Мьждар

Де-бав дькарьн али зарʹед хԝә бькьн, кӧ әԝана ль гора салед хԝә, щабед хԝә һазьр бькьн. Щарна тʹемед гәләк фәрз сәр щьвате тенә лекʹолинкьрьне, мәсәлә проблемед зәԝащеда йан пьрсед нав-намусийева гьредайи. Ле диса жи зарʹа ԝә дькарә сәр һьнә пьрса щаба хԝә бьдә. Ӧса жи зарʹед хԝәрʹа шьровәкьн, кӧ гава әԝана дәстед хԝә бьльнд бькьн, дьбәкә бьра щара жь ԝан пьрс нәкә. Әв йәк ԝе али ԝан бькә, кӧ нәхәйидьн (1 Тимотʹейо 6:18). Әм гьшк дькарьн щабед кӧ рʹумәте дьдьн Йаһоԝа у дьле хушк-бьра ԛәԝи дькьн, һазьр бькьн (Мәтʹәлок 25:11). Щарна әм дькарьн бәʹса дәрәща хԝә бькьн, ле гәрәке әм гәләки дина мәрьва нәкʹьшиньн сәр хԝә (Мәтʹәлок 27:2; 2 Корьнтʹи 10:18). Дәԝса ве йәке, әм гәрәке дина мәрьва бькʹьшиньн сәр Йаһоԝа, Хәбәра ԝи у щьмәʹта ԝи (Әʹйанти 4:11). w23.04 24-25 ¶17-18

Сәва кӧ әм һʹьшйар бьминьн у һаш жь хԝә һәбьн, лазьм ә кӧ әм һьм Хԝәде һьм мәрьва һʹьз бькьн (Мәтта 22:37-39). Һʹьзкьрьна һьндава Хԝәде али мә дькә, кӧ әм нава чәтьнайада жи бәлакьрьна мьзгинийе бәрдәԝам кьн (2 Тимотʹейо 1:7, 8). Әм һʹәму мәрьва һʹьз дькьн, ләма жи әм бәрдәԝам дькьн ԝанрʹа дәрһәԛа Хәбәра Хԝәде гьли кьн һәла һе бь сайа телефон у нәʹма жи. Әм баԝәр ьн кӧ рʹожәке әԝана ԝе жийина хԝә бьгӧһезьн у бенә сәр рʹийа рʹастийе (Һәзәԛел 18:27, 28). Әм хушк-бьра жи һʹьз дькьн. Ләма жи, әм гәрәке «дьл бьдьнә һәв у аликʹарийа һәвдӧ бькьн» (1 Тʹесалоники 5:11). Чаԝа кӧ әскәр пьшта һәв дьгьрьн у тʹәвайи мьԛабьли дьжмьна шәрʹ дькьн, әм жи һәвдӧ һелан дькьн у пьштгьрийа һәв дькьн. Әм щарна дьле хушк-бьра дешиньн, ле әме тʹӧ щар ве йәке бь һʹәмде хԝә нәкьн (1 Тʹесалоники 5:13, 15). Ӧса жи, әм щьватеда ԛәдьре бьред щабдар дьгьрьн у бь ви щурʹәйи һʹьзкьрьна хԝә нишан дькьн (1 Тʹесалоники 5:12). w23.06 10 ¶6; 11 ¶10-11

Һәрге әм сәр ԛӧрбанбуна Иса Мәсиһ кʹур бьфькьрьн, әме баԝәрийа хԝә дьһа ԛәԝи кьн. Ԛӧрбанбуна Иса мә дьдә баԝәркьрьне, ԝәки һʹәму созед Хԝәде ԝе әʹсәйи бенә сери. Гава әм кʹур дьфькьрьн, кӧ Йаһоԝа чьрʹа Иса кьрә ԛӧрбан у әв ԛӧрбан бона Хԝәде чьԛас ԛимәт бу, әм дьһа зедә баԝәр дькьн, ԝәки Хԝәде ԝе созе хԝә дәрһәԛа дьнйа тʹәзә у әʹмьре һʹәта-һʹәтайе, бинә сери. Әм чьрʹа ве йәкеда баԝәр ьн? Йаһоԝа Хԝәде Кӧрʹе хԝәйи һʹьзкьри жь әʹзмана шандә сәр әʹрде, ԝәки әԝ мина мәрьвәки беԛьсур бе буйине. Гава Иса сәр әʹрде бу, әԝ рʹасти щурʹә-щурʹә чәтьнайа һат. Паше әԝи ешәкә гьран кʹьшанд у мьр. Бьдьнә һʹьше хԝә, Йаһоԝа ԛӧрбанәкә чьԛас мәзьн у ԛимәт бона мә дайә! Хԝәде ԝе тʹӧ щара изьн нәда, ԝәки Кӧрʹе ԝи еш бькʹьшанда у бьмьра тʹәне сәва ве йәке, кӧ әм бәхтәԝар бьн ле кьн бьжин (Йуһʹәнна 3:16; 1 Пәтрус 1:18, 19). Бәле, Йаһоԝа ԛӧрбанәкә гәләк ԛимәт бона мә бәрва да, ләма жи бешьк әԝе мәщале бьдә мә кӧ әм һʹәта-һʹәтайе дьнйа тʹәзәда бьжин. w23.04 27 ¶8-9

Гәло Йаһоԝа бь рʹасти дьхԝазә кәсед мьри диса вәгәрʹинә жийине? Бешьк, әре! Бь аликʹарийа рʹӧһʹе Пироз, Кʹьтеба Пирозда һатийә ньвисаре, ԝәки Хԝәде дәрһәԛа рʹабуна жь мьрьне чь соз дайә (Ишайа 26:19; Әʹйанти 20:11-13). У Йаһоԝа созе хԝә тʹьме тинә сери (Йешу 23:14). Йаһоԝа бь дьл у щан дьхԝазә кәсед мьри диса вәгәрʹинә жийине. Бьфькьрьн дәрһәԛа готьнед Ибо. Әԝи баԝәр дькьр кӧ һәрге әԝ бьмьрә жи, Йаһоԝа жь дьл дьхԝазә кӧ диса ԝи жь мьрьне рʹакә (Ибо 14:14, 15). Һәма бь ԝи щурʹәйи, Йаһоԝа бь дьл у щан һивийа ԝе рʹоже йә, ԝәки һʹәму хьзмәткʹаред хԝә жь мьрьне рʹакә у кӧ әԝана сьһʹәт-ԛәԝат у бәхтәԝар бьн. Гәло Кʹьтеба Пирозда чь те готьне дәрһәԛа ԝан мәрьва, мәщала кʹижана тʹӧнә бу дәрһәԛа Ԝи пебьһʹәсьн? Хԝәдайе мәйи дьлован дьхԝазә ԝана жи жь мьрьне рʹакә (Кʹаред Шандийа 24:15). Әԝ дьхԝазә мәщале бьдә ԝан, кӧ әԝана бьбьн достед ԝи у әʹмьре һʹәта-һʹәтайе бьстиньн (Йуһʹәнна 3:16). w23.04 9 ¶5-6

