Тʹәбах

Сәр щьвата әм тиньн бира хԝә, кӧ Йаһоԝа у Иса бона мә чь кьрьн. Жь рʹазибуне әм дьхԝазьн әʹмьре хԝәда һәр рʹож чʹәʹв бьдьнә Иса (2 Корн. 5:14, 15). Дьле мә бь рʹазибуне тʹьжә дьбә у әм һелан дьбьн пәсьна бьдьнә Йаһоԝа бона ԝе кʹьрʹине, кӧ әԝи бона мә да. У щурʹәки кӧ ча әм дькарьн һӧрмәте бьдьнә ԝи, әԝ ә, чахе әм щьватеда щаба хԝә дьдьн. Әм һʹьзкьрьна хԝә һьндава Йаһоԝа у Иса дьдьнә кʹьфше, чахе һазьр ьн ԛӧрбана бькьн бона ԝан. Гәләк щар әм ԛӧрбана дькьн, сәва һәрʹьнә щьвате. Гәләк щьват хьлазийа рʹожа хәбате дәрбаз дьбьн, гава әм ида ԝәстийайи нә. Ле щьвата дьн шәмийе-ләʹде дәрбаз дьбә, чахе мәрьв һеса дьбьн. Гәло Йаһоԝа дьвинә ԝәки әм һьнге жи тенә щьвата, гава ԝәстийайи нә? Бәле! Бь рʹасти, Йаһоԝа гәләк ԛимәт дькә гава әм һʹьзкьрьна хԝә жерʹа дьдьнә кʹьфше бь ве йәке, кӧ һʹәму тьшти дькьн сәва бенә щьвате, һәрге жи мәрʹа чәтьн ә (Марԛ. 12:41-44). ԝ19.01 29 ¶12-13

Иса жи мина мәрьвед дьн рʹасти чәтьнайа дьһат. Мәсәлә, ча те кʹьфше Иса малбәтәкә нәдәԝләтида мәзьн бу. Тʹәви баве хԝә Усьв, әԝ һин бу кӧ хәбата гьран бькә (Мәт. 13:55; Марԛ. 6:3). Ӧса жи, ча те кʹьфше Усьв мьр һьнә ԝәʹдә пешийа дәстпека хьзмәткьрьна Иса. Ләма жи Иса ԝе һаш пе һәбуйа, кӧ дәрде мьрьне ешәкә чьԛас мәзьн тинә. У Иса заньбу кӧ чьԛас чәтьн ә чахе баԝәрийа нәфәра, жь баԝәрийа тә щӧдә дьбә (Йуһʹн. 7:5). Әԝ һʹәму дәрәщә али Иса кьрьн, ԝәки фәʹм бькә чәтьнайи у һʹале мәрьва. Дьлшәԝатийа Иса илаһи һьнге әшкәрә дьһатә кʹьфше, чахе әԝи кʹәрәмәт дькьрьн. Иса әԝ кʹәрәмәт дькьрьн нә сәва ве йәке кӧ әԝ борщдар бу, ле чьмки әԝи гӧне хԝә мәрьва дьани, йед кӧ кӧл-дәрд дькʹьшандьн (Мәт. 20:29-34; Марԛ. 1:40-42). Дьле Иса бона мәрьва дьшәԝьти у ләма әԝи дьхԝәст али ԝан бькә (Марԛ. 7:32-35; Луԛа 7:12-15). ԝ19.03 16 ¶10-11

Евара пашьн йа жийина Иса сәр әʹрде бу. Бьдьнә бәр чʹәʹве хԝә, ве еваре Иса стресәкә чада бу. Әԝ гәрәке һʹәта мьрьне бь тʹәмами амьн бьма, чьмки ахьрийа инсанәте ԝива гьредайи бу (Рʹом. 5:18, 19). Ле йа лапә фәрз, кьред ԝи ԝе сәр наве Баве ԝи һʹӧкӧм кьрана (Иб. 2:4). У чахе әԝи тʹәви шандийед хԝә, демәк һәвалед хԝәйи незик, шива пашьн дьхԝар, «дәʹԝ пешда һат кӧ жь нав ԝанда кʹижан ԝе йе һәри мәзьн бе һʹәсабе». Ле дина хԝә бьдьне, ԝәки әԝ нә жи һерс кʹәт, дәԝсе әԝи бь нәрми әԝана ширәт кьрьн. Әԝи ԝанрʹа шьровәкьр, кӧ әԝана гәрәке ньһерʹандьна хԝә бьгӧһезьн. У паши ве йәке, әԝи пʹайе ԝан һәвалед хԝә да, ԝәки бь амьни пьштгьрийа ԝи дькьрьн (Луԛа 22:24-28; Йуһʹн. 13:1-5, 12-15). Ԝәʹде стресе әм гәрәке чʹәʹв бьдьнә Иса, ԝәки рʹьһʹәт бьминьн у бир нәкьн кӧ әм гьшк жи щара тьштед ӧса дьбежьн йан дькьн, кӧ мәрьвед дьн әʹщьз дькьн (Мәтʹлк. 12:18; Аԛуб 3:2, 5). У әм гәрәке сәр хԝә бьхәбьтьн, ԝәки бона һʹӧнӧред баш пʹайе мәрьва бьдьн (Әфәс. 4:29). ԝ19.02 11-12 ¶16-17

Ԛануна Муса нәдьһишт ԝәки бӧхдана бавежьнә мәрьва. У изьна мәрьв һәбу бьзаньбуйа кʹе бӧхдан авитийә ԝи (Ԛан. Дщр. 19:16-19; 25:1). Әʹсә гәрәке лап кем дӧ шәʹдә һәбуна, ԝәки мәрьв бьһата диԝанкьрьне (Ԛан. Дщр. 17:6; 19:15). Ле бәʹса хәбәре Исраелики хьраби кьр, у тʹәне шәʹдәки әԝ дит, һьнге ԝе ча буйа? Әԝ тʹӧ щар гәрәке нәфькьрийа, кӧ ԝе бона кьре хԝә нәйе щәзакьрьне, чьмки Йаһоԝа дитьбу әԝи чь кьр. Йаһоԝа пе мәсәла хԝә нишан дькә, ԝәки әԝ тʹьме һәԛийе дькә. Әԝ ԝана кʹәрәм дькә йед кӧ бь амьни ԛанун у принсипед ԝи тиньн сери, ле йед кӧ һʹӧкӧме хԝә хьрабийеда у бона кʹара хԝә дьдьнә хәбате, ԝана щәза дькә (2 Сам. 22:21-23; Һәзԛл. 9:9, 10). Һьнәк хьрабийе дькьн, у ӧса те кʹьфше кӧ әԝана найенә щәзакьрьне, ле чахе Йаһоԝа сафи дькә кӧ ида ԝәʹдә йә, әԝ әʹсә диԝана ԝан дькә (Мәтʹлк. 28:13). У һәрге әԝана гӧне хԝә нәйньн рʹуйе хԝә, ԝе зутьрәке фәʹм бькьн кӧ «тьштәки тьрсәһез ә кӧ мәрьв бькʹәвә дәсте Хԝәдайе жиндар» (Ибрн. 10:30, 31, ИМ). ԝ19.02 23-24 ¶20-21

