Кануна Пешьн

Иса һәләԛәтийа хԝә тʹәви шагьртед хԝә бәрамбәри һәләԛәтийа шьван тʹәви пез кьр (Йуһʹәнна 10:14). Әв мәсәлә бь рʹасти жи рʹьнд ә. Пәз шьване хԝә нас дькьн у гӧһ дьдьнә дәнге ԝи. Рʹевики әв йәк бь чʹәʹве хԝә дитьбу. Әԝи гот: «Мә дьхԝәст чәнд пәз бь видео бькʹьшанда, у мә дьхԝәст кӧ әԝ незики мә бьн. Ле ԝана гӧһ нәда мә, чьмки ԝана дәнге мә нас нәдькьр. Паше, шьванәки щаһьл һат, гази пез кьр у әԝана һатьн». Мәсәла ви рʹеви тинә бира мә кӧ Иса Мәсиһ дәрһәԛа пәзед хԝә – демәк дәрһәԛа шагьртед хԝә – чь готьбу: «Әԝе дәнге мьн бьбьһен». Ле Иса ида ль әʹзмана йә. Гәло әм ча дькарьн дәнге ԝи бьбьһен? Гава әм ль гора готьнед ԝи дьжин, әм нишан дькьн кӧ әм гӧһ дьдьнә дәнге Ахайе хԝә (Мәтта 7:24, 25). w21.12 16 ¶1-2

Пешийа кӧ Паԝлосе шанди бу шагьрте Иса Мәсиһ, әԝ йәки сәрт у сәрһʹьшк бу, у әԝи Мәсиһи дьзерандьн. Ле паше, әԝи шашийед хԝә ани рʹуйе хԝә, у һазьр бу кӧ ньһерʹандьн у хәйсәт-һʹӧнӧред хԝә бьгӧһезә (1 Тимотʹейо 1:12-16). Бь сайа аликʹарийа Йаһоԝа, Паԝлос бу шьванәки дьлован, дьлрʹәʹм у мьлук. Рʹаст ә әԝ сәва кемасийед хԝә әʹщьз дьбу, ле әԝи баԝәрийа хԝә рʹәʹма Йаһоԝа дьани (Рʹомайи 7:21-25). Әԝи заньбу кӧ әԝ беԛьсур нинә, ле әԝи хирәт дькьр кӧ хәйсәте хԝә ль гора хԝәстьна Хԝәде бьгӧһезә, у әԝи хԝә бь мьлукти дьспарт аликʹарийа Хԝәде, ԝәки шьхӧле хԝә бинә сери (1 Корьнтʹи 9:27; Филипи 4:13). Гава кәсәк ча рʹуспи те кʹьфшкьрьне, әв найе һʹәсабе ԝәки әԝ беԛьсур ә. Диса жи, Йаһоԝа дьхԝазә кӧ әԝана кемасийед хԝә ԛәбул кьн у «мәрьве ну» ль хԝә кьн (Әфәси 4:23, 24). Һәгәр рʹуспи ль гора Хәбәра Хԝәде дьле хԝә бьщерʹьбиньн у хирәт бькьн кӧ хԝә рʹаст бькьн, Йаһоԝа ԝе али ԝан бькә, кӧ әԝ бәхтәԝар у пешдачуйи бьн (Аԛуб 1:25). w22.03 29-30 ¶13-15

Һәгәр әм тедәрхьн ԝәки мә хушк йан бьрак сущдар кьрийә, ԝе баш бә кӧ әм чь бькьн? Бир нәкә ԝәки әм гәрәке хушк-бьра һʹьз бькьн (Аԛуб 2:8). Ӧса жи, гәрәке әм жь дьл дӧа бькьн, ԝәки Йаһоԝа али мә бькә, әм лома мәрьва нәкьн. Ԝе баш бә ль гора дӧайед хԝә һәр тьшти бькьн у тʹәви кәсед кӧ әм сущдар дькьн, ԝәхт дәрбаз кьн. Әм дьбәкә дькарьн тʹәви ԝана һәрʹьн хьзмәте, йан жи ԝана тʹәглифи мала хԝә бькьн у тʹәвайи нан бьхԝьн. Чьԛас дьһа незик әм ԝана нас кьн, һаԛас әме бькарьбьн мина Йаһоԝа у Иса дина хԝә бьдьн хәйсәт-һʹӧнӧред ԝанә ԛәнщ. Ӧса әме нишан кьн, ԝәки әм гӧһ дьдьн тʹәмийа шьване ԛәнщ у лома тʹӧ кәси накьн. Чаԝа кӧ пәз гӧһ дьдьн дәнге шьване хԝә, шагьртед Иса жи гӧһ дьдьн дәнге ԝи. Һәгәр әм бона һʹәԝщед хԝә бь зедәйи хәма нәкьн у лома мәрьва нәкьн, Йаһоԝа у Иса ԝе бона ве йәке мә кʹәрәм кьн. Һевийа мә чь бә жи – жийина ль сәр әʹзмана йан ль сәр әʹрде – ԝәрә әм бәрдәԝам кьн гӧһ бьдьн дәнге шьване хԝәйи ԛәнщ (Луԛа 12:32; Йуһʹәнна 10:11, 14, 16). w21.12 19 ¶11; 21 ¶17-18

Чахе Рʹәһобоԝам бу пʹадше Исраеле, щьмәʹте тьштәк жь ԝи хԝәст. Ԝана готе ԝәки әԝ, баре кӧ баве ԝи Сьлеман кьрьбу стуйе ԝан, сьвьк кә. Сәрида, Рʹәһобоԝам жь рʹуспийа пьрси, кӧ чь щаб бьдә ԝан. Ԝана гот кӧ һәгәр әԝ ль гора хԝәстьна щьмәʹте бькә, әԝана ԝе һәртʹьм пьштгьрийа ԝи бькьн (1 Пʹадшати 12:3-7). Әшкәрә йә кӧ әв ширәт Рʹәһобоԝам хԝәш нәһат, ләма жи әԝи жь кәсед кӧ тʹәви ԝи мәзьн бьбун ширәт пьрси. Ԝана ԝирʹа гот, ԝәки баре щьмәʹте дьһа гьран бькә (1 Пʹадшати 12:9-11). Гәло ԝе баш нибуйа кӧ Рʹәһобоԝам дӧа бькьра у жь Йаһоԝа бьпьрсийа, кӧ кʹижан ширәт дьһа баш ә. Дәԝсе әԝи гӧһ да һәвалед хԝә. Ахьрийа ве йәке гәләк хьраб бу, һьм бона Рʹәһобоԝам һьм жи бона мьләте Исраеле. Дьбәкә ширәтед кӧ әм жи дьстиньн щарна мә хԝәш нәйен. Диса жи, һәгәр ширәт сәр һʹиме Хәбәра Хԝәде  һатьбә дайине, ԝе баш бә кӧ әм ве ширәте ԛәбул кьн. w22.02 9 ¶6