Тӧ ча дькари һевийа хԝә дьһа ԛәԝи ки? Һәрге һевийа тә әԝ ә, кӧ һʹәта-һʹәтайе сәр әʹрде бьжийи, готьнед Кʹьтеба Пироз дәрһәԛа Щьнәте бьхунә у кʹур сәр бьфькьрә (Ишайа 25:8; 32:16-18). Бьфькьрә кӧ әʹмьр дьнйа тʹәзәда ԝе чаԝа бә. Бьдә бәр чʹәʹве хԝә, кӧ тӧ жи ԝедәре йи. Һәрге әм тʹьме ԝәʹдә бьвиньн кӧ дьнйа тʹәзә бьдьнә бәр чʹәʹве хԝә, проблемед мә ԝе ԝәʹдәлу у сьвьк бенә кʹьфше (2 Корьнтʹи 4:17). Йаһоԝа ԝе бь сайа ве һевийе, тә ԛәԝи кә. Сәва кӧ тӧ ԛәԝате бьстини, Йаһоԝа гәләк тьшт бона тә һазьр кьрийә. Гава тӧ щабдарикә хԝә тини сери у рʹасти чәтьнайики тейи, бь дьл у щан Йаһоԝарʹа дӧа бькә у бь сайа лекʹолина шәхси рʹебәрийа ԝи бьгәрʹә. Бе шьк, Әԝе али тә бькә, ԝәки тӧ шабуна хԝә ӧнда нәки. Аликʹарийа хушк-бьра ԛәбул кә. Тʹьме ԝәʹдә бьвинә, ԝәки дәрһәԛа һевийе бьфькьри. Паше «һун анәгори тʹәмамийа ԝе ԛәԝата [Хԝәде] кӧ жь зорайийа ԝийә хԝәйирʹумәт те ԛәԝат бьн, кӧ һун һәр тьштида бь думька дьреж сәбьр бькьн» (Колоси 1:11). w23.10 17 ¶19-20

Йаһоԝарʹа рʹазибуна хԝә бьдә кʹьфше. Дӧайед хԝәда, әм дькарьн бона гәләк тьшта рʹазибуна хԝә Йаһоԝарʹа бьдьнә кʹьфше. Һәр тьште ԛәнщ жь ԝи йә, ләма жи әм дькарьн бона гәләк тьшта рʹазибуна хԝә ԝирʹа бьдьнә кʹьфше (Аԛуб 1:17). Мәсәлә, әм дькарьн рʹазибуна хԝә ԝирʹа бьдьнә кʹьфше, бона бәдәԝийа дьнйайе у щурʹә-щурʹә әʹфрина. Ӧса жи, әм дькарьн рʹазибуне бьдьнә кʹьфше, бона жийине, малбәта хԝә, һәвалед хԝә у һевийа кӧ Хԝәде дайә мә. У әм дьхԝазьн рʹазибуна хԝә Йаһоԝарʹа бьдьнә кʹьфше, кӧ әԝи изьн дайә мә, ԝәки әм бьбьнә достед ԝи. Гәрәке әм кʹур бьфькьрьн, кӧ әм бона чь жь Йаһоԝа рʹази нә. Иро гәләк мәрьв бешекьр ьн. Мәрьв һʹәчʹи зәʹф дина хԝә дьдьнә хԝәстьнед хԝә, нә кӧ рʹази нә бона ван тьшта, чь кӧ щәм ԝан һәйә. Һәрге әм жи тʹәне бькʹәвьнә һʹәйра хԝә, дӧайед мәда ԝе тʹәне хԝәстьнед мә бьн. Сәва кӧ әв йәк нәйе сәре мә, гәрәке әм һәр тьшти, чь кӧ Йаһоԝа дьдә мә, бьшекьриньн у рʹазибуна хԝә бьдьнә кʹьфше (Луԛа 6:45). w23.05 4 ¶8-9

Баве мәйи дьлован, Йаһоԝа, нахԝазә кӧ әм еше бькʹьшиньн (Ишайа 63:9). Диса жи, әԝ мә жь һʹәму тәнгасийа напʹарезә. Тәнгасийед мә дькарьн мина чʹәм йан жи алава агьр сәр мәда бен (Ишайа 43:2). Ле Хԝәде соз дайә, кӧ ԝе али мә бькә, ԝәки әм бькарьбьн һьмбәри тәнгасийед хԝә сәбьр кьн. Әԝе ԛә изьне нәдә, ԝәки тәнгаси зьрарәкә мәзьн бьдьнә мә. Ӧса жи, Йаһоԝа бь сайа рʹӧһʹе пироз ԛәԝате дьдә мә, кӧ әм сәбьр кьн (Луԛа 11:13; Филипи 4:13). Бәле, сәва кӧ әм сәбьр кьн у Хԝәдерʹа амьн бьминьн, әм дькарьн жь дьл баԝәр бьн, ԝәки Әԝе һәр тьште кӧ мәрʹа лазьм ә, бьдә мә. Йаһоԝа дьхԝазә кӧ әм итʹбарийа хԝә ԝи биньн (Ибрани 11:6). Щарна дәрдед мә бечʹарә тенә кʹьфше. Дьԛәԝьмә шьк дькʹәвә дьле мә, гәло Йаһоԝа ԝе али мә бькә йан на. Ле Кʹьтеба Пироз дьбежә, ԝәки бь ԛәԝата Хԝәде, әм дькарьн «сәр сурарʹа» банздьн (Зәбур 18:29). Ләма жи дәԝса кӧ әм дӧдьли бьн, әм гәрәке жь дьл дӧа бькьн у баԝәр бьн, кӧ Йаһоԝа ԝе щаба дӧайед мә бьдә (Аԛуб 1:6, 7). w23.11 22 ¶8-9

