Илон

Ль рʹожед Иса Мәсиһ, һьнә мәрьварʹа һинкьрьнед Иса бәс нибун. Ле гава Иса бь йа ԝан нәкьр, ԝана әԝ инкʹар кьр (Мәтта 16:4). Ньвисаред Пироз чь дьбежьн? Ишайа пʹехәмбәр дәрһәԛа Мәсиһ жь бәрева ӧса ньвисибу: «Ԝе әԝ нәԛерә у дәнге хԝә бьльнд нәкә у ԝе дь кʹучеда нәдә бьһистьн» (Ишайа 42:1, 2). Иса Мәсиһ бь мьлукти хьзмәт дькьр у дина мәрьва нәдькʹьшандә сәр хԝә. Әԝи дер йан пʹарьстгәһ ава нәдькьрьн, кʹьнщед мәхсус ль хԝә нәдькьрьн у нәдьхԝәст кӧ мәрьв ԝи бь сәрнавед мәхсус рʹумәт бькьн. Гава Иса Мәсиһ дьһат диԝанкьрьн, әԝи кʹәрәмәтәкә мәхсус нәкьр кӧ Һеродәс Пʹадша әʹщебмайи бькә (Луԛа 23:8-11). Бәле, Иса Мәсиһ һьнә кʹәрәмәт дькьрьн, ле әԝи һәри зедә дина хԝә дьда шьхӧле бәлакьрьна мьзгине. Әԝи шагьртед хԝәрʹа ӧса гот: «Әз бона ве йәке һатьмә» (Марԛос 1:38). w21.05 4 ¶9-10

Әм дьгәрʹьн мәрьвед ӧса, дьле кʹижана бона жийина һәрһәйи һазьр ә (Кʹаред Шандийа 13:48). Сәва кӧ әԝана бьбьн шагьртед Иса Мәсиһ, гәрәке әм али ԝан бькьн кӧ әԝана һинкьрьнед Кʹьтеба Пироз (1) фәʹм бькьн, (2) ԛәбул кьн у (3) жийина хԝәда биньн сери (Колоси 2:6, 7; 1 Тʹесалоники 2:13). Гава хԝәндәкʹаред Кʹьтеба Пироз тен щьвина, әм гьшк дькарьн һʹьзкьрьн у дьлгәрмийа хԝә ԝанрʹа нишан кьн у ве йәкеда ԝанрʹа бьбьнә мәсәлә (Йуһʹәнна 13:35). Дьбә кӧ гәләк ԝәхт у ԛәԝат лазьм ә, ԝәки дәрсдар али хԝәндәкʹаре хԝә бькә кӧ әԝ тʹәрка әʹдәт у баԝәрийед нәрʹаст бьдә (2 Корьнтʹи 10:4, 5). Дьԛәԝьмә гәләк мәһ дәрбаз бьн һʹәта кӧ кәсәк ван гава бавежә у һазьр бә кӧ бе ньхӧмандьне. Ле ԛәԝат кӧ әм бона ԝан хәрщ дькьн, бадиһәԝа нинә. w21.07 3 ¶6

Гәло әм баԝәр ьн ԝәки әм сәр рʹийа рʹастийе нә у Йаһоԝа һʹәбандьна Шәʹдед Йаһоԝа ԛәбул дькә? Паԝлосе шанди баԝәр бу ԝәки әԝ сәр рʹийа рʹастийе йә (1 Тʹесалоники 1:5). Баԝәрийа ԝи нә кӧ сәр һʹиме емосийа бу, ле сәр һʹиме избаткьрьна бу. Паԝлос Хәбәра Хԝәде һур у кʹур леколин дькьр, у баԝәр дькьр кӧ «тʹәмамийа ньвисаре жь бина бәр Хԝәде йә» (2 Тимотʹейо 3:16). Гәло Паԝлосе шанди, жь леколина Ньвисаред Пироз чь һин бу? Мәсәлә, әԝи избатед әшкәрә дитьн ԝәки Иса бь рʹасти жи Мәсиһе создайи бу. Сәроке дине Щьһуйа чʹәʹвед хԝә сәр ван избатийа дьгьртьн. Ԝана хԝә ча бьжартийед Хԝәде һʹәсаб дькьр, ле бь кьред хԝә Хԝәде инкʹар дькьр (Тито 1:16). Паԝлос мина ԝан нибу. Әԝи нә тʹәне һьнә тьшт жь Хәбәра Хԝәде, ле «тʹәмамийа ԛьрара Хԝәде» һин дькьр у пек дьани (Кʹаред Шандийа 20:27). w21.10 18 ¶1-2

Чьԛас кӧ әм тʹохьмед рʹастийе дьчиньн у ав дьдьн, гәрәке әм рола Хԝәде фәʹм бькьн (1 Корьнтʹи 3:6, 7). Йаһоԝа һʹәму мәрьва ԛимәт дькә. Ләма, әԝ дьхԝазә кӧ әм тʹәви Кӧрʹе ԝи һәвкʹарийе бькьн у пешийа хьлазийа ве системе мәрьвед жь һʹәму мьләта тʹоп бькьн (Һагай 2:7). Хәбата бәлакьрьна мьзгине мина хәбата легәрʹин у хьлазкьрьне йә. Паши әʹрдһʹәжәке, кәсед кӧ хәбата легәрʹин у хьлазкьрьне дькьн, заньн кӧ йед кӧ һе сах ьн дьбәкә һьндьк ьн. Диса жи, һәгәр тʹәне кәсәки сах һәбә, әԝана бь дьл у щан дьхәбьтьн кӧ ԝи хьлаз кьн. Ләма жи, шьхӧле легәрʹин у хьлазкьрьне пʹьрʹ һежа йә. Әм ньзаньн кӧ чьԛас мәрьв ԝе ԝәʹде кʹӧтакьрьна система Шәйтʹан хьлаз бьн. Ле Йаһоԝа дькарә бь дәсте мә али ван кәса бькә. Бьраки бь наве Андреас, йе кӧ ль Боливйайе дьжи, ӧса дьбежә: «Бь дитьна мьн, гава кӧ кәсәк Кʹьтеба Пироз һин дьбә у те ньхӧмандьне, әв йәк сәркʹәтьна һʹәму хушк у бьра йә.» Ԝәрә әм жи сәр хьзмәта хԝә ӧса бьньһерʹьн! Һәгәр әм ньһерʹандьнәкә позитив хԝәй бькьн, Йаһоԝа ԝе мә бәрәкʹәт бькә, у әме жь хьзмәта хԝә шабуне бьстиньн. w21.05 19 ¶19-20

