Илон

Дьле Иса шәԝьти чахе әԝи дит, кӧ Мәртʹа у Мәрйәме дәрд дькьшандьн жь бо мьрьна бьре хԝә Лазар. Дьле Иса ӧса ешийа, кӧ әԝ «гьрийа» (Йуһʹн. 11:32-35). Иса гьрийа нә бона ԝе йәке кӧ һәвале хԝәйи незик ӧнда кьр, чьмки заньбу ԝәки ԝе ԝи жь мьрьне рʹакә. Бь рʹасти, Иса гьрийа чьмки фәʹм дькьр у тʹәхмин дькьр еша дьле һәвалед хԝәйи дәлал. Әм дьлбинийе дьстиньн жь ве йәке кӧ заньн, ԝәки Иса һьндава мәрьвада дьлшәԝат бу. Әм ԝи һʹьз дькьн, чьмки әԝи бона мәрьва хәм дькьр. Әм заньн кӧ ньһа әԝ Пʹадшатийа Хԝәдеда пʹадшатийе дькә, у әԝ йәк дьлбинийе дьдә мә. Зутьрәке әԝ ԝе һʹәму кӧл-дәрда бьдә һьлдане. Иса хԝәха сәр әʹрде дьжит ча мәри у ләма әԝ дькарә дьһа баш али инсанәте бькә у ԝана жь һʹәму зийана кӧ сәрԝертийа Шәйтʹан анийә, хьлаз кә. Бь рʹасти әԝ кʹәрәмәкә мәзьн ә, кӧ Сәрԝерәки мәйи ӧса һәйә, кӧ «тәнгасийед мәда» дьле ԝи сәр мә дьшәԝьтә (Ибрн. 2:17, 18; 4:15, 16). ԝ19.03 17 ¶12-13

Әм мәрьва дәрһәԛа Хԝәде һин дькьн, ле шьхӧле лапә фәрз әм накьн, Хԝәде дькә (1 Корн. 3:6, 7). Тʹәне Йаһоԝа мәрьва незики хԝә дькә. Ахьрийеда дьле мәрьвава гьредайи йә, кӧ мьзгинийе ԛәбул кьн йан на (Мәт. 13:4-8). Бир нәкьн, Иса дьнйайеда Мамостайе лапи баш бу, ле йәкә гәләк мәрьва мьзгинийа ԝи ԛәбул нәкьрьн! Ләма жи әм гәрәке бәрхԝә нәкʹәвьн, кӧ гәләк мәрьв гӧһ надьнә мә у мьзгинийе нахԝазьн. Әме бәред баш бьстиньн, һәрге хьзмәтийеда дьлшәԝатийе нишан кьн. Әме жь хьзмәтийа хԝә һе зедә шабуне бьстиньн, чьмки мәрʹданийе дьдьнә кʹьфше. У әм али мәрьвед дьлсах дькьн, ньһерʹандьна кʹижана һьндава жийина һʹәта-һʹәтайе рʹаст ә, сәва ԝанрʹа һеса бә мьзгинийе ԛәбул кьн (Кʹар. Шанд. 13:48). Ләма жи ԝәрә «һʹәта кӧ ԝәхт дәстед мәда йә, һʹәмуйарʹа ԛәнщийе бькьн» (Галт. 6:10). Һьнге әме шабуне бьстиньн, чьмки ӧса әме рʹумәте бьдьнә Баве хԝәйи әʹзмана (Мәт. 5:16). ԝ19.03 25 ¶18-19

Даԝьд Пʹадша ньвиси: «Хӧдан мәзьн ә, һежайи гәләк пәсьна йә» (Зәб. 145:3). Әԝи Йаһоԝа һʹьз дькьр у әԝе һʹьзкьрьне ԝи һелан дькьр, ԝәки «нава щьвинеда» пәсьна бьдә Хԝәде (1 Дир. 29:10-13; Зәб. 40:5). Иро әм дькарьн щьватеда пәсьна бьдьнә Йаһоԝа, кӧ щьватеда щаба хԝә бьдьн. Һәр кәс жь мә дьшекьринә чахе хушк-бьра щаба хԝә дьдьн. Һʹәԝаса мә те чахе зарʹа бьчʹук бь дьл щаба кьн дьдә. Ӧса жи дьле мә дьгьрә гава әм дьбьһен, ԝәки кәсәк тьштед ԛимәт кӧ пеһʹәсийайә, гьли дькә. У чахе йед шәрмокә йан жи йед кӧ тʹәзә зьман һин дьбьн, щаба хԝә дьдьн, әм ԝанрʹа фьрнаԛ дьбьн, чьмки әԝана мерхасийе дьдьнә кʹьфше (1 Тʹеслн. 2:2). Ле ча әм дькарьн ԝанрʹа нишан кьн, кӧ әԝ щәфе ԝан ԛимәт дькьн? Ԝе баш бә һәрге паши щьвате пʹайе ԝан бьдьн бона щабед ԝани дьлгәрм. Диса щурʹәки кӧ әм ча дькарьн рʹазибуна хԝә нишан кьн, әԝ ә чахе әм хԝәха жи щаба хԝә дьдьн. Һьнге әм нә кӧ тʹәне дьлдайине дьстиньн, ле әм ӧса жи хԝәха дьл дьдьнә йед майин (Рʹом. 1:11, 12). ԝ19.01 8 ¶1-2; 9 ¶6

Дәһә мер һаләки гәләк гьранда бун, чьмки кʹоти бун. Әԝана нә жи дьфькьрин ԝәки ԝе ԝәʹдәки ӧса бе, кӧ әԝана ԛәнщ бьн. Ле рʹожәке ԝана жь дурва Иса Мамостайе мәзьн дитьн. Әԝана пешийа ве йәке пеһʹәсийабун, ԝәки Иса һʹәму щурʹә нәхԝәшийа ԛәнщ дькә. Ләма ԝана бь дәнге бьльнд кьрьнә гази: «Исайе мамоста, ль мә ԝәрә рʹәме». У әԝ дәһә мер бь тʹәмами ԛәнщ бун. Бешьк, әԝана гьшк жи жь Иса рʹази бун. Ле йәк жь ԝан нә тʹәне дьле хԝәда шекьранд, ле әԝи пе кьре хԝә Исарʹа да кʹьфше. Әԝ Самәрийе кʹоти, жь рʹазибуне «бь дәнгәки бьльнд шькьри дьда Хԝәде» (Луԛа 17:12-19). Мина мәрьве Самәри, әм жи дьхԝазьн ԛәнщийед мәрьва бьшекьриньн. Йаһоԝа мәрʹа ве йәкеда мәсәле дьһелә. Бәʹса хәбәре, Йаһоԝа ԝан мәрьва кʹәрәм дькә, кʹижан кӧ дьле ԝи ша дькьн (2 Сам. 22:21; Зәб. 13:6; Мәт. 10:40, 41). У Кʹьтеба Пироз мәрʹа дьбежә, ԝәки әм «чʹәʹв бьдьнә Хԝәде, чаԝа зарʹед һьзкьри» (Әфәс. 5:1). Демәк, мәʹнийа сәрәкә, кӧ чьрʹа әм гәрәке шекьрдар бьн, әԝ ә кӧ әм дьхԝазьн чʹәʹв бьдьнә Йаһоԝа. ԝ19.02 14 ¶1-2; 15 ¶4

