Тирмәһ

Әм «зәманед хьрабда» дьжин кӧ гәләк чәтьн ә. Һʹәта әм һивийа дьнйа тʹәзә нә, әʹмьр ԝе һе зор у чәтьн бә (2 Тимтʹ. 3:1). Ләма жи ԝе баш бә әм пьрсе бьдьнә хԝә: «Әз аликʹари у рʹебәрийе кʹидәре дьгәрʹьм?». Бь ԛьрʹна пешда, зәбурбеж шьровәкьр кӧ ԝәʹде тәнгасийа чʹәʹве мә ль Йаһоԝа бә, демәк аликʹарийе жь ԝи бьхԝазьн (Зәб. 123:1-4). Әԝи бь мәсәла шьровәкьр кӧ чахе чʹәʹве мә сәр Йаһоԝа йә, әв мина ве йәке йә, ча чʹәʹве хӧлам сәр ахайе ԝи йә. Ле әԝ чь те һʹәсабе? Хӧлам ль ахайе хԝә дьньһерʹә, ԝәки әԝ хԝарьне бьде у ԝи хԝәй кә. Ле ӧса жи хӧлам гәрәке чʹәʹве ахайе хԝә бьньһерʹә, ԝәки тедәрхә һәла әԝ чь жь ԝи дәʹԝа дькә у әԝе йәке бькә. Ԝи щурʹәйи әм жи гәрәке һәр рʹож Хәбәра Хԝәде леколин бькьн, һәла Йаһоԝа хут жь мә чь дәʹԝа дькә, у ве йәке бькьн. Һәрге әм ӧса бькьн, әме дӧдьли нәбьн, ԝәки Йаһоԝа ԝе али мә бькә гава әм һʹәԝщә бьн. ԝ18.07 12 ¶1-2

Иса дәрһәԛа азабуна жь «гӧна» дьгот, кʹижан кӧ мәрьва дькә хӧлам (Йуһʹн. 8:34). Гӧнә мә һелан дькә нә кӧ тʹәне тьштәки хьраб бькьн, ле әԝ ӧса жи рʹе мә дьгьрә сәва нәкьн ԝан тьшта, чь кӧ әм заньн рʹаст ьн у чь дәсте мәва те. Бәле, әм хӧламед гӧнә нә, у ахьрийа ве йәке һәйә еш, кӧл-дәрд у мьрьн (Рʹом. 6:23). Тʹәне чахе гӧнә бь тʹәмами бе кʹӧтакьрьне, һьнге әме бь рʹасти азайе бьстиньн, кʹижан кӧ бал Адәм у Һеԝайе һәбу. Чахе Иса гот кӧ «һәгәр һун сәр һинкьрьна мьн бьминьн», әԝи бь ԝан гьлийа да кʹьфше ԝәки сәва әм жь гӧнә аза бьн, гәрәке әм һьнә тьшта бькьн (Йуһʹн. 8:31). Чаԝа Мәсиһийед кӧ хԝә тʹәсмили Хԝәде кьрьнә, мә хԝә инкʹар кьрийә у бьжартийә кӧ мина шагьртед Иса пе ԝан синора бьжин кʹижан кӧ әԝи һин дькьр (Мәт. 16:24). Иса соз да кӧ әме бь рʹасти аза бьн чахе бь тʹәмами кʹаре бьстиньн жь ԛӧрбана ԝи. ԝ18.04 7 ¶14-16

Йаһоԝа һьнге жи һьндава щьмәʹта хԝә дьлшәԝат ә, һәрге жи щара ньһерʹандьна ԝан нәрʹаст ә. Дина хԝә бьдьнә мәсәла Уньс. Хԝәде әв пʹехәмбәр шандә бал щьмәʹта Нинәԝайе, сәва диԝана ԝи ԝанрʹа әʹлам кә. Чахе ԝана гӧне хԝә да рʹуйе хԝә, Хԝәде сафи кьр ԛьрʹа ԝан нәйнә. Ле әԝ сафикьрьн дьле Уньс нәһат. Әԝ «һерс кʹәт», чьмки пʹехәмбәртийа ԝи дәрһәԛа диԝане нәһатә сери.  Ле Йаһоԝа бь сәбьр бу һьндава Уньс у али ԝи кьр, кӧ ньһерʹандьна хԝә бьгӧһезә (Унс. 3:10–4:11). Ԝәʹдә дәрбаз бу, Уньс фәʹм кьр кӧ Йаһоԝа чь дьхԝәст ԝи һин кьра, у Йаһоԝа һәла һе жи бона кʹара мә сәрһатийа ԝи дайә ньвисаре (Рʹом. 15:4). Йаһоԝа пе кьред хԝә щьмәʹта хԝәрʹа дьдә кʹьфше, ԝәки әԝ һьндава хьзмәткʹаред хԝәда дьлшәԝат ә. Әԝ һаш еша дьле мә һәр кәси һәйә у дәрде мә жи занә. Әԝ фәʹм дькә һәр фькьр, синоред мә у ӧса жи кӧ әм кʹурайа дьле хԝәда чь тʹәхмин дькьн. У «әԝ наһелә кӧ [әм] жь ԛәԝата хԝә дәр бенә щерʹьбандьне» (1 Корн. 10:13). Әԝ соз рʹасти жи дьле мә гәләк һеса у рʹьһʹәт дькә. ԝ19.03 16 ¶6-7

Пе Ԛануна Муса меред әʹмьрда мәзьн щабдар бун, ԝәки нә тʹәне ԝан пьрса сафи кьн, кʹижан кӧ һʹәбандьнева гьредайи бун, ле шәрʹ-дәʹԝа у ԛачахтийе жи. Дина хԝә бьдьнә чәнд мәсәла. Һәрге Исраелики кәсәк бькӧшта, әԝ гәрәке дәрберʹа нәһата кӧштьне. Пешийа кӧ рʹуспийед шәһәр сафи кьрана, кӧ гәрәке әԝ бе кӧштьне йан на, әԝана гәрәке әԝ дәрәщә кʹур леколин кьрана (Ԛан. Дщр. 19:2-7, 11-13). Рʹуспийа ӧса жи гәләк чәтьнайед малбәтада сафи дькьрьн, мәсәлә жь чәтьнайед һәбукева гьредайи һʹәта чәтьнайед ортʹа жьн-мерада (Дәркʹ. 21:35; Ԛан. Дщр. 22:13-19). Чахе рʹуспи һәԛ бун у Исраелийа жи гӧрʹа Ԛануне дькьрьн, һәр кәс кʹар дьстанд, у бь ве йәке щьмәʹте Йаһоԝа рʹумәт дькьр (Ԛан. Кʹаһ. 20:7, 8; Иша. 48:17, 18). Жь ве йәке әм дьвиньн, ԝәки әʹмьре мәда һәр дәрәщә бона Йаһоԝа фәрз ә. Әԝ дьхԝазә ԝәки әм һьндава мәрьвада бь һәԛ у һʹьзкьрьн бьн. У әԝ дина хԝә дьде кӧ әм чь дьбежьн у чь дькьн, һәрге жи әм тʹәне нә малда. ԝ19.02 23 ¶16-18

