Адар

Һәмьки дьнйа тʹәзә һе нәһатийә. Ле ԝәрә әм бьфькьрьн ԝәки иро гәләк тьшт һәнә, кʹижан кӧ бәре тʹӧнә бун, мәсәлә стәйрк, бах, һʹәйԝан у ӧса жи мәрьв. Ле иро тʹӧ кәс ԝан тьштада дӧдьли набә. Иро әԝ һʹәму тьшт һәнә, чьмки Йаһоԝа әԝ әʹфьрандьнә (Дәстпебун 1:1, 26, 27). Бир нәкә, нета Хԝәде әԝ ә, кӧ созе хԝә дәрһәԛа дьнйа тʹәзә бинә сери у әԝ ԝе әʹсәйи ве йәке бькә! Дьнйа тʹәзәда, әме сьһʹәт-ԛәԝат бьн у һʹәта-һʹәтайе бьжин. Әм дькарьн сәд сәләфи баԝәр бьн, ԝәки рʹожа Хԝәде ԝе бе. Чаԝа кӧ иро әʹрд у әʹзман һәйә, дьнйа тʹәзә жи ԝе һәбә (Ишайа 65:17; Әʹйанти 21:3, 4). Һʹәта кӧ дьнйа тʹәзә бе, чь жь дәсте тә те бькә, ԝәки баԝәрийа хԝә дьһа ԛәԝи ки. Тʹьме бона ԛӧрбана Иса рʹази бә у дәрһәԛа ԛәԝата Йаһоԝа бьфькьрә. Һәр тьшти бькә, ԝәки дьһа незики Йаһоԝа би. Һәрге тӧ ӧса бьки, тӧйе жи нава ԝанда би, «йед кӧ бь баԝәрийе у сәбьре созед Хԝәде ԝар дьбун» (Ибрани 6:11, 12). w23.04 31 ¶18-19

Паше Иса дина хԝә да әʹзмен у бәр һʹәмуйа дӧа кьр. Әԝи дьхԝәст бона ве йәке рʹумәте бьдә Йаһоԝа. Паше Иса бь дәнге бьльнд гот: «Лазар, дәркʹәвә!» (Йуһʹәнна 11:43). У Лазар жь тʹьрбе дәркʹәт! Иса кʹәрәмәтәкә ӧса кьр, кʹижан кӧ бона мәрьва тьштәки нәбуйи бу. Әв сәрһати баԝәрийа мә һьндава рʹабуна мьрийа дьһа ԛәԝи дькә. Гәло чаԝа? Иса Мәртʹайерʹа гот: «Бьре тәйе жь мьрьне рʹабә» (Йуһʹәнна 11:23). Иса мина Баве хԝә, һьм дьхԝазә һьм жи дькарә ви созе хԝә бинә сери. Жь һесьред ԝи те кʹьфше, кӧ әԝ бь дьл у щан дьхԝазә мьрьне у еша дьла жь бо дәрде мьрьне, бь тʹәмами бьдә һьлдане. Чахе Лазар жь тʹьрбе дәркʹәт, щарәке жи һатә избаткьрьне, кӧ ԛәԝата Иса һәйә ԝәки мьрийа вәгәрʹинә жийине, у ӧса жи гьлийед кӧ Иса Мәртʹайерʹа готьбу, жь рʹеза рʹоже баԝәрийа мә ԛәԝи дькьн. Гәләк мәʹни һәнә, кӧ әм баԝәрийа хԝә созе Йаһоԝа биньн, дәрһәԛа рʹабуна мьрийа. w23.04 11-12 ¶15-16

Гәрәке әм бир нәкьн, ԝәки Йаһоԝа ԝе нета хԝә ԝәхтда бинә сери. Нета ԝи әв ә, кӧ һʹәму проблема бьдә һьлдане, жь бо чь жи әм кӧл-дәрда дькʹьшиньн, мәсәлә тʹәшԛәлед тʹәбийәте, нәхԝәши у мьрьне. Йаһоԝа ԝе нета хԝә бь сайа Пʹадшатийа хԝә бинә сери (Данийел 2:44; Әʹйанти 21:3, 4). Ле һʹәта һьнге, Йаһоԝа дьһелә кӧ Мире-щьна сәрԝертийа ве дьнйайе бькә (Йуһʹәнна 12:31; Әʹйанти 12:9). Һәрге Йаһоԝа проблемед дьнйайе ньһа бьдә һьлдане, ԝе ӧса бе кʹьфше, кӧ бьн сәрԝертийа Мире-щьнада һәр тьшт баш ә. Рʹаст ә, әм һивийе нә кӧ созед Йаһоԝа Хԝәде бенә сери, ле әԝ мә бе аликʹари наһелә, әԝе бе һәԝара мә. w23.05 8 ¶4; 9-10 ¶7-8

Әм ча дькарьн али кәсед дьн бькьн, кӧ әԝана жи кʹаре жь Евара Биранине бьстиньн? Бәри пешьн әм гәрәке ԝана тʹәглиф кьн. Һәмьки әм ԝан мәрьва гази сәр Биранине дькьн, рʹасти кʹижана кӧ хьзмәтийеда тен. Ле хенщи ԝан, ԝе баш бә кӧ әм насед хԝә жи гази сәр Биранине бькьн, мәсәлә щинар у мәрьвед хԝә, һәвалхәбатчи у һәвалдәрсханед хԝә у кәсед дьн. Ԝе баш бә, әм ве йәке хԝәрʹа бьньвисьн. Һәрге бәлгед тʹәглифкьрьне йед нәшьркьри тʹера мә накьн, әм дькарьн линка ве тʹәглифкьрьне мәрьварʹа бьшиньн. Дьбәкә әм гәләк әʹщебмайи бьминьн, кӧ чьԛас мәрьв ԝе бьхԝазьн бенә сәр Евара Биранине! (Ԝаиз 11:6) Дьбәкә пьрсед кәсед кӧ әм тʹәглифи сәр Биранине дькьн, һәбьн, илаһи һәрге әԝана щара пешьн тенә сәр щьвинәкә мә. Ԝәрә әм пешда бьфькьрьн, кӧ әԝана дькарьн чь бьпьрсьн у хԝә ль гора ве йәке һазьр кьн. Һәла һе паше ве йәке гава мәрьв те сәр Евара Биранине, щәм ԝи гәләк пьрс дькарьн пешда бен. Ԝәрә әм чь жь дәсте мә те, бькьн, кӧ али ԝан мәрьва бькьн, дьле кʹижана бона жийина һʹәта-һʹәтайе һазьр ә, ԝәки әԝана жи жь Евара Биранина Мьрьна Иса кʹаре бьстиньн (Кʹаред Шандийа 13:48). w24.01 12 ¶13, 15; 13 ¶16