Ԛизькәк кӧ Шәʹде Йаһоԝа йә, мәкʹтәбеда бь ԛәдьр дьбежә, ԝәки әԝ тʹәви щәжьне набә, кʹижан кӧ Хԝәде хԝәш найе. Гәдәки кӧ мал бь мал хьзмәт дькә дәрийе мала һәвалдәрсхане хԝә дьхә, йе кӧ ԛәрфе хԝә Шәʹдед Йаһоԝа дькә. Малхек кӧ анщах әʹбура нәфәред хԝә дькә, дьчә хәбате у мәзьне хәбата ԝи жерʹа дьбежә, ԝәки дәрәԝа бькә йан жи тьштәки нәԛануни бькә. Әԝ занә кӧ дькарә хәбата хԝә ӧнда кә, ле йәкә мәзьне хәбатерʹа шьровәдькә, ԝәки әԝ тʹәне рʹастийе дьбежә у гӧрʹа ԛануне дькә, чьмки Хԝәде жь хьзмәткʹаред хԝә ве йәке дәԝа дькә (Рʹом. 13:1-4; Ибрн. 13:18). Һун ча дьфькьрьн, бал ԝан һәрсека чь һʹӧнӧр һәйә? Дьбәкә һуне бежьн, ԝәки ԝана чәнд һʹӧнӧр данә кʹьфше, бәʹса хәбәре мерхаси у һʹәлали. Ле һʹӧнӧрәкә лапә мәхсус кӧ ԝана да кʹьфше, әԝ һәйә беԛьсурти. Һәр йәк жь ԝан Йаһоԝарʹа амьн ма у принсипед Йаһоԝа нәтʹәрьбандьн. Беԛьсуртийе әԝана һелан кьрьн, ԝәки ӧса бькьн. Йаһоԝа бешьк ԝан мәрьварʹа фьрнаԛ буйа, кӧ ԝана һʹӧнӧрәкә ӧса данә кʹьфше. Әм жи дьхԝазьн, ԝәки Баве мә мәрʹа фьрнаԛ бә. ԝ19.02 2 ¶1-2

Ԛануне илаһи әԝ мәрьв хԝәй дькьрьн, хԝәйе кʹижана тʹӧнә бу, мәсәлә, етʹима, жьнәбийа у хәриба. Һʹакьмара ԛанунеда һатә готьне: «Һәԛийа хәриб йан сеԝи нәтʹәрьбинә у кʹьнща жьнәбийе кәфил һьлнәдә» (Ԛан. Дщр. 24:17). Йаһоԝа илаһи бона ԝан мәрьва хәм дькьр, йед кӧ нав щьмәʹтеда сьст бун у пьшта ԝан тʹӧнә бу. У Йаһоԝа әԝ мәрьвед кӧ һьндава ԝан сьстада хьраб бун, щәза дькьр (Дәркʹ. 22:22-24). Йаһоԝа дьхԝазә ԝәки әԝед кӧ щабдарийа ԝан һәйә, бь һʹьзкьрьн бьн һьндава ԝан һʹәмуйада, бона кʹижана әԝана щабдар ьн. Бәр чʹәʹве Йаһоԝа рʹәш ә зорбәтийа сексуали, у әԝ дьхԝазә ԝәки илаһи һʹәму мәрьвед бепьшт, бенә хԝәйкьрьне у һьндава ԝанда һәԛ бьн (Ԛан. Кʹаһ. 18:6-30). Чахе әм дӧдьли ниньн, ԝәки Йаһоԝа һьндава мәда бь һәԛийе йә, һʹьзкьрьна мә һьндава ԝида мәзьн дьбә. У һәрге әм Хԝәде у принсипед ԝийи рʹаст һʹьз бькьн, әме тʹәви мәрьва жи бь һʹьзкьрьн у һәԛ бьн. ԝ19.02 24-25 ¶22-26

Бьфькьрьн дәрһәԛа ԝе мәсәле, кӧ чаԝа әм дькарьн хԝә хԝәй кьн, ԝәки нәкʹәвьнә бәр байе фькьред Шәйтʹан. Йаһоԝа мә һин дькә, ԝәки «наве ԛавийе у һәр һʹәрамийе, . . . гәрәке нава [мәда] нәйе һьлдане» (Әфәс. 5:3). Ле һәрге хәбатеда йан жи мәкʹтәбеда кәсәк дәстпедькә дәрһәԛа бенамусийе хәбәр дә, әме чь бькьн? Нобәдар, демәк исафа мә, ԝе дәнг дәрхә, чахе хофе тʹәхмин кә (Рʹом. 2:15). Ле гәло әме гӧһ бьдьн исафа хԝә? Дәмед ӧсада әм тенә щерʹьбандьне, һәла әме гӧһ бьдьн мәрьва йан жи ԝан шьклед бенамуси бьньһерʹьн, кижан кӧ әԝана мәрʹа нишан дькьн, йан гӧһ бьдьнә исафа хԝә. Ле һьнге һәма әԝ ԝәʹдә йә, кӧ лазьм ә дәргәһед шәһәр дадьн, демәк хәбәрдане бьгӧһезьн йан жи жь ԝедәре һәрʹьн. Рʹасти жи мерхаси лазьм ә сәва нәкʹәвьнә бәр байе фькьр у кьред мәрьвед дор-бәре хԝә. Әм гәрәке дӧдьли нәбьн, кӧ Йаһоԝа дьвинә ԝәки әм нахԝазьн чʹәʹв бьдьнә ԝан мәрьва, у әԝ ԝе ԛәԝате у биланийе бьдә мә, сәва әм нәкʹәвьнә тʹәлька Шәйтʹан (2 Дир. 16:9; Иша. 40:29; Аԛуб 1:5). ԝ19.01 17-18 ¶12-13