Бәле, һʹьзкьрьна жь дьл тʹӧ щар хьлаз набә! Ве рʹезеда гьлийед баш һатьнә ньвисаре, ԝәки жьн-мер бь рʹасти жи дькарьн һәртʹьм һәвдӧ һʹьз бькьн. Сәва кӧ жьн-мер һʹәта хьлазийа әʹмьре хԝә һәв һʹьз бькьн, хирәт лазьм ә. Һʹьзкьрьн мина агьр ә. Сәва кӧ агьр гӧр бьминә, лазьм ә кӧ кәсәк тʹьме дара бавежә агьр. Мина ве йәке, сәва кӧ һʹьзкьрьна ортʹа жьн-мерда ԛәԝи бьминә, әԝана гәрәке бәрдәԝам кьн һәләԛәтийа хԝә ԛәԝи кьн. Ле щарна, һәрге жьн-мер алийе материалида бькʹәвьнә тәнгасийе, сьһʹәт-ԛәԝата ԝан сьст бә, йан жи хԝәйкьрьна зарʹа бона ԝан чәтьн бә, һʹьзкьрьна ортʹа ԝанда дькарә сар бә. Сәва кӧ ‹алава һʹьзкьрьне› нәтәмьрә, жьн-мер гәрәке хирәт бькьн, ԝәки достийа хԝә тʹәви Йаһоԝа дьһа ԛәԝи кьн. w23.05 20-21 ¶1-3

Әм гәрәке чь бькьн, сәва кӧ мерхас бьн? Дьбәкә де-баве мә дьхԝазьн кӧ әм мерхас бьн. Ле әԝана нькарьн ви һʹӧнӧри чаԝа мьлкʹ бьдьнә мә. Дәстхьстьна мерхасийе мина һинбуна пʹешә йә. Сәва кӧ пʹешәки һин бьн, лазьмә дина хԝә бьдьне кӧ дәрсдаре һостә чаԝа фьлан шьхӧли дькә, ԝәки паше мина ԝи бькьн. Һәма бь ви щурʹәйи, әм дькарьн дина хԝә бьдьне, кӧ кәсед дьн чаԝа мерхасийе дьдьнә кʹьфше у паше чʹәʹв бьдьнә ԝан. Мина Данийел, әм жи гәрәке Хәбәра Хԝәде ча лазьм ә нас кьн у достийа ԛәԝи тʹәви Йаһоԝа ԛазанщ кьн. Сәва ве йәке лазьм ә кӧ әм дьле хԝә ԝирʹа вәкьн. У гәрәке әм хԝә бьсперьн Йаһоԝа у баԝәр бьн, кӧ әԝ пьштгьрийа мә дькә. Ӧса әме бькарьбьн һьмбәри чәтьнайа мерхас бьминьн. Мерхасийа мә дькарә сәр мәрьвед дьлпʹак һʹӧкӧм кә, ԝәки әԝана Йаһоԝа нас бькьн. Бе шьк, гәләк фәрз ә кӧ әм мерхасийе пешда биньн. w23.08 2 ¶2; 4 ¶8-9

Хәбәра Йунани, йа кӧ һатийә ԝәлгәрʹандьне ча «һәр тьшти бьщерʹьбиньн», бона щерʹьбандьна металед бьһа дьһатә хәбьтандьне. Демәк лазьм ә, кӧ әм бьщерʹьбиньн һәла әв тьштед кӧ әм дьбьһен йан дьхуньн рʹаст ьн йан на. Әв йәк ԝе бона мә дьһа фәрз бә, чьмки тәнгасийа мәзьн незик дьбә. Дәԝса кӧ әм баԝәрийа хԝә һәр тьшти биньн, гәрәке әм рʹьнд бьфькьрьн һәла тьштед кӧ әм дьбьһен йан дьхуньн, ль гора Кʹьтеба Пироз у тʹәшкиләта Йаһоԝа рʹаст ьн йан на. Һәрге әм ӧса бькьн, әме пе пропаганда щьна нәйенә хапандьне (Мәтʹәлок 14:15; 1 Тимотʹейо 4:1). Чаԝа кʹом, хьзмәткʹаред Хԝәде ԝе жь тәнгасийа мәзьн сах дәрбаз бьбьн. Ле һәр кәс жь мә ньзанә кӧ сьбе ԝе чь бьԛәԝьмә (Аԛуб 4:14). Тьште һәри фәрз әв ә, кӧ әм амьн бьминьн. Һәрге әм пешийа тәнгасийа мәзьн бьмьрьн жи, йәкә әме бенә сахкьрьне у жийина һʹәта-һʹәтайе бьстиньн. Ԝәрә әм һәртʹьм дина хԝә бьдьн һевийа хԝәйә баш у бона рʹожа Йаһоԝа һазьр бьн! w23.06 13 ¶15-16

Әм ньзаньн кӧ һьнә пʹехәмбәртийед Кʹьтеба Пироз ԝе чаԝа бенә сери. Данийел пʹехәмбәр жи мәʹна һәр тьште кӧ хԝәха ньвисибу, фәʹм нәдькьр (Данийел 12:8, 9). Рʹаст ә әм бь тʹәмами ньзаньн кӧ пʹехәмбәртийед Хԝәде ԝе чаԝа бенә сери, ле әв йәк найе һʹәсабе, ԝәки ԝе нәйенә сери. Әм дькарьн баԝәр бьн, ԝәки мина бәре, Йаһоԝа ԝе һәр тьшти чь кӧ әм гәрәке бьзаньбьн, мәрʹа әшкәрә бькә. Ԝе бе әʹламкьрьне, кӧ «дьне сәԛьрʹи у бехофи йә» (1 Тʹесалоники 5:3). Һьнге сәрԝеред политики ԝе һʹьщуми сәр религийа ԛәлп бькьн у ле кʹӧта кьн (Әʹйанти 17:16, 17). Паши ве йәке, әԝана ԝе һʹьщуми сәр хьзмәткʹаред Хԝәде бькьн (Һәзәԛел 38:18, 19). Пәйрʹа ԝе шәрʹе Һармәгәдоне дәстпебә (Әʹйанти 16:14, 16). Әм дькарьн баԝәр бьн, кӧ ԝәхтәкә незикда, әв тьшт ԝе бьԛәԝьмьн. Ле һʹәта кӧ әԝ ԝәʹдә бе, әм һәртʹьм дьхԝазьн рʹазибуна хԝә Баве хԝәйи әʹзманарʹа нишан кьн бь ве йәке, кӧ дина хԝә бьдьнә пʹехәмбәртийед Кʹьтеба Пироз у али кәсед дьн бькьн, ԝәки әԝана жи чʹәʹв бьдьнә мә. w23.08 13 ¶19-20

