Мьждар

Йаһоԝа бь щурʹә-щурʹе метода пьштгьрийа мә дькә. Әԝ дькарә али тә бькә гава тӧ рʹасти пәйкʹәтьна бей, ԝәки тӧ дьлрʹьһʹәт бьмини. Ӧса жи, әԝе али тә бькә һьнә рʹезед лазьм бини бира хԝә ԝәки ԝан мәрьварʹа бьхуни, йед кӧ гӧһ дьдьнә тә. Гава тʹӧ кәс гӧһ нәдьда тә жи, әԝ ԛәԝате бьдә тә ԝәки тӧ хьзмәта хԝә бәрдәԝам бьки (Йерәмйа 20:7-9). Йаһоԝа ӧса жи ԛәнщийа хԝә мәрʹа нишан дькә кӧ мә һин дькә чаԝа хьзмәт бькьн. Мәсәлә, сәр щьвата «Бьжин у Хьзмәт кьн», әм һин дьбьн ча тʹәви мәрьва хәбәрдане дәстпекьн. Серида дьбәкә мәрʹа һʹәвәки чәтьн ә методәкә тʹәзә бьдьнә хәбате, ле ԝәʹдә шунда әм дьвиньн ԝәки әв метод бона дәшта мә керһати йә. Ӧса жи, щарна сәр щьвата у щьватед мәзьн те готьне, ԝәки әм мьзгине бь щурʹед тʹәзә бәла кьн. w21.08 27 ¶5-6

Паԝлосе шанди нәʹма хԝәйә Корьнтʹийарʹа ширәтед рʹастә-рʹаст ньвиси. Паши кӧ әԝи әв нәʹмә ԝанрʹа ньвиси, әԝи Тито шандә бал ԝан. Гава әԝи бьһист кӧ ԝана ширәтед ԝи ԛәбул кьрьн у пек анин, әԝ гәләк ша бу (2 Корьнтʹи 7:6, 7). Мина Паԝлосе шанди, ԝе баш бә кӧ рʹуспи тʹәви хушк-бьра ԝәʹдә дәрбаз кьн. Мәсәлә, ԝе баш бә кӧ әԝана һьнәки зу һәрʹьн Ода Щьвате, ԝәки бькарьбьн пешийа щьвина тʹәви хушк-бьра хәбәр дьн у ԝан һелан кьн. Щарна, бона һеландайине бәс ә ԝәки рʹуспи тʹәви кәсәки чәнд дәԛа хәбәр дьн (Рʹомайи 1:12). Мина Паԝлосе шанди, ԝе баш бә кӧ рʹуспи бь сайа Хәбәра Хԝәде хушк-бьра ԛәԝи кьн у ԝана бьдьн баԝәркьрьне кӧ Хԝәде ԝана һʹьз дькә. Ӧса жи гәрәке рʹуспи мәщала бьгәрʹьн кӧ пʹайе ԝан бьдьн. Һәгәр лазьм бә кӧ рʹуспи ширәте бьдьн кәсәки, гәрәке әԝана ве йәке сәр һʹиме Хәбәра Хԝәде бькьн. Сәва кӧ ширәтәк бьгьһижә дьле хушк-бьра, лазьм ә кӧ әв ширәт бь зәлали у бь дьловани бе дайине (Галати 6:1). w22.03 28-29 ¶11-12

Иро жи, Йаһоԝа «зорайийа ԛәԝате» дьдә хьзмәткʹаред хԝә, ԝәки әԝана бькарьбьн ԝирʹа бь амьни хьзмәт бькьн. Әфәси 6:18-да, Паԝлосе шанди готьбу кӧ бьра әм «һәр гав» дӧа бькьн, ԝәки Хԝәде ԛәԝате бьдә мә. Щарна, әм дьбәкә ньзаньн кӧ дӧайед хԝәда чь бежьн. Ле чьԛас мәрʹа зор бә жи хәбәред рʹаст бьжберьн, Йаһоԝа дьхԝазә кӧ әм ԝирʹа дӧа бькьн (Рʹомайи 8:26, 27). Әԝ ӧса жи бь сайа Кʹьтеба Пироз ԛәԝате дьдә мә. Чаԝа кӧ Паԝлосе шанди жь Ньвисаред Пироз ԛәԝат у дьлбини дьстанд, ԝе баш бә кӧ әм жи хԝә бьсперьн Кʹьтеба Пироз (Рʹомайи 15:4). Һәрге әм Кʹьтеба Пироз бьхуньн у ль сәр ԝе кʹур бьфькьрьн, Йаһоԝа дькарә бь сайа рʹӧһʹе пироз нишани мә бькә кӧ әм чаԝа дькарьн жь ве хԝәндьне кʹаре бьстиньн (Ибрани 4:12). w21.05 22 ¶8-10

Әм һьлбәт заньн кӧ чьԛас фәрз ә ԝәки әм мәрьва һин бькьн. Ле һьнә тьшт дькарьн бьбьн сәбәб кӧ әм хԝә паш хьн. Дәрәщед мә дькарьн рʹийа мә бьгьрьн. Мәсәлә, сьһʹәт-ԛәԝата һьнә мьзгинвана нә баш ә, у һьнәк жи ида кал у пир бунә. Һәгәр бал тә проблемәкә ӧса һәйә, бир нәкә кӧ әм һеса дькарьн һинбунед Кʹьтеба Пироз бь сайа Интернете дәрбаз бькьн. Ләма, дьбәкә тӧ жи дькари жь мале тʹәви кәсәки һинбуна Кʹьтеба Пироз дәстпеки. Ве йәкеда кʹарәкә дьн жи һәйә. Һьнә мәрьв дьхԝазьн һинбуна Кʹьтеба Пироз дәстпекьн, ле әԝана ви ԝәʹдәйи чахе хушк-бьред мә дьчьн хьзмәте, вала ниньн. Әԝана дьбәкә сьбәһе зу йан шәв вала нә. Гәло тӧ дькари ль сьһʹәтед ӧса һинбунәкә Кʹьтеба Пироз дәрбаз ки? Иса жи шәв тʹәви мерәки бь наве Никодемо хәбәр дьда, чьмки Никодемо ль ԝе ԝәхте дьхԝәст хәбәр дә (Йуһʹәнна 3:1, 2). w21.07 5 ¶10-11