Сьлеман кӧ мәрьвәки гәләк дәԝләти у ԛәԝат бу, дьхԝәст әʹмьре хԝәда тьштәки бьщерʹьбинә. Әԝи хԝәст ԝәки кʹефхԝәшийева мьжул бә у бьвинә, һәла әԝ йәк ԝе чь кʹаре бинә (Ԝаиз 2:1-10). Әԝи хԝәрʹа мал ава кьрьн, бахчә у парк чекьрьн, у тьштәк жь хԝә кем нәдькьр, чь дьле ԝи дьхԝәст дькьр. Ле паши ве йәке әԝи ча хԝә тʹәхмин дькьр? Әԝ бәхтәԝар у дьлрьһʹәт бу? Әԝи хԝәха дәрһәԛа хԝә гот, гьлийед ве рʹожеда. Рʹасти жи дәрсәкә чьԛас ԛәԝи йә! Ле һун жь сәрһатийа ԝи чь дәрсе хԝәрʹа һин дьбьн? Һьнә мәрьв тʹәне сәр шашийед хԝә һин дьбьн у ахьрийа хьраб дьстиньн. Йаһоԝа нахԝазә тʹәви ԝә жи ӧса бьԛәԝьмә. Ләма ԝәрʹа лазьм ә баԝәри сәва кӧ гӧрʹа Хԝәде бькьн у ԛьрара ԝи дайньн щийе пешьн. Әԝ баԝәри беһʹәсаб ԛимәт ә у ԝе тʹӧ щар ԝә дьлшькәсти нәкә. Бәле, Йаһоԝа ԝе тʹӧ щар «һʹьзкьрьна кӧ ԝә бона наве ԝи да кʹьфше», бир нәкә (Ибрн. 6:10). Ләма жи һәр тьшти бькьн сәва баԝәрийеда бьшьдьн, у һуне бьвиньн кӧ Баве ԝәйи әʹзмана тʹьме ԛәнщийа ԝә дьхԝазә (Зәб. 32:8). ԝ18.12 22 ¶14-15

Мәрьве рʹӧһʹани баԝәрийа хԝә Хԝәде тинә у сәр тьшта пе чʹәʹве ԝи дьньһерʹә. Әԝ тʹьме рʹебәрийа Хԝәде дьгәрʹә у дьхԝазә һәр тьштида гӧрʹа ԝи бькә (1 Корн. 2:12, 13). Даԝьд ве йәкеда мәсәләкә баш һишт. Әԝи дьстьра: «Хӧдан ә пʹара мьнә жьбарә у рьсԛе мьн» (Зәб. 16:5). Даԝьд рʹази бу бона «пʹара» хԝә, демәк һәләԛәтийа хԝә тʹәви Хԝәде, у әԝи щи-сьтʹар бал ԝи дьгәрʹийа (Зәб. 16:1). Ахьрийа ве йәке чь бу? Даԝьд ньвиси: «Нәфса мьн әшԛ дьбә». Бәле, достийа Даԝьд тʹәви Хԝәде, шабунәкә мәзьн жерʹа дьани (Зәб. 16:9, 11). Мәрьвед кӧ пәй хԝәстьнед хԝә у пʹәра дькʹәвьн, нькарьн шабунәкә ӧса бьстиньн, чаԝа Даԝьд дьстанд (1 Тимтʹ. 6:9, 10). Баԝәри һьндава Йаһоԝа у хьзмәтийа ԝирʹа, әʹмьре мәда шабуне тинә у дьлрьһʹәтийе дьдә мә. Щаһьлно, ле һун ча дькарьн баԝәрийа хԝә ԛәԝи кьн? Һун гәрәке бона Йаһоԝа ԝәʹдә хәрщ кьн, демәк Хәбәра ԝи бьхуньн, дина хԝә бьдьнә әʹфьринед ԝи, у бьфькьрьн дәрһәԛа һʹӧнӧред ԝи у ӧса жи дәрһәԛа һʹьзкьрьна ԝи һьндава ԝә (Рʹом. 1:20). ԝ18.12 25 ¶7-8

Паԝлос Мәсиһи ширәт кьрьн, ԝәки зәԝаще һӧрмәт у ԛимәт кьн. Ле һун жи сәр зәԝаще ӧса дьньһерʹьн, илаһи һәрге һун зәԝащеда ньн? Һәрге һун зәԝаще һӧрмәт дькьн, ԝәки ӧса нә һун чʹәʹв дьдьнә Иса, кʹижан кӧ мәсәла лапә баш ә. Иса хԝәха зәԝащ һӧрмәт дькьр. Чахе Ферьсийа дәрһәԛа һәвԛәтандьне жь ԝи пьрсин, Иса гьлийед Хԝәде ԝәкʹьланд, кʹижан кӧ әԝи гот чахе зәԝаща пешьн саз кьр: «Бона ве йәке мере де у баве хԝә бьһелә, хԝә ль жьна хԝә бьгьрә у һәр дӧ ԝе бьбьнә бәдәнәк». Паши ԝан гьлийа Иса гот: «Әԝед кӧ Хԝәде әԝ кьрьнә йәк, бьра мәрьв ԝан жь һәвдӧ нәԛәтинә» (Марԛ. 10:2-12; Дәстп. 2:24). Иса заньбу кӧ Хԝәде зәԝащ саз кьрийә у да кʹьфше ԝәки зәԝащ гәрәке ԝәʹдәлу нибә. Хԝәде нәготә Адәм у Һеԝайе, ԝәки зәԝащеда әԝана дькарьн жь һәв бьԛәтьн. Дәԝсе, нета Йаһоԝа әԝ бу кӧ «һәр дӧ» һʹәта-һʹәтайе зәԝащеда йәктийеда бьн. ԝ18.12 10-11 ¶2-4

Чахе әм тʹәзә һатьнә сәр рʹийа рʹаст, әм пеһʹәсийан кӧ чьԛас фәрз ә гӧрʹа тʹәмийед сәрәкә бькьн, кӧ Йаһоԝа дьдә мә. Ле чахе әм ида рʹӧһʹанида мәзьн бун, әм һе зедә пеһʹәсийан дәрһәԛа хәйсәт у фькьред Йаһоԝа, мәсәлә чь ԝи хԝәш те у чь на, у ӧса жи ча әԝ сәр щурʹә-щурʹә тьшта дьньһерʹә у әԝ йәк сәр сафикьрьн у кьред мә һʹӧкӧм дькьн. Мә хԝәш те чахе әм дәрһәԛа фькьред Йаһоԝа педьһʹәсьн, ле әм гӧнәкʹар ьн у ләма щара һеса нинә, ԝәки әм жи мина ԝи бьфькьрьн. Бәʹса хәбәре, әм заньн кӧ Йаһоԝа ча дьньһерʹә сәр бенамусийе, пʹәрәһʹьзийе, шьхӧле бәлакьрьна мьзгинийе, бәридайина хуне, у диса тьштед дьн. Ле дьбәкә мәрʹа чәтьн ә фәʹм кьн ньһерʹандьна ԝи сәр ԝан тьшта. Һьнге чь әм гәрәке бькьн? Чаԝа әм дькарьн һин бьн мина Йаһоԝа бьфькьрьн? Щаба ве пьрсе әԝ ә, кӧ әм гәрәке Хәбәра Хԝәде леколин бькьн, сәва фькьред ԝи тедәрхьн у сәр дьшьрмиш бьн, сәва бь ньһерʹандьна Хԝәде сәр тьшта бьньһерʹьн. ԝ18.11 23-24 ¶2-4