Кәсед кӧ мьлук ьн у синоред хԝә заньн, әʹщьз набьн кӧ кәсед щаһьл щерʹьбанди ниньн, ле дәԝсе әԝана дина хԝә дьдьн һʹӧнӧред ԝан у ԛәԝата ԝан. Әԝана щаһьларʹа накʹәвьнә ләще, у ча һәвалкʹаред хԝә һʹәсаб дькьн. Кәсед әʹмьрда мәзьн хушк-бьред щаһьл ча пʹешкʹешед жь Йаһоԝа һʹәсаб дькьн, у әԝана бона ван пʹешкʹеша рʹази нә. Чьԛас ԛәԝата кәсед әʹмьрда мәзьн кем дьбә, әԝана ша нә ԝәки кәсед щаһьл һазьр ьн дәԝса ԝан шьхӧлед щьвате бькьн. Кʹьтеба Пироз бәʹса жьнәбикә бь наве Наһоми дькә. Гава әԝ пир бу, әԝ һазьр бу аликʹарийе жь кәсе дьһа щаһьл ԛәбул кә, у әԝ бона ве аликʹарийе шекьрдар бу. Пешийе, Наһомйе бука хԝә Рʹутʹерʹа гот, ԝәки әԝ вәгәрʹә щәм мьләте хԝә. Ле Рʹутʹе сафи кьр ԝәки тʹәви Наһомйе һәрʹә Бәйтләһʹме, у әԝе аликʹарийа Рʹутʹе ԛәбул кьр (Рʹутʹ 1:7, 8, 18). Ахьрийеда, һәр дӧ жьна жи кʹәрәмед мәзьн стандьн (Рʹутʹ 4:13-16). Ԝе баш бә кӧ кәсед әʹмьрда мәзьн бь мьлукти мина Наһомйе аликʹарийе ԛәбул бькьн. w21.09 10-11 ¶9-11

Баве мәйи әʹзмана фәʹм дькә, кӧ дәрәщед мә һәр кәси жь һәв щӧдә нә. Дьбәкә һʹале тә ӧса йә, ԝәки тӧ дькари жь кәсед дьн зедәтьр бона Йаһоԝа бьки. Йан жи, дьбәкә тӧ ида әʹмьрда мәзьн и, сьһʹәт-ԛәԝата тә тʹӧнә йан жи щабдарийед тәйә малбәтеда гьран ьн у тӧ нькари һаԛас бьки, чьԛас кәсед дьн дькьн. Хәмгин нәбә! (Галати 6:4). Йаһоԝа ԝе шьхӧл у щәфе тә тʹӧ щар бир нәкә. Һәгәр тӧ чь жь дәсте тә те бьки у ве йәке бь нета рʹаст бьки, әԝе жь тә рʹази бә. Йаһоԝа нета дьле тә дьвинә. Әԝ дьхԝазә ԝәки тӧ жь ве йәке шабуне бьстини, чь кӧ ԛәԝата тә дьгьһиже бона ԝи бьки. Дьле мә рʹьһʹәт ә, чьмки әм заньн кӧ һәгәр әм рʹасти тәнгасийа бен, Йаһоԝа ԝе али мә бькә (Ишайа 41:9, 10). Гәләк мәʹни һәнә кӧ әм бь шабуне Баве хԝәйи әʹзмана бьһʹәбиньн. Бәле, әԝ бь рʹасти һежа йә «кӧ рʹумәт, һӧрмәте у ԛәԝате» бьстинә (Әʹйанти 4:11). w22.03 24 ¶16; 25 ¶18

Әм дьхԝазьн чʹәʹв бьдьнә Иса, һәмьки әм нькарьн бь тʹәмами бьбьнә мина ԝи, ле сәва ве йәке әм гәрәке дьлтәнг нәбьн (Аԛуб 3:2). Шагьрт нькарә бь тʹәмами бьбә мина дәрсдаре хԝә. Ле диса жи әԝ дькарә чʹәʹв бьдә мәсәла дәрсдаре хԝә у жь шашийед хԝә дәрса һин бә. Бь ви щурʹәйи, шагьрт ԝе гав бь гав пешда һәрʹә. Мина ве йәке, һәгәр әм чь жь Кʹьтеба Пироз һин дьбьн, дьдьнә хәбате, у чь жь дәсте мә те дькьн ԝәки кемасийед хԝә рʹаст кьн, әме бькарьбьн дьһа баш чʹәʹв бьдьнә Иса (Зәбур 119:59). Һʹәчʹи зәʹф мәрьвед ве дьнйайе хԝәһʹьз ьн. Ле хьзмәткʹаред Йаһоԝа мина ԝан ниньн. Иса тʹьме һазьр бу али мәрьва бькә, у әԝ йәк дьле мә дьгьрә, ләма жи әм дьхԝазьн чʹәʹв бьдьнә ԝи (1 Пәтрус 2:21). Һәгәр әм чь жь дәсте мә те бькьн ԝәки чʹәʹв бьдьнә Иса, Йаһоԝа ԝе жь мә рʹази бә, у дьле мә ԝе ша бә! w22.02 24 ¶16; 25 ¶18

Иро, Йаһоԝа бь сайа Кʹьтеба Пироз рʹебәрийа хьзмәткʹаред хԝә дькә. Һәгәр әм сәр тьштед кӧ Йаһоԝа мә һин дькә, кʹур бьфькьрьн, әме бькарьбьн ль гора рʹебәрийа ԝи бькьн у шьхӧле бәлакьрьна мьзгине биньн сери (1 Тимотʹейо 4:15, 16). Ӧса жи, Йаһоԝа бь сайа «хӧламе амьн у сәрԝахт» рʹебәрийе дьдә мә (Мәтта 24:45). Щарна дьбәкә әм рʹьнд фәʹм нәкьн кӧ чьрʹа «хӧламе амьн» фьлан рʹебәри дайә. Мәсәлә, дьбәкә мәрʹа бе готьне кӧ гәрәке әм хԝә бона тʹәшԛәләкә тʹәбийәте һазьр кьн, ле әм дьбәкә дьфькьрьн кӧ тьштәки ӧса ԝәлате мәда нькарә бьԛәԝьмә. Һәгәр әм бьфькьрьн ԝәки рʹебәрийа кӧ әм дьстиньн, бадиһәԝа йә, ԝе баш бә әм чь бькьн? Һʹаләки ӧсада, ԝе баш бә әм сәр ван рʹезед жь Кʹьтеба Пироз бьфькьрьн, чь кӧ мә хԝәнд. Щарна, рʹебәрийа кӧ хьзмәткʹаред Хԝәде дьстандьн серида бекер дьһатә кʹьфше, ле паше әшкәрә дьбу кӧ бь сайа ве рʹебәрийе әʹмьре мәрьва хьлаз дьбу (Һʹакьмти 7:7; 8:10). w22.03 18-19 ¶15-16

