа рʹаст, бәрдәԝам дькьн амьн бьминьн у дьбәкә бунә пешәнг жи. Ләма жи чахе әм дьвиньн кӧ пешәнг дьлтәнг ә, әм дькарьн кьред ԝийи баш биньн бира ԝи, чахе әԝи аликʹари дайә йед майин. Гәләк бәрпьрсийаред мьһале дьбежьн, кӧ әԝана у жьнед ԝан гәләк дьлгәрм дьбьн, чахе нәʹмед рʹазибуне дьстиньн жь хушк-бьра паши тʹәсәлийа щьвате. Рʹуспи, мисйонер, пешәнг у хьзмәткʹаред Бәйтәле жи гәләк ша дьбьн у ԛәԝи дьбьн, чахе хушк-бьра пе гьлийа рʹазибуна хԝә ԝанрʹа дьдьнә кʹьфше. ԝ18.04 23 ¶14-15

Сьлеман әԝ ԛанун пьшт гӧһе хԝәва авит, у ахьрийеда 700 жьнед ԝи у 300 щарийед ԝи һәбун (1 Пʹадш. 11:3). Гәләк жьнед ԝи жь мьләте Исраели нибун, у хӧданед ԛәлп дьһʹәбандьн. У Сьлеман бь ве йәке жи гӧрʹа ԛануна Хԝәде нәкьр кӧ жьнед хәриб станд (Ԛан. Дщр. 7:3, 4). Дьле Сьлеман һьндава ԛанунед Йаһоԝа һеди-һеди сар бу, у ахьрийеда әԝи тьштед хьраб кьр. Сьлеман бона хӧданед ԛәлп Астартийа у Кәмош, горигәһ ава кьр. Әԝи һәла һе жи тʹәви жьнед хԝә пʹутпʹарьсти кьр. Әԝи әԝ горигәһ һәма бәр Оршәлиме сәр бьльндщи ава кьр, кʹидәре кӧ әԝи хԝәха бона Йаһоԝа пʹарьстгәһ ава кьрьбу (1 Пʹадш. 11:5-8; 2 Пʹадш. 23:13). Дьԛәԝьмә Сьлеман хԝәха хԝә дьхапанд, ԝәки Йаһоԝа чʹәʹве хԝә дадьдә сәр кьред ԝийи хьраб, чьмки әԝи диса жи бәрдәԝам дькьр пʹарьстгәһа ԝида ԛӧрбана бьдә. Ле Йаһоԝа тӧ щар сәр хьрабийе чʹәʹве хԝә данадә. ԝ18.07 18-19 ¶7-9

Һьнә «тиред агьрийә» кӧ Шәйтʹан дькарә бавежә сәр тә, әԝ һәйә дәрәԝед дәрһәԛа Йаһоԝа, йанчь әԝ бона тә хәм накә у тә һʹьз накә. Иде кӧ 19 сали йә, дәрһәԛа хԝә дьфькьрә ԝәки әԝ нәһежайи һʹьзкьрьна Хԝәде йә. Әԝ дьбежә: «Гәләк щар әз дьфькьрьм, кӧ Йаһоԝа жь мьн дур ә у нахԝазә бьбә Досте мьн». Ле гәло Иде ча шәрʹ дькә тʹәви ԝан фькьра? Әԝ гьли дькә: «Щьват гәләк баԝәрийа мьн дьшьдиньн. Бәре әз сәр щьвата рʹудьньштьм у мьн тӧ щар щаба хԝә нәдьда, чьмки дьфькьрим кӧ тʹӧ кәс ԝе нәхԝазә мьн бьбьһе. Ле ньһа, әз бона щьвате хԝә һазьр дькьм у дӧ йан се щара щаба хԝә дьдьм». Сәрһатийа Иде рʹастийа фәрз әйан дькә: Бәре мәрталед кӧ дьданә әскәра, чапа ԝан стандарт бу, ле баԝәри ӧса нинә, чьмки баԝәрийа мә дькарә йан зедә бә йан жи кем бә, әԝ йәк мәва гьредайи йә (Мәт. 14:31; 2 Тʹеслн. 1:3). Ләма жи әм гәрәке алийе хԝәда һәр тьшти бькьн, ԝәки баԝәрийа хԝә тʹьме ԛәԝи кьн! ԝ18.05 29-30 ¶12-14

