Щотмәһ

Гәло ԛә ӧса дьбә кӧ щара тәрʹа чәтьн ә гӧһдар би? Әв йәк бона Даԝьд Пʹадша жи нә һеса бу, ләма жи әԝи Хԝәдерʹа дӧа кьр: «Бь рʹӧһʹәки рʹази [һазьрбуне, ДТʹ] мьн бьнгәһ кә» (Зәбур 51:12). Даԝьд Йаһоԝа һʹәз дькьр. Ле диса жи, бона Даԝьд щара нә һеса бу гӧһ бьдә рʹебәрийе, у әв йәк щара бона мә жи нә һеса йә. Гәло чьрʹа? Йа пешьн, нәгӧһдарибун дәрбази сәр мә һʹәмуйа буйә. Йа дӧда, Мире-щьна тʹьме һәр тьшти дькә, ԝәки әм чʹәʹв бьдьнә ԝи у мьԛабьли Йаһоԝа дәрен (2 Корьнтʹи 11:3). Йа сьсийа, әм нава мәрьвед ӧсада дьжин, «йед кӧ нә гӧрʹа Хԝәдеда» ньн (Әфәси 2:2). Әм гәрәке жь алийе хԝәда һәр тьшти бькьн, ԝәки нә кӧ тʹәне һьмбәри хԝәстьнед хԝәйә гӧнәкʹар шәрʹ бькьн, ле ӧса жи һьмбәри һʹӧкӧме Мире-щьна у дьнйа ԝи. Ӧса жи, әм гәрәке гӧһ бьдьнә Йаһоԝа у ԝан мәрьва, кʹижанарʹа Әԝи һʹӧкӧм дайә. w23.10 6 ¶1

Әм дькарьн жь ве кʹәрәмәта Иса чь һин бьн? Әм дәрһәԛа мьлуктийе һин дьбьн. Иса тʹӧ щара пʹайе хԝә нәдьда у хԝә ԛӧрʹә нәдькьр, кӧ әԝи кʹәрәмәт дькьрьн. Дәԝса ве йәке, әԝи һәртʹьм бь мьлукти Баве хԝә рʹумәт дькьр (Йуһʹәнна 5:19, 30; 8:28). Мина Иса, һәрге әм жи бь мьлукти сәр хԝә бьфькьрьн, әме тʹӧ щар пʹайе хԝә нәдьн у хԝә ԛӧрʹә нәкьн, гава тьштәкида пешда дьчьн. Гәрәке әм пʹайе хԝә нәдьн, ле пәсьне Йаһоԝа Хԝәде бьдьн (Йерәмйа 9:23, 24). Бәле, Йаһоԝа һежайи рʹумәте йә. Бе аликʹарийа Хԝәде, әм ԛә нькарьн пешдачуйи бьн (1 Корьнтʹи 1:26-31). Һәрге әм мьлук бьн, әме дина кәсед дьн нәкʹьшиньн сәр ԛәнщийа кӧ мә кьрийә. Йаһоԝа һәр тьшти дьвинә у ԛәнщийа мә дьшекьринә (Бәрамбәр кьн Мәтта 6:2-4; Ибрани 13:16). Һәрге әм чʹәʹв дьдьнә мьлуктийа Иса, әме дьле Йаһоԝа ша бькьн (1 Пәтрус 5:6). w23.04 4 ¶9; 5 ¶11-12