Ль рʹожед Иса Мәсиһ, шагьртед Йуһʹәннайе Ньхӧмдар әʹщебмайи дьман, чьмки шагьртед Иса Мәсиһ рʹожи нәдьгьртьн. Иса ԝанрʹа гот кӧ һʹәта әԝ сах ә, нәлазьм ә кӧ әԝана рʹожийе бьгьрьн (Мәтта 9:14-17). Ферьси у дьжмьнед дьн йед Иса, ԝи нәһәԛ дькьрьн чьмки әԝи әʹрф-әʹдәтед ԝан нәдьанин сери. Ԝәхта кӧ Иса Мәсиһ кәсед нәхԝәш ль рʹожа Шәмийе ԛәнщ дькьрьн, әԝана һерс дькʹәтьн (Марԛос 3:1-6; Йуһʹәнна 9:16). Жь алийикива, Щьһуйа дьгот кӧ әԝана ԛәдре рʹожа Шәмийе дьгьрьн, ле жь алийе дьнва, ԝана пʹарьстгәһеда арш-верши дькьрьн, у гава Иса сәва ве йәке ԝана сущдар кьр, әԝана гәләк һерс кʹәтьн (Мәтта 21:12, 13, 15). Щарәке жи, гава Иса Мәсиһ ль кʹьништа Ньсрәте бәʹса һьнә мәсәлед жь тʹәрихе кьр у ӧса жи хԝәһʹьзи у бебаԝәрийа ԝана әшкәрә кьр, һерса ԝан рʹабу (Луԛа 4:16, 25-30). Гәләк кәс сәр готьн у кьрьнед ԝи дьлькʹӧмин, чьмки әв ль гора дьле ԝан нибун (Мәтта 11:16-19). w21.05 5-6 ¶13-14

Бь сайа сәрһатийед кәсед дьн, Йаһоԝа мә дәрһәԛа ԛӧрʹәти у тьмайе һʹьшйар дькә у ширәт дькә. Алийе тьмайеда, мәсәла пешьн Мире-щьна йә. Әԝ йәк жь мәләкед Йаһоԝа бу, у бешьк гәләк шьхӧлед ԛимәт жерʹа һатьбун дайине. Ле әԝ бь тьштед кӧ дәсте ԝида һәбун, нә рʹази бу. Әԝи дьхԝәст кӧ мәләк у инсан нә кӧ Йаһоԝарʹа, ле ԝирʹа хьзмәт кьн. Мире-щьна дьхԝазә кӧ әм жи мина ԝи бьн, ләма әԝ һәр тьшти дькә ԝәки тьмайе бькә дьле мә. Ль бахче Едене, әԝи әв метод щара пешьн да хәбате. Йаһоԝа тʹер-тʹьжә хԝарьн дабу Адәм у Һеԝайе. Изна ԝан һәбу кӧ жь һʹәму даред бахче бьхԝьн; тʹәне дарәк һатьбу ԛәдәхәкьрьн (Дәстпебун 2:16). Диса жи, Мире-щьна Һеԝа хапанд кӧ әԝ бәре ԛәдәхәкьри бьхԝазә у бьхԝә. Һеԝайе бь тьштед кӧ дәсте ԝеда һәбун, нә рʹази бу. Сәва тьмайе, Һәԝайе гӧнә кьр у хьлазийеда мьр (Дәстпебун 3:6, 19). w21.06 14 ¶2-3; 17 ¶9

Йаһоԝа дьхԝәст кӧ Адәм у Һеԝайе зарʹ дьне хьстана у тʹәмамийа әʹрде бькьрана щьнәт. Һәгәр ԝана гӧһ бьдана Йаһоԝа у ль гора нета ԝи бьжитана, әԝана у зӧрʹәта ԝан ԝе һʹәта-һʹәтайе бьбуна пʹара малбәта Хԝәде. Адәм у Һеԝайе малбәта Йаһоԝада щики мәхсус дьгьртьн. Зәбур 8:5-да Даԝьд дәрһәԛа ԝана ӧса гот: «Тә һьнәки жь мьлйакʹәта әԝ ньмьзтьр кьр, рʹумәт у рʹәԝшева әԝ хәмьланд». Рʹаст ә, ԛәԝат, билани у һʹӧнӧред мәрьва мина йед мәләка ниньн (Зәбур 103:20). Диса жи, Кʹьтеба Пироз дьбежә ԝәки мәрьв тʹәне «һьнәки» жь мәләка ньмьзтьр ьн. Сәд һʹәйф, Адәм у Һеԝайе щийе хԝә малбәта Йаһоԝада ӧнда кьрьн. Әԝ йәк ахьрийа хьраб ани сәре зӧрʹәта ԝан. Ле нета Йаһоԝа бона мәрьва нәһатийә гӧһастьне. Әԝ диса жи дьхԝазә, ԝәки мәрьвед гӧһдар бьбьнә зарʹед ԝи у һʹәта-һʹәтайе бьжин. w21.08 2-3 ¶2-4

Иро, гәләк хьзмәткʹаред Йаһоԝа рʹасти пәйкʹәтьна тен. Мәсәлә, шьхӧле Шәʹдед Йаһоԝа һьнә ԝәлатада һатийә ԛәдәхәкьрьне. Ван ԝәлатада, хушк-бьред мә щарна дькьнә кәле, дьбьнә «бәр ԝәлийа у пʹадша», ԝәки ԝанрʹа шәʹдәтийе бьдьн (Мәтта 10:17, 18). Һьнә хушк-бьред мә жи нә кӧ жь алийе дәԝләтева, ле жь алийе мәрьвед хԝәва рʹасти мьԛабьлибуне тен (Мәтта 10:32-36). Гәләк щар, гава йед мьԛабьл фәʹм дькьн кӧ әԝана нькарьн мәрьвед хԝә, йед кӧ Шәʹдед Йаһоԝа нә, бьдьн сәкьнандьне, әԝана ида пәй ԝан накʹәвьн. Сәрда жи, һьнә кәсед кӧ бәре гәләк мьԛабьли хушк-бьред мә дәрдькʹәтьн, бунә Шәʹдед Йаһоԝа. Ләма жи, гава тӧ рʹасти мьԛабьлибуне тейи, мерхасийа хԝә ӧнда нәкә! Чьмки Йаһоԝа у рʹӧһʹе ԝийи пироз пьштгьрийа тә дькьн, у нә лазьм ә кӧ тӧ бьтьрси! w22.03 16 ¶8

