Кануна Пешьн

Гәло ԛәԝата Йаһоԝа һәйә кӧ мьрийа вәгәрʹинә жийине? Бешьк, әре! Чьмки әԝ «Хԝәдейе Һʹәму Зорайийе» йә (Әʹйанти 1:8). Ԛәԝата Йаһоԝа ӧса мәзьн ә, кӧ әԝ дькарә һʹәму дьжмьна, һәла һе мьрьне жи кʹӧта кә (1 Корьнтʹи 15:26). Мәʹникә дьн кӧ чьрʹа әм заньн, ԝәки Хԝәде дькарә мьрийа диса вәгәрʹинә жийине, әԝ ә, кӧ биранина ԝи бесинор ә. Хԝәде наве һәр стәйркәке занә (Ишайа 40:26). Кәсед мьри жи бира Хԝәдеда ньн (Ибо 14:13; Луԛа 20:38). Әԝ һәр тьшти һур бь һур дәрһәԛа кәсед мьри занә, мәсәлә рʹәнг-рʹуйе ԝан, хәйсәт-һʹӧнӧред ԝан у ӧса жи биранин у сәрһатийа ԝан. Чьрʹа әм баԝәрийа хԝә созе Йаһоԝа тиньн, кӧ әԝе мьрийа вәгәрʹинә жийине? Чьмки һьм хԝәстьн һьм жи ԛәԝата ԝи һәйә, ԝәки ви созе хԝә бинә сери. Мәʹникә дьн жи әв ә, кӧ Йаһоԝа бәре жи кәсед мьри сах дькьр. Мәсәлә, әԝи ԛәԝат да Иса у һьнә хьзмәткʹаред хԝәйә амьн, кӧ ве йәке бькьн. w23.04 9-10 ¶7-9

Һәрге әм бь зьманәки нәрм хәбәр дьн, кәсед дьн ԝе һазьр бьн гӧһ бьдьнә мә у хәбәрдане бәрдәԝам кьн. Һәмьки һәрге кәсәк бьхԝазә тʹәви мә бькʹәвә дәʹԝе, йан ԛәрфед хԝә баԝәрийа мә бькә, әʹсәйи нинә әм щаба ԝи бьдьн (Мәтʹәлок 26:4). Ле һʹәчʹи зәʹф мәрьв ӧса ниньн. Әԝана һазьр ьн гӧһ бьдьнә мә. Әшкәрә йә, кӧ чахе әм нәрм у мьлук ьн, кʹара ве йәке гәләк ә. Гава тӧ щаба пьрсед чәтьн дьди у рʹасти ԛәрфа тейи, Йаһоԝарʹа дӧа бькә у ԛәԝате бьхԝазә, ԝәки тӧ мьлук у нәрм бьмини. Бир нәкә, нәрми у мьлукти наһельн ԝәки шәрʹ-дәʹԝ пешда бен. У щабед тәйә нәрм у мәʹрифәт, дькарьн сәр кәсәки һʹӧкӧм кьн, кӧ әԝ ньһерʹандьна хԝә дәрһәԛа мә у рʹастийед Кʹьтеба Пироз, бьгӧһезә. Бона баԝәрийа хԝә, «һәр гав һазьр бьн, щаба ԝан һʹәмуйа бьдьн. . . . Ле ԝе йәке бь хоф у мьлуктийе бькьн» (1 Пәтрус 3:15). Бәле, бьра мьлукти ԛәԝата тә бә! w23.09 19 ¶18-19

Ԝәрә әм чар гава шеԝьр кьн, бь сайа кʹижана әм дькарьн сәбьре бьдьнә кʹьфше? Йа пешьн, мәрьве бь сәбьр зу һерс накʹәвә. Дәрәщед чәтьнда, гава кәсәк һерса ԝи рʹадькә, әԝ рʹьһʹәт дьминә у һʹәйфе һьлнадә (Дәркʹәтьн 34:6). Йа дӧда, мәрьве бь сәбьр бь дьлрʹьһʹәти дькарә һивийа тьштәки бьсәкьнә. Гава тьштәк дәрәнги дькʹәвә, мәрьве бь сәбьр диса жи һәр тьшти дькә, ԝәки бинтәнг у әʹщьз нәбә (Мәтта 18:26, 27). Йа сьсийа, мәрьве бь сәбьр ләз накʹәвә. Гава кәсәки бь сәбьр шьхӧләки фәрз дькә, әԝ ве йәке ләз-бәз накә ԝәки йаха хԝә ле хьлаз кә. Дәԝсе, әԝ ԝәʹдә бона ԝи шьхӧли кʹьфш дькә, ԝәки паше ча лазьм ә әви шьхӧли бькә. Йа чара, мәрьве бь сәбьр дәрәщед чәтьнда жи бе газьна сәбьр дькә. Мәрьве бь сәбьр дина хԝә дьдә сәр тьштед позитив, у чь жь дәсте ԝи те дькә, ԝәки тʹьме бь шабуне Йаһоԝарʹа хьзмәт кә (Колоси 1:11). Чаԝа хьзмәткʹаред Хԝәде, әм гәрәке ван һʹәму дәрәщада сәбьре бьдьнә кʹьфше. w23.08 20-21 ¶3-6

Йаһоԝа Хԝәде дьвинә кӧ дьле мәда чь һәйә. Ләма жи, гәрәке әм дьле хԝәйи симболик рʹьнд бьбьнә хԝәйи. Тьште һәри фәрз әԝ нинә кӧ әм рʹува чаԝа ньн, ле әв ә кӧ кʹурайа дьле мәда бь рʹасти чь һәйә. Һәрге биланийа Хԝәде һʹьш у дьле мәда һәбә, Әԝе мә һʹьз бькә (Йуһʹәнна 4:14). Ӧса әме жь бенамусийе, дәрәԝед Мире-щьна у жь мәрьвед хьраб, бенә хԝәйкьрьне (1 Йуһʹәнна 5:18, 19). Чьԛас әм незики Йаһоԝа бьн, һаԛас һе зедә әме ԛәдьре ԝи бьгьрьн у ԝи һʹьз бькьн. Әм нахԝазьн дьле Баве хԝәйи әʹзмана бешиньн, ләма жи әме жь фькьред кӧ дькарьн бьбьнә сәбәбе гӧнәкьрьне, бьрʹәвьн. Щарәке һьндьк мабу хушка мә Марта, йа кӧ Хорватйайеда дьжи, бенамуси бькьра. Әԝе ньвиси: «Мьнрʹа чәтьн бу бь зәлали бьфькьрьм у хԝә контрол кьм, ԝәки гӧнә нәкьм. Ле тьрса бәр Йаһоԝа әз пʹарастьм». Гәло чаԝа? Мартайе гот, кӧ әԝ фькьри ԝәки чь дькарә бьԛәԝьмә һәрге әԝ бенамусийе бькә. Әм жи гәрәке сәр ве йәке бьфькьрьн. w23.06 20-21 ¶3-4