Кʹьтеба Пироз бәʹса һʹәйшт мәрьва дькә, йед кӧ жь мьрьне һатьбун рʹакьрьне. Ван һәр сәрһатийа кʹур лекʹолин кә. Бьфькьрә, тӧ жь ԝан чь дькари һин би. Жь хԝә бьпьрсә: Һәр сәрһати чаԝа нишан дькә, кӧ хԝәстьн у ԛәԝата Хԝәде һәйә, ԝәки кәсед мьри вәгәрʹинә жийине. У дәрһәԛа сахкьрьна Иса кʹур бьфькьрә, кʹижан кӧ һәрә фәрз бу. Бь сәда мәрьв бунә шәʹдә, кӧ Иса жь мьрьне һатә рʹакьрьне, у әв йәк буйә һʹиме баԝәрийа мә (1 Корьнтʹи 15:3-6, 20-22). Әм бона созе Йаһоԝайә дәрһәԛа рʹабуна мьрийа гәләки шекьрдар ьн! Әм баԝәр дькьн кӧ әԝе созе хԝә бинә сери, чьмки һьм хԝәстьн у һьм жи ԛәԝата ԝи һәйә. Әм ньһада, бь дьл у щан дьхԝазьн баԝәрийа хԝә һьндава рʹабуна мьрийа дьһа ԛәԝи кьн. Ӧса әме дьһа незики Хԝәде бьн, йе кӧ әв созе хԝәш дайә мә, ‹Мәрьве тәйе жь мьрьне рʹабә› (Йуһʹәнна 11:23). w23.04 8 ¶2; 12 ¶17; 13 ¶20

Мәʹна хәбәред «шкәсти» у «мьлукти» йәкә. Һәрге әм шкәсти бьн, әме бь зедәйи дәрһәԛа хԝә нәфькьрьн у фәʹм кьн кӧ һәнә тьшт, чь кӧ ԛәԝата мә нагьһиже бькьн. Һәрге әм мьлук бьн, әме мәрьвед дьн сәр хԝәрʹа бьгьрьн (Филипи 2:3). Бь әʹсьле хԝә, мәрьве шкәсти мьлук ә жи. Гидәон йәки шкәсти у мьлук бу. Гава мәләке Йаһоԝа Гидәонрʹа гот кӧ әԝе щьмәʹта Исраеле жь Мьдйана хьлаз кә, әԝи гот: «Малбәта мьн ль Манашше, йед һәри хьзан ьн [нә әʹйан ьн] у әз мала баве хԝәда йе һәри бьчʹук ьм» (Һʹакьмти 6:15). Әԝ дьфькьри кӧ әԝ кери ве щабдарийе найе, ле Йаһоԝа ӧса нәдьфькьри. Бь аликʹарийа Йаһоԝа, Гидәон щабдарийа хԝәда сәркʹәти бу. Рʹуспи чь жь дәсте ԝан те дькьн, ԝәки шкәсти у мьлук бьн (Кʹаред Шандийа 20:18, 19). Әԝана бона фәрәсәт у щабдарийед хԝә пʹайе хԝә надьн. У жь бо ԛьсур у кемасийед хԝә, нафькьрьн кӧ әԝана беԛимәт ьн. w23.06 3 ¶4-5

Һәла һе һʹәзар сал зедәтьр майә, ԝәки сәре Мире-щьна бе һʹьнщьрʹандьне (Әʹйанти 20:7-10). Ле һʹәта кӧ әв йәк бьԛәԝьмә, Кʹьтеба Пирозда те готьне, кӧ һьнә тьшт ԝе бьԛәԝьмьн. Йа пешьн, сәрԝеред дьнйайе ԝе әʹлам кьн: «Дьне сәԛьрʹи у бехофи йә»! (1 Тʹесалоники 5:2, 3) Ньшкева, коалисйа мьләта ԝе һʹьщуми сәр религийед ԛәлп бькә у тәнгасийа мәзьн ԝе дәстпебә (Әʹйанти 17:16). Паши ве йәке, Иса Мәсиһ ԝе диԝана мәрьва бькә у пәза жь бьзьна вәԛәтинә (Мәтта 25:31-33, 46). Ԝе дәме, Мире-щьна ԝе мьԛабьли Йаһоԝа дәре. Әԝ хьзмәткʹаред Йаһоԝа нәфрʹәт дькә, ләма жи әԝе сәр коалисйа мьләта һʹӧкӧм кә, кʹижан кӧ Кʹьтеба Пироз нав дькә ча Гог жь ԝәлате Магоге, кӧ әԝ һʹьщуми сәр һʹәбандьна рʹаст бькә (Һәзәԛел 38:2, 10, 11). Ԝәхта рʹастда, кәсед бьжарти кӧ сәр әʹрде манә, ԝе һәрʹьн сәр әʹзмана, ԝәки тʹәви Мәсиһ у ордийа ԝи шәрʹе Һармәгәдонеда кʹар бькьн. Бь ве йәке тәнгасийа мәзьн ԝе кʹӧта бә (Мәтта 24:31; Әʹйанти 16:14, 16). Паше, Сәрԝертийа Мәсиһә Һʹәзарсали ԝе дәстпебә (Әʹйанти 20:6). w23.10 20-21 ¶9-10

Иро гәләк хьзмәткʹаред Йаһоԝа ԝан ԝәлатада дьжин, кʹидәре кӧ шьхӧле мә ԛәдәхәкьри йә. Рʹаст ә әԝана ԛәдьре дәԝләте дьгьрьн, ле мина Обадйа, әԝ хушк-бьред ԛимәт диса жи бәрдәԝам дькьн Йаһоԝарʹа хьзмәт кьн у ԝирʹа амьн бьминьн (Мәтта 22:21). Әԝана тьрса бәр Хԝәде бь ве йәке дьдьнә кʹьфше, кӧ гӧрʹа Хԝәде дькьн, нә кӧ гӧрʹа мәрьва (Кʹаред Шандийа 5:29). Ләма жи әԝана бәрдәԝам дькьн мьзгинийе бәла кьн у дьзикава щьвинед хԝә тʹәвайи дәрбаз дькьн (Мәтта 10:16, 28). Әԝана хәм дькьн, кӧ һʹәму хушк-бьра хԝарьна рʹӧһʹани бьстиньн. Ԝәрә әм дина хԝә бьдьнә мәсәла бьре мә Һенри, йе кӧ ԝәлатәки Африкайеда дьжи. Ԝедәре шьхӧле мә ԝәʹдәки һатьбу ԛәдәхәкьрьне. Ԝи чахи Һенри дьхԝәст әʹдәбйәтед мә хушк-бьрарʹа бьвә. Әԝи ньвиси: «Бь әʹсьле хԝә, әз йәки шәрмокә мә. Ле Йаһоԝа мерхасийа кӧ мьнрʹа лазьм бу да мьн». Һәрге тьрса бәр Хԝәде дьле тәда һәбә, тӧ жи дькари мина Һенри мерхас би! w23.06 16 ¶9, 11