Нәфрʹәт кә ԝан тьшта, чь кӧ Йаһоԝа нәфрʹәт дькә. Ль гора Кʹьтеба Пироз, Йаһоԝа «чʹәʹвед кʹӧбар, зьмане дәрәԝин, дәстед кӧ хуна бесущ дьрʹежьн» нәфрʹәт дькә (Мәтʹәлок 6:16, 17). Ӧса жи, мәрьвед «ԛәтʹьл у ԛәлп» бәр чʹәʹве ԝи рʹәш ьн (Зәбур 5:6). Рʹожед Нӧһда, Йаһоԝа ԛьрʹа һʹәму мәрьвед хьраб ани, чьмки ԝана әʹрд бь зӧлм у зордарийе тʹьжә кьрьбу (Дәстпебун 6:13). Ӧса жи, Йаһоԝа бь сайа Малахи пʹехәмбәр готьбу, ԝәки Әԝ ԝан кәса нәфрʹәт дькә, йед кӧ ԛәста нәмамийа һәвалзәԝаще хԝә дькьн, сәва кӧ жь ԝана бьԛәтьн. Хԝәде һʹәбандьна ԝан ԛәбул накә, у ԝе диԝана ԝан бькә (Малахи 2:13-16; Ибрани 13:4). Йаһоԝа дьхԝазә кӧ әм «жь хьрабийе зьвер бьн» (Рʹомайи 12:9). Хәбәра «зьвер» те һʹәсабе гава тьштәк бәр чʹәʹве мәрьва рʹәш ә у һʹәрам ә. Ләма жи гәрәке әм ван тьшта нәфрʹәт бькьн чь кӧ бәр чʹәʹве Йаһоԝа рʹәш ьн, у хԝә жь ԝан тьшта дур бьгьрьн. w22.03 4-5 ¶11-12

Зутьрәке Баве мәйи әʹзмана ԝе бь сайа Пʹадшатийа хԝә кʹәрәма сәр мәда бьбаринә. Кәсед кӧ һивийа Йаһоԝа нә, ԝе һьм ньһа һьм жи дьнйа тʹәзәда гәләк кʹәрәма бьстиньн. Чахе хьзмәткʹаред Хԝәде бькʹәвьнә дьнйа тʹәзә, әԝана ԝе жь кӧл-дәрдед иройин хьлаз бьн. Нәһәԛи у еш ԝе ида дәрбаз бьн (Әʹйанти 21:4). Әме ида бона тʹӧ тьшти хәма нәкьн, чьмки һәр тьшт ԝе тʹер-тʹьжә бә (Зәбур 72:16; Ишайа 54:13). Кʹәрәмәкә чьԛас мәзьн һивийа мә йә! Йаһоԝа али мә дькә тʹәрка хәйсәтед хьраб бьдьн у һʹӧнӧред баш пешда биньн, у бь ԝе йәке мә бона жийина бьн сәрԝертийа хԝәда һазьр дькә. Мерхасийа хԝә ӧнда нәкә у нәԝәстә. Рʹожед хԝәш незик ьн! Ләма жи ԝәрен әм бь сәбьр һивийа Йаһоԝа бьн, һʹәта кӧ әԝ ԛьрара хԝә бинә сери! w21.08 13 ¶17-19

Чахе шагьртед Иса Щьһустанеда әв нәʹма Паԝлосе шанди стандьн, лазьм бу ԝәки әԝана мал, хәбат у мәрьвед хԝәйи нәбаԝәрмәнд бьһельн у «бьрʹәвьнә чʹийа» (Мәтта 24:16). Һьнге һʹәԝщәти һәбу ԝәки әԝана али һәвдӧ бькьн. Бона ԝан Мәсиһийа, йед кӧ пешда жи гӧһ дабунә ве ширәта Паԝлос, ԝәки чь щәм ԝан һәбу һәвдӧрʹа пʹаравәкьрана, бешьк дьһа һеса бу кӧ һини дәрәщед хԝәйә тʹәзә бьн. Щара хушк-бьра рʹастә-рʹаст дәрһәԛа һʹәԝщед хԝә мәрʹа навежьн. Һьндава ԝанда дьлгәрм бә. Щьвата тәда бешьк хушк-бьред ӧса һәнә, йед кӧ һәр гав һазьр ьн, ԝәки али кәсед дьн бькьн у тʹӧ щар жь ве йәке әʹщьз набьн. Әм заньн, кӧ һәгәр әм һʹәԝще аликʹарийе бьн, әԝе бенә һәԝара мә. Әм жи дьхԝазьн бьбьнә мина ԝан, ӧса нинә? w22.02 23-24 ¶13-15

Ван салада гәләк щьват у мьһал тʹәзәда һатьнә организәкьрьне. Гава мәрʹа те готьне ԝәки әм дәрбази щьватәкә дьн бьн, дьԛәԝьмә мәрʹа чәтьн ә һәвал у мәрьвед хԝә бьһельн. Гәло рʹуспи рʹастә-рʹаст жь Хԝәде рʹебәрийе дьстиньн кӧ кʹижан мьзгинван гәрәке һәрʹә кʹижан щьвате? Һьлбәт на. Ләма жи дьбәкә мәрʹа нәһеса йә ԝәки ве рʹебәрийе ԛәбул кьн. Ле Йаһоԝа итʹбарийа хԝә рʹуспийа тинә у изне дьдә, ԝәки әԝана сафикьрьнед ӧса бькьн, у гәрәке әм жи итʹбарийа хԝә ԝана биньн. Һәгәр сафикьрьнед рʹуспийа нә ль гора дьле мә бьн жи, ԝе баш бә кӧ әм тʹәви ԝан һәвкʹарийе бькьн у пьштгьрийа сафикьрьнед ԝан бькьн, ԝәки йәктийа нав хьзмәткʹаред Хԝәдеда хьраб нәбә. Гава һәр кәс бь мьлукти гӧрʹа сафикьрьнед кʹома рʹуспийа дькьн, щьват дьһа пешда дьчә у гәш дьбә (Ибрани 13:17). Йа һәри фәрз, гава әм итʹбарийа хԝә бьред кʹьфшкьри тиньн, әм нишан дькьн ԝәки әм итʹбарийа хԝә Йаһоԝа тиньн (Кʹаред Шандийа 20:28). w22.02 4-5 ¶9-10