Иса заньбу кӧ ԛьрара Йаһоԝа әв ә, ԝәки наве хԝә пироз кә у жь һʹәму ләкʹә у дәрәԝа паԛьж кә. Ләма жи Ахайе мә, демәк Иса, шагьртед хԝә һин кьр кӧ ӧса дӧа бькьн: «Баве мәйи әʹзмана, бьра наве тә пироз бә» (Мәтта 6:9). Иса рʹьнд фәʹм дькьр кӧ пирозкьрьна наве Хԝәде, пьрса һәрә мәзьн ә, кӧ һʹәму әʹфрина дькʹәвә. Иса жь һәр кәси зедәтьр хирәт кьрийә кӧ наве Йаһоԝа пироз кә. Диса жи, гава дьжмьна әԝ гьртьн, ԝана бӧхдан авитьнә ԝи кӧ әԝ кʹьфьрийа Хԝәде дькә. Бе шьк, Иса беһӧрмәткьрьна наве Хԝәдейи пироз һʹәсаб дькьр гӧне һәри мәзьн. Ләма әԝ гәләк әʹщьз у дьлтәнг дьбу, чьмки әԝ ԝе бона ве йәке бьһата сущдаркьрьне. Дьԛәԝьмә һәма әв бу сәбәба сәрәкә, кӧ чьрʹа Иса пешийа гьртьна хԝә ӧса дьлтәнг бу (Луԛа 22:41-44). w24.02 11 ¶11

Рʹәва жийинеда, әм гәрәке Йаһоԝа у Иса жь мәрьвед хԝә зедәтьр һʹәз бькьн (Мәтта 10:37). Ле әв йәк найе һʹәсабе кӧ әм гәрәке щабдарийед малбәте нәйньн сери. Сәва кӧ Хԝәде у Иса жь мә рʹази бьн, әм борщдар ьн щабдарийед малбәте биньн сери (1 Тимотʹейо 5:4, 8). Һәрге әм ӧса бькьн, әме шабуне бьстиньн. Йаһоԝа дьхԝазә кӧ жьн-мер һәвдӧ һʹәз бькьн у ԛәдьре һәв бьгьрьн. Әԝ дьхԝазә ԝәки де-бав зарʹед хԝә һʹәз бькьн у ԝана һин кьн. Ӧса жи әԝ дьхԝазә, кӧ зарʹ гӧрʹа де-баве хԝә бькьн. Бь ви щурʹәйи малбәтеда ԝе әʹдьлайи һәбә (Әфәси 5:33; 6:1, 4). Малбәт гәрәке хԝә бьсперьн биланийа Кʹьтеба Пироз. Изьне нәдә ԝәки ньһерʹандьна ван мәрьва, занәбуна кʹижана кӧ һәйә, әʹдәт у һәстед ԝә, сәр сафикьрьнед ԝә һʹӧкӧм кьн. Әʹдәбйәтед мәда, ширәтед баш һәнә. Ԝана рʹьнд лекʹолин бькә. Әԝана ԝе али тә бькьн, ԝәки тӧ принсипед Кʹьтеба Пироз әʹмьре хԝәда бьди хәбате. w23.08 28 ¶6-7

Хушкед мә гәрәке фәрәсәтед керһати нав хԝәда пешда биньн. Һьнә тьштед кӧ әԝана зарʹотийеда һин дьбьн, тʹәмамийа әʹмьре ԝанда кʹаре дьдә ԝан. Мәсәлә, һин бә кӧ рʹьнд бьхуни у бьньвиси. Һьнә културада, фәрз нинә кӧ жьн хԝәндьн у ньвисандьне бьзаньбә. Ле әв йәк бона һʹәму Мәсиһийа гәләк фәрз ә (1 Тимотʹейо 4:13). Чьԛас зор бә жи, нәһелә кӧ тʹӧ тьшт рʹийа тә бьгьрә, ԝәки тӧ һин би кӧ рʹьнд бьхуни у бьньвиси. Ле әв йәк чьрʹа ӧса фәрз ә? Фәрәсәтед ӧса дькарьн али тә бькьн, ԝәки тӧ хԝәрʹа хәбатәкә баш бьвини. Ӧса жи, тӧйе бькарьби Хәбәра Хԝәде рʹьнд лекʹолин бьки у бьби дәрсдаре Хәбәра Хԝәде. Ле йа һәрә фәрз әв ә, кӧ чахе тӧ Хәбәра Хԝәде бьхуни у лекʹолин бьки, тӧйе дьһа незики Йаһоԝа би (1 Тимотʹейо 4:15). w23.12 20 ¶10-11

Аликʹарийе жь Йаһоԝа бьхԝазә, ԝәки щерʹьбандьнада амьн бьмини. Әм мәрьвнә гӧнәкʹар ьн, ләма жи әм гәрәке һәр тьшти бькьн, ԝәки һьмбәри щерʹьбандьна шәрʹ кьн. Дьжмьне мә Мире-щьна чь жь дәсте ԝи те дькә, ԝәки әм щерʹьбандьнада амьн нәминьн. Мәсәлә, әԝ ӧса дькә, ԝәки әм ԝәʹдәдәрбазкьрьнед нәщайизва мьжул бьн. Әԝ дьхԝазә кӧ һʹьше мә тьштед хьрабва тʹьжә бә, ԝәки әм гӧнед гьран бькьн (Маркос 7:21-23; Аԛуб 1:14, 15). Мәрʹа аликʹарийа Йаһоԝа лазьм ә, ԝәки әм хԝә жь тьштед нәрʹаст дур бьгьрьн. Щарәке Иса Хԝәдерʹа ӧса дӧа кьр: «Мә нәбә щерʹьбандьне, ле мә жь йе хьраб хьлаз кә» (Мәтта 6:13). Йаһоԝа һәртʹьм һазьр ә али мә бькә, ле әм гәрәке бона ве йәке ԝирʹа дӧа бькьн. w23.05 6-7 ¶15-17