Гава Паԝлосе шанди бәʹса гӧмане, баԝәрийе у һʹәзкьрьне кьр, әԝи гот кӧ «йа һәри мәзьн һʹәзкьрьн ә» (1 Корьнтʹи 13:13, ИМ). Паԝлос чьрʹа ӧса гот? Дьнйа тʹәзәда ԝе ида нәлазьм бә, ԝәки әм баԝәр кьн, кӧ созед Хԝәде ԝе бенә сери, чьмки әме бь чʹәʹве хԝә бьвиньн ԝәки әԝ ча һатьнә сери. Ле тьштәк ԝе һәрһәйи бьминә. Гәло чь? Гәрәке әм тʹьме Йаһоԝа у мәрьва һʹәз бькьн. Әв һʹәзкьрьн ԝе һʹәта-һʹәтайе зедә бә. Ӧса жи, шагьртед Исайә рʹаст бь һʹәзкьрьне тенә наскьрьне. Иса шандийед хԝәрʹа ӧса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹәнна 13:35). Һʹәзкьрьн ӧса жи мә йәктийеда хԝәй дькә. Паԝлос һʹәзкьрьн нав кьр ча «йәктийа тʹам» (Колоси 3:14). Хенщи ве йәке, Йуһʹәннайе шанди ӧса хушк-бьрарʹа ньвиси: «Әԝе кӧ Хԝәде һʹьз дькә, әԝ гәрәке бьре хԝә жи һʹьз бькә» (1 Йуһʹәнна 4:21). Гава әм һʹәзкьрьне һьндава һәвда дьдьнә кʹьфше, бь ве йәке әм әʹйан дькьн, кӧ Йаһоԝа һʹәз дькьн. w23.11 8 ¶1, 3

Кʹьтеба Пироз жийина хьзмәткʹаред Хԝәде бәрамбәри рʹәве дькә. Рʹәвокед кӧ дьгьһижьнә хьлазийе, ԝе бь әʹмьре һʹәта-һʹәтайе бенә хәлаткьрьне (2 Тимотʹейо 4:7, 8). Әм гәрәке чь жь дәсте мә те бькьн, ԝәки бәрдәԝам кьн бьрʹәвьн, чьмки хьлази гәләк незик ә. Паԝлосе шанди готьбу кӧ чь ԝе али мә бькә, ԝәки әм жи ве йәкеда сәркʹәвьн. Әԝи ӧса готьбу: «Һʹәму гьранийе . . . жь хԝә дур хьн у бь тәйах ләщмәйдана пешийа хԝәда бьрʹәвьн». Гәло Паԝлос дьхԝәст бьгота кӧ гәрәке хьзмәткʹаред Хԝәде тʹӧ барәки һьлнәдьн сәр хԝә? На! Нета гьлийед ԝи әԝ бу, кӧ әм гәрәке һʹәму гьранийед нәлазьм жь сәр хԝә бавежьн. Баред ӧса дькарьн мәрʹа бьбьнә кәвьре лькʹӧмандьне у мә гәләки бьԝәстиньн. Сәва кӧ әм сәбьр кьн, әм гәрәке зу тедәрхьн кӧ кʹижан баред нәлазьм сәр пьшта мә нә у ԝана жь сәр хԝә бавежьн. Ле диса жи әм нахԝазьн баред кӧ гәрәке әм һьлдьн, жь сәр хԝә бавежьн. Һәрге әм баред лазьм һьлнәдьн, әме нькарьбьн рʹәве бәрдәԝам кьн (2 Тимотʹейо 2:5). w23.08 26 ¶1-2

Ӧса жи бәрбьһери али мә дькә, ԝәки әм ԛәдьре ньһерʹандьна мәрьвед дьн бьгьрьн. Мәсәлә, һьнә хушкед мә һʹьз дькьн макийаж бькьн, ле һьнәк жи һʹьз накьн. Һьнә хьзмәткʹаред Хԝәде бь сәрԝахти ичке вәдьхԝьн, ле кәсед дьн хԝә жь ве йәке дур дьгьрьн у ԛә вәнахԝьн. Һʹәму хьзмәткʹаред Хԝәде сьһʹәт-ԛәԝата баш дьхԝазьн, ле әԝана щурʹә-щурʹә метода дьдьнә хәбате, кӧ мьԛати хԝә бьн. Һәрге әм дьфькьрьн, кӧ әм тʹьме рʹаст ьн у әм дьхԝазьн ԝәки хушк-бьра ӧса бькьн чаԝа әм һʹәсаб дькьн кӧ рʹаст ә, дьбәкә әме бьбьн мәʹни кӧ кәсәк бьлӧкʹӧмә у щӧдәти бькʹәвә нава щьвате (1 Корьнтʹи 8:9; 10:23, 24) Йаһоԝа мәрʹа набежә кӧ әм гәрәке чь хԝә кьн, ле Әԝи принсип данә мә, ԝәки әм сафикьрьнед баш бькьн. Гәрәке әм кʹьнщед ӧса хԝә кьн, кʹижан кӧ ԝе наве Хԝәде рʹумәт кьн. Кʹьтеба Пироз дьбежә кӧ әм гәрәке бь «шәрме у бәрбьһерийе хԝә бьхәмьлиньн» (1 Тимотʹейо 2:9, 10). Ләма жи әм нахԝазьн дина кәсед дьн бь зедәйи бькʹьшиньн сәр кʹьнщхԝәкьрьн у хәмьландьна хԝә. Принсипед Кʹьтеба Пироз али рʹуспийа дькьн, ԝәки әԝана ль гора ньһерʹандьна хԝә, ԛәйд-ԛануна данәйньн. w23.07 23-24 ¶13-14

