Нисан

Хьзмәткʹаред Йаһоԝа йед бәре жи рʹасти тәнгасийед ӧса дьһатьн, кӧ нә жи һевийе бун. Дина хԝә бьдә сәрһатийа Аԛуб. Баве ԝи Исһаԛ дьхԝәст, ԝәки әԝ ԛиза Лабан хԝәрʹа жьнти бинә, кʹижан кӧ мәрьве ԝани незик бу у Хԝәдерʹа хьзмәт дькьр. Исһаԛ ӧса жи кӧрʹе хԝә Аԛубрʹа гот, ԝәки Йаһоԝа ԝе гәләк ԝи кʹәрәм кә (Дәстпебун 28:1-4). Аԛуб гӧрʹа баве хԝә кьр. Әԝ жь ԝәлате Кәнане дәркʹәт у чу мала Лабан. Дӧ ԛизед ԝи һәбун, Леа у Рʹаһел. Дьле Аԛуб кʹәтә Рʹаһеле, ԛиза Лабанә бьчʹук. Сәва кӧ Лабан ԛиза хԝә бьдә ԝи, Аԛуб һазьр бу һʹәфт сала бона ԝе бьхәбьтә (Дәстпебун 29:18). Ле сәд һʹәйф, тьштәки ӧса һатә сәре Аԛуб, кӧ әԝ нә жи һивийе бу. Лабан әԝ хапанд у ԛиза хԝәйә мәзьн Леа да ԝи. Әԝи изьн да Аԛуб, ԝәки әԝ һʹәфтек шунда Рʹаһеле жи бьстинә, ле гәрәке һʹәфт сала жи бона ԝе бьхәбьтийа (Дәстпебун 29:26, 27). Лабан хәбатеда жи гәләк щар нәһәԛи Аԛуб дькьр. Әԝи 20 сала Аԛуб кьрьбу хӧламе хԝә (Дәстпебун 31:41, 42). w23.04 15 ¶5

Гава әм һʹәԝще рʹебәрийе у бәрдьлийе нә, гәло әм дькарьн аликʹарийе жь кʹе бьхԝазьн? Әм щаба ве пьрсе заньн, әм дькарьн Йаһоԝа Хԝәдерʹа дӧа бькьн. Йаһоԝа дьхԝазә кӧ әм «һәр гав дӧа бькьн» (1 Тʹесалоники 5:17). Әм дькарьн аза дьле хԝә ԝирʹа вәкьн у жь ԝи лава кьн, кӧ рʹебәрийа мә бькә (Мәтʹәлок 3:5, 6). Йаһоԝа гәләк мәрʹд ә, ләма жи әм кʹәнге у чьԛас бьхԝазьн дькарьн ԝирʹа дӧа бькьн. Иса заньбу ԝәки Йаһоԝа дӧайед мә гәләк ԛимәт дькә. Пешийа кӧ әԝ һатә сәр әʹрде, әԝи дьдит кӧ Баве ԝи Йаһоԝа, чаԝа щаба дӧайед мәрьвед амьн дьдә. Мәсәлә, гава Иса кʹеләка Баве хԝә бу, әԝи дьдит кӧ Әԝ чаԝа щаба дӧайед Һанна, Даԝьд у Елйас дьдә, чахе ԝана жь дьл дӧа дькьр (1 Самуйел 1:10, 11, 20; 1 Пʹадшати 19:4-6; Зәбур 32:5). Ләма жи, Иса шагьртед хԝәрʹа гот, ԝәки әԝана тʹьме дӧа бькьн у баԝәр кьн, кӧ Хԝәде дәнге ԝан дьбьһе! (Мәтта 7:7-11) w23.05 2 ¶1, 3

Тьрса бәр Хԝәде али Сәрәккʹаһин Йәһойада дькьр, ԝәки әԝ амьн бьминә у пьштгьрийа һʹәбандьна рʹаст бькә. Рʹожәке, ԛиза Изабеле, Аталйа, тʹәхте пʹадшатийа Щьһудайе бь дәсте зоре зәфти хԝә кьр. Сәва кӧ бьбә жьн-пʹадша, Аталйа һазьр бу тʹәмамийа хәза пʹадше кӧта кә, һәла һе нәбийед хԝә жи! (2 Дирок 22:10, 11) Ле Йоаш, нәбики ԝе, һатә хьлазкьрьне. Йәһойада у жьна ԝи Йәһошабәата, әԝ вәшартьн у хԝәй кьрьн. Бь ви щурʹәйи ԝана хәза пʹадшатийа Даԝьд хԝәй кьр. Йәһойада Йаһоԝарʹа амьн ма у жь Аталйайе нәдьтьрсийа. Гава Йоаш һʹәфт сали бу, Йәһойада диса избат кьр, кӧ әԝ Йаһоԝарʹа амьн ә. Әԝи нетәк дани пешийа хԝә у һәрге әв нета ԝи бьһата сери, Йоаш ԝе бьбуйа пʹадше ԛануни. Ле һәрге нета ԝи нәһата сери, әԝи дькарьбу әʹмьре хԝә ӧнда кьра. Бь аликʹарийа Йаһоԝа, әԝ гьһиштә нета хԝә. w23.06 17 ¶12-13

