Чьлә

Иса пешийе дайика хәмгин «дит» у паше «гӧне ԝи ле һат» (Луԛа 7:13). Ле Иса нә тʹәне гӧне хԝә ле ани, ле бь дәнгәки дьлшәԝат жерʹа гот: «Нәгьри!» Паше, Иса кʹәрәмәтәк кьр, әԝи гәдә жь мьрьне рʹакьр у «әԝ да дийа ԝи» (Луԛа 7:14, 15). Әм дькарьн жь ве кʹәрәмәта Иса чь һин бьн? Әм педьһʹәсьн ԝәки әм чаԝа дькарьн һьндава кәсед кӧ шине дькьн, дьлшәԝат бьн. Һәмьки, әм нькарьн мина Иса ԝана жь мьрьне рʹакьн. Ле мина Иса, әм жи дькарьн бәр дьле ԝанда бен. Әм дькарьн бь готьн у кьред хԝә аликʹари у дьлбинийе бьдьнә ԝан (Мәтʹәлок 17:17; 2 Корьнтʹи 1:3, 4; 1 Пәтрус 3:8). Һәла һе бь чәнд готьн у кьред бьчʹук жи, әм дькарьн бәр дьле кәсед дьнда бен. w23.04 5-6 ¶13-15

Рʹаст ә Иса бьһист кӧ досте ԝи Лазар мьрийә, ле әԝ диса жи дӧ рʹожа ԝедәре ма. Паше әԝ чу Бәйтанйайе. Чахе Иса гьһиштә ԝедәре, ида чар рʹож бу, кӧ Лазар мьрьбу. Иса дьхԝәст бона достед хԝә кʹәрәмәтәкә мәзьн бькә у бь ви щурʹәйи рʹумәте бьдә Хԝәде (Йуһʹәнна 11:6, 11, 17). Әм дькарьн жь ве сәрһатийе дәрһәԛа достийе чь һин бьн? Һәла бьфькьрә: Гава Мәрйәм у Мәртʹайе дәрһәԛа нәхԝәшийа Лазар, Исарʹа әʹламәти шандьн, ԝана ԝирʹа нәгот кӧ бьра әԝ бе Бәйтанйайе. Ԝана тʹәне жерʹа гот кӧ досте ԝи нәхԝәш ә (Йуһʹәнна 11:3). Гава Лазар мьр, Иса дькарьбу дурва жи әԝ жь мьрьне рʹакьра. Ле Иса сафи кьр, ԝәки һәрʹә Бәйтанйайе, сәва кӧ кʹеләка Мәрйәме у Мәртʹайе бә. Гәло достәки тәйи ӧса һәйә, кӧ һазьр ә бе готьна тә жи кʹеләка тә бә у али тә бькә? Һәвале рʹаст «рʹожа охьрме гьран» һазьр ә аликʹарийе бьдә мә (Мәтʹәлок 17:17). Мина Иса, әм жи дькарьн бона кәсед дьн бьбьн һәвалед ԛәнщ! w23.04 10 ¶10-11

Ԝәʹде тәнгасикә гьран, дьԛәԝьмә әм бьфькьрьн кӧ дьнйа тʹәзә ԝе ԛә нәйе. Ле гәло әв йәк те һʹәсабе кӧ баԝәрийа мә сьст ә? Һәмьки на! Ԝәрә әм дина хԝә бьдьнә ве мәсәле. Ԝәʹде зьвьстанәкә гәләк сар, дьбәкә әм бьфькьрьн кӧ һавин ԝе ԛә нәйе. Ле диса жи һавин те. Һәма мина ве йәке, гава әм жь бо тәнгасийа гәләк дьлтәнг дьбьн, дьбәкә әм бьфькьрьн кӧ дьнйа тʹәзә ԝе ԛә нәйе. Ле һәрге баԝәрийа мә ԛәԝи йә, әм заньн ԝәки һʹәму созед Хԝәде ԝе әʹсәйи бенә сери (Зәбур 94:3, 14, 15; Ибрани 6:17-19). Баԝәрийа ԛәԝи али мә дькә, кӧ әм жийина хԝәда шьхӧлед рʹӧһʹани дайньн сәр щийе пешьн. Бона бәлакьрьна мьзгинийе жи мәрʹа баԝәрийа ԛәԝи лазьм ә. Гәләк мәрьв дьбежьн, ԝәки мьзгинийа дәрһәԛа дьнйа тʹәзә ӧса хԝәш ә, кӧ әԝана нькарьн ве йәке баԝәр кьн (Мәтта 24:14; Һәзәԛел 33:32). Әм гәрәке мьԛати хԝә бьн, ԝәки мина ван мәрьва, һьндава созе Йаһоԝа шьк нәкʹәвә дьле мә. Сәва кӧ әв йәк тʹӧ щар нәйе сәре мә, әм гәрәке бәрдәԝам кьн баԝәрийа хԝә ԛәԝи кьн. w23.04 27 ¶6-7; 28 ¶14

Тӧ ԛә бәр хԝә кʹәти һәла Йаһоԝа щаба дӧайед тә дьдә йан на? Һәрге әре, тӧ тʹәне нини, чьмки гәләк хушк-бьра бона ве йәке бәр хԝә дькʹәвьн, илаһи гава дькʹәвьнә тәнгасийа. Чахе әм кӧл-дәрда дькʹьшиньн, мәрʹа чәтьн ә бьвиньн, кӧ Йаһоԝа бь рʹасти гӧһ дьдә дӧайед мә, йан на. Әм чьрʹа дькарьн баԝәр бьн, ԝәки Йаһоԝа гӧһ дьдә дӧайед хьзмәткʹаред хԝә? Кʹьтеба Пироз дьбежә, кӧ Йаһоԝа жь дьл мә һʹьз дькә у әм бәр чʹәʹве ԝи гәләк ԛимәт ьн (Һагай 2:7; 1 Йуһʹәнна 4:10). Ләма жи, әԝ дьле мә ԛәԝи дькә, кӧ әм бь сайа дӧа аликʹарийе жь ԝи бьхԝазьн (1 Пәтрус 5:6, 7). Әԝ дьхԝазә, кӧ әм незики ԝи бьн у һьмбәри чәтьнайа сәркʹәвьн. Кʹьтеба Пирозда те готьне, ԝәки Йаһоԝа гәләк щар щаба дӧайед хьзмәткʹаред хԝә дабу. Һун дькарьн мәсәләкә ӧса биньн бира хԝә? w23.05 8 ¶1-4