Муса рʹебәри бал Йаһоԝа дьгʹәрийа. Кʹьтеба Пироз дьбежә ԝәки Муса «әԝе кӧ нәдьһатә кʹьфше дьдит у сәр йа хԝә ма» (Ибрн. 11:24-27). Чахе Исраели жь Мьсьре дәркʹәтьн, дӧ мәһ жи дәрбаз нәбу, пешийа кӧ әԝана бьгьһиштана Чʹийайе Синайе, чәтьнайик пешда һат. Щьмәʹте дәстпекьр бькә кӧтә-кӧт, чьмки ав тʹӧнәбу. Әԝана мьԛабьли Муса рʹабун, у һʹал ӧса хьраб бу кӧ һерса ԝи рʹабу у әԝи готә Йаһоԝа: «Әз хԝә ль ве щьмәʹте чаԝа бькьм? Һьндьк майә кӧ мьн бьдьнә ль бәр кәвьра!» (Дәрк. 17:4) Йаһоԝа щаба Муса да бь ԝе йәке, кӧ рʹебәрийа зәлал да ԝи. Муса Һоребеда пе шьвдара хԝә гәрәке ԛәйе хьста, демәк зьнар хьста, у паше жь ԛәйе гәрәке ав бькʹьшийа. Кʹьтеба Пирозда әм дьхуньн: «Муса ль бәр чʹәʹве рʹуспийед Исраел ӧса кьр». Ав кʹьшийа, у Исраелийа ав тʹер вәхԝарьн у ӧса әԝ чәтьнайи сафи бу (Дәркʹ. 17:5, 6). ԝ18.07 13 ¶4-5

Йаһоԝа ӧса жи бь сайа щьвате пе һʹьзкьрьна хԝә мә ԛәԝи дькә. Һәрге әм хушк-бьред хԝә һʹьз дькьн у ԛәԝи дькьн, һьн рʹӧһʹанида һьн жи емосийалида, ӧса әм избат дькьн һʹьзкьрьна хԝә һьндава Йаһоԝа (1 Йуһʹн. 4:19-21). Паԝлосе шанди ширәт да Мәсиһийа: «Дьл бьдьнә һәв у аликʹарийа һәвдӧ бькьн, чаԝа һун дькьн жи» (1 Тʹеслн. 5:11). Бәле, щьватеда нә кӧ тʹәне рʹуспи, ле гьшк жи гәрәке чʹәʹв бьдьнә Йаһоԝа у Иса, кӧ дьл бьдьнә хушк-бьра у ԝана ԛәԝи кьн (Рʹом. 15:1, 2). Һьнә хушк-бьред щьватеда, йед кӧ депресийеда ньн у гәләк емосийали нә, дьбәкә һʹәԝще аликʹарийа һʹәким ьн (Луԛа 5:31). Рʹуспи у хушк-бьред дьн фәʹм дькьн, ԝәки әԝана мина һʹәким нькарьн сьһʹәт-ԛәԝата ԝан хушк-бьра ԛәнщ кьн. Ле йәкә әԝана дькарьн аликʹарийа мәзьн бьдьн ве йәкеда, кӧ дьл бьдьнә бәр йед кӧ депресийеда ньн, кери кʹәтийа бен у һьндава һʹәмуйада бь сәбьр бьн (1 Тʹеслн. 5:14). ԝ18.09 14 ¶10-11

Әме баԝәрийа хԝә һьндава Йаһоԝа ԛәԝи кьн, чахе дәрһәԛа ԝи һе зедә пебьһʹәсьн у ԝи һе рʹьнд нас бькьн. Тʹәне бь сайа хԝәндьна Кʹьтеба Пироз у фькьрандьна сәр, әм дькарьн бь рʹасти ԝи нас кьн. Кʹьтеба Пирозда те гьликьрьне кӧ Йаһоԝа ча ԝәʹде бәре хьзмәткʹаред хԝә хьлаз дькьр. Кьред ԝийи бәре баԝәрийа мә ԛәԝи дькьн ԝе йәкеда, кӧ әԝе мә хԝәй кә. Ԝәрә дина хԝә бьдьнә ԝан гьлийед хԝәш, кӧ Ишайа ньвиси, ԝәки Йаһоԝа чаԝа мә хԝәй дькә. Ишайа, Йаһоԝа бәрамбәри шьван дькә, ле хьзмәткʹаред Хԝәде бәрамбәри бәрхька дькә. Әԝ дәрһәԛа Йаһоԝа дьбежә: «Бь баске хԝә ԝе бәрхькан бьщьвинә у . . . бьчʹеринә» (Иша. 40:11). Чахе әм ԛәԝата баскед Йаһоԝа тʹәхмин дькьн, әм тьштәки натьрсьн у дьлрʹьһʹәт ьн. Сәва һун ԝәʹде тәнгасийа дьлрʹьһʹәтийе ӧнда нәкьн, бьфькьрьн сәр ԝан гьлийед дьлгәрм жь рʹеза иройин. Әԝ гьли ԝе ԝәʹде тәнгасийед кӧ ахьрийеда һун рʹасти бен, ԝә ԛәԝи кьн. ԝ19.01 7 ¶17-18

Чь нетед ԝәйә рʹӧһʹани һәнә? Мәсәлә, дьбәкә ԝә хԝәрʹа нет данийә һәр рʹож Кʹьтеба Пироз бьхуньн, йан жи дьбәкә һун дьхԝазьн һе рʹьнд щьватеда щаба хԝә бьдьн у пе дәрса дәркʹәвьн. Һун ча хԝә тʹәхмин дькьн гава дьвиньн йан жи кәсәки дьн ԝәрʹа дьбежә, ԝәки ԝә чь нет дайә пешийа хԝә, һун ве йәкеда пешда чунә? Бешьк, һун гәләк ша дьбьн! Бәле, һун гәрәке ша бьн, чьмки һәла һе ԝан тьштед бьчʹукда жи һун хԝәстьна Йаһоԝа датиньн щийе пешьн, у бь ве йәке чʹәʹв дьдьнә Иса (Мәтʹлк. 27:11). Чахе һʹьш-аԛьле ԝә сәр хьзмәтийа Йаһоԝа йә, һун шьхӧле ӧса дькьн, кʹижан кӧ ԝә бәхтәԝар дькә у шабуне ԝәрʹа тинә. Әԝ шьхӧле ԝә тʹӧ щар бадиһәԝа нинә. Паԝлос ньвиси: «Ԛәԝин бьминьн, жь щийе хԝә нәһәжьн, һәр гав шьхӧле Хӧданда пешда һәрʹьн, бьзаньбьн хәбата ԝә бош-бәтал нинә ль бәр Хӧдан» (1 Корн. 15:58). Әԝед кӧ нетед ве дьнйайе датиньн пешийа хԝә, мәсәлә сәва дәԝләти бьн у навдар бьн, бәхтәԝар ниньн. Һәрге жи әԝана гьһиштьнә нетед хԝә, йәкә ахьрийеда дьле ԝан вала йә (Луԛа 9:25). ԝ18.12 22 ¶12-13