Нәбукәднәсәр Пʹадша дькарьбу Данийел ча дьжмьне хԝә һʹәсаб кьра у әԝ бькӧшта. Ле Данийел нәтьрсийа у хәԝна ԝи шьровәкьр. Гәло чь али Данийел дькьр ԝәки әԝ мерхас бә? Гава әԝ щаһьл бу, әԝ жь мәсәла де-баве хԝә һин дьбу (Ԛануна Дӧщари 6:6-9). Данийел нә тʹәне Дәһ Тʹәми, ле ӧса жи гәләк тьштед һур заньбу, кʹижан кӧ дькʹәтьнә нава Ԛануне. Мәсәлә, әԝи заньбу, кӧ изьна Исраелийа һәйә чь бьхԝьн чь на (Ԛануна Кʹаһинтийе 11:4-8; Данийел 1:8, 11-13). Хенщи ве йәке, Данийел дәрһәԛа тʹәрихийа щьмәʹта Хԝәде заньбу, у ӧса жи һаш жь пе һәбу, кӧ чь һатьбу сәре ԝан мәрьва, йед кӧ гӧрʹа Йаһоԝа нәкьрьбун (Данийел 9:10, 11). Әԝи әʹмьре хԝәда дьдит, кӧ Йаһоԝа у мәләкед ԝи, чаԝа али ԝи дькьрьн (Данийел 2:19-24; 10:12, 18, 19). w23.08 3 ¶5-6

Рʹевекайе жьнәкә жир у билан бу. Әԝе тʹәмамийа әʹмьре хԝәда сафикьрьнед билани дькьр у заньбу, кӧ гавед хԝә кʹәнге у чаԝа бавежә (Дәстпебун 24:58; 27:5-17). Әԝе ԛәдьре кәсед дьн дьгьрт у һазьр бу гӧһ бьдә рʹебәрийе (Дәстпебун 24:17, 18, 65). Һәрге тӧ мина Рʹевекайе мьлук би у гӧһ бьди кәсед кӧ Йаһоԝа бьжартийә, ԝәки рʹебәрийа мә бькьн, тӧйе бьби мәсәләкә баш һьм бона малбәта хԝә, һьм жи бона щьвате. Шкәстибун һʹәму хьзмәткʹаред Хԝәдейә гьһиштирʹа лазьм ә. Әстәр жьнәкә шкәсти бу у һәр тьшт ӧса дькьр, чаԝа кӧ Хԝәде дьхԝәст. Гава әԝ бу жьна пʹадше, диса жи әԝ нәбу йәкә кʹӧбар-бабах. Әԝе гӧһ дьда ширәтед пьсмаме хԝә Мордокʹай (Әстәр 2:10, 20, 22). Бәле, гава һун ширәтед баш дьгәрʹьн у әʹмьре хԝәда дьдьнә хәбате, ве йәкеда шкәстибуна ԝә те кʹьфше (Тито 2:3-5). Әстәре шкәстибуна хԝә бь щурʹәки майин жи дьда кʹьфше. «Әԝ ԛизькә бәдәԝ у бәжьн-баледа хасә-хәԝан бу», ле әԝе дина кәсед дьн нәдькʹьшандә сәр хԝә (Әстәр 2:7, 15). w23.12 19-20 ¶6-8

Йаһоԝа ԛә нахԝазә ԝәки әм хԝә гәләк сущдар кьн. Һәрге әм гӧне хԝә бьдьнә рʹуйе хԝә, тʹобә кьн у гавед лазьм бавежьн ԝәки диса ԝи гӧнәйи нәкьн, әм дькарьн баԝәр бьн, кӧ Йаһоԝа ԝе бьбахшинә мә (Кʹаред Шандийа 3:19). Паши ве йәке, Йаһоԝа нахԝазә кӧ әм бәрдәԝам кьн хԝә бона ви гӧнәйи сущдар кьн. Әԝ занә кӧ һәрге әм бәрдәԝам кьн хԝә бона ве йәке сущдар кьн, әв йәк дькарә зьрарәкә мәзьн бьдә мә (Зәбур 31:10). Һәрге әм гәләк хәмгин бьн, дьбәкә әм сьст бьн у рʹәва жийине бәрдәԝам нәкьн (2 Корьнтʹи 2:7). Һәрге әм бь зедәйи хԝә сущдар дькьн, һьнге әм гәрәке дина хԝә бьдьнә ве йәке, кӧ Хԝәде бь рʹасти дьбахшинә мә (Зәбур 130:4). Гава Хԝәде дьбахшинә кәсе кӧ жь дьл тʹобә кьрийә, әԝ соз дьдә ԝи: «Еди әз йе сущед ԝан нә дь бира хԝәда биньм!» (Йерәмйа 31:34). Әв йәк те һʹәсабе, кӧ Йаһоԝа ԝе гӧнед тәйә бәре нәдә рʹуйе тә. У һәрге шашийед тәйә бәре хьзмәтийа тәйә ньһа синор дькьн, дьлтәнг нәбә. Йаһоԝа ида дәрһәԛа гӧнед тә нафькьрә у гәрәке тӧ жи сәр ԝан нәфькьри. w23.08 30-31 ¶14-15

Мәрьвед кӧ ԝәʹде пандемийа коронавирусе, дькʹәтьнә бәр байе информасийа нәрʹаст, тьрс у хоф дькʹәтә дьле ԝан, ле Шәʹдед Йаһоԝа, йед кӧ гӧһ дьданә рʹебәрийа тʹәшкиләте, жь ԝан тьшта хԝәйкьри бун. (Мәтта 24:45). Әм гәрәке дина хԝә бьдьнә тьштед кӧ «һәрә ԛәнщ ә» (Филипи 1:9, 10). Һәрге әм гәләк тьштава мьжул бьн, ԝе ԝәʹдә у ԛәԝата мә бона тьштед фәрз нәминә. Шьхӧлед һәррʹожи, мәсәлә хԝарьн, вәхԝарьн, кʹеф, рʹьһʹәти у хәбат, дькарьн мә һаԛас мьжул бькьн, кӧ әм ԝәʹде хԝә тʹәне сәр ван тьшта хәрщ кьн (Луԛа 21:34, 35). Ӧса жи әм һәррʹож нучәйед дәрһәԛа протеста у шәрʹ-дәʹԝед политика дьбьһен. Һәрге әм тʹьме ван нучәйа бьньһерʹьн, дьбәкә әм һʹьш у дьле хԝәда пьштгьрийа кәсәки жь ԝан бькьн. Мире-щьна дьхԝазә бь щурʹә-щурʹә метода баԝәрийа мә сьст кә, ԝәки әм жь рʹе дәркʹәвьн. w23.07 16-17 ¶12-13