Достийа Мәрйәме тʹәви Йаһоԝа ԛәԝи бу. Баԝәрийа ԝе кьред Усьвва гьредайи нибу, әԝе хԝәха баԝәрийа хԝә ԛәԝи дькьр. Мәрйәме Ньвисаред Пироз рʹьнд заньбун. Ӧса жи әԝ сәр ван тьшта кʹур дьфькьри, чь кӧ педьһʹәсийа (Луԛа 2:19, 51). Бешьк, Мәрйәм рʹӧһʹанида ԛәԝи бу, ләма жи әԝ кʹӧлфәтәкә гәләк баш бу. Иро гәләк хушк хирәт дькьн кӧ чʹәʹв бьдьнә ԝе. Мәсәлә, дина хԝә бьдьне кӧ хушка мә Емико чь дьбежә: «Гава әз азәп бум, мьн хԝәха баԝәрийа хԝә ԛәԝи дькьр. Ле паши зәԝаще, мере мьн дӧа дькьр у ԛӧльхкьрьна тʹәви малбәте дәрбаз дькьр. Ләма жи баԝәрийа мьн ида кьред ԝива гьредайи бу. Ле мьн фәʹм кьр кӧ әз гәрәке хԝәха достийа хԝә тʹәви Йаһоԝа ԛәԝи кьм. Ньһа әз ԝәʹдә башԛә дькьм ԝәки дӧа бькьм, Ньвисаред Пироз бьхуньм у сәр бьфькьрьм» (Галати 6:5). Хушкно, гава һун хирәт дькьн ԝәки достийа хԝә тʹәви Йаһоԝа дьһа ԛәԝи кьн, һун һе зедә мәщала дьдьнә мере хԝә, кӧ әԝ ԝә һʹьз бькә у пʹайе ԝә бьдә (Мәтʹәлок 31:30). w23.05 22 ¶6

Тьрса бәр Хԝәде жь буйине мәрʹа нәһатийә дайине. Ләма жи лазьм ә кӧ әм тьрса Хԝәде дьле хԝәда пешда биньн. Мәщаләк кӧ ча әм дькарьн тьрса бәр Хԝәде пешда биньн әв ә, кӧ дина хԝә бьдьнә тʹәбийәте у сәр ԝе кʹур бьфькьрьн. Чьԛас әм билани, ԛәԝат у һʹьзкьрьна Хԝәде әʹфринада бьвиньн, һаԛас һе зедә әме ԛәдьре ԝи бьгьрьн у ԝи һʹьз бькьн (Рʹомайи 1:20). Мәщаләкә дьн кӧ ча тьрса бәр Хԝәде пешда биньн әв ә, кӧ һәр рʹож дӧа бькьн. Әм чьԛас зедә дӧа бькьн, һаԛас әме дьһа баш Йаһоԝа нас бькьн. Һәр щар гава әм рʹасти чәтьнайа тен у жь Ԝи рʹәща дькьн ԝәки сәбьр у ԛәԝате бьдә мә, әв йәк тинә бира мә кӧ Әԝ чьԛас ԛәԝат ә. Гава әм бона ԛӧрбана Иса Йаһоԝарʹа рʹазибуна хԝә дьдьнә кʹьфше у чахе әм лавайа ԝи дькьн, кӧ әԝ чәтьнайед мәда али мә бькә, әм һʹьзкьрьн у биланийа ԝи дьвиньн. Дӧайед ӧса али мә дькьн, кӧ әм дьһа зедә ԛәдьре Йаһоԝа бьгьрьн у жь һәр тьште кӧ дькарә достийа мә тʹәви ԝи хьраб кә, хԝә дур бьгьрьн. w23.06 15 ¶6-7

Ԛанундаре Һәри Мәзьн, Йаһоԝа, тʹьме ԛанунед зәлал дьда хьзмәткʹаред хԝә. Мәсәлә, ԛьрʹна йәкеда кʹома рʹебәрийе готьбу, кӧ хьзмәткʹаред Хԝәде гәрәке кʹижан се дәрәщада ԛәԝи бьминьн: (1) әԝана пʹута инкʹар дькьн у тʹәне Йаһоԝа дьһʹәбиньн, (2) әԝана гӧһ дьдьн ԛануна Йаһоԝа һьндава пирозийа хуне, (3) әԝана дьжин ль гора ԛануна Кʹьтеба Пирозә дәрһәԛа нав-намусийе (Кʹаред Шандийа 15:28, 29). Ле иро гәло әм чаԝа дькарьн ԝан се тьштада Йаһоԝарʹа амьн бьн? Әм гәрәке тʹәне Йаһоԝа бьһʹәбиньн у гӧрʹа ԝи бькьн. Хԝәде фәрман дабу Исраелийа кӧ әԝана бь тʹәмами жерʹа амьн бьн (Ԛануна Дӧщари 5:6-10). Ԝәрә әм дина хԝә бьдьнә мәсәла Иса Мәсиһ. Гава әԝ жь Мире-щьна һатә щерʹьбандьне, әԝи бь зәлали гот, кӧ әм гәрәке тʹәне сәре хԝә бәр Йаһоԝа дайньн (Мәтта 4:8-10). Ләма жи әм сәре хԝә нә бәр пʹута нә жи бәр мәрьва датиньн. Мәсәлә, әм нә рʹебәред религи, нә сәрԝеред политики у нә жи кәсед бь нав у дәнг ча хӧдана һʹәсаб накьн. Әм тʹәне Йаһоԝарʹа хьзмәт дькьн, чьмки әԝи «һәр тьшт әʹфьрандьн» (Әʹйанти 4:11). w23.07 14-15 ¶3-4

