Сьбат

Гава Һьзԛийа Пʹадша гьран нәхԝәш бу, әԝи жь Йаһоԝа лава дькьр, кӧ ԝи ԛәнщ бькә. Паше Йаһоԝа щаба ԝи да у ԝи ԛәнщ кьр (2 Пʹадшати 20:1-6). Жь алийе дьнва, гава Паԝлосе шанди жь Хԝәде рʹәща кьр, кӧ «дәрзике» жь бәдәна ԝи дәрхә, Йаһоԝа әԝ ԛәнщ нәкьр (2 Корьнтʹи 12:7-9). Һеродәс Пʹадша дьхԝәст Аԛуб у Пәтрусе шанди бькӧшта. Пәтрус һатә хьлазкьрьне, ле Аԛуб һатә кӧштьне (Кʹаред Шандийа 12:1-11). Дьбәкә әм бьфькьрьн, «Гәло чьрʹа Йаһоԝа Пәтрус хьлаз кьр, ле Аԛуб хьлаз нәкьр?» Кʹьтеба Пироз дәрһәԛа ве йәке тьштәки набежә. Ле әм дькарьн баԝәр бьн, кӧ «нәһәԛи» щәм Йаһоԝа тʹӧнә йә (Ԛануна Дӧщари 32:4). Щарна Йаһоԝа щаба дӧайед мә ӧса надә, чаԝа кӧ әм дьхԝазьн. Ле әм баԝәр ьн, кӧ Йаһоԝа һәр тьшти тʹьме ль гора һʹәзкьрьн у һәԛийе дькә, ләма жи гава әԝ щаба дӧайед мә бь щурʹәки дьн дьдә, әм бәр хԝә накʹәвьн (Ибо 33:13). w23.11 21 ¶6

Аԛуб жь бина бәр Хԝәде ньвиси, ԝәки мәрьвед билан һазьр ьн гӧһдар бьн. Бьфькьрә әв йәк чь те һʹәсабе. Әм гәрәке жь дьл һазьр бьн гӧһ бьдьнә ԝан мәрьва, кʹижанарʹа Йаһоԝа һʹӧкӧм дайә. Һәмьки, Йаһоԝа нахԝазә ԝәки әм гӧһ бьдьнә ԝи мәрьви, йе кӧ жь мә дәʹԝа дькә, ԝәки әм ԛанунед Ԝи бьтʹәрьбиньн (Кʹаред Шандийа 4:18-20). Дьбәкә мәрʹа дьһа һеса йә гӧһ бьдьнә Йаһоԝа, нә кӧ мәрьва. Гәло чьрʹа? Чьмки Йаһоԝа тʹьме рʹебәрийа беԛьсур дьдә мә (Зәбур 19:7). Ле мәрьвед хԝәйиһʹӧкӧм ԛьсурдар ьн. Диса жи, Баве мәйи әʹзмана һʹӧкӧм у щабдари дайә де-бава, сәрԝеред дәԝләте у рʹуспийед щьвате (Мәтʹәлок 6:20; 1 Тʹесалоники 5:12; 1 Пәтрус 2:13, 14). Гава әм гӧһ дьдьнә ԝан, бь ве йәке әм гӧһ дьдьнә Йаһоԝа. w23.10 6 ¶2-3

Һәрге әм дәрһәԛа ԛәԝата Йаһоԝа бьфькьрьн, әме баԝәрийа хԝә дьһа ԛәԝи кьн. Бешьк ԛәԝата ԝи һәйә, ԝәки һʹәму созед хԝә бинә сери. Хԝәде чь дьбежә, тинә сери, чьмки ԛәԝата ԝи бесинор ә (Ибо 42:2; Маркос 10:27; Әфәси 3:20). Мәсәлә, әԝи соз дабу Бьраһим у Сәрайе, кӧ әʹмьре ԝани мәзьнда ԝе кӧрʹәк ԝанрʹа бе буйине (Дәстпебун 17:15-17). Ӧса жи, әԝи Бьраһимрʹа соз дабу, кӧ ԝе ԝәлате Кәнане бьдә зӧрʹәта ԝи. Гәләк сала зӧрʹәта Бьраһим, демәк Исраели, Мьсьреда чаԝа дил бун, ләма жи ӧса дьһатә кʹьфше кӧ әв созе Хԝәде ԝе тʹӧ щар нәйе сери. Ле созе Йаһоԝа һатә сери! Әԝи Мәрйәма бькʹьррʹа гот, кӧ әԝе Кӧрʹе Ԝи бинә дьнйайе. Бь ве йәке, созе кӧ Йаһоԝа бь һʹәзара сала пешда бахче Еденеда дабу, һатә сери! (Дәстпебун 3:15) Чахе әм дәрһәԛа созед Йаһоԝа, йед кӧ ида һатьнә сери, дьфькьрьн, әв йәк баԝәрийа мә ԛәԝи дькә, ԝәки ԛәԝата ԝи һәйә созе хԝәйи дәрһәԛа дьнйа тʹәзә жи бинә сери (Йешу 23:14; Ишайа 55:10, 11). w23.04 28 ¶10-12