Иса бь баԝәрикә тʹам, әв гьлийед жь рʹеза рʹоже гот. Иса заньбу кӧ тʹәне Йаһоԝа дькарә ԝи вәгәрʹинә жийине, у әԝ баԝәр бу кӧ Баве ԝи ԝе тʹӧ щар әԝ бир нәкә. Әм дькарьн жь готьнед Иса чь һин бьн? Жийина хԝә тʹәсмили дәсте Йаһоԝа бькә. Бона ве йәке, «бь тʹәмамийа дьле хԝә хԝә бьсперә Хӧдан» (Мәтʹәлок 3:5). Дина хԝә бьдә сәрһатийа бьраки щаһьл бь наве Щошуа. Гава әԝ 15 сали бу, әԝ бь нәхԝәшийа гьран нәхԝәш кʹәт, ле әԝи методед ԛәнщкьрьне йед кӧ мьԛабьли ԛанунед Хԝәде нә, ԛәбул нәкьр. Пешийа мьрьна хԝә, әԝи дийа хԝәрʹа гот: «Дайе, әз дәсте Йаһоԝада мә . . . әз жь дьл баԝәр ьм кӧ Йаһоԝа ԝе мьн жь мьрьне рʹакә. Әԝ занә кӧ дьле мьнда чь һәйә, у әз ԝи гәләк һʹьз дькьм». Ԝе баш бә кӧ әм жи жь хԝә бьпьрсьн: «Һәгәр әз мина ви бьре щаһьл ль бәр мьрьне бума, гәло мьне жи жийина хԝә тʹәсмили дәсте Йаһоԝа бькьра у баԝәр бума кӧ әԝе мьн бир нәкә?» w21.04 12-13 ¶15-16

Щьмәʹта Йаһоԝа жь хьзмәте ԛәԝате дьстинә. Гава әм кәсед дьнрʹа дәрһәԛа рʹастийед жь Кʹьтеба Пироз гьли дькьн, әԝана гӧһ дьдьнә мә йан на, йәкә шабуна мә ӧнда набә. Һьнә кәс дьбәкә дьфькьрьн кӧ һʹале ԝан изне надә кӧ дьһа зедә хьзмәт бькьн. Һәгәр тӧ жи ӧса дьфькьри, бир нәкә кӧ һәгәр тӧ чь жь дәсте тә те бьки, Йаһоԝа ԝе жь тә рʹази бә. Һәгәр әм нькарьн жь мале дәркʹәвьн жи, Йаһоԝа занә кӧ әм һазьр ьн кӧ мьзгине бәла кьн, у әԝ ԛимәт дькә ве хԝәстьна мә. Ләма, Хԝәде дькарә мәщала чекә кӧ әм мьзгине бьдьн кәсед кӧ тен мала мә. Сәва кӧ дьлтәнг нәбьн, гәрәке әм һʹале хԝәйи иро бәрамбәри һʹале хԝәйи бәре нәкьн. Ле һәгәр әм фәʹм бькьн кӧ Йаһоԝа ньһа чаԝа али мә дькә, әме ԛәԝате бьстиньн кӧ ль һьмбәри тәнгасийа бь шабуне сәбьр бькьн. Әм ньзаньн кӧ жь тʹохьмед кӧ әм дьчиньн, кʹижане ԝе кʹок бәрʹдә у мәзьн бьбә (Ԝаиз 11:6). w21.05 24-25 ¶14-17

Даԝьд Пʹадша сәва тьмайе бир кьр кӧ Йаһоԝа чьԛас мал у мьлкʹ, навдари у сәркʹәтьна сәр дьжмьна, дабу ԝи. Даԝьд бь рʹазибуне готьбу кӧ пʹешкʹешед Йаһоԝа беһʹәсаб ьн (Зәбур 40:5). Ле щарәке, Даԝьд бь тьштед кӧ дәсте ԝида һәбун, нә рʹази бу. Рʹаст ә чәнд жьнед Даԝьд һәбун, йәкә диса жи дьле ԝи кʹәтә Бат-Шәба, демәк жьна мерәки дьн,  жьна Урийайе Һитти. Даԝьд тʹәви Бат-Шәбайе зьне кьр, у Бат-Шәба һʹәмлә ма. Сәрда жи, Даԝьд Урийа да кӧштьне! (2 Самуйел 11:2-15) Гәло Даԝьд чьрʹа ӧса кьр? Гәло әԝ дьфькьри кӧ Йаһоԝа ԝи навинә? Рʹаст ә Даԝьд гәләк Йаһоԝа һʹьз дькьр, ле ижар, әԝи сәва тьмайе гӧнед гьран кьрьн. Ахьрийеда, тьштед гәләк хьраб һатьн сәре ԝи. Чьԛас баш ә кӧ ԝәхт шунда, Даԝьд сәва гӧнед хԝә пʹошман бу у тʹобә кьр, у Йаһоԝа бахшандә ԝи. Бьдьнә бәр чʹәʹве хԝә кӧ Даԝьд бона рʹәʹма Йаһоԝа чьԛас рʹази бу! (2 Самуйел 12:7-13). w21.06 17 ¶10

Әм дьбәкә дьфькьрьн кӧ фәрәсәтед мә нагьһижьн ве йәке, кӧ әм һинбунед Кʹьтеба Пироз дәрбаз бькьн. Дьԛәԝьмә әм дьфькьрьн кӧ пешийа әм тʹәви кәсәки һинбуна Кʹьтеба Пироз дәрбаз бькьн, гәрәке әм занәбуна хԝә зедә кьн йан жи һинкьрьнеда бьбьнә һостә. Һәгәр тӧ ӧса дьфькьри, ван се тьшта һьлдә һʹәсаб: Йа пешьн, Йаһоԝа баԝәр ә кӧ тӧ дькари кәсед дьн һин бьки. Йа дӧда, Иса, йе кӧ «һʹәму һʹӧкӧме әʹрд у әʹзмен» дәсте ԝида йә, изьн дайә тә кӧ тӧ мәрьва һин бьки (Мәтта 28:18). У йа сьсийа, тӧ дькари аликʹарийе жь кәсед дьн бьстини. Мәсәлә, Иса хԝә дьспарт Баве хԝә, у тьштед кӧ әԝ жь Баве хԝә һин дьбу, дьгот (Йуһʹәнна 8:28; 12:49). Ԝе баш бә кӧ тӧ жи хԝә бьспери Баве хԝәйи әʹзмана. Ӧса жи, дәрһәԛа дәстпекьрьн у дәрбазкьрьна һинбунед Кʹьтеба Пироз, тӧ дькари жь бәрпьрсийаре кʹома хьзмәте, жь пешәнгәки йан жь мьзгинванәки щерʹьбанди аликʹарийе бьхԝази. Мәсәлә, сәва кӧ дьһа щерʹьбанди би у баԝәр би кӧ тӧйе жи бькарьби ве йәке бьки, тӧ дькари жь ван хушк-бьра бьхԝази, ԝәки тә тʹәглифи сәр һинбуна хԝә кьн. w21.07 6 ¶12

