Щотмәһ

Һʹиме баԝәрийа мә Кʹьтеба Пироз ә. Диса жи, гәләк кәс дькʹәвьн шьке, чьмки әԝана дьфькьрьн кӧ һʹәбандьна мә гәләк бәрбьчʹәʹв нинә, у тьштед кӧ әм һин дькьн ль гора дьле ԝан ниньн. Сәва кӧ әм нәлькʹӧмьн, гәрәке әм чь бькьн? Паԝлосе шанди шагьртед Иса йед Рʹомайирʹа ӧса гот: «Баԝәри жь бьһистьне те у бьһистьн жи жь готьнед бона Мәсиһ» (Рʹомайи 10:17). Гәләк әʹйд-ԛәйдед религи ль мәрьва хԝәш тен, ле бь рʹасти әԝана нә ль гора Кʹьтеба Пироз ьн. Гәләк фәрз ә кӧ әм баԝәрийа хԝә, нә кӧ бь әʹйд-ԛәйдед пʹутпʹарьст, ле бь леколина Ньвисаред Пироз ава бькьн. Лазьм ә кӧ баԝәрийа мә ль сәр занәбуна рʹаст ава бә, чьмки «бе баԝәри тʹӧ щар набә кӧ инсан ль Хԝәде хԝәш бе» (Ибрани 11:1, 6). Мәрʹа нәлазьм ә кӧ кʹәрәмәтәки жь әʹзмед бьвиньн, ԝәки фәʹм бькьн һәла әм ль сәр рʹийа рʹаст ьн йан на. Готьнед Кʹьтеба Пироз баԝәрийа мә дьһа ԛәԝи дькьн у мә дьдьнә баԝәркьрьне кӧ мә рʹасти дитийә. w21.05 4-5 ¶11-12

Паԝлосе шанди рʹасти гәләк тәнгасийа дьһат. Илаһи гава әԝ дьһат ледане, ԝи дьданә бәр кәвьра у давитьн кәле, әԝ һьнге һʹәԝще ԛәԝате бу (2 Корьнтʹи 11:23-25). Паԝлос дьани сәр хԝә у вәнәдьшарт кӧ щарна әԝ һьмбәри фькред хԝәйә негатив шәрʹ дькә (Рʹомайи 7:18, 19, 24). Ӧса жи, дь бәдәна ԝида «стьрийәк» һәбу, у әԝи гәләк щара рʹәща кьр кӧ Хԝәде ԝи жь ве еше хьлаз кә (2 Корьнтʹи 12:7, 8, ИМ). Йаһоԝа ԛәԝат дьда Паԝлосе шанди, ԝәки әԝ бькарьбә хьзмәта хԝә ԝәʹде тәнгасийа бинә сери. Бинә бәр чʹәʹве хԝә кӧ Паԝлос шьхӧлед чьԛас мәзьн дькьрьн. Мәсәлә, гава әԝ ль Рʹоме ль мале гьрти бу, әԝи дәрһәԛа мьзгине бь дьл у щан гьли дькьр рʹебәред Щьһуйарʹа у дьбәкә жи сәрԝеред дәԝләтерʹа (Кʹаред Шандийа 28:17; Филипи 4:21, 22). Ӧса жи, әԝи дәрһәԛа мьзгине гәләк нобәдарарʹа у һʹәму кәсед кӧ дьһатьн тʹәсәлийа ԝи, гьли дькьр (Кʹаред Шандийа 28:30, 31; Филипи 1:13). Нәʹмед кӧ Паԝлосе шанди ль ԝе дәме бь рʹебәрийа Хԝәде ньвиси, иро жи гәләк керһати нә. w21.05 21 ¶4-5

Узийа Пʹадша сәва ԛӧрʹәтийе, ширәт ԛәбул нәкьр у мьԛабьли Йаһоԝа рʹабу. Бь әʹсле хԝә, Узийа мәрьвәки гәләк аԛьл у сәрхԝә бу. Әԝ шәрʹада сәркʹәти бу, әԝи гәләк бажар ава кьрьн у әԝи ише щоткʹарийе пешда дьбьр. Бәле, «Хԝәде кʹаре ԝи сәрфьраз кьр» (2 Дирок 26:3-7, 10). Ле Кʹьтеба Пироз дь бежә ԝәхта кӧ әԝ бу йәки ԛәԝи, ԛӧрʹәти кʹәтә дьле ԝи. Ль гора ԛануна Йаһоԝа, тʹәне кʹаһина дькарьбун пʹарьстгәһеда бьхуре бьшәԝьтиньн. Ле Узийа Пʹадша диса жи ль гора хԝәстьна хԝә кʹәтә пʹарьстгәһе кӧ бьхуре бьшәԝьтинә. Әв йәк Йаһоԝа хԝәш нәһат, ләма әԝи әв мере ԛӧрʹә бь кʹотибуне щәза кьр (2 Дирок 26:16-21). Гәло әм жи дькарьн сәва ԛӧрʹәтийе мина Узийа бькʹәвьн тʹәльке? Бәле, һәгәр әм дәстпекьн дьһа зедә бькʹәвьнә һʹәйра наве хԝә. Бьра әм тʹӧ щар бир нәкьн кӧ һʹәму һʹӧнӧр, фәрәсәт у щабдарийед кӧ әм щьватеда дьстиньн жь Йаһоԝа тен (1 Корьнтʹи 4:7). Һәгәр әм ԛӧрʹә бьн, Йаһоԝа ԝе мә шьхӧле хԝәда нәдә хәбате. w21.06 16 ¶7-8

Иса Мәсиһ заньбу ԝәки сәва шагьртед ԝи, хьзмәти ԝе һәртʹьм һаԛас хԝәш у һʹәԝас дәрбаз нәбә. Әм ньзаньн чьԛас мәрьв йед кӧ серида гӧһ дабунә шагьрта, бунә баԝәрмәнд. Ләма жи, лазьм бу ԝәки шагьрт нә тʹәне ве йәкерʹа шабуна, кӧ чьԛас мәрьв мьзгинийе ԛәбул дькьрьн, ле һәри зедә гәрәке ве йәкерʹа ша буна, ԝәки Йаһоԝа жь хирәта ԝан рʹази йә. Һәгәр әм хьзмәтеда сәбьр бькьн, әме жийина һʹәта-һʹәтайе бьстиньн. Гава әм тʹохьмед мьзгинийа Пʹадшатийе дьчиньн, әм ӧса жи ‹бона рʹӧһʹ дьчиньн›, демәк әм изне дьдьн ԝәки рʹӧһʹе Хԝәде сәр мә һʹӧкӧм бькә. Фьрԛи тʹӧнә, мә али кәсәки кьрийә кӧ бьбә Шәʹде Йаһоԝа йан на, һәгәр әм «ащьз нәбьн» у нәԝәстьн, Йаһоԝа ԝе жийина һʹәта-һʹәтайе бьдә мә (Галати 6:7-9). w21.10 26 ¶8-9