Һәгәр тӧ бьраки ньхӧманди йи, ԝе баш бә кӧ тӧ пешда һәрʹи у бьби готарван у дәрсдарәки дьһа баш. Бь ви щурʹәйи, гӧһдаред тә ԝе жь хԝәндьн, хәбәрдан у һинкьрьна тә дьһа кʹаре бьстиньн (1 Тимотʹейо 4:15). Мәсәлә, хԝәрʹа бькә нет ԝәки һʹәму методед кӧ ль брошура «Хԝәндьн у Һинкьрьнеда Щерʹьбанди бә» һәнә, йәк пәй йәкерʹа леколин бьки у бьди хәбате. Дәрсәке бьжберә у ԝәхтәки сәр бьхәбьтә. Пешда хԝә һазьр бькә у ван ширәта, дәрс у готаред хԝәда бьдә хәбате. Жь бьре ширәткʹар йан жь рʹуспийед дьн, кӧ «хәбәрдан у һинкьрьнеда дьхәбьтьн», ширәте бьхԝазә (1 Тимотʹейо 5:17). Һьлбәт бәс нинә кӧ тӧ тʹәне ԝан метода кӧ брошуреда һатьнә дайине, бьди хәбате. Нета тә гәрәке әв бә ԝәки баԝәрийа гӧһдара дьһа ԛәԝи бьки у ԝана һелан ки ԝәки тьштед кӧ әԝана дьбьһен, жийина хԝәда бьдьнә хәбате. Бь ви щурʹәйи, тӧйе һьм шабуна ԝан һьм жи шабуна хԝә зедә ки. w21.08 24 ¶17

Һәрге әм хушк-бьра сәр хԝәрʹа дьгьрьн, гава әм нава ԝанда фәрәсәтед ӧса бьвиньн кӧ жь йед мә четьр ьн, әме ша бьн. У әме дьһа ша бьн гава әԝана ван фәрәсәтед хԝә бона хьзмәт у рʹумәта Йаһоԝа бьдьнә хәбате. Бь ве йәке, әм гьшк дькарьн әʹдьлайи у йәктийа щьвате пешда бьвьн. Сәва кӧ әм чʹәʹвнәбарийе кәсәки нәкьн, ԝе баш бә кӧ әм синоред хԝә бьзаньбьн. Һәгәр әм мьлук бьн, әме мәрьварʹа нәдьнә кʹьфше кӧ фәрәсәтед мә жь йед ԝан баштьр ьн. Дәԝсе әме чʹәʹв бьдьнә кәсед зен у жь ԝана гәләк тьшт һин бьн. Мәсәлә, бьрак готаред пʹьрʹ хԝәш дьхунә. Әм дькарьн жь ԝи бьпьрсьн кӧ әԝ ча хԝә бона готаре һазьр дькә. Йан жи, һәгәр хушкәк хԝарьнед тәʹм чедькә, әм дькарьн жь ԝе бьпьрсьн кӧ әԝ чаԝа ӧса хԝәш чедькә. w21.07 16 ¶8-9

Кʹьтеба Жьмарда те готьне кӧ Йаһоԝа фәрман да, ԝәки мерәки кӧ рʹожа Шәмийе ԛьрш тʹоп кьрьбу, бькӧжьн. Ле кʹьтеба 2 Самуйелда әм дьвиньн кӧ чәнд ԛьрʹнә паши ве йәке, Йаһоԝа бенамуси у меркӧжийа Даԝьд бахшанд (Жьмар 15:32, 35; 2 Самуйел 12:9, 13). Әм дьбәкә дьфькьрьн: «Йаһоԝа чьма гӧнед гьран йед Даԝьд бахшандьн, ле фәрман да ԝәки мерәки кӧ гӧнәки бьчʹук кьрьбу, бькӧжьн?» Кʹьтеба Пироз щарна һәр тьшти зәлал накә. Мәсәлә, әм заньн кӧ Даԝьд сәва гӧнед хԝә жь дьл тʹобә кьр (Зәбур 51:2-4). Ле гәло мере кӧ ԛануна Шәмийе тʹәрьбанд, йәки чаԝа бу? Гәло әԝ сәва гӧне хԝә пʹошман бу? Гәло әԝи бәре жи ԛанунед Йаһоԝа дьтʹәрʹьбанд у тʹәмийед ԝи пьшт гӧһе хԝәва давит? Кʹьтеба Пироз щаба ван пьрса надә. Ле ԝе баш бә ԝәки әм биньн бира хԝә, кӧ Йаһоԝа «рʹаст ә, һʹәму рʹе-дьрбед Хԝәда» (Зәбур 145:17). w22.02 2-3 ¶3-4