Чахе Адәм у Һеԝа мьԛабьли Хԝәде рʹабун, дьԛәԝьмә ӧса һатә кʹьфше, кӧ Мире-щьна рʹийа Хԝәде гьрт, ԝәки ԛьрара Ԝи һьндава мәрьва у әʹрде нәйе сери. Дьбәкә Мире-щьна дьфькьри кӧ Йаһоԝа нькарә хԝәйе созе хԝә бә. Дьԛәԝьмә әԝ дьфькьри кӧ Хԝәде ԝе бона пеканина ԛьрара хԝә Адәм у Һеԝайе бьдә кӧштьне у дәԝса ԝан, жьн у мерәки беԛьсур бьәʹфьринә. Ле һәрге Хԝәде ӧса бькьра, Мире-щьна ԝе бьгота кӧ Хԝәде дәрәԝа дькә. Гәло чьма? Чьмки ль гора Дәстпебун 1:28, Йаһоԝа готьбу Адәм у Һеԝайе, ԝәки дьнйа ԝе бь зӧрʹәта ԝан тʹьжә бә. Дьбәкә Мире-щьна ӧса жи дьфькьри, кӧ Йаһоԝа ԝе бьһелә ԝәки Адәм у Һеԝа зарʹед ԛьсурдар биньн дьнйайе, йед кӧ ԝе ԛәт нәгьһиштана беԛьсуртийе (Ԝаиз 7:20; Рʹомайи 3:23). Бе шьк, ве дәрәщеда Мире-щьна ԝе бьгота, кӧ Йаһоԝа хԝәйе созе хԝә нинә. Гәло чьрʹа? Чьмки дьнйа ԝе бь мәрьвед кʹамьл тʹьжә нәбуйа. У бь ве йәке, ԛьрара Хԝәде йа әʹсьли ԝе нәһата сери. w23.11 6 ¶15-16

Йаһоԝа бь сайа Хәбәра хԝә у тʹәшкиләта хԝә, рʹебәрийа зәлал дьдә мә. Нә жи лазьм ә кӧ әм тьштәки сәрда зедә кьн (Мәтʹәлок 3:5-7). Ләма жи әм жь тьштед кӧ Кʹьтеба Пирозда һатьнә ньвисаре, дәрнакʹәвьн у ль гора ньһерʹандьна хԝәйә шәхси ԛәйда данайньн. Мире-щьна дьхԝазә мәрьва бь информасийа «дәрәԝә пʹучʹ» у «әʹдәтед мәрьва у сьхьред ве дьнйайе» бьхапинә у жь рʹе дәрхә (Колоси 2:8). Ԛьрʹна йәкеда, Мире-щьна мәрьва бь сайа щурʹә-щурʹә тьшта дьхапанд. Мәсәлә, бь сайа философийа, һинкьрьнед Щьһуйа йед нә ль гора Кʹьтеба Пироз, у бь сайа ве йәке, кӧ хьзмәткʹаред Хԝәде гәрәке бәрдәԝам кьн ль гора Ԛануна Муса бьжин. Мире-щьна дьхԝәст мәрьва жь Канийа биланийа рʹаст, демәк жь Йаһоԝа дур хә. Иро Мире-щьна бь сайа телевизийоне у интернете, информасийа ԛәлп у нучәйед нәрʹаст бәла дькә, йед кӧ щарна жь алийе сәрԝеред политики тен. w23.07 16 ¶11-12

Йаһоԝа пьрса мьԛабьлибуна Мире-щьна у мәрьвед пешьн, гәләк баш сафи кьр. Мире-щьна нә жи дькарьбу бьфькьрийа, кӧ Йаһоԝа чь дькарә бькә. Йаһоԝа һишт кӧ Адәм у Һеԝайерʹа зарʹ бьбьн. У чьмки Йаһоԝа дәрәԝа накә, гьлийед ԝи рʹаст һатьнә сери. Йаһоԝа избат кьр, кӧ әԝ һәр тьштида рʹаст у сәрфьраз ә. Әԝ баԝәр бу кӧ созе ԝи ԝе бе сери у соз да ԝәки әԝе бь сайа кʹьрʹине, жь зӧрʹәта Адәм у Һеԝайе кәсед гӧһдар хьлаз кә (Дәстпебун 3:15; 22:18). Мире-щьна әв йәк ԛәт һьлнәда һʹәсаб! Гәло чьрʹа? Чьмки Йаһоԝа жь һʹәзкьрьна мәзьн, Иса ча ԛӧрбан бона мә бәрва да (Мәтта 20:28; Йуһʹәнна 3:16). Әв һʹӧнӧр бал Мире-щьна тʹӧнә йә, әԝ тʹәне хԝә һʹәз дькә. Демәк, бь сайа кʹьрʹина Иса Мәсиһ чь мәщал ԝе вәбьн? Хьлазийа Сәрԝертийа Һʹәзарсали йа Мәсиһ, чаԝа кӧ Йаһоԝа бәреда ԛьрар кьрьбу, щьнәтеда сәр әʹрде ԝе мәрьвед кʹамьл у гӧһдар бьжин. w23.11 6 ¶17

Әм гӧһ дьдьнә ԛануна Йаһоԝа һьндава пирозийа әʹмьр у хуне. Гәло чьрʹа? Чьмки Йаһоԝа дьбежә ԝәки хун те һʹәсабе әʹмьр, демәк пʹешкʹешәкә гәләк ԛимәт, кʹижан кӧ әԝи дайә мә (Ԛануна Кʹаһинтийе 17:14). Гава Йаһоԝа изьн да ԝәки мәрьв гоште һʹәйԝана бьхԝьн, әԝи тʹәми да ԝан ԝәки хунева нәхԝьн (Дәстпебун 9:4). Чахе әԝи Ԛануна Муса да Исраелийа, әԝи әв тʹәми щарәке жи ԝанрʹа да (Ԛануна Кʹаһинтийе 17:10). У ԛьрʹна йәкеда, Йаһоԝа бь сайа кʹома рʹебәрийе гот, кӧ бьра һʹәму хьзмәткʹаред ԝи дури хуне бьн (Кʹаред Шандийа 15:28, 29). Гава әм бона сьһʹәт-ԛәԝата хԝә сафикьрьнәке дькьн, әм бь һазьрбуне гӧһ дьдьнә ве тʹәмийе. Әм ӧса жи бь хирәт ль гора ԛанунед Йаһоԝайә дәрһәԛа нав-намусийе дьжин. Паԝлосе шанди ширәт дайә мә, кӧ әм хԝәстьнед бәдәнейә нәрʹаст «бькӧжьн». Демәк, әм гәрәке чь жь дәсте мә те бькьн, ԝәки хԝә дури тьштед бенамус бьгьрьн. Әм ԝан тьшта, чь кӧ дькарә бәрбь бенамусийе бьвә, нә дькьн, нә жи дьньһерʹьн (Колоси 3:5; Ибо 31:1). w23.07 15 ¶5-6