Бона хьзмәткʹаред Йаһоԝа, Биранина Мьрьна Иса рʹожа лапә фәрз ә, йа тʹәмамийа сале. Иса тʹәми да шагьртед хԝә, кӧ тʹәне ве рʹожа мәхсус кʹьфш кьн (Луԛа 22:19, 20). Евара Биранине али мә дькә, ԝәки әм рʹазибуна хԝә бона ԛимәта ԛӧрбана Иса бьдьнә кʹьфше (2 Корьнтʹи 5:14, 15). Ӧса жи, Биранин мәщаләкә баш ә, кӧ «әм дьл бьдьн бәр һәв» (Рʹомайи 1:12). У гәләк мәрьвед кӧ тенә сәр Евара Биранине, һʹӧкӧм дькә әв йәк, чь кӧ әԝана ԝедәре дьвиньн у дьбьһен, у ләма жи сафи дькьн Кʹьтеба Пироз һин бьн. Ӧса жи бьфькьрьн, кӧ Евара Биранине ча йәктийа мә дьһа ԛәԝи дькә. Бе шьк, Евара Биранине бона мә гәләк мәхсус ә у шабунәкә мәзьн мәрʹа тинә! w24.01 8 ¶1-3

Чьԛас һе зедә әм дәрһәԛа ԛимәта ве ԛӧрбане дьфькьрьн, йа кӧ Йаһоԝа у Иса данә, һаԛас һе баш әм фәʹм дькьн, кӧ һәр дӧ жи чьԛас мә һʹәз дькьн (Галати 2:20). Ԛӧрбан жь бо һʹәзкьрьне һатә дайине. Иса бона Йаһоԝа гәләк ԛимәт ә. Ләма жи, гава Йаһоԝа изьн да, ԝәки Иса бона мә еше бькʹьшинә у бьмьрә, Әԝи избат кьр, кӧ мә гәләк һʹәз дькә. Ча мә дит, Йаһоԝа һʹәзкьрьна хԝә вәнашерә, ле әшкәрә дьдә кʹьфше (Йерәмйа 31:3). Йаһоԝа әм кʹьшандьнә бәрбь хԝә, чьмки әԝ мә һʹәз дькә (Бәрамбәр кә Ԛануна Дӧщари 7:7, 8). Тʹӧ кәс у тʹӧ тьшт нькарә мә жь ве һʹәзкьрьне бьԛәтинә (Рʹомайи 8:38, 39). Гәло һʹәзкьрьна Йаһоԝа сәр тә ча һʹӧкӧм дькә? w24.01 28 ¶10-11

Кәсед бьжарти һевийа жийина сәр әʹзмана гәләки ԛимәт дькьн. Йәк жь ԝан, бьре Фредерик Франс бу. Щарәке әԝи дәрһәԛа ве гӧмане ӧса гот: «Бе шьк, гӧмана мә ԝе бе сери, у һәр кәсе бьжарти жь 144 000, ԝе хәлата кӧ Хԝәде соз дайә, бьстинә. Бәле, хәлата кӧ әме бьстиньн ԝе дьһа баш бә, нә кӧ ча әм дьдьнә бәр чʹәʹве хԝә». Сала 1991-да, Франс ӧса гот: «Һʹәта иро жи [әм] ԛимәта ве һевийе заньн. . . . Әм чьԛас ԝәхт һивийа ԝе бьн жи, әме һаԛас зедә рʹази бьн. Әв тьштәкә ӧса йә, ԝәки . . . һежа йә кӧ әм һивийе бьн. Ньһа әз дьһа зедә һевийа мә ԛимәт дькьм». Фьрԛи тʹӧнә әм һивийа жийина һәрһәйи йа сәр әʹзмана, йан сәр әʹрде нә, һевийа мә дьле мә ша дькә. У һевийа мә дькарә һе ԛәԝи у ԛәԝи бә. w23.12 9 ¶6; 10 ¶8

Бәр коне пирозе кәвьн ԛӧрбангәһәкә жь сьфьр һәбу. Сәр ве ԛӧрбангәһе, һʹәйԝан чаԝа ԛӧрбан Йаһоԝарʹа дьанин (Дәркʹәтьн 27:1, 2; 40:29). Ле бь сайа ван ԛӧрбана, гӧнед щьмәʹте бь тʹәмами нькарьбун бьһатана бахшандьне (Ибрани 10:1-3). Ԛӧрбанед кӧ тʹьме дьһатьнә дайине, әв ԛӧрбана тʹәк дьданә кʹьфше, йа кӧ ахьрийеда ԝе һʹәму мәрьв жь гӧна хьлаз кьра. Иса Мәсиһ заньбу кӧ Йаһоԝа әԝ шандә сәр әʹрде, ԝәки әԝ әʹмьре хԝә ча ԛӧрбан бона һʹәму мәрьва бьдә (Мәтта 20:28). Бь ньхӧмандьна хԝә Иса нишан кьр, ԝәки әԝ һазьр ә хԝәстьна Йаһоԝа бинә сери (Йуһʹәнна 6:38; Галати 1:4). Иса «щарәке бона һәр тʹьм бәдәна хԝә кьрә ԛӧрбан», ԝәки гӧне һәр кәсе кӧ баԝәрийа хԝә ԝи тинә, бе бахшандьне (Ибрани 10:5-7, 10). w23.10 26-27 ¶10-11