Чьԛас әм незики хьлазийа ве дьнйайе дьбьн, һаԛас дьһа зедә әм гәрәке итʹбарийа хԝә сафикьрьнед Йаһоԝа биньн. Гәло чьрʹа? Ԝәʹде тәнгасийа мәзьн, дьԛәԝьмә рʹебәрийа кӧ әме бьстиньн щара мәрʹа әʹщеб йан нәлогики бе кʹьфше. Йаһоԝа ԝе һәмьки рʹастә-рʹаст тʹәви мә хәбәр нәдә. Ле әԝе бь сайа бьред кʹьфшкьри рʹебәрийе бьдә мә. Ԝәʹде тәнгасийа мәзьн, гәло әме бькʹәвьнә шьке һәла рʹебәрийа кӧ мә жь бьред щабдар стандийә, бь рʹасти жь Йаһоԝа йә йан на? Һьнге ԝе гәләк фәрз бә ԝәки әм итʹбарийа хԝә Йаһоԝа у тʹәшкиләта ԝи биньн. Ләма жи гәрәке әм ида ньһада гӧһ бьдьн рʹебәрийа тʹәшкиләта Хԝәде. Һәгәр әм итʹбарийа хԝә ван рʹебәрийа тиньн, кʹижан кӧ әм иро дьстиньн у пәй ван рʹебәрийа дьчьн, ԝе мәрʹа һеса бә ԝәʹде тәнгасийа мәзьн жи ӧса бькьн. w22.02 6 ¶15

Бь сайа аликʹарийа Йаһоԝа, Гидәон у 300 әскәред ԝи шәрʹәки мәзьнда сәркʹәтьн. Меред Әфрайими чун бал Гидәон, нә сәва кӧ пʹайе ԝи бьдьн, ле ԝәки ԝирʹа шәрʹ бькьн, чьмки әԝи гази ԝан нәкьрьбу, ԝәки тʹәви ԝи һьмбәри дьжмьна шәрʹ бькьн (Һʹакьмти 8:1). Гидәон дина ԝан кʹьшандә сәр ве йәке кӧ Йаһоԝа әԝана чаԝа кʹәрәм кьрьн. Кʹьтеба Пироз дьбежә кӧ һьнге һерса ԝан дани (Һʹакьмти 8:3). Гидәон бона кӧ әʹдьлайе хԝәй кә, хԝә шкенанд у бь мьлукти щаба ԝан да. Жь мәсәла Әфрайимийа, әм дьвиньн кӧ гәрәке әм һәри зедә нә кӧ пәй наве хԝә кәвьн, ле һәр тьшти бькьн кӧ наве Йаһоԝа рʹумәт кьн. Һәгәр тӧ сәре малбәте йан рʹуспи йи, тӧ дькари чʹәʹв бьди Гидәон. Чахе кәсәк сәва кьред тә хәйиди йә, хԝә дайнә дәԝса ԝи у бьфькьрә кӧ чь дьле ԝи ешанд. Ӧса жи, мина Гидәон, тӧ дькари пʹайе ви кәси бьди. Бона ве йәке мьлукти лазьм ә. Диса жи, бир нәкә кӧ дьһа баш ә әʹдьлайе хԝәй ки, нә кӧ хԝә һәԛ дәрхи у пәй наве хԝә кʹәви! w21.07 16-17 ¶10-12

Йаһоԝа әм сурәте хԝәда хӧльԛандьнә. Жь бо ԝе йәке кӧ әм сурәте Хԝәдеда һатьнә әʹфьрандьн, әм дькарьн һʹӧнӧред баш ча һʹьзкьрьн, дьлрʹәʹми, амьни у һәԛийе нав хԝәда пешда биньн (Зәбур 86:15; 145:17). Гава әм һʹӧнӧред ӧса пешда тиньн, әм Йаһоԝа рʹумәт дькьн у рʹазибуна хԝә әʹйан дькьн (1 Пәтрус 1:14-16). Һәгәр әм бь рʹабун-рʹуньштьна хԝә дьле Баве хԝәйи әʹзмана ша бькьн, әме жи шабуне бьстиньн. Ӧса жи, әԝ йәк кӧ Хԝәде әм сурәте хԝәда әʹфьрандьнә те һʹәсабе, ԝәки әм дькарьн бьбьн мәрьвед лайиԛи малбәта ԝи. Йаһоԝа маләкә хԝәш дайә мә. Пешийа кӧ Йаһоԝа мәрьвед пешьн әʹфьранд, әԝи әʹрд бона ԝан һазьр кьр (Ибо 38:4-6; Йерәмйа 10:12). Йаһоԝа йәки хәмкʹеш у мәрʹд ә, ләма жи әԝи гәләк тьштед баш әʹфьрандьнә, ԝәки әм бәхтәԝар бьн (Зәбур 104:14, 15, 24). Гава Хԝәде сәр кьред дәсте хԝә ньһерʹи, әԝи дит кӧ һәр кьред ԝи «гәләки ԛәнщ бун» (Дәстпебун 1:10, 12, 31). w21.08 3 ¶5-6

Мә һʹәмуйарʹа шьхӧл һатийә дайине, ԝәки мьзгине бәла кьн у мәрьва бькьн шагьртед Иса (Мәтта 28:19, 20; Рʹомайи 10:14). Һәгәр тӧ дьхԝази ви шьхӧле фәрзда бьби һостә, хԝәрʹа нет дайнә ԝәки тӧ ширәтед жь брошура «Хԝәндьн у Һинкьрьнеда Щерʹьбанди бә», леколин бьки у бьди хәбате. Гава тӧ хԝәрʹа нета датини, бир нәкә ԝәки нета һәри фәрз әԝ ә кӧ тӧ һʹӧнӧред баш нав хԝәда пешда бини (Колоси 3:12; 2 Пәтрус 1:5-8). Бешьк әм гьшк дьхԝазьн Йаһоԝарʹа һе зедә хьзмәт бькьн. Дьнйа тʹәзәда, әме бькарьбьн бь щурʹе һәри баш ԝирʹа хьзмәт бькьн. Һʹәта әв рʹож бе, ԝе баш бә әм һʹәму мәщала кӧ дькʹәвә дәсте мә, бьдьнә хәбате, чьмки ӧса шабуна мә ԝе зедә бә, у әме гәләк бәрхԝә нәкʹәвьн. Сәрда жи, әме пәсне Йаһоԝа бьдьн, йе кӧ «Хԝәдейе хԝәзьли» йә (1 Тимотʹейо 1:11). Ләма ԝәрә әм тʹьме щабдари у шьхӧлед хԝәрʹа ша бьн, йед кӧ щәм мә ида һәнә! w21.08 25 ¶18-20