Щарәке, Иса Мәсиһ у шагьртед ԝи паши хьзмәте гәләк ԝәстийайи бун. Ԝана дьхԝәст һәрʹьн щики рʹьһʹәт кӧ һʹәвәки һеса бьн, ле әʹлаләтәкә мәзьн пәй ԝан чун. Дьле Иса сәр ԝан шәԝьти, ләма жи әԝи «дәстпекьр гәләк тьшт әԝ һин кьрьн». Иса һʹале ԝан фәʹм дькьр, чьмки хԝә датани дәԝса ԝан. Әԝи дьдит кӧ дәрде ԝан чьԛас гьран ә у әԝана чьԛас һʹәԝщәйи һевийе нә, ләма жи дьхԝәст али ԝан бькә. Иро жи һʹале мәрьва ӧса йә. Әԝана чьԛас рʹува бәхтәԝар бенә кʹьфше жи, бь рʹасти әԝана бәрхед ӧндабуйи у бе шьван ьн. Паԝлосе шанди гот кӧ мәрьвед ӧса бе һеви у «бе Хԝәде» нә (Әфәси 2:12). Гава әм дьфькьрьн кӧ мәрьвед дәшта мәда чьԛас һʹәԝще рʹастийе нә, гәло дьле мә сәр ԝан нашәԝьтә? Бәле, әм мәрьва һʹьз дькьн у дьхԝазьн али ԝан бькьн. Аликʹарийа һәри  баш әв ә кӧ әм тʹәви ԝан һинбуна Кʹьтеба Пироз дәстпекьн. w21.07 5 ¶8

Мәрьвәки хԝәһʹьз ԛӧрʹә йә у тʹәне дькʹәвә һʹәйра хԝә. Кәсе чʹәʹвнәбар нә кӧ тʹәне ван тьшта дьхԝазә чь кӧ щәм кәсед дьн һәнә, ле һәла һе дьхԝазә кӧ әԝ тьшт щәм ԝан тʹӧнә бьн жи. Бь рʹасти һʹәвсуди нәфрʹәтева гьредайи йә. Һʹӧнӧред ӧса ча хԝәһʹьзи у чʹәʹвнәбари мина кӧрмед даре нә, йед кӧ һьндӧрʹе даре дьхԝьн у дьрʹьзиньн. Дьԛәԝьмә дәрберʹа әшкәрә нинә кӧ дар ида рʹьзийа йә, ле рʹожәке, әв дар ԝе бькʹәвә. Мина ве йәке, кәсәк дькарә ԝәхтәке Йаһоԝарʹа хьзмәт бькә, ле һәгәр дьле ԝида хԝәһʹьзи у һʹәвсуди һәбьн, әԝе мина дарәкә рʹьзийайи бькʹәвә (Мәтʹәлок 16:18). Ахьрийеда әв кәс ԝе хьзмәта хԝә бьһелә у зьраре бьдә хԝә у кәсед дьн. Сәва кӧ әм хԝәһʹьзийе жь хԝә дур хьн, ԝе баш бә кӧ әм гӧһ бьдьнә ве ширәта Паԝлосе шанди: «Тьштәки бь һәврʹькʹийе нәкьн у ль наве хԝә нәгәрʹьн, ле жь ԝә һәр йәк бь мьлуктийе һәвале хԝә сәр хԝәрʹа бьгьрә» (Филипи 2:3). w21.07 15-16 ¶6-8

Һьнә кәс дьфькьрьн, ԝәки дине рʹаст гәрәке щаба һәр пьрсе бьдә – һʹәта пьрсед ӧса жи, кӧ Кʹьтеба Пироз рʹастә-рʹаст щаб надә. Гәло әв фькьр рʹаст ә? Һәла дина хԝә бьдьнә мәсәла Паԝлосе шанди. Әԝи кәсед баԝәрмәнд һелан дькьр, ԝәки «һәр тьшти бьщерʹьбиньн», ле диса жи әԝи ԛәбул дькьр ԝәки әԝ гәләк тьшта фәʹм накә (1 Тʹесалоники 5:21). Паԝлосе шанди ӧса ньвиси: «Әм жь пʹьри-һьндьки заньн . . . Ньһа әм чаԝа ԛәрәтʹуки нәйнькеда дьбиньн» (1 Корьнтʹи 13:9, 12). Паԝлос һәр тьшт фәʹм нәдькьр, у әм жи һәр тьшти фәʹм накьн. Ле Паԝлос хԝәстьн у нета Йаһоԝайә сәрәкә фәʹм дькьр, ләма жи баԝәр бу кӧ әԝ сәр рʹийа рʹастийе йә. Сәва кӧ әм баԝәр бьн ԝәки әм сәр рʹийа рʹастийе нә, ԝе баш бә әм леколин бькьн һәла Иса Мәсиһ чаԝа Хԝәде дьһʹәбанд, у ве йәке бәрамбәри һʹәбандьна Шәʹдед Йаһоԝа бькьн. w21.10 18-19 ¶2-4