Әԝи әԝ гьли дәрһәԛа ԝи ԝәʹдәйи гот, кʹәнге мәрьв сәр әʹрде пе ԛанун у принсипед Хԝәде бьжин (2 Пәт. 3:13). Пʹехәмбәртийа Ишайа 65:22-да те готьне: «Ԝе рʹожед нәтәԝа [щьмәʹта] мьн бьбә мина рʹожед даре». Әԝ гьли тенә һʹәсабе ԝәки мәрьв ԝе бь һʹәзара сала бьжин. Ль гора Әʹйанти 21:1-4, Хԝәде ԝе кʹәрәма сәр инсанәтеда бьбаринә у кʹәрәмәк ԝе әԝ бә, кӧ «иди мьрьне тʹӧнәбә», у мәрьв ԝе Хԝәдерʹа хьзмәт кьн дьнйа ԝийә тʹәзә у һәԛда. Адәм у Һеԝайе Щьнәт ӧнда кьрьн, ле әԝ һʹәта-һʹәтайе нәһатийә ӧндакьрьне, щьнәт ԝе диса һәбә сәр әʹрде. Чаԝа Хԝәде соз дабу, мәрьв сәр әʹрде ԝе бенә кʹәрәмкьрьне. Даԝьд пе рʹебәрийа Хԝәде ньвиси, ԝәки йед мьлук у рʹаст ԝе әʹрде ԝар бьн у һʹәта-һʹәтайе сәр бьжин (Зәб. 37:11). Пʹехәмбәртийед жь кʹьтеба Ишайа жи мәрʹа әйан дькьн, кӧ ԝәʹдәки чьԛас хԝәш һивийа мә йә (Иша. 11:6-9; 35:5-10; 65:21-23). Әԝ ԝәʹдә ԝе бе, чахе созе Иса кӧ әԝи ԛачахирʹа да, бе сери (Луԛа 23:43). Һун жи дькарьн бькʹәвьнә ве Щьнәте. ԝ18.12 7 ¶22-23

Гәло әм бь тʹәмами дькарьн хԝә жь ве дьнйайе дур бьгьрьн? На, әм нькарьн хԝә жь ве дьнйайе бь тʹәмами бьԛәтиньн, йан жи лап дәркʹәвьн (1 Корн. 5:9, 10). Әм нькарьн хԝә жь ве йәке хԝәй кьн илаһи ԝәʹде хьзмәтийе, чьмки дьхԝази нахԝази әм фькьред нәрʹаст у һинкьрьнед ԛәлп дьбьһен. Рʹаст ә әм нькарьн хԝә жь ԝан тьшта бь тʹәмами хԝәй кьн, ле әм гәрәке әԝ фькьред кӧ Хԝәде хԝәш найен, ԛәбул нәкьн у сәр дьшьрмиш нәбьн. Мина Иса, әм гәрәке дәрберʹа инкʹар кьн ԝан фькьра, кʹижан жь Шәйтʹан ьн. Ӧса әме нәкʹәвьнә бәр байе фькьред ве дьнйайе. Мәсәлә, әм гәрәке фәсал бьн кӧ тʹәви кʹе әм һәвалтийе дькьн. Кʹьтеба Пироз пешда ширәте дьдә мә, ԝәки тʹәви ԝан мәрьва һәвалтийе нәкьн, йед кӧ Йаһоԝарʹа хьзмәт накьн, чьмки фькьред ԝан ԝе дәрбази мә бьн (Мәтʹлк. 13:20; 1 Корн. 15:12, 32, 33). Ӧса жи һәрге әм инкʹар дькьн ԝан ԝәʹдәдәрбазкьрьна, кʹидәре теорийа еволусйайе, зорбәти, йан жи бенамуси һәйә, әме пе ԝан фькьред кӧ «мьԛабьли занәбуна Хԝәде» нә, һʹьше хԝә жәрдадайи нәкьн (2 Корн. 10:5). ԝ18.11 21 ¶16-17

Чаԝа Һун дькарьн мьԛәрм рʹийа рʹастийеда һәрʹьн? Чьԛас дәсте ԝә те мәрьвед дьн рʹастийа Кʹьтеба Пироз һин кьн. Ԝи щурʹәйи, шурʹе рʹӧһʹани, демәк «хәбәра Хԝәде» ԝе ԛайим ԝәва бә (Әфәс. 6:17). Һәр кәс жь мә гәрәке чаԝа дәрсдар пешда һәрә, кӧ «хәбәра рʹастийе» рʹаст шьровәкә (2 Тимтʹ. 2:15). Чахе әм али мәрьва дькьн, ԝәки рʹастийе бькʹьрʹьн у тьштед ԛәлп инкʹар кьн, һьнге гьлийед Хԝәде кʹур һʹьш у дьле мәда рʹудьнен. Әԝ йәк мә һелан дькә кӧ бәрдәԝам кьн рʹастийеда һәрʹьн. Йаһоԝа пʹешкʹешәкә гәләк ԛимәт дайә мә, әԝ һәйә рʹасти. Бь сайа ве пʹешкʹеше, һәбунәкә мәзьн бал мә һәйә, әԝ һәйә һәләԛәтийа мә тʹәви Баве мәйи әзмана. Чь жи әԝ һʹәта ньһа мә һин дькә, әԝ тʹәне дәстпебун ә. Хԝәде соз дьдә, ԝәки әме һʹәта-һʹәтайе жь ԝи тьшта һин бьн. Ләма жи ԝәрә әм рʹастийе мина дӧрʹәкә рʹьнд ԛимәт кьн. Бәрдәԝам кьн рʹастийе бькʹьрʹьн у тʹӧ щар нәфьрошьн (Мәтʹлк. 23:23). ԝ18.11 8 ¶2; 12 ¶15-17