Дьԛәԝьмә Шьмшон ӧса сәр Дәлилайе бәнги бу кӧ тедәрнәдьхьст, ԝәки нета ԝе хьраб ә. Дәлилайе гәләк щар зоре ԝи дькьр, ԝәки әԝ жерʹа бежә, кӧ мәʹнийа ԛәԝата ԝи чьда йә. Ахьрийеда әԝи сьрʹа хԝә жерʹа вәкьр у гот кӧ мәʹнийа ԛәԝата ԝи чь йә. Сәд һʹәйф, шашийа Шьмшон бу сәбәб, кӧ әԝи сәр ԝәʹдәки ԛәԝата хԝә у ԛәбулкьрьна Хԝәде ӧнда кьр (Һʹакьмти 16:16-20). Шьмшон дьһа зедә итʹбарийа хԝә Дәлилайе ани, нә кӧ Йаһоԝа. Ахьрийеда жь бо ве йәке, әԝи гәләк еш кʹьшанд. Фьльстийа әԝ гьрт у чʹәʹвед ԝи кор кьрьн. Ԝана әԝ бьрә Газайе у авитьнә кәле, кʹидәре кӧ әԝи дәргәһед бажер рʹакьрьбу. Ԝедәре әԝи мина хӧламәки гәньм дьһера. Паше, Фьльсти бона щәжьне тʹоп бун. Ԝана хӧдане хԝә Дагонрʹа ԛӧрбанәкә мәзьн ани, чьмки ԝана баԝәр дькьр, ԝәки әԝи Шьмшон дайә дәсте ԝан. Ԝана Шьмшон жь кәле дәрхьст у бьрьнә ԝедәре кʹидәре кӧ кʹеф дькьрьн, ԝәки ԛәрфед хԝә ԝи бькьн у «кʹефхԝәш» бьн (Һʹакьмти 16:21-25). w23.09 5-6 ¶13-14

Дьбәкә һәвалхәбатчи йан һәвалдәрсханәк жь мә бьпьрсә, кӧ чьрʹа әм гӧһ дьдьнә ԛанун у принсипед Кʹьтеба Пироз. Һәмьки, әме баԝәрийа хԝә бьпʹарезьн, ле йәкә әме ԛәдьре ньһерʹандьна кәсед дьн жи бьгьрьн (1 Пәтрус 3:15). Фәрз әԝ ә, кӧ әм пьрсед ӧса инкʹар нәкьн, ле мәщале бьвиньн, ԝәки нета ԝи фәʹм бькьн. Мәʹнийа пьрса ԝи чь бә жи, йәкә әм гәрәке бь нәрми щаба ԝи бьдьн. Щабед мә дькарьн сәр ԝи һʹӧкӧм кьн, ԝәки әԝ сәр ньһерʹандьна хԝә бьфькьрә. Һәрге һәвалхәбатчи жь мә бьпьрсә, кӧ әм чьрʹа рʹожа буйине дәрбаз накьн, әм дькарьн дина хԝә бьдьнә ԝан тьшта: Дьԛәԝьмә әԝ дьфькьрә кӧ изьна мә ԛә тʹӧнә кʹеф кьн. Һәрге әм нета пьрса ԝи фәʹм кьн, ԝе мәрʹа дьһа һеса бә щаба ԝи бьдьн. Мәсәлә, әм дькарьн пʹайе ԝи бьдьн, кӧ әԝ дьхԝазә ԝәки сәр хәбате һәләԛәтийа ортʹа хәбатчийа тʹьме баш бә. Бь сайа ве йәке дьԛәԝьмә мәщала хәбәрдана баш вәбә у әме бькарьбьн зәлал ԝирʹа шьровәкьн, кӧ Кʹьтеба Пироз дәрһәԛа дәрбазкьрьна рʹожа буйине чь дьбежә. w23.09 17 ¶10-11

Бь рʹасти жи ԛәдьрәки чьԛас мәзьн ә, кӧ әм дькарьн әԝ ԝәʹде кӧ майә, мьзгинийе сәр тʹәмамийа дьнйайе бәла кьн. Пәтрусе шанди мә һелан дькә, ԝәки әм «һивийа Рʹожа Хԝәде бьн» (2 Пәтрус 3:11, 12). Әм чаԝа дькарьн ве йәке бькьн? Һәр рʹож дьнйа тʹәзә бьдьнә бәр чʹәʹве хԝә у дәрһәԛа созед Хԝәде кʹур бьфькьрьн. Бьдьнә бәр чʹәʹве хԝә, кӧ әм һәԝа тʹәмьз дькʹьшиньн, хԝарьна тʹәмьз дьхԝьн у сьлавәкә ширьн дьдьнә мәрьвед хԝә, йед кӧ жь мьрьне һатьнә сахкьрьне. Ӧса жи бьдьнә бәр чʹәʹве хԝә ԝан мәрьва, йед кӧ гәләк ԝәхт пешда дьжитьн, у әм ԝана дәрһәԛа пʹехәмбәртийед Кʹьтеба Пироз һин дькьн. Һәрге әм тьштед ӧса бьдьнә бәр чʹәʹве хԝә, әԝ йәк ԝе али мә бькә кӧ әм һивийа рʹожа Хԝәде бьн у баԝәр бьн, кӧ дьнйа тʹәзә незик ә. Әм заньн чь һивийа мә йә. Ләма жи әм гәрәке «һаш жь хԝә һәбьн», сәва кӧ бь һинкьрьнед ԛәлп нәйенә хапандьне. w23.09 27 ¶5-6