Фьрԛи тʹӧнә, кәсед әʹмьрда мәзьн хьзмәта һәртʹьмда бьн йан на, әԝана һʹәму дькарьн али кәсед дьн бькьн. Ԝе баш бә ԝәки әԝана һини һʹале хԝәйи тʹәзә бьн у хԝәрʹа нетед тʹәзә дайньн. Дәԝса кӧ дьле ԝан сәр кʹьфшкьрьнед ԝанә бәре бьминә, ԝе баш бә әԝана нетед тʹәзә дайньн пешийа хԝә у дина хԝә бьдьн тьштед кӧ ԛәԝата ԝан дьгьһиже бькьн. Даԝьд Пʹадша жи синоред хԝә ԛәбул дькьр. Әԝи гәләк дьхԝәст бона Йаһоԝа пʹарьстгәһе ава кьра. Ле гава Йаһоԝа ԝирʹа гот ԝәки кӧрʹе ԝи Сьлеман ԝе ви шьхӧли бинә сери, Даԝьд ԛьрара Йаһоԝа ԛәбул кьр у бь дьл у щан пьштгьрийа ве сафикьрьне кьр (1 Дирок 17:4; 22:5). Даԝьд нәдьфькьри ԝәки Сьлеман һе «щаһьл ә» у нәщерʹьбанди йә, у ԝе дьһа баш бә ԝәки әԝ хԝәха ви шьхӧли бькә (1 Дирок 29:1). Даԝьд заньбу кӧ пешдачуйина авакьрьне кʹәрәма Йаһоԝава гьредайи йә, нә кӧ ве йәкева кӧ сәркʹар чәнд сали йә йан чьԛас щерʹьбанди йә. Чахе щабдарийа кәсед әʹмьрда мәзьн те гӧһастьне у ида лазьм ә ԝәки әԝана шьхӧлед щьвате тʹәсмили бьред дьһа щаһьл бькьн, әԝана диса жи щьватеда шьхӧлед дьн дькьн. Әԝана баԝәр ьн ԝәки Йаһоԝа ԝе хирәта бьред щаһьл кʹәрәм бькә. w21.09 9 ¶4; 10 ¶5, 8

Гава әм нетед рʹӧһʹани датиньн пешийа хԝә, әм бәхтәԝар дьбьн. Ле гәрәке әм нә ль гора ԛәԝата у дәрәщед кәсед дьн, ле ԛаси ԛәԝат у дәрәщед хԝә хԝәрʹа нета дайньн. Әв йәк фәрз ә сәва кӧ әм дьлтәнг нәбьн у шабуна хԝә ӧнда нәкьн (Луԛа 14:28). Тӧ хьзмәткʹарәки Йаһоԝа йи, ләма тӧ малбәта ԝида әндәмәки һежа йи. Йаһоԝа тӧ кʹьшандийә бал хԝә, нә жь бо ве йәке кӧ тӧ жь мәрьвед дьн четьр и, ле чьмки әԝи дьле тә ньһерʹи, дит кӧ тӧ йәки мьлук и, һазьр и жь ԝи һин би у бейи гӧһастьне. Баԝәр бә кӧ гава тӧ чь жь дәсте тә те дьки ԝәки ԝирʹа хьзмәт бьки, әԝ ве йәке гәләк ԛимәт дькә. Амьнийа тә нишан дькә ԝәки дьле тә «сах у ԛәнщ» ә (Луԛа 8:15). Ләма, бәрдәԝам кә чьԛас жь дәсте тә те бь дьл у щан Йаһоԝарʹа хьзмәт кә. Һәгәр тӧ ӧса бьки, тӧйе бькарьби кьред хԝәрʹа у пешдачуйина хԝәрʹа ша би! (Галати 6:4). w21.07 24 ¶15; 25 ¶20

Гәләк щар әм гәрәке һьмбәри нәһәԛийе сәбьр кьн, һʹәта әв бе сафикьрьне. Мәсәлә гава рʹуспи педьһʹәсьн, ԝәки хушк йан бьраки гӧнәки гьран кьрийә, әԝана дӧа дькьн, кӧ Йаһоԝа биланийе бьдә ԝан сәр ве дәрәще бь чʹәʹве ԝи бьньһерʹьн (Аԛуб 3:17). Нета ԝан әв ә, ԝәки али кәсе гӧнәкʹар бькьн жь рʹийа шаш вәгәрʹә (Аԛуб 5:19, 20). Ӧса жи, әԝана чь жь дәсте ԝан те дькьн, ԝәки щьвате бьпарезьн у бәрдьлийе бьдьн ԝан кәса, йед кӧ жь ве дәрәще зьрар стандьнә (2 Корьнтʹи 1:3, 4). У чахе рʹуспи дәрәщед ӧса леколин дькьн, бәри пешьн лазьм ә, ԝәки әԝана пебьһʹәсьн кӧ бь рʹасти чь ԛәԝьмийә, у бона ве йәке ԝәʹдә лазьм ә. Әԝана дӧа дькьн, у бь нәрми сәр һʹиме Кʹьтеба Пироз ширәте дьдьн кәсе гӧнәкʹар, у паше бь һәԛи ԝи ширәт у рʹаст дькьн (Йерәмйа 30:11). Рʹуспи ләзә-ләз диԝана ԝи кәси накьн. Гава әв дәрәщә рʹаст у һәԛ те сафикьрьне, әв йәк щьватерʹа кʹарәкә мәзьн тинә. w21.08 11 ¶12-13

Гава ԝәлате Исраеледа хәлайи дәстпебу, Наһоми тʹәви мер у дӧ кӧрʹед хԝә мала хԝә һишт у чу ԝәлате Моԝабе. Ԝедәре, мере Наһомийе мьр. Дӧ кӧрʹед ԝе зәԝьщин, ле йазьх ԝәʹдә шунда кӧрʹед ԝе жи мьрьн (Рʹутʹ 1:3-5). Жь бо ван дәрдед гьран, Наһомийе хԝә бечʹарә тʹәхмин дькьр, у әԝ дьфькьри кӧ Йаһоԝа пьшта хԝә да ԝе. Дина хԝә бьдьн әԝе чь гот: «Дәсте Хӧдан ль сәр мьн гьран буйә . . . Йе Һәри Зор дәрд у кӧлава әз данимә». Әԝе ӧса жи гот: «Хӧдан чәрха мьн чʹәп кьр у Йе Һәри Зор әз кьрьмә ве рʹоже» (Рʹутʹ 1:13, 20, 21). Йаһоԝа занә ԝәки рʹуйе кӧл-дәрдада мәрьве билан дькарә беһʹәмде хԝә хәбәр дә (Ԝаиз 7:7). Әԝи Рʹутʹ һелан кьр ԝәки Наһомийерʹа һʹьзкьрьна амьн нишан бькә. Рʹутʹе бь рʹәзәдьли у бь нәрми дьле хасийа хԝә ԛәԝи кьр у али ԝе кьр әԝ фәʹм кә ԝәки Йаһоԝа ле һʹьз дькә. w21.11 9 ¶9; 10 ¶10, 13