Һәгәр де-баве тә Шәʹдед Йаһоԝа нә, демәк тӧ жь зарʹотийе зани ԝәки Йаһоԝа йә Әʹфьрандар. Мәсәлә, тӧ пеһʹәсийайи кӧ әԝи һәр тьшт әʹфьрандийә, кӧ хәйсәт-һʹӧнӧред ԝи чь щурʹәйи нә у нета ԝи бона мә чь йә (Дәстпебун 1:1; Кʹаред Шандийа 17:24-27). Ле гәләк кәс баԝәр накьн ԝәки Хԝәде һәйә у кӧ әԝи һәр тьшт әʹфьрандийә. Әԝана дьбежьн кӧ жийин хԝәха жь шанед бьчʹук пешда һатийә у паше һеди-һеди дьһатьнә гӧһастьне у дьбунә формед дьһа ԛәԝи. Һьнә кәсед кӧ ве йәке баԝәр дькьн, мәрьвнә гәләк хԝәнди нә. Әԝана дьфькьрьн кӧ зандари избат кьрийә, ԝәки Кʹьтеба Пирозда шаши һәнә, у тʹәне мәрьвед нәхԝәнди, бәләнгаз у нәзан баԝәр дькьн ԝәки Әʹфьрандар һәйә. Фьрԛи тʹӧнә чәнд сал ә әм Шәʹдед Йаһоԝа нә, гәрәке әм тʹьме баԝәрийа хԝә ԛәԝи кьн. Һәгәр әм ӧса бькьн, әме нәкʹәвьн бәр байе «сәрԝахтийа дәрәԝә пʹучʹ» йед мәрьвед кӧ Кʹьтеба Пироз рʹәт дькьн (Колоси 2:8). w21.08 14 ¶1-3

Һабил, Нӧһ, Бьраһим у Ибо, бь гӧһдарибуна хԝә у ӧса жи бь баԝәри у ԛӧрбанед хԝә, нишан дькьрьн ԝәки әԝана Йаһоԝа һʹьз дькьн у ԛәдре ԝи дьгьрьн. Әшкәрә йә, кӧ әԝ кәсед амьн чь жь дәсте ԝан дьһат дькьрьн, ԝәки рʹумәте бьдьнә Йаһоԝа, у Йаһоԝа һʹәбандьна ԝан ԛәбул дькьр. Паше, Йаһоԝа Ԛануна Муса да зӧрʹәта Бьраһим. Ван ԛанунада рʹебәри һатьбун дайине, кӧ гәрәке ԝана ча Йаһоԝа бьһʹәбанда. Паши мьрьн у рʹабуна Иса, Йаһоԝа ида дәʹԝа нәдькьр, ԝәки ль гора Ԛануна Муса Ԝи бьһʹәбиньн (Рʹомайи 10:4). Шагьртед Иса ида гәрәке ль гора ԛануна тʹәзә бьжитана, демәк ль гора «ԛануна Мәсиһ» (Галати 6:2). Сәва кӧ гӧһ бьдьн ве «ԛануне», нә лазьм бу кӧ ԝана ԛәйдә әзбәри бькьн. Ԝана гәрәке чʹәʹв бьда Иса у ль гора һинкьрьнед ԝи бьжитана. Иро, әм жи чь жь дәсте мә те дькьн, кӧ пәй Иса һәрʹьн ԝәки Йаһоԝа жь мә рʹази бә у әм бькарьбьн «рʹьһʹәтийе бьбиньн» (Мәтта 11:29). w22.03 20-21 ¶4-5

Йаһоԝа гӧһ дьдә зарʹед хԝә. Гава Иса сәр әʹрде бу, әԝи гәләк щара дӧа дькьр, у Йаһоԝа гӧһ дьда дӧайед ԝи. Гава Иса дәрһәԛа сафикьрьнед фәрз дӧа дькьр, мәсәлә дәрһәԛа бьжартьна 12 шандийа, Хԝәде гӧһ дьда ԝи (Луԛа 6:12, 13). Ӧса жи, гава Иса Йаһоԝарʹа бәʹса хәмед хԝә дькьр, Йаһоԝа гӧһ дьда ԝи. Пешийа кӧ Иса һатә гьртьне, әԝи дәрһәԛа чәтьнайед кӧ ԝе бьһатана сәре ԝи, дӧа кьр. Йаһоԝа һьм гӧһ да ве дӧайе һьм жи мәләкәк шанд, ԝәки әԝ дьле Кӧрʹе ԝийи дәлал ԛәԝи бькә (Луԛа 22:41-44). Иро жи Йаһоԝа гӧһ дьдә дӧайед хьзмәткʹаред хԝә, у ԝәхта рʹастда бь щурʹе һәри баш щаба ԝан дьдә (Зәбур 116:1, 2). Сәрһатийа хушкәкә жь Һьндьстане ве йәке зәлал нишан дькә. Әԝ гәләк дьлтәнг дьбу у емосийалида хԝә хьраб тʹәхмин дькьр, ләма әԝе дәрһәԛа ве проблеме Йаһоԝарʹа дӧа кьр. Әԝ дьбежә: «Бәрнама JW Бродкастинг йа мәһа Гӧлане, сала 2019, ԝәʹдәда бу у һәма бона мьн бу. Әз һин бум кӧ гәрәке чь бькьм гава хәмгин у дьлтәнг ьм. Бь рʹасти жи әв бәрнамә щаба дӧайед мьн бу!». w21.09 21-22 ¶6-7