Йаһоԝа дӧайе Даԝьд бьһист у ԝи хьлаз кьр (1 Самуйел 19:10, 18-20; 2 Самуйел 5:17-25). Әм жи дькарьн ве йәкеда баԝәр бьн (Зәбур 145:18). Йаһоԝа щара ӧса щаба дӧайед мә надә чаԝа кӧ әм дьхԝазьн. Паԝлос жь Хԝәде рʹәща дькьр, ԝәки әԝ жь стьруйа кӧ бәдәна ԝида бу, ле хьлаз кә. Паԝлосе шанди се щара һәма дәрһәԛа ви дәрде хԝә дӧа кьр. Гәло Йаһоԝа щаба дӧайед ԝи да? Әре, ле нә ӧса чаԝа кӧ Паԝлос һивийе бу. Дәԝса кӧ жь ви дәрди ле хьлаз кә, Йаһоԝа ԛәԝат да ԝи, ԝәки әԝ бькарьбә тʹьме бь амьни ԝирʹа хьзмәт кә (2 Корьнтʹи 12:7-10). Щара дьбәкә әм жи щаба дӧайед хԝә ӧса нәстиньн, чаԝа кӧ әм дьхԝазьн. Ле әм дькарьн баԝәр бьн, ԝәки Йаһоԝа рʹьнд занә, кӧ ча бь щурʹе лапи баш али мә бькә. Әԝ «дькарә һәр тьшти һе зедә кә, нә чаԝа әм дьхԝазьн йан дьфькьрьн» (Әфәси 3:20). Ләма жи, әԝ дькарә нә кӧ чаԝа әм дьхԝазьн у дьфькьрьн, ле щурʹәки майин щаба мә бьдә. w23.05 8-9 ¶4-6

Щарна әм гәрәке дәрһәԛа созе рʹабуна мьрийа бьфькьрьн. Гәло чьрʹа? Чьмки рʹожәке һәр кәс дькарә нәхԝәшикә гьран бькʹәвә, йан жи мәрьвәки хԝәйи һʹьзкьри ӧнда кә (Ԝаиз 9:11; Аԛуб 4:13, 14). Һевийа рʹабуна мьрийа али мә дькә, ԝәки әм һьмбәри дәрдед ӧса сәбьр кьн (1 Тʹесалоники 4:13). Кʹьтеба Пироз дьбежә, ԝәки Баве мәйи әʹзмана мә нас дькә у мә гәләки һʹьз дькә (Луԛа 12:7). Йаһоԝа Хԝәде мә ӧса баш нас дькә, кӧ әԝе мә вәгәрʹинә жийине хут бь ԝан хәйсәт-һʹӧнӧра, кʹижан кӧ пешийа мьрьне щәм мә һәбун. Әԝ мә гәләк һʹьз дькә, у әԝ дьхԝазә жийина һʹәта-һʹәтайе бьдә мә. Һәрге әм бьмьрьн жи, әԝе мә жь мьрьне рʹакә! Чьрʹа әм дькарьн баԝәрийа хԝә созе рʹабуна мьрийа биньн? Чьмки әм дӧдьли набьн, ԝәки Кәсе кӧ әв йәк соз дайә, һьм дьхԝазә у һьм жи ԛәԝат у фәрәсәте Ԝи һәйә, кӧ созе хԝә бинә сери. w23.04 8-9 ¶2-4

Усьв у Мәрйәме тʹәвайи хирәт дькьрьн, ԝәки достийа хԝә тʹәви Йаһоԝа һе ԛәԝи кьн. Ԝана фәʹм дькьр, кӧ чьԛас фәрз ә малбәтева Йаһоԝарʹа хьзмәт кьн (Луԛа 2:22-24; 4:16). Ԝана мәсәләкә гәләк баш жьн-мерарʹа һиштийә! Һәрге зарʹед ԝә һәнә, дьбәкә ԝәрʹа щара чәтьн ә һәрʹьн щьвата, йан жи ԛӧльхкьрьна тʹәви малбәте дәрбаз кьн. У илаһи дьбәкә дьһа чәтьн ә, кӧ жьн-мер ԝәʹдә бьвиньн ԝәки тʹәвайи дӧа кьн у Кʹьтеба Пироз лекʹолин кьн. Ле бир нәкьн, гава һун тʹәвайи Йаһоԝарʹа хьзмәт дькьн, һун дьһа незики һәвдӧ у Йаһоԝа дьбьн. Ләма жи хьзмәтийа Йаһоԝа дайньн сәр щийе пешьн! Һәрге зәԝаща ԝәда чәтьнайи һәнә, дьԛәԝьмә ԝәрʹа һʹәԝас нибә ԛӧльхкьрьна тʹәви малбәте тʹәвайи дәрбаз кьн. Һәрге ӧса нә, һун дькарьн кьн у һʹәԝас тьштәки ӧса шеԝьр кьн, чь кӧ ԝә һәрда хԝәш те. Әв гав дькарә али ԝә бькә, ԝәки һун дьһа зедә һәвдӧ һʹьз бькьн у һьм жи хԝәстьна ԝә зедә бә, кӧ тʹәвайи Йаһоԝарʹа хьзмәт кьн у шьхӧлед рʹӧһʹанида кʹар бькьн. w23.05 22 ¶7-8

Бь сайа тьрса бәр Хԝәде, Обадйа йәки рʹаст, һәԛ у бь итʹбар бу. Ләма жи пʹадша әԝ кьрә нобәдаре ԛәсьре (Бәрамбәр кә Нәһәмийа 7:2). Ӧса жи тьрса бәр Хԝәде али ԝи дькьр, кӧ әԝ йәки гәләк мерхас бә. Әԝ һена сәрԝертийа Аһаб Пʹадшада дьжит, йе кӧ гәләки зӧлм бу (1 Пʹадшати 16:30). Жьна Аһаб Изабел, Баәлрʹа хьзмәт дькьр. Әԝе Йаһоԝа нәфрʹәт дькьр, ләма жи һәр тьшт дькьр, ԝәки һʹәбандьна Йаһоԝа кʹӧта кә. Әԝе һәла һе гәләк пʹехәмбәред Хԝәде жи да кӧштьне (1 Пʹадшати 18:4). Гава Изабел пʹехәмбәред Хԝәде дьгәрʹийа ԝәки ԝана бькӧжә, Обадйа «сәд пʹехәмбәред Хӧдан пенщи пенщи дь шькәфтада вәшартьн у әԝ бь нан у ав кьрьн» (1 Пʹадшати 18:13, 14, ИМ). Һәрге Изабел дәрһәԛа ве йәке пебьһʹәсийа, бешьк Обадйа ԝе бьһата кӧштьне. Һәмьки, Обадйа дьбәкә дьтьрсийа у нәдьхԝәст бьмьрә, ле әԝи жь әʹмьре хԝә зедәтьр Йаһоԝа у хьзмәткʹаред ԝи һʹьз дькьр. w23.06 16 ¶9-10