Жь бина бәр Хԝәде, Паԝлосе шанди хушк-бьра һелан дькьр, ԝәки әԝана дьһа зедә бькʹәвьнә һʹәйра мәрьвед дьн. Әм ча дькарьн ве ширәте щьватеда бьдьнә хәбате? Әм гәрәке бир нәкьн, ԝәки кәсед дьн жи дьхԝазьн щаба хԝә бьдьн. Ԝәрә әм дәрһәԛа ве мәсәле бьфькьрьн. Бәʹса хәбәре тӧ тʹәви һәваләки хԝә хәбәр дьди. Гәло тʹәне тӧйе хәбәр ди у ԛә мәщале нәди ԝи кӧ әԝ жи хәбәр дә? Бешьк тӧйе бьхԝази кӧ әԝ жи фькьред хԝә бежә. Һәма бь ви щурʹәйи, щьватеда жи, әм дьхԝазьн мәщале бьдьнә кәсед дьн жи кӧ щабед хԝә бьдьн. Гәло мәщала һәрә баш кʹижан ә кӧ әм щьватеда һәвдӧ һелан кьн? Әм дькарьн мәщале бьдьн хушк-бьра, кӧ әԝана пе щабед хԝә баԝәрийа хԝә әʹйан кьн (1 Корьнтʹи 10:24). Бьра щабед мә кьн бьн. Ӧса ԝе дьһа зедә ԝәʹдә бьминә ԝәки кәсед дьн жи щаба хԝә бьдьн. Рʹуспи у мьзгинванед щерʹьбанди дькарьн ве йәкеда бьбьнә мәсәләкә баш. Гава әм щабәкә кьн дьдьн, ԝәрә әм гәләк фькьра нәбежьн. Һәрге әм һʹәму фькьред абзаседа бежьн, бона кәсед дьн ԝе мәщал нәминә кӧ щаба хԝә бьдьн. w23.04 22-23 ¶11-13

Әм гәрәке бир нәкьн кӧ чьԛас фәрз ә ԝәки әм бәрдәԝам кьн али кәсед дьн бькьн, илаһи бь сайа хьзмәтийе. Гәрәке әм һазьр бьн кӧ хьзмәтийа хԝә ль гора дәрәща мәрьва бьгӧһезьн. Әм рʹасти мәрьвед жь гәләк мьләта тен, баԝәри у култура кʹижана щӧдә йә. Ве йәкеда Паԝлосе шанди мәсәләкә баш мәрʹа һиштийә. Иса әԝ ча «шандийе нәщьһуйа» бьжартьбу (Рʹомайи 11:13). Паԝлос шәʹдәти дьда Щьһуйа, Йунанийа, мәрьвед хԝәнди, щоткʹара, кәсед ԛәдьрбьльнд у пʹадша. Сәва кӧ мьзгинийе бьгьһинә дьле мәрьвед щурʹә-щурʹә, Паԝлос бона «һәр кәси» бу һәр тьшт (1 Корьнтʹи 9:19-22). Әԝи рʹьнд дина хԝә дьда мьләт, култура у баԝәрийа мәрьва у метода хьзмәтийа хԝә ль гора һʹәԝще ԝан дьгӧһаст. Һәрге әм жи хьзмәтийа хԝә ль гора һʹәԝщед мәрьва бьгӧһезьн, хьзмәтийа мә жи ԝе дьһа пешдачуйи бә. w23.07 23 ¶11-12

Мьлукти ԛәԝат ә, нә кӧ кемаси йә. Дәрәща чәтьнда, сәва кӧ мәрьв рʹьһʹәтийе хԝәй кә, ԛәԝат лазьм ә. Мьлукти йәк жь һʹӧнӧред бәре рʹӧһʹе пироз ә (Галати 5:22, 23). Бь зьмане Йунани, хәбәра «мьлукти» щара һьндава һәспәки бәйани дьдьнә хәбате, йе кӧ дьһатә һинкьрьне. Рʹаст ә һәспе ӧса һеди-һеди нәрм дьбә, ле диса жи әԝ ԛәԝи йә. Ле әм ча дькарьн һьм мьлук бьн, һьм жи ԛәԝи бьминьн? Бь ԛәԝата хԝә әм нькарьн ве йәке бькьн. Әм гәрәке бона рʹӧһʹе пироз дӧа бькьн у жь Хԝәде бьхԝазьн, ԝәки Әԝ али мә бькә. Сәрһатийед гәләк мәрьва нишан дькьн, кӧ әв йәк фәрз ә. Мәсәлә, гава мәрьв дьхԝәстьн хушк-бьред мәрʹа бькʹәвьнә дәʹԝе, йан һерса ԝан рʹакьн, йәкә әԝана бәрбьһер у мьлук дьман. Мьлуктийа ԝан сәр кәсед дьн һʹӧкӧм дькьр у әԝана ида дәрһәԛа Шәʹдед Йаһоԝада баш дьфькьрин (2 Тимотʹейо 2:24, 25). w23.09 15 ¶3