Һәбаԛуԛ ԝәʹдәки гәләк чәтьнда дьжит. Дор бәре ԝи мәрьв гәләк хьраб у зӧлм бун, у сәва ве йәке әԝ гәләк бәрхԝә дькʹәт. Бал ԝи пьрс пешда дьһат: «Кʹәнге әв хьраби ԝе кʹӧта бә? Чьрʹа Йаһоԝа һаԛас ԝәхт тьштәки накә?» Әԝи пе чʹәʹве хԝә дьдит кӧ мьләте ԝи ча берʹәʹм ьн у нәһәԛийе дькьн. Әԝи хԝә тʹәне у беаликʹари тʹәхмин дькьр. Ләма әԝи лавайа Йаһоԝа дькьр, ԝәки әԝ тьштәки бькә. Һәбаԛуԛ дькарьбу бьфькьрийа, ԝәки хәма Йаһоԝа нинә кӧ чь дьԛәԝьмә, у нә жи те кʹьфше кӧ әԝ ԝе тьштәки бькә. Ле ԛә ԝә хԝә мина ԝи ӧса тʹәхмин кьрийә? Гәло Һәбаԛуԛ баԝәрийа хԝә һьндава Йаһоԝа у созед ԝи ӧнда кьрьбу, ләма пьрсед ӧса бал ԝи пешда дьһатьн? Тӧ щар на! Рʹаст ә әԝ чәтьнайада бу у бинтәнг бу, ле йәкә әԝи хԝә бечʹарә һʹәсаб нәкьр, чьмки хәмед хԝә да дәсте Йаһоԝа, нә кӧ мәрьва. Ча те кʹьфше Һәбаԛуԛ бәрхԝә дькʹәт, чьмки фәʹм нәдькьр кӧ чьрʹа Йаһоԝа һе тьштәки накә у дьһелә, ԝәки әԝ бьчәрчьрә. ԝ18.11 14 ¶4-5

Чахе Иса гази Пәтрус у Әндраԝьсе мәсигьр кьр, ԝәки бьбьнә «нечʹирванед мәрьва», ԝана «тʹоред хԝә һьштьн» (Мәт. 4:18-20). Фәʹмдари йә, ԝәки гәләкед кӧ рʹастийе педьһʹәсьн, нькарьн хәбата хԝә бьһельн, чьмки ль гора Кʹьтеба Пироз борщдарийа ԝан һәйә (1 Тимтʹ. 5:8). Ле әԝана гәрәке ньһерʹандьна хԝә һьндава пʹәра у һәбуке бьгӧһезьн, у тьште лапи фәрз дайньн сәр щийе пешьн. Дина хԝә бьдьнә мәсәла ԛизькәкә щаһьл бь наве Мариа. Голф бьбу нета әʹмьре ԝе. Әԝе дьхԝәст бьбә професионала навдар у пе ве йәке дәԝләти бә. Паше Мариайе дәстпекьр һинбуна Кʹьтеба Пироз у әԝ ша бу ԝәки рʹастийе али ԝе кьр, кӧ әԝе жийина хԝәда гӧһастьн кьр. Мариайе фәʹм кьр, ԝәки әԝе нькарьбу һʹьш-аԛьле хԝә бьдә һьн сәр тьштед рʹӧһʹани, һьн жи сәр һәбуке (Мәт. 6:24). Әԝе тʹәрьканд нета хԝә, у нәхԝәст голфеда бьбә професионал. Ньһа әԝ ча пешәнг хьзмәт дькә у әʹмьре хԝәрʹа ша дьбә, чьмки гәләк бәхтәԝар буйә у нета ԝейә жийине жи һәйә. ԝ18.11 5 ¶9-10

Иса чахе 30 сали бу ида нәщарти нәдькьр, чьмки заньбу кӧ хьзмәткьрьн шьхӧләкә һе фәрз ә. Әԝи гот, ԝәки бәлакьрьна мьзгинийа Пʹадшатийе жи мәʹни бу, кӧ Хԝәде әԝ шандә сәр әʹрде (Мәт. 20:28; Луԛа 3:23; 4:43). Бона Иса хьзмәти щийе пешьн дьгьрт, у әԝи дьхԝәст ԝәки бона мәрьвед дьн жи ӧса бә (Мәт. 9:35-38). Дьбәкә әм нәщар ниньн, ле әм гьшк жи хьзмәткʹар ьн, йед кӧ мәрьва мьзгинийе һин дькьн. Әԝ шьхӧл гәләк фәрз ә, чьмки Хԝәде нав ԝи шьхӧлида йә, у әм һәвалхәбаткʹаред ԝи нә (1 Корн. 3:9; 2 Корн. 6:4). Әм заньн, ԝәки «хәбәред [Йаһоԝа] тʹәмамийа хԝәва рʹасти нә» (Зәб. 119:159, 160, ДТʹ). Ләма жи әм дьхԝазьн баԝәр бьн, ԝәки әм «хәбәра рʹастийе» рʹаст шьровәдькьн (2 Тимтʹ. 2:15). Бона ве йәке, әм сәр хԝә дьхәбьтьн, ԝәки һе бь һостәти Кʹьтеба Пироз бьдьнә хәбате, чьмки әԝ һащәта мәйә сәрәкә йә, кӧ әм дьдьнә хәбате сәва мәрьва дәрһәԛа Йаһоԝа, Иса у Пʹадшатийе һин кьн. ԝ18.10 11 ¶1-2

Чахе малхе мале чʹәʹв дьдә Иса Мәсиһ, кӧ сәре ԝи йә, жьна ԝирʹа һеса дьбә ԛәдьре ԝи бьгьрә (Әфәс. 5:22-25, 33). Чахе жьн ԛәдьре ԝи бьгьрә, ида ԝе алийе хԝәда бона ԝи хәм бькә у ԝи фәʹм бькә. Чахе де-бав бона һәвдӧ хәм дькьн, әԝана зарʹед хԝәрʹа мәсәла баш дьһельн. Сәва кӧ зарʹ жи бона мәрьва хәм бькьн, де-бав борщдар  ьн ԝана һин кьн. Мәсәлә, әԝана дькарьн зарʹед хԝә һин кьн, ԝәки дор бәре Ода Щьвате нәрʹәвьн. Йан жи чахе тʹәвайи тʹоп дьбьн сәва ԝәʹдә дәрбаз кьн, дькарьн зарʹед хԝәрʹа бежьн, ԝәки рʹе бьдьнә мәзьна сәва пешийе әԝана хԝәрʹа хԝарьне һьлдьн. Пʹайе зарʹа бьдьн чахе ԛәнщийе дькьн, мәсәлә гава бона хушк-бьра дәри вәдькьн. Әԝ йәк ԝе дьл бьдә зарʹа, у әԝана ԝе фәʹм бькьн, ԝәки «хԝәзи ль дайийа, нә кӧ ль стандийа». ԝ18.09 29 ¶5-6