Нета нечʹирван әв ә кӧ һʹәйԝана бьгьрә йан жи бькӧжә. Чаԝа кӧ Кʹьтеба Пироз жи нишан дькә, нечʹирван щурʹә-щурʹә тʹәлька дьдә хәбате кӧ бьгьһижә нета хԝә (Ибо 18:8-10). Гәло нечʹирван чь дькә кӧ һʹәйԝанәки бькә тʹәльке? Йа пешьн, әԝ дина хԝә дьдә ве һʹәйԝане. Мәсәлә, һʹәйԝан кʹӧда дьчә? Әԝ чь һʹьз дькә? Әԝ чаԝа дькарә ньшкева бе гьртьн? Мире-щьна мина ви нечʹирвани йә. Әԝ жи дина хԝә дьдә мә у мә леколин дькә. Әԝ дьвинә кӧ әм кʹӧда дьчьн у чь һʹьз дькьн. Паше, әԝ тʹәлькәке датинә у һивийе дьсәкьнә кӧ әм бькʹәвьн ве тʹәльке. Ле Кʹьтеба Пироз дьбежә кӧ һәгәр әм бен гьртьн жи, әм дькарьн хԝә хьлаз кьн. Ӧса жи, Кʹьтеба Пироз мә һин дькә кӧ әм ча дькарьн хԝә жь ван тʹәлька дур бьгьрьн. Нав тʹәлькед Мире-щьнада, ԛӧрʹәти у тьмайи дӧ тʹәлькед лапи ԛәԝи нә. Бь һʹәзара сала, Мире-щьна әв һʹӧнӧред хьраб дьдә хәбате. Әԝ мина нечʹирванәки йә кӧ чʹьвика бь сайа тʹәлька йан тʹорʹәке дьгьрә (Зәбур 91:3). Ле әм дькарьн хԝә жь ван тʹәлька бьпарезьн, чьмки Йаһоԝа мәрʹа методед Мире-щьна әшкәрә кьрийә (2 Корьнтʹи 2:11). w21.06 14 ¶1-2

Хушк-бьред мәйә әʹмьрда мәзьн хьзнә нә. Ль гора Кʹьтеба Пироз, пʹорʹе ԝанә спи, «кʹофийа рʹумәте йә» (Мәтʹәлок 20:29). Йазьх щарна ԛимәта ԝана әшкәрә найе кʹьфше. Ле һәгәр әм тедәрхьн кӧ әԝана чьԛас ԛимәт ьн, әм дькарьн жь мәсәла жийина ԝан кʹарәкә мәзьн бьстиньн. Йаһоԝа хьзмәткʹаред хԝәйә әʹмьрда мәзьн гәләк ԛимәт дькә. Әԝ ԝана рʹьнд нас дькә у һʹӧнӧред ԝанә баш занә. Хԝәде дьхԝазә ԝәки әв биланийа кӧ ԝана бь сала дәстхьстийә, щаһьларʹа пʹарәвәкьн (Ибо 12:12; Мәтʹәлок 1:1-4). Ӧса жи, Йаһоԝа амьнийа ԝан ԛимәт дькә (Малахи 3:16). Бәр щурʹә-щурʹә дәрд у тәнгасийа, ԝана баԝәрийа хԝә тʹӧ щар ӧнда нәкьрийә. Һевийа ԝан чьԛас дьчә, дьһа ԛәԝи дьбә. Хенщи ве йәке, Йаһоԝа ԝана һʹьз дькә, чьмки әԝана «һʹәта мәзьнайийа хԝәда жи» наве ԝи пироз дькьн (Зәбур 92:12-15). w21.09 2 ¶2-3

Щар-щара лазьм ә кӧ әм нетед хԝә бьщерʹьбиньн. Мәсәлә, әм дькарьн жь хԝә бьпьрсьн: «Гәло әз хԝә һәр тʹьм бәрамбәри кәсед дьн дькьм? Гәло әз пәй чь дькʹәвьм у нета мьн чь йә? Әз пәй ве йәке дькʹәвьм кӧ щьватеда жь кәсед дьн четьр бьм, йан әз дьхԝазьм дьле Йаһоԝа ша кьм?» Кʹьтеба Пироз дьбежә кӧ гәрәке әм хԝә бәрамбәри тʹӧ кәси нәкьн. Гәло чьрʹа? Һәгәр әм хԝә жь кәсәки дьн четьр һʹәсаб бькьн, ԛӧрʹәти дькарә бькʹәвә дьле мә. Жь алийе дьнва, һәгәр әм бьфькьрьн кӧ кәсед дьн жь мә четьр ьн, әм дькарьн дьлтәнг бьн у шабуна хԝә ӧнда кьн (Рʹомайи 12:3). Гәрәке әм бир нәкьн кӧ Йаһоԝа әм кʹьшандьнә бал хԝә нә жь бо ве йәке кӧ әм бәдәԝ йан хәбәрхԝәш ьн, йан жи чьмки гәләк кәс мә һʹьз дькьн. Ле бона ве йәке кӧ әм һазьр бун ԝи һʹьз бькьн у гӧһ бьдьн Иса (Йуһʹәнна 6:44; 1 Корьнтʹи 1:26-31). w21.07 14-15 ¶3-4