Жьн-меред кӧ достийа хԝә тʹәви Баве хԝәйи әʹзмана ԛимәт дькьн, һазьр ьн гӧһ бьдьнә ширәтед Хԝәде. У әв йәк ԝе али ԝан бькә проблема алт кьн, ԝәки һ›ьзкьрьна ԝан һьндава һәвда сар нәбә. Жьн-мере р›ӧһ›анида ԛәԝи, һәр тьшти дькьн, ԝәки чʹәʹв бьдьнә Йаһоԝа у мина ԝи дьлован бьн, бь сәбьр бьн у афукʹар бьн (Әфәси 4:32–5:1). Һʹӧнӧред ӧса али жьн-мера дькьн, ԝәки дьһа зедә һәвдӧ һʹьз бькьн. Хушкәкә бь наве Лена, йа кӧ 25 сала зедәтьр меркьри йә, дьбежә: «Мьнрʹа чәтьн нинә ԛәдьре йәки хԝәдеһʹьз бьгьрьм у ԝи һʹьз бькьм». Ԝәрә әм дина хԝә бьдьнә мәсәләкә жь Кʹьтеба Пироз. Гәло Йаһоԝа чьма Усьв у Мәрйәм бьжарт кӧ әԝана бьбьн де-баве Мәсиһе создайи? Ԝана Йаһоԝа һʹьз дькьр, у Йаһоԝа заньбу ԝәки Әԝе әʹмьре ԝанда щийе пешьн бьгьрә. w23.05 21 ¶3-4

Рʹебәре мә Иса беԛьсур ә, ле әԝ бьрен, кʹижана кӧ әԝ дьдә хәбате ԝәки рʹебәрийа мә бькьн, мәрьвнә ԛьсурдар ьн. Дьбәкә щара мәрʹа чәтьн ә гӧһ бьдьнә ԝан, илаһи һәрге әԝана нә ль гора дьле мә тьштәки жь мә дьхԝазьн. Щарәке, Пәтрусе шанди жь мәләке Хԝәде рʹебәри станд, кʹижан кӧ пешийе әԝи нәхԝәст бинә сери. Әԝи гәрәке гоште һʹәйԝанед кӧ ль гора Ԛануна Муса ԛәдәхәкьри бун, бьхԝара. Пәтрус әв рʹебәри нә тʹәне щарәке, ле се щара инкʹар кьр! (Кʹаред Шандийа 10:9-16) Гәло чьрʹа? Чьмки әв рʹебәрийа тʹәзә, бона ԝи тьштәки нәтʹәбийәти бу. Хенщи ве йәке, Паԝлосе шанди һазьр бу ԝи чахи жи гӧһ бьдә рʹебәрийе, гава Оршәлимеда, меред әʹмьрда мәзьн кӧ Мәсиһи бун, жерʹа готьн, ԝәки әԝ тʹәви чар мера һәрә пʹарьстгәһе у ԝедәре хԝә ль гора Ԛануне паԛьж кә. Бь ве йәке Паԝлос ԝе бьда кʹьфше, ԝәки әԝ Ԛануне ԛәбул дькә. Ле әԝи заньбу кӧ Мәсиһи ида бьн һʹӧкӧме Ԛануна Мусада ниньн. У әԝи тʹӧ шаши нәкьрьбу. Ле диса жи, Паԝлос дәрберʹа гав авит. Әԝи «әԝ мәри рʹожа дьне һьлдан, тʹәви ԝан паԛьж бу» (Кʹаред Шандийа 21:23, 24, 26). Паԝлос гӧһ да рʹебәрийе у бь ве йәке йәкти хԝәй кьр (Рʹомайи 14:19, 21). w23.10 10 ¶15-16

Бь рʹасти, һәвал гәрәке һәвдӧ нәтьрсьн. Ле рʹеза сәрәкәда те готьне, ԝәки кʹе кӧ дьхԝазә бьбә досте Йаһоԝайә незик, гәрәке хофа Хԝәде дьле ԝанда һәбә. Лазьм ә кӧ тьрса Хԝәде дьле һʹәму хьзмәткʹаред Йаһоԝада һәбә. Ле чь те һʹәсабе Хԝәде бьтьрсьн? Кәсе кӧ бь щурʹе рʹаст жь Хԝәде дьтьрсә, бь рʹасти ԝи һʹьз дькә. Әԝ нахԝазә тьштәки хьраб бькә, чь кӧ дькарә зьраре бьдә достийа ԝи тʹәви Хԝәде. Тьрса Хԝәде дьле Иса Мәсиһда жи һәбу (Ибрани 5:7). Зьраве ԝи жь Йаһоԝа нәдьԛәтийа, ле әԝи Хԝәде һʹьз дькьр у бь дьл ԛьрара ԝи дьани сери (Ишайа 11:2, 3; Йуһʹәнна 14:21, 31). Һʹӧнӧред Йаһоԝайә сәрәкә һʹьзкьрьн, билани, һәԛи у ԛәԝат ә. Ләма әм жи мина Иса ԛәдьре ԝи дьгьрьн у һӧрмәте дьдьнә ԝи. Ӧса жи әм заньн, кӧ Йаһоԝа мә һʹьз дькә у рʹебәрийа мә дькә. Бь готьн у кьред хԝә, әм дькарьн дьле ԝи йан бешиньн йан жи ша бькьн (Зәбур 78:41; Мәтʹәлок 27:11). w23.06 14 ¶1-2; 15 ¶5