Чахе әм стреседа ньн, ида мәрʹа чәтьн ә шкәсти бьминьн. Әм дькарьн дәстпекьн тʹәви мәрьва сәрт у сар хәбәр дьн. Һәрге һун кʹәтьнә стресе, дина хԝә бьдьнә мәсәла Иса. Әԝи нава чәнд мәһед хьлазийа жийина хԝәйә сәр әʹрде, стресәкә гьранда бу. Әԝи заньбу ԝәки әԝ ԝе бьчәрчьрә у бе кӧштьне (Йуһʹн. 3:14, 15; Галт. 3:13). Чәнд мәһ пешийа мьрьна хԝә, әԝи гот кӧ дьле ԝи нәрʹьһʹәт ә (Луԛа 12:50). У һәма рʹожәк пешийа мьрьна хԝә, Иса гот: «Агьр дьле мьн кʹәтийә». Гьлийед Иса кӧ әԝи дӧайе хԝәда Хԝәдерʹа дьгот, нишан дькьн, ԝәки әԝ йәки ча мьлук у гӧһдар бу (Йуһʹн. 12:27, 28). Чахе ԝәʹдә гьһишт, Иса бь мерхаси хԝәха хԝә кьрә дәсте дьжмьнед Хԝәде, йед кӧ ԝи гәләк беһӧрмәт кьрьн у берʹәʹмти кӧштьн. Рʹаст ә Иса стресәкә гәләк ԛайимда бу, у дьчәрчьри, йәкә әԝи бь мьлукти ԛьрара Хԝәде ани сери. Бешьк әм дькарьн бежьн, ԝәки Иса мәсәләкә лапә мәзьн һишт, чьмки һәла һе ԝәʹде тәнгасийа жи әԝ шкәсти ма! (Иша. 53:10) ԝ19.02 11 ¶14-15

Мәрʹа мерхаси лазьм ә, сәва ԝәʹде чәтьнда жи һәр гав бенә щьвате. Һьнә хушк-бьред мә һьнге жи тенә сәр щьвате, гава рʹасти кӧл-дәрда, дьлтәнгбуне, у чәтьнайед сьһʹәт-ԛәԝатева гьредайи, тен. Һьнәк жи алийе нәфәред хԝә йан жи алийе сәрԝеред дәԝләтеда рʹасти мьԛабьлибуне тен, ле йәкә әԝана тенә щьвате. Бьфькьрьн кӧ чаԝа мәсәла ԝә һʹӧкӧм дькә сәр ԝан бьра, йед кӧ бона баԝәрийа хԝә кәледа ньн (Ибрн. 13:3). Чахе әԝана дьбьһен кӧ әм бәрдәԝам дькьн ԝәʹде тәнгасийа Йаһоԝарʹа хьзмәт дькьн, әԝана ԛәԝи дьбьн сәва баԝәри, мерхаси у амьнийа хԝә хԝәй кьн. Чахе Паԝлос кәла Рʹомеда бу, әԝ ша дьбу гава дьбьһист, ԝәки бьред ԝи бь амьни Хԝәдерʹа хьзмәт дькьн (Фили. 1:3-5, 12-14). Паԝлос һьнә ԝәʹдә пешийа йан жи паши азабуна хԝә, Ибранийарʹа нәʹмә ньвиси. Ве нәʹмеда әԝи ширәт да Мәсиһийед амьн, ԝәки «тʹьме чаԝа хушк-бьра һәвдӧ һʹьз бькьн» у тʹӧ щар щьвинед хԝә бәрʹнәдьн (Ибрн. 10:25). ԝ19.01 28 ¶9

Шәйтʹан дьхԝазә ԝәки әм бьбьнә мина ԝи, демәк бьбьнә рʹабәр, йед кӧ принсипед Йаһоԝа пьшт гӧһе хԝәва давежьн у пәй хԝәстьнед хԝә дькʹәвьн. Әԝ ӧса дькә ԝәки дор бәре мә мәрьвед ӧса һәбьн, йед кӧ ида ньһерʹандьна хԝә хьраб кьрьнә, у дьхԝазә ԝәки әм жи мина ԝан «хьраб» кьн фькьр у рʹабун- рʹуньштьна хԝә (1 Корн. 15:33). Шәйтʹан ӧса жи дьхԝазә дьле мә хьраб кә, кӧ әм итʹбарийа хԝә биланийа мәрьва биньн, нә кӧ фькьред Йаһоԝа (Колс. 2:8). Бьфькьрьн дәрһәԛа фькьрәкә ӧса кӧ Шәйтʹан бәла дькә, мәсәлә әԝ мәрьва дьдә баԝәркьрьне, ԝәки дәԝләтибун гәрәке нетәкә сәрәкә бә әʹмьре ԝанда. Әԝед кӧ ӧса дьфькьрьн, дьԛәԝьмә ԛә дәԝләти нәбьн жи. Ле фьрԛи тʹӧнә дәԝләти бьн йан на, йәкә әԝана хԝә дькьнә бьн хофе. Чьрʹа? Чьмки әԝана дькарьн ӧса бькʹәвьнә һʹәйра пʹәра, ԝәки сьһʹәт-ԛәԝата хԝә, һәләԛәтийа тʹәви нәфәред хԝә у һәла һе жи достийа хԝә тʹәви Хԝәде, ӧнда кьн (1 Тимтʹ. 6:10). Әм гәрәке рʹази бьн, кӧ Баве мәйи билан али мә дькә, ԝәки әм рʹаст бьньһерʹьн сәр пʹәра (Ԝаиз 7:12; Луԛа 12:15). ԝ19.01 15 ¶6; 17 ¶9

Һәла һе жи пешийа кӧ Иса бьһата сәр әʹрде у мәсәлә бьһишта дәрһәԛа дьлдайине, хьзмәткʹаред Йаһоԝайи амьн заньбун, ԝәки гәрәке бәр дьле һәвдӧда бен. Бәʹса хәбәре, чахе Асурийа Щьһуйа данә тьрсандьне кӧ ԝе тʹәви ԝан шәрʹ кьн, Һьзԛийа Пʹадша сәрокед әскәра у щьмәʹта жь Щьһудайе тʹоп кьр у дьл да бәр ԝан. Щьмәʹт бь гьлийед ԝи гәләк ԛәԝи бу (2 Дир. 32:6-8). Жь Ибо әм дькарьн һин бьн кӧ чаԝа бәр дьле мәрьвада бен. Рʹаст ә әԝ хԝәха һʹәԝще бәрдьлийе бу, ле әԝи дәрһәԛа дьлдайине дәрс да се һәвалед хԝә, йед кӧ йанчь бәр дьле ԝида дьһатьн. Ибо готә ԝан, кӧ һәрге әԝ дәԝса ԝан буйа, әԝ ԝе бь гьлийа ԝана ԛәԝи кьра у бәр дьле ԝанда бьһата (Иб. 16:1-5). Ахьрийеда, Ибо бәрдьли жь Әлиһу станд у паше Йаһоԝа хԝәха жи ԝи дьлгәрм кьр (Иб. 33:24, 25; 36:1, 11; 42:7, 10). ԝ18.04 16 ¶6; 17 ¶8-9