Сәва кӧ фькьред хԝә нуйәжийин бькьн, гәрәке әм дӧа бькьн, Кʹьтеба Пироз леколин бькьн у кʹур сәр бьфькьрьн. Һәр гав ван тьшта бькә у жь Йаһоԝа ԛәԝате бьхԝазә. Йаһоԝа ԝе бь сайа рʹӧһʹе пироз али тә бькә, ԝәки тӧ хԝә бәрамбәри кәсед дьн нәки. Һәгәр дьле тәда ԛӧрʹәти йан чʹәʹвнәбари кʹока хԝә бьдә, Йаһоԝа ԝе али тә бькә кӧ тӧ ван һʹӧнӧред хьраб бьвини у жь дьле хԝә дәрхи (2 Дирок 6:29, 30). Йаһоԝа дьле мә дьвинә. Әԝ занә кӧ әм һьм мьԛабьли рʹӧһʹе ве дьнйайе һьм жи мьԛабьли кемасийед хԝә шәрʹ дькьн. Гава әԝ дьвинә кӧ әм чьԛас сәр хԝә дьхәбьтьн, ԝәки жь ван һʹӧнӧред нәбаш аза бьн, әԝ мә дьһа зедә һʹьз дькә. Чаԝа кӧ дайькәк зарʹа хԝә һʹьз дькә, Йаһоԝа жи ӧса мә һʹьз дькә (Ишайа 49:15). Гава Йаһоԝа дьвинә кӧ әм чьԛас сәр хԝә дьхәбьтьн у щәфа дькʹьшиньн ԝәки бь дьл у щан ԝирʹа хьзмәт кьн, әԝ мә дьһа ԛайим һʹьз дькә! w21.07 24-25 ¶17-19

Әм дькарьн шабуна хԝә зедә кьн, һәгәр щабдарийед хԝә бь хирәт биньн сери. Һәгәр тӧ «тʹәмамийа ԝәхте хԝә» тʹәсмили шьхӧле бәлакьрьна мьзгине дьки у шьхӧлед щьвате бь дьл у щан тини сери, тӧйе шабуне бьстини (Кʹаред Шандийа 18:5; Ибрани 10:24, 25). Хԝә рʹьнд һазьр бькә, ԝәки тӧ бькарьби щьватеда пе щабед хԝә хушк-бьра бьшьдини. Дәрсед кӧ тӧ бона щьвата «Бьжин у Хьзмәт кьн» дьстини, рʹьнд у бь хирәт һазьр кә. Һәгәр щьватеда тәрʹа шьхӧләк бе дайине, ви шьхӧли ԝәʹдәда у бь тʹәмами бинә сери. Дәрһәԛа тʹӧ шьхӧле рʹӧһʹани нәфькьрә кӧ һежа нинә ԝәхте хԝә сәр хәрщ ки. Фәрәсәтед хԝәда пешда һәрʹә у шьхӧлед хԝәда бьбә һостә (Мәтʹәлок 22:29). Чьԛас тӧйе бь шьхӧлед рʹӧһʹани у шьхӧлед щьватева мьжул би, тӧйе һе зу пешда һәри у дьһа зедә шабуне бьстини (Галати 6:4). Сәрда жи, гава кәсәки дьн кʹьфшкьрьнәке дьстинә, йа кӧ тә жи дьхԝәст бьстанда, әв йәк кӧ тӧ шьхӧлед щьватева мьжул и, ԝе али тә бькә ԝәки тӧ тʹәви ԝи ша би (Галати 5:26). w21.08 22 ¶11

Әм гәрәке ԛӧрʹә нәбьн у ве йәке бира хԝәда хԝәй кьн. Чаԝа кӧ нәхԝәши дькарә тамаред дьл бьхьтьминә у нәһелә ԝәки дьл рʹьнд бькʹӧтә, ӧса жи ԛӧрʹәбун дькарә бьбә сәбәб, кӧ дьле мәйи симболик рʹебәрийа Йаһоԝа ԛәбул нәкә. Дьле Ферьсийа һаԛас һьшк бу кӧ ԝана избатед зәлал, йед кӧ рʹӧһʹе пироз әшкәрә дькьр ԝәки Иса кӧрʹе Хԝәде йә, инкʹар дькьрьн (Йуһʹәнна 12:37-40). Сәва кʹӧбар-бабахийа хԝә, ԝана мәщала жийина һʹәта-һʹәтайе жь дәсте хԝә бәрʹда (Мәтта 23:13, 33). Ләма жи гәләк фәрз ә, ԝәки әм бь мьлукти изне бьдьн, ԝәки Кʹьтеба Пироз у рʹӧһʹе Хԝәде хәйсәт-һʹӧнӧред мә бьгӧһезьн, у сәр фькьр у сафикьрьнед мә һʹӧкӧм кьн. Аԛуб йәки мьлук бу, ләма жи әԝ һазьр бу жь Йаһоԝа һин бә. Аԛуб ӧса жи дәрсдарәки баш бу, чьмки мьлук бу. w22.01 10 ¶7

Әм дькарьн баԝәр бьн, кӧ һәгәр әм «һәр гав» дӧа бькьн, Баве мәйи әʹзмана ԝе мә бьбьһе у щаба дӧайед мә бьдә (Колоси 4:2). Щарна, әм дьбәкә дьфькьрьн ԝәки щаба дӧайе мә дәрәнги дькʹәвә. Ле Йаһоԝа соз дайә, ԝәки әԝе ԝәхтда, демәк «гава әм һʹәԝщә бьн» щаба дӧайе мә бьдә (Ибрани 4:16). Ләма, һәгәр хԝәстьна мә зу нәйе сери жи, гәрәке әм тʹӧ щар нәфькьрьн, ԝәки Йаһоԝа пьшта хԝә дайә мә. Мәсәлә, гәләк кәс бь сала дӧа дькьн, ԝәки Пʹадшатийа Хԝәде бе у ве система хьраб кʹӧта кә. Иса жи дьгот, ԝәки әм гәрәке бона ве йәке дӧа бькьн (Мәтта 6:10). Һәгәр кәсәк баԝәрийа хԝә ӧнда кә жь бо ве йәке кӧ ль гора ньһерʹандьна ԝи хьлазийа дьнйайе ԝәхтда нәһатийә, әв йәк чь беаԛьлайи йә! (Һәбаԛуԛ 2:3; Мәтта 24:44) Ԝе баш бә әм бәрдәԝам кьн һивийа Йаһоԝа бьн у баԝәр бьн ԝәки әԝе щаба дӧайед мә бьдә. Хьлазийа дьнйайе ԝе ԝәхте хԝәда бе, чьмки Йаһоԝа «ԝе рʹоже у ԝе сьһʹәте» ида кʹьфш кьрийә. У әԝ рʹож ԝе бона һәр кәси ԝәхта һәри баш бә (Мәтта 24:36; 2 Пәтрус 3:15). w21.08 10 ¶10-11