Нӧһ мәрьварʹа пешда әʹлам дькьр ԝәки Селав ԝе рʹабә. Дина хԝә бьдьне Иса чь гот: «Чаԝа кӧ ԝан рʹожед бәри тофане мәрьва дьхԝарьн, вәдьхԝарьн, дьзәԝьщин у мер дькьрьн, һʹәта ԝе рʹожа кӧ Нӧһ кʹәтә гәмийе у мәрьв пе нәһʹәсийан, һʹәта кӧ лейи рʹабу у һʹәму жи хәньԛандьн. Һатьна Кӧрʹе Инсан жи ԝе ӧса бә» (Мәт. 24:38, 39). Рʹаст ә гәләк мәрьв әʹламәтийа Нӧһ пьшт гӧһе хԝәва дьавитьн, йәкә әԝи бь амьни бәрдәԝам дькьр әʹламәтийа Хԝәде бәла кә. Иро әм мьзгинийа Пʹадшатийе бәла дькьн, сәва мәрьв пебьһʹәсьн ԛьрара Хԝәде һьндава инсанәте. Әм жи мина Йаһоԝа дьхԝазьн мәрьв гӧһ бьдьнә ве әʹламәтийе у бьжин (Һәзԛл. 18:23). Хенщи ве йәке чахе әм мал бь мал у щийед кӧ гәләк мәрьв һәнә, хьзмәт дькьн, әм мәрьварʹа пешда әʹлам дькьн дәрһәԛа Пʹадшатийа Хԝәде, кʹижан кӧ ԝе бе у ԛьрʹа ве дьнйа хьраб бинә (Һәзԛл. 3:18, 19; Дан. 2:44; Әʹйан. 14:6, 7). ԝ18.05 19 ¶8-9

Һәрге сәрԝеред дәԝләте шьхӧле бәлакьрьна мьзгинийе ԝәлате ԝәда ԛәдәхә дькьн у ԝә дьгьрьн, сәва дәрһәԛа бьра информасийа бежьн, һун чь гәрәке бькьн? Гәло лазьм ә, һун һәр тьшти чь заньн ԝанрʹа бежьн? Иса чь кьр, гава сәрԝере Рʹоме пьрс дьда ԝи? Кʹьтеба Пироз дьбежә ԝәки «ԝәхта һʹьшбуне һәйә у ԝәхта готьне һәйә», у Иса жи әԝ принсип дьда хәбате у щара тьштәки нәдьгот (Ԝаиз 3:1, 7; Мәт. 27:11-14). Һәрге әм бькʹәвьнә ве дәрәще, әм гәрәке сәрԝахт у фәсал бьн, ԝәки бьра нәкьнә ԛәзийе (Мәтʹлк. 10:19; 11:12). Ле һәрге һәвале тәйи незик ә, йан жи мәрьве тә щьватеда гӧнәки гьран кьрийә, у һун заньн дәрһәԛа ве йәке, лазьм ә чь бькьн? Рʹастийе бежә. Тӧ щабдар и рʹуспийарʹа бь тʹәмами рʹастийе бежи у гәрәке тьшта зедә йан кем нәки. Изьна ԝан һәйә, ԝәки бь тʹәмами рʹастийе бьзаньбьн, сәва кӧ паше али ԝи кәсе кӧ гӧнә кьрийә бькьн, ԝәки әԝ һәләԛәтийа хԝәйә баш тʹәви Йаһоԝа вәгәрʹинә (Аԛуб 5:14, 15). ԝ18.10 10 ¶17-18

Чаԝа әм дькарьн һәвдӧ бь һʹьзкьрьне ава бькьн? Гавәк әԝ ә кӧ рʹьнд гӧһ бьдьнә һәв (Аԛуб 1:19). Әԝ йәк бь һʹьзкьрьн ә чахе һун бь дьлшәԝати гӧһ дьдьнә мәрьва. Ԝәʹде хәбәрдане һун дькарьн бь мәʹрифәти пьрса бьдьнә ԝан, сәва кӧ еша ԝан фәʹм кьн. Ԝи щурʹәйи һуне бькарьбьн бәрдьлийе бьдьнә ԝан у ԝана ԛәԝи кьн. Бәшәра ԝәва жи гәрәке бе кʹьфше, кӧ һун бона ԝан хәм дькьн у дьхԝазьн али ԝан бькьн. Һәрге хушк йан бьрак дьхԝазә дьле хԝә ԝәрʹа вәкә у һур бь һур кӧла хԝә ԝәрʹа гьли дькә, бь сәбьр гӧһ бьдьне у гьлийед ԝи нәбьрьн. Ӧса һуне бькарьбьн ԝи һе рʹьнд фәʹм кьн. Ле әԝ ԝе алийе хԝәда итʹбарийа хԝә ԝә бинә у чахе ида һун хәбәр дьн сәва ԝи бьшьдиньн, әԝ жи ԝе бьхԝазә гӧһ бьдә ԝә. Чахе әԝ бьвинә кӧ һун бь рʹасти дькʹәвьнә һʹәйра ԝи, чьмки ԝи һʹьз дькьн, әԝ ԝе гәләк ԛәԝи бә у дьлбинийе бьстинә. ԝ18.09 14 ¶10; 15 ¶13

Һәр кәс ԝәʹдә ча һәԛ дьдә, сәва рʹастийе бькʹьрʹә. Бәле, ԝәʹдә лазьм ә сәва мьзгинийа Пʹадшатийе бьбьһен, Кʹьтеба Пироз у әʹдәбйәтед сәр һʹиме Кʹьтеба Пироз бьхуньн, һинбуна шәхси дәрбаз кьн, һазьр бьн бона щьвате у бен сәр щьвате. Әм гәрәке «дәст бьдьнә бәр ԝәхт», демәк ԝәʹде хԝә кем хәрщ кьн сәр тьштед нәфәрз (Әфәс. 5:15, 16). Ле гәло чьԛас ԝәʹдә мәрʹа лазьм ә, сәва әм занәбуна рʹаст йа һинкьрьнед Кʹьтеба Пирозә сәрәкә ԛазанщ кьн? Әԝ йәк дәрәщед мәва гьредайи йә. Синор тʹӧнә кӧ әм чьԛас дькарьн дәрһәԛа билани, принсип у шьхӧлед Йаһоԝа пебьһʹәсьн (Рʹом. 11:33). Дәрхьстьна «Бьрща Ԛәрәԝьлийе» йа пешьнда, рʹасти бәрамбәри «кӧлирка бьчʹук» дьбу. Ԝедәре дьһатә готьне: «Тʹәне бь ве кӧлиркәкә рʹастийе, тʹер нәбьн. Һәрге тʹәне кӧлиркәк бәс буйа, Хԝәде һе зедә рʹасти ԝе нәда мә. Кӧлиркед дьн бьгәрʹьн, нәсәкьньн һе зедә тʹоп кьн». Һәла һе жи гава әм һʹәта-һʹәтайе бьжин, әме тʹьме һе зедә дәрһәԛа Йаһоԝа пебьһʹәсьн. Ле иро гәләк фәрз ә, ԝәки ԝәʹде хԝә бь билани хәрщ кьн, сәва кӧ чьԛас дькарьн һе зедә рʹастийе бькʹьрʹьн. ԝ18.11 4 ¶7