Ишайа ида готьбу, кӧ Йаһоԝа ԝе чь щурʹәйи щьмәʹта хԝә хԝәй кә у ԛәԝи кә, әԝи гот: «Йаһоԝа ԝе бь ԛәԝат бе, у ԝе дәсте ԝи сәрԝертийе бькә бона ԝи» (Иша. 40:10, ДТʹ). Кʹьтеба Пироз гәләк щар хәбәра «дәст» дьдә хәбате, сәва бь симболик ԛәԝате бьдә кʹьфше. Ләма жи әԝ гьли «ԝе дәсте ԝи сәрԝертийе . .  . бькә», тинә бира мә кӧ Йаһоԝа Пʹадшайе зор ә. Бәре әԝи ԛәԝата хԝәйә бесинор дьда хәбате, сәва али хьзмәткʹаред хԝә бькә у ԝана хԝәй кә. Иро жи әԝ бәрдәԝам дькә бьшьдинә у хԝәй кә ԝан, йед кӧ итʹбарийа хԝә ԝи тиньн (Ԛан. Дщр. 1:30, 31; Иша. 43:10). Йаһоԝа хԝәйе ԝи созе хԝә йә, илаһи чахе дьжмьн пәй мә дькʹәвьн. Әԝ соз дьдә: «Әзе тә хԝәй кьм». Иро һьнә ԝәлатада, дьжмьнед мә дьхԝазьн һәр тьшти бькьн, сәва бәлакьрьна мьзгинийе бьдьнә сәкьнандьне, йан жи шьхӧле тʹәшкиләта мә ԛәдәхә кьн. Ԝи һʹале чәтьнда жи, әм зәʹф бәрхԝә накʹәвьн, чьмки Йаһоԝа мәрʹа соз дайә кӧ ԝе әʹсә ԛәԝате у мерхасийе бьдә мә. Әԝ дьбежә: «Ԛәт чʹәкед кӧ ль дьжи [мьԛабьли] тә һатьнә чекьрьн, ԝе жь тӧ кʹарира нәбә» (Иша. 54:17). ԝ19.01 5-6 ¶12-13

Алийе рʹӧһʹанида һʹәԝщәтийа һʹәйԝана тʹӧнә, ле йа мәрьва һәйә, у тʹәне Әʹфьрандаре ԝә дькарә рʹӧһʹанида ԝә тʹер кә (Мәт. 4:4). Чахе һун гӧһ дьдьнә ԝи, һун сәрԝахтийе у фәʹмкарийе дьстиньн у һьн жи бәхтәԝар дьбьн. Хԝәде бона һʹәԝщәтийа ԝәйә рʹӧһʹани Хәбәра хԝә дайә ԝә у ӧса жи хԝарьна рʹӧһʹани кӧ бь сайа «хӧламе амьн у сәрԝахт» әм дьстиньн (Мәт. 24:45). Рʹасти жи чьԛас тʹер-тʹьжә у щурʹә-щурʹә хԝарьна мәйә рʹӧһʹани һәйә (Иша. 65:13, 14). Әԝ хԝарьна рʹӧһʹани кӧ Хԝәде дьдә, ԝе ԝә сәрԝахт у аԛьл кә. Әԝ йәк ԝе гәләк тьштада ԝә хԝәй кә (Мәтʹлк. 2:10-14). Мәсәлә, әԝ һʹӧнӧр ԝе чʹәʹве ԝә вәкә кӧ һун һинкьрьнед ԛәлп ԛәбул нәкьн, бәʹса хәбәре һинкьрьнәкә ӧса кӧ Әʹфьрандар тʹӧнә йә. Әԝана ԝе ԝә хԝәй кьн жь ве дәрәԝийе, кӧ йанчь пʹәрә у һәбук тʹәне бәхтәԝарийе тиньн. Ӧса жи һуне дәрберʹа тедәрхьн у бьтʹәрькиньн хԝәстьнед хьраб у рʹабун-рʹуньштьна ӧса, кӧ дькарьн зийане ԝәрʹа биньн. Ләма жи бьгәрьн сәрԝахтийа Хԝәде, аԛьл бьн у әве йәке бьшекьриньн. ԝ18.12 20 ¶6-7

Ве пʹехәмбәртийеда те готьне, ԝәки бе ԝәʹдә чахе рʹожед мә бьбьнә «мина рʹожед даре». Һьнә дар бь һʹәзара сала дьжин, ле сәва мәрьв һаԛас сал бьжин, сьһʹәт-ԛәԝата гәләк баш лазьм ә. Һәрге һьнге мәрьв ӧса бьжитана, чаԝа Ишайа пʹехәмбәрти кьр, бь рʹасти әԝ ԝе щьнәт буйа! Ле әв пʹехәмбәрти ԝе ахьрийеда бе сери! Бьфькьрьн, ча әԝ соз әʹйан дькьн ԝәки ахьрийеда щьнәт ԝе һәбә: Хԝәде ԝе сәр тʹәмамийа әʹрде мәрьва кʹәрәм кә. Тʹӧ кәс ԝе нәтьрсә жь мәрьва у жь һʹәйԝана. Корʹ, кәрʹ-лал у сәԛәт ԝе ԛәнщ бьн. Мәрьв ԝе хԝәрʹа мала ава кьн у жь бәред әʹрде ләзәте бьвиньн. Әԝана ԝе жь баха дьрежтьр бьжин. Бәле, әм жь Кʹьтеба Пироз әшкәрә дьвиньн, ԝәки ахьрийа ԝи щурʹәйи пешийа мә йә. Ле дьбәкә һьнә мәрьв бежьн кӧ әԝ пʹехәмбәрти надә кʹьфше, ԝәки щьнәт ԝе һәбә. Чь мәʹнийа ԝә һәйә, ԝәки һун бь дьл у щан һивийа щьнәта сәр әʹрде нә? Мәрьвәки һәри гьринг кӧ сәр әʹрде дьжит, демәк Иса, мәʹнийа фәрз дьдә мә (Луԛа 23:43). ԝ18.12 5 ¶13-15