Кәсед әʹмьрда мәзьн гәрәке бь мьлукти ԛәбул кьн кӧ ԛәԝата ԝан ида мина йа бәре нинә. Мәсәлә, бьфькьрьн дәрһәԛа бәрпьрсийаред мьһале. Гава әԝана дьбьн 70 сали, әԝана кʹьфшкьрьнәкә дьн дьстиньн. Бона һьнә бәрпьрсийара зор те ве кʹьфшкьрьна хԝә бьһельн. Ԝана бь дьл у щан али хушк-бьра дькьр, ле әԝана фәʹм дькьн кӧ ԝәхт һатийә ԝәки ве щабдарийе бьдьн дәсте кәсед жь ԝан щаһьлтьр. Бь ве йәке әԝана чʹәʹв дьдьнә Леԝийед Исраела бәре: Гава Леԝи дьбун 50 сали, ԝана хьзмәта хԝә коне пирозда дьда сәкьнандьне. Йәкә Леԝийа шабуна хԝә ӧнда нәдькьр, чьмки шабуна ԝан шьхӧләки йан кʹьфшкьрьнәкива гьредайи нибу. Чь дәсте ԝан дьһат ԝана дькьр, ԝәки бь дьл у щан пьштгьрийа щаһьла бькьн (Жьмар 8:25, 26). Иро, гава бәрпьрсийаред мьһале дьбьн 70 сали, әԝана ве кʹьфшкьрьне дьһельн, ле әԝана диса жи бь дьл у щан пьштгьрийа щьвата хԝә дькьн. w21.09 8-9 ¶3-4

Луԛа 15:11-32-да, Иса Мәсиһ бәʹса хортәки кьр, йе кӧ мьԛабьли баве хԝә рʹабу у чу «ԝәлатәки дур». Ԝедәре әԝи бь жийинәкә хьраб у бенамус дьжит. Гава сәре ԝи кʹәтә бәлайе, әԝ сәр кьред хԝә кʹур фькьри. Әԝи фәʹм кьр, ԝәки жийина мала баве ԝида чьԛас хԝәш бу. Иса гот кӧ «әԝ сәр һʹьше хԝәда һат». Ахьрийеда, әԝи сафи кьр вәгәрʹә мала баве хԝә у жь баве хԝә бахшандьне бьхԝазә. Әв йәк кӧ әԝи фәʹм кьр, ԝәки чьԛас хьраби кьрийә, һьлбәт фәрз бу. Лазьм бу кӧ әԝ әʹмьре хԝә бьгӧһезә! Кӧрʹе ӧндабуйи сәва кьред хԝә жь дьл тʹобә кьр. Ве мәтʹәлокеда чәнд дәрсед фәрз һәнә. Әԝ мәсәлә дькарә али рʹуспийед щьвате бькә, кӧ тедәрхьн һәла хушк йан бьра бь рʹасти гӧне хԝә тʹобә дькә йан на. w21.10 5 ¶14-15

Гәло чь ԝе нәйе һʹәжандьн, демәк нәйе ԛьрʹкьрьне? Паԝлосе шанди ӧса гот: «Аԝа әм ве йәке бьшекьриньн, кӧ әм пʹадшатикә нәһʹәжийайи дьстиньн у бь ви аԝайи бь хоф у тьрс Хԝәде бьһʹәбиньн, чаԝа кӧ ль ԝи хԝәш те» (Ибрани 12:28). Бәле, паши һʹәжандьна хьлазийе, тʹәне Пʹадшатийа Хԝәде ԝе ль щийе хԝә нәһʹәжә! (Зәбур 110:5, 6; Данийел 2:44). Ԝәхт һьндьк майә! Гәрәке һәр кәс сафикьрьне бькә, йан пьштгьрийа ве дьнйайе бькә, йа кӧ дьчә бәрбь кʹӧтабуне, йан жи ль гора хԝәстьна Хԝәде бьжи у жийина һʹәта-һʹәтайе бьстинә (Ибрани 12:25). Бь сайа бәлакьрьна мьзгине, әм дькарьн али мәрьва бькьн, ԝәки әԝана сафикьрьна фәрз бькьн. У бьра әм ван готьнед Иса Мәсиһ бир нәкьн: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14). w21.09 19 ¶18-20

Рʹуспино, чь кӧ жь дәсте ԝә те бькьн, ԝәки дьле малбәтед ӧса ԛәԝи кьн. Гава кәсәк жь щьвате те дәрхьстьне, лазьм ә кӧ һун дьле малбәта ԝи рʹьһʹәт кьн. Әв йәк щабдарийа ԝә йә (1 Тʹесалоники 5:14). Пешийа у паши щьвина тʹәви ԝан хәбәр дьн у ԝана бьшьдиньн. Тʹәви ԝан дәркʹәвьн хьзмәте, йан ԝана щара тʹәглифи сәр ԛӧльхкьрьна малбәте бькьн. Бәле, лазьм ә кӧ шьванед рʹӧһʹани бәрхед Хԝәде йед дьлшкәсти хԝәй кьн у ԝанрʹа дьлрʹәʹм у дьлшәԝат бьн (1 Тʹесалоники 2:7, 8). Йаһоԝа «нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәтрус 3:9). Һәгәр кәсәки гӧнәки гьран кьрьбә жи, жийина ԝи бона Йаһоԝа гәләк ԛимәт ә. Бир нәкә, Йаһоԝа әʹмре Кӧрʹе хԝәйи дәлал бона һәр кәси ԛӧрбан кьр. Йаһоԝа бь дьлрʹәʹми гази гӧнәкʹара дькә ԝәки әԝана вәгәрʹьн щәм ԝи. Чаԝа жь мәтʹәлока Иса дәрһәԛа кӧрʹе ӧндабуйи әм дьвиньн, чʹәʹве Йаһоԝа рʹийа ԝан ә (Луԛа 15:11-32). w21.09 30-31 ¶17-19