Чаԝа бәре, Йаһоԝа иро жи бь сайа Кʹьтеба Пироз у сәре щьвате, Кӧрʹе хԝә Иса, рʹебәрийе щьмәʹта хԝә дькә. Гәло избати һәнә кӧ Йаһоԝа иро бона рʹебәрийе щьмәʹта хԝә бькә, ӧса жи мәрьва дьдә хәбате? Бәле. Ԝәрә дина хԝә бьдьне кӧ жь сала 1870 у паше чь ԛәԝьми. Чарлз Теиз Рассел у һәвалед ԝи фәʹм кьрьн, кӧ бона сазкьрьна Пʹадшатийа Хԝәде, сала 1914 ԝе саләкә фәрз у мәхсус бә (Данийел 4:25, 26). Әԝана сәр һʹиме Кʹьтеба Пироз һатьбун сәр ве фькьре. Әшкәрә йә кӧ Йаһоԝа рʹебәри лекʹолина ԝан дькьр, чьмки сала 1914-да, тьштед кӧ дьнйайеда ԛәԝьмин избат кьрьн, ԝәки Пʹадшатийа Хԝәде ида һатийә сазкьрьне у сәрԝертийе дькә. Шәрʹе Һʹәмдьнйайейә I дәстпебу. Паше, нәхԝәши бәла бун, гәләк щийада әʹрдһʹәж у хәлайи дьбун (Луԛа 21:10, 11). Бәле, Йаһоԝа бь сайа ԝан лекʹолинкʹаред Кʹьтеба Пироз, али щьмәʹта хԝә дькьр, ԝәки әԝана Кʹьтеба Пироз фәʹм кьн. w24.02 22 ¶11

Мина хьзмәткʹаред Йаһоԝа, әм баԝәр ьн ԝәки Хԝәде мә һʹьз дькә у дьхԝазә кӧ әм бь жийинәкә гәләк хԝәш бьжин (Рʹомайи 8:35-39). Ӧса жи, әм баԝәр ьн кӧ һәрге әм ль гора Кʹьтеба Пироз бьжин, әме тʹьме кʹаре бьстиньн (Ишайа 48:17, 18). Ле һәрге әм ньшкева бькʹәвьнә тәнгасийе, гәрәке әм чь бькьн? Мәсәлә, дьԛәԝьмә нәфәрәки мала мә дьле мә ешандийә. Йан әм жь нәхԝәшикә гьран дьчәрчьрьн у нькарьн ль гора дьле хԝә Йаһоԝарʹа хьзмәт кьн. Йан тʹәшԛәләкә тʹәбйәте зьрарәкә мәзьн дайә мә. Йан жи бона баԝәрийа хԝә әм рʹасти пәйкʹәтьна тен. Гава әм дькʹәвьнә тәнгасийед ӧса, дьбәкә әм бәрхԝә дькʹәвьн у дьфькьрьн: «Әв бәла чьрʹа һатә сәре мьн? Ԛәй мьн гӧнә кьрийә? Ԛәй Йаһоԝа ида мьн кʹәрәм накә?» Гәло тӧ жи щарна ӧса дьфькьри? Һәрге әре, бәрхԝә нәкʹәвә. Гәләк хьзмәткʹаред Йаһоԝа жи щарна хԝә ӧса тʹәхмин дькьрьн (Зәбур 22:1, 2; Һәбаԛуԛ 1:2, 3). w23.04 14 ¶1-2

Гава әм рʹасти щерʹьбандьнәке тен, әм дәрберʹа инкʹар дькьн һәр фькьр у кьред кӧ дькарә зьраре бьдә һәләԛәтийа мә тʹәви Хԝәде. Йаһоԝа дьхԝазә ԝәки әм бь дьл у щан гӧһ бьдьнә ԝи (Рʹомайи 6:17). Рʹебәрийа Йаһоԝа тʹьме бона кʹара мә йә, у ԛанунед ԝи найенә гӧһастьне (Ишайа 48:17, 18; 1 Корьнтʹи 6:9, 10). Мире-щьна дьхԝазә алийе емосийали у физикида сәр мә һʹӧкӧм кә, ԝәки баԝәрийа мә сьст кә. Нета ԝи әв ә, кӧ мә «һʹуфи хԝә кә», демәк һәләԛәтийа мә тʹәви Йаһоԝа хьраб кә (1 Пәтрус 5:8). Ԛьрʹна йәкеда, хьзмәткʹаред Хԝәде жь бо амьнийа хԝә рʹасти пәйкʹәтьна дьһатьн, әԝана дьһатьнә ледане у һәла һе дьһатьнә кӧштьне жи (Кʹаред Шандийа 5:27, 28, 40; 7:54-60). Һʹәта рʹожа иро жи, Мире-щьна пәй щьмәʹта Хԝәде дькʹәвә. Мәсәлә, хушк-бьред мәйә жь Русйайе у ԝәлатед дьн, рʹасти зӧлмийе у пәйкʹәтьна тен. Мире-щьна хенщи һʹьщумкьрьнед әʹйан, йед вәшарти жи дьдә хәбате (Әфәси 6:11). w23.07 15-16 ¶6-9