Тʹәне бь сайа кʹьрʹине мәрьв дькарьн жь гӧнә у мьрьне хьлаз бьн (Зәбур 49:7, 8). Ләма жи, Йаһоԝа Кӧрʹе хԝә Иса шандә сәр әʹрде, ԝәки әԝ әʹмьре хԝә бона мә бәрва бьдә. Әм чьԛас дәрһәԛа ве ԛӧрбана ԛимәт бьфькьрьн, һаԛас һе зедә әме ве йәке ԛимәт кьн. Ләма жи әме дина хԝә бьдьне, кӧ чьрʹа бона Йаһоԝа у Иса һеса нибу ве ԛӧрбане бьдьн. Чахе Адәм гӧнә кьр, әԝи мәщала жийина һʹәта-һʹәтайе ӧнда кьр, нә тʹәне бона хԝә, ле бона һʹәму зарʹед хԝә жи. Иса Мәсиһ һатә сәр әʹрде у әʹмьре хԝә ча ԛӧрбан бәрва да, ԝәки тьште ӧндабуйи диса бькʹьрʹә. Чахе Иса сәр әʹрде бу, «әԝи гӧнә нәкьр у зарʹе ԝида һьләкʹари тʹӧнәбу» (1 Пәтрус 2:22). Иса беԛьсур бу, ләма жи ԛимәта әʹмьре ԝи у ԛимәта әʹмьре кӧ Адәм ӧнда кьрьбу, ԝәк һәв бун (1 Корьнтʹи 15:45; 1 Тимотʹейо 2:6). w24.01 10 ¶5-6

Чахе Иса һатә сахкьрьне, паше әԝ пʹарьстгәһа рʹӧһʹанида дәрбази Щийе Һәри Пироз бу. Иро әм бь сайа ԛӧрбана Иса у бь сайа ве йәке кӧ әԝ Кʹаһине Мәзьн ә, дькарьн Йаһоԝа бьһʹәбиньн. Исраеледа кʹаһине мәзьн пе хуна ԛӧрбанед һʹәйԝана дькʹәтә Щийе Һәри Пироз, йе кӧ пе дәсте мәрьва һатьбу чекьрьне. Ле Иса «һәма хут кʹәтә әʹзмен», демәк щийе кӧ жь һʹәму щийед дьн пирозтьр ә, сәва кӧ бәр Йаһоԝа бьсәкьнә. Ԝедәре әԝи ԛимәта әʹмьре хԝәйә физики у беԛьсур, Хԝәдерʹа әʹйан кьр, у «пе хԝәԛӧрбанкьрьне» гӧне мә һьлда (Ибрани 9:24-26). Әм гьшк жи дькарьн пʹарьстгәһа рʹӧһʹанида Йаһоԝарʹа хьзмәт кьн, фьрԛи тʹӧнә әме сәр әʹрде, йан сәр әʹзмана бьжин. w23.10 28 ¶13-14

Бьфькьрә кӧ Иса сәр әʹзмана ча Пʹадша у Кʹаһине Мәзьнә дьлован, чь дькә. Бь сайа ԝи, әм дькарьн дӧада «незики тʹәхте Хԝәдейи кʹәрәме бьн», ԝәки аликʹари у дьлрʹәмийе жь ԝи рʹәща бькьн (Ибрани 4:14, 15). Әм гәрәке һәр рʹож бьфькьрьн сәр ван тьшта, чь кӧ Йаһоԝа у Иса бона мә кьрьнә у һʹәта ньһа жи дькьн. Гәрәке һʹәзкьрьна ԝан сәр һʹьш у дьле мә кʹур һʹӧкӧм кьн у мә һелан кьн, ԝәки бь хирәт Йаһоԝарʹа хьзмәт кьн (2 Корьнтʹи 5:14, 15). Мәщаләкә баш кӧ ча ԝанрʹа рʹазибуна хԝә бьдьнә кʹьфше, әԝ ә, кӧ али мәрьва бькьн, ԝәки әԝана бьбьнә Шәʹдед Йаһоԝа у шагьртед Иса (Мәтта 28:19, 20). Паԝлосе шанди жи бь ви щурʹәйи рʹазибуна хԝә дьда кʹьфше. Әԝи заньбу ԝәки Йаһоԝа «дьхԝазә һʹәму мәрьв хьлаз бьн у рʹастийе нас кьн» (1 Тимотʹейо 2:3, 4). w23.10 22-23 ¶13-14

Әм мьзгинийе мәрьварʹа бәла дькьн. Ле әм чаԝа дькарьн хԝә у кәсед дьн бьдьнә баԝәркьрьне, кӧ гьлийед жь Әʹйанти 21:3, 4 ԝе бь рʹасти бенә сери? Сәва кӧ әм баԝәрийа хԝә ви созе хԝәш биньн, Йаһоԝа избатийед ве йәке дайә ньвисаре. Рʹезед Кʹьтеба Пироз нишан дькьн, кӧ әм дькарьн баԝәрийа хԝә созе Йаһоԝа биньн. Кʹьтеба Пироз ӧса дьбежә: «Һьнге әԝи ль сәр тʹәхт рʹуньшти гот: ‹Ва әз һәр тьшти ну чедькьм›. У мьнрʹа гот: ‹Бьньвисә, чьмки әв хәбәрнә амьн у рʹаст ьн›. Ӧса жи готә мьн: ‹Һәр тьшт һатә сери. Әз ьм Алфа у Омега, Дәстпебун у Ахьри›» (Әʹйанти 21:5, 6а). w23.11 3 ¶3-5

Бьра дькарә бь кʹьнщ у хәмьландьна хԝә бьдә кʹьфше, кӧ әԝ йәки гьһишти йә. Гәләк щар, мәрьвед ӧса моде дәрдьхьн, йед кӧ ԛәдьре Йаһоԝа нагьрьн у бь жийинәкә бенамус дьжин. Мәсәлә, әԝана кʹьнщед ӧса дәрдьхьнә моде, кʹижан кӧ гәләк тәнг ьн у мера дькьнә мина жьна. Мәрьве гьһишти ԝе ль гора принсипед Кʹьтеба Пироз кʹьнща хԝәрʹа бьжберә у щьватеда чʹәʹв бьдьнә мәсәлед баш. Жь хԝә бьпьрсә: «Гәло сафикьрьнед мьн дьдьнә кʹьфше, ԝәки әз пешийа кӧ кʹьнщәки бьжберьм, кʹур дьфькьрьм у ԛәдьр һьндава мәрьвед дьн дьдьмә кʹьфше? Гәло кʹьнщхԝәкьрьна мьн нишан дькә, кӧ әз Шәʹде Йаһоԝа мә?» (1 Корьнтʹи 10:31-33). Хорте билан, ԝе һьм бәр чʹәʹве хушк-бьра, һьм жи бәр чʹәʹве Йаһоԝа Хԝәде, гәләк ԛимәт бә. w23.12 26 ¶7