Һәла бьдә бәр чʹәʹве хԝә кӧ бона ван шагьртед Иса Мәсиһ, кʹижан кӧ ԛьрʹна йәкеда дьман, чьԛас зор бу һәр тьшти бьһельн у тʹәзәда һәр тьшти дәстпекьн! Лазьм бу кӧ әԝана баԝәрийа хԝә Йаһоԝа биньн, ԝәки әԝ ԝе бона һʹәԝщед ԝан хәм бькә. Ле пенщ сал пешийа кӧ Рʹомайа дора бажаре Оршәлиме гьрт, Паԝлосе шанди әв ширәта керһати дабу хушк-бьред Ибрани: «Пʹәрәһʹьзи бьра нава жийина ԝәда щи нәгьрә у дәстед ԝәда чьԛас һәйә, рʹази бьн, чьмки Хԝәде гот: ‹Әзе тʹӧ щар жь тә нәчьм у тʹӧ щар тә бәрʹнадьм›. Ләма жи рʹуйе мә дьгьрә кӧ әм бежьн: ‹Хӧдан пьштоване мьн ә у әз натьрсьм. Инсане чь ль мьн бькә?›» (Ибрани 13:5, 6). Ԝан Мәсиһийарʹа, йед кӧ пешийа һатьна ордийа Рʹоме гӧһ дабу ширәта Паԝлос, бешьк дьһа һеса бу һʹале хԝә рʹази бьн. Ԝана заньбу ԝәки Йаһоԝа ԝе бона һʹәԝщед ԝан хәм бькә. w22.01 4 ¶7, 9

Дьлрʹәʹми һʹӧнӧрәки гәләк хԝәш ә. Әв һʹӧнӧр бь ԛәнщийе, дьлгәрмийе, дьлшәԝатийе, у мәрʹданийева гьредайи йә. Мәтʹәлока Иса дәрһәԛа мерәки Самәрийе дьлрʹәʹм биньн бира хԝә. Әв мер жь мьләтәки дьн бу, ле  гава әԝи мерәки Щьһу дит, йе кӧ кʹәтьбу дәстед ԛачаха, «гӧне ԝи ле һат». Мере Самәри бь дьловани Щьһуйе бьриндар бу хԝәйи, чьмки дьле ԝи сәр шәԝьти (Луԛа 10:29-37). Әв мәтʹәлок дина мә дькʹьшинә сәр рʹәʹмтийа Хԝәде. Хԝәде һьндава мәда рʹәʹм ә, чьмки әԝ мә һʹьз дькә у әԝ һәр рʹож рʹәʹма хԝә мәрʹа нишан дькә. Хенщи ве йәке, дьлрʹәʹми щарна те һʹәсабе ԝәки кәсәки кӧ һежайи щәза йә, щәза нәкьн. Йаһоԝа рʹәʹма хԝә бь ви щурʹәйи мәрʹа гәләк щар нишан дькә. Кʹьтеба Пироз ӧса дьбежә: «Әԝ ԝәкә гӧнәйед мә, сәре мә накә» (Зәбур 103:10). Ле щара лазьм ә ԝәки Йаһоԝа кәсе  кӧ гӧнә кьрийә, щәза бькә. w21.10 8 ¶1-2

Йаһоԝа һʹьзкьрьна хԝәйә амьн тʹәне достед хԝәрʹа, демәк хьзмәткʹаред хԝәрʹа нишан дькә. Готьнед Даԝьд Пʹадша у Данийел ве йәке нишан дькьн. Мәсәлә, Даԝьд ӧса готьбу: «Һʹӧба Хԝә жь насед Хԝә нәбьрʹә». «Һʹӧба Хӧдан . . . һʹәта-һʹәтайе йә, ль сәр хофкʹешед Ԝи йә». Данийел жи гот, ԝәки Хԝәдайе рʹаст Йаһоԝа, һʹьзкьрьна амьн дьдә кʹьфше һьндава ԝан, йед кӧ ԝи һʹьз дькьн у тʹәмийед ԝи тиньн сери (Зәбур 36:10; 103:17; Данийел 9:4). Ль гора ван готьнед жь Хәбәра Хԝәде, Йаһоԝа һʹӧба хԝәйә амьн, демәк һʹьзкьрьна амьн, нишан дькә һьндава кәсед кӧ ԝи нас дькьн, жь ԝи дьтьрсьн, ԝи һʹьз дькьн у тʹәмийед ԝи тиньн сери. Бәле, сәва әм жь һʹьзкьрьна Йаһоԝайә амьн кʹаре бьстиньн, гәрәке әм бь щурʹе рʹаст ԝирʹа хьзмәт бькьн. Пешийа кӧ мә дәстпекьр Йаһоԝарʹа хьзмәт кьн, мә жь һʹьзкьрьна ԝи кʹар дьстанд, йа кӧ әԝ һьндава тʹәмамийа инсанәте нишан дькә (Зәбур 104:14). Ле чахе әм бунә хьзмәткʹаред ԝи, әм ӧса жи жь һʹьзкьрьна ԝийә амьн кʹаре дьстиньн. w21.11 4 ¶8-9

Чь жи бьбә әм һазьр ьн гӧһ бьдьнә ван хәбәред Иса жь рʹеза ве рʹоже. Гәләк мәрьв пәй сәрԝеред религийа у кʹәшишед нав-дәнг дьчьн. Әԝана һаԛас ԝанарʹа фьрнаԛ дьбьн, ԛәй те бежи сәре хԝә бәр ԝан датиньн. Әԝ дьчьн деред ԝан, кʹьтебед ԝан дькʹьрʹьн у пе ԛӧрбанкьрьнед ԛальм пьштгьрийа ԝан дькьн. Готьнед ԝан бона мәрьва ԛанун ә. Мәрьв ӧса ԝан сәрԝеред религийарʹа ша дьбьн у ԝанрʹа дьрʹьщьфьн, те бежи Иса бәр ԝан сәкьнийә! Ле Шәʹдед Йаһоԝа ӧса накьн. Сәрок у кʹәшишед мә тʹӧнә нә. Әм чьԛас жи ԛәдре бьред щабдар дьгьрьн, әм ван готьнед Иса ԛәбул дькьн: «Һун һʹәму жи бьра нә» (Мәтта 23:8-10). Әм сәре хԝә бәр сәрԝеред религийайе у бәр сәрԝеред политике данайньн. Әм, Шәʹдед Йаһоԝа, пьштгьрийа нетед ԝан накьн. Әм тʹәвнәбуйине хԝәй дькьн у тʹәви шьхӧле ве дьнйайе набьн. Бь ԝи щурʹәйи, Шәʹдед Йаһоԝа бь рʹасти жи жь религийед, кӧ хԝә ча Мәсиһи нав дькьн, щӧдә дьбьн (Йуһʹәнна 18:36). w21.10 20 ¶6-7