Дитьнокеда Йуһʹәннайе шанди дит, кӧ 24 рʹуспи сәр әʹзмана сәре хԝә бәр Йаһоԝа датиньн. Ԝана пәсьне Хԝәде дьда у дьгот кӧ тʹәне Хԝәде һежа йә ԝәки «рʹумәт, һӧрмәте у ԛәԝате» бьстинә (Әʹйанти 4:10, 11). Бәле, гәләк мәʹнийед мәләка жи һәнә, кӧ пәсьн у рʹумәте бьдьнә Йаһоԝа. Әԝана сәр әʹзмана кʹеләка ԝи нә у ԝи рʹьнд нас дькьн. Әԝана һʹӧнӧред Хԝәде бь сайа кьред ԝи дьвиньн. У әв йәк ԝана һелан дькә пәсьне Йаһоԝа бьдьн (Ибо 38:4-7). Әм жи гәрәке дӧайед хԝәда пәсьне Йаһоԝа бьдьн у ԝирʹа бежьн, кӧ әм чьрʹа ԝи һʹьз дькьн у ԛәдьре ԝи дьгьрьн. Чахе тӧ Кʹьтеба Пироз дьхуни у сәр дьфькьри, дина хԝә бьдә һʹӧнӧред Йаһоԝа, кʹижанарʹа тӧ фьрнаԛ дьби (Ибо 37:23; Рʹомайи 11:33). Паше Йаһоԝарʹа бежә, кӧ әв һʹӧнӧр ча сәр һʹьш у дьле тә һʹӧкӧм дькьн. Ӧса жи, әм дькарьн пәсьне Йаһоԝа бьдьн, чьмки әԝ али мә у хушк-бьра дькә (1 Самуйел 2:1, 2). w23.05 3-4 ¶6-7

Сала 1919-да, хьзмәткʹаред Хԝәде жь һʹӧкӧме Бабилона Мәзьн аза бун. Ԝе сале, «хӧламе амьн у сәрԝахт» әʹйан бу. Әв кʹом ԝәхтда, али кәсед дьлсах дькьр, ԝәки әԝана бькʹәвьнә сәр «Рʹийа Пироз» (Мәтта 24:45-47; Ишайа 35:8). Бь сайа хәбата ван меред хирәт у хԝәдехоф, кәсед кӧ һатьбун сәр ве рʹе, дькарьбун дәрһәԛа Йаһоԝа у нета ԝи дьһа зедә пебьһʹәсьн (Мәтʹәлок 4:18). Ӧса жи, ԝана дькарьбу ль гора хԝәстьна Йаһоԝа бьжин. Йаһоԝа һивийе нибу, кӧ хьзмәткʹаред ԝи һʹәму гӧһастьнед лазьм щарәкерʹа бькьн. Дәԝса ве йәке, әԝи али хьзмәткʹаред хԝә дькьр, ԝәки әԝана һеди-һеди бенә гӧһастьне. Гава әв рʹож бе кӧ әм бькарьбьн бь һʹәму кьред хԝә дьле Хԝәде ша кьн, әме гәләк бәхтәԝар бьн! Һʹәму рʹе тʹьме тенә тʹәзәкьрьне. Жь сала 1919, сәр «Рʹийа Пироз» гәләк хәбат тенә кьрьне. Бь ви щурʹәйи, дьһа зедә мәрьв дькарьбун жь Бабилона Мәзьн дәркʹәвьн. w23.05 17 ¶15; 19 ¶16