Малхед мале гәрәке мәсәлә бьн ве йәкеда кӧ хәм бькьн бона нәфәред хԝә. Мәсәлә, әԝана гәрәке тʹәви жьнед хԝә «бь фәʹмдарийе» бьн (1 Пәт. 3:7). Бәле, гәләк фәрз ә мер жьна хԝә фәʹм кә у һʹәԝщед ԝе һьлдә һʹәсаб. Бәʹса хәбәре, мере фәʹмкʹар занә, ԝәки әԝ гәләк тьштада жь жьна хԝә щӧдә дьбә, ле жьна хԝә баштьр нинә (Дәстп. 2:18). Әԝ ӧса жи бона ԝе хәм дькә, фькьред ԝе у һʹале ԝе һьлдьдә һʹәсаб, у һьндава ԝеда бь ԛәдьр у мәʹрифәт ә. Мере фәʹмкʹар ӧса жи ԝе тʹӧ щар хԝә һьндава жьнед дьн нәрʹаст нәдә кʹьфше, чьмки ԝе нәхԝазә дьле жьна хԝә бешинә. Әԝ ԝе тʹӧ щар флирте нәкә тʹәви жьнед дьн у һьндава ԝанда ԝе ӧса бә чаԝа щайиз ә. Әԝ ӧса жи ԝе нә Интернетеда у нә жи малпәра сосйалида ӧса нәкә (Иб. 31:1). Әԝ һәр тьштида ԝе жьна хԝәрʹа амьн бә, нә тʹәне сәва ве йәке кӧ әԝ ле һʹьз дькә, ле чьмки әԝ Хԝәде һʹьз дькә у хьраби бәр чʹәʹве ԝи рʹәш ә (Зәб. 19:14; 97:10). ԝ18.09 29 ¶3-4

Чьрʹа чәтьн ә ԝан тьшта биньн сери, кʹижан кӧ әм жь Хәбәра Хԝәде һин дьбьн? Мәʹник әԝ ә кӧ әм гәрәке шькәсти бьн сәва тьштед рʹаст бькьн. Ле әԝ йәк нәһеса йә, чьмки ԝан «рʹожед ахьрийеда» мәрьвед дор бәре мә «хԝәһʹьз, пʹәрәһʹьз, кʹӧбар, бабах» у «тәмсьст» ьн (2 Тимтʹ. 3:1-3). Әм чаԝа хьзмәткаред Хԝәде заньн, ԝәки әԝ хәйсәт-һʹӧнӧр хьраб ьн, ле йәкә щара мәрʹа дьбәкә бе кʹьфше кӧ мәрьвед ӧса, пешдачуйи нә у бәхтәԝар ьн (Зәб. 37:1; 73:3). Дьбәкә әм һәла һе жи пьрсе бьдьнә хԝә: «Һежа йә ԝәки әз пешийе кʹара мәрьвед майин бьгәрʹьм, дәԝса кӧ кʹара хԝә? Һәрге әз йәки мьлук бьм, ԛә мәрьв ԝе ԛәдьре мьн бьгьрьн?» Һәрге әм фәсал нибьн, у мина ԝе дьнйайе бьбьнә хԝәһʹьз, ӧса һәләԛәтийа мә тʹәви хушк-бьра ԝе хьраб бә, у ида нә жи ԝе бе кʹьфше, ԝәки әм Мәсиһи нә. Ле чахе әм сәрһатийед хьзмәткʹаред амьн, дәрһәԛа кʹижана Кʹьтеба Пирозда те гьликьрьне, леколин бькьн у чʹәʹв бьдьнә ԝан, һьнге әме кʹәрәма бьстиньн. ԝ18.09 3 ¶1

Һʹәта кӧ Йаһоԝа дәстпекьр тьшта бьәʹфьринә, әԝ тʹәнә бу. Паше әԝи хԝәст кӧ пʹешкʹеша жийине бьдә чаԝа әʹфьринед рʹӧһʹани ӧса жи мәрьва. Йаһоԝа, демәк Хԝәдейе хԝәзьли, һʹьз дькә тьштед ԛәнщ бькә (1 Тимтʹ. 1:11; Аԛуб 1:17). У әԝ дьхԝазә ԝәки әм жи бәхтәԝар бьн, ләма мә һин дькә, ԝәки әм мәрʹд бьн (Рʹом. 1:20). Хԝәде мәрьв дьлԛе хԝәда хӧльԛанд (Дәстп. 1:27). Әԝ те һʹәсабе ԝәки әм ӧса һатьнә әʹфьрандьне кӧ дькарьн чʹәʹв бьдьнә һʹӧнӧред ԝи. Сәва кӧ әм бәхтәԝар у дьлша бьн, әм гәрәке чʹәʹв бьдьнә Йаһоԝа кӧ хәм бькьн бона мәрьва у мәрʹд бьн (Фили. 2:3, 4; Аԛуб 1:5). Ле чьрʹа? Чьмки Йаһоԝа бь ԝи һʹӧнӧри әм әʹфьрандьн. Рʹаст ә әм гӧнәкʹар ьн, ле йәкә әм дькарьн чʹәʹв бьдьнә мәрʹданийа Йаһоԝа. Йаһоԝа дьхԝазә ԝәки әм чʹәʹв бьдьнә ԝи, ләма чахе әԝ дьвинә ԝәки әм мәрʹд ьн, дьле ԝи гәләк ша дьбә (Әфәс. 5:1). ԝ18.08 18 ¶1-2; 19 ¶4

Шагьртед Иса нә тʹәне гӧһ дьдьнә Иса, ле ӧса жи гьлийед ԝи тиньн сери. Әԝана «хәмед ве дьнйайева» гьредайи ниньн (Луԛа 21:34). Дәԝсе, әʹмьре ԝанда тʹәмийед Иса щийе гәләк фәрз дьгьрьн, һәла һе жи гава ԝанрʹа зәʹф чәтьн ә. Хушк-бьред мә Йаһоԝарʹа амьн дьминьн, фьрԛи тʹӧнә бькʹәвьнә чь чәтьнайа жи. Чахе әм һәвкʹарийе тʹәви бьред щабдар дькьн, һьнге жи әм нишан дькьн, ԝәки гӧһ дьдьнә Иса (Ибрн. 13:7, 17). Тʹәшкиләта Хԝәде ԝан салед пашԝәхтийеда гәләк гӧһастьна дькә. Мәсәлә, һащәтед у методед тʹәзә хьзмәтийеда тенә хәбьтандьне, щьвата хьзмәтийе ида бь щурʹе тʹәзә те дәрбазкьрьне, у авакьрьн, тʹәзәкьрьн у хԝәйкьрьна Одед Щьвата, һатьнә гӧһастьне. Әм гәләк рʹази нә бона ԝан рʹебәрийед кӧ әм ԝәʹдәда дьстиньн. Әм гәрәке дӧдьли нәбьн кӧ Йаһоԝа ԝе мә кʹәрәм кә, һәрге әм пәй рʹебәрийа тʹәшкиләта ԝи дьчьн. ԝ19.03 10-11 ¶11-12