Сәрԝере кәле тʹәне паши әʹрдһәже ньһерʹандьна хԝә гӧһаст у аликʹари хԝәст (Кʹар. Шанд. 16:25-34). Иро жи чахе һʹале мәрьва ньшкева те гӧһастьне, әԝана һьнге дькарьн гӧһ бьдьнә мьзгинийе у бьхԝазьн аликʹарийе бьстиньн. Дьбәкә ньшкева ԝана хәбата хԝә ӧнда кьрьнә у ньзаньн чь бькьн. Һьнәк жи бинтәнг дьбьн, чьмки пеһʹәсийанә кӧ нәхԝәшийа ԝанә гьран һәйә, йан жи дьлшкәсти нә, чьмки мәрьве хԝәйи незик ӧнда кьрьнә. Бал ԝан мәрьва пьрсед нета әʹмьрва гьредайи дькарьн пешда бен, дәрһәԛа кʹижани кӧ бәре нә жи фькьринә. Дьԛәԝьмә әԝана һәла һе жи дьфькьрьн: «Әз гәрәке чь бькьм ԝәки хьлаз бьм?» Гава әм рʹасти ԝан мәрьва тен, әԝана дькарьн гӧһ бьдьнә мьзгинийа мәйә ша, кӧ ԝана әʹмьре хԝәда тӧ щар нәбьһистийә. Ләма жи һәрге әм бь амьни бәрдәԝам кьн мьзгинийе бәла кьн, әме бькарьбьн бәрдьлийе бьдьнә мәрьва, гава әԝана һазьр бьн гӧһ бьдьнә мә у бәрдьлийа мә ԛәбул кьн (Иша. 61:1). ԝ18.05 19-20 ¶10-12

Иро Шәйтʹан чʹәʹве һʹәчʹи зәʹф мәрьва кор кьрийә. Әԝана нә жи тедәрдьхьн ԝәки хӧламед религийа ԛәлп, һәбуке, у политике нә (2 Корн. 4:4). Бона мә ԛәдьрәки гәләк мәзьн ә, кӧ мина Иса али мәрьва бькьн сәва әԝана дәрһәԛа Йаһоԝа пебьһʹәсьн у жерʹа хьзмәт кьн (Мәт. 28:19, 20). Әԝ шьхӧләкә нәһеса йә, у гәләк чәтьнайи жи һәнә. Һьнә щийада, мәрьв дьбьнә бетʹалаш у һәла һе жи гәләк һерс. Ле һәр кәс жь мә гәрәке пьрсәкә ӧса бьдә хԝә: «Гәло әз дькарьм азайа хԝә ӧса бьдьмә хәбате сәва һе зедә Йаһоԝарʹа хьзмәт кьм?» Әм ԛәԝи дьбьн чахе дьвиньн кӧ гәләк хьзмәткʹаред Хԝәде тедәрдьхьн, ԝәки ахьри гәләк незик ә у әʹмьре хԝә сьвьк дькьн сәва хьзмәтийа һәртʹьм дәстпекьн (1 Корн. 9:19, 23). Һьнәк мьһала хԝәда хьзмәт дькьн, һьнәк жи дәрбази щики дьн дьбьн кʹидәре һʹәԝщәти һәйә. Рʹасти жи чьԛас баш ә кӧ гәләк хушк-бьра азайа хԝә бь билани дьдьнә хәбате, у Йаһоԝарʹа хьзмәт дькьн (Зәб. 110:3). ԝ18.04 11-12 ¶13-14