Әм дькарьн һʹьше хԝә бьгӧһезьн. Әм чь жи дькьнә һʹьше хԝә у сәр чь жи гәләк дьфькьрьн, әԝ йәк һʹьше мә дьгӧһезә. Демәк, һәрге әм кʹур дьфькьрьн дәрһәԛа фькьред Йаһоԝа, әме фәʹм кьн ԝәки ньһерʹандьна ԝи тʹьме рʹаст ә. Паше ида әме хԝәха бьхԝазьн сәр тьшта мина ԝи бьньһерʹьн. Дина хԝә бьдьне, кӧ сәва фькьрандьна мә мина йа Йаһоԝа бә, әм гәрәке «нәкʹәвьнә кьрасе бәнде ве дьнйайе». Әм гәрәке нәһельн, ԝәки фькьр йан жи ньһерʹандьна кӧ Хԝәде ԛәбул накә, бькʹәвьнә һʹьше мә. Ԝәрә пе мәсәле бьвиньн, кӧ чьрʹа әԝ йәк гәләк фәрз ә. Бәʹса хәбәре, кәсәк дьхԝазә ԝәки сьһʹәт-ԛәԝата хԝә баш кә, у ләма сафи дькә тʹәне хԝарьна баш у керһати бьхԝә. Ле һәрге әԝ һьн жи тʹьме хԝарьна нәтʹәмьз бьхԝә, әԝ йәк ԝе жерʹа кʹаре нәйнә. Һәрге әм жи һʹьше хԝә пе фькьред Йаһоԝа тʹьжә дькьн у ԝи ԝәʹдәйи ӧса жи дьһельн ԝәки әԝ дьнйа сәр фькьрандьна мә һʹӧкӧм кә, әме тӧ кʹаре нәстиньн. ԝ18.11 21 ¶14-15

Әм гәрәке һәр рʹож ль гора рʹастийе бьжин. Әм ве рʹастийе гәрәке мина кʹәмбәре ль пьшта хԝәва гьредьн. Бәре кʹәмбәра кӧ әскәр хԝәва дькьр, ԝәʹде шәрʹ пьшта ԝи хԝәй дькьр. Ле сәва кʹәмбәр рʹьнд ԝи хԝәй кә, әԝ гәрәке ԛайим ԝива гьредайи бә. Кʹәмбәра кӧ сьст гьредайи бу, кем кери ԝи дьһат. Ле гәло кʹәмбәра рʹӧһʹанийә рʹастийе, ча мә хԝәй дькә? Һәрге әм ԛайим әԝе кʹәмбәре хԝәва гьредьдьн, әԝ ԝе мә жь фькьред нәрʹаст хԝәй кә у али мә бькә сафикьрьнед аԛьлайи бькьн. Һьн жи чахе әм рʹасти щерʹьбандьна у тәнгасийа бен, рʹастийа Кʹьтеба Пироз ԝе дьл бьдә мә, сәва әм тьштед рʹаст бькьн. Чаԝа кӧ әскәр ԝе тӧ щар бей кʹәмбәре нәчә шәрʹ, әм жи гәрәке тʹӧ щар кʹәмбәра рʹастийе сьст нәкьн у жь хԝә нәехьн. Дәԝсе әм гәрәке һәр тьшти бькьн, сәва әв ԛайим бәдәна мәва гьредайи бә, демәк ль гора рʹастийе бьжин. ԝ18.11 12 ¶15

Сәва әм Хәбәра Хԝәдеда рʹастийе бьгәрʹьн, лазьм ә һьнәки щәфе бькʹьшиньн. Әм ӧса жи гәрәке һазьр бьн тьшта ԛӧрбан кьн, ԝәки рʹастийе ԛазанщ кьн. Чаԝа Мәтʹәлокда те готьне, чахе әм рʹастийе «дькʹьрьн», демәк ԛазанщ дькьн, әм гәрәке фәсал бьн, ԝәки «нәфьрʹошьн», демәк ӧнда нәкьн. Тьште кӧ бе пʹәрә йә жи, йәкә дькарә баһе ԝе һәбә. Хәбәра Ибрани кӧ Мәтʹәлок 23:23-да һатийә ԝәлгәрʹандьне «бькʹьрʹә», дькарә ӧса жи бе һʹәсабе «ԛазанщ кә». Әԝ һәрдӧ хәбәр жи дьдьнә кʹьфше, ԝәки лазьм ә тьштәки бькьн, йан жи тьштәки жь хԝә кем кьн, сәва кӧ ве ԛазанщ кьн. Әве йәке әм пе мәсәла банана дькарьн һе рʹьнд фәʹм кьн. Бәʹса хәбәре, дькʹанеда әʹлам дькьн, ԝәки банана дькарьн бе пʹәрә һьлдьн. Фәʹмдари йә, банан ԝе хԝәха бь хԝә нәйенә сәр сьфьра мә. Әм гәрәке һьнәки щәфе бькʹьшиньн, у һәрʹьн дькʹане ԝан банана һьлдьн. Ӧса жи сәва әм рʹастийе бькʹьрьн, рʹаст ә мәрʹа пʹәрә нәлазьм ә, ле әм гәрәке алийе хԝәда тьштәки бькьн. ԝ18.11 4 ¶4-5

Иса Пәтрус, Аԛуб у Йуһʹәнна тʹәви хԝә бьрә сәр чʹийаки бьльнд. Чахе әԝана ԝедәре бун, шагьрта хәԝн-хәйаләкә әʹщеб дитьн. Рʹуйе Иса бьрьԛи у кʹьнще ԝи чʹил-ԛәрԛаш бун. Дӧ кәс кӧ мина Муса у Елйас бун, дәстпекьрьн тʹәви Иса хәбәр дьн дәрһәԛа мьрьн у рʹабуна ԝи жь мьрийа (Луԛа 9:29-32). Паше, әʹԝрәки сәр ԝан кьрә си, у ԝана дәнгәк жь әʹԝр бьһист, әԝ дәнге Хԝәде бу! Әԝе хәԝн-хәйале әʹйан кьр рʹумәт у ԛәԝата Исайә ахьрийе, ча Пʹадша Пʹадшатийа Хԝәдеда. Бешьк, әԝе йәке дьл да ԝи у шьданд, чьмки щәфе гьран у мьрьна бь чәрчьрандьне пешийа ԝи бу. Әԝе хәԝн-хәйале ӧса жи баԝәрийа шагьрта һе ԛәԝи кьр у әԝана шьдандьн бона щерʹьбандьн у шьхӧлед ахьрийе, кӧ пешийа ԝан бу. Ԝәкә 30 сал шунда, Пәтрусе шанди диса бәʹса ве хәԝн-хәйале кьр у да кʹьфше, ԝәки әԝ һәла һе рʹьнд бира ԝида йә (2 Пәт. 1:16-18). ԝ19.03 10 ¶7-8