Һәгәр сьһʹәт у ԛәԝата тә ида тʹерʹа тә накә, ԝәки мьзгине ча бәре бәла ки, гәло тӧ диса жи дькари жь ви шьхӧли шабуне бьстини? Бәле! Сәрһатийа Даԝьд Пʹадша бинә бира хԝә. Чахе Амалекийа һәбука Даԝьд у әскәред ԝи тʹалан кьрьн у нәфәред ԝан жи рʹәвандьн, Даԝьд тʹәви әскәред хԝә кʹәтә пәй ԝан. Ле 200 әскәр гәләк ԝәстийайи бун, у ԝана нькарьбу шәрʹ бькьра. Ләма, әԝана бәр һур-мура ман. Паши шәрʹ, Даԝьд тʹәми да кӧ тьштед зәфткьри ԝәкә һәв бенә пʹарәвәкьрьн (1 Самуйел 30:21-25). Шьхӧле һазьркьрьна шагьрта жи ӧса йә. Гава кәсәк тʹәзә те сәр рʹийа жийине, һәр кәсе кӧ чь жь дәсте ԝи һат кьр ԝәки али ԝи мәрьви бькә, дькарә ша бә. Йаһоԝа дина хԝә дьдә хирәта мә у занә әм чьԛас ԝи һʹьз дькьн, ләма жи әԝ мә хәлат дькә. Ӧса жи, әԝ мә һин дькә ԝәки ча жь шьхӧле һазьркьрьна шагьрта шабуне бьстиньн (Йуһʹәнна 14:12). Әм дькарьн баԝәр бьн ԝәки Хԝәде ԝе жь мә рʹази бә, сәри әԝ ә әм дьлтәнг нәбьн у нәԝәстьн! w21.10 28 ¶15-17

Гава әм кал у пир дьбьн, әм дьбәкә дьтьрсьн ԝәки рʹожәке, әме ида нькарьбьн ча бәре хьзмәт кьн. Рʹаст ә, дьԛәԝьмә ԛәԝата мә ԝе дьһа кем бә, ле әм дькарьн бь сайа билани у әʹмьре хԝәйә щерʹьбанди али щаһьла бькьн, ԝәки әԝана рʹӧһʹанида пешда һәрʹьн у щабдарийед тʹәзә бьстиньн. Сәва кӧ кәсед әʹмьрда мәзьн бькарьбьн али кәсед щаһьл бькьн, лазьм ә ԝәки әԝана мьлук бьн. Мәрьвед мьлук кәсед дьн жь хԝә бьльндтьр һʹәсаб дькьн (Филипи 2:3, 4). Кәсе мьлук ԛәбул дькә кӧ ль гора Кʹьтеба Пироз изьн һәйә ԝәки һьнә шьхӧлед щьвате бь щурʹә-щурʹә метода бенә кьрьне. Ләма жи ԝе баш бә ԝәки йед әʹмьрда мәзьн мьлук бьн у нәфькьрьн кӧ гәрәке һәр кәс ван шьхӧла бь методед бәре бькьн (Ԝаиз 7:10). Әԝана чьԛас щерʹьбанди бьн жи, гәрәке фәʹм бькьн кӧ «әв дьнйа әʹйан дәрбаз дьбә» у лазьм ә ԝәки мәрьв һини дәрәщед тʹәзә бә (1 Корьнтʹи 7:31). w21.09 8 ¶1, 3

Йаһоԝа бь тʹәмами пироз ә. Сәр бәрәʹнике жь зерʹе хальс, йа кӧ ль сәр пʹапʹаха сәрәккʹаһин дьһат гьредане, ӧса ньвиси бу: «Пироз Хӧданрʹа» (Дәркʹәтьн 28:36-38). Ве ньвисаре дьани бира мәрьва кӧ Йаһоԝа бь рʹасти жи пироз ә. Ле Исраелийед кӧ әв ньвисар нәдьдитьн, жь кʹӧ заньбун ԝәки Йаһоԝа пироз ә? Гава Ԛанун бәр щьмәʹте дьһатә хԝәндьне, һәр мер, жьн у зарʹ әв рʹастийа фәрз дьбьһист (Ԛануна Дӧщари 31:9-12). Һәгәр әм ԝедәре буна, мәйе жи әв готьн бьбьһиста: «Әз Хӧдан Хԝәдейе ԝә мә, . . . пироз бьн, чьмки әзи пироз ьм». «Һун бона мьн пироз бьн, чьмки әз Хӧдан пироз ьм» (Ԛануна Кʹаһинтийе 11:44, 45; 20:7, 26). w21.12 3 ¶6-7

Һьнә кәс дәрһәԛа һʹәԝщед хԝә хәма дькьн. Ԝәлатед кʹәсибда щарна зор ә, ԝәки мәрьв әʹбура мала хԝә бькә. Йан жи дьбәкә малхе мале мьрийә у кәс тʹӧнә кӧ малбәте хԝәй кә. Дәԝса кӧ әм хәма бькьн, гәрәке әм баԝәрийа хԝә дьһа ԛәԝи кьн. Бир нәкә, Йаһоԝа соз дайә, ԝәки ԝе бона һʹәԝщед мә хәм бькә, һәгәр әм «бәре пешьн ль Пʹадшатийа Хԝәде бьгәрʹьн у бькьн кӧ рʹастийа ԝи бьԛәдиньн (Мәтта 6:32, 33). Әԝ ви созе хԝә һәртʹьм тинә сери! (Ԛануна Дӧщари 8:4, 15, 16; Зәбур 37:25). Һәгәр Йаһоԝа гӧл у чʹьвика хԝәй дькә, ида нә лазьм ә әм бона кʹьнщ у хԝарьне хәма бькьн (Мәтта 6:26-30; Филипи 4:6, 7). Чаԝа де-бав бона һʹәԝщед зарʹед хԝә хәм дькьн, чьмки ԝана һʹьз дькьн, Баве мәйи әʹзмана жи бона һʹәԝщед физики йед зарʹед хԝә хәм дькә, чьмки ԝана һʹьз дькә. w21.12 17 ¶4-5; 18 ¶8