Иро дор-бәре щаһьла гәләк щаһьлед ӧса һәнә, йед кӧ «нә гӧрʹа де-бавада» ньн (2 Тимотʹейо 3:1, 2). Гәло чьрʹа? Әԝана дьфькьрьн, ԝәки де-бав тьштед кӧ хԝәха накьн, жь ԝана дәʹԝа дькьн. Һьнәк жи дьфькьрьн кӧ ширәтед де-баве ԝан ида керһати ниньн, чьмки дьнйа һатийә гӧһастьне, йан жи дьфькьрьн кӧ ширәтед ԝана гәләк сәрт ьн. Һәрге тӧ щаһьл и, гәло тӧ жи ӧса дьфькьри? Дьԛәԝьмә щаһьларʹа һеса нинә гӧһ бьдьнә ве тʹәмийа Йаһоԝа жь рʹеза рʹоже. Ле чь дькарә али тә бькә, ԝәки гӧһ бьди де-баве хԝә? Тӧ дькари жь Иса, демәк жь мәсәла һәри баш, дәрһәԛа гӧһдарибуне һин би (1 Пәтрус 2:21-24). Әԝ йәки беԛьсур бу, ле де-баве ԝи мәрьвнә ԛьсурдар бун. Щара ԝана Иса нәрʹаст фәʹм дькьр, йан жи шаши бәрʹдьдан, ле диса жи әԝи ԛәдьре ԝан дьгьрт (Дәркʹәтьн 20:12). w23.10 7 ¶4-5

Паԝлосе шанди шьровәкьр, ԝәки ԛӧрбанед ль гора Ԛануне, нькарьн гӧнә бь тʹәмами бьдьнә һьлдане. Ләма жи, һʹӧкӧме ве Ԛануне «һатә бәталкьрьне». Паше, Паԝлос чәнд рʹастийед кʹур ԝана һин кьр. Әԝи ани бира ԝан, ԝәки Хԝәде «гӧманәкә һе ԛәнщ» дайә ԝан, демәк ԝана дькарьбу сәр һʹиме ԛӧрбанкьрьна Иса Мәсиһ бь рʹасти «незики Хԝәде» бьн (Ибрани 7:19). Паԝлос Мәсиһийед Ибранирʹа зәлал кьр, кӧ чьрʹа һʹәбандьна ԝанә Мәсиһити жь һʹәбандьна ԝанә бәре четьр бу. Һʹәбандьна дине Щьһуйа ль гора Ԛануне, тʹәне «сийа ԝан тьшта нә, йед кӧ ԝе бен, ле рʹасти Мәсиһ ә» (Колоси 2:17). Си тьштәки реали нинә, әв тʹәне форма тьшта дьдә кʹьфше. Һәма бь ԝи щурʹәйи һʹәбандьна Щьһуйа тʹәне сийа һʹәбандьна рʹаст бу. Сәва кӧ Хԝәде һʹәбандьна мә ԛәбул кә, әм гәрәке фәʹм бькьн, кӧ әԝ сәр һʹиме чь гӧнед мә дьбахшинә. w23.10 25 ¶4-5

Кʹьтеба Данийел сәре 11 бәʹса дӧ пʹадшед политикийә ԛәԝи дькә, йед кӧ һәвдӧрʹа кʹәтьбунә дәʹԝе. Гава әм ве йәке у гьлийед дьн жь Кʹьтеба Пироз бәрамбәри һәв дькьн, әм дькарьн тедәрхьн кӧ пʹадше бакӧре, әв һәйә Русйа у пьштгьред ԝи, ле пʹадше башуре те һʹәсабе Англо-Америка, демәк Империйа Һʹәмдьнйайе. Хьзмәткʹаред Хԝәде, йед кӧ бьн һʹӧкӧме пʹадше бакӧреда дьжин, жь ԝи пʹадшайи рʹасти пәйкʹәтьна тен. Һьнә Шәʹдед Йаһоԝа, жь бо баԝәрийа хԝә һатьнә зерандьне у кʹәтьнә кәле. Ле әв йәк баԝәрийа ԝан нә кӧ сьст кьрийә, ле дьһа ԛәԝи кьрийә. Гәло чьрʹа? Чьмки хушк-бьред мә заньн, ԝәки Данийел пʹехәмбәр пешда готьбу кӧ хьзмәткʹаред Хԝәде ԝе рʹасти пәйкʹәтьна бен (Данийел 11:41). Занәбуна ве йәке гӧмане дьдә мә у али мә дькә Йаһоԝарʹа амьн бьминьн. w23.08 11 ¶15-16

Йаһоԝа мә һʹәз дькә, ләма жи әԝ һәстед мә фәʹм дькә у һазьр ә мә бьпʹарезә. Гава әм хәмгин дьбьн, әԝ жи хәмгин дьбә. Ләма жи әм дькарьн баԝәр бьн, кӧ әԝ мә дьбьһе гава әм дӧада ԝирʹа дьбежьн: «Мина рʹонайийа чʹәʹва Тӧ мьн хԝәй кә» (Зәбур 17:8). Чʹәʹв пʹарәкә бәдәнейә гәләк назьк у ԛимәт ә. Ләма жи, гава Йаһоԝа мә бәрамбәри бибока чʹәʹве хԝә дькә, ча бежи әԝ дьбежә: «Һәр кәсе кӧ хьзмәткʹаред мьн дешинә, зийане дьдә ве йәке, чь кӧ бона мьн гәләк ԛимәт ә». Йаһоԝа дьхԝазә ԝәки әм баԝәр бьн, кӧ әԝ мә һʹәз дькә. Ле әԝ занә ԝәки жь бо щурʹе жийина мәйә бәре, дьԛәԝьмә әм дӧдьли бьн һәла әԝ бь рʹасти мә һʹәз дькә, йан на. Гәло чь дькарә баԝәрийа мә ԛәԝи кә, кӧ әм һʹәзкьрьна Йаһоԝада дӧдьли нәбьн? Дина хԝә бьде, кӧ Йаһоԝа ча һʹәзкьрьна хԝә Исарʹа, кәсед бь рʹӧһʹ бьжартирʹа у мә һʹәмуйарʹа нишан дькә. w24.01 27 ¶6-7

Әзра дьдит кӧ Йаһоԝа ча али хьзмәткʹаред хԝә дькә. Сала 484-да Б.Д.М., Аһашвәрош Пʹадша фәрман да, ԝәки тʹәмамийа Империйа Фарьсада һʹәму Щьһу бенә кӧштьне. Ԝи чахи Әзра Бабилонеда дьжит (Әстәр 3:7, 13-15). Әʹмьре Әзра у һʹәму Щьһуйа, бьн хофеда бу! Һʹәму һәремада, чахе Щьһу әв фәрман бьһистьн, ԝана рʹожи гьрт, шинәкә мәзьн кьрьн у дӧада жь Йаһоԝа аликʹари хԝәстьн (Әстәр 4:3). Кәсед кӧ дьхԝәстьн ԝана бькӧжьн, хԝәха һатьнә кӧштьне. Бьдьнә бәр чʹәʹве хԝә, кӧ Әзра у Щьһуйа чь сәр хԝә тʹәхмин дькьрьн! (Әстәр 9:1, 2) Бе шьк, әве йәке Әзра бона щерʹьбандьнед дьн жи һазьр кьр, рʹасти кʹижана кӧ әԝ паше һат у ӧса жи баԝәрийа ԝи ԛәԝи кьр, кӧ Йаһоԝа дькарә хьзмәткʹаред Хԝә бьпʹарезә. w23.11 17 ¶12-13