Кʹома Рʹебәрийе, аликʹарчийед бона комитейед Кʹома Рʹебәрийе һин дькә. Әԝ аликʹарчи ньһа бь амьни гәләк щабдарийед гьран тиньн сери, у әԝана һазьр ьн ахьрийеда жи бона пәзед Мәсиһ хәм бькьн. Гава незики хьлазийа тәнгасийа мәзьн бьжартийед пашьн бенә һьлдане ль әʹзмана, хьзмәткʹаред Хԝәдейә дьн ԝе бь сайа рʹебәрийа Иса Мәсиһ, бәрдәԝам кьн бь амьни Йаһоԝарʹа хьзмәт кьн. Һьнге Гог жь Магоге, демәк коалисйа мьләта, ԝе һʹьщуми сәр хьзмәткʹаред Хԝәде бькә (Һәзәԛел 38:18-20). Ле әԝ һʹьщума кьн ԝе сәр нәкʹәвә у һʹәбандьна тʹәмьз нәдә сәкьнандьне. Йаһоԝа ԝе хьзмәткʹаред хԝә хьлаз кә. Йуһʹәннайе шанди хәйаләкеда «әʹлаләтәкә . . . мәзьн», демәк пәзед дьн, дит. Ԝирʹа һатә готьне кӧ әԝана жь «тәнгасийа мәзьн» дәркʹәтьнә (Әʹйанти 7:9, 14). Демәк әԝана ԝе бенә хьлазкьрьне! w24.02 5-6 ¶13-14

Сәва кӧ әм рʹӧһʹе пироз бьстиньн, әм гәрәке дӧа бькьн, Хәбәра Хԝәде бьхуньн у хԝә ль тʹәшкиләта ԝи бьгьрьн, йа кӧ бь рʹебәрийа рʹӧһʹе пироз пешда дьчә. Ӧса әме бькарьбьн «бәре рʹӧһʹ» пешда биньн (Галати 5:22, 23, ДТʹ). Хԝәде рʹӧһʹе пироз дьдә тʹәне ԝан мәрьва фькьр у кьред кʹижана тʹәмьз ә. Һәрге әм бәрдәԝам кьн сәр тьштед хьраб бьфькьрьн, йан жи ль гора фькьред нәбаш тьшта бькьн, Хԝәде ԝе рʹӧһʹе пироз нәдә мә (1 Тʹесалоники 4:7, 8). Хенщи ве йәке, сәва кӧ әм бәрдәԝам кьн рʹӧһʹе пироз бьстиньн, әм гәрәке «пʹехәмбәртийа берʹумәт нәкьн» (1 Тʹесалоники 5:20). Ве рʹезеда, хәбәра ‹пʹехәмбәрти› те һʹәсабе хәбәред кӧ Хԝәде бь һʹӧкӧме рʹӧһʹе пироз дайә мә. Мәсәлә, һьнә жь ван хәбәра бәʹса рʹожа Йаһоԝа дькьн у тиньн бира мә, кӧ әв рʹож чьԛас незик ә. Гәрәке әм нәфькьрьн ԝәки әме пе чʹәʹве хԝә Һармәгәдоне нәвиньн. Дәԝса ве йәке, сәва кӧ әм бир нәкьн, ԝәки рʹожа Хԝәде чьԛас незик ә, әм гәрәке һәр рʹож «жийина һʹәлал у хԝәденасийеда бьмәшьн» (2 Пәтрус 3:11, 12). w23.06 12 ¶13-14

Һәрге сәр һащәта мәйә әләктроник ньшкева шькләки порнографи вәбә, гәрәке әм чь бькьн? Гәрәке әм дәрберʹа бәре хԝә бьзьвьрʹиньн у әве шькьле нәньһерʹьн. Ԝе мәрʹа һеса бә ве йәке бькьн, һәрге әм биньн бира хԝә, кӧ достийа мә тʹәви Йаһоԝа чьԛас ԛимәт ә. Һьнә шькьлед кӧ рʹастә-рʹаст найенә һʹәсабе порнографийа, диса жи дькарьн һәстед мәрийа гӧр бькьн. Чьрʹа лазьм ә кӧ әм жь шькьлед ви щурʹәйи жи бьрʹәвьн? Чьмки чаԝа кӧ Иса готьбу, «кʹи бь тәме хьраб жьнәке бьньһерʹә, әԝи дьле хԝәда иди тʹәви ԝе зьнекʹари кьр» (Мәтта 5:28, 29). Рʹуспики бь наве Девид, йе кӧ Тайландеда дьжи, дьбежә: «Әз һәртʹьм жь хԝә дьпьрсьм: ‹Һәрге әз шькьләкә нәщайиз, йа кӧ найе һʹәсабе порнографийа, бьньһерʹьм, гәло Йаһоԝа ԝе жь мьн рʹази бә?› Фькьред ӧса али мьн дькьн, ԝәки әз сафикьрьнед рʹаст бькьм». Гәло чь дькарә али мә бькә, кӧ әм сафикьрьнед баш бькьн у дьле Йаһоԝа нәешиньн? Кʹьтеба Пироз нишан дькә, ԝәки тьрса Хԝәде дәстпека биланийа рʹаст ә. w23.06 23 ¶12-13