Чьԛас тӧ Хәбәра Хԝәде лекʹолин дьки, һаԛас һе зедә һʹьзкьрьна тә һьндава Йаһоԝа мәзьн дьбә. Әв һʹьзкьрьн тә һелан дькә, ԝәки ԝан тьшта, чь кӧ һин дьби, бини сери. Бь аликʹарийа принсипед Кʹьтеба Пироз, тӧ сафикьрьнед баш дьки. Тӧ дьхԝәзи ԝәки Хԝәде жь тә рʹази бә, ләма жи тӧ әʹмьре хԝә дьгӧһези. Чаԝа кӧ зарʹ чʹәʹв дьдьнә баве хԝә, тӧ жи чʹәʹв дьди Баве хԝәйи әʹзмана (Әфәси 5:1, 2). Дьбәкә әм жь хԝә дьпьрсьн: «Гәло жь ԝи чахива, гава әз бумә Шәʹде Йаһоԝа, һʹьзкьрьна мьн һьндава Йаһоԝа дьһа ԛәԝи буйә? Гәло әз чʹәʹв дьдьмә Йаһоԝа кӧ һе зедә һʹьзкьрьне һьндава хушк-бьра бьдьмә кʹьфше?» Һәрге һʹьзкьрьна тәйә «бәре» сар буйә, хәмгин нәбә. Ԛьрʹна йәкеда, әв йәк һатә сәре шагьртед Иса Мәсиһ жи. Иса әԝ инкʹар нәкьрьн у әԝ мә жи инкʹар накә (Әʹйанти 2:4, 7). Әԝ занә кӧ әм дькарьн һʹьзкьрьна хԝәйә бәре диса ава кьн. w23.07 8 ¶2-3

Пәтрусе шанди гӧнәки гьран кьр. Пешийе Пәтрус гәләк хԝәда баԝәр бу у гот, кӧ һәрге шандийед дьн тʹәрка Иса бьдьн жи, әԝе тʹӧ щар тʹәрка ԝи нәдә (Маркос 14:27-29). Паше, Пәтрус чәнд щара хәԝрʹа чу у һʹьшйар нәма (Маркос 14:32, 37-41). Ахьрийеда, гава мәрьв һатьн кӧ Иса бьгьрьн, Пәтрус әԝ һишт у рʹәвийа (Маркос 14:50). Хьлазийеда жи, Пәтрус се щара инкʹар кьр кӧ әԝ Иса нас дькә у һәла һе сәр ве дәрәԝе сонд жи хԝар (Маркос 14:66-71). Гава Пәтрус фәʹм кьр кӧ әԝи гӧнәки чьԛас мәзьн кьрьбу, әԝи чь кьр? Әԝи тәйах нәкьр у кʹәлә-кʹәл гьрийа (Маркос 14:72). Дәԝса ве йәке Иса һәвале хԝә нә кӧ сущдар кьр бона шашийед ԝи, ле жерʹа гот кӧ әԝе щабдарийед һе мәзьн бьстинә (Йуһʹәнна 21:15-17). Пәтрус заньбу кӧ әԝи гӧнәки гьран кьрьбу, ле диса жи, әԝи хԝә бекер һʹәсаб нәдькьр. Гәло чьрʹа? Чьмки әԝ баԝәр бу кӧ Ахайе ԝи, Иса, гӧмана хԝә ԝи нәбьрʹибу (Рʹомайи 8:38, 39). w24.03 18-19 ¶13-15

Жь бо бенамусийе мәрьв дькарә шәрми бә, хԝә бекер һʹәсаб кә, ньшкева гьран дәркʹәвә у малбәта хԝә ӧнда кә. Ләма жи, дьһа баш ә тʹәглифкьрьна ‹жьна ахмах› инкʹар ки у нәчи мала ԝе. Бенамуси дькарә мәрьва ча рʹӧһʹанида ӧса жи физикида бькӧжә (Мәтʹәлок 7:23). Мәтʹәлок 9:18 дьбежә: «Меванед ԝе гәлийе дийаре мьрийада нә». Һәрге ӧса йә, чьрʹа гәләк мәрьв дькʹәвьнә ве тʹәльке? (Мәтʹәлок 9:13-18) Гәләк щар порнографийа дьбә мәʹни кӧ мәрьв бенамусийе дькьн. Һьнәк дьфькьрьн кӧ порнографийа тьштәки нә хьраб ә. Ле әв йәк нә рʹаст ә. Порнографийа зьрарәкә мәзьн тинә. Һьм жи һеса нинә тʹәрка ве бьдьн. Шькьлед бенамусийе мина жәʹре һʹьше мәрьвада дьминьн. Ӧса жи порнографийа хԝәстьнед хьраб дьлда пешда тинә у мина агьр гӧрʹ дькә (Колоси 3:5; Аԛуб 1:14, 15). Бәле, гәләк кәсед кӧ порнографийайе дьньһерʹьн ахьрийеда бенамусийе дькьн. w23.06 23 ¶10-11

Дьбәкә дәԝләтед дьн бьхԝазьн Империйа Һʹәмдьнйайе, демәк Англо-Америкайе алт бькьн, ле әԝе нькарьбьн дәԝса ԝе бьгьрьн. Әм ве йәке заньн, чьмки «кәвьре» кӧ те һʹәсабе Пʹадшатийа Хԝәде, ԝе ньгед һʹәйкәл һурдәхԝәши кә, йе кӧ те һʹәсабе Англо-Америка (Данийел 2:34, 35, 44, 45). Гәло тӧ баԝәр дьки, кӧ пʹехәмбәртийед Хԝәде дәрһәԛа ньгед жь һʹәсьн у һʹәрʹийа сор, рʹаст ьн? Һәрге әре, әв йәк ԝе сәр щурʹе жийина тә һʹӧкӧм кә. Тӧйе ве дьнйайеда пәй һәбуке нәкʹәви, чьмки тӧ зани ԝәки әв дьнйа хьраб, ԝе зутьрәке бе кʹӧтакьрьне (Луԛа 12:16-21; 1 Йуһʹәнна 2:15-17). Фәʹмкьрьна ван пʹехәмбәртийед Хԝәде ԝе али тә бькьн, кӧ тӧ шьхӧле бәлакьрьна мьзгинийе у һинкьрьне, ԛимәт ки (Мәтта 6:33; 28:18-20). Паши лекʹолинкьрьна ве пʹехәмбәртийа Хԝәде, жь хԝә бьпьрсә: «Гәло сафикьрьнед мьн нишан дькьн ԝәки әз баԝәр дькьм, кӧ Пʹадшатийа Хԝәде ԝе дәмәкә незикда һʹәму сәрԝертийед мәрьва кʹӧта ә?» w23.08 11 ¶13-14