Йаһоԝа рʹийа һәрә баш нишани мә дькә. Кәсед кӧ тʹәглифкьрьна ‹жьна ахмах› ԛәбул дькьн, дьфькьрьн кӧ гӧнәкьрьна дьзикава, тьштәки ширьн ә. Рʹийа ԝан дьбә бәрбь ‹гәлийе дийаре мьрийа› (Мәтʹәлок 9:13, 17, 18). Һʹале кәсед кӧ тʹәглифкьрьна биланийа рʹаст ԛәбул дькьн, бь тʹәмами щӧдә йә (Мәтʹәлок 9:1). Бь сайа ве йәке, әм һин дьбьн ԝәки чаԝа тьштед кӧ Йаһоԝа һʹьз дькә, һʹьз бькьн у тьштед кӧ әԝ нәфрʹәт дькә, нәфрʹәт бькьн (Зәбур 97:10). Ӧса жи, әм бь шабуне кәсед дьн жи тʹәглифи мала биланийа рʹаст дькьн. Ча бежи әм ль мәйдана бажер ӧса дькьн гази: «Кʹи беһʹьш ә, бьра бе вьра!» Һʹәму кәсед кӧ гӧһ дьдьнә ве газикьрьне, дькарьн нә тʹәне иро, ле һʹәта-һʹәтайе «хԝә ль рʹийа билантийе бьгьрьн» (Мәтʹәлок 9:3, 4, 6). w23.06 24 ¶17-18

Гава һәвалхәбатчи йан һәвалдәрсханәк дәрһәԛа баԝәрийа тә тьштәки жь тә дьпьрсә, тӧ хԝә ча тʹәхмин дьки? Дьбәкә тӧ бәр хԝә дькʹәви? Гәләк жь мә хԝә ӧса тʹәхмин дькьн. Пьрсед ӧса әшкәрә дькьн, кӧ әԝ мәрьв чаԝа дьфькьрә йан чь баԝәр дькә. Бь ве йәке мәщал дькʹәвә дәсте мә, кӧ әм жерʹа шәʹдәтийе бьдьн. Ле щара нета һьнә мәрьва әԝ ә, кӧ ԛәрфе хԝә баԝәрийа мә бькьн. Әм жь ве йәке әʹщебмайи наминьн, чьмки һьнә мәрьва тьштед нәбаш дәрһәԛа баԝәрийа мә бьһистьнә (Кʹаред Шандийа 28:22). Ӧса жи әм «рʹожед ахьрийеда» дьжин у гәләк мәрьв «берʹәʹм» у «зӧлмкʹар» ьн (2 Тимотʹейо 3:1, 3). Дьԛәԝьмә тӧ бәр хԝә дькʹәви у дьфькьри: «Гава кәсед дьн дьхԝазьн дәрһәԛа баԝәрийа мьн тʹәви мьн бькʹәвьнә дәʹԝе, әз чаԝа дькарьм рʹьһʹәтийе хԝәй кьм у бь мәʹрифәти тʹәви ԝан хәбәр дьм?» Гәло чь дькарә али тә бькә? Ве дәрәщеда бәрбьһери дькарә али тә бькә. Гава мәрьве нәрм у мьлук әʹщьз дькьн, йан жи чахе әԝ ньзанә кӧ ча щаба хԝә бьдә, йәкә әԝ зу һерс накʹәвә. w23.09 14 ¶1-2

Щарна мәрʹа ширәт те дайине, ԝәки әм нәкʹәвьнә пәй пʹәра, у һаш жь хԝә һәбьн кӧ ԛанунед Хԝәде нәтʹәрʹьбиньн. Ви алида жи, рʹебәрийа Йаһоԝа кʹаре дьдә мә. Гава әм гӧһ дьдьнә рʹебәрийа ԝи, исафа мә тʹәмьз дьминә у әм хԝә жь проблема хԝәй дькьн. Бь ви щурʹәйи, әм дькарьн бь дьл у щан Йаһоԝа бьһʹәбиньн, у әԝ йәк мәрʹа шабун, әʹдьлайе у дьлрʹьһʹәтийе тинә (Иша. 48:17, 18; 1 Тимтʹ. 6:9, 10). Ԝәʹде тәнгасийа мәзьн у ԝәʹде Һʹәзарсалийа Пʹадшатийе жи, Йаһоԝа ԝе бе шьк бь сайа мәрьва рʹебәрийе мә бькә. Һәрге рʹебәри нә ль гора дьле мә бә, гәло әме диса жи гӧһ бьдьне? Щаба ве пьрсе ве йәкева гьредайи йә, һәла иро әм ча пәй рʹебәрийа Йаһоԝа дьчьн. Ләма жи ԝәрә әм һәр гав пәй рʹебәрийа Йаһоԝа һәрʹьн у гӧһ бьдьнә кәсед кӧ һатьнә кʹьфшкьрьне, ԝәки мьԛати мә бьн (Ишайа 32:1, 2; Ибрани 13:17). Ԝәрә әм һәртʹьм итʹбарийа хԝә Рʹебәре хԝә Йаһоԝа биньн. Әԝ мә жь һәр тьште кӧ дькарә достийа мә тʹәви ԝи хьраб кә, дур дьгьрә, у мә бәрбь жийина һʹәта-һʹәтайе дьбә. w24.02 25 ¶17-18

Паԝлосе шанди бь дьл у щан Йаһоԝарʹа хьзмәт дькьр, ле әԝ рʹасти гәләк тәнгасийа жи дьһат. Әԝи гәләк щар рʹеԝитийед мәзьн дькьр, у рʹеԝитийед бәре нә һаԛас рʹьһʹәт бун. Сәр рʹийа хԝә, Паԝлосе шанди щара рʹасти щурʹә-щурʹә чәтьнайа дьһат. Щара жи әԝ жь алийе дьжмьнада дьһатә кʹӧтане (2 Корьнтʹи 11:23-27). Ӧса жи хушк-бьра щара ԛимәт нәдькьрьн әв йәк, чь кӧ әԝи бона ԝан дькьр (2 Корьнтʹи 10:10; Филипи 4:15). Чь али Паԝлос дькьр, кӧ әԝ бәрдәԝам кә Йаһоԝарʹа хьзмәт кә? Әԝи бь сайа Ньвисаред Пироз у дәрәщед әʹмьре хԝә, дьһа баш Йаһоԝа нас дькьр. Әԝи баԝәр дькьр, ԝәки Йаһоԝа Хԝәде ԝи һʹьз дькә (Рʹомайи 8:38, 39; Әфәси 2:4, 5). У һʹьзкьрьна ԝи һьндава Йаһоԝа дьле ԝида дьһа пешда дьһат. Паԝлос һʹьзкьрьна хԝә Йаһоԝарʹа бь ве йәке нишан дькьр, кӧ «щьмәʹта Хԝәдерʹа хьзмәткʹари» дькьр (Ибрани 6:10). w23.07 9 ¶5-6