Мәрьвед мьлук һәгәр ида нькарьн һьнә тьшта бькьн, шабуна хԝә ӧнда накьн. Һʹале ԝан мина һʹале мәрьвәки йә кӧ дьхԝазә һьлкʹьшә чʹийаки. Әԝ дьбәкә нькарә зу рʹе һәрʹә, ле һеди-һеди әԝе бьгьһижә сәре чʹийе. Мина ве йәке, кәсед кӧ синоред хԝә заньн, фәʹм дькьн ԝәки щарна лазьм ә әԝана «һеди-һеди бьмәшьн», сәва кӧ бькарьбьн бәрдәԝам кьн Йаһоԝарʹа хьзмәт кьн у али кәсед дьн бькьн (Филипи 4:5). Щарәке, Даԝьд Пʹадша мәрьвәки бь наве Барзиллайрʹа гот ԝәки әԝ тʹәви ԝи һәрʹә Оршәлиме у щәм ԝи бьминә. Ле Барзиллай ида 80 сали бу, у әԝи синоред хԝә заньбу, ләма тʹәглифа Даԝьд Пʹадша ԛәбул нәкьр. Дәԝсе әԝи гот ԝәки бьра щаһьләки бь наве Кимһам дәԝса ԝи һәрʹә (2 Самуйел 19:35-37). Мина Барзиллай, ԝе баш бә ԝәки бьред әʹмьрда мәзьн мәщале бьдьн бьред щаһьл кӧ щабдарийа һьлдьн сәр хԝә. w21.09 10 ¶6-7

Һьнәкарʹа чәтьн ә Йаһоԝа ча Бавәки һʹьзкьри һʹәсаб кьн, чьмки бавед ԝан мәрьвед сәрт бун. Ле чьԛас баш ә кӧ Йаһоԝа һәстед мә фәʹм дькә. Әԝ дьхԝазә незики мә бә. Ләма жи Кʹьтеба Пироз ӧса дьбежә: «Незики Хԝәде бьбьн, әԝ жи ԝе незики ԝә бьбә» (Аԛуб 4:8, ИМ). Бәле, Йаһоԝа мә һʹьз дькә, у әԝ дьхԝазә мәрʹа бьбә Бавәки баш. Иса дькарә али мә бькә ԝәки әм дьһа незики Йаһоԝа бьн. Иса гәләк рʹьнд Йаһоԝа нас дькә у һʹәму һʹӧнӧред ԝи бь тʹәмами әʹйан дькә. Ләма, әԝи гот: «Йе кӧ әз дитьмә, Бав дитийә» (Йуһʹәнна 14:9). Мина бьраки мәзьн, Иса мә һин дькә ча әм гәрәке ԛәдре Баве хԝә бьгьрьн, гӧһ бьдьнә ԝи у дьле ԝи ша кьн. Ӧса жи әԝи нишани мә кьрийә, кӧ Йаһоԝа чьԛас һʹәйф у бь һʹьзкьрьн ә. w21.09 21 ¶4-5

Щьмәʹта Йаһоԝа йәктийеда Хԝәдайе рʹаст у тайе тʹәнерʹа хьзмәт дькьн. Йаһоԝа дьхԝазә ԝәки рʹуспи щьват рʹӧһʹанида тʹәмьз хԝәй кьн, у әва щабдарикә мәзьн ә. Гава Мәсиһик гӧнәки гьран дькә, Йаһоԝа дьхԝазә ԝәки рʹуспи сафи кьн кӧ һәла әв кәс дькарә щьватеда бьминә йан на. Жь бо ве йәке, гәрәке әԝана тедәрхьн һәла әԝ сәва кьред хԝә бь рʹасти пʹошман дьбә йан на. Һәгәр әԝ дьбежә жи ԝәки әԝ тʹобә дькә, гәло әԝ кьред хԝә бь рʹасти нәфрʹәт дькә? Гәло әԝи хԝәрʹа ԛьрар кьрийә ԝәки ви гӧнәйи щарәкә дьн нәкә? Һәгәр рʹуйе һәвалед нәбашда әԝи гӧне гьран кьрийә, гәло әԝ һазьр ә ԝәки һәвалтийа хԝә тʹәви ԝан бьбьрʹә? Рʹуспи гәрәке бь аликʹарийа Кʹьтеба Пироз дина хԝә бьдьн һʹәму фактора у ӧса жи ве йәке кӧ кәсе гӧнәкʹар ча сәр кьред хԝә дьньһерʹә. Паше, гәрәке әԝана сафи кьн һәла әԝ кәс дькарә щьватеда бьминә йан лазьм ә ԝәки әԝ жь щьвате бе дәрхьстьне (1 Корьнтʹи 5:11-13). w22.02 5 ¶11-12

Фьрԛи тʹӧнә әм зудава һатьнә ньхӧмандьне йан жи тʹәзә, әм гьшк дьхԝазьн бьбьнә мәрьвнә ӧса, кӧ дьле Йаһоԝа хԝәш бен. Сәва ве йәке, лазьм ә әм фькред хԝә контрол бькьн. Гәло чьрʹа? Чьмки щурʹе фькьрандьна мә сәр кьред мә һʹӧкӧм дькьн. Һәгәр әм бәрдәԝам кьн ль сәр хԝәстьнед бәдәне бьфькьрьн, әме тьштед хьраб бежьн у бькьн (Әфәси 4:17-19). Ле алийе дьнва жи, һәгәр әм һʹьше хԝә пе фькред баш тʹьжә кьн, хәбәрдан у кьред мә ԝе дьһа баш бьн, у Йаһоԝа жи ԝе жь мә рʹази бә (Галати 5:16). Диса жи, мәва гьредайи һәла әме бькʹәвьнә бәр байе ԝан фькра йан на. Пешийа кӧ әм бенә ньхӧмандьне, гәрәке әм тʹәрка хәбәрдан у кьред ӧса бьдьн, кʹижан кӧ Йаһоԝа нәфрʹәт дькә. Әԝ һәйә гава пешьн у лапә фәрз, кʹижан кӧ ԝе али мә бькә «мәрьве кәвьн» жь хԝә бехьн. Ӧса жи, сәва кӧ Йаһоԝа жь мә рʹази бә, гәрәке әм «мәрьве ну» ль хԝә кьн у хԝәй кьн? w22.03 8 ¶1-2