Рʹебәрийед кӧ Иса Мәсиһ, демәк Пʹадше мә, мәрʹа дьдә, ньһа али мә дькьн у ахьрийеда жи ԝе али мә бькьн. Ләма жи ԝәрә әм тʹьме дина хԝә бьдьнә сәр ве шабуне кӧ әм дьстиньн, гава гӧһастьна ԛәбул дькьн у кʹаре дьвиньн. Ԝе керһати бә кӧ һун ԝәʹде ԛӧльхкьрьна тʹәви малбәте, шеԝьр кьн, кӧ һун чь кʹаре дьстиньн жь гӧһастьнед щьватада у хьзмәтийеда. Һәрге әм бир нәкьн, ԝәки гӧһастьнед тʹәшкиләта Йаһоԝада тʹьме мәрʹа кʹаре тиньн, ԝе мәрʹа дьһа һеса бә, кӧ бь шабуне пәй ԝан рʹебәрийа һәрʹьн. Мәсәлә, әм ԛимәт дькьн ве йәке кӧ тʹәшкиләтеда пʹәрә кем хәрщ дьбә, чьмки ида әʹдәбйәтед мә кем тенә нәшьркьрьне, у һе зедә йед әләктроник тенә хәбьтандьне. Әԝ йәк али тʹәшкиләте дькә, сәва нав тʹәмамийа дьнйайеда мьзгинийе бьгьһиньнә һе зедә мәрьва. Ләма жи чьԛас дькарьн дьһа зәʹф бьдьнә хәбате әʹдәбйәтед әләктроник у видео. Бь ԝи щурʹәйи, әме пьштгьрийа ньһерʹандьна Мәсиһ бькьн, кӧ пʹәре тʹәшкиләте бь билани хәрщ бә. Чахе әм бь дьл у щан пәй рʹебәрийа Иса дьчьн, әм бь ве йәке баԝәрийа хушк-бьра ԛәԝи дькьн у йәктийе дькьнә щьвате. ԝ18.10 25-26 ¶17-19

Чахе әм һьндава мәрьвед дьлшкәсти ширьн у нәрм ьн, әм ве бәрдьлийе дьдьнә ԝан, бона кʹижани дьбәкә ԝана дӧа кьрьбу (2 Корн. 1:3-6). Ле йәкә жь хушк-бьра гәләк дәʹԝа нәкьн. Һәрге әм жь хушк-бьра гәләк дәԝа бькьн у һивийе бьн, ԝәки әԝана тʹӧ щар шашийа нәкьн, әме бина хԝә тәнг кьн у ԝе дьле мә бьшке (Ԝаиз 7:21, 22). Бир нәкьн, ԝәки Йаһоԝа жь хьзмәткʹаред хԝә дәԝа накә ԝан тьшта чь кӧ жь ԛәԝата ԝан дәр ә. Һәрге әм чʹәʹв бьдьнә Йаһоԝа, әме бь сәбьр бьн һьндава кемасийед хушк-бьра (Әфәс. 4:2, 32). Һьнге әме нә кӧ дина хԝә бьдьн сәр шашийед ԝан, ле сәр кьред ԝани баш, у пʹайе ԝан бьдьн. Ӧса әԝана ԝе бьшьдьн у дьлгәрм бьн. Чахе әм бь дьле хԝәйи сах пʹайе ԝан бьдьн, нә кӧ ԝана бәрамбәри кәсәки дьн бькьн, әԝана ԝе бьвиньн кӧ хьзмәтийа ԝанда мәʹнийа шабуне һәйә. У әԝ йәк ԝе дьһа кʹаре ԝанрʹа бинә (Галт. 6:4). ԝ18.09 16 ¶16-17

Бона Иса хԝарьна рʹӧһʹани әԝ бу жи, кӧ ԛьрара Хԝәде бинә сери. Ле чь щурʹәйи әԝ мина хԝарьне бу? Чахе әм хԝарьна баш дьхԝьн, әм ләзәте дьстиньн у бәдәна мә ԛәԝи дьбә. Ԝи щурʹәйи, чахе әм ԛьрара Хԝәде тиньн сери, әм шабуне дьстиньн у баԝәрийа мә жи ԛәԝи дьбә. Чахе әм кьред кӧ Йаһоԝа хԝәш тен дькьн, әԝ йәк бь билани йә (Зәб. 107:43). Бь рʹасти әм гәләк кʹаре дьстиньн чахе биланийе дьдьнә кʹьфше. Дәрһәԛа биланийе Кʹьтеба Пироз дьбежә: «Һәр тьште кӧ дьле тә дькʹьшинә ԝәкә ԝе набьн . . . Әԝ бона йед кӧ ԝе [биланийе] дәст тиньн дара жийине йә, йед кӧ ԝе ԛәԝин дьгьрьн бәхтәԝар дьбьн» (Мәтʹлк. 3:13-18). Иса гот: «Һәгәр һун ве йәке заньн, һуне хԝәзьли бьн гава бьԛәдиньн» (Йуһʹн. 13:17). Шагьртед Иса ԝе бәхтәԝар буна, һәрге тʹьме гьлийед ԝи бьанийана сери. У ԝана ӧса жи кьр, әԝана ль горʹа һинкьрьн у мәсәла ԝи дьжитьн. ԝ18.09 4 ¶4-5

Адәм у Һеԝа пешийе Әдәнеда рʹаст ә тʹәне бун, йәкә Хԝәде шьхӧлед ӧса дабу ԝан, кʹижан кӧ ԝе һʹәму мәрьварʹа кʹар бьанийа. Йаһоԝа дӧа ль Адәм у Һеԝайе кьр у гот кӧ ль һәв зедә бьн, әʹрде тʹьжи кьн у хԝәйитийе ле бькьн (Дәстп. 1:28). Әʹфьрандар хԝәха дьфькьри бона һалхԝәшийа әʹфьринед хԝә, у жьн-мере пешьн жи гәрәке бона бәхтәԝарийа зарʹа, йед кӧ гәрәке бьһатана буйине, бьфькьрийана. Әʹрд бь тʹәмами гәрәке бьбуйа щьнәт, сәва кӧ тʹәмамийа зӧрʹәта Адәмрʹа ләзәт бьанийа. Әԝ шьхӧләкә мәзьн ԝана гәрәке тʹәвайи малбәта хԝәва бькьрана. Мер у жьне беԛьсур, гәрәке тʹәви Йаһоԝа һәвкʹари бькьрана, ԝәки ԛьрара ԝи бьанийана сери. Ԝи щурʹәйи әԝана дькарьбун бькʹәтана рʹьһʹәтийа ԝи (Ибрн. 4:11). Бьдьнә бәр чʹәʹве хԝә, кӧ әԝ шьхӧл ԝе шабун у ләзәтәкә ча бьанийа! Һәрге әԝана хԝәһʹьз нибуна, у бона йед дьн хәм кьрана, Йаһоԝа ԝе һе зедә әԝана кʹәрәм кьра. ԝ18.08 18 ¶2; 19-20 ¶8-9