Дьбәкә әв «одәйед һӧндӧрʹ» тенә һʹәсабе щьватед мә. Ԝе дәме, һәрге әм тʹәви хушк-бьра Йаһоԝарʹа хьзмәт кьн, Йаһоԝа соз дьдә кӧ әԝе мә бьпʹарезә. Ләма жи, гәрәке әм ньһада хирәт бькьн кӧ жь дьл хушк у бьра һʹьз бькьн. Дьбәкә хьлазбуна мә ве йәкева гьредайи бә! «Рʹожа мәзьн йа Хӧдан» ԝе бона һʹәму мәрьва ԝәхтәкә гәләк чәтьн бә (Сефанйа 1:14, 15). Хьзмәткʹаред Йаһоԝа жи ԝе рʹасти тәнгасийа бен. Ле һәрге әм хԝә ньһада һазьр кьн, әме бькарьбьн рʹьһʹәт бьминьн у али кәсед дьн бькьн. Чь жи бьбә, әме һьмбәри һʹәму проблема сәбьр кьн. Гава хушк у бьред мә еше бькʹьшиньн, әме хирәт бькьн кӧ дьлшәԝатийе ԝанрʹа нишан кьн у али ԝан бькьн. У һәрге әм ньһада хушк-бьра һʹьз бькьн, әме ахьрийеда жи ԝана һʹьз бькьн. Паше, Йаһоԝа ԝе жийина һʹәта-һʹәтайе бьдә мә. Һьнге ԝе тʹӧ тʹәшԛәлә у тәнгаси тʹӧнә бьн у ԝе бенә биркьрьне (Ишайа 65:17). w23.07 7 ¶16-17

Хәбәра Хԝәдеда гәләк щар меред амьн ча кәсед ԛәԝи тенә навкьрьне. Ле щара ԝана жи хԝә бе ԛәԝат тʹәхмин дькьр. Мәсәлә, һьнә дәрәщада Даԝьд Пʹадша хԝә мина чʹийаки ԛәԝи тʹәхмин дькьр, ле һьнә дәрәщада хоф у тьрс дькʹәтә дьле ԝи (Зәбур 30:7). Йаһоԝа бь сайа рʹӧһʹе пироз ԛәԝатәкә мәзьн дабу Шьмшон. Ле Шьмшон заньбу кӧ бе ԛәԝата Хԝәде, әԝе сьст бә у бьбә мина мәрьвед дьн (Һʹакьмти 14:5, 6; 16:17). Әв меред амьн ԛәԝи бун, чьмки Йаһоԝа ԛәԝат дьда ԝан. Паԝлосе шанди заньбу, ԝәки әԝ жи һʹәԝще ԛәԝата Йаһоԝа бу (2 Корьнтʹи 12:9, 10). Әԝ рʹасти чәтьнайед сьһʹәт-ԛәԝатева гьредайи дьһат (Галати 4:13, 14). Щара ԝирʹа жи чәтьн бу тьштед рʹаст бькә (Рʹомайи 7:18, 19). У щара әԝ бәр хԝә дькʹәт, кӧ ахьрийа ԝи ԝе чаԝа бә (2 Корьнтʹи 1:8, 9). Ле гава Паԝлос сьст дьбу, әԝ диса жи ԛәԝи дьбу. Гәло чаԝа? Йаһоԝа һаԛас ԛәԝат дьда ԝи, чьԛас ԝирʹа лазьм бу. Әԝи Паԝлос ԛәԝи дькьр. w23.10 12 ¶1-2