Гава Узийа бу Пʹадшаки ԛәԝи, әԝи бир кьр ԝәки Канийа ԛәԝате у дәԝләмәндтийа ԝи, Йаһоԝа бу. Гәло әв чь дәрс ә бона мә? Гәрәке әм тʹӧ щар бир нәкьн, ԝәки һәр кʹәрәм у щабдари әм жь Йаһоԝа дьстиньн. Дәԝса кӧ әм бона пешдачуйина хԝә пәсьна бьдьнә хԝә, әм гәрәке пәсьна бьдьнә Йаһоԝа (1 Корьнтʹи 4:7). Әм гәрәке бь мьлукти ԛәбул кьн, ԝәки әм ԛьсурдар ьн у ләма жи әм һʹәԝще ширәта нә. Бьраки ԝәкә 60 сали, ӧса ньвисийә: «Әз һин бум, кӧ бь зедәйи дәрһәԛа хԝә нәфькьрьм. Гава кәсәк мьнрʹа дәрһәԛа шашийед мьн дьбежә, әз хирәт дькьм ԝәки ве йәке ԛәбул кьм у хьзмәтийеда пешда һәрʹьм». Бәле, һәрге әм гӧһ бьдьн Йаһоԝа у мьлук бьминьн, әме бь жийинәкә хԝәш у бәхтәԝар бьжин (Мәтʹәлок 22:4). w23.09 10 ¶10-11

Ԛьрʹна йәкеда, лазьм бу кӧ шагьртед Иса сәбьр кьн. Хенщи чәтьнайед һәррʹожи, әԝана жь алийе рʹебәред Щьһуйа, дәԝләте у малбәта хԝә жи рʹасти пәйкʹәтьна дьһатьн, чьмки әԝана шагьртед Иса бун (Мәтта 10:21). У щьватеда жи әԝана гәрәке фәсал буна, ԝәки һинкьрьнед рʹабәра, йед кӧ дьхԝәстьн щӧдәбун бькьрана щьвате, сәр ԝана һʹӧкӧм нәкә (Кʹаред Шандийа 20:29, 30). Ле хьзмәткʹаред Хԝәде бь амьни тәйах дькьрьн (Әʹйанти 2:3). Гәло чь али ԝан дькьр? Әԝана дәрһәԛа сәрһатийед жь Ньвисаред Пироз кʹур дьфькьрин, мәсәлә, дәрһәԛа сәрһатийа Ибо, йе кӧ сәбьр дьда кʹьфше (Аԛуб 5:10, 11). Ԝана бона ԛәԝате дӧа дькьр (Кʹаред Шандийа 4:29-31). У ԝана бир нәдькьр, кӧ һәрге әԝана сәбьр кьн, Хԝәде ԝе әʹсәйи ԝана кʹәрәм кә (Кʹаред Шандийа 5:41). Һәрге әм сәрһатийед жь Хәбәра Хԝәде у әʹдәбйәтед мә бьхуньн у дәрһәԛа ԝан кʹур бьфькьрьн, әме жи бькарьбьн сәбьр кьн. w23.07 3 ¶5-6

Йаһоԝа у Иса ԝе тʹӧ щар мә нәһельн. Чахе Пәтрусе шанди Иса инкʹар кьр, лазьм бу кӧ әԝ сафикьрьнед фәрз бькә. Гәло әԝе диса бәрдәԝам кьра пәй Иса бьчуйа у хьзмәтийеда хирәт буйа? Иса жь Йаһоԝа лава дькьр кӧ баԝәрийа Пәтрус сьст нәбә. Иса Пәтрусрʹа бәʹса ве дӧайе кьр. Әԝи гот кӧ Пәтрус ԝе паше бькарьбә дьле хушк-бьра ԛәԝи кә (Луԛа 22:31, 32). Бе шьк, Пәтрус жь ван гьлийед Иса гәләк ԛәԝат станд! Гава әм мәщбур бьн кӧ сафикьрьнед фәрз бькьн, Йаһоԝа ԝе бь сайа шьванед дьлован дьле мә ԛәԝи кә, ԝәки әм амьн бьминьн (Әфәси 4:8, 11). Чаԝа кӧ Йаһоԝа бона Пәтрус у шандийед дьн хәм дькьр, Әԝе бона һʹәԝщед мә жи хәм бькә, һәрге әм шьхӧле Пʹадшатийе дайньн сәр щийе пешьн. w23.09 24-25 ¶14-15

Йаһоԝа һәр ԛәнщийа бьчʹук, йа кӧ әм бона кәсед дьн дькьн, дьвинә. Әԝ ԛәнщийа мә ча ԛӧрбанәкә ԛимәт һʹәсаб дькә у әԝе әʹсәйи мә хәлат кә. Дьԛәԝьмә тә бәре ча бәрдәстийе щьвате йан ча рʹуспи хьзмәт дькьр. Йаһоԝа хирәт у һʹьзкьрьна тә ԛә бир накә (1 Корьнтʹи 15:58). Әԝ дьвинә ԝәки тӧ диса жи һʹьзкьрьне нишан дьки. Йаһоԝа дьхԝазә кӧ әм һʹьзкьрьна һьндава ԝи у кәсед дьн, дьле хԝәда дьһа зедә пешда биньн. Һәрге әм Хәбәра Хԝәде бьхуньн, сәр ԝе кʹур бьфькьрьн у һәр рʹож Хԝәдерʹа дӧа бькьн, һʹьзкьрьна ортʹа мә у Хԝәде ԝе дьһа мәзьн бә. Гава әм али хушк-бьра дькьн, әм нишан дькьн кӧ әм жь дьл ԝана һʹьз дькьн. Чьԛас һʹьзкьрьна мә мәзьн бә, һаԛас әме дьһа незики Йаһоԝа у хушк-бьра бьн. У әме жь достийа тʹәви ԝан һʹәта-һʹәтайе шабуне бьстиньн! w23.07 10 ¶11; 11 ¶13; 13 ¶18