Һәр шагьрте Иса, йе кӧ дьхԝазә пироз бә, гәрәке һаш жь хԝә һәбә ԝәки тʹӧ тьшт у тʹӧ кәс достийа ԝи тʹәви Хԝәде хьраб нәкә. Әм Шәʹдед Йаһоԝа нә. Наве Хԝәде ль сәр мә йә, ләма гәрәке әм хԝә жь һʹәму кьред ӧса дур бьгьрьн, йед кӧ дькарьн ләкʹә биньн сәр наве ԝийи пироз (Ԛануна Каһинтийе 19:12; Ишайа 57:15). Гава Исраелийа гӧрʹа ԛанунед Хԝәде дькьрьн, бь ве йәке ԝана дьда кʹьфше ԝәки Йаһоԝа ча Хԝәдайе хԝә ԛәбул дькьн. Ԛануна Кʹаһинтийе 18:4 ӧса дьбежә: «Ԛьраред мьн бьԛәдиньн у ԛәйдәԛанунед мьн хԝәй кьн пе ԝан һәрʹьн, әз Хӧдан Хԝәдейе ԝә мә». Һьнә жь ван «ԛәйдә-ԛанунед» Хԝәде сәре 19-да ньвисар ьн. Мәсәлә, рʹезед 5 һʹәта 8 у 21 у 22 бәʹса ԛӧрбана дькьн. Лазьм бу кӧ мәрьва ԛӧрбанед лайиԛ пʹешкʹеш кьрана, ԝәки «тьштед Хӧданә пироз» нәһʹәрʹьминьн. Хԝәндьна ван рʹеза дькарә хԝәстьна мә зедә бькә, ԝәки дьле Йаһоԝа ша бькьн у «ԛӧрбана пәсьндайине» пʹешкʹеши ԝи бькьн (Ибрани 13:15). w21.12 5-6 ¶14-15

Щотед зәԝьщи дькарьн жь мәсәла хушк-бьред кӧ итʹбарийа хԝә Йаһоԝа тиньн, кʹаре бьстиньн. Һьнә щотед зәԝьщи дьбәкә бь дәһа сала хьзмәта һәртʹьмда нә. Сәва кӧ һун хԝәрʹа нетед баш дайньн, һун дькарьн жь кәсед ӧса ширәта бьхԝазьн. Бь ви щурʹәйи һуне нишан кьн, ԝәки хԝә дьсперьн Йаһоԝа (Мәтʹәлок 22:17, 19). Бир нәкьн зәԝащ пʹешкʹешәкә жь Йаһоԝа йә (Мәтта 19:5, 6). Әԝ дьхԝазә ԝәки щотед зәԝьщи жь ве пʹешкʹеше шабуне бьстиньн. Жьн-меред щаһьл, бьфькьрьн һун жийина хԝә ча дәрбаз дькьн. Гәло һун чь жь дәсте ԝә те дькьн, ԝәки рʹазибуна хԝә Йаһоԝарʹа нишан бькьн? Тʹьме дӧада тʹәви Йаһоԝа хәбәр дьн. Дина хԝә бьдьне кӧ кʹижан принсипед Кʹьтеба Пироз дькарьн али ԝә бькьн сафикьрьнед баш бькьн. Паше жи ԝан ширәтед Йаһоԝа жийина хԝәда бьдьнә хәбате. Баԝәр бьн кӧ һәгәр һун зәԝаща хԝәда хьзмәта Йаһоԝа дайньн щийе пешьн, һуне гәләк бәхтәԝар бьн! w21.11 19 ¶16, 18

Аԛуб хԝә жь кәсед дьн бьльндтьр һʹәсаб нәдькьр. Рʹаст ә Аԛуб бьре Иса бу у щабдарийед ԝийә мәхсус һәбун, ле диса жи әԝи хԝә сәр баԝәрмәндед дьнрʹа нәдьгьрт. Әԝи ԝанрʹа дьгот: «Хушк-бьрайед мьнә дәлал!» (Аԛуб 1:16, 19; 2:5). Әԝи хԝә ча мәрьве беԛьсур һʹәсаб нәдькьр. Дәрс: Бир нәкә кӧ әм гьшк гӧнәкʹар ьн. Гәрәке әм хԝә жь хԝәндәкʹаред хԝә бьльндтьр һʹәсаб нәкьн. Гәло чьрʹа? Һәгәр әм хԝә ӧса бьдьнә кʹьфше кӧ те бежи әм беԛьсур ьн у шашийа накьн, әԝе дьԛәԝьмә бьфькьрьн кӧ әԝана тʹӧ щар нькарьбьн бьбьнә мина мә у һʹәму алийава бе шаши гӧрʹа Хԝәде бькьн. Ԝе баш бә әм бь һʹәлали биньн сәр хԝә, ԝәки мәрʹа жи щарна зор ә ль гора принсипед Кʹьтеба Пироз бьжин. Ӧса жи, әм дькарьн хԝәндәкʹаред хԝәрʹа гьли кьн, кӧ Йаһоԝа ча али мә кьрийә ԝәки әм пешда һәрʹьн. Бь ви щурʹәйи, әԝе фәʹм бькьн кӧ әԝана жи дькарьн Йаһоԝарʹа хьзмәт кьн. w22.01 11-12 ¶13-14

Чьԛас һе зедә әм мина Иса бьфькьрьн, һаԛас һе зедә әме кьред хԝәда чʹәʹв бьдьнә ԝи, у хәйсәте мә ԝе дьһа зедә бьбә мина хәйсәте ԝи (Ибрани 1:3). Дьԛәԝьмә тӧ бежи: «Иса йәки беԛьсур бу. Әз тʹӧ щар нькарьм бь тʹәмами бьбьмә мина ԝи!» Ле ван тьшта бир нәкә: Йа йәке, әм сурәте Йаһоԝа у Исада һатьнә әʹфьрандьне, ләма жи әм хәйсәт-һʹӧнӧред хԝәда дькарьн бьбьнә мина ԝан. Әԝ те һʹәсабе кӧ тӧ дькари чʹәʹв бьди ԝан у ве йәкеда пешда һәрʹи (Дәстпебун 1:26). Йа дӧда, рʹӧһʹе пироз тʹәмамийа гәрдунеда ԛәԝата һәри мәзьн ә. Рʹӧһʹе пироз дькарә али тә бькә, тьштед ӧса бьки, кʹижан кӧ тәйе тʹӧ щар пе ԛәԝата хԝә нькарьбуйа бькьра. Йа сьсийа, Йаһоԝа набежә кӧ гәрәке тӧ «бәре рʹӧһʹ» бь щурʹәки беԛьсур әʹйан ки. Дьнйа тʹәзәда, Баве мәйи дәлал, 1 000 сали ԝе һивийе бә һʹәта мәрьв бьгьһижьнә беԛьсуртийе (Әʹйанти 20:1-3). Ле ньһа Йаһоԝа тʹәне дьхԝазә кӧ әм чь жь дәсте мә те бькьн у итʹбарийа хԝә ԛәԝата ԝи биньн. w22.03 9 ¶5-6