Паԝлосе шанди бәʹса пеканина «кьред Ԛануне» дькьр, демәк Ԛануна Муса. Хԝәде әв Ԛанун сәр Чʹийайе Синайе дабу Исраелийа (Рʹомайи 3:21, 28). Ча те кʹьфше, рʹожед Паԝлосда һьнә Мәсиһийед Щьһу баԝәр дькьрьн, ԝәки әԝана гәрәке һәла һе хԝә ль Ԛануна Муса бьгьрьн. Паԝлос пе мәсәла Бьраһим избат кьр, ԝәки сәва кӧ мәрьв рʹаст бе һʹәсабе, һʹәԝщә нинә кӧ әԝ хԝә ль Ԛануна Муса бьгьрә. Ле дәԝсе баԝәри лазьм ә. Гава әм баԝәрийа хԝә Хԝәде у Мәсиһ тиньн, Хԝәде мә ԛәбул дькә. Әв йәк һеланикә мәзьн ә. Алийе дьнва, мәʹна хәбәра «кьред», кʹижан кӧ Аԛуб сәре 2-да те готьне, у «кьред Ԛануне» дәрһәԛа кʹижани Паԝлос дьбежә, нә мина һәв ьн. Аԛуб дина мә дькʹьшинә сәр тьштед кӧ хьзмәткʹаред Хԝәде жийина хԝәйә һәррʹожида дькьн (Аԛуб 2:24). Тьштед ӧса нишан дькьн, һәла әм бь рʹасти баԝәрийа хԝә Хԝәде тиньн йан на. w23.12 3 ¶8; 4-5 ¶10-11

Хушкед кӧ дьхԝазьн мер кьн гәрәке фәсал хԝәрʹа һәвалзәԝащ бьжберьн. Ль сәр ве йәке бьфькьрә: Гава тӧ мер ки, мере тә ԝе бьбә сәре мале (Рʹомайи 7:2; Әфәси 5:33). Ләма жь хԝә бьпьрсә: «Гәло әԝ Мәсиһики рʹӧһʹанида гьһишти йә? Гәло Йаһоԝа жийина ԝида щийе пешьн дьгьрә? Гәло әԝ сафикьрьнед билани дькә? Гәло әԝ шашийед хԝә ԛәбул дькә? Гәло әԝ ԛәдьре жьна дьгьрә? Гәло әԝ дькарә жь алийе рʹӧһʹани у материалида али мьн бькә у мьнрʹа бьбә һәваләки баш?» Бәле, һәрге тӧ бьхԝази һәвалзәԝащәки баш хԝәрʹа бьвини, тӧ гәрәке хԝәха жи йәкә баш би. Кʹӧлфәта баш кʹомәкдара мере хԝә йә (Дәстпебун 2:18). Әԝ Йаһоԝа һʹәз дькә. Ләма жи әԝ бәр кәсед дьн сәр мере хԝә хьраб хәбәр надә, ле пʹайе ԝи дьдә (Мәтʹәлок 31:11, 12; 1 Тимотʹейо 3:11). Сәва кӧ тӧ бона һәвалзәԝаще хԝә бьби кʹӧлфәтәкә баш, ньһада һʹәзкьрьна хԝә һьндава Йаһоԝа мәзьн кә у ӧса жи малбәтеда у щьватеда али кәсед дьн бькә. w23.12 22-23 ¶18-19

Йаһоԝа соз дьдә, кӧ әԝе биланийа хԝә бьдә мә, ԝәки әм сафикьрьнед баш бькьн. Биланийа Хԝәде мәрʹа лазьм ә, илаһи бона сафикьрьнед кӧ сәр тʹәмамийа жийина мә һʹӧкӧм дькьн. Әԝ ӧса жи ԛәԝате дьдә мә, ԝәки әм сәбьр кьн. Чаԝа кӧ Йаһоԝа ԛәԝат дабу Паԝлосе шанди, Әԝе ԛәԝате бьдә мә жи, ԝәки әм һьмбәри тәнгасийед хԝә сәбьр кьн (Филипи 4:13). Мәсәлә, әԝ бь сайа малбәта мәйә рʹӧһʹани али мә дькә. Евара пешийа кӧ Иса әʹмьре хԝә бәрва бьда, әԝи бь дьлшәԝати дӧа кьр. Әԝи жь Йаһоԝа лава дькьр, ԝәки әԝ бәр чʹәʹве мәрьва ча йәки кӧ кʹьфьрийа дькә нәйе һʹәсабе. Дәԝса ве йәке Йаһоԝа бьраки ԝи, демәк мәләкәк шанд, кӧ дьле Иса ԛәԝи кә (Луԛа 22:42, 43). Иро жи Йаһоԝа дькарә бь сайа хушк-бьра, мәсәлә йед кӧ мәрʹа тʹеле дьхьн йан жи сәрики мә дьхьн, али мә бькә. Әм гьшк дькарьн мәщала бьгәрʹьн кӧ һәвдӧ бь «готьнәкә ԛәнщ» ԛәԝи кьн (Мәтʹәлок 12:25). w23.05 10-11 ¶9-11

Чахе кәсед нәактиф тенә сәр Евара Биранине, дьԛәԝьмә әԝана дьтьрсьн йан жи дьфькьрьн, ԝәки һатьна ԝан ԝе хушк-бьра хԝәш нәйе. Ләма жи, ԝәрә әм дьле ԝан бь пьрс йан готьнед хԝә нәешиньн у нәбьн сәбәб кӧ әԝана шәрм бькьн. Бәле, әԝана хушк-бьред мә нә, у әм гәләк рʹази нә, ԝәки әм диса дькарьн сәр Биранине тʹәви ԝан тʹоп бьн (Зәбур 119:176; Кʹаред Шандийа 20:35). Әм шекьрдар ьн кӧ Иса тʹәми дайә мә, ԝәки әм һәр сал Биранина мьрьна ԝи дәрбаз кьн у әм заньн кӧ әв йәк чьрʹа ӧса фәрз ә. Әм фәʹм дькьн, кӧ Евара Биранине һьм бона мә һьм жи бона кәсед дьн чьԛас керһати йә (Ишайа 48:17, 18). Чахе әм дьчьн сәр Евара Биранине, әм Йаһоԝа у Исарʹа рʹазибуна хԝә бона ԛӧрбане дьдьнә кʹьфше, у һʹәзкьрьна мә һьндава ԝан дьһа мәзьн дьбә. Ӧса жи, йәктийа мә тʹәви хушк-бьра дьһа ԛәԝи дьбә. У әм дькарьн али кәсед дьн бькьн, ԝәки әԝана жи жь ԛӧрбане кʹаре бьстиньн. Ләма жи, ԝәрә әм чь жь дәсте мә те бькьн, кӧ бона Биранина исал, демәк бона рʹожа һәрә фәрз йа тʹәмамийа сале, һазьр бьн! w24.01 14 ¶18-19