Гәләк мәрьв ԛәбул дькьн, кӧ әм һʹәԝще сәрԝера нә у әм гәрәке һәма гӧра һьнә ԛанунед ԝан бькьн. Ле дьбәкә әԝ мәрьв гӧра ван ԛануна нәкьн, тʹәви кʹижана әԝана рʹази ниньн, йан жи кʹижан кӧ әԝана һʹәсаб дькьн, кӧ бь һәԛи ниньн. Кʹьтеба Пироз дьбежә, ԝәки сәрԝеред мәрьва дьбьн сәбәбед кӧл-дәрда, әԝана бьн контрола Мире-щьнада ньн у ԝе дәмәкә незикда бенә ԛьрʹкьрьне (Зәбур 110:5, 6; Ԝаиз 8:9; Луԛа 4:5, 6). Ӧса жи, ль гора Хәбәра Хԝәде, «кʹи кӧ бәр һʹӧкӧмәтийе рʹадьбә, әԝ бәр әʹмьре Хԝәде рʹадьбә». Йаһоԝа изьне дьдә сәрԝеред дәԝләте, ԝәки сәрԝертийе бькьн, сәва кӧ һәр тьшт бь тʹәрбәти бә, у әԝ дьхԝазә кӧ әм гӧра ԝан бькьн. Ләма жи, әм гәрәке «кʹерʹа чь дькʹәвә» бьдьн, демәк хәрщ, ԛәдьр у гӧһдарибун (Рʹомайи 13:1-7). Дьԛәԝьмә әм ԛанунәке нә һеса һʹәсаб кьн у бьфькьрьн кӧ әв бь һәԛи нәһатийә дайине у ԝе гьран сәр мә рʹуне. Ле диса жи, һʹәта кӧ әԝ ԛанун мьԛабьли ԛанунед Йаһоԝа нинә, әм гӧһ дьдьне, чьмки Йаһоԝа ве йәке жь мә дьхԝазә (Кʹаред Шандийа 5:29). w23.10 8 ¶9-10

Гава Шьмшон һатә буйине, Исраели бьн дәсте Фьльстийада бун у дьһатьнә зерандьне (Һʹакьмти 13:1). Ләма жи Исраелийа гәләк еш дькʹьшанд. Йаһоԝа Шьмшон бьжарт кӧ Исраелийа жь дәсте Фьльстийа хьлаз кә (Һʹакьмти 13:5). Шьмшон гәрәке итʹбарийа хԝә Йаһоԝа бьанийа, сәва кӧ бькарьбуйа әԝ щабдари бьанийа сери. Щарәке әскәред Фьльстийа һатьбунә Ләһийе, ԝәки Шьмшон бьгьрьн. Меред Щьһудайе тьрсийан у сафи кьрьн, ԝәки Шьмшон бьдьнә дәсте дьжмьна. Ԝана Шьмшон пе дӧ бәна гьреда у тʹәсмили Фьльстийа кьр (Һʹакьмти 15:9-13). Ле «рʹӧһʹе Хӧдан бьһез һатә сәр» Шьмшон, у әԝи бәне дәстед хԝә ԛәтанд. Паше әԝи «һәстийәки чәнга кʹәрәки йа тʹәзә дит», әв һьлда у пе ви 1 000 меред Фьльсти кӧшт! (Һʹакьмти 15:14-16) w23.09 2 ¶3-4

Кʹьтеба Пирозда, Йаһоԝа нета хԝәйә һәр-һәйи гав бь гав зәлал кьрийә. Йаһоԝа дькарә гәләк рʹийед щӧдә бьдә хәбате. Әԝ һәртʹьм сәрдькʹәвә, чьмки щәм ԝи һәр тьшт «мәрәм кьрийә» (Мәтʹәлок 16:4) У чь кӧ Йаһоԝа дькә, әв йәк һәр-һәйи дьминә. Ле гәло нета Йаһоԝа чь йә у Әԝи чь һьнә гӧһастьн кьрийә, сәва кӧ бьгьһижә нета хԝә? Хԝәде мәрьвед пешьнрʹа готьбу, кӧ нета ԝи бона ԝан чь йә. Әԝи дьхԝәст кӧ әԝ «шин бьн у ль һәв зедә бьн, әʹрде тʹьжи кьн у хԝәйитийе ле бькьн, һʹӧкӧми ль сәр . . . һʹәму һʹәйԝанед ль сәр әʹрдейә кӧ дьһʹәжьн бькьн» (Дәстпебун 1:28). Ле Адәм у Һеԝа һьмбәри Йаһоԝа дәркʹәтьн. Ӧса ԝана гӧнә дәрбази һʹәму мәрьва кьр. Ле нета Йаһоԝа нәһатә гӧһастьне. Сәва кӧ әԝ бьгьһижә нета хԝә, әԝи рʹекә дьн бьжарт. Йаһоԝа дәрберʹа сафи кьр, кӧ сәр әʹзмана Пʹадшати саз кә, ԝәки нета хԝәйә пешьн бинә сери (Мәтта 25:34). w23.10 20 ¶6-7

Йаһоԝа дькарә али мә бькә, ԝәки әм бәрдәԝам кьн бь хирәт ԝирʹа хьзмәт кьн. Ле әв йәк дькарә һеса нибә, һәрге әм ида гәләк ԝәхт һьмбәри кемасикә хԝә шәрʹ дькьн. Щара дьбәкә ӧса те кʹьфше, ԝәки кемасийед мә жь йед Пәтрусе шанди мәзьнтьр ьн. Ле Йаһоԝа дькарә ԛәԝате бьдә мә, ԝәки әм дьлтәнг нәбьн (Зәбур 94:18, 19). Мәсәлә, бьраки мә пешийа кӧ рʹастийе нас кьра, әԝ гәләк сал ча һомосексуал дьжит. Бь аликʹарийа Кʹьтеба Пироз, әԝи жийина хԝә бь тʹәмами гӧһаст. Ле диса жи, әԝи щара һьмбәри хԝәстьнед хԝәйә хьраб шәрʹ дькьр. Ле гәло чь али ԝи дькьр амьн бьминә? Әԝ дьбежә: «Йаһоԝа ԛәԝате дьдә мә. Бь сайа рʹӧһʹе пироз . . . мьн дит, ԝәки мәрьв дькарә бәрдәԝам кә сәр рʹийа рʹастийе бьминә. . . . Рʹаст ә, әз мәрьвәки гӧнәкʹар ьм, ле диса жи Йаһоԝа мьн ԛәԝи дькә у хьзмәтийеда дьдә хәбате». w23.09 23 ¶12