Бь рʹасти сәрһати йан жи әʹламәти кӧ нивида рʹаст ә, әм нькарьн бежьн ԝәки әԝ сәд сәләфи рʹаст ә. Дина хԝә бьдьне кӧ ԝәʹде Йешу чь ԛәԝьми тʹәви Исраелийа, йед кӧ дьжитьн жь чʹәме Урдӧне алийе рʹоавайе (Йешу 22:9-34). Әԝана бьһистьн ԝәки Исраелийед кӧ алийе рʹоһьлате дьжитьн, хԝәрʹа горигәһәкә мәзьн чекьрьнә. Әԝ йәк рʹасти ӧса бу. Ле Исраелийед кӧ алийе рʹоавайе дьжитьн, фькьрин, ԝәки әԝ Исраели мьԛабьли Йаһоԝа рʹабунә кӧ әԝ горигәһ чекьрьнә (Йешу 22:9-12). Ле чьԛас баш ә, ԝәки пешийа ве йәке ԝана чәнд меред бь итʹбар шандьн, сәва пебьһʹәсьн һәла рʹасти ӧса нә йан на. Ле әԝ мер чь пеһʹәсийан? Исраели әԝ горигәһ чекьрьбун нә кӧ сәва ԛӧрбана биньн, ле чаԝа биранин, сәва ахьрийеда гьшк бьзаньбьн, ԝәки әԝана жи хьзмәткʹаред Йаһоԝа бун. Бьдьнә бәр чʹәʹве хԝә, ԝәки әԝ Исраели чьԛас ша бун, кӧ мьԛабьли бьред хԝә нәчун сәр һʹиме әʹламәтийа нә тʹәмам, ле пеһʹәсийан чь бу у ча бу. ԝ18.08 5 ¶9-10

Жь гьлийед Паԝлос те кʹьфше, ԝәки һәла һе хьзмәткʹаред рʹаст жи дькарьн кьред хьраб бькьн. Әԝед кӧ дькʹәвьнә ве тʹәльке дьбәкә дьфькьрьн, ԝәки Йаһоԝа ԝана диса жи ԛәбул дькә. Ле һәрге мәрьв тʹәне дьхԝазә бьбә досте Йаһоԝа йан жи дьбежә йанчь әԝ жерʹа амьн ә, әԝ найе һʹәсабе ԝәки Йаһоԝа ԝи бь рʹасти ԛәбул дькә (1 Корн. 10:1-5). Чаԝа Исраели бәрхԝә кʹәтьн чахе дитьн кӧ Муса дәрәнги дькʹәвә, у жь Синайе бәржер набә, иро жи Мәсиһи дькарьн бина хԝә тәнг кьн, чьмки ԝана тʹьре рʹожа диԝана Йаһоԝа у дьнйа тʹәзә, дәрәнги дькʹәвә. Әԝана дьбәкә бьфькьрьн жи, ԝәки созе Йаһоԝа һе гәләк дур ә, йан жи әԝ созәки нәбуйи йә. Һәрге әм мьԛати хԝә нәбьн у фькьред хԝә рʹаст нәкьн, әме ида хԝәстьнед хԝәйә бәдәне сәр ԛьрара Йаһоԝарʹа бьгьрьн. Паше, һеди-һеди әме жь Йаһоԝа дур кʹәвьн у тьштед ӧса бькьн, кʹижан кӧ дьбәкә ԛә һʹьше мәрʹа жи дәрбаз нәдьбу. ԝ18.07 21 ¶17-18

Чахе Йаһоԝа мә нас дькә, әм дькарьн гәләк кʹәрәма бьстиньн. Ле әм чь гәрәке бькьн ԝәки алийе Йаһоԝада бенә наскьрьне? Әм гәрәке ԝи һʹьз кьн у әʹмьре хԝә тʹәсмили ԝи бькьн (1 Корн. 8:3). Ле әм гәрәке фәсал бьн ԝәки һәләԛәтийа хԝә тʹәви Баве хԝәйи әʹзмана ӧнда нәкьн. Әм мина Мәсиһийед Галати, кʹижанарʹа кӧ Паԝлос ньвиси, гәрәке хԝә хԝәй кьн жь «сьхьред ве дьнейә беԛәԝатә нә тʹӧ тʹьшт», у ӧса жи жь навдари у ԛәбулкьрьна ве дьнйайе (Галт. 4:9). Әԝ Мәсиһийед ԛьрʹна йәке, ида алийе Хԝәдеда наскьри бун у Хԝәде ԝана ԛәбул дькьр. Ле йәкә Паԝлос гот ԝәки әԝ хушк-бьра «диса вәдьгәрʹьн» пәй тьштед пʹучʹ. Щурʹәки майин бежьн, әв бу готьна Паԝлос: «Һун ӧса пешда чунә, чьрʹа һун пашда вәдьгәрʹьн у пәй тьштед бекер у пʹучʹ дькʹәвьн?» ԝ18.07 8 ¶5-6

Нәлазьм ә әм ԛанунед Хԝәде бьтʹәрʹьбиньн у ахьрийа хьраб бьстиньн, у паше фәʹм кьн чь рʹаст ә чь хьраб ә. Әм дькарьн жь шашийед мәрьвед бәре һин бьн, сәрһатийед кʹижана Хәбәра Хԝәдеда ньвисар ьн. Бь рʹасти чахе әм сәрһатийед жь Кʹьтеба Пироз дьхуньн у сәр дьфькьрьн, бь ве йәке әм занәбун у һинкьрьна жь Хԝәде дьстиньн. Һинкьрьна Хԝәде лапә баш ә. Бәʹса хәбәре, бьфькьрьн кӧ Даԝьд Пʹадша чьԛас кӧл-дәрд кʹьшанд, гава гӧрʹа тʹәмийа Йаһоԝа нәкьр у тʹәви Бат-Шәбайе бенамуси кьр (2 Сам. 12:7-14). Чахе әм әве сәрһатийе дьхуньн у сәр дьфькьрьн, әм дькарьн пьрсе бьдьнә хԝә: «Даԝьд ча дькарьбу хьлазбуйа жь ԝе ахьрийа хьраб у еше, йа кӧ әԝи бона бенамусийа тʹәви Бат-Шәбайе станд?» Һәрге әз рʹасти щерʹьбандьнәкә ӧса бьһатама, гәло мьне бькарьбуйа хԝә зәфт кьра у мина Усьв жь ве тʹәльке бьрʹәвийама? (Дәстп. 39:11-15) Һәрге әм бьфькьрьн кӧ гӧнә чь ахьрийе тинә, әме һе ԛайим хьрабийе нәфьрʹәт кьн (Амс. 5:15). ԝ18.06 17 ¶5, 7