Дьнйа Мире-щьна бь бенамусийе у порнографийайе тʹьжә буйә (Әфәси 4:19). Ләма жи гәләк фәрз ә кӧ әм тьрса бәр Хԝәде дьле хԝәда пешда биньн у жь тьштед хьраб бьрʹәвьн. Кʹьтеба Мәтʹәлок сәре 9-да, әм дәрһәԛа дӧ жьнед симболик дьхуньн, йәк сәрԝахт ә йәк жи ахмах ә. Һәр дӧ жьн жи кәсед «беһʹьш» тʹәглифи мала хԝә дькьн у дькьнә гази: «Ԝәрьн бьхԝьн нане мьн» (Мәтʹәлок 9:1, 4-6). Ле ахьрийа бьжартьна ԝан гәләк жь һәв щӧдә дьбә. Ԝәрә әм дина хԝә бьдьнә тʹәглифкьрьна ‹жьна ахмах› (Мәтʹәлок 9:13-18). Әԝ бь мерхаси дькә гази: «Кʹи беһʹьш ә, бьра бе вьра!» Паше чь ԛәԝьми? «Әԝе гӧһ дьдә ԝе ньзанә кӧ ль ԝьр мьри нә». Сәре 2-да жи мәсәла жьнәке һәйә. Ԝедәре тʹәми мәрʹа те дайине, кӧ әм жь «кʹӧлфәта хәриб» у «кʹӧлфәта нәрʹедайә» хԝә дур бьгьрьн. Дәрһәԛа ԝе ӧса те готьне: «Мала ԝе бәрбь мьрьне дьбә» (Мәтʹәлок 2:11-19). Ӧса жи, Мәтʹәлок 5:3-10 дәрһәԛа «жьна зьнекʹар» те готьне кӧ «ньгед ԝе бәрбь мьрьне дьбьн». w23.06 21-22 ¶6-7

Рʹуспи гәрәке сәрԝахти у бәрбьһерийеда кәсед дьнрʹа бьбьнә мәсәлә (1 Тимотʹейо 3:2, 3). Мәсәлә, әԝ гәрәке нәфькьрә кӧ һәрге әԝ әʹмьрда жь рʹуспийед дьн мәстьр ә, ньһерʹандьна ԝи гәрәке тʹьме ԛәбул кьн. Әԝ занә кӧ рʹӧһʹе пироз дькарә сәр һәр рʹуспи һʹӧкӧм кә кӧ әԝ тьштәки бежә, ԝәки сафикьрьнәкә баш бе кьрьне. У һәрге һʹәчʹи зәʹф рʹуспи сафикьрьнәке бькьн, йа кӧ мьԛабьли принсипед Кʹьтеба Пироз нинә, рʹуспики сәрԝахт у бәрбьһер ԝе бь шабуне тʹәви сафикьрьна ԝан рʹази бә, һәла һе һьнге жи, гава әԝ йәк жь ньһерʹандьна ԝи щӧдә дьбә. Һәрге әм мәрьвнә бәрбьһер бьн, әв йәк ԝе кʹаре мәрʹа бинә. Әме жь һәвалтийа тʹәви хушк-бьра шабуне бьстиньн, у щьватеда әʹдьлайи ԝе бе хԝәйкьрьне. Әме мина малбәтәкә мәзьн бьн, кʹижан кӧ жь гәләк мьләт, култур у хәйсәт-һʹӧнӧра нә, у әме бь шабуне Йаһоԝарʹа хьзмәт кьн. Хенщи ве йәке, әм ша нә кӧ мәщала мә һәйә чʹәʹв бьдьнә Хԝәдайе хԝә Йаһоԝа, йе кӧ һәр тьштида сәрԝахт у бәрбьһер ә. w23.07 25 ¶16-17

Данийел пʹехәмбәртийед Хԝәде бь нета рʹаст лекʹолин дькьр, чьмки әԝи дьхԝәст рʹастийе бьзаньбә. Ӧса жи, Данийел йәки мьлук бу. Әԝи заньбу кӧ гава әԝ Йаһоԝарʹа амьн бьминә, Йаһоԝа ԝе али ԝи бькә, ԝәки әԝ пʹехәмбәртийед Ԝи фәʹм бькә (Данийел 2:27, 28). Данийел хԝә дьспартә аликʹарийа Йаһоԝа у ӧса избат дькьр, кӧ әԝ йәки мьлук ә (Данийел 2:18). Әԝи бь хирәт лекʹолина дькьр. Әԝи ӧса жи Ньвисаред Пироз, йед кӧ щәм ԝи һәбун, кʹур лекʹолин дькьр (Йерәмйа 25:11, 12; Данийел 9:2). Гәло тӧ ча дькари чʹәʹв бьди Данийел пʹехәмбәр? Бь нета рʹаст лекʹолина бькә. Гәло нета лекʹолина тә әԝ ә, кӧ тӧ рʹастийе фәʹм бьки? Һәрге әре, Йаһоԝа ԝе али тә бькә (Йуһʹәнна 4:23, 24; 14:16, 17). Ле һьнә кәс пʹехәмбәртийед Хԝәде бь нетәкә дьн лекʹолин дькьн. Әԝана дьхԝазьн избат кьн, ԝәки Кʹьтеба Пироз жь бина бәр Хԝәде нинә. Әԝана дьфькьрьн, кӧ һәрге Кʹьтеба Пироз нә жь Хԝәде йә, әԝана хԝәха дькарьн сафи кьн чь рʹаст ә у чь на. Ле әм гәрәке бь нета рʹаст лекʹолина бькьн. w23.08 9 ¶7-8

Һәрге әм хԝә бәрамбәри кәсед дьн бькьн, баре мә ԝе дьһа гьран бә (Галати 6:4). Әв йәк дькарә һʹьш у дьле мәда чʹәʹвнәбари у һерсе пешда бинә (Галати 5:26). Һәрге әм чʹәʹв дьдьнә мәрьва у дьхԝазьн ԝан тьшта бькьн чь кӧ әԝана дькьн, ле әв йәк жь ԛәԝата мә дәр ә, ви чахи әм дькарьн зийане бьстиньн. Кʹьтеба Пироз дьбежә: «Гӧмана кӧ дәрәнги дьбә, дьл дешинә». Дә бьдьнә һʹәсабе хԝә, ԝәки нетед нәреали дькарьн гәләк дьле мә бешиньн (Мәтʹәлок 13:12). Тьштед ӧса дькарьн мә бьԝәстиньн у бьбьн мәʹни, кӧ әм рʹәва жийинеда һеди-һеди сьст бьн. Йаһоԝа тьштәки жь ԛәԝата мә дәр жь мә дәʹԝа накә. Гәрәке әм жи ԝан тьшта нәхԝазьн, чь кӧ жь ԛәԝата мә дәр ә (2 Корьнтʹи 8:12). Йаһоԝа тʹӧ щар мә бәрамбәри кәсед дьн накә (Мәтта 25:20-23). Хьзмәтийа тә, амьнийа тә у сәбьра тә, бәр чʹәʹве ԝи гәләк ԛимәт ә. w23.08 29 ¶10-11