Һәр хьзмәткʹаре Хԝәде гәрәке хԝәха сафи кә, кӧ ча мьԛати сьһʹәта-ԛәԝата хԝә бә. Гава Мәсиһи дәрһәԛа метода ԛәнщкьрьне сафикьрьна дькьн, әԝана гәрәке гӧһ бьдьнә ԛанунед Кʹьтеба Пироз, ԝәки хԝә жь хуне у сербазийе дур бьгьрьн (Кʹаред Шандийа 15:20; Галати 5:19, 20). Ле һьнә дәрәщада әм гәрәке хԝәха сафи кьн, кӧ кʹижан методед ԛәнщкьрьне бьжберьн. Фьрԛи тʹӧнә әм чь дьфькьрьн дәрһәԛа фьлан метода ԛәнщкьрьне, ле йәкә әм гәрәке ԛәдьре сафикьрьна хушк-бьра бьгьрьн, чьмки әԝ сафикьрьна шәхси йа һәр кәси йә. Ләма жи әм гәрәке ван чар тьшта һьлдьн һʹәсаб: (1) Тʹәне Пʹадшатийа Хԝәде ԝе мә жь һʹәму нәхԝәшийа ԛәнщ кә (Ишайа 33:24). (2) Һәр хьзмәткʹаре Хԝәде гәрәке хԝәха бона хԝә сафикьрьнәкә лапә баш бькә у ве йәкеда «баԝәр бә» (Рʹомайи 14:5). (3) Әм нахԝазьн сәр сафикьрьнед кәсед дьн һʹӧкӧм кьн у бь кьред хԝә бьбьн мәʹни кӧ әԝана бьлькʹӧмьн (Рʹомайи 14:13). (4) Хьзмәткʹаред Хԝәде һʹьзкьрьне дьдьнә кʹьфше у фәʹм дькьн, ԝәки йәктийа щьвате жь ньһерʹандьнед ԝанә шәхси фәрзтьр ә (Рʹомайи 14:15, 19, 20). w23.07 24 ¶15

Достийа мә тʹәви Йаһоԝа тьштәки гәләк ԛимәт ә, ӧса нинә? Бь һʹәзара сала, бь милйона мәрьв жи гәләк ԛимәт кьрьнә әв дости (Зәбур 104:33, 34). Гәләк мәрьва жь алийе хԝәда ԛӧрбан кьрьнә, сәва кӧ Йаһоԝарʹа хьзмәт кьн. Мәсәлә, Нәзир, йан кәсе тʹәсмилкьри, кӧ ԝәʹде бәре Исраеледа дьжитьн, ԝана жи ӧса дькьр. Нәзира һьнә ԛӧрбан жь алийе хԝәда дькьрьн, сәва кӧ бь щурʹе мәхсус Йаһоԝарʹа хьзмәт кьн. Ль гора Ԛануна Муса, ча жьн ӧса жи мер дькарьбун ль бәр Йаһоԝа сонд бьхԝарана, кӧ сәр ԝәхтәке ча Нәзир бьжитана (Жьмар 6:1, 2). Жь бо пеканина ве сонде, лазьм бу кӧ ԝана хԝә ль һьнә ԛәйда бьгьртана, йед кӧ бона Исраелийед дьн нибун. Гәло һьнә мәрьва чьрʹа дьхԝәстьн бьбьнә Нәзир? Әʹйан ә мәʹни әв бу, кӧ ԝана Йаһоԝа гәләк һʹәз дькьр у дьхԝәстьн рʹазибуна хԝә бона кʹәрәмед ԝи нишан кьн (Ԛануна Дӧщари 6:5; 16:17). w24.02 14 ¶1-2

Кʹьтеба Пирозда, хәбәра Ибрани, йа кӧ ча «амьн» йан «һʹәзкьрьна амьн» һатийә ԝәлгәрʹандьне те һʹәсабе һәләԛәтийа кʹур у дьлгәрм, йа кӧ Хԝәде бь һʹәзкьрьне нишани хьзмәткʹаред хԝә дькә. Әв хәбәр ӧса жи бона ве һʹәзкьрьне те хәбьтандьне, йа кӧ ортʹа хьзмәткʹаред Хԝәдеда һәйә (2 Самуйел 9:6, 7). Ԝәхт шунда амьнийа мә дькарә дьһа ԛәԝи бә. Әме ньһа бьвиньн кӧ амьнийа Данийел чаԝа дьһа ԛәԝи дьбу. Амьнийа Данийел һьндава Йаһоԝа, гәләк щар дьһатә щерʹьбандьне. Гава әԝ 90 сал зедәтьр бу, әԝ рʹасти щерʹьбандьнәкә лапә мәзьн һат. Сәрокед ԛәсьре Данийел нәфрʹәт дькьрьн у ԛәдьре Хԝәдайе ԝи нәдьгьртьн. Ләма жи ԝана сафи кьр ԝәки Данийел бькӧжьн. У ль гора хԝәстьна ԝан, Пʹадша ԛанунәк дәрхьст, ԝәки бьщерʹьбиньн һәла Данийел ԝе пʹадшерʹа, йан Хԝәдайе хԝәрʹа амьн бьминә. Сәва кӧ Данийел избат кьра кӧ әԝ пʹадшарʹа амьн ә, гәрәке әԝи 30 рʹож Йаһоԝарʹа дӧа нәкьра. Данийел ԛайил нәбу (Данийел 6:12-15, 20-22). w23.08 5 ¶10-12

Йаһоԝа мәрʹа дьбежә, ԝәки әм бәрдәԝам кьн һʹәзкьрьне һьндава хушк-бьра бьдьнә кʹьфше. Һәрге хушк йан бьрак дьле мә бешинә жи, әм дькарьн баԝәр бьн, кӧ әԝи нәдьхԝәст ӧса бькьра, ле дьхԝазә ль гора принсипед Кʹьтеба Пироз бьжи (Мәтʹәлок 12:18). Кемасийед мә чьԛас зәʹф бьн жи, Хԝәде мә һʹәз дькә. Чахе әм шашийа дькьн, әԝ пьшта хԝә надә мә у сәр мә һерс накʹәвә (Зәбур 103:9). Бәле, Баве мәйи әʹзмана Хԝәдейе әʹфукʹар ә у әм жи гәрәке чʹәʹв бьдьнә ԝи! (Әфәси 4:32–5:1) Әм чьԛас незики хьлазийа ве дьнйа хьраб дьбьн, һаԛас әм гәрәке незики хушк-бьра бьн. Дьбәкә жь бо баԝәрийа мә пәй мә кʹәвьн у һәла һе мә бькьнә кәле жи. Һәрге ӧса бьԛәԝьмә, әме гәләк һʹәԝще аликʹарийа хушк-бьра бьн (Мәтʹәлок 17:17). w24.03 15-16 ¶6-7