Хенщи дӧакьрьне, һьнә тьштед дьн жи дькарьн достийа мә тʹәви Йаһоԝа дьһа ԛәԝи кьн, мәсәлә леколина Кʹьтеба Пироз у щьватед мә. Гәло тӧ дькари чь бьки ԝәки ԝәʹде хԝә бона леколине у щьвина бь билани бьди хәбате? Жь хԝә ӧса бьпьрсә: «Гава әз гӧһ дьдьмә щьвата йан жи леколина шәхси дькьм, һʹәчʹи зәʹф чь һʹьш-аԛьле мьн дьрʹәвинә?» Дьԛәԝьмә проблем әв ә, кӧ кәсәк ԝәʹде щьвате йан ԝәʹде леколине тәрʹа тʹеле дьхә йан жи смса дьшинә? Һәгәр тӧ тедәрдьхи ԝәки ԝәʹде леколине йан щьвине, һʹьше тә дьчә сәр тьштед дьн, жь Йаһоԝа аликʹарийе бьхԝазә. Һәгәр тӧ сәва тьштәки бәрхԝә дькʹәви йан жи дьлтәнг и, дьбәкә нә һеса йә рʹьнд дина хԝә бьди сәр тьштед рʹӧһʹани, ле гәләк фәрз ә ве йәке бьки. Дӧа бькә ԝәки әʹдьлайа Хԝәде нә тʹәне дьле тә, ле һʹьше тә жи хԝәй кә (Филипи 4:6, 7). w22.01 29-30 ¶12-14

Узийа Пʹадша ширәт инкʹар кьр. Щарәке, әԝ кʹәтә пʹарьстгәһа Йаһоԝа, щики ӧса, кʹидәре тʹәне изна кʹаһина һәбу бькʹәвьне, у әԝи дьхԝәст бьхуре бьшәԝьтинә. Һьнге кʹаһина ԝирʹа гот: «Йа Уззийа жь Хӧданрʹа бӧхӧр вехьстьн нә жь тәрʹа йә, ле жь кʹаһинед, жь лаԝед Һарун, йед кӧ бона бӧхӧр вехьстьне һатьнә пироз кьрьнрʹа дькʹәвә». Гәло Узийа чь кьр? Һәгәр әԝи әв ширәт бь мьлукти ԛәбул кьра у дәрберʹа жь пʹарьстгәһе дәркʹәта, дьԛәԝьмә Йаһоԝа бьбахшанда ԝи. Ле Узийа һерс кʹәт. Гәло әԝи ширәта кӧ жерʹа һатә дайине, чьрʹа инкʹар кьр? Әшкәрә йә, ԝәки әԝ дьфькьри кӧ әԝ пʹадша йә, у ләма жи изна ԝи һәйә ԝәки ль гора дьле хԝә бькә. Ле Йаһоԝа ӧса нәдьфькьри. Сәва ԛӧрʹәбуна хԝә, Узийа бь кʹотибуне һатә щәзакьрьне у «һʹәта рʹожа мьрьна хԝә» кʹоти ма (2 Дирок 26:16-21). Сәрһатийа Узийа нишан дькә, ԝәки фьрԛи тʹӧнә кӧ әм кʹи бьн жи, һәгәр әм ширәта кӧ сәр һʹиме Кʹьтеба Пироз мәрʹа те дайине, инкʹар кьн, әме достийа хԝә тʹәви Йаһоԝа ӧнда кьн. w22.02 9 ¶7

«Мәрьве кәвьн» те һʹәсабе әԝ мәрьв, йе кӧ ль гора хԝәстьнед бәдәнейә гӧнәкʹар дьфькьрә у дьжи (Колоси 3:9). Әԝ мәрьв дькарә хԝәһʹьз, һерс, бешекьр у ԛӧрʹә бә. Ӧса жи әԝ мәрьв дьбәкә порнографийа у филмед бь бенамуси у зордари, һʹьз дькә. Бал ԝи бешьк һьнә хәйсәтед баш жи һәнә, у дьԛәԝьмә әԝ хԝә сәва готьн у кьред хԝәйә хьраб сущдар дькә. Ле хԝәстьна ԝи һаԛас тʹӧнә, ԝәки ньһерʹандьн у рʹабун-рʹуньштьна хԝә бьгӧһезә (Галати 5:19-21; 2 Тимотʹейо 3:2-5). Әм гӧнәкʹар ьн, ләма жи әм нькарьн һʹәму фькьр у хԝәстьнед хьраб жь һʹьш у дьле хԝә дәрхьн. Щарна, әм сәва тьштәки кӧ мә готийә йан кьрийә пʹошман дьбьн (Йерәмийа 17:9; Аԛуб 3:2). Ле гава әм «мәрьве кәвьн» жь хԝә дехьн, хԝәстьнед бәдәне ида мә контрол накьн. Һьнге ньһерʹандьн, рʹабун-рʹуньштьн у хәйсәт-һʹӧнӧред мә тенә гӧһастьне (Ишайа 55:7). w22.03 3 ¶4-5

Рʹуспино, дина хԝә бьдьнә хәйсәтед баш йед хушк-бьра! Рʹаст ә һәр кәс гӧнәкʹар ә, ле хәйсәт-һʹӧнӧред баш бал һәр кәси һәйә. Дьбәкә щарна лазьм бә кӧ рʹуспи фькьр у ньһерʹандьнед хушк-бьра рʹаст кьн. Диса жи, мина Паԝлосе шанди, ԝе баш бә кӧ һерса ԝан сәва готьн у кьред хушк-бьра рʹанәбә, ле дина хԝә бьдьн ве йәке кӧ хушк-бьра Йаһоԝа чьԛас һʹьз дькьн, чаԝа бь сәбьр Хԝәдерʹа хьзмәт дькьн у дькарьн ԛәнщийе бькьн. Рʹуспи бь ньһерʹандьна хԝәйә позитив, щьват дькьнә мина һелунәкә хԝәш у гәрм. Бир нәкьн кӧ Йаһоԝа жь ԝә һивийа беԛьсуртийе нинә, әԝ һивийа амьнийе йә (1 Корьнтʹи 4:2).  Һун дькарьн баԝәр бьн, ԝәки Әԝ хьзмәта ԝә жи ԛимәте дькә. Йаһоԝа ԝе тʹӧ щар бир нәкә «кьред ԝә у әԝ һʹьзкьрьна кӧ ԝә бона наве ԝи да кʹьфше . . . , йа кӧ ԝә щьмәʹта Хԝәдерʹа хьзмәткʹари кьр у дькьн жи»! (Ибрани 6:10). w22.03 31 ¶19, 21