Бона рʹуспийа һеса нинә тедәрхьн һәла кәсәки кӧ гӧнәки гьран кьрийә жь дьл тʹобә дькә йан на. Гәло чьрʹа? Рʹуспи нькарьн бьвиньн кӧ дьле мәрьвада чь һәйә, ләма жи ԝанрʹа избати лазьм ьн, йед кӧ әшкәрә дькьн һәла кәсе гӧнәкʹар кьред хԝә бь рʹасти нәфрʹәт дькә йан на. Рʹуспи гәрәке избат бьн, һәла әԝи һьм фькьред хԝә һьм жи рʹабун-рʹуньштьна хԝә бь рʹасти гӧһастийә йан на. Дьбәкә епʹещә ԝәхт лазьм бә кӧ әԝ бе гӧһастьне. Һәгәр кәсе кӧ жь щьвате һатийә дәрхьстьне дьхԝазә нишан кә, ԝәки әԝ жь дьл тʹобә дькә, гәрәке әԝ һәрʹә һʹәму щьвина у ль гора ширәта рʹуспийа тʹьме дӧа бькә у Кʹьтеба Пироз леколин бькә. Ӧса жи, гәрәке әԝ хԝә жь тьштед ӧса дур бьгьрә, йед кӧ дькарьн ԝи диса бәрбь гӧна бьвьн. Һәгәр әԝ хирәт бькә достийа хԝә тʹәви Йаһоԝа тʹәзәда ава бькә, Йаһоԝа ԝе бь тʹәмами бьбахшинә ԝи у рʹуспи ԝе ԝи вәгәрʹиньн щьвате. w21.10 6 ¶16-18

Иса гәләк Хԝәде һʹьз дькьр. Әԝи тʹәне Йаһоԝа дьһʹәбанд, һьм чахе әԝ сәр әʹзмана бу һьм жи чахе сәр әʹрде бу (Луԛа 4:8). Иса Мәсиһ шагьртед хԝәрʹа гот ԝәки әԝана жи ӧса бькьн. Иса у шагьртед ԝийә амьн тʹӧ щар пе пʹута у шькла, Хԝәде нәдьһʹәбандьн. Хԝәде Рʹӧһʹ ә, ләма жи тʹӧ кәс нькарә тьштәки дьлԛе ԝида чекә (Ишайа 46:5). Ле гәло изьн һәйә ԝәки әм шьклед мәрьва, йед кӧ ча кәсед пироз һʹәсаб дькьн, чекьн у ԝанрʹа дӧа бькьн? Ԛануна дӧдада жь Дәһ Тʹәмийа, Йаһоԝа чь кӧ рʹеза рʹожеда ньвисийә гот. Кәсед кӧ дьхԝазьн дьле Хԝәде ша кьн, ван готьна рʹьнд фәʹм дькьн. Ль гора леколинед тʹәрихзана, Мәсиһийед пешьн тʹәне Хԝәде дьһʹәбандьн. Иро, Шәʹдед Йаһоԝа мина Мәсиһийед пешьн тʹәне Йаһоԝа дьһʹәбиньн. w21.10 19-20 ¶5-6

Иса пешда шагьртед хԝәрʹа готьбу, ԝәки рʹожәке әԝана ԝе «бьбиньн кӧ ордийа дора Оршәлиме гьртийә» (Луԛа 21:20-24). Һьнге ԝе лазьм буйа кӧ әԝ «бьрʹәвьнә чʹийа». Бәле, әԝана ԝе ԝәʹде ԝеранкьрьна Оршәлиме сах бьмана, ле сәва ве йәке ԝана гәрәке гәләк тьшт ԛӧрбан кьра. Чәнд сал пешда, «Бьрща Ԛәрәԝьлийеда» ӧса һатьбу готьне: «Ԝана хани у зәвийед хԝә һишт, у нькарьбун һәбука хԝә тʹәви хԝә бьвьн. Әԝана баԝәр бун ԝәки Йаһоԝа ԝе али ԝан бькә у ԝана хԝәй кә, у жийина ԝанда һʹәбандьна Йаһоԝарʹа сәр щийе пешьн бу». Ве «Бьрща Ԛәрәԝьлийеда» ӧса жи һатьбу готьне: «Рʹожед ахьрийеда, дьбәкә ньһерʹандьна мә сәр һәбуке ԝе бе щерʹьбандьне. Ԝи чахи бона мә тьште һәри фәрз ԝе чь бә? Тьштед материали йан әв йәк кӧ Йаһоԝарʹа амьн бьминьн у хьлаз бьн? Рʹожед хьлазийа ве дьнйайе дьбәкә әм рʹасти тәнгасийед ӧса бен, кӧ әме мәщбур бьн гәләк тьшта жь хԝә кем кьн. Гәрәке әм жи һазьр бьн чь лазьм бә бькьн, ԝәки хьлаз бьн». w22.01 4 ¶7-8

Ԝәхтәкә кьн паши кӧ мьләте Исраеле жь Мьсьре дәркʹәтьбу, Йаһоԝа наве хԝә у һʹӧнӧред хԝә Мусарʹа әʹйан кьр. Әԝи гот: «Хӧдан, Хӧдан ьм! Хԝәдейе рʹәʹм у кʹәрәме, сәбьр-ськʹане, бь һӧб у амьнийеда хьнейо, кӧ бона һʹәзара хԝәйе һʹӧба амьн ә [һʹьзкьрьна амьн, ДТʹ], нәһәԛийе, нәрʹастийе у гӧна дьбахшинә» (Дәркʹәтьн 34:6, 7). Бь ван готьнед дьлгәрм, Йаһоԝа дина Муса кʹьшанд сәр һʹӧнӧрәкә фәрз, демәк сәр һʹьзкьрьна хԝәйә амьн. Йаһоԝа нә тʹәне гот ԝәки һʹьзкьрьна ԝийә амьн һәйә, ле әԝи гот ԝәки әԝ бь ве һʹьзкьрьне «хьнейо» йә, демәк тʹьжә йә. Әв готьн шәш рʹезед дьнда жи һәнә (Жьмар 14:18; Нәһәмийа 9:17; Зәбур 86:15; 103:8; Йоԝел 2:13; Уньс 4:2). Ван шәш рʹезада тʹәне дәрһәԛа Йаһоԝа әв гьли те хәбьтандьне, нә кӧ дәрһәԛа мәрьва. Гәло әԝ йәк дьле мә нагьрә, ԝәки Йаһоԝа хԝә бь ви хәйсәти мәрʹа әʹйан дькә? w21.11 2-3 ¶3-4