Йаһоԝа дәнге Шьмшон бьһист у бь кʹәрәмәти ӧса кьр, кӧ каникә аве кʹьшийа. Гава Шьмшон ав вәхԝар, «рʹӧһʹе ԝи зьвьри у вәжийа», демәк әԝи диса ԛәԝат станд (Һʹакьмти 15:19). Ча те кʹьфше, бь сала шунда, гава Самуйел пʹехәмбәр кʹьтеба Һʹакьмти ньвиси, әв кани һе һәбу. Чахе Исраелийа дьдит, кӧ әв кани дькʹьшә, дьԛәԝьмә дьһатә бира ԝан, кӧ һәрге әԝана хԝә бьсперьн Йаһоԝа, Әԝе ԝәʹдәда һʹәԝщед хьзмәткʹаред хԝәйә амьн рʹази кә. Фьрԛи тʹӧнә әм дәстпʹешә нә, йан жи әм хьзмәтийеда чьԛас пешдачуйи нә, диса жи әм гәрәке аликʹарийе жь Йаһоԝа бьхԝазьн. Әм гәрәке бь мьлукти ԛәбул кьн, кӧ тʹәне бь аликʹарийа Йаһоԝа әм дькарьн бь рʹасти сәркʹәвьн. Гава Шьмшон ава канийе вәхԝар, йа кӧ Йаһоԝа да ԝи, әԝи диса ԛәԝат станд. Мина Шьмшон, гава әм аликʹарийа кӧ Йаһоԝа дьдә мә, ԛәбул дькьн, баԝәрийа мә дьһа ԛәԝи дьбә (Мәтта 11:28). w23.09 4 ¶8-10

Һәрге кәсәк дәрһәԛа Хԝәде йан жи Кʹьтеба Пироз тьштәки хьраб бежә, әм чь дькарьн бькьн? Әм гәрәке ԛәԝат у биланийе жь Хԝәде бьхԝазьн, ԝәки әм бькарьбьн бь нәрми щаба ԝан бьдьн. Ле һәрге мә бь сәрт щаба ԝан да, ԝи чахи әм чь дькарьн бькьн? Әм дькарьн бона ԝе дәрәще дӧа бькьн у бьфькьрьн кӧ щарәкә дьн, әм чаԝа дькарьн дьһа баш щаба ԝан бьдьн. Паше, Йаһоԝа ԝе бь сайа рʹӧһʹе пироз ԛәԝате бьдә мә, кӧ әм хԝә контрол кьн у мьлук бьминьн. Һьнә рʹезед Кʹьтеба Пироз дькарьн али мә бькьн, кӧ әм дәрәщед чәтьнда зьмане хԝә бькарьбьн. Рʹӧһʹе пироз дькарә али мә бькә, ԝәки әм ван рʹеза биньн бира хԝә (Йуһʹәнна 14:26). Мәсәлә, принсипед кʹьтеба Мәтʹәлокда дькарьн али мә бькьн кӧ әм нәрм бьн (Мәтʹәлок 15:18). Ӧса жи, рʹезед ве кʹьтебе әшкәрә дькьн, кӧ кʹара зьмане нәрм у ширьн чьԛас мәзьн ә (Мәтʹәлок 10:19; 17:27; 21:23; 25:15). w23.09 15 ¶6-7

Пәтрусе шанди гәләк сал бь амьни Йаһоԝарʹа хьзмәт дькьр. Әԝ тʹәви Иса дьчу хьзмәтийе, дәштед тʹәзәда мьзгини бәла дькьр у ча әндәме кʹома рʹебәрийе хьзмәт дькьр. Пешийа мьрьна Пәтрус, Йаһоԝа һе зедә шьхӧл да ԝи. Ԝәкә сала 62-64 Д.М.-да, әԝи жь бина бәр Хԝәде дӧ нәʹмә ньвисин, демәк йәке Пәтрус у дӧдӧйе Пәтрус (2 Пәтрус 1:13-15). Пәтрус һьнге нәʹмед хԝә ньвисин, чахе хушк-бьра жь бо «щурʹә-щурʹә щерʹьбандьна» хәмгин дьбун (1 Пәтрус 1:6). Пʹехәмбәред дәрәԝин дьхԝәстьн һинкьрьнед ԛәлп у бенамусийе бькьнә щьвате (2 Пәтрус 2:1, 2, 14). Һьнә ԝәʹдә шунда, Мәсиһийед кӧ Оршәлимеда дьжитьн «ахьрийа һәр тьшти» дитьн, демәк чахе бажаре Оршәлиме у система Щьһуйа жь алийе әскәред Рʹомайи һатьнә ԝеранкьрьне (1 Пәтрус 4:7). Бе шьк, нәʹмед Пәтрус али хушк-бьра дькьрьн, ԝәки хԝә бона тәнгасийа һазьр кьн у Йаһоԝарʹа амьн бьминьн. w23.09 26 ¶1-2

Мина Иса, әм жи гәләк щар дәрәщед чәтьнда һини гӧһдарийе дьбьн. Мәсәлә, дәстпека пандәмийа коронавируседа, гава щьватед мә Одед Щьватада у хьзмәтийа мал бь мал һатьнә сәкьнандьне, гәло тәрʹа чәтьн бу ве сафикьрьне ԛәбул ки? Бәле, әв йәк кӧ тә гӧһ да ве рʹебәрийе, тә чаԝа хԝә, ӧса жи кәсед дьн пʹараст, пьштгьрийа йәктийа щьвате кьр у дьле Йаһоԝа ша кьр. Бәле, ньһа ида һәр кәс жь мә һе баш һазьр ә гӧһ бьдә һʹәму рʹебәрийа, кʹижана кӧ әме ԝәʹде тәнгасийа мәзьн бьстиньн. Һәрге әм гӧһ бьдьнә ԝан рʹебәрийа, әме хьлаз бьн! (Ибо 36:11) Әм гӧһ дьдьнә Йаһоԝа, чьмки әм Ԝи һʹәз дькьн у дьхԝазьн ԝәки Әԝ жь мә рʹази бә (1 Йуһʹәнна 5:3). Йаһоԝа бона мә һʹәмуйа, гәләк тьштед ԛәнщ кьрийә у әме тʹӧ щар нькарьбьн бьн ԛәнщийа Ԝи дәрен (Зәбур 116:12). Ле әм дькарьн гӧһ бьдьнә Ԝи у кәсед хԝәйиһʹӧкӧм. Һәрге әм ӧса бькьн, әме биланийе бьдьнә кʹьфше. У әԝ мәрьве кӧ биланийе дьдә кʹьфше, дьле Йаһоԝа ша дькә (Мәтʹәлок 27:11). w23.10 11 ¶18-19