Һәрге әм жи щарна хԝә беԛимәт һʹәсаб дькьн, ԝәрә әм биньн бира хԝә, кӧ Йаһоԝа әм чаԝа кʹьшандьнә бәрбь хԝә (Йуһʹәнна 6:44). Йаһоԝа занә кӧ дьле мәда чь һәйә, у әԝ һʹӧнӧред мәйә баш дьвинә, һәрге әм ван навиньн жи (2 Дирок 6:30). Гава әԝ дьбежә кӧ әм ԛимәт ьн, әм дькарьн ве йәкеда дӧдьли нәбьн (1 Йуһʹәнна 3:19, 20). Һьнә Мәсиһи хԝә бона тьштед бәре сущдар дькьн (1 Пәтрус 4:3). Ӧса жи, хьзмәткʹаред Хԝәдейи амьн һьмбәри кемасийед хԝә шәрʹ дькьн. Һәрге дьле тә, тә сущдар бькә, бир нәкә ԝәки хьзмәткʹаред Йаһоԝайи бәре жи хԝә ӧса тʹәхмин дькьрьн. Мәсәлә, Паԝлосе шанди жь бо кемасийед хԝә әʹщьз дьбу (Рʹомайи 7:24). Һәмьки Паԝлос гӧнед хԝә тʹобә кьрьбу у һатьбу ньхӧмандьне, ле диса жи әԝи гот кӧ әԝ «жь шандийа йе һәри паш» ә у һәри гӧнәкʹар ә (1 Корьнтʹи 15:9; 1 Тимотʹейо 1:15). w24.03 27 ¶5-6

Сәрһатийа Йоаш Пʹадша нишан дькә, ԝәки әм гәрәке хԝәрʹа һәвалед ӧса бьжберьн йед кӧ Йаһоԝа һʹәз дькьн у дьхԝазьн дьле ԝи ша кьн. Һәвалед ӧса ԝе али мә бькьн кӧ әм тьштед ԛәнщ бькьн. Һәвалед мә дькарьн жь мә щаһьлтьр йан мәзьнтьр бьн. Йоаш жи жь һәвале хԝә Йәһойада щаһьлтьр бу. Жь хԝә бьпьрсә: «Гәло һәвалед мьн али мьн дькьн кӧ баԝәрийа мьн дьһа ԛәԝи бә? Гәло әԝана мьн һелан дькьн кӧ әз ль гора ԛанун у принсипед Хԝәде бьжим? Гәло әԝана бәʹса Йаһоԝа у рʹастийед ԝийә ԛимәт дькьн? Гәло әԝана тʹәне тьштед ӧса дьбежьн йед кӧ әз дьхԝазьм бьбьһем, у чахе лазьм ә, гәло әԝана дәрһәԛа шашийа мьн дьбежьнә мьн?» (Мәтʹәлок 27:5, 6, 17). Бь рʹасти, һәвалед кӧ Йаһоԝа һʹәз накьн тәрʹа нә лазьм ьн. Ле һәвалед кӧ Йаһоԝа һʹәз дькьн гәләк ԛимәт ьн, чьмки әԝана ԝе сәр тә баш һʹӧкӧм кьн (Мәтʹәлок 13:20). w23.09 9-10 ¶6-7

Алифбәйа Йунани бь һʹәрфа алфа дәстпедьбә у бь һʹәрфа омега хьлаз дьбә. Бь ԝан гьлийа, «Алфа у Омега», Йаһоԝа дьдә кʹьфше, кӧ гава әԝ дәстпедькә тьштәки бькә, бе шьк әԝ ԝи тьшти тинә сери. Йаһоԝа Адәм у Һеԝайерʹа гот, кӧ ԛьрара ԝи бона мәрьва у әʹрде чь йә. Кʹьтеба Пироз дьбежә: «Хԝәде дӧа ль ԝан кьр у Хԝәде ԝанрʹа гот: ‹Шин бьн у ль һәв зедә бьн, әʹрде тʹьжи кьн у хԝәйитийе ле бькьн›» (Дәстпебун 1:28). Чахе Йаһоԝа щара пешьн дәрһәԛа ԛьрара хԝә гот, әв йәк дәстпек бу, демәк «Алфа» бу. Ле чахе ԛьрара ԝи бь тʹәмами бе сери у мәрьвед гӧһдар жь зӧрʹәта Адәм у Һеԝайе дьнйайе тʹьжә кьн у бькьнә Щьнәт, әв йәк ԝе «Омега» бә. Чахе әʹфьрандьна «әʹрд у әʹзман тʹәмамийа нәхшед хԝәва ль сәр һәвда һатьн», һьнге Йаһоԝа тьштәки ӧса гот, чь кӧ да кʹьфше ԝәки созе ԝи ԝе әʹсәйи бе сери. Ԛьрара Ԝи бона мәрьва у әʹрде, ԝе хьлазийа рʹожа һʹәфта бь тʹәмами бе сери (Дәстпебун 2:1-3). w23.11 5 ¶13-14