Ньвисаред Пирозда дәрһәԛа сәрһатийед щаһьла те готьне, йед кӧ бунә достед Йаһоԝа у бь жийинәкә баш дьжитьн. Мәсәлә, Даԝьд щаһьлтийа хԝәда сафи кьрьбу Хԝәдерʹа хьзмәт кә у паше әԝ бу пʹадшаки амьн (1 Пʹадшати 3:6; 9:4, 5; 14:8). Һәрге тӧ сәрһатийа Даԝьд лекʹолин ки, мәсәла ԝи ԝе дьле тә ԛәԝи кә, ԝәки тӧ бь амьни Йаһоԝарʹа хьзмәт ки. Ӧса жи тӧ дькари һе зедә дәрһәԛа мәсәла Маркос йан жи Тимотʹейо лекʹолин ки. Ԝана жь щаһьлтийе бь амьни Йаһоԝарʹа хьзмәт дькьр. Хԝәде жь ԝан рʹази бу у әԝана жи бәхтәԝар бун. Сафикьрьнед кӧ тӧ иро дьки, ԝе сәр ахьрийа тә һʹӧкӧм кьн. Һәрге тӧ баԝәрийа хԝә Йаһоԝа бини у хԝә нәспери аԛьле хԝә, Әԝе али тә бькә ԝәки тӧ сафикьрьнед баш бьки. Тӧ дькари әʹмьрәки хԝәш ԛазанщ ки у бәхтәԝар би. Бир нәкә, Йаһоԝа ԛимәт дькә, чь кӧ тӧ бона ԝи дьки. Тʹӧ тьшт жь ве йәке четьр тʹӧнә йә, кӧ Йаһоԝарʹа хьзмәт ки! w23.09 13 ¶18-19

Паԝлосе шанди заньбу, кӧ хушк-бьра беԛьсур ниньн. Гәло әԝ рʹасти чь проблема дьһат? Мәсәлә, гава әԝ тʹәзә бу шагьрте Иса, һьнә хушк-бьред жь щьвата Оршәлиме итʹбарийа хԝә ԝи нәдьанин (Кʹаред Шандийа 9:26). Чәнд сал шунда, һьнә мәрьва дәрһәԛа ԝи тьштед хьраб готьн, кӧ наве ԝи рʹәш кьн (2 Корьнтʹи 10:10). Щарәке Паԝлос дит, кӧ рʹуспики ча жь тьрса бәр мәрьва, сафикьрьнәкә нәрʹаст кьр, жь бо чь жи бона һьнәка дькарьбу бьбуйа кәвьре лькʹӧмандьне (Галати 2:11, 12). Паԝлос ӧса жи жь бо кьред һәвале хԝә, Маркос, гәләк әʹщьз бу (Кʹаред Шандийа 15:37, 38). Ле йәкә әԝ жь хушк-бьра нәдьрʹәвийа у тʹәрка хьзмәтийе нәдьда. Гәло чь али Паԝлос кьр тәйах кә? Паԝлос хушк-бьра һʹәз дькьр, ләма жи әԝи бь зедәйи дина хԝә нәдьда кемасийед ԝан. Дәԝса ве йәке, әԝи дина хԝә дьда хәйсәтед ԝанә баш. Бь сайа һʹәзкьрьне, Паԝлос дьбахшандә мәрьва. w24.03 15 ¶4-5

Гәләк сәрһатийед жь Кʹьтеба Пироз нишан дькьн, ԝәки мьлукти чьԛас ԛимәт ә. Мәсәлә, гава Исһаԛ ль һәрема Гераре щи-ԝар бу, Фьльстийа жь һʹәвсудийе биред аве, йед кӧ хӧламед баве ԝи кʹола бун, хьтьмандьн. Дәԝса кӧ әԝ тʹәви ԝан шәрʹ бькә, Исһаԛ малбәта хԝәва жь ԝедәре дәрбази щики дьн бу у биред тʹәзә кʹола (Дәстпебун 26:12-18). Ле Фьльстийа готә ԝан: «Әва ава мә йә». Ԝе щаре жи әԝи әԝ чәтьнайи бь әʹдьлайи сафи кьр (Дәстпебун 26:19-25). Гава кәсед дьн ԝи әʹщьз дькьрьн йан һерса ԝи данин, гәло чь али ԝи дькьр мьлук бьминә? Бе шьк, мәсәла де-баве ԝи гәләк сәр ԝи һʹӧкӧм кьрьбу. Әԝи дьдит ԝәки баве ԝи Бьраһим мәрьвәки әʹдьлайиһʹәз ә у дийа ԝи Сәра жи йәкә «мьлук у гьранә» (1 Пәтрус 3:4-6; Дәстпебун 21:22-34). w23.09 15 ¶4

Ԝәʹде кʹьфшкьрида, Йаһоԝа Кӧрʹе хԝәйи тайе тʹәне шандә сәр әʹрде. Йаһоԝа дьхԝәст, ԝәки Иса дәрһәԛа Пʹадшатийе мәрьва һин кә у әʹмьре хԝә ча ԛӧрбан бьдә, сәва кӧ әм жь гӧнә у мьрьне хьлаз бьн. Паше, Йаһоԝа Иса жь мьрьне рʹакьр у диса вәгәрʹандә сәр әʹзмана, ԝәки әԝ бьбә Пʹадше Пʹадшатийа Хԝәде. Тʹема сәрәкә йа Кʹьтеба Пироз әв ә, кӧ Йаһоԝа ԝе бь сайа Пʹадшатийа хԝә, кʹижанеда Мәсиһ сәрԝертийе дькә, нета хԝә бинә сери. Бь ви щурʹәйи, наве Ԝи ԝе бе пирозкьрьне у жь һʹәму дәрәԝа бе паԛьжкьрьне. Нета Йаһоԝа найе гӧһастьне. Әԝи соз дайә кӧ һʹәму готьнед ԝи, ԝе әʹсә бенә сери (Ишайа 46:10; Ибрани 6:17, 18). Дьнйа ԝе бьбә щьнәт у мәрьвед беԛьсур у рʹаст ԝе «һʹәта-һʹәтайе» сәр рʹуйе әʹрде бьжин (Зәбур 22:26). Ле нета Йаһоԝа нә тʹәне әԝ ә. Әԝе һʹәму хьзмәткʹаред хԝәйә сәр әʹзмана у йед сәр әʹрде, бькә йәк. Паше, һәр кәс ԝе бь амьни пьштгьрийа Сәрԝертийа Йаһоԝа бькә (Әфәси 1:8-11). Сәва кӧ Йаһоԝа нета хԝә бинә сери, Әԝи рʹекә лапә баш бьжартийә. Гәло тӧ ве йәкерʹа фьрнаԛ наби? w23.10 20 ¶7-8