Һәрге мәләкәк тәрʹа хәбәр да, тәйе гӧһ бьда ԝи? Иро, мәләкәк дьбежә «һʹәму мьләта, бәрәка, зьмана у щьмәʹта . . . ‹Жь Хԝәде бьтьрсьн у шькьрийе бьдьнә ԝи, . . . Сәре хԝә бәр ԝи дайньн, йе кӧ әʹрд у әʹзман, . . . әʹфьрандьнә›» (Әʹйанти 14:6, 7). Йаһоԝа Хԝәдайе рʹаст ә, у тʹәне әԝ һежайи һʹәбандьне йә. Әԝи мәщал дайә кӧ әм пʹарьстгәһа рʹӧһʹанида ԝирʹа хьзмәт бькьн. Әв йәк бона мә ԛәдьрәки гәләк мәзьн ә! Гәло пʹарьстгәһа рʹӧһʹани чь йә у әм жь кʹидәре дькарьн һур бь һур дәрһәԛа ве йәке пебьһʹәсьн? Пʹарьстгәһа рʹӧһʹани авайикә реали нинә. Ле әԝ һәйә сазкьрьнәкә ӧса, бь сайа кʹижани кӧ Йаһоԝа һʹәбандьна хьзмәткʹаред хԝә, сәр һʹиме ԛӧрбана Иса Мәсиһ ԛәбул дькә. Ԛьрʹна йәкеда, Паԝлосе шанди хьзмәткʹаред Хԝәде йед Ибранирʹа нәʹмә ньвиси у дәрһәԛа пʹарьстгәһа рʹӧһʹани зәлал кьр. w23.10 24 ¶1-2

Сала 522 Б.Д., дьжмьнед Щьһуйа авакьрьна пʹарьстгәһа Йаһоԝа ԛәдәхә кьрьн. Ле Зәкәрйа щьмәʹтерʹа гот, ԝәки Йаһоԝа ԝе бь сайа рʹӧһʹе пироз һʹәму чәтьнайа бьдә һьлдане. Сала 520 Б.Д., Дарйус Пʹадша ԛәдәха шьхӧле авакьрьна пʹарьстгәһе да һьлдане у бона авакьрьна пʹарьстгәһе пʹәрә у аликʹари да ԝан (Әзра 6:1, 6-10). Йаһоԝа соз да хьзмәткʹаред хԝә, кӧ һәрге әԝана бәри пешьн дина хԝә бьдьнә авакьрьна пʹарьстгәһе, Әԝе али ԝан бькә (Һагай 1:8, 13, 14; Зәкәрйа 1:3, 16). Әв гьлийед пʹехәмбәра ԛәԝат дьда хьзмәткʹаред Хԝәде. Ԝана сала 520-да Б.Д.М., авакьрьна пʹарьстгәһе бәрдәԝам кьрьн, у әв шьхӧл пенщ сала кемтьр кʹьшанд. Жь бо ве йәке кӧ ԝана ԝәʹде чәтьнда хԝәстьна Хԝәде жийина хԝәда датанин сәр щийе пешьн, Йаһоԝа али ԝан дькьр. Ләма жи, ԝана бь шабуне Йаһоԝарʹа хьзмәт дькьр (Әзра 6:14-16, 22). w23.11 15 ¶6-7

Гәләк мәрьв дәрһәԛа наве Бьраһим пʹехәмбәр бьһистьнә, ле диса жи һʹәчʹи зәʹф жь ԝана дәрһәԛа ԝи һьндьки заньн. Һәмьки тӧ дәрһәԛа Бьраһим гәләк тьшт зани. Мәсәлә, тӧ зани ԝәки әԝ «баве» һʹәму баԝәрмәнда те навкьрьне (Рʹомайи 4:11). Дьԛәԝьмә тӧ пьрсе дьди хԝә: «Гәло әз дькарьм пʹегәһа Бьраһимда һәрʹьм у баԝәрийа мьн дькарә мина йа ԝи ԛәԝи бә?» Бәле, тӧ дькари! Сәва кӧ баԝәрийа мә мина йа Бьраһим ԛәԝи бә, әм гәрәке сәрһатийа ԝи лекʹолин кьн. Ль гора фәрмана Хԝәде, Бьраһим чу ԝәлатәки дур, бь дәһа сала конада дьма у һазьр бу кӧрʹе хԝәйи дәлал, Исһаԛ бькә ԛӧрбан. Әв кьред Бьраһим нишан дькьн, ԝәки баԝәрийа ԝи ԛәԝи бу. Бьраһим бь баԝәри у кьред хԝә ԛәбулкьрьн у достийа Хԝәде ԛазанщ кьрьбу (Аԛуб 2:22, 23). Йаһоԝа дьхԝазә ԝәки һәр йәк жь мә ԝан кʹәрәма бьстинә. Ләма жи Хԝәде рʹебәри Паԝлос у Аԛуб кьр, ԝәки әԝана жь бина бәр ԝи дәрһәԛа Бьраһим бьньвисьн. w23.12 2 ¶1-2

Хушкно, һин бьн кӧ тʹәви мәрьва бькʹәвьнә хәбәрдане. Мәсиһи гәрәке һин бьн, кӧ баш хәбәр дьн. Аԛуб ширәтәкә баш да мә, кӧ мә жоре хԝәнд. Гава тӧ жь дьл гӧһ дьди кәсед дьн, тӧ нишан дьки ԝәки тӧ йәкә «рʹәʹм» и (1 Пәтрус 3:8). Һәрге тә һәст, йан жи гьлийед кәсәки рʹаст фәʹм нәкьрийә, бь нәрми ле бьпьрсә кӧ әԝ чь тʹәхмин дькә у дьфькьрә. Ле пешийа кӧ тʹәви мәрьв хәбәр ди, кʹур бьфькьрә (Мәтʹәлок 15:28). Жь хԝә бьпьрсә: «Тьштед кӧ әзе бежьм, гәло рʹаст ьн у ԝе кәсед дьн бьшьдиньн? Гәло хәбәрдана мьн бь нәрми у дьловани йә?» Чʹәʹв бьдә ԝан хушка, йед кӧ жь дьл гӧһ дьдьнә мәрьва у бь нәрми хәбәр дьдьн. Рʹьнд дина хԝә бьдә хәбәрдана ԝан (Мәтʹәлок 31:26). Бәле, хәбәрдана баш ԝе али ԝә бькә, кӧ һәвалед баш хԝәрʹа ԛазанщ кьн у тʹәви ԝан әʹдьлайеда бьн. w23.12 21 ¶12