Диса чь тьштида Мәсиһийед рʹаст жь әндәмед религийед ԛәлп башԛә дьбьн? Әм «растийе» дьбежьн (Зәкәр. 8:16, 17). Әме һьн тьштед бьчʹукда һьн жи йед мәзьнда рʹастийе бежьн мәрьвед нәнасрʹа, һәвалхәбатчийед хԝәрʹа, һәвалед хԝәрʹа, у мәрьвед хԝәйи незикрʹа жи. Һәрге тӧ щаһьл и, дьбәкә дьхԝази мина щаһьлед дьн би, сәва жь ԝана щӧдә нәби. Тʹӧ щар нәбә мина мәрьвед дӧрʹу кӧ бәр нәфәр у хушк-бьред щьвате хԝә нав-намус бьди кʹьфше, ле нав щаһьлед дьнйайе у малпәред сосйалида лаптә щурʹәки дьн. Һәрге тӧ ӧса бьжийи, бь ве йәке тӧ де-бавед хԝә, хушк-бьред щьвате у Хԝәде дьхапини (Зәб. 26:4, 5). Ле Йаһоԝа занә чахе әм ԝи тʹәне пе зарʹ-зьмане хԝә һӧрмәт дькьн, ле дьле мә жь ԝи дур ә (Марԛ. 7:6). Чьԛас баш ә бькьн ве йәке, чь жи ве мәтʹәлокеда те готьне: «Бьра дьле тә һʹәвсудийа гӧнәкʹар нәкә, ле һәр рʹож хофа Хӧданда бә» (Мәтʹлк. 23:17). ԝ18.10 9 ¶14-15

Әм щьмәʹта Хԝәде малбәтәкә рʹӧһʹани нә, кʹижан кӧ бь һʹьзкьрьне әʹйан ә. Әм һәвдӧ һʹьз дькьн (1 Йуһʹн. 4:21). Әм һʹьзкьрьна хԝә дьһа зәʹф дьдьнә кʹьфше шьхӧлед бьчʹукда у тьштед гәләк һурда, нә кӧ тʹәне пе кьред мәзьн у мәхсус. Мәсәлә, әм һәврʹа ширьн хәбәр дьдьн, һьндава һәвда һʹәйф ьн у бона һәв хәм дькьн. Чахе әм ӧса дькьн, әм «чаԝа зарʹед һʹьзкьри» чʹәʹв дьдьнә Хԝәде (Әфәс. 5:1). Иса жи бь тʹәмами чʹәʹв дьда Баве хԝә. Әԝи гот: «Ԝәрьнә щәм мьн һʹәмуйед ԝәстийайи у баргьран у әзе рʹьһʹәтийе бьдьмә ԝә . . . чьмки әз шкәсти мә у дьлмьлаһим ьм» (Мәт. 11:28, 29). Чахе әм чʹәʹв дьдьнә Иса, кӧ «хәм» дькьн «бона йе кʹәсиб», әм ԛәбулкьрьна Баве хԝәйи әʹзмана дьстиньн у бәхтәԝар дьбьн (Зәб. 41:1). Ләма ԝәрә әм бь һʹьзкьрьне хәм бькьн бона нәфәред хԝә, хушк-бьред щьватеда, у мәрьвед мьһала хԝәда. ԝ18.09 28 ¶1-2

Әм ӧса жи тʹәви Хԝәде дьхәбьтьн, гава аликʹарийе дьдьнә хушк-бьра ԝәʹде хәзәба. Мәсәлә, әм дькарьн пʹәра ԛӧрбан кьн (Йуһʹн. 13:34, 35; Кʹар. Шанд. 11:27-30). Ӧса жи әм дькарьн али ԝан бькьн, кӧ паши хәзәбе авайа тʹәмьз кьн йан жи тʹәзә кьн. Мала хушкәкә жь Полонистане, наве кʹижане Габриела йә, ԝәʹде хәзәбе һатә һьлшандьне. Гава паши хәзәбе хушк-бьред жь щьватед дор бәр, һатьн али ԝе бькьн, әԝ гәләк шьдийа у ша бу. Әԝ гьли дькә: «Әз нахԝазьм бежьм мьн чь ӧнда кьр, чьмки әԝ тʹәне тьштед материали нә. Дәԝсе әз дьхԝазьм бежьм, кӧ мьн чьԛас тьштед баш ԛазанщ кьр. Әве ԛәԝьмандьне али мьн кьр кӧ һе зедә бьшекьриньм ԝи ԛәдьри, кӧ әз щьвата Хԝәдеда мә, кʹидәре кӧ шабуне дьстиньм у бәхтәԝар ьм». Гәләк хушк-бьра, кӧ ԝәʹде хәзәба аликʹари стандьнә, дьбежьн ԝәки әԝе йәке ԝана һе бәхтәԝар кьрийә. Һьн жи әԝед кӧ тʹәви Йаһоԝа һәвкʹарийе дькьн, ша дьбьн кӧ аликʹарийе дьдьн хушк-бьра (Кʹар. Шанд. 20:35; 2 Корн. 9:6, 7). ԝ18.08 26 ¶12

Һәрге әм дьхԝазьн мьԛати дьле хԝә бьн, әм гәрәке бьзаньбьн кӧ чь хоф һәнә, у дәрберʹа тьштәки бькьн сәва хԝә хԝәй кьн. Хәбәра «мьԛат», тинә бира мә дәрһәԛа шьхӧле нобәдара. Ԝәʹде бәре нобәдар сәр диԝаред шәһәр дьсәкьнин у һәрге тьштәки хоф дьдитьн, дәнг дәрдьхьстьн. Һәрге әм әԝе йәке бьдьнә бәр чʹәʹве хԝә, әме фәʹм кьн кӧ әм чь гәрәке бькьн, сәва Шәйтʹан һʹьш-аԛьле мә хьраб нәкә. Бәре нобәдара тʹәви дәргәвана һәвкʹари дькьрьн (2 Сам. 18:24-26). Әԝана тʹәвайи мьԛати шәһәр дьбун, у чахе дьжмьн незик дьбу, әԝана щабдар бун, ԝәки дәргәһед шәһәр зу бенә дадане (Нәһәм. 7:1-3). Исафа мәйә пе Кʹьтеба Пироз һинкьри жи дькарә мина нобәдар али мә бькә. Чахе Шәйтʹан дьхԝазә сәр дьле мә һʹӧкӧм кә, демәк сәр фькьр, нет-мәрәм у хԝәстьнед мә, исаф пешда дькарә әʹлами мә кә. Чахе исафа мә ча бежи дәнг дәрдьхә, чьмки хофе тʹәхмин дькә, әм гәрәке гӧһ бьдьнә исафе у бь симболик дәргәһ дадьн. ԝ19.01 17 ¶10-11