Гәло хушк йан бьраки ԛә нәһәԛи тә кьрийә у дьле тә бьриндар кьрийә? Дина хԝә бьдә мәсәла Усьв, әԝ жь бьред хԝә рʹасти нәһәԛийе һат. Ле диса жи бәрдәԝам дькьр дина хԝә бьдә достийа хԝә тʹәви Йаһоԝа. Хьлазийе, Йаһоԝа сәбра ԝи хәлат кьр. Ԝәʹдә шунда Усьв бахшандә бьред хԝә у дит, ԝәки Йаһоԝа ча ԝи кʹәрәм кьр (Дәстпебун 45:5). Мина Усьв, һәгәр әм незики Йаһоԝа бьн у баԝәр бьн кӧ әԝе ԝәхта рʹастда ве дәрәще сафи кә, дьле мә ԝе рʹьһʹәт бә (Зәбур 7:17; 73:28). Һәгәр дьле тә жи ешандьнә йан тӧ рʹасти нәһәԛийе һати, бир нәкә ԝәки Йаһоԝа «незики дьлшкәстийа йә» (Зәбур 34:18). Әԝ тә һʹьз дькә у әԝ ша дьбә чахе тӧ сәбьр дьки у баре хԝә дьди дәсте ԝи (Зәбур 55:22). Әԝ Һʹакьме дьнйайе йә, у әԝ һәр тьшти дьвинә (1 Пәтрус 3:12). Гава тӧ рʹасти проблема тейи у нькари чʹарәке бьвини, гәло тӧйе һивийе би һʹәта кӧ Йаһоԝа проблема тә сафи кә? w21.08 11 ¶14; 12 ¶16

Гәләк фәрз ә кӧ әм ӧса бьжин, ԝәки дьле Йаһоԝа ша кьн. Ләма жи әм гәрәке тьштед фәрз дайньн сәр щийе пешьн. Щарна, сәва кӧ әм бькарьбьн ԝәʹде хԝә бь билани хәрщ кьн, лазьм ә әм жь дӧ тьшта, йед кӧ нә хьраб ьн, тʹәне йәке бьжберьн. Бинә бира хԝә кӧ гава Иса чу мала Мәрйәм у Мәртʹайе, чь ԛәԝьми. Мәртʹа гәләк ша бу кӧ Иса һат мала ԝан, ләма жи әԝ чу ԝәки хԝарьнәкә хԝәш һазьр кә. Ле хушка ԝе Мәрйәм кʹеләка Иса рʹуньшт у гӧһ дьда готьнед ԝи. Һьлбәт, нета Мәртʹайе нә хьраб бу, ле бәле Мәрйәме «пʹара ԛәнщ хԝәрʹа бьжарт» (Луԛа 10:38-42). Ԝәʹдә шунда, Мәрйәме дьбәкә бир кьр, кӧ ԝе рʹоже ԝана чь хԝар, ле әм дькарьн баԝәр бьн ԝәки әԝе готьнед Иса бир нәкьр. Чаԝа кӧ Мәрйәме ԛимәт дькьр ԝәʹде кӧ әԝе тʹәви Иса дәрбаз кьр, әм жи ԛимәт дькьн ԝәʹде кӧ бона Йаһоԝа хәрщ дькьн. w22.01 27 ¶5-6

Рʹаст ә Аһаб хԝә бәр Йаһоԝа ньмьз кьр, йәкә кьред ԝи нишан дькьрьн ԝәки әԝи жь дьл тʹобә нәкьрьбу. Мәсәлә, әԝи тьштәки нәдькьр ԝәки ԝәлате хԝә жь пʹутпʹарьстийе паԛьж кә. Ӧса жи, әԝи пьштгьрийа һʹәбандьна Йаһоԝа нәдькьр. Паши мьрьна Аһаб, Йаһоԝа әшкәрә кьр, ԝәки бәр чʹәʹве ԝи Аһаб йәки ча бу. Йәһу пʹехәмбәр гот кӧ әԝ йәки «хьраб» бу (2 Дирок 19:1, 2). Һәла бьфькьрә: Һәгәр Аһаб жь дьл тʹобә кьра, гәло пʹехәмбәр ԝе бьгота ԝәки Аһаб йәки хьраб ә у Йаһоԝа нәфрʹәт дькә? Пешда Аһаб чьԛас пʹошман бу жи, әшкәрә йә, әԝи бь тʹәмами тʹобә нәкьр. Әм дькарьн жь сәрһатийа Аһаб чь һин бьн? Гава Аһаб фәрмана Йаһоԝа бьһист, әԝи хԝә бәр Хԝәде ньмьз кьр. Әв йәк һьлбәт гавәкә баш бу. Ле паше, әԝи пе кьред хԝә нишан кьр, ԝәки жь дьл тʹобә нәкьрьбу. Әʹйан ә кӧ тʹобәкьрьн тʹәне әв нинә, гава мәрьв сәва кьред хԝә пʹошман дьбә, ле һе зедә тьшт лазьм ә. w21.10 3 ¶4-5, 7-8

Ишайа пʹехәмбәр бу у жьна ԝи жи ча «пʹехәмбәр» дьһатә навкьрьне (Ишайа 8:1-4, ИМ). Те кʹьфше ԝәки Ишайа у жьна ԝи хьзмәта Йаһоԝа датанин сәр щийе пешьн. Рʹожед мәда жи, ԝе баш бә жьн-мер чь жь дәсте ԝан те бькьн, ԝәки жийина хԝәда хьзмәта Йаһоԝа дайньн сәр щийе пешьн. Гава әԝана Кʹьтеба Пироз тʹәвайи леколин дькьн у дьвиньн кӧ созед Йаһоԝа чаԝа тенә сери, баԝәрийа ԝан һьндава Йаһоԝа у созед ԝи дьһа ԛәԝи дьбә (Тито 1:2). Ӧса жи әԝана дькарьн бьфькьрьн, һәла әԝана хԝәха ча дькарьн пьштгьрийа пекһатьна һьнә пʹехәмбәртийед Кʹьтеба Пироз бькьн. Мәсәлә, Иса пешда готьбу ԝәки пешийа хьлазийа ве дьнйайе, мьзгина Пʹадшатийе ԝе сәр тʹәмамийа дьнйайе бе бәлакьрьне, у әԝана жи дькарьн пеканина ве пʹехәмбәртийеда кʹар бькьн. Чьԛас жьн у мер баԝәр дьбьн ԝәки готьнед Кʹьтеба Пироз һәртʹьм тенә сери, һаԛас хԝәстьна ԝан ԝе дьһа зедә бьбә, ԝәки бь дьл у щан Йаһоԝарʹа хьзмәт бькьн. w21.11 16 ¶9-10