Бәре, пʹадше башуре жи һʹьщуми сәр хьзмәткʹаред Йаһоԝа дькьр (Данийел 11:40). Мәсәлә, ԝәʹде Шәрʹе Һʹәмдьнйайе йа I у II, гәләк бьра һатьнә гьртьне у гәләк зарʹед Шәʹдед Йаһоԝа жь мәкʹтәбе һатьнә дәрхьстьне, чьмки ԝана тʹәвнәбуйине хԝәй дькьр. Ван салед пашьнда, амьнийа хьзмәткʹаред Йаһоԝа, йед кӧ бьн сәрԝертийа ви пʹадшида дьжин, бь щурʹед дьн һатьнә щерʹьбандьне. Мәсәлә, ԝәʹде бьжартьна сәрԝера, дьбәкә Мәсиһик бе щерʹьбандьне, кӧ политикәк, йан жи партикә политики бьжберә. Дьбәкә әԝана дәнге хԝә нәдьн жи, ле дьԛәԝьмә әԝана һʹьш у дьле хԝәда пьштгьрийа кәсәки бькьн. Сәва кӧ әм бь тʹәмами тʹәвнәбуйине хԝәй кьн, әм гәрәке рʹьнд дина хԝә бьдьнә һьм кьред хԝә, һьм жи һәст у фькьред хԝә! (Йуһʹәнна 15:18, 19) w23.08 12 ¶17

Рʹәва жийинеда әм гәрәке ӧса бьрʹәвьн, ԝәки «хәлате бьстиньн» (1 Корьнтʹи 9:24, ИМ). Иса гот: «Мьԛати хԝә бьн, нәбә кӧ дьле ԝә хԝарьн, вәхԝарьне у хәмед ве дьнйайева гьредайи бә» (Луԛа 21:34). Гәләк рʹезед Кʹьтеба Пироз дькарьн али тә бькьн, ԝәки тӧ гӧһастьнед лазьм бьки, кӧ бькарьби рʹәва жийинеда сәркʹәви. Әм баԝәр ьн кӧ әме рʹәва жийинеда сәркʹәвьн, чьмки Йаһоԝа ԝе ԛәԝате бьдә мә (Ишайа 40:29-31). Ләма жи бьрʹәвә у мина Паԝлосе шанди чь жь дәсте тә те бькә, ԝәки тӧ хәлате бьстини! (Филипи 3:13, 14) Тʹӧ кәс нькарә дәԝса тә бьрʹәвә, ле бь аликʹарийа Йаһоԝа тӧ дькари бьгьһижи нете хԝә. Йаһоԝа дькарә али тә бькә, ԝәки тӧ баре фәрз һьлди у йед нәлазьм жь хԝә дур хи. Бь ԛәԝата Йаһоԝа, тӧ дькари рʹәва жийинеда сәркʹәви! Нәтьрсә, Йаһоԝа тʹәви тә йә! w23.08 31 ¶16-17

Гава Иса 12 сали бу, де-баве ԝи әԝ Оршәлимеда бир кьрьн (Луԛа 2:46-52). Чахе де-баве ԝи паши щәжьне, жь Оршәлиме вәдьгәрʹийанә мал, ԝана дина хԝә нәдайе кӧ Иса тʹәви ԝан нибу. Әԝана борщдар бун кӧ дина хԝә бьдьне, һәла һʹәму зарʹед ԝан тʹәви ԝан ьн, йан на. Чахе Усьв у Мәрйәме Иса дитьн, Мәрйәме Иса нәһәԛ кьр, кӧ рʹуйе ԝида әԝана тьрсийан у бәр хԝә кʹәтьн! Иса дькарьбу ԝанрʹа бьгота, кӧ әԝана нәһәԛ ьн. Дәԝса ве йәке, әԝи рʹьһʹәт у бь ԛәдьр щаба ԝан да, «ле ԝана фәʹм нәкьр әԝи чь гот», диса жи Иса «гӧрʹа ԝанда бу». Щаһьлно, гава де-баве ԝә шашийа дькьн, йан жи ԝә фәʹм накьн, гәло ԝәрʹа чәтьн ә гӧһ бьдьнә ԝан? Һәрге чәтьн ә, чь дькарә али ԝә бькә? Бьфькьрьн кӧ Йаһоԝа чь сәр хԝә тʹәхмин дькә, гава һун гӧрʹа де-баве хԝә дькьн. Кʹьтеба Пироз дьбежә, кӧ әв йәк «ль Хӧдан хԝәш те» (Колоси 3:20). Йаһоԝа занә кӧ де-баве ԝә щара ԝә фәʹм накьн, йан жи ԛәйдед ӧса датиньн, кӧ ԝәрʹа һеса нинә гӧһ бьдьнә ԝан ԛәйда. Ле диса жи, гава һун гӧһ дьдьнә де-баве хԝә, һун дьле Хԝәде ша дькьн. w23.10 7 ¶5-6