Ԝе баш бә кӧ әм һәри зедә дина хԝә бьдьн кʹьфшкьрьнед кӧ ньһа щәм мә һәнә. Ле гәло әԝ йәк те һʹәсабе кӧ нә лазьм ә әм хирәт бькьн ԝәки хьзмәтеда дьһа пешда һәрʹьн? Һьлбәт на! Әм дькарьн у һьм жи лазьм ә кӧ әм нетед рʹӧһʹани дайньн пешийа хԝә. Һәгәр нетед мәйә рʹӧһʹани һәбьн, әме чь жь дәсте мә те бькьн, ԝәки һьм хьзмәтеда бьбьнә һостә һьм жи щьватеда кери хушк-бьра бен. Сәва әм бьгьһижьн ван нета, гәрәке әм бь сәрԝахти у мьлукти дина хԝә бьдьн ве йәке, кӧ әм чаԝа дькарьн али кәсед дьн бькьн (Мәтʹәлок 11:2; Кʹаред Шандийа 20:35). Гәло тӧ дькари хԝәрʹа кʹижан нета дайни? Жь Йаһоԝа аликʹарийе бьхԝазә ԝәки тедәрхи һәла тӧ дькари бьгьһижи кʹижан нета (Мәтʹәлок 16:3). Мәсәлә, гәло тӧ дькари бьби пешәнге ԝәʹдәлу йан пешәнге һәртʹьм? Гәло тӧ дькари Бәйтʹәледа йан проектед авакьрьнеда хьзмәт бьки? Йан жи, сәва кӧ тӧ мьзгине дьһа зедә бәла ки, гәло тӧ дькари зьманәки тʹәзә һин би йан дәрбази дәштәкә дьн би? w21.08 23 ¶14-15

Йаһоԝа хԝәш те һʹьзкьрьна амьн бьдә кʹьфше (Һосәйа 6:6). Бь сайа Миха пʹехәмбәр, Хԝәде мәрʹа дьбежә ԝәки әм ви һʹӧнӧри һʹьз бькьн (Миха 6:8). Ле сәва кӧ әм бькарьбьн ве йәке бькьн, лазьм ә бьзаньбьн һәла һʹьзкьрьна амьн чь йә. Хәбәра Ибрани «һʹьзкьрьна амьн», «Ԝәлгәрʹандьна Дьнйа Тʹәзәда» сәр зьмане Инглизи, ԝәкә 230 щара һатийә хәбьтандьне. Ле ԝәлгәрʹандьнед Кʹьтеба Пирозда сәр зьмане Кӧрманщи ча «һʹӧба амьн», «амьни», «дьлсози» у «һʹьзкьрьн» һатийә ԝәлгәрʹандьне. Йаһоԝа әʹйанкьрьна ви һʹӧнӧрида мәсәла һәри мәзьн ә. Гәло һʹьзкьрьна амьн чь йә? Һʹьзкьрьна ԝи щурʹәйи гәләк ԛәԝи йә у тʹӧ щар кӧта набә, у әԝ һелан дькә бь амьни тʹьме кʹеләка ԝи кәси бьн, кʹижани кӧ һʹьз дькьн. Хԝәде ви һʹӧнӧри һьндава мәрьва әʹйан дькә, у мәрьв жи дькарьн ви һʹӧнӧри һәвдӧрʹа әʹйан кьн. Бешьк, Даԝьд пʹадша һелан бу кӧ бежә: «Йа Хӧдан! Һʹӧба Тә һʹәта әʹзмен ә . . . Һʹӧба Тә чьԛас беһьмбәр ә, Хԝәдейо» (Зәб. 36:5, 7). Ле әм мина Даԝьд, һʹьзкьрьна Йаһоԝайи амьн ԛимәт дькьн? w21.11 2 ¶1-2; 3 ¶4

Иса Мәсиһ, демәк «Ньхӧрийе Хԝәде», у бь милйона мәләк пʹара малбәта Йаһоԝа нә (Колоси 1:15; Зәбур 103:20). Чахе Иса сәр әʹрде бу, әԝи гот ԝәки мәрьвед амьн дькарьн Йаһоԝа ча Баве хԝә һʹәсаб кьн. Гава әԝи шагьртед хԝәрʹа бәʹса Йаһоԝа кьр, әԝи гот кӧ әз дьчьм щәм «Баве хԝә у щәм Баве ԝә» (Йуһʹәнна 20:17). Чахе әм әʹмьре хԝә тʹәсмили Йаһоԝа дькьн у тенә ньхӧмандьне, әм дьбьн пʹара малбәтәкә бь һʹьзкьрьне тʹьжә (Марԛос 10:29, 30). Йаһоԝа хԝәйиһʹӧкӧме мәзьн ә, ле әԝ йәки сәрт у дьлсар нинә. Иса дьхԝазә ԝәки әм жи Йаһоԝа ча Бавәки дьлгәрм у дьлован һʹәсаб кьн. Иса дӧа бь ван гьлийа дәстпекьр: «Баве мәйи әʹзмана». Иса дькарьбу мәрʹа бьгота, ԝәки әм Йаһоԝа ча «Йе Һәри-Зор», ча «Әʹфьрандар» йан ча «Пʹадшайе һʹәта-һʹәтайе» нав бькьн, чьмки әв сәрнавед Хԝәде рʹасти жи һежайи ԝи нә у Кʹьтеба Пирозда жи ньвисар ьн (Дәстпебун 49:25; Ишайа 40:28; 1 Тимотʹейо 1:17). Ле дәԝсе Иса гот ԝәки әм Йаһоԝарʹа бежьн «Баво». w21.09 20 ¶1, 3

Мина Аһаб, Мьнаш жи йәки сәрһʹьшк бу, у әԝи гӧһ нәдьда пʹехәмбәред Йаһоԝа. Хьлазийе, Йаһоԝа сәрокед ордийа пʹадше Асуре мьԛабьли Щьһудайе шанд, у Мьнаш «ль һʹәсьн хьстьн у бь дӧ ԛати зьнщирева гьредан у ԝи бьрьн Бабиле». Кʹьфш ә, паши кӧ Мьнаш ԝәлатәки хәрибда кʹәтә кәле, әԝ ль сәр кьред хԝә кʹур фькьри у «хԝә ль бәр Хԝәдайе бапиред хԝәва зәʹф ньмьз кьр». Ӧса жи, әԝи «жь Хԝәдайе хԝә Хӧданрʹа лава кьр» у «жерʹа дӧа кьр» (2 Дирок 33:10-12). Ԝәʹдә шунда, Йаһоԝа гӧһ да дӧайед Мьнаш. Әԝи дит кӧ Мьнаш һатә гӧһастьне у әв йәк жь дӧайед ԝи әшкәрә бу. Ләма, Йаһоԝа гӧһ да ԝи у әԝ вәгәрʹанд сәр тәхте пʹадшатийе. Бәле, Мьнаш пе кьред хԝә избат кьр, ԝәки әԝи жь дьл тʹобә кьрьбу. w21.10 4 ¶10-11