Бь мьлукти ԛәбул кә ԝәки әʹмьр, сьһʹәт-ԛәԝат у дәрәща тә, дькарьн мәщалед тә синор кьн. Мина Барзиллай, гава сьһʹәт-ԛәԝата мә хьраб бә, әм гәрәке ԛәбул кьн, кӧ һьнә тьшт әме ида нькарьбьн бькьн (2 Самуйел 19:35, 36). Мина Муса, аликʹарийе ԛәбул кә у һәрге дьбә, һьнә щабдарийа бьдә кәсед дьн (Дәркʹәтьн 18:21, 22). Мәрьве мьлук тьштед жь ԛәԝата хԝә дәр жь хԝә дәʹԝа накә, чьмки әв йәк дькарә бьбә мәʹни, кӧ әԝ һʹал бькʹәвә. Әм гәрәке бона сафикьрьнед нәбаш йед мәрьвед дьн, хԝә щабдар тʹәхмин нәкьн. Әм нькарьн дәԝса кәсед дьн сафикьрьна бькьн у ԝана жь ахьрийа кьред ԝанә хьраб бьпʹарезьн. Мәсәлә, дьбәкә кӧрʹ йан ԛиза тә сафи кә ида Йаһоԝарʹа хьзмәт нәкә. Әв сафикьрьн дькарә дьле де-бава гәләки бешинә. Ле де-бавед кӧ хԝә жь бо сафикьрьнед нәбаш йед зарʹед хԝә сущдар дькьн, барәки гьран датиньн сәр пьшта хԝә. Йаһоԝа нахԝазә ԝәки әԝана барәки ӧса һьлдьн сәр хԝә. w23.08 29 ¶11-12

Шьмшон мина мә, йәки гӧнәкʹар бу, ләма жи әԝи щара сафикьрьнед нәбаш дькьр. Илаһи жь бо сафикьрьнәкә нәбаш гәләк тьштед хьраб һатьн сәре ԝи. Һьнә ԝәхт шунда, чахе Шьмшон чаԝа һʹакьм хьзмәт дькьр, әԝи «нәԝала Сорәкеда жьнәке һʹәз кьр у наве ԝе Дәлила бу». Пешийа ве йәке, Йаһоԝа изьн да Шьмшон, ԝәки әԝ бьбә дәргистийе ԛизәкә Фьльсти, чьмки әԝи мьԛабьли «Фьльстийа мәщале дьгәрʹийа» кӧ ԝана бькӧжә. Паше, Шьмшон ль бажаре Фьльстийа, Газайеда мала ԛавәкеда ма. Һьнге Хԝәде ԛәԝат да Шьмшон, ԝәки әԝ һьмбәри Фьльстийа шәрʹ бькә (Һʹакьмти 14:1-4; 16:1-3). Ле дәрәща ԝи тʹәви Дәлилайе щӧдә бу, чьмки дьԛәԝьмә Дәлила Исраели бу у һәләԛәтийа тʹәви ԝе, мәщал нәдьда ԝи, ԝәки мьԛабьли Фьльстийа шәрʹ бькә. Дәлилайе жь Фьльстийа гәләк пʹәрә ԛәбул кьр, ԝәки Шьмшон бьхапинә у бьдә дәсте ԝан. w23.09 5 ¶12-13

Бь сайа фәʹмкʹарийе, әм дькарьн мьлук бьн. Гава йәк һʹьщуми баԝәрийа кәсәки фәʹмкʹар дькә, әԝ хԝәгьртьне нишан дькә. Фькьред мәрьва мина бәʹре кʹур ьн. Демәк, гава кәсәк тьштәки дьпьрсә, гәләк щар нета пьрса ԝи тьштәки дьн ә. Ләма жи пешийа кӧ щаба ԝи бьдьн, дьһа баш ә әм сәр нета пьрса ԝи бьфькьрьн (Мәтʹәлок 16:23). Дина хԝә бьдьне кӧ Гидәон ча щаба Әфрайимийа да. Ԝана бь һерс пьрси, кӧ әԝи чьрʹа бейи ԝан мьԛабьли дьжмьнед Исраеле шәрʹ кьр. Гәло әԝана чьрʹа һерс кʹәтьн? Гәло жь бо ԝе йәке ԛәдьре ԝан кʹәт? Фьрԛи тʹӧнә мәʹни чь бу, диса жи Гидәон ԝана фәʹм кьр у щабәкә нәрм да ԝан. Паше һерса ԝан дани у бина ԝан фьрә бу (Һʹакьмти 8:1-3). w23.09 16 ¶8-9