Рʹеԝитийа жь Бабилоне һʹәта Исраеле гәләк зәʹмәт бу у ԝәкә чар мәһа дькʹьшанд. Ле Йаһоԝа соз дабу, кӧ ԝе һʹәму чәтьнайа жь рʹийа ԝан бьдә һьлдане. Бона Щьһуйед амьн, вәгәрʹьн ԝәлате хԝә Исраеле, һежайи һәр тьшти бу. Чьмки бона ԝан кʹәрәмед һәри мәзьн һʹәбандьна Йаһоԝа бу. Бабилонеда пʹарьстгәһа Йаһоԝа тʹӧнә бу. Ԝедәре, бона ԛӧрбананина ль гора Ԛануна Муса, нә ԛӧрбангәһ нә жи кʹаһинед кʹьфшкьри һәбун, ԝәки ԛӧрбана биньн. Ӧса жи, ви шәһәрида һʹәчʹи зәʹф мәрьв, хӧданед ԛәлп дьһʹәбандьн, нә кӧ Йаһоԝа. Ләма жи бь һʹәзара Щьһуйед хԝәдехоф, һʹьзрәта ԝе рʹоже бун, кӧ вәгәрʹьн ԝәлате хԝә у диса ԝедәре Йаһоԝа бьһʹәбиньн. w23.05 14-15 ¶3-4

Сәва кӧ әм «мина зарʹед рʹонайе бьжин», әм һʹәԝще аликʹарийа рʹӧһʹе пироз ьн. Гәло чьрʹа? Чьмки һеса нинә кӧ әм ве дьнйа бенамусда тʹәмьз бьминьн (1 Тʹесалоники 4:3-5, 7, 8). Рʹӧһʹе пироз дькарә али мә бькә, ԝәки әм һьмбәри фькьр у философийед дьнйайе, йед кӧ мьԛабьли ньһерʹандьна Хԝәде нә, шәрʹ бькьн. Ӧса жи рʹӧһʹе пироз дькарә али мә бькә, ԝәки әм «ԛәнщи, һәԛи у рʹасти» нав хԝәда пешда биньн (Әфәси 5:9). Әм гәрәке дӧа бькьн, ԝәки Йаһоԝа рʹӧһʹе пироз бьдә мә. Иса готьбу, ԝәки Йаһоԝа ԝе рʹӧһʹе пироз бьдә ԝан, йед кӧ «жь ԝи дьхԝазьн» (Луԛа 11:13). Ӧса жи гава әм сәр щьвата тʹәви хушк у бьра пәсьне Йаһоԝа дьдьн, әм рʹӧһʹе пироз дьстиньн (Әфәс. 5:19, 20). Рʹӧһʹе пироз ԝе ӧса жи али мә бькә, ԝәки әм ль гора хԝәстьна Хԝәде бьжин. w24.03 23-24 ¶13-15