Рʹуспи гәрәке нә кӧ анәгори ньһерʹандьна хԝә йан жи әʹдәте мьләте хԝә сафи кьн кӧ бьре щаһьл кʹьфш кьн йан на, ле анәгори Хәбәра Хԝәде (2 Тимтʹ. 3:16, 17). Ньһерʹандьна анәгори әʹдәте мьләт, дькарә рʹе бьгьрә кӧ бьра нәйенә кʹьфшкьрьне. Ԝәлатәкида, щабдарийед мәзьн данә бьраки щаһьл у әԝи әԝ щабдари рʹьнд ани сери. Рʹуспийед щьвате дьхԝәстьн ԝи ча рʹуспи кʹьфш кьн, чьмки ль гора Кʹьтеба Пироз әԝ лайиԛи ве кʹьфшкьрьне бу. Ле йәкә әԝ нәһатә кʹьфшкьрьне. Чьра? Чьмки чәнд рʹуспийед әʹмьрда мәзьн һʹәсаб кьрьн, кӧ әԝ гәләк щаһьл те хане сәва бьбә рʹуспи. Йазьх, сәва ве йәке әԝ бьра нәбу рʹуспи. Әԝ ньһерʹандьна нәрʹаст гәләк ԝәлатада һәйә. Ләма жи гәләк фәрз ә әм гьшк ль гора Кʹьтеба Пироз һәр тьшти бькьн, нә кӧ ль гора ньһерʹандьна хԝә йан жи әʹдәте мьләте хԝә! Тʹәне ӧса әме нишан кьн, ԝәки гӧрʹа Иса дькьн у анәгори дитьна чʹәʹвед хԝә диԝане накьн (Йуһʹн. 7:24). ԝ18.08 12 ¶16-17

Чахе әм дьхԝазьн дәрберʹа кәсәкирʹа тьштәки бьшиньн, хофәк һәйә. Һьнә ԝәлатада шьхӧле мә ԛәдәхәкьри йә, йан жи синоркьри йә. Ԝан ԝәлатада мәрьвед кӧ мьԛабьли мә нә, дькарьн әʹламәтийед ӧса бәла кьн, сәва кӧ тьрсе бькьнә дьле хушк-бьра, йан жи сәва итʹбарийа мә һьндава һәвдӧ ӧнда бә. Дина хԝә бьдьне чь ԛәԝьми ԝәде Йәктийа Совйәта бәре. Полисәки кӧ әндәме КГБ бу, әʹламәтийа ԛәлп бәла кьр, ԝәки йанчь бьред щабдар нәмамийа щьмәʹта Хԝәде дькьрьн. Гәләк хушк-бьра әԝ тьштед ԛәлп баԝәр кьрьн, у ахьрийеда жь тʹәшкиләта Йаһоԝа дур кʹәтьн. Рʹасти жи сәд һʹәйф! Рʹаст ә һьнәк паше вәгәрʹийан, ле һьнәк жи һʹәта иро нәһатьн, чьмки баԝәрийа ԝан ӧнда бу (1 Тимтʹ. 1:19). Ле ча әм дькарьн хԝә хԝәй кьн, ԝәки тьштәки ӧса тʹәви мә жи нәԛәԝьмә? Әʹламәтийед нәбаш у ӧса жи кʹижан кӧ һун ньзаньн рʹаст ә йан на, бәла нәкьн. Һьн жи дәрберʹа тьшта баԝәр нәкьн. Баԝәр бьн кӧ һун һәр тьшти рʹаст заньн. ԝ18.08 4 ¶8

Манускриптед бәрейә Йунанида, нишан щӧмлада һьндьк дьһатьнә хәбьтандьне. Ньһа пьрс пешда те: Гәло Иса гот «Әз тәрʹа рʹаст дьбежьм, иро те тʹәви мьн Щьнәтеда би»? Йан әԝи гот: «Әз тәрʹа рʹаст иро дьбежьм, те тʹәви мьн Щьнәтеда би, ДТʹ»? Биньн бира хԝә, Иса дәрһәԛа мьрьна хԝә шагьртед хԝәрʹа чь гот: «Кӧрʹе Инсан жи ӧса ԝе се рʹож у се шәва нава кʹурайийа әʹрдеда бьминә». (Мәт. 12:40; 16:21; 17:22, 23; Марԛ. 10:34; Кʹар. Шанд. 10:39, 40). Демәк, Иса у әԝ ԛачах рʹожа мьрьна хԝә нәчунә тӧ Щьнәтәке. Иса «дийаре мьрийада» бу, һʹәта рʹожа кӧ Хԝәде ԝи жь мьрьне рʹакьр (Кʹар. Шанд. 2:31, 32). Әԝи ԛачахи ньзаньбу, ԝәки Иса тʹәви шандийед хԝәйи амьн пәйман гьредайә, сәва тʹәви ԝи Пʹадшатийа әʹзманада бьн (Луԛа 22:29). Хенщи ве йәке, әԝ ԛачах нә ньхӧманди бу у нә жи бьжарти бу (Йуһʹн. 3:3-6, 12). Әв созе Иса дәрһәԛа щьнәта сәр әʹрде бу, кӧ гәрәке ахьрийеда бьһата сери. ԝ18.12 6 ¶17-18, 20-21

Ԝәʹдә дәрбаз бу, Исраелийа сәре хԝә бәр голькәкә зерʹ данин! Ԝана заньбун кӧ бь ве йәке әԝана гӧрʹа Хԝәде накьн, ле йәкә ԝана хԝәха хԝә дьхапандьн йанчь әԝана диса жи алийе Йаһоԝа нә. Һәла һе Һарун жи кʹәтә ве тʹәльке чахе гот кӧ әԝ гольк бона «щәжьна» Йаһоԝа йә. Ле Йаһоԝа ча сәр ве йәке ньһʹери? Әԝи һʹәсаб кьр ԝәки ԝана пьшта хԝә данә ԝи у нәмамийа ԝи кьрьн. Йаһоԝа готә Муса ԝәки щьмәт «жь ԝе рʹийе шьһьтин» кʹижанерʹа кӧ әԝи «тʹәми дабу ԝан» кӧ һәрʹьн. «Һерса» Йаһоԝа ӧса сәр ԝан рʹабу, кӧ әԝи һәла һе жи дьхԝәст бь тʹәмами ԛьрʹа мьләте Исраел бинә (Дәркʹ. 32:5-10). Ле Йаһоԝа сафи кьр ԝәки ԛьрʹа Исраелийа нәйнә (Дәркʹ. 32:14). Рʹаст ә пешийе Һарун хԝәха әԝ пʹутʹ чекьр, ле әԝи гӧне хԝә ани рʹуйе хԝә у тʹәви ԝан Леԝийа бу йәк, йед кӧ алийе Йаһоԝа гьртьн. Һʹәзара Исраели сәва пʹутʹпарьстийа хԝә әʹмьре хԝә ӧнда кьрьн. Ле әԝед кӧ алийе Йаһоԝа гьртьн, хьлаз бун у һьн жи Хԝәде ԝанрʹа соз да кӧ ԝе ԝана кʹәрәм кә (Дәркʹ. 32:26-29). ԝ18.07 20 ¶13-16