Дьԛәԝьмә һәвалхәбатчик бежә, ԝәки Шәʹдед Йаһоԝа гәрәке ньһерʹандьна хԝә һьндава һомосексуалийе бьгӧһезьн. Дьһа баш ә, кӧ әм ԝирʹа шьровәкьн ԝәки әм ԛәдьре ньһерʹандьна һәр кәси дьгьрьн (1 Пәтрус 2:17). Паше, әм дькарьн ԝирʹа зәлал кьн кӧ кʹара ԛанунед Кʹьтеба Пироз дәрһәԛа нав-намусийе чь йә. Һәрге мәрьвәк тʹәви готьнед мә рʹази нинә, әм гәрәке дәрберʹа нәбежьн, кӧ әм заньн әԝ чь баԝәр дькә. Мәсәлә, дьбәкә һәвалдәрсханәки тә бежә, кӧ әв тьштәки беаԛьлайи йә, ԝәки баԝәрийа хԝә Хԝәде биньн. Ле гәло әв йәк те һʹәсабе кӧ әԝ еволусийайе баԝәр дькә у дәрһәԛа ве йәке гәләк тьшт занә? Дьбәкә әԝ тʹәне ԝан гьлийа дьбежә, чь кӧ жь кәсед дьн бьһистийә. Әм дькарьн жь jw.org жерʹа линка готарәке йан жи видеойәке дәрһәԛа әʹфьрандьне бьшиньн. Паше әм дькарьн дәрһәԛа ван тьшта хәбәр дьн. Бәле, һәрге әм бь ԛәдьр щаба ԝи бьдьн, әв йәк дькарә ԝи һелан кә, кӧ ньһерʹандьна хԝә бьгӧһезә. w23.09 17 ¶12-13

Һәрге мә шаши кьрийә жи, әм дькарьн баԝәр бьн, ԝәки Йаһоԝа ԝе щабдарийа бьдә мә у мә кʹәрәм кә. Жь бо ве йәке, гәрәке әм чь жь дәсте мә те бькьн, ԝәки жь рʹийа рʹаст дәрнәйен у бәрдәԝам кьн итʹбарийа хԝә Йаһоԝа биньн (Мәтʹәлок 28:13). Шьмшон мәрьвәки гӧнәкʹар бу, ле диса жи әԝи чь жь дәсте ԝи дьһат, дькьр, ԝәки Йаһоԝарʹа хьзмәт кә һәла һе паши ве шашийа хԝә жи, кӧ әԝи дәрһәԛа ԛәԝата хԝә, Дәлилайерʹа гьли кьр. Бәле, Йаһоԝа тʹәрка Шьмшон нәда у диса ԛәԝат да ԝи, ԝәки әԝ хԝәстьна Ԝи бинә сери. Йаһоԝа диса жи ԝи ча йәки баԝәрмәнд һʹәсаб дькьр у наве ԝи кьрә нава рʹеза мәрьвед амьн, йед кӧ Ибрани сәре 11-да һатьнә ньвисаре. Бәле, Баве мәйи әʹзмана гәләк мә һʹәз дькә у рʹожед чәтьнда дьхԝазә ԛәԝате бьдә мә! Әв йәк дьле мә рʹьһʹәт дькә. Мина Шьмшон, ԝәрә әм жь Йаһоԝа рʹәща бькьн у бежьн: «Мьн дь бира хԝәда бинә . . . мьн хԝӧрт [ԛәԝи] бькә» (Һʹакьмти 16:28). w23.09 7 ¶18-19

Әм заньн кӧ рʹожа Йаһоԝа незик ә, ләма жи әм бь хирәт мьзгинийе бәла дькьн. Ле һьнә дәрәщада дьԛәԝьмә әм дьтьрсьн шәʹдәтийе бьдьн. Гәло чʹьра? Чьмки дьԛәԝьмә әм дьтьрсьн кӧ мәрьв ԝе чь бьфькьрьн, йан жи тьштәки нәбаш бькьн. Әв йәк һатә сәре Пәтрус. Шәва пешийа мьрьна Иса, Пәтрус тьрсийа бежә, кӧ әԝ шагьрте Иса йә у әԝи чәнд щара Иса инкʹар кьр (Мәтта 26:69-75). Ле паше, Пәтрус тьрса бәр мәрьва алт кьр у бь дьләки ԛәԝи гот: «Жь мәрьва нәтьрсьн у хԝә ӧнда нәкьн» (1 Пәтрус 3:14). Гьлийед Пәтрус нишан дькьн, кӧ әм дькарьн жь тьрса бәр мәрьва аза бьн. Чь дькарә али мә бькә, кӧ әм мәрьва нәтьрсьн? Пәтрус мәрʹа дьбежә: «Мәсиһ чаԝа Хӧдане пироз дьле хԝәда бьльнд бьгьрьн» (1 Пәтрус 3:15). Демәк, әм дькарьн сәр ве йәке бьфькьрьн, кӧ Иса Мәсиһ Пʹадше мә йә у ԛәԝата ԝи гәләк мәзьн ә. w23.09 27-28 ¶6-8

Әм гәрәке бәрдәԝам кьн мьԛабьли «кьред бебәрә тәʹрийе» шәрʹ бькьн (Әфәси 5:11). Әʹйан ә кӧ гава кәсәк тьштед хьраб у бенамус дьньһерʹә йан дьбьһе, йан жи дәрһәԛа тьштед ӧса хәбәр дьдә, әв һеса дькарә гӧнә бькә (Дәстпебун 3:6; Аԛуб 1:14, 15). Дьнйа Мире-щьна һәр тьшти дькә, кӧ мә бьхапинә у мә бьдә баԝәркьрьне, ԝәки тьштед кӧ бәр чʹәʹве Йаһоԝа рʹәш ьн, бь рʹасти нә хьраб ьн (2 Пәтрус 2:19). Бь һʹәзара сала, метода Мире-щьна әв ә кӧ һʹьше мәрьва тʹәвльһәв кә, ԝәки әԝана нәвиньн, кӧ чь рʹаст ә у чь на (Ишайа 5:20; 2 Корьнтʹи 4:4). Ләма жи гәләк филм, бәрнамед телевизийоне у рʹупʹелед интернете, фькьред кӧ мьԛабьли ԛанунед Йаһоԝа нә, бәла дькьн. Мире-щьна дьхԝазә, ԝәки әм бьфькьрьн кӧ кьред нәпʹак бе зийан ьн (Әфәс. 5:6). w24.03 22 ¶8-10