Прьскила у Әкила мала хԝә бар кьрьн у чунә бажаре Корьнтʹе. Ԝедәре лазьм бу әԝана һәр тьшти тʹәзәда дәстпекьн. Корьнтʹеда ԝана пьштгьрийа щьвате дькьр у тʹәви Паԝлос һелане дьда хушк у бьра. Паше, әԝана дәрбази бажаред дьн жи бун, ԝәки мьзгине бәла кьн (Кʹаред Шандийа 18:18-21; Рʹомайи 16:3-5). Жийина ԝан бешьк гәләк хԝәш бу, чьмки әԝана тʹәвайи шьхӧле Йаһоԝава мьжул дьбун! Иро жи, щотед зәԝьщи дькарьн мина Прьскила у Әкила шьхӧле Пʹадшатийе дайньн щийе пешьн. Ԝе баш бә ԝәки әԝана пешийа зәԝаще, гава һәвдӧ нас дькьн, дәрһәԛа нетед хԝә хәбәр дьн. Һәгәр жьн у мер тʹәвайи сафикьрьна бькьн у хирәт бькьн ԝәки бьгьһижьн нетед рʹӧһʹани, әԝана ԝе жийина хԝәда дьһа зедә дәсте Йаһоԝа бьвиньн (Ԝаиз 4:12). w21.11 17 ¶11-12

Әʹйан ә ԝәки әм гәрәке бь дьл тʹәмийа Хԝәде биньн сери, кӧ ԛәдьре де-баве хԝә бьгьрьн. Бир нәкьн ԝәки готьнед Ԛануна Кʹаһинтийе 19:3 – кӧ гәрәке мәрьв ԛәдьре де-баве хԝә бьгьрә – дәрберʹа паши ван готьна тен: «Пироз бьн, чьмки әз Хӧдан Хԝәдейе ԝә пироз ьм» (Ԛануна Кʹаһинтийе 19:2). Йаһоԝа дьхԝазә, ԝәки әм ԛәдьре де-баве хԝә бьгьрьн, ләма жи ԝе баш бә әм жь хԝә бьпьрсьн: «Гәло әз бь рʹасти ԛәдре де у баве хԝә дьгьрьм?» Һәгәр тӧ фәʹм дьки кӧ тә һʹәта ньһа гӧһ нәдайә ве тʹәмийе, ԝе баш бә сәр хԝә бьхәбьти кӧ бей гӧһастьне. Тӧ һьлбәт нькари рʹожед дәрбазбуйи вәгәрʹини, ле тӧ дькари ирода дьһа зедә ԝәʹдә тʹәви де-баве хԝә дәрбаз ки у алийе материйали у рʹӧһʹанива али ԝан бьки. Бь ви щурʹәйи тӧйе ль гора ширәта жь Ԛануна Кʹаһинтийе 19:3 бьжийи. w21.12 4-5 ¶10-12

Даԝьд  Пʹадша гӧнед гьран кьр. Мәсәлә, Даԝьд тʹәви Бат-Шәбайе бенамуси кьр у сәрда жи әԝи мере ԝе да кӧштьне (2 Самуйел 11:2-4, 14, 15, 24). Ӧса Даԝьд бәла ани сәр хԝә у малбәта хԝә (2 Самуйел 12:10, 11). Щарәкә дьн, Даԝьд хԝә бь тʹәмами нәспартә Йаһоԝа у фәрман да, ԝәки ордийа Исраеле бе жьмартьн. Әве йәке чь ахьри ани? Ԝәкә 70 000 Исраели жь бо нәхԝәшикә гьран мьрьн (2 Самуйел 24:1-4, 10-15). Гәло тӧйе бьфькьрийайи кӧ Даԝьд һежайи рʹәʹма Йаһоԝа нинә? Йаһоԝа ӧса нәдьфькьри. Әԝи дина хԝә да амьни у тʹобәкьрьна Даԝьд. Ахьрийеда Йаһоԝа гӧнед Даԝьдә гьран, бахшанд. Йаһоԝа заньбу, ԝәки Даԝьд гәләк ԝи һʹьз дькә у дьхԝазә тьштед рʹаст бькә. Гәло тӧ шекьрдар нини, ԝәки Хԝәде дина хԝә дьдә хәйсәт-һʹӧнӧред мәйә баш? (1 Пʹадшати 9:4; 1 Дирок 29:10, 17). w21.12 19 ¶11-13

Иса һьндава кәсед сәԛәт дьлрʹәʹм бу. Хәбәра кӧ әԝи Йуһʹәннайе Ньхӧмдаррʹа шандьбу, бинә бира хԝә: «Кор дьбиньн, сәԛәт дьгәрʹьн, кʹоти паԛьж дьбьн, кәрʹ дьбьһен, мьри рʹадьбьн». Кәсед кӧ кʹәрәмәтед Иса дьдитьн, «пәсьне Хԝәде дьдан» (Луԛа 7:20-22). Әм шагьртед Иса нә, ләма жи әм дьхԝазьн мина ԝи һьндава кәсед сәԛәт дьлрʹәʹм, һʹәйф у бь сәбьр бьн. Әм һьлбәт нькарьн мина Иса кʹәрәмәта бькьн, ле әм дькарьн мьзгине бьдьн кәсед кӧ физики йан рʹӧһʹанида кор ьн. Әм дькарьн ԝанрʹа бежьн ԝәки щьнәтеда һәр кәс ԝе жь алийе физики у рʹӧһʹанива беԛьсур бә (Луԛа 4:18). Бь сайа ве мьзгине, гәләк кәс ида пәсьне Хԝәде дьдьн. w21.12 9 ¶5