Тʹӧ бав у кӧрʹ мина Йаһоԝа у Иса һәвдӧ һʹәз накьн. Гава Хԝәде дьдит кӧрʹе ԝи чьԛас еше дькʹьшинә, дьле ԝи гәләк дьшәԝьти. Мьрьна зарʹе бона де-бава ешәкә гәләк гьран ә. Һәмьки әм баԝәрийа хԝә рʹабуна мьрийа тиньн, ле әв йәк найе һʹәсабе, кӧ гава мәрьве мәйи һʹәзкьри дьмьрә, әм еше накʹьшиньн. Мина ве йәке, Йаһоԝа гәләк еш кʹьшанд, гава Кӧрʹе ԝийи әʹзиз бьһара сала 33 Д.М.-да, щәфа кʹьшанд у мьр (Мәтта 3:17). Пешийа Евара Биранине мәщала мә һәйә ԝәʹде һинбуна шәхси йан жи Ԛӧльхкьрьна Тʹәви Малбәте, дьһа зедә дәрһәԛа ԛӧрбане лекʹолин бькьн. Рʹожа Биранине, Шеԝьркьрьна Кʹьтеба Пирозә Шәбәԛе тʹәмашә бькьн. Һәрге әм дьле хԝә бона Биранине һазьр кьн, әме бькарьбьн али кәсед дьн бькьн, кӧ әԝана жи кʹаре жь ве йәке бьстиньн (Әзра 7:10). w24.01 11 ¶10-12

Щурʹәк кӧ чаԝа әм дькарьн жь Йаһоԝа ԛәԝате бьстиньн, әԝ ә, ԝәки Ԝирʹа дӧа бькьн. Әԝ дькарә ԛәԝатәкә ӧса бьдә мә, кʹижан кӧ жь ԛәԝата мә дәр ә (2 Корьнтʹи 4:7). Ӧса жи, гава әм Хәбәра Хԝәде дьхуньн у кʹур сәр дьфькьрьн, әм ԛәԝате дьстиньн (Зәбур 86:11). Хәбәра Хԝәде «зор ә» (Ибрани 4:12). Һәрге тӧ Йаһоԝарʹа дӧа бьки у Хәбәра ԝи бьхуни, әԝе ԛәԝате бьдә тә ԝәки тӧ чәтьнайада сәр кʹәви, шабуна хԝә ӧнда нәки, йан жи щабдарикә мәзьн бини сери. Дина хԝә бьдьн кӧ чаԝа Йаһоԝа али Уньс пʹехәмбәр дькьр. Йаһоԝа щабдарикә нә һеса да Уньс, ле әԝи әв щабдари инкʹар кьр у пе гәмийе чу щики дьн. Ләма жи, жь бо ве сафикьрьне һьндьк мабу әԝ у мәрьвед кӧ тʹәви ԝи гәмийеда бун, фьртонеда бьмьрана. Чахе әԝ жь гәмийе һатә авитьне, мәʹсики гәләк мәзьн ԝи даԛӧртанд, у әԝ кʹәтә щийе тәʹри, демәк зьке мәʹси. Уньс чь кьр ԝәки дьлбинийе бьстинә? Әԝи дӧа кьр (Уньс 2:1, 2, 7). w23.10 13 ¶4-6

Рʹаст ә Пәтрусе шанди нәʹмед хԝә Мәсиһийед ԛьрʹна йәкерʹа ньвиси, ле диса жи Йаһоԝа нәʹмед ԝи кьрә пʹара Хәбәра Хԝә, ԝәки әм жи бькарьбьн кʹаре бьстиньн (Рʹомайи 15:4). Гәләк мәрьв баԝәрийа хԝә пʹехәмбәртийед Кʹьтеба Пироз найньн. Жь бо ве йәке кӧ әм гәләк ԝәхт дәрһәԛа ахьрийа ве дьнйайе хәбәр дьдьн, һьнә мәрьв щара ԛәрфед хԝә мә дькьн. Һьнәк жи дьбежьн, кӧ рʹожа Хԝәде ԝе тʹӧ щар нәйе (2 Пәтрус 3:3, 4). Һәрге әм тьштед ӧса ԝәʹде хьзмәтийе, сәр хәбате, йан жи жь нәфәред мале бьбьһен, шьк дькарә бькʹәвә дьле мә у баԝәрийа мә сьст кә. Гәло гьлийед Пәтрус чаԝа дькарьн али мә бькьн? Дьбәкә һьнә мәрьв дьфькьрьн, кӧ Йаһоԝа кʹӧтакьрьна ве дьнйа хьраб дәрәнги дьхә. Гьлийед Пәтрус тиньн бира мә, ԝәки ньһерʹандьна Йаһоԝа сәр ԝәʹдә жь ньһерʹандьна мәрьва гәләк щӧдә дьбә (2 Пәтрус 3:8, 9). Бона Йаһоԝа һʹәзар сал мина рʹожәке йә. Әԝ сәбьр дькә у нахԝазә кӧ кәсәк ԛьрʹ бә. Ле гава рʹожа ԝи бе, әв дьнйа хьраб ԝе ԛьрʹ бә. w23.09 26-27 ¶2-5

Гәло чьрʹа Паԝлосе шанди нәʹмә Мәсиһийед Ибранирʹа ньвиси, йед кӧ Щьһустанеда дьман? Дьԛәԝьмә жь бо ван дӧ мәʹнийед сәрәкә. Йа пешьн, әԝи дьхԝәст ԝана һелан кә, чьмки гәләк жь ԝан ль гора дин у баԝәрийа Щьһу мәзьн бьбун. Дьбәкә сәрԝеред религи ԛәрфед хԝә ԝана дькьрьн кӧ әԝана бьбунә шагьртед Иса Мәсиһ. Гәло чьрʹа? Чьмки нә пʹарьстгәһа ԝан, нә ԛӧрбангәһа ԝан у нә жи кʹаһин һәбун ԝәки ԝедәре хьзмәт кьн. Әв йәк дькарьбу Мәсиһийа дьлтәнг кьра у баԝәрийа ԝан сьст кьра (Ибрани 3:12, 14). Һьнә жь ԝан дьԛәԝьмә дьфькьрин, ԝәки вәгәрʹьн нава дине Щьһуйа. Йа дӧда, Паԝлосе шанди ԝан хьзмәткʹаред Хԝәде йед Ибранирʹа гот, ԝәки әԝана хирәт накьн кӧ «хԝарьна гьран» бьстиньн, демәк рʹастийед тʹәзә, йан жи йед кʹур фәʹм бькьн (Ибрани 5:11-14). Ӧса дьһатә кʹьфше, ԝәки һьнәк жь ԝан һе пәй Ԛануна Муса дьчун. w23.10 24-25 ¶3-4