Гава Исраели жь щики дәрбази щики дьн дьбун, ԝана коне пироз тʹәви хԝә дьбьр. Һʹәта кӧ Оршәлимеда пʹарьстгәһ бьһата авакьрьне, коне пироз ԝәкә 500 сали һатә хәбьтандьне (Дәркʹәтьн 25:8, 9; Жьмар 9:22). Коне пироз бона Исраелийа щийе сәрәкә бу, кʹидәре кӧ Йаһоԝа Хԝәде дьһʹәбандьн. Ԝедәре, ԝана ԛӧрбан дьанин (Дәркʹәтьн 29:43-46). Ле коне пироз ӧса жи тьштәк дьһа мәзьн дьһатә һʹәсабе. Коне пироз «си у сурәте» тьштед әʹзмани бу у дьда кʹьфше пʹарьстгәһа рʹӧһʹанийә гьринг. Паԝлосе шанди гот, ԝәки коне пироз «сурәтәк ә бона зәмане ньһа» (Ибрани 9:9). Чахе әԝи нәʹмә Ибранийарʹа ньвиси, пʹарьстгәһа рʹӧһʹани сала 29 Д.М.-да ида һатьбу авакьрьне. Ԝе сале, Иса Мәсиһ һатә ньхӧмандьне у пʹарьстгәһа рʹӧһʹанида чаԝа Кʹаһине Мәзьн һатә кʹьфшкьрьне (Ибрани 4:14; Кʹаред Шандийа 10:37, 38). w23.10 25-26 ¶6-7

Сәва кӧ әм бәр «байе жийине» ԛәԝи бьминьн, гәрәке әм нәрм у бәрбьһер бьн, демәк һазьр бьн кӧ һини дәрәщед тʹәзә бьн. Мәсәлә, гава һʹале мә те гӧһастьне йан жи гава ньһерʹандьн у сафикьрьнед мә жь йа мәрьвед дьн щӧдә дьбә, әм гәрәке мәрьвнә нәрм бьн у сәрԝахти бьдьнә кʹьфше. Чаԝа хьзмәткʹаред Йаһоԝа, әм дьхԝазьн сәрԝахт бьн. Ӧса жи, әм дьхԝазьн бәрбьһер у дьлован бьн. Дәрһәԛа Йаһоԝа те готьне кӧ әԝ «Ԛәйа йә», чьмки әԝ йәки ԛәԝи йә (Ԛануна Дӧщари 32:4). Ле ӧса жи әԝ йәки сәрԝахт ә. Гава һʹале ве дьнйайе те гӧһастьне, әԝ диса жи һәр тьшти дькә, ԝәки хԝәстьна хԝә бинә сери. Йаһоԝа әм ӧса әʹфьрандьнә, кӧ әм дькарьн һини гӧһастьна бьн. Әԝ бь сайа принсипед Кʹьтеба Пироз али мә дькә, кӧ әм һʹәму дәрәщед жийина хԝәда сафикьрьнед баш бькьн. Мәсәла Йаһоԝайә шәхси у принсипед ԝи избат дькьн, кӧ әԝ һьм мина «Зьнар» ә, һьм жи йәки сәрԝахт у бәрбьһер ә. w23.07 20 ¶1-3

Кʹьтеба Пирозда, Йаһоԝа хԝә бәрамбәри дайикәкә дьлован дькә (Ишайа 66:12, 13). Бьдә бәр чʹәʹве хԝә, кӧ дайик ча бь һʹәзкьрьне зарʹа хԝә дьдә бәр дьле хԝә у һәр тьшти дькә, ԝәки ле рʹьһʹәт кә. Мина ве йәке, гава тӧ дьлтәнг дьби, баԝәр бә кӧ Йаһоԝа тә һʹәз дькә у ԝе рʹьһʹәтийа дьл бьдә тә. Гава әм шаши дькьн, әԝ диса жи мә һʹәз дькә (Зәбур 103:8). Исраели гәләк щар дьле Йаһоԝа дешандьн, ле гава әԝана пʹошман дьбун у тʹобә дькьрьн, Йаһоԝа һьндава ԝанда дьлован бу. Әԝи ԝанрʹа гот: «Тӧ бәр чʹәʹве мьн һежа у бь рʹумәт и у әз тә һʹәз дькьм» (Ишайа 43:4, 5, ИМ). Хԝәде найе гӧһастьне. Һәрге мә гӧнед гьран кьрийә жи, гава әм тʹобә дькьн у вәдьгәрʹьн бал Йаһоԝа, әм дьвиньн кӧ әԝ диса жи мә һʹәз дькә. Йаһоԝа соз дьдә кӧ әԝе «бь зедәбари бьбәхьшинә» (Ишайа 55:7, ИМ). Ӧса жи Кʹьтеба Пироз дьбежә, ԝәки гӧнәйед мә ԝе бенә бахшандьне у Йаһоԝа ԝе рʹьһʹәтийа дьл бьдә мә (Кʹаред Шандийа 3:19). w24.01 27 ¶4-5