Аԛуб сәр һʹиме Ньвисаред Пироз һин дькьр. Бь аликʹарийа Хәбәра Хԝәде, әԝи нишан кьр ԝәки Йаһоԝа кәсед амьн хәлат дькә, чаԝа кӧ әԝи Ибо хәлат кьр. Аԛуб әв дәрс бь готьнед һеса у логики шьровәкьр. Бь ви щурʹәйи, әԝи дина мәрьва кʹьшандә сәр Йаһоԝа, нә кӧ сәр хԝә. Дәрс: Бь готьнед һеса хәбәр дә у жь Хәбәра Хԝәде һин кә. Нета мә нә әв ә кӧ нишани мәрьва бькьн, ԝәки занәбуна мә чьԛас кʹур ә, ле әв ә кӧ нишани ԝан бькьн, ԝәки занәбуна Йаһоԝа чьԛас кʹур ә у әԝ чьԛас бона ԝан хәм дькә (Рʹомайи 11:33). Сәва кӧ әм бьгьһижьн ве нете, гәләк фәрз ә ԝәки готьнед мә һәртʹьм сәр һʹиме Ньвисаред Пироз бьн. Мәсәлә, дәԝса кӧ әм хԝәндәкʹаред хԝәрʹа бежьн мәйе чь бькьра, гәрәке әм али ԝан бькьн, ԝәки әԝана дина хԝә бьдьн мәсәлед жь Кʹьтеба Пироз, у ӧса жи фькьр у һәстед Йаһоԝа фәʹм бькьн. Бь ви щурʹәйи, әԝана ԝе бьхԝазьн нә кӧ дьле мә, ле дьле Йаһоԝа ша кьн. w22.01 11 ¶9-10

Хԝәстьна Хԝәде нә тʹәне әв ә ԝәки әм мәрьварʹа хьрабийе нәкьн. Һәгәр әм дьхԝазьн дьле Хԝәде ша кьн, гәләк фәрз ә әм мәрьва һʹьз бькьн. Готьнед Иса нишан дькьн, кӧ тʹәмийа жь Ԛануна Кʹаһинтийе 19:18 гәләк фәрз ә. Щарәке Ферьсики жь Иса пьрси: «Дәрсдар. Ԛанунеда кʹижан ә тʹәмийа һәрʹә мәзьн?» Иса гот ԝәки тʹәмийа һәри мәзьн әв ә кӧ Йаһоԝа һʹьз бькә бь тʹәмамийа дьле хԝә, бь тʹәмамийа щанийа хԝә у бь тʹәмамийа һʹьше хԝә. Паше, әԝи гьлийед жь Ԛануна Кʹаһинтийе 19:18 ԝәкʹьланд у гот: «Йа дӧда жи мина ве йә: ‹Һәвале хԝә ԝәкә хԝә һʹьз бькә›» (Мәтта 22:35-40). Әм һьлбәт дькарьн щурʹә-щурʹә алийава нишан бькьн, ԝәки әм мәрьва һʹьз дькьн. Мәсәлә, Ԛануна Кʹаһинтийе 19:18 мә һин дькә, кӧ әм ча дькарьн нишан бькьн, ԝәки мәрьва һʹьз дькьн: «Һʹәйфе һьлнәди у кʹине зарʹед щьмәʹта хԝәрʹа нәжойи». w21.12 10-11 ¶11-13

Иса дәсте хԝә дьрежи ԝи кьр у Пәтрус хьлаз кьр. Һʹәԝас әԝ ә кӧ һʹәта Пәтрус дина хԝә дьда Иса, әԝи дькарьбу ль сәр аверʹа һәрʹә. Ле гава Пәтрус дина хԝә да фьртоне, тьрс у шьк кʹәтьнә дьле ԝи, у әԝи дәстпекьр нӧԛ бә (Мәтта 14:24-31). Әм дькарьн жь сәрһатийа Пәтрус һьнә дәрса һин бьн. Гава Пәтрус жь ԛәйьке пәйа бу у ль сәр аверʹа чу, әԝ нәдьфькьри кӧ әԝе жь бо фьртоне бькʹәвә панике у нӧԛ бә. Әԝ дьфькьри, ԝәки әԝ дькарә ль сәр аверʹа һәрʹә бал Ахайе хԝә. Ле әԝи һʹәта хьлазийе дина хԝә нәда ве нете. Әм һьлбәт нькарьн ль сәр аверʹа һәрʹьн, ле баԝәрийа мә бь щурʹәки дьн те щерʹьбандьне. Һәгәр әм дина хԝә нәдьн Йаһоԝа у созед ԝи, әм дькарьн жь алийе рʹӧһʹанива «нӧԛ бьн». Жийина мәда багәр у фьртонә чьԛас мәзьн бьн жи, гәрәке әм һәртʹьм дина хԝә бьдьнә Йаһоԝа у баԝәр бьн, ԝәки әԝ дькарә али мә бькә. w21.12 17-18 ¶6-7

Дӧа, леколин у фькьрандьна кʹур, пʹарәкә һʹәбандьна мә йә. Гава әм дӧа дькьн, әм бь ви щурʹәйи тʹәви Баве хԝәйи әʹзмана хәбәр дьдьн, йе кӧ мә гәләк һʹьз дькә. Гава әм Кʹьтеба Пироз леколин дькьн, әм жь Хԝәде һин дьбьн, йе кӧ Канийа биланийе йә (Мәтʹәлок 2:1-5). Гава әм сәр тьштед кӧ әм дәрһәԛа Йаһоԝа һин дьбьн, кʹур дьфькьрьн, әм нет у һʹӧнӧред ԝи дьвиньн, у әм фәʹм дькьн ԝәки нета ԝида рола мә чь йә. Һәгәр әм ԝәʹде хԝә бь ви щурʹәйи бьдьнә хәбате, әме тʹӧ щар пʹошман нәбьн! Ле һәгәр ԝәʹде мә һьндьк бә, гәло әм ча дькарьн әв ԝәʹдә бь билани бьдьнә хәбате? Һәгәр дьбә, хԝәрʹа щики башԛә у рʹьһʹәт бьвинә. Дина хԝә бьдә мәсәла Иса. Пешийа кӧ әԝи хьзмәта хԝә дәстпекьр, әԝ 40 рʹож бәрʹийеда бу (Луԛа 4:1, 2). Ԝедәре мәщала ԝи һәбу, ԝәки Йаһоԝарʹа дӧа бькә у дәрһәԛа ԛьрара Ԝи һьндава хԝә, кʹур бьфькьрә. Бешьк, әв йәк бона тәнгасийед ахьрийе, ԝи һазьр дькьр. w22.01 27-28 ¶7-8