Иро жи, Йаһоԝа дькарә бь сайа малбәта мә, һәвалед мә, йан жи рʹуспийед щьвате али мә бькә. Ле гава әм хәмгин дьбьн, дьԛәԝьмә әм нахԝазьн кәсәки бьвиньн. Һәстед ӧса нормал ьн. Ле гәло әм ча дькарьн жь Йаһоԝа аликʹарийе бьстиньн? Чьԛас жь дәсте мә те, ԝәрә әм хԝә жь мәрьва дур нәгьрьн. Гава кәсәк хԝә жь мәрьва дур дьгьрә, әԝ гәләк щар дәрдед хԝә тʹәне дькʹьшинә. Әв йәк дькарә сәр сафикьрьнед ԝи жи хьраб һʹӧкӧм кә. Һәмьки, әм гьшк щарна дьхԝазьн тʹәне бьминьн, илаһи чахе тьштәки хьраб дьԛәԝьмә. Ле һәрге әм бәрдәԝам дькьн хԝә дури мәрьва бьгьрьн, әм мәщале надьнә Йаһоԝа, ԝәки әԝ бь сайа кәсед дьн али мә бькә. Ләма ԝәрә әм аликʹарийа малбәта хԝә, һәвалед хԝә у рʹуспийа ԛәбул кьн, чьмки Йаһоԝа бь сайа ԝан али мә дькә (Мәтʹәлок 17:17; Ишайа 32:1, 2). w24.01 24 ¶12-13

Нәзира сонд дьхԝар кӧ пʹорʹе хԝә нәбьрʹьн. Ӧса ԝана нишан дькьр, кӧ бь тʹәмами хԝә тʹәсмили Йаһоԝа кьрьнә. Ле йазьх, жь тʹәрихийа Исраеле те кʹьфше, ԝәки мәрьва щарна Нәзир ԛимәт нәдькьрьн у пьштгьрийа ԝан нәдькьрьн. Әʹйан ә кӧ щарна бона Нәзира һеса нибу, ԝәки хԝәйе созе хԝә бьн у жь кәсед дьн щӧдә бьн (Амос 2:12). Әм жь мәрьвед дәр-доре хԝә щӧдә дьбьн, чьмки әм гӧрʹа Йаһоԝа дькьн. Мәрʹа жи мерхаси лазьм ә, ԝәки әм ль щийе хәбате йан мәкʹтәбеда бежьн, кӧ әм Шәʹдед Йаһоԝа нә. Фькьр у кьред мәрьвед кӧ Йаһоԝа нас накьн, чьԛас дьчә дьһа хьраб дьбә, ләма дьбәкә мәрʹа чәтьн бә, ԝәки ль гора принсипед Кʹьтеба Пироз бьжин у мьзгинийе бәла кьн (2 Тимотʹейо 1:8; 3:13). Ле бир нәкьн, гава әм натьрсьн жь ԝан мәрьва щӧдә бьн, йед кӧ Йаһоԝарʹа хьзмәт накьн, дьле Ԝи гәләк ша дьбә (Мәтʹәлок 27:11; Малахи 3:18). w24.02 16 ¶7; 17 ¶9

Дина хԝә бьдьнә щьвата Рʹоме. Нав ԝанда һәбун һьм Щьһуйед кӧ ль гора Ԛануна Муса мәзьн бьбун, һьм жи кәсед жь мьләт у културед дьн. Һьнә Мәсиһи хӧлам бун, һьнәк жи мәрьвед аза бун у дьбәкә хӧламед ԝан жи һәбун. Ле диса жи, гәло шагьртед Иса чаԝа һʹьзкьрьн һьндава һәвда дьданә кʹьфше? Паԝлосе шанди әԝ һелан кьрьн, кӧ «һәвдӧ ԛәбул кьн». Гәло әԝи дьхԝәст чь бьгота? Хәбәра Йунани, йа кӧ һатийә ԝәлгәрʹандьне ча «ԛәбул кьн», те һʹәсабе кӧ мәрьв кәсәки ль мала хԝә йан ча һәвале хԝә ԛәбул дькә. Мәсәлә, Паԝлосе шанди Фьлимонрʹа гот кӧ бьра әԝ Онисимо, йе кӧ хӧламе ԝийи рʹәви бу, «ԛәбул кә» (Фьлимон 17). Әкила у Прьскилайе жи мерәки бь наве Аполо ԛәбул кьрьн, әԝ бьрьнә бал хԝә у һе рʹаст дәрһәԛа Иса Мәсиһ жерʹа шьровәкьрьн (Кʹаред Шандийа 18:26). Шагьртед Иса изьн нәдьдан, ԝәки фьрԛийа ортʹа ԝанда, йәкти у тʹьфаԛийа ԝан хьраб кә у ԝана һәвдӧ ԛәбул дькьр. w23.07 6 ¶13

Мәʹнийа сәрәкә кӧ чьрʹа тӧ әʹмьре хԝә тʹәсмили Йаһоԝа дьки әв ә, кӧ тӧ ԝи һʹәз дьки. Һʹәзкьрьна тә нә тʹәне сәр һʹиме һәстед тә йә, ле ӧса жи «занәбуна рʹӧһʹанива» гьредайи йә, демәк бь сайа тьштед кӧ тӧ дәрһәԛа Йаһоԝа һин буйи, һʹәзкьрьна тә һьндава ԝи ԛәԝи буйә (Колоси 1:9). Бь сайа лекʹолина Кʹьтеба Пироз тӧ баԝәр дьки, ԝәки (1) Хԝәдайе рʹаст Йаһоԝа йә, (2) Кʹьтеба Пироз жь бина бәр Ԝи йә у (3) Йаһоԝа тʹәшкиләта хԝә дьдә хәбате, ԝәки ԛьрара хԝә бинә сери. Кәсед кӧ әʹмьре хԝә дьдьнә дәсте Йаһоԝа, гәрәке һинкьрьнед сәрәкә жь Кʹьтеба Пироз бьзаньбьн у ль гора ԛанунед Йаһоԝа бьжин. Чь жь дәсте ԝан те әԝана дькьн, ԝәки кәсед дьнрʹа дәрһәԛа баԝәрийа хԝә гьли кьн (Мәтта 28:19, 20). Әԝана Йаһоԝа гәләк һʹәз дькьн у бь дьл у щан дьхԝазьн тʹәне Йаһоԝарʹа хьзмәт кьн. Тӧ жи гәрәке ӧса бьки. w24.03 4-5 ¶6-8