Гава Иса Мәсиһ дардакьри бу, әԝи бона дийа хԝә хәм дькьр, чьмки ча те кʹьфше әԝ һьнге ида жьнәби бу. Иса бона Мәрйәме дийа хԝә хәм дькьр у ԝе һʹьз дькьр, ләма жи әԝи ле тʹәсмили Йуһʹәнна кьр, чьмки әԝи заньбу кӧ Йуһʹәнна ԝе бона һʹәԝщед ԝейә рʹӧһʹани хәм бькә. Һьнгеда, Йуһʹәнна Мәрйәмерʹа бу кӧрʹ, у әԝи ча дийа хԝә ԝе һʹәсаб дькьр. Бәле, Иса Мәсиһ гәләк ԛимәт дькьр ве кʹӧлфәта кӧ әԝ дьне хьстьбу, дәма мьрьна ԝи кʹеләка ԝи бу, у жерʹа һʹьзкьрьнәкә мәзьн нишан кьр! Әм дькарьн жь готьнед Иса чь һин бьн? Әм һьлбәт мәрьвед хԝә һʹьз дькьн у хԝә незики ԝан тʹәхмин дькьн. Ле әм дькарьн хԝә дьһа зедә незики хушк-бьред хԝәйә рʹӧһʹани тʹәхмин бькьн. Мәрьвед мә дькарьн мьԛабьли мә дәрен, йан һәла һе тʹәрка мә жи бьдьн, ле чаԝа кӧ Иса соз дабу, һәгәр әм незики Йаһоԝа у тʹәшкиләта ԝи бьминьн, әме жь тьштед кӧ мә ӧнда кьрьнә «сәд ԛати» зедәтьр бьстиньн. Гәләк хушк у бьра ԝе мәрʹа бьбьн ча ԛиз, кӧрʹ, де у бав (Марԛос 10:29, 30). Гәло әԝ баԝәри у йәктийа хушк-бьра, йед кӧ һьм Йаһоԝа һьм жи һәвдӧ һʹьз дькьн, дьле тә гәрм накә? (Колоси 3:14; 1 Пәтрус 2:17). w21.04 9-11 ¶7-8

Кәсед кӧ һʹьзкьрьна амьн нишан дькьн һазьр ьн зәʹмәте бькʹьшиньн. Гәләк Шәʹдед Йаһоԝа хушк-бьред хԝәрʹа һʹьзкьрьна амьн нишан дькьн, һәла һе ԝанрʹа жи кʹижана нас накьн. Мәсәлә, гава әԝана дьбьһен кӧ щики тʹәшԛәла тʹәбийәте ԛәԝьмийә, әԝана һазьр ьн бенә һәԝара ԝан. Гава хушк йан бьрак дькʹәвә тәнгасийе, әԝана һазьр ьн али ԝи бькьн. Ԛьрʹна йәкеда, щьватед Мәкәдони һазьр бун бона хушк у бьра щәфа бькʹьшиньн. Иро жи, гәләк хьзмәткʹаред Хԝәде ӧса дькьн. Һьнә жь ԝан «жь ԛәԝата хԝә зедәтьр» ԛӧрбана дькьн, ԝәки али хушк-бьра бькьн (2 Корьнтʹи 8:3). Рʹуспийед щьвате жи пʹайе хушк у бьред дьлован дьдьн. Бь сайа ван пʹайа, хушк у бьра ԝе ԛәԝат у дьлбинийе бьстиньн (Ишайа 32:1, 2). w21.11 11 ¶14; 12 ¶21

Әм гьшк жи һʹәԝще ширәта нә. Щара дьбәкә әм хԝәха ширәте жь мәрьвәки ӧса дьхԝазьн, ԛәдре кʹижани кӧ әм дьгьрьн. Щара жи дьбәкә кәсәк, кӧ бона мә хәм дькә, бе у мәрʹа бежә кӧ әм гавәкә нәрʹаст давежьн (Галати 6:1). Ӧса жи, дьԛәԝьмә паши шашикә мәйә гьран, кәсәк ширәте бьдә мә у мә рʹаст кә. Ширәт чь щурʹә жи бе дайине, ԝе баш бә ԝәки әм гӧһ бьдьне. Әв йәк бона кʹара мә йә у дькарә жийина мә хԝәй кә (Мәтʹәлок 6:23). Рʹеза рʹоже дьбежә, кӧ гәрәке әм ‹готьнед сәрԝахта бьбьһен›. Гәрәке әм ԛәбул кьн, ԝәки әм һәр тьшти ньзаньн, у занәбун йан фәрәсәтед кәсәки дьн дькарә жь йа мә зедәтьр бә (Мәтʹәлок 12:15). Ләма жи, гәрәке әм мьлук бьн у гӧһ бьдьн ширәта. Бь ви щурʹәйи әм нишан дькьн, ԝәки әм синоред хԝә заньн у һʹәԝще аликʹарийе нә. Бь рʹасти, бе аликʹарийе әме нькарьбьн бьгьһижьн нетед хԝә. Сьлеман Пʹадша ньвиси кӧ «бь сайа гәләк ширәткʹара» мәрьв пешда дьчьн (Мәтʹәлок 15:22). w22.02 8 ¶1-2