Һәрге кәсәк бӧхдана давежә ԝә, һун чь гәрәке бькьн? Биньн бира хԝә, ԝәки мәрьва дәрһәԛа Иса у Йуһʹәннайе Ньхӧмдар жи тьштед дәрәԝ бәла дькьрьн (Мәт. 11:18, 19). Ле гәло Иса хԝә ча дьда кʹьфше? Әԝи ԝәʹдә у ԛәԝата хԝә тӧ щар сәр ве йәке хәрщ нәдькьр, ԝәки һʹәмушкарʹа избат кә кӧ әԝ йәк дәрәԝ ә. Дәԝса ве йәке, әԝи дина мәрьва дьда сәр избаткьрьна, демәк сәр шьхӧл у һинкьрьнед хԝә. Иса гот: «Сәрԝахти бь әʹмәлед хԝә кʹьфш дьбә кӧ әԝ рʹаст ә» (Мәт. 11:19). Әм дәрсәкә фәрз жь Иса дькарьн һин бьн. Щара мәрьв дькарьн сәр мә тьштед нәрʹаст йан жи тьштед хьраб бежьн. Әԝ йәк дькарә сәр наве мә хьраб һʹӧкӧм кә, ләма жи дьбәкә әм гәләк бьхԝазьн кӧ әԝан дәрәща рʹаст кьн. Ле әм чь гәрәке бькьн? Һәрге кәсәк дәрһәԛа мә тьштед дәрәԝ бәла дькә, әм гәрәке мәрьварʹа пе әʹмьре хԝә нишан кьн, ԝәки әԝ йәк дәрәԝ ә. Чаԝа мәсәла Иса дьдә кʹьфше, бь щурʹе жийина хԝә у кьред хԝә әм дькарьн избат кьн, ԝәки һәр дәрәԝи йан жи бӧхдан кӧ сәр мә дьбежьн, ԛәлп у нәрʹаст ьн. ԝ18.08 6 ¶11-13

Сәрһатийед дәрһәԛа нәгӧдарийа Ԛайин, Сьлеман у Исраелийа, дьдьн кʹьфше кӧ бал һʹәмушка һәйә мәщал ԝәки «тʹобә кьн у . . . вәгәрʹьн» (Кʹар. Шанд. 3:19). Әшкәрә йә, ԝәки Йаһоԝа ләз накʹәвә мә инкʹар кә чахе әм шашийа дькьн. Дәрәща Һарунда әм дьвиньн, ԝәки Йаһоԝа бахшандә ԝи. Иро жи һәрге әм гавәкә нәрʹаст давежьн, Йаһоԝа бь сайа Кʹьтеба Пироз, әʹдәбйәтед сәр һʹиме Кʹьтеба Пироз, у ширәтед жь хушк-бьра мә пешда ширәт дькә. Гава әм ширәтед ԝи у рʹасткьрьна ԝи ԛәбул дькьн, әм дькарьн рʹәʹма ԝи бьстиньн. Ԛәнщийа Йаһоԝайә нәһежа бона нетәке йә (2 Корн. 6:1). Әԝ мәщале дьдә мә, ԝәки «нәпʹакийе у дьлһʹавьжийед дьнйайе инкʹар кьн» (Тито 2:11-14). Һʹәта кӧ әм «ль ве дьне» дьжин, әме рʹасти ԝан дәрәща бен, кʹидәре кӧ амьнийа мә һьндава Йаһоԝа ԝе бе щерʹьбандьне. Ләма жи ԝәрә әм һәр гав алийе Йаһоԝа бьгьрьн. ԝ18.07 21 ¶20-21

Ча әм дькарьн нәкʹәвьнә һʹәйра ве йәке, ԝәки әԝ дьнйа мә ԛәбул кә, ле дәԝсе ԛәбулкьрьна Йаһоԝа бьгәрʹьн? Әм гәрәке бир нәкьн дӧ тьштед фәрз. Йа пешьн, Йаһоԝа тʹьме нас дькә у ԛимәт дькә ԝана, йед кӧ бь амьни жерʹа хьзмәт дькьн (Ибрн. 6:10; 11:6). Бәле, әԝ гәләк ԛимәт дькә һәр хьзмәткʹарәки хԝә, у әԝ сәр «нәһәԛийе» нинә ԝәки хәм нәкә бона мәрьвед кӧ жерʹа амьн ьн. Чʹәʹве ԝи «сәр рʹийа рʹаста йә» у әԝ занә чаԝа ԝана жь щерʹьбандьна хьлаз кә (Зәб. 1:6; 2 Пәт. 2:9). Йа дӧда, Йаһоԝа дькарә ԛәбулкьрьна хԝә мәрʹа ӧса бьдә кʹьфше, кӧ тʹӧ щар әм нә жи һивийе бун. Мәрьвед кӧ сәва ве йәке ԛәнщийе дькьн ԝәки йед дьн бьвиньн, ԝе жь Йаһоԝа хәлате нәстиньн. Ле чьрʹа? Чьмки әԝана бь тʹәмами һәԛе хԝә дьстиньн (Мәт. 6:1-5). Ле Иса гот кӧ Баве ԝи «дьзива . . . дьбинә» ԝана, йед кӧ бона кьред хԝәйә ԛәнщ, һӧрмәт у пʹайи нәстандьнә. Әԝ кьред ԝан дьвинә у ԝе һәр йәкирʹа һәԛе ԝи бьдә. ԝ18.07 9 ¶8, 10