Мере Абигайле, Набал, мәрьвәки сәрт у сәрһʹьшк бу (1 Самуйел 25:3). Бона Абигайле, әʹмьр тʹәви мерәки ӧса, бе шьк гәләк чәтьн бу. Гәло мәщала Абигайле һәбу ԝәки хԝә жь ԝи хьлаз кә? Бәле. Щарәке, Набал Даԝьд у әскәред ԝи беһӧрмәт кьр, жь бо чь жи Даԝьд дьхԝәст һәрʹә у һʹәму меред мала ԝида бькӧжә. Әв йәк бона Абигайле мәщаләкә баш бу, кӧ жь ви мери хьлаз бә (1 Самуйел 25:9-13). Абигайл дькарьбу бьрʹәвийа у изьн бьда, ԝәки Даԝьд нета хԝә бинә сери. Ле әԝе рʹийа Даԝьд гьрт, кӧ әԝ Набал нәкӧжә (1 Самуйел 25:23-27). Гәло Абигайле чьрʹа ӧса кьр? Абигайле гәләк Йаһоԝа һʹәз дькьр у ԛәдьре ньһерʹандьна Йаһоԝа һьндава зәԝаще дьгьрт. Әԝе заньбу кӧ бәр чʹәʹве Йаһоԝа зәԝащ пироз ә. Әԝе дьхԝәст дьле Йаһоԝа ша кә, ләма чь жь дәсте ԝе дьһат әԝе дькьр, ԝәки мала хԝә у мере хԝә хԝәй кә. Әԝе зу тьштәк кьр, ԝәки рʹийа Даԝьд бьгьрә кӧ әԝ Набал нәкӧжә. w24.03 16-17 ¶9-10

Гәло щьвата тәда һьнә хушк-бьра хирәт дькьн, ԝәки жийина хԝә һе һеса кьн, сәва бькарьбьн һе зедә хьзмәт кьн? Тӧ зарʹ у щаһьлед ӧса нас дьки, йед кӧ мәкʹтәбеда бь мерхаси пьштгьрийа рʹастийе дькьн? Йан жи, ԝан кәса нас дьки, йед кӧ Йаһоԝарʹа амьн дьминьн, чахе нәфәред ԝан мьԛабьли ԝан дәртен? Чьԛас жь дәсте тә те, бь готьнед хԝә ԝана бьшьдинә у ԝанрʹа бежә кӧ тӧ чьԛас ԛимәт дьки мерхаси у ԛӧрбанед ԝан кӧ әԝана дькьн (Фьлимон 4, 5, 7). Йаһоԝа баԝәр ә кӧ әм бь дьл у щан дьхԝазьн дьле ԝи ша кьн, у һазьр ьн ԛӧрбана жи бькьн, сәва кӧ хԝәйе сонда хԝә бьн. Әԝ бь дьловани мәщале дьдә мә кӧ әм избат бькьн, ԝәки әм ԝи һʹәз дькьн (Мәтʹәлок 23:15, 16). Ләма жи ԝәрә чьԛас жь дәсте мә те, әм бона Йаһоԝа бькьн у дьле хԝәда сафи кьн, ԝәки әм тʹӧ щар хьзмәтийа хԝә нәдьнә сәкьнандьне! w24.02 18 ¶14; 19 ¶16

Бьдә бәр чʹәʹве хԝә, кӧ дәстпека хьзмәтийа Иса чь ԛәԝьми. Әв йәк пайизе сала 29 Д.М.-да ԛәԝьми. Иса, дийа ԝи Мәрйәм сәр дәʹԝатәке ль Ԛанайе һатьнә тʹәглифкьрьне. Мәрйәме али ԝан дькьр ве йәкеда, кӧ бона мевана хәм дькьр. Ле ԝәʹде дәʹԝате, чәтьнайи пешда һат шәрава ԝан хьлаз бу. Мәрйәм зу чу щәм Иса у жерʹа гот: «Шәрава ԝан нәма» (Йуһʹәнна 2:1-3). Гәло Иса чь кьр? Әԝи бь кʹәрәмәти ав кьрә «шәрава рʹьнд» (Йуһʹәнна 2:9, 10). Ԝәʹде хьзмәтийа хԝәйә сәр әʹрде, Иса гәләк кʹәрәмәт кьрьн. Әԝи ԛәԝата хԝә дьда хәбате, ԝәки али бь дәһа һʹәзара мәрьва бькә. Мәсәлә, дӧ кʹәрәмәтед ԝи әв бун: Щарәке әԝи 5 000 мәрьв тʹер кьр у паше жи 4 000 мәрьв, һәрге әм жьн у зарʹа жи һʹәсаб кьн, әме бьгьһижьнә 27 000 мәрьва зедәтьр (Мәтта 14:15-21; 15:32-38). Һәрдӧ дәрәщада жи, Иса гәләк кәсед нәхԝәш жи ԛәнщ кьрьн (Мәтта 14:14; 15:30, 31). w23.04 2 ¶1-2

Чахе әм рʹасти дәрдәки тен, паши ве йәке дьбәкә әм хԝә бьриндар у бетʹаԛәт тʹәхмин дькьн. Гава Елйас пʹехәмбәр рʹасти чәтьнайе һат, жерʹа зор бу рʹабә сәр пʹийа у әԝи тʹәне дьхԝәст рʹазе. Дьбәкә һʹале мә жи ӧса бә (1 Пʹадшати 19:5-7). Дьԛәԝьмә мәрʹа аликʹари лазьм ә, ԝәки дәрәщед чәтьнда бәрдәԝам кьн Йаһоԝарʹа хьзмәт кьн. Дәрәщед ӧсада, Йаһоԝа мәрʹа гьлийед жь рʹеза иройин дьбежә. Даԝьд Пʹадша әʹмьре хԝәда аликʹарийа Йаһоԝа дитьбу. Чахе Даԝьд рʹасти тәнгасийа у дьжмьна дьһат, әԝи Йаһоԝарʹа гот: «Мьле Тәйи рʹасте гьрт пьшта мьн» (Зәбур 18:35). Йаһоԝа гәләк щара бь сайа кәсед дьн али мә дькә. Мәсәлә, гава Даԝьд хԝә сьст тʹәхмин дькьр, досте ԝи Йонатʹан щарәке чу бал ԝи, кӧ бәрдьлийе бьдә ԝи у емосийалида ԝи бьшьдинә (1 Самуйел 23:16, 17). Ӧса жи, Йаһоԝа бь сайа Елиша али Елйас пʹехәмбәр кьр (1 Пʹадшати 19:16, 21; 2 Пʹадшати 2:2). w24.01 23-24 ¶10-12