Дьԛәԝьмә рʹуспик йан бьраки щерʹьбанди мәрʹа бежә, кӧ гәрәке әм сәр кемасикә хԝә бьхәбьтьн. Әԝ бьра ӧса мә һʹьз дькә, кӧ сәр һʹиме Кʹьтеба Пироз ширәте дьдә мә. Гәло нә лазьм ә ԝәки әм гӧһ бьдьнә ԝи у ве ширәте ԛәбул кьн? Щара чахе мәрʹа рʹастә-рʹаст ширәта дьдьн, мәрʹа һеса нинә ван ширәта ԛәбул кьн. Әм һәла һе дькарьн бьхәйдьн жи. Гәло чьрʹа? Әм һьлбәт ԛәбул дькьн ԝәки әм гӧнәкʹар ьн, ле гава кәсәк дина мә дькʹьшинә сәр кемасикә мә, әм дькарьн әʹщьз бьн (Ԝаиз 7:9). Дьбәкә ви чахи әм дәстпекьн хԝә һәԛ дәрхьн, у нета кәсе кӧ ширәте дьдә мә бькьнә бьн шьке, йан жи сәр щурʹе ширәтдайина ԝи һерс кәвьн. Дьԛәԝьмә әм мәʹнийа бьгәрʹьн у ӧса бежьн: «Чь изна ԝи һәйә кӧ ширәте бьдә мьн? Бьра пешийе хԝә бьньһерʹә!» Чахе ширәта кӧ әм дьстиньн, мә хԝәш найе, һьнге дьбәкә әм ве ширәте пьшт гӧһе хԝәва бавежьн, йан жи ширәтәкә кӧ мә хԝәш те, бьгәрʹьн. w22.02 8-9 ¶2-4

Гәло итʹбарийа мә һьндава сафикьрьнед Йаһоԝа, дьнйа тʹәзәда жи дькарә бе щерʹьбандьне? Бинә бира хԝә кӧ гава Исраели жь хӧламтийа Мьсре аза бун, ԝәʹдә шунда чь ԛәԝьми. Һьнә жь ԝана дькьрә кӧтә-кӧт у газьне хԝә дькьрьн, чьмки ԝана бира хԝарьнед Мьсре дькьрьн, у әв мана йа кӧ Йаһоԝа дьда ԝан, нәдьшекьрандьн (Жьмар 11:4-6; 21:5). Паши тәнгасийа мәзьн, гәло әме жи сәва һьнә тьшта әʹщьз бьн? Мәсәлә, әм ньзаньн кӧ чьԛас шьхӧл ԝе һәбә һʹәта кӧ әм әʹрде тʹәмьз кьн у һеди-һеди бькьн щьнәт. Дьԛәԝьмә ԝе гәләк шьхӧл һәбә, у пешийе жийина мә ԝе һʹәвәки чәтьн бә. Гәло әме һьнге сәва тьштед кӧ Йаһоԝа дайә мә, газьна бькьн? Һәгәр әм ньһада бона тьштед кӧ Йаһоԝа дьдә мә рʹази бьн, әԝ йәк ԝе али мә бькә ԝәки әм һьнге жи шекьрдар бьн. w22.02 7 ¶18-19

Ве пʹехәмбәртийеда жь Зәкәрйа 8:23 мерәки «Щьһу», бь симболик те һʹәсабе кʹома Мәсиһийед бь рʹӧһʹ кʹьфшкьри (Рʹомайи 2:28, 29). Дәһ кәсед жь мьләтед дьн тенә һʹәсабе пәзед дьн, йед кӧ бь амьни тʹәви Мәсиһийед бьжарти Йаһоԝарʹа хьзмәт дькьн. Чаԝа кӧ пʹехәмбәртийа жь Һәзәԛел 37:15-19, 24, 25-да те кʹьфше, Йаһоԝа Мәсиһийед бь рʹӧһʹ кʹьфшкьри у пәзед дьн кьрьнә йәк. Пʹехәмбәрти бәʹса дӧ «чойа» дькә, демәк дӧ дара. Кәсед бь рʹӧһʹ кʹьфшкьри ча даре «Щьһуда» нә (бәрәка кӧ пʹадшед Исраеле же дьһатьн), пәзед дьн жи ча даре «Әфрайим» ьн. Йаһоԝа готьбу кӧ әԝе ван дӧ кʹома бькә йәк, ԝәки әԝ бьбьн дарәк. Ләма, әв дӧ кʹом, бьн сәрԝертийа Исада тʹәвайи йәктийеда хьзмәт дькьн (Йуһʹәнна 10:16). w22.01 22 ¶9-10

Иса бәʹса һьнә кәса дькьр, йед кӧ кʹәсибарʹа ԛәнщи дькьрьн, чьмки дьхԝәстьн бькʹәтана чʹәʹва у пʹайи бьстандана. Кьред ван кәса чьԛас жи ча ԛәнщи дьһатә кʹьфше, йәкә ԛәнщийа ԝан бәр чʹәʹве Йаһоԝа беԛимәт бу (Мәтта 6:2-4). Һәгәр әм бь нета рʹаст ԛәнщийе дькьн, ви чахи әм бь рʹасти мәрьвнә ԛәнщ ьн. Жь хԝә бьпьрсә: «Хенщи кӧ әз заньм ԝәки тьштед рʹаст чь йә, гәло әз хԝәха жи ван тьшта дькьм? Гава әз ԛәнщийе дькьм, әз ве йәке бь чь нете дькьм?» Рʹӧһʹе Хԝәде ԛәԝатәкә ӧса йә, кӧ мә һелан дькә тьштед рʹаст бькьн (Дәстпебун 1:2). Ләма жи, лазьм ә кӧ һәр хәйсәтәки «бәре рʹӧһʹ» ль сәр мә һʹӧкӧм кә у ԛәԝате бьдә мә тьштед рʹаст бькьн. Мәсәлә, Аԛуб ӧса ньвисибу: «Баԝәри бейи кьра мьри йә» (Аԛуб 2:26). Ве йәке әм дькарьн бежьн дәрһәԛа һʹәму хәйсәт-һʹӧнӧред кӧ дькʹәвьн нава «бәре рʹӧһʹ». Чьԛас әм ԝан һʹӧнӧра дьдьнә кʹьфше, һаԛас әм нишан дькьн кӧ рʹӧһʹе Хԝәде сәр мә һʹӧкӧм дькә. w22.03 11-12 ¶14-16