Һьнә хушк сафи дькьн азәп бьминьн (Мәтта 19:10-12). Әм баԝәр ьн, кӧ Йаһоԝа у Иса кәсед нәзәԝьщи гәләки ԛимәт дькьн. Сәр тʹәмамийа дьнйайе, хушкед азәп бона щьватед хԝә кʹәрәмед мәзьн ьн. Әԝана мәрьва һʹәз дькьн у дькʹәвьнә һʹәйра кәсед дьн. Әԝана бона гәләка дьбьн хушк у дайикед рʹӧһʹани (Маркос 10:29, 30). Һьнәка бунә хьзмәткʹаред һәртʹьм. Кәсед кӧ шьхӧле бәлакьрьна мьзгинийеда кʹар дькьн, һʹәчʹи зәʹф хушкед мәйә хирәт ьн (Зәбур 68:11). Гәло тӧ дькари хԝәрʹа нете дайни, ԝәки бьби хьзмәткʹара һәртʹьм? Мәсәлә, тӧ дькари бьби пешәнг, сәр проектед авакьрьне кʹар бьки, йан жи Бәйтʹәледа хьзмәт ки. Дәрһәԛа нета хԝә Йаһоԝарʹа бежә. Жь кәсед дьн бьпьрсә кӧ әԝана ча гьһиштьнә ве нете, у пебьһʹәсә кӧ тӧ гәрәке чь бьки, ԝәки бьгьһижи ве нете. Паше хԝәрʹа графике чекә, ԝәки бьгьһижи нетед хԝә. Һәрге тӧ бьби хьзмәткʹара һәртʹьм, ԝи чахи хьзмәтийеда ԝе гәләк дәред тʹәзә у һʹәԝас бәр тә вәбьн. w23.12 22 ¶16-17

Тәнгасийа мәзьн незик дьбә, ләма жи гәләк фәрз ә кӧ әм гӧрʹа рʹебәрийа дәрһәԛа бәлакьрьна мьзгинийе бькьн. Ле һәрге әм бона проблемед материали бәр хԝә дькʹәвьн йан жи бона шьхӧле бәлакьрьна мьзгине рʹасти пәйкʹәтьна тен, дьбәкә нә һеса йә, кӧ әм дина хԝә бьдьнә хьзмәтийе. Ле чь дькарә али мә бькә, ԝәки әм пешийа һәр тьшти дина хԝә бьдьнә шьхӧле Йаһоԝа. Ԛә бир нәкә кӧ «Хӧдане Кариндар» тʹәви мәйә. Һәрге әм шьхӧле Пʹадшатийе жийина хԝәда дайньн сәр щийе пешьн, Йаһоԝа ԝе али мә бькә. Ләма жи әм гәрәке тʹӧ тьшти нәтьрсьн (Һагай 2:4). Йаһоԝа дьхԝазә, ԝәки әм дина хԝә бьдьнә шьхӧле хьзмәтийе йа кӧ дькарә әʹмьре мәрьва хьлаз кә. Һагай хьзмәткʹаред Йаһоԝа һелан дькьрьн кӧ тʹәзәда пʹарьстгәһа Хԝәде ава кьн. Йаһоԝа соз да ԝәки әԝе ԝана кʹәрәм кә (Һагай 2:18, 19). Бәле, һәрге әм бәри һәр тьшти дина хԝә бьдьнә шьхӧле кӧ Йаһоԝа дайә мә, әԝе хирәта мә кʹәрәм кә. w23.11 16 ¶8; 17 ¶11

Гава Паԝлосе шанди Рʹомайарʹа нәʹмә ньвиси, әԝи гот кӧ һʹәму мәрьв гӧнәкʹар ьн. Ле һәрге ӧса йә, мәрьв чаԝа дькарә чʹәʹве Хԝәдеда рʹаст йан жи бесущ бе һʹәсабе? Гәло мәрьв чаԝа дькарә ԛәбулкьрьна Хԝәде ԛазанщ кә? Паԝлос мәсәла Бьраһим да хәбате, ԝәки щаба ве пьрсе зәлал кә. Гава Бьраһим ԝәлате Кәнанеда бу, чьрʹа Йаһоԝа әԝ ча йәки рʹаст нав кьр? Гәло мәʹни әԝ бу кӧ Бьраһим гӧрʹа Ԛануна Мусада бу? Һәмьки на! (Рʹомайи 4:13) Чахе Хԝәде гот кӧ Бьраһим йәки рʹаст ә, һьнге Ԛануна Муса һе тʹӧнә бу. Әв Ԛанун паши 400 сали зедәтьр дәркʹәт. Ле чьрʹа Хԝәде әԝ ча йәки рʹаст һʹәсаб кьр? Йаһоԝа ԛәнщийа хԝә ԝирʹа да кʹьфше у жь бо баԝәрийа ԝи әԝ ча мәрьвәки рʹаст нав кьр (Рʹомайи 4:2-4). w23.12 3 ¶4-5