Щотед зәԝьщи дькарьн жь сәрһатийа Пәтрусе шанди у жьна ԝи һьнә дәрса һин бьн. Ԝәкә шәш мәһ йан саләк, паши кӧ Пәтрус щара пешьн рʹасти Иса Мәсиһ һат, әԝи гәрәке сафикьрьнәкә фәрз бькьра. Пәтрус пе мәʹсигьртьне әʹбура малбәта хԝә дькьр. Ләма жи гава Иса гази ԝи кьр кӧ пәй ԝи һәрʹә, Пәтрус гәрәке һʹале малбәта хԝә жи һьлда һʹәсаб (Луԛа 5:1-11). Пәтрус сафи кьр пәй Иса һәрʹә у мьзгине тʹәви ԝи бәла кә. Те кʹьфше жьна Пәтрус пьштгьрийа сафикьрьна ԝи дькьр. Кʹьтеба Пироз нишан дькә ԝәки паши кӧ Иса жь мьрьне рʹабу, жьна Пәтрус щарна тʹәви мере хԝә рʹеԝити дькьр (1 Корьнтʹи 9:5). Жь бо ве йәке кӧ жьна Пәтрус Мәсиһикә баш бу, Пәтрус бь азайи дькарьбу ширәта бьдә жьн у мера (1 Пәтрус 3:1-7). Әшкәрә йә, ԝәки һьм Пәтрус һьм жьна ԝи баԝәрийа хԝә ве созе Йаһоԝа дьанин, кӧ әԝе бона һʹәԝщед ԝан хәм бькә, һәгәр әԝана Пʹадшатийа ԝи дайньн сәр щийе пешьн (Мәтта 6:31-34). w21.11 18 ¶14

Паԝлосе шанди хушк-бьра гәләк һʹьз дькьр. Әԝи бона һʹалхԝәшийа ԝан гәләк шьхӧл дькьр у бона ԝан хәм дькьр (Кʹаред Шандийа 20:31). Ԝана жи Паԝлос гәләк һʹьз дькьр. Щарәке, гава рʹуспийед жь Әфәсе пеһʹәсийан кӧ әԝана ԝе Паԝлосе шанди ида нәвиньн, «һʹәму жи гәләки дьгьрийан» (Кʹаред Шандийа 20:37). Иро жи, рʹуспийед хирәт хушк-бьра гәләк һʹьз дькьн у бь дьл у щан бона ԝан шьхӧл дькьн у али ԝан дькьн (Филипи 2:16, 17). Ле рʹуспи жи щарна рʹасти чәтьнайа тен. Гәло чь дькарә али ԝан бькә кӧ сәри жь ван чәтьнайа дәрхьн? Ԝе баш бә кӧ рʹуспи дина хԝә бьдьнә мәсәла Паԝлосе шанди. Паԝлосе шанди мәрьвәки мина мә бу, у щарна ԝирʹа жи зор бу тьштед рʹаст бькә (Рʹомайи 7:18-20). Ле нава чәтьнайада Паԝлос мерхаси у шабуна хԝә ӧнда нәдькьр. Иро жи рʹуспи рʹасти чәтьнайа тен. Сәва кӧ әԝана бькарьбьн ван чәтьнайа сафи кьн у шабуна хԝә ӧнда нәкьн, ԝе баш бә кӧ әԝана чʹәʹв бьдьнә Паԝлосе шанди. w22.03 26 ¶1-2

Ԛануна Кʹаһинтийе 19:3-да дәрһәԛа хԝәйкьрьна рʹожа Шәмийе те готьне. Ле шагьртед Иса бьн һʹӧкӧме Ԛануна Мусада ниньн у ида нә лазьм ә кӧ әм рʹожа Шәмийе хԝәй кьн. Диса жи, әм дькарьн жь ве йәке кӧ Исраелийа ча рʹожа Шәмийе хԝәй дькьрьн у жь ве чь кʹар дьстандьн, һьнә дәрсед фәрз бьстиньн. Рʹожа Шәмийе лазьм бу ԝәки әԝана шьхӧлед һәррʹожи нәкьн у бь тʹәмами шьхӧлед рʹӧһʹанива мьжул бьн. Ләма жи Иса Шәмийа дьчу кʹьниште у ԝедәре Хәбәра Хԝәде дьхԝәнд (Дәркʹәтьн 31:12-15; Луԛа 4:16-18). Әв йәк кӧ Хԝәде Ԛануна Кʹаһинтийе 19:3-да Исраелийарʹа готьбу ԝәки әԝана рʹожед Шәмийе хԝәй кьн, нишани мә дькә кӧ гәрәке әм жи бона шьхӧлед рʹӧһʹани ԝәʹдә вәԛәтиньн. Гәло тӧ тʹәхмин дьки, ԝәки ви алива тӧ гәрәке һе зедә бьки, сәва кӧ ве тʹәмийе бини сери? Һәгәр тӧ бәрдәԝам ки бона шьхӧлед рʹӧһʹани ԝәʹдә вәԛәтини, тӧйе һе незики Йаһоԝа би, у әв йәк гәләк фәрз ә сәва кӧ тӧ пироз бей һʹәсабе. w21.12 5 ¶13