Чахе Щьһуйа жь Бабилоне дәркʹәтьн у гьһиштьнә Оршәлиме, әԝана рʹасти чәтьнайед гьран һатьн. Ԝана нькарьбу әʹбура мала хԝә бькьра, ԝи чахи һʹале политики дьһа хьраб дьбу у әԝана рʹасти пәйкʹәтьна дьһатьн. Жь бо ван чәтьнайа, һьнәкарʹа зор бу, кӧ дина хԝә бьдьнә авакьрьна пʹарьстгәһа Йаһоԝа. Ләма жи, сәва кӧ хирәта ԝан зедә кә, Йаһоԝа Һагай у Зәкәрйа пʹехәмбәр шандьнә щәм ԝан у бь сайа һелана ван пʹехәмбәра дьле ԝан гәләк ԛәԝи бу (Һагай 1:1; Зәкәрйа 1:1). Ԝәкә 50 сал шунда, Щьһу диса сьст бун. Паше Әзра, йе кӧ бәргьрәки Ԛанунейә һостә бу, жь Бабилоне һатә Оршәлиме. Сәва кӧ хьзмәткʹаред Хԝәде пешийа һәр тьшти дина хԝә бьдьнә һʹәбандьна рʹаст, Әзра әԝана һелан кьрьн (Әзра 7:1, 6). Готьнед Һагай у Зәкәрйа али хьзмәткʹаред Хԝәде дькьр, кӧ ԝәʹде пәйкʹәтьна тʹьме хԝә бьсперьн Йаһоԝа. Иро жи гьлийед ԝан дькарьн али мә бькьн, кӧ әм ԝәʹде чәтьнайа, хԝә бьсперьн Йаһоԝа (Мәтʹәлок 22:19). w23.11 14-15 ¶2-3

Әм чаԝа дькарьн һʹәзкьрьна хԝә кәсед дьнрʹа нишан кьн? Мәщаләк әԝ ә, кӧ әм бь дьлшәԝатийе «бәр дьле һәвда» бен (1 Тʹесалоники 4:18). Гава әм ԛьсур у кемасийед кәсед дьн дьбахшиньн, һʹәзкьрьна мә һьндава һәвда ԛәԝи дьбә. Гәло чьрʹа ӧса фәрз ә, кӧ әм иро һәв һʹәз бькьн? Пәтрус ӧса готьбу: «Ахьрийа һәр тьшти незик буйә. . . . Бәри һәр тьшти, һʹьзкьрьна ԝә һьндава һәвда бь дьл у щан бә» (1 Пәтрус 4:7, 8). Хьлазийа ве дьнйа хьраб незик дьбә, ләма жи әм гәрәке бона чь һазьр бьн? Иса пешда дәрһәԛа пәйчуйед хԝә ӧса готьбу: «Бона наве мьн һуне бәр чʹәʹве һʹәму мьләта рʹәш бьн» (Мәтта 24:9). Сәва кӧ әм һьмбәри ве нәфрʹәтийе Йаһоԝа Хԝәдерʹа амьн бьминьн, гәрәке әм тʹьфаԛи у йәктийа хԝә бьпʹарезьн. Һәрге әм хушк-бьра һʹәз бькьн, Мире-щьна ԝе тʹӧ щар нькарьбә мә жь һәв вәԛәтинә (Филипи 2:1, 2). w23.11 13 ¶18-19

Ԛәԝата рʹастийед Кʹьтеба Пироз гәләк мәзьн ә. Гава әм мәрьварʹа дәрһәԛа Йаһоԝа у һʹӧнӧред ԝи гьли дькьн, әм дьвиньн кӧ һʹӧкӧме дәрәԝед Мире-щьна чьԛас дьчә сьст дьбә, у чʹәʹвед мәрьва вәдьбьн. Әԝана һеди-һеди фәʹм дькьн кӧ Баве мәйи дьлован йәки чаԝа йә, у әԝана жь ԛәԝата ԝийә бесинор һʹәйран-һʹӧжмәкʹар дьминьн (Ишайа 40:26). У әԝана итʹбарийа хԝә һәԛийа ԝийә беԛьсур тиньн (Ԛануна Дӧщари 32:4). Әԝана жь биланийа ԝийә мәзьн гәләк тьшт һин дьбьн (Ишайа 55:9; Рʹомайи 11:33). У гава әԝана педьһʹәсьн кӧ Хԝәде һʹәзкьрьн ә, дьле ԝан рʹьһʹәт дьбә (1 Йуһʹәнна 4:8). Әԝана чьԛас һе незики Йаһоԝа дьбьн, һаԛас һевийа жийина һʹәта-һʹәтайе дьле ԝан дьгьрә. Ԛәдьрәки чьԛас мәзьн ә, кӧ әм дькарьн али мәрьва бькьн, ԝәки әԝана незики Баве хԝәйи әʹзмана бьн! Гава әм ви шьхӧли дькьн, Йаһоԝа мә ча һәвалкʹаред хԝә һʹәсаб дькә (1 Корьнтʹи 3:5). w24.02 12 ¶15