Һәма «ԝе шәве» гава Натʹан әв йәк готә Даԝьд Пʹадша, Йаһоԝа Натʹанрʹа гот, ԝәки Даԝьд ԝе пʹарьстгәһе ава нәкә (1 Дирок 17:3, 4, 11, 12). Чахе Даԝьд әв йәк бьһист, әԝи чь кьр? Әԝи пʹәрә у гәләк тьштед дьн һазьр кьр, ԝәки кӧрʹе ԝи Сьлеман авакьрьне дәстпекә (1 Дирок 29:1-5). Чахе Йаһоԝа готә Даԝьд кӧ әԝе пʹарьстгәһе ава нәкә, һьнге Әԝи пәйманәк тʹәви ԝи гьреда. Йаһоԝа соз да Даԝьд, кӧ йәк жь зӧрʹәта ԝи, ԝе һʹәта-һʹәтайе сәрԝертийе бькә (2 Самуйел 7:16). Дьнйа тʹәзәда ԝәʹде Сәрԝертийа Исайә Һʹәзарсали, гава Даԝьд пебьһʹәсә кӧ Иса Мәсиһ пʹадше жь зӧрʹәта ԝи йә, әԝе гәләки ша бә! Әм жь сәрһатийа Даԝьд һин дьбьн, кӧ һәрге әм нькарьбьн ль гора хԝәстьна дьле хԝә Йаһоԝарʹа хьзмәт кьн, әԝ дькарә шьхӧләки дьн бьдә мә у кʹәрәмед мәзьн сәр мәда бьбаринә. w23.04 16 ¶8-10

Гава тьрс дькʹәвә дьле мә, ԝи чахи һьнә рʹезед Кʹьтеба Пироз дькарьн дьле мә рʹьһʹәт кьн. Мәсәлә, кʹьтеба Ибо, Зәбур у Мәтʹәлок, йан жи гьлийед Иса, йед кӧ кʹьтеба Мәтта сәре 6-да һатьнә дайине, дькарьн мә бьшьдиньн. Чьԛас әм Йаһоԝарʹа дӧа бькьн у Хәбәра ԝи бьхуньн, һаԛас әме бәрдьлийе жь Ԝи бьстиньн. Әм гәрәке баԝәр бьн, кӧ рʹожед гьран у чәтьнда Йаһоԝа ԝе кʹеләка мә бә. Әԝе тʹӧ щар мә тʹәне нәһелә (Зәбур 23:4). Йаһоԝа соз дайә, кӧ әԝе мә ԛәԝи кә, али мә бькә у дьле мә рʹьһʹәт кә. Бәле, Йаһоԝа кәсед кӧ хԝә дьсперьн ԝи, дьпʹарезә у рʹьһʹәтийа дьл дьдә ԝан (Ишайа 26:3). Ләма жи, итʹбарийа хԝә Йаһоԝа бинә у аликʹарийа ԝи ԛәбул кә. Һәрге тӧ ӧса бьки, тӧйе ԝәʹде чәтьнда ԛәԝате бьстини кӧ рʹаби сәр пʹийа! w24.01 25 ¶16-17

Әв гьлийед жь бина бәр Хԝәде, йа жь рʹеза рʹоже иро тенә сери. Кʹьтеба Пирозда ӧса жи те готьне: «Ԝе һʹәму лаԝед тә алийе Хӧданва һатьбьн һинкьрьне у ԝе сьламәта лаԝед тә зәʹф бә. Тӧйе бь рʹастийе бьзәхм [ԛәԝи би]; . . . тӧйе нәтьрси у тӧйе дури безарбуне би [саԝе нәкʹәвә сәр тә], чьмки ԝе незики тә нәбә» (Ишайа 54:13, 14). Әв гьли бона һена мә нә жи. Мире-щьна, «хԝәдайе ве дьнйайе» жи, нькарә шьхӧле һинкьрьне, йе кӧ Шәʹдед Йаһоԝа дькьн, бьдә сәкьнандьне (2 Корьнтʹи 4:4, ИМ). Һʹәбандьна тʹәмьз һатийә вәгәрʹандьне, у әԝе тʹӧ щар диса хьраб нәбә. Әԝе һʹәта-һʹәтайе бьминә. Тʹӧ чʹәке кӧ мьԛабьли мә те чекьрьне, ԝе сәр нәкʹәвә! w24.02 4 ¶10

Сонда тʹәсмилбуйина мә Йаһоԝарʹа, бона мә гәләк фәрз ә. Әв сонд сәр сафикьрьн у рʹабун-рʹуньштьна мә малбәтеда жи, һʹӧкӧм дькә. Әм һәмьки щабдарийед хԝәйә малбәте, кӧ ль гора Кʹьтеба Пироз ьн, бь дьл у щан тиньн сери, ле әм тʹӧ щар хԝәстьнед нәфәред хԝә сәр дәʹԝакьрьнед Йаһоԝарʹа нагьрьн (Мәтта 10:35, 36; 1 Тимотʹейо 5:8). Ләма жи щарна лазьм ә кӧ әм сафикьрьнед ӧса бькьн, кʹижан кӧ дьбәкә мәрьвед мә хԝәш нәйен, ле дьле Йаһоԝа ша дькьн. Малбәта пешьн Йаһоԝа саз кьрьбу, у әԝ дьхԝазә малбәта мә бәхтәԝар бә (Әфәси 3:14, 15). Һәрге әм бь рʹасти дьхԝазьн бәхтәԝар бьн, әм гәрәке ван тьшта бькьн, чь кӧ Йаһоԝа дьхԝазә әм бькьн. Ләма гава тӧ бона малбәта хԝә хәм дьки у һьндава ԝанда бь һʹәзкьрьн у ԛәдьр и, дӧдьли нәбә ԝәки Йаһоԝа ԛимәт дькә ԛӧрбанед тә, кӧ тӧ дьки, ԝәки ԝирʹа хьзмәт ки (Рʹомайи 12:10). w24.02 18 ¶11, 13