Пәтрус тʹәвһәв бу у дәстпекьр бьфькьрә, кӧ әв дәнг жерʹа чь дьхԝәст бьгота. Һәма ве дәме, ԛасьдед Корнелйойе һатьн бал ԝи. Пәтрус дит кӧ әԝ йәк рʹебәрийа рʹӧһʹе пироз ә, у ләма тʹәви ԛасьда чу мала Корнелйо. Һәрге Пәтрус анәгори дитьна чʹәʹвед хԝә диԝан бькьра, әԝ ԝе тӧ щар нәкʹәта мала Корнелйо, чьмки Щьһу нәдькʹәтьнә мала мьләтед нәщьһу. Ле чьрʹа Пәтрус әԝ ньһерʹандьн, кʹижан кӧ кʹур һʹьше ԝида рʹуньштьбу, гӧһаст? Сәр Пәтрус гәләк һʹӧкӧм бу хәԝн-хәйал у рʹебәри кӧ әԝи бь сайа рʹӧһʹе пироз станд. Чахе Корнелйо дәрһәԛа хԝә Пәтрусрʹа гьли кьр, Пәтрус бешьк фәʹм кьр һәр тьшт, у гот: «Әз ньһа фәʹм дькьм, ԝәки Хԝәде рʹасти жи фьрԛийе накә нава мьләта. Ле жь нав һәр мьләтида, йе кӧ жь ԝи хоф дькә у рʹастийе дькә ль ԝи ԛәбул ә» (Кʹар. Шанд. 10:34, 35). Әԝ ньһерʹандьна тʹәзә тьштәки мәхсус бу бона Пәтрус. ԝ18.08 9 ¶3-4

Бәле, мәрʹа нә зор ә хԝә жь ԝан тьшта дур бьгьрьн, кʹижан кӧ бәр чʹәʹве Хԝәде рʹәш ьн. Ле һәнә тьштед ӧса, дәрһәԛа кʹижана Кʹьтеба Пирозда тʹәмийа конкрет тʹӧнә. Һьнге әм ча дькарьн тедәрхьн кӧ ԝе ча Хԝәде хԝәш бе? Ве дәрәщеда исафа пе Кʹьтеба Пироз һинкьри, дькарә али мә бькә сафикьрьна билани бькьн. Йаһоԝа жь һʹьзкьрьне мәрʹа принсип данә, кʹижан кӧ рʹебәрийе исафа мә дькьн. Әԝ дьбежә: «Әз Йаһоԝа, Хԝәдайе тә мә, кʹижан кӧ тьштед ԛәнщ тә һин дькә у ве рʹерʹа тә дьбә, ль сәр кʹижани тӧ гәрәке һәрʹи» (Иша. 48:17, 18, ДТʹ). Чахе әм пе һʹьш-аԛьл у дьле хԝә сәр принсипед Хԝәде кур дьфькьрьн, әԝ йәк али мә дькә сафикьрьнед билани бькьн. Принсип әԝ һәйә рʹастийа сәрәкә кӧ рʹебәрийе фькьред мә дькә, у али мә дькә сафикьрьнед рʹаст бькьн. Чахе әм принсипа заньн, әԝ йәк али мә дькә ньһерʹандьна Ԛанундар, демәк Йаһоԝа фәʹм кьн, у ԝан мәʹнийа, кӧ чьрʹа әԝи әԝ ԛанун данә мә. ԝ18.06 17 ¶5; 18 ¶8-10

Пьштгьред Һеродәс, кӧ алийе политикайеда пьштгьрийа ԝи дькьрьн, дьфькьрин кӧ һәрге Иса бежә, ԝәки нәлазьм ә хәрщ бьдьн, һьнге ԝе ԝи нәһәԛ кьн, кӧ әԝ дьжмьне Империйа Рʹоме йә. Ле һәрге Иса бежә ԝәки гәрәке хәрщ бьдьн, мәрьв ида ԝе пәй ԝи нәчьн. Иса ве пьрседа гәләк фәсал бу, сәва тʹәвнәбуйине хԝәй кә. Әԝи заньбу ԝәки бона хәрщгьра корупсийа тьштәки нормал ә. Ле әԝи нәдьхԝәст пәй ԝе йәке кʹәвә. Дәԝсе әԝи дина хԝә да сәр тьштәки дьһа фәрз, демәк сәр Пʹадшатийа Хԝәде кʹижан кӧ ԝе һʹәму проблема сафи кә. Бь ве йәке, әԝи мәсәләкә баш һишт бона һʹәму шагьртед хԝә. Әԝана гәрәке политикайеда алийе тӧ кәси нәгьрьн, һәрге жи һʹәсаб дькьн кӧ кәсәк жь ԝана рʹаст у һәԛ ә. Мәсиһи һʹьш-аԛьле хԝә дьдьнә сәр Пʹадшатийа Хԝәде у сәр һәԛийа ԝи. Ләма жи әԝана нә тʹәви шьхӧле политика дьбьн у нә жи мьԛабьли ԝан дьчьн, у һәла һе хәбәрданеда жи тӧ кәси нәһәԛ накьн (Мәт. 6:33). Гәләк Шәʹдед Йаһоԝа, кʹижан нав шьхӧле политикайеда бун, әв шьхӧле хԝә һиштьн. ԝ18.06 6 ¶9-11

Хенщи тʹәлька бенамусийе, дьԛәԝьмә Шәйтʹан ӧса жи мьлйакʹәтед нәамьнрʹа соз да, кӧ әԝана ԝе һʹӧкӧмтийе бькьн сәр һʹәму мәрьва. Нета ԝи дьбәкә әԝ бу, ԝәки рʹе бьгьрә сәва пʹехәмбәртийа дәрһәԛа һатьна зӧрәта создайи, нәйе сери (Дәстп. 3:15). Чь жи һәбә, йәкә Йаһоԝа әԝ һʹәму нетед Шәйтʹан у мьлйакʹәтед рʹабәр бош-бәтал кьр, чахе Селав ани сәр дьне. Тʹӧ щар бир нәкьн, кӧ тʹәлькед бенамусийе у хԝәһʹьзийе гәләк ԛәԝи нә. Мьлйакʹәтед кӧ пьшта Шәйтʹан гьртьн, пешийе сәр әзмана гәләк сала кʹеләка Хԝәде бун, ле йәкә гәләк жь ԝана нав хԝәда хԝәстьнед хьраб пешда анин. Һәрге мьлйакʹәт кʹәтьнә ве тʹәльке, илаһи әм гәрәке чьԛас фәсал бьн, ԝәки хԝәстьнед хьраб дьле мәда кʹокед хԝә нәдьн. Бәле, фьрԛи тʹӧнә әм чьԛас сала Йаһоԝарʹа хьзмәт дькьн, йәкә әм гәрәке тʹьме мьԛати дьле хԝә бьн (1 Корн. 10:12). Гәләк фәрз ә әм дьле хԝә леколин бькьн, тʹәрка фькьред бенамуси бькьн, у жь хԝәһʹьзийе у ԛӧрʹәбуне дур бьн (Галт. 5:26; Колс. 3:5). ԝ18.05 25 ¶11-12