Һәрге тӧ Кʹьтеба Пироз һин дьби йан жи һәрге де-баве тә Шәʹдед Йаһоԝа нә, гәло тӧ дьхԝази бейи ньхӧмандьне? Әв нетәкә гәләк баш ә! Ле пешийа кӧ тӧ бейи ньхӧмандьне, тӧ гәрәке хԝә тʹәсмили Йаһоԝа ки. Гәло тӧ ча дькари хԝә тʹәсмил Йаһоԝа бьки? Тӧ дӧада гәрәке соз бьди Ԝи, ԝәки тӧйе тʹәне ԝирʹа хьзмәт ки у ԛьрара ԝи бона тә ԝе сәр щийе пешьн бә. Бь ви щурʹәйи тӧ соз дьди Йаһоԝа, ԝәки тӧйе ԝи «бь тʹәмамийа дьле хԝә, бь тʹәмамийа щанийа хԝә, бь тʹәмамийа һʹьше хԝә у бь тʹәмамийа ԛәԝата хԝә» һʹәз бьки (Маркос 12:30). Чахе тӧ хԝә тʹәсмили Йаһоԝа дьки, әв йәк тʹәне тӧ у Йаһоԝа заньн, ле гава тӧ тейи ньхӧмандьне, әв йәк мәрьвед дьн жи дьвиньн. Сонда тʹәсмилбуйине тьштәки гәләк пироз ә, у Йаһоԝа дьхԝазә тӧ ль гора ве сонда хԝә бьжийи (Ԝаиз 5:4). w24.03 2 ¶2; 3 ¶5

Һʹәму зәԝащада проблем дькарьн пешда бен. Кʹьтеба Пироз дәрһәԛа ԝан, йед кӧ зәԝьщи нә, дьбежә кӧ әԝана ԝе «рʹасти охьрмед гьран бен» (1 Корьнтʹи 7:28). Гәло чьрʹа? Чьмки жьн-мер ԛьсурдар ьн, хәйсәте ԝан жь һәв щӧдә йә у дьбәкә әԝана културед щӧдәда мәзьн бунә. Паши зәԝаще, дьбәкә һьнә хәйсәтед ԝанә әʹщеб әшкәрә бьн. Тьштед ӧса дькарьн проблема ортʹа ԝанда пешда биньн. Дәԝса кӧ тʹәвайи проблема сафи кьн, дьбәкә әԝана һәвдӧ сущдар кьн. Дьԛәԝьмә әԝана һәла һе бьфькьрьн жь һәв башԛә бьжин, йан жи жь һәвдӧ бьԛәтьн. Гәло әв сафикьрьна рʹаст ә? На. Һәрге зәԝащ зор бә жи, Йаһоԝа дьхԝазә кӧ жьн у мер һәв нәԛәтьн. w24.03 16 ¶8; 17 ¶11

Паши сонда тʹәсмилбуйине у ньхӧмандьне, мә Йаһоԝа дьһа баш нас кьр у һе зедә Ԝи һʹәз кьр. Паши ве йәке, гӧмана мәйә жийина һʹәта-һʹәтайе сәр әʹрде щьнәте дьһа ԛәԝи бу (Ибрани 5:13–6:1). Мә әʹмьре хԝәда дитийә кӧ готьнед жь Рʹомайи 5:2-4 чьԛас ԛәԝи нә. Әм рʹасти гәләк тәнгасийа һатьнә, ле мә сәбьр кьрийә у дитийә, кӧ Хԝәде жь мә рʹази йә. Хԝәде мә һʹәз дькә, ләма жи әм һе зедә баԝәр дькьн ԝәки созед ԝи ԝе бенә сери. Гӧмана мә гав бь гав ԛәԝи дьбә у дьһа реали дьбә. Гӧмана мә һе зедә һʹӧкӧм дькә сәр сафикьрьнед мә, һәләԛәтийа мә тʹәви малбәте у сәр ве йәке, кӧ әм ча ԝәʹде хԝә хәрщ дькьн. Паԝлосе шанди достед Хԝәдерʹа ньвиси, кӧ һевийа ԝан ԝе бе сери (Рʹомайи 15:13). w23.12 12-13 ¶16-19

Гава әм дәрдәки дькʹьшиньн, дьбәкә һәст у фькьред мә тʹәвльһәв бьн, мина гәмике кӧ ԝәʹде фьртоне вьрда-ԝеда дьчә. Гава әм хԝә ӧса тʹәхмин дькьн, гәло Йаһоԝа ча али мә дькә? Йаһоԝа соз дайә, кӧ әԝе мә ԛәԝи кә. Гава фьртонә рʹадьбә, дьбәкә гәми гәләк дьһʹәжә. Гәләк гәмийава һәр дӧ алийава стабилизатор һәнә, бь сайа чь жи гәми нӧԛи аве нәбә, у ба гәмийе вьрда-веда нәвежә. Бь сайа ве йәке, рʹеԝити бона рʹеԝийа рʹьһʹәт дьбә. Ле сәва кӧ кʹара ван стабилизатора һәбә, лазьм ә кӧ гәми пешда һәрә. Бь ԝи щурʹәйи, һәрге әм ԝәʹде тәнгасийа бәрдәԝам кьн бь амьни Йаһоԝарʹа хьзмәт кьн, әԝе мә ԛәԝи кә. w24.01 22 ¶7-8

Гава тьрс дькʹәвә дьле тә, дәрһәԛа ԝан тьшта бьфькьрә, чь кӧ Йаһоԝа ида кьрийә. Дина хԝә бьдә әʹфрина, мәсәлә чʹьвик у кӧлирка. Әԝана нькарьн Йаһоԝарʹа хьзмәт кьн, ле диса жи Йаһоԝа бона ԝан хәм дькә. Әв йәк кӧ Йаһоԝа ӧса бона ԝан хәм дькә, гәло баԝәрийа тә дьһа ԛәԝи накә, кӧ Әԝе бона тә һе зедә хәм бькә? (Мәтта 6:25-32) Ӧса жи бьдә бәр чʹәʹве хԝә, кӧ Йаһоԝа бона хьзмәткʹаред хԝә чь кьрийә. Мәсәлә, сәрһатикә Кʹьтеба Пироз лекʹолин кә, йан жи сәрһатийед хушк-бьра бьхунә. Хенщи ве йәке, бинә бира хԝә кӧ Йаһоԝа һʹәта ньһа ча али тә кьрийә. Бәʹса хәбәре, әԝи ча рʹийа рʹастийе нишани тә кьрийә? (Йуһʹәнна 6:44) Әԝи ча щаба дӧайед тә дайә? (1 Йуһʹәнна 5:14) Тӧ ча һәр рʹож жь ԛӧрбана Иса кʹаре дьстини? (Әфәси 1:7; Ибрани 4:14-16) w24.01 4 ¶6; 7 ¶17