Бьред щаһьл, һун дькарьн хирәт бьн, кӧ бьбьнә Мәсиһийед гьһишти. Бона ве йәке лазьм ә кӧ һун хԝәрʹа мәсәлед баш бьжберьн, тʹьме кʹур бьфькьрьн, хирәт бьн, фәрәсәтед керһати ԛазанщ кьн, кӧ әʹбура хԝә бькьн у хԝә бона щабдарийед тʹәзә һазьр кьн. Дьԛәԝьмә һун дьфькьрьн, ԝәки һун нькарьн кери ван тьшта бен. Ле әм баԝәр ьн, кӧ һуне пешдачуйи бьн. Бир нәкьн, Йаһоԝа тʹьме һазьр ә али ԝә бькә (Ишайа 41:10, 13). Бе шьк, хушк-бьред щьвате жи ԝе али ԝә бькьн. Гава һун бьбьн мәрьвед ль гора дьле Йаһоԝа Хԝәде, һуне бь әʹмьрәки хԝәш у бәхтәԝар бьжин. Хортед һежа, әм дьхԝазьн ԝәки Йаһоԝа ԝә һʹәмуйа кʹәрәм кә, кӧ һун бьбьнә Мәсиһийед гьһишти. Әм ԝә гәләки һʹәз дькьн! w23.12 29 ¶19-20

Дәԝса кӧ дина хԝә бьдьнә ԛьсур у кемасийед хушк у бьра, дина хԝә бьдьнә һʹӧнӧред ԝанә баш. Ԝәрә әм мәсәләке шеԝьр кьн. Бьдә бәр чʹәʹве хԝә, кӧ тӧ тʹәви хушк-бьра ԝәʹдәки баш дәрбаз дьки у тӧ шькьле кʹоме дькʹьшини. Тӧ дӧ шькьлед дьн жи дькʹьшини, чьмки дьԛәԝьмә шькьле пешьн рʹьнд дәрнәйе. Ньһа се шькьл дәсте тәда ньн. Сәр шькьләки, тӧ дьвини ԝәки бьрак рʹьнд дәрнәкʹәтийә. У тӧ ԝи шькьли тʹәмьз дьки, чьмки дӧ шькьлед дьн жи һәнә, сәр кʹижана һәр кәс бәдәԝ ә у бәшәра гьшка хԝәш ә. Гава әм тʹәви хушк-бьра ԝәʹдәки хԝәш дәрбаз дькьн, әм ван биранинед хԝә ԛә бир накьн. Ле рʹожәке, һәрге хушкәк йан бьрак дьле мә бешинә, гәло әме чь бькьн? Чаԝа кӧ әм дькарьн шькьләки нәрʹьнд тʹәмьз кьн, ӧса жи әм дькарьн ван тьштед нә баш бир кьн (Әфәси 4:32). Жь бо ве йәке, кӧ мә тʹәви хушк-бьра гәләк ԝәʹде баш дәрбаз кьрийә, әм дьхԝазьн тʹәне биранинед хԝәш бира хԝәда хԝәй кьн у ԛимәт кьн. w23.11 12-13 ¶16-17

Хәбәред Йунани, йед кӧ ван рʹезада һатьнә хәбьтандьне, нишан дькьн ԝәки кʹӧлфәт гәрәке пе кʹьнщ у хәмьла хԝә, һӧрмәте бьдьнә Хԝәде. Ӧса жи, әԝана гәрәке һәст у исафа кәсед дьн һьлдьн һʹәсаб чахе хԝә дьхәмьлиньн. Гәли хушкед хирәт, әм ԝәрʹа фьрнаԛ дьбьн, кӧ һун бь дьл гӧһ дьдьнә ве ширәте! Сәрԝахти жи һʹӧнӧрәкә фәрз ә, кʹижан кӧ кʹӧлфәт гәрәке бьдьнә кʹьфше. Сәрԝахти чь йә? Мәрьве сәрԝахт дькарә тьштед баш у хьраб жь һәв дәрхә у сафикьрьнед билан бькә. Ԝәрә әм дина хԝә бьдьнә мәсәла Абигайле. Мере ԝе сафикьрьнәкә нә бь билани кьр у жийина һʹәму кәсед мала хԝәда кьрә бьн ԛәзийе. Ле Абигайле дәрберʹа һәрәкʹәт кьр. Бь сайа сәрԝахтийа ԝе, әʹмьре гәләк мәрьва хьлаз бу (1 Самуйел 25:14-23, 32-35). Мәрьвед сәрԝахт заньн, кӧ ԝәхта һьшбуне у ԝәхта хәбәрдане һәйә. Гава әԝана дькʹәвьнә һʹәйра кәсед дьн, әԝана накʹәвьн нава шьхӧлед ԝанә шәхси (1 Тʹесалоники 4:11). w23.12 20 ¶8-9

Паԝлосе шанди әв йәк щьвата Рʹомайарʹа ньвиси. Хушк-бьред ԝедәре дәрһәԛа Йаһоԝа у Иса пеһʹәсийа бун, ԝана баԝәрийа хԝә ава кьрьбу у бьбунә шагьртед Иса. Хԝәде әԝана жь бо баԝәрийа ԝан «рʹаст» һʹәсаб дькьр у бь рʹӧһʹе пироз һьлбьжартьн (Рʹомайи 5:1). Бәле, әԝана бьбунә хԝәйе һевикә хԝәш. Ԝәхт шунда Паԝлос Мәсиһийед бь рʹӧһʹ бьжартирʹа, йед ль бажаре Әфәсе, дәрһәԛа һевийа кӧ Хԝәде дайә ԝан ньвиси. Әԝи бәʹса ве хәлате кьр, йа кӧ кәсед бь рʹӧһʹ бьжарти гәрәке бьстандана (Әфәси 1:18). Паԝлос Колосйарʹа жи ньвиси, кӧ әԝана ԝе хәлата хԝә кʹӧдәре бьстиньн. Әԝи әв хәлат нав кьр гӧмана сәр әʹзмана (Колоси 1:4, 5). Һевийа кәсед бьжарти әԝ ә, кӧ әԝана ԝе бона жийина һәрһәйи сәр әʹзмана бенә рʹакьрьне у ԝедәре тʹәви Мәсиһ сәрԝертийе бькьн (1 Тʹесалоники 4:13-17; Әʹйанти 20:6). w23.12 9 ¶4-5