Паԝлос бәрхԝә дькʹәт бона Щьһуйед кӧ мьзгинийа Пʹадшатийе ԛәбул нәдькьрьн. Ле йәкә ԝи чахи жи әԝи тʹәрька ԝан нәдьда. Дина хԝә бьдьне, әԝи дәрһәԛа ԝан Щьһуйа чь гот: «Дӧа у хԝәстьна дьле мьн жь Хԝәде бона хьлазбуна Исраеле йә. Әз шәʹде ԝана мә, кӧ әԝ һьндава Хԝәдеда хԝәйихирәт ьн, ле әв йәк бе занәбун ә» (Рʹом. 10:1, 2). Паԝлос шьровәкьр ԝәки әԝ бәрдәԝам дькә Щьһуйарʹа мьзгинийе бәла кә, чьмки әԝ «хԝәстьна дьле» ԝи бу. Паԝлос бь дьл у щан дьхԝәст, ԝәки әԝ Щьһу хьлаз бьн (Рʹом. 11:13, 14). Әԝи дӧада лавайа Хԝәде дькьр сәва әԝ али ԝи бькә, ԝәки Щьһу мьзгинийа Пʹадшатийе ԛәбул кьн. Паԝлос дәрһәԛа ван Щьһуйа гот: «Әԝ һьндава Хԝәдеда хԝәйихирәт ьн». Бәле, Паԝлос нав мәрьвада тьштед баш дьдит у тʹәхмин дькьр кӧ әԝана дькарьн бьбьнә хьзмәткʹаред Хԝәдейи хирәт, чаԝа әԝ хԝәха бу. ԝ18.05 13 ¶4; 15-16 ¶13-14

Һәр кәс жь мә гәрәке дина хԝә бьдә һʹәԝщед хушк-бьра. Паԝлос ширәт да Мәсиһийед Ибрани: «Мьлед хԝәйә сьстбуйи у ԛӧдуме чокед хԝәйә бе тʹаԛәт бьшьдиньн у ньгед хԝә рʹийа рʹастда бавежьн, кӧ йе дькӧлә һол нәбә, ле сәрда ԛәнщ бә» (Ибрн. 12:12, 13). Һәр кәс жь мә, ӧса жи щаһьл дькарьн пе гьлийа һәвдӧ ԛәԝи кьн у бьшьдиньн. Паԝлос ширәтәкә ӧса да: «Аԝа һәгәр тʹәвбуна ԝәйә тʹәви Мәсиһ бина бәр ԝә йә, һәгәр һʹьзкьрьна ԝи дьл дьдә бәр ԝә, һәгәр рʹӧһʹе пироз ԝә дькә йәк, һәгәр дьлшәԝати у рʹәʹма ԝә һәйә, әшԛа дьле мьн бь тʹьфаԛа хԝә һун бьгьһиньнә сери: Бьра әԝ һʹьзкьрьна нава ԝәда бә у сәр нет у фькьрәке бьн. Тьштәки бь һәврʹькʹийе нәкьн у ль наве хԝә нәгәрʹьн, ле жь ԝә һәр йәк бь мьлуктийе һәвале хԝә сәр хԝәрʹа бьгьрә. Тʹәне ль кʹара хԝә нәгәрʹьн, ле бьра һәр кәс ль кʹара һәвале хԝә жи бьгәрʹә» (Фили. 2:1-4). ԝ18.04 22 ¶10; 23 ¶12

Чахе Йаһоԝа бь сайа Иса мә жь хӧламтийа гӧнә у мьрьне аза кьр, нета ԝи әԝ бу, кӧ паше әм ида әʹмьре хԝә тʹәсмили Ԝи кьн, демәк бьжин «чаԝа хӧламед Хԝәде». Йа лапә баш кӧ чаԝа әм азайа хԝә дькарьн бьдьнә хәбате әԝ ә, һәрге әм һʹьш-аԛьле хԝә бь тʹәмами дайньн сәр нетед рʹӧһʹани, демәк сәр хьзмәтийе. Ԝи щурʹәйи әме нәбьнә хӧламед хԝәстьнед нәрʹаст у нәкʹәвьнә пәй нетед ве дьнйайе (Галт. 5:16). Дина хԝә бьдьнә мәсәла Нӧһ у малбәта ԝи. Әԝана дьнйакә гәләк зӧлм у хьрабда дьжитьн, ле ԝана тӧ щар чʹәʹв нәдьданә мәрьвед дор бәре хԝә. Чьрʹа? Чьмки әԝана бь тʹәмами нав шьхӧле Йаһоԝада бун кӧ әԝи ԝанрʹа дабу, демәк гәми ава дькьрьн, хԝарьн тʹоп дькьрьн һьн бона хԝә һьн жи бона һʹәйԝана, у дәрһәԛа Селаве мәрьварʹа әʹлам дькьрьн. «Нӧһ һәр тьшт кьр, Хԝәде чаԝа тʹәми дабу ԝи, әԝи ӧса жи кьр» (Дәстп. 6:22). Ле ахьрийа ве йәке чь бу? Нӧһ малбәта хԝәва жь кʹӧтакьрьна ԝе дьнйайе хьлаз бун (Ибрн. 11:7). ԝ18.04 10 ¶8; 11 ¶11-12

Шәйтʹан у щьн религийед ԛәлп у система кʹомерси дьдьнә хәбате, сәва «тʹәмамийа дьне» бьхальфиньн (Әʹйан. 12:9). Шәйтʹан дәрһәԛа Йаһоԝа бь религийед ԛәлп дәрәԝа бәла дькә. Хенщи ве йәке, Мире-щьна ӧса дькә ԝәки мәрьв наве Хԝәде бир кьн (Йерәм. 23:26, 27). Ләма жи гәләк мәрьвед дьлсах дьфькьрьн, ԝәки әԝана Хԝәде дьһʹәбиньн, ле бь рʹасти щьна дьһʹәбиньн (1 Корн. 10:20; 2 Корн. 11:13-15). Шәйтʹан ӧса жи бь сайа система комерси тьштед ԛәлп бәла дькә. Мәсәлә, әԝ систем мәрьва һин дькә, ԝәки әԝана ԝе бәхтәԝар бьн һәрге пәй пʹәра кʹәвьн у гәләк һәбуке хԝәрʹа тʹоп кьн (Мәтʹлк. 18:11). Әԝед кӧ ве дәрәԝийе баԝәр дькьн, әʹмьре хԝәда дьбьнә хӧламед «һәбуке», нә кӧ хӧламед Хԝәде (Мәт. 6:24). Ахьрийеда, һʹьзкьрьна ԝанә һьндава һәбуке, дькарә һʹьзкьрьна ԝанә һьндава Хԝәде бьхәньԛинә (Мәт. 13:22; 1 Йуһʹн. 2:15, 16). ԝ18.05 23 ¶6-7