Гава әм рʹасти дәрәщәкә чәтьн тен, Йаһоԝа дькарә али мә бькә. Мәсәлә, гава әм жь сәркʹаре хәбате изьне дьхԝазьн ԝәки һәрʹьнә сәр щьвата мәзьн, йан жи гава әм дьхԝазьн ԝәки әԝ сьһʹәтед хәбате бьгӧһезә, кӧ әм бькарьбьн һәрʹьнә сәр щьвата, әм дькарьн бьвиньн кӧ Йаһоԝа ча али мә дькә. Дьбәкә әм әʹщебмайи бьминьн, кӧ әв дәрәщә чьԛас баш һатә сафикьрьне. Сәрһатийед ӧса али мә дькьн, кӧ әм һе зедә хԝә бьсперьн Йаһоԝа. Әзра бь мьлукти жь Йаһоԝа аликʹари дьхԝәст. Һәр щар чахе ԝирʹа чәтьн бу щабдарийед хԝә бинә сери, әԝи бь мьлукти Йаһоԝарʹа дӧа дькьр (Әзра 8:21-23; 9:3-5). Жь бәр кӧ Әзра хԝә дьспартә Йаһоԝа, кәсед дьн жи бь дьл у щан пьштгьрийа ԝи дькьрьн у чʹәʹв дьданә баԝәрийа ԝи (Әзра 10:1-4). Гава әм бона һʹәԝщед материали, йан жи бона сьһʹәт-ԛәԝата малбәта хԝә хәм дькьн, әм гәрәке дӧада жь Йаһоԝа аликʹарийе бьхԝазьн у баԝәр бьн, кӧ әԝе али мә бькә. w23.11 18 ¶15-17

Сәва кӧ әм ча кәсед рʹаст бенә һʹәсабе, Йаһоԝа набежә кӧ гәрәке әм һәма ве йәке бькьн чь кӧ Бьраһим кьр. Гәләк мәщал һәнә кӧ әм баԝәрийа хԝә бь кьред хԝә нишан кьн. Щьватеда әм дькарьн ԝан мәрьва сьлав кьн, йед кӧ тʹәзә һатьнә, аликʹарийе бьдьнә хушк-бьред дәсттәнг у нәфәред хԝәрʹа ԛәнщийе бькьн. Һәрге әм ӧса бькьн, Хԝәде ԝе жь мә рʹази бә у мә кʹәрәм кә (Рʹомайи 15:7; 1 Тимотʹейо 5:4, 8; 1 Йуһʹәнна 3:18). Сәва кӧ әм баԝәрийа хԝә бь кьред хԝә нишан кьн, мәщаләкә дьн әԝ ә, кӧ бь хирәт мьзгинийе бәла кьн (1 Тимотʹейо 4:16). Әм гьшк дькарьн пе кьред хԝә нишан кьн, ԝәки әм баԝәр дькьн кӧ һʹәму созед Йаһоԝа ԝе әʹсәйи бенә сери у рʹебәрийа ԝи йа һәрә баш ә. Һәрге әм ӧса бькьн, әм дькарьн дӧдьли нәбьн кӧ Хԝәде ԝе мә рʹаст һʹәсаб кә у мә ча досте хԝә нав кә. w23.12 2 ¶3; 6 ¶15

Гава Даԝьд Пʹадша бәр мьрьне бу, әԝи Сьлеманрʹа хәбәред жоре ньвиси (1 Пʹадшати 2:1, 3). Әв ширәт бона һʹәму бьред кӧ дьхԝазьн чʹәʹв бьдьнә Иса, гәләк фәрз ә. Сәва кӧ әԝана пешдачуйи бьн, әԝана гәрәке һин бьн гӧһ бьдьнә ԛанунед Хԝәде. Ӧса жи әԝана гәрәке принсипед Кʹьтеба Пироз әʹмьре хԝәйи һәррʹожида биньн сери (Луԛа 2:52). Чьрʹа гәләк фәрз ә кӧ бьред щаһьл бьбьнә шагьртед Иса йед гьһишти? Бьред мә һьм малбәтеда һьм жи щьватеда щабдарийед фәрз тиньн сери. Бьред щаһьл, бе шьк һун жи дьхԝазьн щабдарийа бьстиньн. Дьԛәԝьмә тә хԝәрʹа нет данийә, ԝәки бьби хьзмәткʹаре һәртʹьм, бәрдәстийе щьвате, у паше бьби рʹуспийе щьвате. Дьбәкә тӧ ӧса жи дьхԝази бьзәԝьщи у бьби бав (Әфәси 6:4; 1 Тимотʹейо 3:1). Сәва кӧ тӧ бьгьһижи ван нета, гавәкә фәрз әԝ ә, кӧ тӧ бьби Мәсиһийе рʹӧһʹанида гьһишти. w23.12 24 ¶1-2

Йаһоԝа бәрхед хԝәйә ԛимәт тʹәсмили рʹуспийед щьвате кьрьнә. Әв меред амьн гәләк жь Йаһоԝа рʹази нә, кӧ әԝ итʹбарийа хԝә ԝан тинә у бәрхед хԝә тʹәсмили ԝан кьрийә. У әԝана сәр хԝә дьхәбьтьн, ԝәки бьбьн шьванед ль гора дьле Йаһоԝа (Йерәмйа 3:15; 1 Пәтрус 5:2). Әм гәләк рʹази нә кӧ щьватед мәда шьванед ӧса һәнә! Рʹуспи дькарьн жь мәсәла Гидәоне һʹакьм гәләк тьшт һин бьн (Ибрани 6:12). Әԝи хьзмәткʹаред Хԝәде һьм дьпʹарастьн һьм жи шьванти ԝан дькьр (Һʹакьмти 2:16; 1 Дирок 17:6). Иро һʹале дьнйайе гәләк хьраб ә. Ләма жи гәләк фәрз ә кӧ рʹуспи хьзмәткʹаред Хԝәде бьбьнә хԝәйи (Кʹаред Шандийа 20:28; 2 Тимотʹейо 3:1). Әм дькарьн жь мьлукти у гӧһдарикьрьна Гидәон гәләк тьшт һин бьн. Чахе әԝи щабдарийед хԝә дьанин сери, лазьм бу кӧ әԝ гәләки сәбьр бькә. Һәрге әм рʹуспи ниньн жи, әм дькарьн рʹазибуна хԝә рʹуспийарʹа бьдьнә кʹьфше у пьштгьрийа ԝан бькьн (Ибрани 13:17). w23.06 2 ¶1; 3 ¶3