Алийе кʹеда һежа йә ԝәки әм бенә наскьрьне у ԛимәткьрьне? Иро мәрьв дьхԝазьн наве хԝә бьльнд кьн, мәсәлә бь хԝәндьна бьльнд, хәбатәкә баш, у навдәнгийа ве дьнйайеда. Ле Паԝлос шьровәкьр ԝәки һежа йә алийе кʹеда әм бенә наскьрьне у ԛимәткьрьне. Әԝи гот: «Ньһа кӧ ԝә Хԝәде нас кьрийә, ле бәле Хԝәде жи һун нас кьрьнә, һун чаԝа диса вәдьгәрʹьнә сәр ԝан сьхьред ве дьнейә беԛәԝатә нә тӧ тьшт у диса дьхԝазьн хӧламтийе ԝанрʹа бькьн?» (Галт. 4:9) Рʹасти жи ԛәдьрәки чьԛас мәзьн ә кӧ әм дькарьн алийе Хԝәдеда бенә наскьрьне, демәк алийе Сәрԝере Һәри Бьльнд! Әԝ бь дьл дьхԝазә әм һәләԛәтийа хԝә тʹәви ԝи незик кьн. Йаһоԝа мә нас дькә, мә һʹьз дькә, у дьхԝазә әм бьбьнә достед ԝи. Әԝи әм ӧса әʹфьрандьнә, кӧ әм бькарьбьн тʹәви ԝи достийе бькьн (Ԝаиз 12:13, 14). ԝ18.07 8 ¶3-4

Һәрге әм дьхԝазьн жь ԛанунед Хԝәде кʹаре бьстиньн, әм гәрәке ԝан ԛануна ԛайим һʹьз бькьн у ԛимәт кьн (Амс. 5:15). Ле ча әм дькарьн ве йәке бькьн? Йа пешьн, әм гәрәке мина Йаһоԝа сәр тьшта бьньһерʹьн. Бьфькьрьн сәр ве мәсәле: Бәʹса хәбәре һун шәв хьраб рʹадьзен, у һʹәкиме ԝә ԝәрʹа диетайе дьньвисә, дьбежә кӧ спортева мьжул бьн, у һьнә тьшт әʹмьре хԝәда бьгӧһезьн. Паше чахе ԝә һʹәму ширәтед ԝи данә хәбате, ԝә дит ԝәки проблема ԝә сафи бу! Фәʹмдари йә, һуне бона ԝе аликʹарийе жь ԝи һʹәкими гәләк рʹази бьн. Әʹфьрандаре мә жи мәрʹа ԛанун данә, кʹижан кӧ дькарьн мә хԝәй кьн жь ахьрийа хьраб кӧ гӧнә тинә, у әʹмьре мә баш кьн. Бьфькьрьн кӧ әм чьԛас кʹаре дьстиньн гава гӧрʹа ԝан тʹәмийед Кʹьтеба Пироз дькьн, мәсәлә чахе хԝә дур дьгьрьн жь дәрәԝийе, фелбазийе, дьзийе, бенамусийе, зорбәтийе у сербазийе (Мәтʹлк. 6:16-19; Әʹйан. 21:8). Гава әм дьвиньн кӧ әм чьԛас кʹәрәмед баш дьстиньн чахе гӧрʹа Йаһоԝа дькьн, дьле мә һьндава Йаһоԝа у ԛанунед ԝи бь рʹазибуне у һʹьзкьрьне тʹьжә дьбә. ԝ18.06 17 ¶5-6

Дьбәкә Пилато дьтьрсийа, ԝәки Иса ԝе нав щьмәʹте дә, кӧ мьԛабьли Рʹомайа дәрен. Ле Иса щаба ԝи да: «Пʹадшатийа мьн нә жь ве дьнйайе йә» (Йуһʹн. 18:36). Бәле, Иса тʹӧ щар нәдькʹәтә нав политикайе, чьмки Пʹадшатийа ԝи гәрәке сәр әʹзмана буйа. У Иса Пилаторʹа гот кӧ шьхӧле ԝи сәр әʹрде әԝ ә, ԝәки дәрһәԛа «рʹастийе шәʹдәтийе» бьдә (Йуһʹн. 18:37). Һәрге әм жи мина Иса фәʹм дькьн кӧ шьхӧле мә чь йә, әме тӧ щар пьштгьрийа политике нәкьн, һәла һе дьле хԝәда жи. Ле әԝ йәк һеса нинә. Дина хԝә бьдьне бәрпьрсийарәки мьһале чь гот: «Мәрьвед мьһала мәда һе зедә у зедә фьрԛийе дькьнә ортʹа мәрьва. Әԝана мьләте хԝәрʹа фьрнаԛ дьбьн у гәләк жь ԝана баԝәр дькьн кӧ һәрге мьләтәки дьн сәр ԝанрʹа сәрԝертийе нәкә, ԝе әʹмьре ԝан дьһа баш бә. Ле чьԛас баш ә кӧ хушк-бьра йәктийе хԝәй дькьн, чьмки һʹьш-аԛьле ԝан сәр шьхӧле бәлакьрьна мьзгинийа Пʹадшатийе йә. Әԝана итʹбарийа хԝә Хԝәде тиньн, кӧ әԝ ԝе һʹәму нәһәԛийа у чәтьнайед мәйә дьн бьдә һьлдане». ԝ18.06 4-5 ¶6-7

Ньвисаред Ибранида тʹәне се кʹьтеб бәʹса Шәйтʹан дькьн, 1 Дирок, Ибо, у Зәкәрйа. Әԝ нав те һʹәсабе «Йе Мьԛабьл». Ле гәло чьрʹа пешийа һатьна Мәсиһ дәрһәԛа ԝи дьжмьни һьндьк һатә готьне? Те кʹьфше Йаһоԝа нәхԝәстийә, ԝәки Ньвисаред Ибранида гәләк тьшт дәрһәԛа Шәйтʹан у кьред ԝи бе готьне. Нета Йаһоԝайә сәрәкә Ньвисаред Ибранида әԝ бу, ԝәки Мәсиһ бе әʹйанкьрьне у щьмәʹта Хԝәде ԝи нас кә (Луԛа 24:44; Галт. 3:24). Гава әԝ йәк һатә сери у Мәсиһ һат, Йаһоԝа ԝи у шагьртед ԝи да хәбате, сәва һе зедә әʹйан кьн дәрһәԛа Шәйтʹан у ԝан мьлйакʹәта, йед кӧ тʹәви ԝи бунә йәк. Әԝ йәк әʹщебмайи нинә, чьмки Иса у йед бьжарти ԝе ԛьрʹа Шәйтʹан у пәйчуйед ԝи биньн (Рʹом. 16:20; Әʹйан. 17:14; 20:10). Ԛәԝата Шәйтʹан бь синор ә. Йаһоԝа, Иса у мьлйакʹәтед амьн, мә хԝәй дькьн. Әм пе аликʹарийа ԝан дькарьн мьԛабьли дьжмьне хԝә дәрен. ԝ18.05 22-23 ¶2-4