Хәбәра Йунани, йа кӧ һатийә ԝәлгәрʹандьне «хԝәй кә», һʹәчʹи зәʹф дәрһәԛа ԝан әскәра дьданә хәбате, йед кӧ бажар хԝәй дькьрьн. Кәсед кӧ бажарәки ӧсада дьжитьн, хԝә бехофийеда тʹәхмин дькьрьн у рʹьһʹәт рʹадьзан, чьмки ԝана заньбу, ԝәки дәргәһед бажер рʹьнд тенә хԝәйкьрьне. Мина ве йәке, гава «әʹдьлайийа Хԝәде» һʹьш у дьле мә хԝәй дькә, әм хԝә әʹдьлайи у бехофийеда тʹәхмин дькьн (Зәбур 4:8). Мина дәрәща Һананйа, һәрге һʹале мә зу нәйе гӧһастьне жи, әм дькарьн дьлрʹьһʹәт бьн (1 Самуйел 1:16-18). У гава әм дьлрʹьһʹәт дьбьн, мәрʹа дьһа һеса йә рʹаст бьфькьрьн у сафикьрьнед баш бькьн. Гәло әм чь дькарьн бькьн? Гава дәрдед мә һәнә, әм гәрәке дӧа бькьн һʹәта кӧ «әʹдьлайийа Хԝәде» бькʹәвә дьле мә (Луԛа 11:9; 1 Тʹесалоники 5:17). Бәле, гава әм рʹасти тәнгасийа тен, әм гәрәке бәрдәԝам кьн дӧа бькьн, ԝәки «әʹдьлайийа Хԝәде» һʹьш у дьле мә хԝәй кә (Рʹомайи 12:12). w24.01 21 ¶5-6

Иса сәва кӧ наве Баве хԝә пироз кә, бәр щәфа, беһӧрмәткьрьне у бӧхдана тәйах кьр. Әԝи һәр тьштида гӧһ да Баве хԝә у ԛә гӧнә нәкьр, ләма жи әԝи «шәрм бәр тьштәки һʹәсаб нәкьр» (Ибрани 12:2). Ӧса жи, әԝи фәʹм дькьр кӧ ԝан сьһʹәтед рʹәш у тәʹрида, Шәйтʹан рʹастә-рʹаст һʹьщуми сәр ԝи дькә (Луԛа 22:2-4; 23:33, 34). Бе шьк, Шәйтʹан дьхԝәст амьнийа Иса бьшкенанда, ле әԝи да дәр. Иса избат кьр кӧ Мире-щьна дәрәԝин ә, у кӧ хьзмәткʹаред Йаһоԝайә амьн һәнә, йед кӧ нава тәнгасийед гьранда жи амьнийа хԝә хԝәй дькьн. Һәрге тӧ дьхԝази дьле Пʹадше хԝә Иса ша ки, пәсьне наве Йаһоԝа бьдә у али мәрьва бькә, ԝәки әԝана жи Хԝәдайе мә рʹьнд нас кьн. Гава тӧ ӧса дьки, тӧ пʹегәһа Исада дьчи (1 Пәтрус 2:21). У тӧ мина Иса, дьле Йаһоԝа ша дьки у избат дьки, кӧ дьжмьне Ԝи, Мире-щьна, дәрәԝинәки беисаф ә! w24.02 11-12 ¶11-13

Нава ван пенщ салед пашьнда, милйонәк мәрьва зедәтьр ча Шәʹдед Йаһоԝа һатьнә ньхӧмандьне. Гава тӧ хԝә тʹәсмили Йаһоԝа дьки, тӧ сафи дьки кӧ бьби шагьрте Иса Мәсиһ у ԛьрара Хԝәде әʹмьре хԝәда дьди сәр щийе пешьн. Әв йәк чь те һʹәсабе? Иса гот: «Һәрге йәк жь ԝә бьхԝазә пәй мьн бе, әԝ ида гәрәке бона хԝә нәжи» (Мәтта 16:24). Тӧ ча хьзмәткʹаре Йаһоԝа, йе кӧ әʹмьре хԝә тʹәсмили ԝи кьрийә, гәрәке һʹәму тьштед кӧ мьԛабьли хԝәстьна ԝи нә, инкʹар ки (2 Корьнтʹи 5:14, 15). Тӧ гәрәке «кьред бьнйатʹа инсен», мәсәлә бенамуси, инкʹар ки (Галати 5:19-21; 1 Корьнтʹи 6:18). Гәло чәтьн ә ль гора ԝан ԛануна бьжийи? Һәрге тӧ Йаһоԝа һʹәз дьки у баԝәр би кӧ ԛанунед ԝи бона кʹара тә нә, ԝе тәрʹа чәтьн нибә ԝан ԛануна бини сери (Зәбур 119:97; Ишайа 48:17, 18). w24.03 2 ¶1; 3 ¶4

Йаһоԝа рʹӧһʹе пироз дьдә ван мәрьва, жь кʹижана әԝ рʹази йә (Мәтта 12:18). Һәла жь хԝә бьпьрсә: «Гәло әз аликʹарийа рʹӧһʹе пироз жийина хԝәда дьвиньм?» Мәсәлә, чахе тә Йаһоԝа нас нәдькьр, дьбәкә тӧ мәрьвәки бесәбьр буйи. Бь сайа рʹӧһʹе пироз, гәло тӧ ньһа һьндава кәсед дьн дьһа зедә сәбьр нади кʹьфше? Чьԛас тӧ бәре рʹӧһʹе пироз нав хԝәда пешда бини, һаԛас Йаһоԝа ԝе жь тә рʹази бә! Кәсед кӧ Йаһоԝа жь ԝан рʹази йә, жь кʹьрʹине кʹаре дьстиньн (1 Тимотʹейо 2:5, 6). Һәрге тә баԝәрийа хԝә ԛӧрбана Иса анийә у һати ньхӧмандьне, ле диса жи хԝә бекер һʹәсаб дьки, тӧ дькари чь бьки? Бир нәкә кӧ ньһерʹандьна Йаһоԝа жь ньһерʹандьна тә щӧдә дьбә. Әԝ ԝан мәрьвед кӧ баԝәрийа хԝә ԛӧрбане тиньн, ча кәсед рʹаст һʹәсаб дькә у соз дьдә кӧ ԝе ԝана кʹәрәм кә (Зәбур 5:12; Рʹомайи 3:26). w24.03 30 ¶15; 31 ¶17