Тʹобәкьрьна рʹаст нә тʹәне әв ә гава мәрьв бона гӧне хԝә пʹошман дьбә. Хенщи ве йәке, лазьм ә ԝәки әԝ дьле хԝә у һʹьш-аԛьле хԝә бьгӧһезә. Бона ве йәке, гәрәке әԝ рʹийа хьраб бьһелә у вәгәрʹә бал Йаһоԝа (Һәзәԛел 33:14-16). Нета ԝийә сәрәкә гәрәке әԝ бә, ԝәки әԝ тʹәзәда бьбә досте Йаһоԝа. Соз мәсәлә, тә бьһист ԝәки достәки тә гӧнәки гьран кьрийә. Тӧ гәрәке чь бьки? Һәгәр тӧ гӧне досте хԝә вәшери, әв йәк ԝе зьраре бьдә ԝи, чьмки Йаһоԝа һәр тьшти дьвинә, у әм нькарьн тьштәки жь ԝи вәшерьн (Мәтʹәлок 5:21, 22). Ләма жи ԝе баш бә досте хԝәрʹа бежи, ԝәки әԝ жь рʹуспийа аликʹарийе бьхԝазә. Ле һәгәр әԝ дәрһәԛа гӧне хԝә рʹуспийарʹа нәбежә, гәрәке тӧ хԝәха рʹуспийарʹа бежи кӧ чь ԛәԝьмийә. Бь ве йәке тӧйе нишан ки ԝәки дьхԝази али ԝи бьки. w21.10 7 ¶19-21

Әм гьшк дькарьн чʹәʹв бьдьнә Иса у бькʹәвьнә һʹәйра мәрьва. Кʹьтеба Пироз дьбежә кӧ Иса «кʹәтә бьнйатʹа хӧламәки» (Филипи 2:7). Хӧламе баш мәщала дьгәрʹийа, ԝәки ахайе хԝә рʹази кә. Әм хӧламед Йаһоԝа у кʹомәкдаред хушк-бьра нә, ләма әм бешьк дьхԝазьн дьле Йаһоԝа у дьле хушк-бьра һе зедә ша кьн у кери ԝан бен. Жь хԝә бьпьрсә: «Гәло әз һазьр ьм кӧ бона мәрьвед дьн ԝәʹдә у ԛәԝата хԝә хәрщ кьм? Чахе лазьм ә, ԝәки Ода щьвате йан жи щийе щьвата мәзьн бе тʹәмьзкьрьне йан тʹәзәкьрьне, гәло әз һазьр ьм ван шьхӧлада аликʹарийе бьдьм?» Һәгәр әм тедәрхьн кӧ гәрәке әм хԝә һьнә алийава бьгӧһәрʹиньн, ле хԝәстьна мә һьндьк ә, гәрәке әм жь дьл дӧа бькьн у дәрһәԛа проблема хԝә Йаһоԝарʹа бежьн. Йаһоԝа дькарә хԝәстьн у ԛәԝата мә зедә кә, ԝәки әм бьхԝазьн ве йәке бькьн (Филипи 2:13). w22.02 22-23 ¶9-11

Иса йәки һʹәйф у ԛәнщ бу. Гава зор бу жи, әԝ һьндава мәрьвада нәрм бу у дькʹәтә һʹале ԝан (Мәтта 11:29, 30). Мәсәлә, чахе жьнькәкә Кәнани жь ԝи хԝәст, ԝәки әԝ ԛиза ԝе ԛәнщ кә, әԝи серида хԝәстьна ԝе инкʹар кьр, ле гава әԝи дит кӧ баԝәрийа ԝе чьԛас ԛәԝи йә, әԝи ԛиза ԝе ԛәнщ кьр (Мәтта 15:22-28). Иса чьԛас йәки дьлшәԝат бу жи, гава лазьм дьбу кӧ кәсәкирʹа ширәт бьда, әԝи хԝә паш нәдьхьст. Мәсәлә, чахе Пәтрусе шанди дьхԝәст Иса һелан кьра, кӧ әԝ хԝәстьна Йаһоԝа нәйнә сери, Иса әԝ ль бәр шагьртед дьн рʹаст кьр (Марԛос 8:32, 33). Иса һәмьки нәдьхԝәст Пәтрус бәр гьшка бьдә шәрме у ньмьз кә, ле әԝи дьхԝәст Пәтрус һин кә у дәрсе бьдә шагьртед дьн, ԝәки әԝана гәләк хԝәда баԝәр нибьн. Пәтрус бешьк шәрм кьр, ле чь жи һәбу әв ширәт гәләк кери ԝи һат. Щарна лазьм ә ԝәки тӧ рʹастә-рʹаст ширәте бьди кәсед кӧ тӧ ԝана һʹьз дьки. Мина Иса, һәртʹьм ль гора принсипед Кʹьтеба Пироз, бь нәрми ширәте бьдә ԝан. w22.03 11 ¶12-13

Пәсьндайина Йаһоԝа пʹарәкә һʹәбандьна мә йә (Зәбур 34:1). Гәләк мәʹни һәнә кӧ әм бь рʹазибуне бәʹса һʹӧнӧр у кʹаред Йаһоԝа бькьн у бь ви щурʹәйи пәсне ԝи бьдьн. Һәгәр әм дәрһәԛа ԛәнщийа Йаһоԝа, демәк дәрһәԛа һʹәму тьштед кӧ әԝи бона мә кьрийә, кʹур бьфькьрьн, әме һәр гав бьхԝазьн пәсне ԝи бьдьн. Шьхӧле бәлакьрьна мьзгине мәщаләкә баш дьдә мә, ԝәки әм «ԛӧрбана пәсьндайине бьдьнә Хԝәде, аԝа готи бәре зарʹ-зьмане хԝә». Әм гәрәке рʹьнд бьфькьрьн кӧ әме дӧайед хԝәда чь бежьн, ӧса жи әм гәрәке рʹьнд бьфькьрьн кӧ әме хьзмәтеда мәрьварʹа чь бежьн. Әм дьхԝазьн кӧ «ԛӧрбана пәсьндайине», йа кӧ әм пʹешкʹеши Йаһоԝа дькьн, йа һәри баш бә. Ләма жи әм бь дьл у щан мәрьварʹа рʹастийе гьли дькьн. w22.03 21 ¶8