Гәләк щар чахе мәрьв нәһәԛийе дьвиньн, һьнге дькʹәвьнә нав шьхӧле политике. Ԝәʹде Исада, гәләк дәʹԝ-доз чедьбун бона хәрщед кӧ щьмәʹте дьда сәрԝера. Бьнәлийед Рʹоме, ӧса жи әԝед кӧ гӧһ дьданә Иса, мәщбур бун гәләк хәрща бьдьн, мәсәлә бона һәбуке, әʹрде йан жи ханийа. У хәрщгьр, демәк йед кӧ хәрщ тʹоп дькьрьн, кʹара хԝә дьгәрʹийан у әв йәк һе дьбу баргьрани бона щьмәʹте. Хәрщгьра щара пʹәрә дьданә дәԝләте сәва һʹӧкӧм бьстиньн, ԝәки паше сәр щьмәʹте пʹәра чекьн. Зәхайо, йе кӧ Әриһайеда сәрԝере хәрщгьра бу, пʹәрә зедә жь щьмәʹте дьстанд у бь ве йәке дәԝләти бу (Луԛа 19:2, 8). Әʹщебмайи нинә ԝәки һьнге гәләк хәрщгьр мина ԝи дәԝләти дьбун. Дьжмьнед Иса дьхԝәстьн, ԝәки әԝ жи бькʹәвә нав шьхӧле хәрщгьра. Ԝана пьрс да ԝи дәрһәԛа «хәрщ» кӧ зивәк бу, у һʹәму Щьһуйа гәрәке бона хәрщ һәрәке зивәк бьда (Мәт. 22:16-18). Ле Щьһуйа хәрщдайин нәфрʹәт дькьрьн, чьмки әве йәке ԝанарʹа дьда кʹьфше кӧ әԝана бьн һʹӧкӧме Рʹомеда ньн. ԝ18.06 5-6 ¶8-10

Әԝед кӧ алийе Шәйтʹан дьгьрьн, тʹьме ахьрийа хьраб дьстиньн (Иб. 21:7-17; Галт. 6:8). Ле чьрʹа кʹар ә кӧ әм заньн, ԝәки Шәйтʹан һʹӧкӧм дькә сәр дьнйайе? Занәбуна ве йәке али мә дькә кӧ рʹаст бьньһерʹьн сәр сәрԝера у хьзмәткʹаред дәԝләте, у ӧса жи мә һелан дькә кӧ мьзгинийе бәла кьн. Әм фәʹм дькьн ԝәки Йаһоԝа дьхԝазә әм ԛәдьре сәрԝеред дәԝләте бьгьрьн (1 Пәт. 2:17). У әԝ дьхԝазә әм гӧрʹа ԛанунед сәрԝертийед мәрьва бькьн, һәрге әԝана мьԛабьли принсипед ԝи начьн (Рʹом. 13:1-4). Ле әм ӧса жи заньн ԝәки әм гәрәке тʹәвнәбуйине хԝәй кьн, у пьштгьрийа тӧ партиакә политики йан жи сәрԝерәки нәкьн (Йуһʹн. 17:15, 16; 18:36). Әм заньн Шәйтʹан дьхԝазә наве Йаһоԝа беһӧрмәт кә, ләма жи әм һәр тьшти дькьн сәва мәрьва рʹастийа дәрһәԛа Хԝәде һин кьн. Әм фьрнаԛ дьбьн кӧ наве ԝи сәр мә йә у кӧ әм наве ԝи һьлдьдьн. Хенщи ве йәке, һʹьзкьрьна мә һьндава Хԝәде, жь һʹьзкьрьна һьндава пʹәра у һәбуке бьльндтьр у ԛимәттьр ә (Иша. 43:10; 1 Тимтʹ. 6:6-10). ԝ18.05 24 ¶8-9

Гәло изьн һәйә, ԝәки жьн-мер башԛә бьминьн, һәрге зәԝащеда проблем һәнә? Чаԝа мә жоре гот, Кʹьтеба Пироз дьбежә, ԝәки тʹәне бенамуси дькарә бьбә мәʹнийа һәвԛәтандьне. Ле Кʹьтеба Пирозда тʹӧ щики найе готьне, ԝәки мәʹни гәрәке чь бә кӧ жьн-мер башԛә бьжин. Паԝлос ньвиси: «Жьнәкә кӧ мере ԝе нәбаԝәр бә у әԝ бьхԝазә тʹәви ԝе бьминә, бьра жь ԝи нәԛәтә» (1 Корн. 7:12, 13). Әԝ йәк бона ԝәʹде мәйә жи. Ле йәкә щара дәрәщед ӧса һәнә, кӧ дьдьнә кʹьфше ԝәки «мере нәбаԝәр» нахԝазә тʹәви жьна хԝә «бьминә». Мәсәлә, әԝ жьна хԝә ӧса ԛайим дькʹӧтә кӧ әԝ дьфькьрә ԝәки сьһʹәт-ԛәԝата ԝе йан жи әʹмьре ԝе, бьн ԛәзийеда нә. Йан әԝ нахԝазә ле хԝәй кә у әʹбура нәфәред хԝә бькә, йан жи рʹе ԝе дьгьрә Хԝәдерʹа хьзмәт кә. Ԝан дәрәщада һьнә Мәсиһи дьфькьрьн кӧ мер чь жи дьбежә, йәкә әԝ нахԝазә тʹәви ԝе бьжи, ләма лазьм ә башԛә бьжин. Ле һьнә Мәсиһи жи ԝан дәрәщада сафи дькьн, ԝәки башԛә нәбьн. Әԝана сәбьр дькьн у алийе хԝәда һәр тьшт дькьн, ԝәки һʹале зәԝаща хԝә баш кьн. ԝ18.12 13 ¶14, 16; 14 ¶17

Мәсәла дәрһәԛа тʹохьмрʹәшда кӧ Луԛа 8:5-8, 11-15-да те гьликьрьне, бь симболик тʹохьм те һʹәсабе «хәбәра Хԝәде», демәк мьзгинийа Пʹадшатийе. Әʹрд те һʹәсабе дьле мерьв. Тʹохьме кӧ кʹәтийә сәр әʹрде ԛәнщ, шин бу у бу чил, у 100 щари зедәтьр бәр ани. Чаԝа мәсәла Исада әʹрде баш тʹохьм хԝәй кьр, ӧса жи мә әԝ әʹламәти ԛәбул кьр у хԝәй кьр. Ахьрийеда, әԝ тʹохьме мьзгинийа Пʹадшатийе кʹокед хԝә да, мәзьн бу, бу чил у паше ида һазьр бу сәва бәр бьдә. Чаԝа кӧ чʹиле гәньм бәр дьдә, демәк тʹохьмед тʹәзә дьдә, нә кӧ чʹилед тʹәзә, әм жи бәр дьдьн бь тʹохьме тʹәзә йе Пʹадшатийе, нә кӧ шагьртед тʹәзә. Ле чаԝа әм тʹохьме тʹәзә йе Пʹадшатийе дьдьн? Һәр щар гава әм мьзгинийа дәрһәԛа Пʹадшатийе бәла дькьн, бь ве йәке әм әԝ тʹохьме кӧ дьле мәда һатьбу чандьне, дьрʹәшиньн (Луԛа 6:45; 8:1). Әԝ мәсәлә мә һин дькә, ԝәки гава әм мьзгинийа Пʹадшатийе бәла дькьн, әм «бь сәбьр бәре» хԝә дьдьн . ԝ18.05 14 ¶10-11