Йаһоԝа Бавәки мәрʹд ә у мә дьбә хԝәйи. Әв һʹӧнӧр биланийа рʹаства гьредайи йә, йа кӧ Мәтʹәлок сәре 9-да бь симболик ча жьнәкә билан те һʹәсабе. Әԝе гошт у шәрав һазьр кьрийә у сьфьрә рʹаст кьрийә (Мәтʹәлок 9:2). Паше, рʹеза 4 у 5-да те готьне, кӧ билани гази кәсед ‹беһʹьш› дькә у ԝанрʹа дьбежә: «Ԝәрьн бьхԝьн нане мьн». Гәло чьрʹа фәрз ә, кӧ әм һәрʹьн мала биланийа рʹаст у бәр сьфьре рʹунен? Чьмки Йаһоԝа дьхԝазә, ԝәки зарʹед ԝи сафикьрьнед баш бькьн. Әԝ нахԝазә кӧ әм сәре хԝә бькьнә бәлайе у паше пʹошман бьн. Ләма жи, әԝ бона кәсед рʹаст биланийе хԝәй дькә (Мәтʹәлок 2:7). Һәрге тьрса Хԝәде дьле мәда һәбә, әме бьхԝазьн дьле ԝи ша кьн. Әме гӧһ бьдьн ширәтед ԝи у ль гора ԝан бьжин (Аԛуб 1:25). w23.06 23 ¶14-15

Һәрге әм нькарьн бь тʹәмами хьзмәтийеда кʹар бькьн, диса жи әм дькарьн баԝәр бьн, ԝәки Йаһоԝа ԛимәт дькә һәр тьште кӧ әм бона ԝи дькьн. Әм ве йәке жь кʹӧ заньн? Рʹожед Зәкәрйада, Йаһоԝа готә пʹехәмбәре хԝә, ԝәки жь зерʹ у зиве кӧ дьле Бабилонеда шандьбун, тʹащәке чекә (Зәкәрйа 6:11). Әв тʹащ бона биранина ԝан Щьһуйа һатьбу чекьрьн, йед кӧ Бабилонеда мабун у бь мәрʹдани пʹешкʹеш шандьбун (Зәкәрйа 6:14). Әм дькарьн баԝәр бьн, кӧ Йаһоԝа ԝе тʹӧ щар бир нәкә, ԝәки әм бь хирәт у бь дьл у щан ԝан рʹожед чәтьнда ԝирʹа хьзмәт дькьн. Ван рʹожед пашьнда, әме рʹасти чәтьнайа бен у һʹале дьнйайе ԝе чьԛас һәрʹә һе хьраб бә (2 Тимотʹейо 3:1, 13). Ле нәлазьм ә кӧ әм бь зедәйи бьтьрсьн. Бир нәкьн, кӧ Йаһоԝа бь сайа Һагай пʹехәмбәр чь готьбу: «Әз бь ԝәрʹа мә. . . . Нәтьрсьн!» (Һагай 2:4, 5). Һәрге чьԛас дәсте мә те, әм нета Йаһоԝа биньн сери, әԝ ԝе тʹьме тʹәви мә бә. w23.11 19 ¶20-21

Кемасийед Пәтрусе шанди дькарьбун Кʹьтеба Пирозда нә жи бьһатана ньвисаре. Ле Йаһоԝа әԝ данә ньвисаре, ԝәки әм жь ԝан шашийед ԝи һин бьн (2 Тимотʹейо 3:16, 17). Пәтрус мәрьвәки мина мә бу. Жь мәсәла ԝи әме бьвиньн, кӧ Йаһоԝа беԛьсуртийе жь мә дәʹԝа накә. Әԝ дьхԝазә кӧ әм һьмбәри ԛьсур у кемасийед хԝә шәрʹ бькьн у тʹьме хирәт бьн. Чьрʹа фәрз ә кӧ әм хирәт бьн? Гава әм сәр кемасикә хԝә бьхәбьтьн у хԝә рʹаст кьн, дьбәкә әм диса ве шашийе бькьн. Ле әм хирәт дькьн кӧ бьгьһижьн нета хԝә. Әм щарна тьштәки дьбежьн йан дькьн у паше жи пʹошман дьбьн. Ле һәрге әм хирәта хԝә ӧнда нәкьн, Йаһоԝа ԝе али мә бькә кӧ әм пешда һәрʹьн (1 Пәтрус 5:10). Рʹаст ә кемасийед Пәтрус һәбун, ле йәкә Иса һьндава ԝида дьлован бу. Әв йәк дькарә дьле мә ԛәԝи кә, кӧ әм бәрдәԝам кьн Йаһоԝарʹа хьзмәт кьн. w23.09 20-21 ¶2-3

Иса дькарьбу Лазар ԛәнщ кьра. Ле әԝи дьхԝәст тьштәки дьһа мәзьн бькьра. Әԝи соз да Мәртʹайе: «Бьре тәйе жь мьрьне рʹабә». Ӧса жи гот: «Әз ьм рʹабун у жийин!» (Йуһʹәнна 11:23, 25). Бәле, Хԝәде ԛәԝат дайә Иса, ԝәки мьрийа вәгәрʹинә жийине. Щарәке, Иса кәчʹькәк һьнә ԝәхт шунда паши мьрьна ԝе, вәгәрʹандә жийине. Щарәке жи, әԝи хортәк һәма рʹожа мьрьна ԝи, вәгәрʹандә жийине (Луԛа 7:11-15; 8:49-55). Ле гәло әԝи дькарьбу кәсәки кӧ ида чар рʹож мьрьбу у бин кʹәтьбуйе, жь мьрьне рʹакьра? Мәрйәм, хушка Лазарә дьн, чу пешийа Иса. Әԝе жи ӧса готә ԝи: «Хӧдан, һәгәр тӧ ль ве дәре буйайи, бьре мьн нәдьмьр» (Йуһʹәнна 11:32). Мәрйәм у кәсед дьн жи гәләк хәмгин бун. Гава Иса еша дьле ԝан у һесьред чʹәʹве ԝан дитьн, әԝ гәләки хәмгин бу. Дьле Иса сәр ԝан шәԝьти у әԝ жи тʹәви ԝан гьрийа. Әԝи заньбу кӧ чахе достәки мәрьва дьмьрә, әв йәк ешәкә гәләк гьран ә. Бешьк, әԝи жь дьл дьхԝәст мәʹнийа һесьред ԝан кʹӧта кә! w23.04 10-11 ¶12-13