Гәло Йаһоԝа чаԝа рʹебәрийе мә дькә? Йа пешьн, бь сайа Хәбәра хԝә, Кʹьтеба Пироз. Хенщи ве йәке, әԝ ӧса жи бь сайа мәрьвед кӧ әԝ кʹьфш дькә, рʹебәрийе мә дькә. Мәсәлә, әԝ бь сайа «хӧламе амьн у сәрԝахт», хԝарьна рʹӧһʹани дьдә мә, ԝәки әм бькарьбьн сафикьрьнед баш бькьн (Мәтта 24:45). Йаһоԝа бь сайа меред дьнә кʹьфшкьри жи рʹебәрийа мә дькә. Мәсәлә, бәрпьрсийаред мьһале у рʹуспийед щьвате һелане дьдьнә мә у мә һин дькьн, ԝәки әм бькарьбьн ԝәʹде чәтьнайа Йаһоԝарʹа амьн бьминьн. Әм бона рʹебәрийа кӧ ван рʹожед ахьрийеда дьстиньн, гәләк рʹази нә! Бь сайа ве рʹебәрийе, әм дькарьн сәр рʹийа жийине бьминьн у ԛәбулкьрьна Йаһоԝа ӧнда нәкьн. Диса жи, дьбәкә щарна мәрʹа чәтьн бә, ԝәки пәй рʹебәрийа Йаһоԝа һәрʹьн, илаһи гава әв рʹебәри пе мәрьвед гӧнәкʹар дьгьһижә мә. Дәрәщед ӧсада әм гәрәке баԝәр бьн кӧ Йаһоԝа рʹебәрийе щьмәʹта хԝә дькә, у һәрге әм пәй рʹебәрийа ԝи һәрʹьн, әме тʹьме кʹәрәма бьстиньн. w24.02 20 ¶2-3

Гава әм Хәбәра Хԝәде кʹур лекʹолин дькьн, һʹьзкьрьна Хԝәде дьле мәда дьһа мәзьн дьбә. Ԝәʹде хԝәндьна Кʹьтеба Пироз, бьфькьрә кӧ әԝ пʹар дәрһәԛа Йаһоԝа чь нишан дькә. Жь хԝә бьпьрсә: «Әв сәрһати чаԝа нишан дькә, кӧ Йаһоԝа мьн һʹьз дькә у чаԝа али мьн дькә, кӧ әз Йаһоԝа һʹьз бькьм?» Ӧса жи гава әм һәр рʹож Йаһоԝарʹа дӧа дькьн у дьле хԝә ԝирʹа вәдькьн, һʹьзкьрьна һьндава ԝи дьле мәда һе мәзьн дьбә (Зәбур 25:4, 5). У Йаһоԝа ԝе щаба дӧайед мә бьдә (1 Йуһʹәнна 3:21, 22). Әм ӧса жи гәрәке һʹьзкьрьна хԝә һьндава мәрьва жи мәзьн кьн. Чәнд сал шунда чахе Паԝлосе шанди бу шагьрте Иса Мәсиһ, әԝи хортәки дәлал бь наве Тимотʹейо нас кьр. Тимотʹейо Йаһоԝа у мәрьва һʹьз дькьр. Паԝлос дәрһәԛа Тимотʹейо, Филипйарʹа ӧса гот: «Әз дьле хԝәрʹа йәки мина [Тимотʹейо] набиньм, кӧ бона һʹале ԝә мина пешәԝьтики хәм бьхԝә» (Филипи 2:20). Паԝлос пʹайе Тимотʹейо дьда, чьмки әԝи хушк-бьра гәләки һʹьз дькьр. Бешьк, хушк-бьра жь сәрледанед Тимотʹейо гәләк ша дьбун (1 Корьнтʹи 4:17). w23.07 9 ¶7-10

Пешийа кӧ щьмәʹта Исраеле бькʹәта Әʹрде Создайи, Муса пʹехәмбәр мьр. Гәло щьмәʹта Хԝәде ида бе хԝәйи у бе рʹебәр ма? На. Һʹәта әԝана амьн дьман, Йаһоԝа бона һʹәԝщед ԝан хәм дькьр. Пешийа мьрьна Муса, Йаһоԝа ԝирʹа гот кӧ Йешу ча рʹебәре щьмәʹта Исраеле кʹьфш кә. Муса бь дәһа сала Йешу һин дькьр (Дәркʹәтьн 33:11; Ԛануна Дӧщари 34:9). Ӧса жи сәрһʹәзар, сәрсәд, сәрпенщи у һәла һе жи сәрдәһ һәбун, йед кӧ рʹьнд рʹебәри щьмәʹте дькьрьн (Ԛануна Дӧщари 1:15). Бәле, Хԝәде бона хьзмәткʹаред хԝә гәләк баш хәм дькьр. Ԝәʹде Елйас пʹехәмбәрда жи ӧса бу. Әви пʹехәмбәри бь дәһа сала һʹәбандьна тʹәмьзда рʹебәри Исраелийа дькьр. Ле паше, Йаһоԝа шьхӧләкә дьн да ԝи у әԝ шандә ԝәлате Щьһудайе (2 Пʹадшати 2:1; 2 Дирок 21:12). Гәло кәсед амьн, йед кӧ пʹадшатийа Исраеледа дьжитьн, бе рʹебәри ман? На. Елйас пʹехәмбәр һәвале хԝә Елиша бь сала һин кьрьбу. Йаһоԝа бәрдәԝам дькьр ԛьрара хԝә бинә сери, у әԝи бона хьзмәткʹаред хԝәйи амьн хәм дькьр. w24.02 5 ¶12