Йаһоԝа мә ча хьзмәткʹаред хԝә һʹәсаб дькә тʹәне һьнге, һәрге әм бәр дьдьн (Мәт. 13:23; 21:43). Жь мәсәла кӧ Йуһʹәнна 15:1-5-да әм дьвиньн, бәр, кʹижан кӧ һәр Мәсиһи гәрәке бьдә, найе һʹәсабе әԝ шагьртед тʹәзә, йед кӧ мә али ԝан кьрийә бьбьнә шагьрт (Мәт. 28:19). Һәрге әԝ ӧса буйа, ль гора мәсәла Иса, чʹьԛьлед бебәр ԝе бьһатана һʹәсабе әԝ Шәʹдед Йаһоԝайи амьн, йед кӧ тӧ кәс нәкьрьнә шагьрт, чьмки хьзмәт дькьн щийе ӧса, кʹидәре кӧ һьндьк мәрьв мьзгинийе ԛәбул дькьн. Ле әԝ йәк нәрʹаст ә. Чьрʹа? Чьмки әм зоре тʹӧ кәси нькарьн бькьн ԝәки бьбьнә шагьрт. Һьн жи, Йаһоԝа Хԝәдейе һʹьзкьрьне йә, у әԝ тʹӧ щар жь хьзмәткʹаред хԝә тьштед ӧса дәʹԝа накә, кӧ жь ԛәԝата ԝан дәр бә. Әԝ тʹьме һаԛаси жь мә дьхԝазә, чьԛас әм дькарьн бькьн (Ԛан. Дщр. 30:11-14). Ԝәки ӧса нә, кʹижан ә әԝ бәр кӧ әм гәрәке бьдьн? Әшкәрә йә, ԝәки бәр әԝ шьхӧл ә, кʹижан кӧ һәр кәс жь мә ԝәкә ԛәԝата хԝә дькарә бькә. Ле әԝ чь шьхӧл ә? Әԝ һәйә бәлакьрьна мьзгинийа Пʹадшатийа Хԝәде (Мәт. 24:14). ԝ18.05 14 ¶8-9

Сәрԝеред религийа нав тʹәмамийа дьнйайеда гәләк ьн. Һьнәка нав дькьн кʹәшиш, раби, пастор, йан жи пе сәрнавед дьн. Мина сәрԝеред религийа ԛьрʹна йәкеда, әԝана жи наһельн, ԝәки жь Хәбәра Хԝәде «рʹасти хӧйа бә» у «рʹастийа Хԝәде дәрәԝийерʹа гӧһерин» (Рʹом. 1:18, 25). Әԝана һинкьрьнед ԛәлп һин дькьн, мәсәлә дәрһәԛа щәʹньме, жийина паши мьрьне, реинкарнасйайе, у дәрәԝийа мьрʹдар бәла дькьн, кӧ йанчь Хԝәде һомосексуалисме ԛәбул дькә. Политик пе дәрәԝийе мәрьва дьхальфиньн. Дәрәԝийа лапә мәзьн кʹижан кӧ әԝана ԝе бәла кьн, әԝ ә чахе әʹлам кьн кӧ «дьне сәԛьри у бехофи йә»! Ле «һьнге хәзәбе ньшкева сәр ԝанда бе». Ԝәрә әм тʹӧ щар баԝәр нәкьн дәрәԝийа ԝан, кӧ йанчь дьнйа һʹале хьрабда нинә! Ле әм һаш рʹастийе һәнә, әм заньн ԝәки «рʹожа Хӧдан ԝе мина дьзе шәве бе» (1 Тʹеслн. 5:1-4). ԝ18.10 7-8 ¶6-8

Бь сайа «сәрока», демәк рʹуспийед жь Мәсиһийед бьжарти у пәзед дьн, Иса Мәсиһ бәрдьли у рʹебәрийе дьдә ԝан, йед кӧ дьлшкәсти нә у дьлтәнг ьн. Әԝ рʹуспи «һʹӧкӧми» сәр баԝәрийа хушк-бьра накьн, ле тʹәви ԝан дьхәбьтьн ԝәки әԝана баԝәрийеда шьдийайи бьн (Иша. 32:1, 2; 2 Корн. 1:24). Паԝлосе шанди мәсәләкә мәзьн һишт дьлдайинеда. Әԝи Мәсиһийед Тʹесалоникирʹа йед кӧ рʹасти зерандьне дьһатьн, ньвиси: «Дьле мә сәр ԝә дьшәԝьти, һʹәта кӧ мә дьхԝәст нә кӧ тʹәне Мьзгинийа Хԝәде бьда ԝә, ле әʹмьре хԝә жи, чьмки һун бьбунә дәлалийед мә» (1 Тʹеслн. 2:8). Паԝлос да кʹьфше ԝәки щара тʹәне пе гьлийа дьл бьдьнә кәсәки бәс нинә, ләма әԝи рʹуспийед Әфәсирʹа гьлийед рʹеза ве рʹоже ньвиси. ԝ18.04 21-22 ¶6-8

Сәва кӧ әве азайе бьстиньн, әм гәрәке вәгәрʹьн бал Йаһоԝа, демәк һәләԛәтийа мә тʹәви ԝи гәрәке незик бә (2 Корн. 3:16). Исраелийед кӧ бәрʹийеда бун, бь ньһерʹандьна хԝә сәр тьшта дьньһерʹин, нә кӧ пе ньһерʹандьна Йаһоԝа. Бь симболик дьле ԝан у һʹьше ԝан дадайи бу у һʹьшк бьбу, чьмки ԝана дьхԝәст азайа хԝә кӧ тʹәзәда сьтандьбун, бьдьнә хәбате сәва хԝәстьнед хԝә биньн сери (Ибрн. 3:8-10). Азайа кӧ жь рʹӧһʹе Йаһоԝа йә, һе бьльнд ә, нә кӧ азабуна жь хӧламтийа физики. Әԝ рʹӧһʹ азайикә ӧса тинә кӧ мәрьв тʹӧ щар нькарә бинә. Әԝ жь хӧламтийа гӧнә, мьрьне, у ӧса жи жь хӧламтийа һʹәбандьна ԛәлп у кьред ԝе аза дькә (Рʹом. 6:23; 8:2). Рʹасти жи әԝ азайикә чьԛас баш ә! Мәрьв дькарә ве азайе бьстинә һәла һе жи һәрге әԝ гьрти йә йан жи хӧлам ә (Дәстп. 39:20-23). ԝ18.04 9 ¶3-5