Әм чьԛас Йаһоԝарʹа хьзмәт бькьн у ԛәнщийе бькьн жи, әв йәк бәс нинә. Пешийа кӧ Пәтрус гот, ԝәки әм «пироз бьн нава һʹәму рʹабун-рʹуньштьна хԝәда», әԝи готьбу кӧ гәрәке әм «фькьред хԝәда пьштгьредайи у һʹьшйар бьн» (1 Пәтрус 1:13). Гәло бона чь? Әԝи зәлал кьр ԝәки бьред Иса йед бь рʹӧһʹ кʹьфшкьри ԝе ‹кʹәрәмәтед Хԝәде бькьнә дәнги›, йе кӧ «гази» ԝан кьрийә (1 Пәтрус 2:9). Иро жи лазьм ә, ԝәки һʹәму шагьртед Иса ви шьхӧле фәрз бькьн. Бь рʹасти әв щабдари ԛәнщийа һәри мәзьн ә, кӧ әм дькарьн бона мәрьва бькьн. Ԛәдрәки чьԛас мәзьн ә, кӧ әм ча щьмәʹтәкә пироз дькарьн мьзгине бь дьл у щан бәла кьн! (Марԛос 13:10) Гава әм бь хирәт мьзгинийе бәла дькьн, әм избат дькьн ԝәки әм Хԝәде у мәрьва һʹьз дькьн. Ӧса жи әм бь ви щурʹәйи нишан дькьн, кӧ әм дьхԝазьн «пироз бьн нава һʹәму рʹабун-рʹуньштьна хԝәда». w21.12 13 ¶18

Паԝлосе шанди һәртʹьм сәр хушк-бьра бь позитив дьньһерʹи. Әԝи фәʹм дькьр, кӧ гава кәсәк шаши дькә, әв йәк найе һʹәсабе кӧ әԝ мәрьвәки хьраб ә. Әԝи хушк-бьра һʹьз дькьр у дина хԝә дьда хәйсәтед ԝанә баш. Гава ԝанарʹа чәтьн бу кӧ тьштед рʹаст бькьн, Паԝлос диса жи нәдьфькьри кӧ нета ԝан хьраб ә, ле фәʹм дькьр кӧ әԝана һʹәԝще аликʹарийе нә. Мәсәлә, бинә бира хԝә кӧ гава нав дӧ хушкед щьвата Филипйайеда проблем пешда һат, Паԝлос чь кьр (Филипи 4:1-3). Паԝлос әв дӧ хушк, Әйодийа у Сьнтиха, рʹьнд нас дькьрьн. Әԝи заньбу кӧ ԝана гәләк сала бь мьлукти хьзмәт кьрьбун, у әԝ баԝәр бу кӧ Йаһоԝа ԝана һʹьз дькә. Ләма жи Паԝлос әԝ сәрт сущдар нәкьрьн, ле әԝи дина хԝә да хәйсәтед ԝанә баш, у дьхԝәст али ԝан бькә ԝәки әԝана ль һәв бен. Бь сайа ньһерʹандьна позитив, әԝи шабуна хԝә ӧнда нәдькьр, у достийа ԝи тʹәви хушк-бьра хьраб нәдьбу. w22.03 30 ¶16-18

Әʹдьлайа кӧ Йаһоԝа дьдә, рʹьһʹәтийе дькә һʹьш у дьле мә. Дина хԝә бьдьн кӧ Йаһоԝа ча али хушкәкә бь наве Луз кьр. Әԝ дьбежә: «Щарна, әз хԝә тʹәне тʹәхмин дькьм у дьфькьрьм ԝәки Йаһоԝа мьн һʹьз накә. Ле ве дәме, әз дәрберʹа дьле хԝә Йаһоԝарʹа вәдькьм. Дӧа дьле мьн рʹьһʹәт дькә». Чаԝа кӧ мәсәла хушка мә нишан дькә, әм дькарьн бь сайа дӧа рʹьһʹәтийа  дьл бьстиньн (Филипи 4:6, 7). Әм заньн кӧ һәгәр әм мәрьве хԝәйи һʹьзкьри ӧнда кьн, Йаһоԝа у Иса ԝе дьлбинийе бьдьнә мә. Ӧса жи, һесьред ԝи тиньн бира мә, ԝәки әм гәрәке мьзгинийе бь дьлрʹәʹми бәла кьн, чьмки дьле Йаһоԝа у Иса сәр мәрьва дьшәԝьтә. Хенщи ве йәке, һесьред Иса нишани мә дькьн кӧ Йаһоԝа у Кӧрʹе ԝи сьстбунед мә фәʹм дькьн у дьхԝазьн али мә бькьн ԝәки әм амьн бьминьн. Әм гәләк һʹьзрәта ве рʹоже нә, кӧ Йаһоԝа «һʹәму һесьред [мә] паԛьж кә» (Әʹйанти 21:4). w22.01 15 ¶7; 19 ¶19-20

Иса бәʹса дӧ дәрийа кьр, йед кӧ бәр дӧ щурʹә рʹе вәдьбьн, рʹийа «фьрә» у рʹийа «тәнг» (Мәтта 7:14). Рʹийа сьсийа тʹӧнә! Гәрәке әм сафи бькьн кӧ әме кʹижан рʹерʹа һәрʹьн. Әв сафикьрьнәкә гәләк фәрз ә, чьмки жийина мәйә һʹәта-һʹәтайе ве йәкева гьредайи йә. Сәд һʹәйф ԝәки һʹәчʹи зәʹф мәрьв рʹийа «фьрә» дьжберьн, чьмки әв рʹекә һеса йә. Әԝана фәʹм накьн кӧ әв рʹе, рʹийа Мире-щьна йә, йа кӧ «дьбә бәрбь ӧндабуне» (1 Корьнтʹи 6:9, 10; 1 Йуһʹәнна 5:19). Рʹийа дьн рʹийа «тәнг» ә, у ча Иса готьбу, «һьндьк ьн әԝед кӧ ԝе рʹейе дьбиньн». Гәло чьрʹа? Рʹеза дьнда, Иса шагьртед хԝәрʹа гот, ԝәки әԝана хԝә «жь пʹехәмбәред дәрәԝ» дур бьгьрьн (Мәтта 7:15). w21.12 22-23 ¶3-5