Һьнә Мәсиһийед Әфәси ида рʹонайа Кʹьтеба Пироз ԛәбул кьрьбу (Зәбур 119:105). Ӧса жи, ԝана тʹәрка әʹдәтед ԛәлп у бенамусийе дабун. Ԝана чʹәʹв дьда Хԝәде у чь дәсте ԝан дьһат, дькьр кӧ Йаһоԝарʹа хьзмәт кьн у дьле ԝи ша кьн (Әфәси 5:1). Мина ԝана, пешийа кӧ әм дәрһәԛа рʹастийе пебьһʹәсийана, әм жи алийе религи у нав-намусийеда тәʹрийеда бун. Дьԛәԝьмә һьнәка жь мә щәжьнед ӧса кʹьфш дькьрьн, йед кӧ религийа ԛәлпва гьредайи бун, ле һьнәк жи бь жийинәкә бенамус дьжитьн. Ле чахе әм пеһʹәсийан, кӧ чь бәр чʹәʹве Хԝәде рʹәш ә у чь на, мә әʹмьре хԝә гӧһаст. Һеди-һеди мә щурʹе жийина хԝә гӧһаст, ԝәки ль гора ԛанунед Йаһоԝа бьжин. Әв йәк кʹарәкә мәзьн мәрʹа ани (Ишайа 48:17). Рʹаст ә әм диса жи рʹасти чәтьнайа тен, ле әм гәрәке хԝә жь тәʹрийа кӧ әм дәркʹәтьнә, дур бьгьрьн у «мина зарʹед рʹонайе бьжин». w24.03 21 ¶6-7

Дьбәкә тӧ дьфькьри ԝәки тӧ һазьр нини әʹмьре хԝә тʹәсмили Йаһоԝа ки у бейи ньхӧмандьне. Дьԛәԝьмә пешийе лазьм ә, ԝәки тӧ әʹмьре хԝә ль гора принсипед Йаһоԝа бьгӧһези, йан жи баԝәрийа хԝә дьһа ԛәԝи ки (Колоси 2:6, 7). Нә һʹәму хԝәндәван ԝәк һәв рʹӧһʹанида пешда дьчьн у щаһьл жи щурʹә-щурʹә салийед хԝәда хԝә тʹәсмили Йаһоԝа дькьн у тенә ньхӧмандьне. Дәԝса кӧ тӧ хԝә бәрамбәри кәсед дьн бьки, бьфькьрә кӧ тӧ ча дькари рʹӧһʹанида пешда һәрʹи у һьнә тьштада дьһа баш би (Галати 6:4, 5). Һәрге тӧ һәла һе һазьр нини әʹмьре хԝә тʹәсмил Йаһоԝа ки, хԝәрʹа нет дайнә, ԝәки әве гаве бавежи. Жь Йаһоԝа лава кә, ԝәки али тә бькә һьнә гӧһастьнед лазьм бьки (Филипи 2:13). Баԝәр бә, кӧ Йаһоԝа ԝе гӧһ бьдә дӧайе тә у али тә бькә (1 Йуһʹәнна 5:14). w24.03 5 ¶9-10

Щарәке Сәра гәләк дьлтәнг бу. Әԝе дьле хԝә Бьраһимрʹа вәкьр у бона дьлтәнгийа хԝә ԝи нәһәԛ кьр. Гәло Бьраһим һерс кʹәт у жерʹа шәрʹ кьр? На. Әԝи заньбу кӧ Сәра ԝи ча сәре мале ԛәбул дькә у пьштгьрийа сафикьрьнед ԝи дькә. Бьраһим гӧһ да ԝе у хирәт кьр, ԝәки бона дәрде ԝе чʹарәке бьвинә (Дәстпебун 16:5, 6). Әм дькарьн жь ве мәсәле чь һин бьн? Хԝәде щабдарийа сафикьрьнед малбәте тʹәсмили мера кьрийә (1 Корьнтʹи 11:3). Ле пешийа кӧ мер сафикьрьнәке бькә, ԝе баш бә ԝәки әԝ жьна хԝә бьпьрсә, һәла әԝ дәрһәԛа ве йәке чь дьфькьрә, илаһи һәрге әв йәк ԝе сәр жьна ԝи жи һʹӧкӧм кә (1 Корьнтʹи 13:4, 5). Рʹожәке, ньшкева се кәс һатьн щәм Бьраһим у әԝи хԝәст меванһʹьзийе ԝанрʹа бьдә кʹьфше. Әԝи Сәрайерʹа гот, кӧ шьхӧле хԝә бьһелә у зускава нан бьпежә (Дәстпебун 18:6). Сәрайе дәрберʹа гӧрʹа мере хԝә кьр у дәстпекьр һазьрийа бькә. Кʹӧлфәтно, һун дькарьн чʹәʹв бьдьнә Сәрайе у мина ԝе пьштгьрийа сафикьрьнед мере хԝә бькьн. Һәрге һун ӧса бькьн, зәԝаща ԝәйе дьһа ԛәԝи бә (1 Пәтрус 3:5, 6). w23.05 24-25 ¶16-17

Паши кӧ Гидәон бу рʹебәре щьмәʹта Исраеле, әԝи гәрәке гӧһ бьда рʹебәрийе у мерхас буйа. Хԝәде ԝирʹа гот, кӧ әԝ ԛӧрбангәһа Баал йа баве хԝә ԝеран бькә (Һʹакьмти 6:25, 26). Паше, Хԝәде дӧ щара жерʹа гот, кӧ әԝ әскәред ордийа хԝә кем бькә (Һʹакьмти 7:2-7). Паше жи готе, ԝәки әԝ шәв һʹьщуми сәр ордийа дьжмьна бькә (Һʹакьмти 7:9-11). Рʹуспи гәрәке гӧһдар бьн. Рʹуспи бь дьл у щан рʹебәрийа жь Кʹьтеба Пироз у тʹәшкиләта Хԝәде, ԛәбул дькьн. Ӧса әԝана бона кәсед дьн дьбьнә мәсәләкә баш. Ле щарна нә һеса йә кӧ рʹуспи гӧһ бьдьнә рʹебәрийе. Мәсәлә, дьбәкә рʹуспикирʹа чәтьн бә рʹебәрийа тʹәзә ԛәбул кә у бьдә хәбате. Йан жи дьԛәԝьмә бал ԝи пьрс пешда бе, һәла фьлан рʹебәри бь рʹасти баш ә, йан на. Йан жи, дьбәкә жь ԝи бе хԝәстьне ԝәки әԝ щабдарикә ӧса бинә сери, йа кӧ дькарә бьбә сәбәб кӧ әԝ бькʹәвә кәле. Дәрәщед ӧсада, рʹуспи чаԝа дькарьн гӧһдарикьрьнеда чʹәʹв бьдьнә Гидәон? Рʹьнд гӧһ бьдә рʹебәрийа тʹәшкиләте у ль гора ԝе йәке кʹар бькә. w23.06 4-5 ¶9-11