Гава Иса Мәсиһ ль дьнйайе дьжит, әԝи тʹәви щурʹә-щурʹә мәрьва һәвалти дькьр. Рʹаст ә, әԝи тʹәви кәсед дәԝләмәнд у нав у дәнг хԝарьн дьхԝар, ле әԝи тʹәви кәсед кʹәсиб у бәләнгаз жи гәләк ԝәхт дәрбаз дькьр. Сәрда жи, дьле ԝи сәр кәсед кӧ жь алийе хәлԛева ча «гӧнәкʹар» дьһатьн дитьн, дьшәԝьти. Һьнә кәсед ԛӧрʹә бь кьрьнед Иса Мәсиһ нә рʹази бун. Ԝана жь шагьртед ԝи ӧса пьрси: «Чьма һун тʹәви хәрщгьр у гӧнәкʹара дьхԝьн у вәдьхԝьн?» Иса Мәсиһ щаба ԝан да чаԝа кӧ рʹеза рʹожеда ньвисар ә (Луԛа 5:29-31). Чәнд сәдсал пешийа һатьна Мәсиһ, Ишайа пʹехәмбәр готьбу кӧ дьнйа ԝе Мәсиһ ԛәбул нәкә. Әԝи дәрһәԛа Мәсиһ ӧса ньвисибу: «Жь алийе мәрьвава әԝ һат кемкьрьн у рʹәдкьрьн . . . Ԝәки зьламе кӧ мәрьв рʹуйе хԝә же вәдьшерьн, әԝ һат кемкьрьн. Мә ԛәдьр нәда ԝи» (Ишайа 53:3, ИМ). Ль гора готьнед ве рʹезе, гәрәке Щьһуйед ль ԛьрʹна йәке бьзаньбуна кӧ Мәсиһ ԝе бьһата рʹәдкьрьн. w21.05 8-9 ¶3-4

Гава һьнә шагьртед Иса ширәт дьстандьн, әԝана ләз нәдькʹәтьн кӧ ве ширәте биньн сери (Аԛуб 1:22). Һьнә хушк-бьра жи кәсед дәԝләти сәр кәсед дьнрʹа дьгьртьн (Аԛуб 2:1-3). Һьнәкарʹа жи зор бу кӧ зьмане хԝә бькарьбьн (Аԛуб 3:8-10). Бәле, кемасийед ван хушк-бьра һәбун, ле диса жи Аԛуб һевийа хԝә жь ԝан нәдьбьрʹи. Әԝи зәлал у бь нәрми ширәт да ԝан, у ԝанрʹа, йед кӧ алийе рʹӧһʹанида сьст бун, дьгот ԝәки әԝана жь рʹуспийа жи аликʹарийе бьхԝазьн (Аԛуб 5:13, 14). Дәрс: Бир нәкә кӧ һәр кәс гӧнәкʹар ә, ле һевийа хԝә жь ԝана нәбьрʹә. Һьнә хԝәндәкʹаред мәрʹа дьбәкә чәтьн ә, ԝәки ль гора рʹебәрийа Кʹьтеба Пироз бьжин (Аԛуб 4:1-4). Дьбәкә ԝанрʹа ԝәхт лазьм бә, кӧ хәйсәтед хԝәйә хьраб бьтʹәрькиньн у һʹӧнӧред баш нав хԝәда пешда биньн. Ԝе баш бә ԝәки әм хԝәндәкʹаред хԝәрʹа бежьн, кӧ гәрәке әԝана чьда хԝә рʹаст кьн. Ӧса жи, гәрәке әм һевийа хԝә ӧнда нәкьн, ле баԝәр бьн кӧ Йаһоԝа ԝе мәрьвед мьлук бькʹьшинә бал хԝә у ԛәԝате бьдә ԝан, ԝәки жийина хԝә бьгӧһезьн (Аԛуб 4:10). w22.01 11 ¶11-12

Әм һʹәмушк жи гәрәке чʹәʹв бьдьнә рʹәʹма Йаһоԝа. Гәло чьма? Мәʹнийа фәрз әв ә ԝәки Йаһоԝа гӧһ надә кәсед кӧ һьндава мәрьвада дьлрʹәʹм ниньн. Һәгәр әм дьхԝазьн Йаһоԝа гӧһ бьдә дӧайед мә, әм гәрәке һаш жь хԝә һәбьн, ԝәки әм нәбьнә мәрьвнә дьлсар у берʹәʹм. Әм гәрәке гӧһе хԝә сәр дәрд у газьнед хушк-бьра данәдьн, ле һәртʹьм һазьр бьн гӧһ бьдьнә ԝан. Ӧса жи әм гәрәке бир нәкьн, кӧ «бе рʹәʹм ԝе диԝана берʹәʹма бьбә» (Аԛуб 2:13). Һәгәр әм бь мьлукти биньн бира хԝә ԝәки әм хԝәха чьԛас һʹәԝще рʹәʹме нә, мәрʹа ԝе дьһа һеса бә һьндава кәсед дьн рʹәʹме бьдьнә кʹьфше. Мәсәлә, гава гӧнәкʹарәки тʹобә кьрийә у вәдьгәрʹә щьвате, әм гәрәке һьндава ԝида дьлрʹәʹм бьн у бь дьл у щан ԝи ԛәбул кьн. Һьнә сәрһатийед Кʹьтеба Пироз дькарьн али мә бькьн дьлрʹәʹм бьн у һьндава мәрьвада дьлсар нәбьн. w21.10 12 ¶16-17

Шәва пешийа мьрьна хԝә, гава хьзмәта ԝи сәр әʹрде ида хьлаз дьбу, диса жи Иса щики рʹьһʹәт дьгәрʹийа ԝәки дӧа бькә у бьфькьрә. Бона ве йәке әԝ чу бахче Гетшәмани. Һьнге Иса шандийед хԝәрʹа дәрһәԛа дӧакьрьне тьштәки фәрз гот. Гава әԝана гьһиштьнә бахче Гетшәмани, ида гәләк дәрәнг бу, дьбәкә ниве шәве бу. Иса шандийед хԝәрʹа гот, ԝәки әԝана һʹьшйар бьминьн у паше чу ԝәки дӧа бькә (Мәтта 26:37-39). Ле гава әԝи дӧа дькьр, шандийед ԝи хәԝрʹа чун. Чахе Иса дит кӧ әԝана хәԝрʹа чун, әԝи диса ԝанрʹа гот кӧ гәрәке әԝана «һʹьшйар бьминьн у дӧа бькьн» (Мәтта 26:40, 41). Иса һʹале ԝан рʹьнд фәʹм дькьр у дьдит, ԝәки әԝана жь бо стресе гәләк ԝәстийайи бун. Әԝи заньбу кӧ «бәдән сьст ә». Иса диса дӧ щара чу кӧ дӧа бькә, ле гава әԝ вәдьгәрʹийа, шандийед ԝи дәԝса кӧ дӧа бькьн, рʹазайи бун (Мәтта 26:42-45). w22.01 28 ¶10-11