Паԝлос һазьр бу нә кӧ тʹәне дьл бьдә хушк-бьра, ле ӧса жи «хԝә жи у мал-һʹале хԝә жи» бьдә (2 Корн. 12:15). Ӧса жи рʹуспи гәрәке нә кӧ тʹәне пе гьлийа хушк-бьра бьшьдиньн, ле пе кьред хԝә. Әԝ йәк дьдә кʹьфше ԝәки әԝана бь рʹасти бона хушк-бьра хәм дькьн (1 Корн. 14:3). Щара бона һәвшьдандьне ширәт лазьм ьн. Ле һьнге рʹуспи гәрәке гӧһ бьдьнә Кʹьтеба Пироз кӧ ӧса ширәт кьн, ԝәки ԝана ԛәԝи кьн. Иса ве йәкеда мәсәләкә мәзьн һишт. Иса паши рʹабуна хԝә ширәтед сәрт да һьнә щьватед Асйа Бьчʹукда. Ле дина хԝә бьдьне, Иса әԝ йәк ча кьр. Пешийа ширәткьрьне, әԝи бь дьл у щан пʹайи да щьвата Әфәси, Пәргамайе у Тийатирайе (Әʹйан. 2:1-5, 12, 13, 18, 19). Ԝе баш бә һәрге рʹуспи чʹәʹв бьдьнә Иса чахе ширәта дьдьнә хушк-бьра. ԝ18.04 22 ¶8-9

Бешьк, де-бавно һун һәр тьшти дькьн сәва зарʹед ԝә нәхԝәш нәкʹәвьн. Бәʹса хәбәре, һун мале тʹәмьз дькьн у жь мал дәрдьхьн у давежьн һәр тьште кӧ дькарә зарʹед ԝә нәхԝәш бехә. Ԝи щурʹәйи һун гәрәке зарʹед хԝә жь һʹӧкӧме Шәйтʹан хԝәй кьн. Ԝана дур хԝәй кьн жь ԝан филма, TV шоу, листькед әләктроник у малпәред ӧса, кʹижан кӧ дькарьн фькьред Шәйтʹан бькьнә һʹьше ԝан. Йаһоԝа щабдари дайә ԝә, сәва һун мьԛати рʹӧһʹанийа зарʹед хԝә бьн (Мәтʹлк. 1:8). Нәтьрсьн мала хԝәда синора дайньн, кʹижан кӧ сәр һʹиме принсипед Кʹьтеба Пироз ьн. Зарʹед хԝәрʹа бежьн, ԝәки чь изьн ә әԝана бьньһерʹьн у чь на, у али ԝан бькьн ԝәки әԝана фәʹм кьн кӧ чьрʹа ԝә ӧса сафи кьрийә (Мәт. 5:37). Чахе зарʹед ԝә һьнәки ида мәзьн бьн, ԝана һин кьн ԝәки тедәрхьн ль гора принсипед Йаһоԝа чь рʹаст ә у чь хьраб ә (Ибрн. 5:14). У бир нәкьн ԝәки зарʹед ԝә ԝе һе зәʹф жь мәсәла ԝә һин бьн кӧ һун чь дькьн (Ԛан. Дщр. 6:6, 7; Рʹом. 2:21). ԝ19.01 16 ¶8

Щаһьлно, һун дькарьн нете дайньн пешийа хԝә, ԝәки щьватеда тʹәви мәрьвед әʹмьрда мәзьн һәвалтийе бькьн. Һун дькарьн жь ԝана бьпьрсьн, ԝәки әԝана дәрһәԛа ԛәԝьмандьнед хьзмәтийа хԝәда ԝәрʹа гьли кьн. Бь ве йәке һуне жи ԛәԝи бьн у әԝана жи, у пе рʹонайа хԝә шәԝԛ бьдьн. Һәр  кәс жь мә дькарә нете дайнә пешийа хԝә, ԝәки бь дьл сьлав кә у ԛәбул кә мәрьвед кӧ тенә щьватед мә. Һәрге һун щабдар ьн, ԝәки щьвина бона хьзмәткьрьне дәрбаз кьн, һун дькарьн гәләк али хушк- бьред әʹмьрда мәзьн бькьн. Мәсәлә, пебьһʹәсьн кӧ мьһала ԝанә бона хьзмәтийе һәйә йан на. Шьхӧл бьдьнә щаһьла, ԝәки аликʹарийе бьдьнә хушк-бьред әʹмьрда мәзьн. Ӧса жи гәләк фәрз ә дьл бьдьнә ԝан хушк-бьра, сьһʹәт-ԛәԝата кʹижана хьраб ә у нькарьн гәләк хьзмәт кьн. Хәмкьрьна ԝә у һʹьзкьрьна ԝә һьндава щаһьла у йед әʹмьрда мәзьн, ӧса жи һьндава йед щерʹьбанди у нәщерʹьбанди, дькарә ԝана һелан кә кӧ бь хирәт мьзгинийе бәла кьн (Ԛан. Кʹаһ. 19:32). ԝ18.06 23-24 ¶10-12

Әм гәрәке бьшекьриньн ве йәке кӧ Йаһоԝа мә жь хӧламтийа гӧнә у мьрьне аза кьр. Бь сайа ԛӧрбана Иса, әм дькарьн бь исафа тʹәмьз Хԝәдерʹа хьзмәт кьн у шабуне жь ве йәке бьстиньн (Зәб. 40:8). Бәле, әм гәрәке әве азайа жь Хԝәде ԛимәт кьн. Ле ӧса жи фәрз ә әм бир нәкьн, ԝәки әве азайе рʹаст бьдьнә хәбате. Пәтрусе шанди ширәтәкә фәрз да Мәсиһийа, ԝәки азайа хԝә нәдьнә хәбате сәва хԝәстьнед хԝәйә нәрʹаст биньн сери у хԝә һәԛ дәрхьн бона кьред хԝәйи нәрʹаст. Әв ширәта Пәтрус тинә бира мә кӧ бәрʹийеда чь ԛәԝьми тʹәви Исраелийа, у әԝ сәрһатийа ԝан бона мә дәрсәкә фәрз ә. Шәйтʹан у дьнйа ԝи мәрьва һелан дькьн кӧ пәй хԝарьн-вәхԝарьне, кʹьнща, һесабуне, у ԝәʹдәдәрбазкьрьне у диса тьштед дьн кʹәвьн. Әԝед кӧ реклама дькьн, мәрьвед бәрбьчʹәʹв дьдьнә хәбате, сәва мә һелан кьн ԝан тьшта бькʹьрʹьн, кʹижан кӧ бь рʹасти мәрʹа нәлазьм ьн. Мәрьв гәләк һеса дькарә бькʹәвә ԝан тʹәлька у азайа хԝә нәрʹаст бьдә хәбате. ԝ18.04 10 ¶7-8