Тәрʹа һе зедә сәбьр лазьм ә? Һәрге әре, сәва ве йәке дӧа бькә. Сәбьр һʹӧнӧре бәре рʹӧһʹе пироз ә (Галати 5:22, 23). Ләма жи әм дькарьн бона рʹӧһʹе пироз дӧа кьн у жь Йаһоԝа бьхԝазьн кӧ али мә бькә, ԝәки әм сәбьра хԝә зедә кьн. Һәрге сәбьра мә бе щерʹьбандьне, әме дӧада рʹӧһʹе пироз жь Хԝәде «бьхԝазьн», ԝәки бькарьбьн сәбьр кьн (Луԛа 11:13). Ӧса жи әм дькарьн жь Йаһоԝа рʹәща кьн, ԝәки әԝ али мә бькә кӧ әм ль гора ньһерʹандьна ԝи бьфькьрьн. Паши дӧакьрьне, әм гәрәке чь жь дәсте мә те бькьн, ԝәки һәр рʹож сәбьр кьн. Әм чьԛас бона сәбьркьрьне дӧа бькьн у һәр тьшти бькьн кӧ бь сәбьр бьн, әв һʹӧнӧр ԝе кʹурайа дьле мәда кʹока хԝә бәрдә у бьбә пʹара хәйсәте мә. Ӧса жи, дәрһәԛа сәрһатийед Кʹьтеба Пироз кʹур бьфькьрә. Кʹьтеба Пироз бәʹса гәләк мәрьвед бь сәбьр дькә. Гава әм ван сәрһатийа дьхуньн у ль сәр ԝан кʹур дьфькьрьн, әм һин дьбьн кӧ сәбьр кьн. w23.08 22 ¶10-11

Иса Пәтрусе шандирʹа гот, кӧ Йаһоԝа ԝе али ԝи бькә у бона ԝи хәм бькә. Паши рʹабуна жь мьрьне, Иса бь кʹәрәмәт али Пәтрус у шандийед дьн кьр, кӧ әԝана гәләк мәʹсийа бьгьрьн (Йуһʹәнна 21:4-6). Жь ве кʹәрәмәте, Пәтрус фәʹм кьр ԝәки Йаһоԝа ԝе һʹәму һʹәԝщед ԝи рʹази кә. Ԝи чахи, дьԛәԝьмә әв гьлийед Иса һатьнә бира ԝи: Йаһоԝа ԝе ԝан мәрьва бьбә хԝәйи, йед кӧ «бәре пешьн ль Пʹадшатийа Хԝәде бьгәрʹьн» (Мәтта 6:33). Ләма жи, Пәтрус пешийа һәр тьшти дина хԝә дьда хьзмәтийе, нә кӧ шьхӧле мәʹсигьрийе. Рʹожа Пенщийә Һʹәсаб сала 33 Д.М., әԝи али бь һʹәзара мәрьва кьр, кӧ әԝана мьзгинийе ԛәбул кьн (Кʹаред Шандийа 2:14, 37-41). Паше әԝи али Самәрйа у кәсед жь мьләтед дьн дькьр, кӧ әԝана бьбьнә хьзмәткʹаред Хԝәде (Кʹаред Шандийа 8:14-17; 10:44-48). Бәле, Йаһоԝа Пәтрус да хәбате, ԝәки мәрьвед жь һʹәму мьләта бьбьнә пʹара щьвата Мәсиһити. w23.09 20 ¶1; 23 ¶11

Ԝәкә дӧ сал шунда, гава Бабилонийа Оршәлим ԝеран кьрьн, Пʹадше Бабилоне, Нәбукәднәсәр хәԝн-хәйаләкә тьрс дит, дәрһәԛа һʹәйкәләки мәзьн. Әԝи ԛьрар кьр, кӧ һәрге нәвежьн ԝәки әԝи чь хәԝн дитийә у шьровәнәкьн, әԝе ԛәсьреда һʹәму меред билан бькӧжә, Данийел жи нава ԝанда бу (Данийел 2:3-5). Данийел гәрәке ләз кʹәта у зу-зу тьштәк бькьра, чьмки чаԝа әʹмьре ԝи ӧса жи әʹмьре гәләк мәрьвед дьн, бьн хофеда бу. Әԝ «кʹәт һӧндӧрʹ у жь пʹадша ԝәхт хԝәст кӧ әԝ дьхԝазә шьровәйа хәԝна ԝи бькә» (Данийел 2:16, ИМ). Бона ве йәке мерхаси у баԝәри лазьм бун. Кʹьтеба Пироз набежә кӧ Данийел пешийа ве йәке ида хәԝн шьровәкьрьбу. Әԝи жь һәвалед хԝә рʹәща кьр кӧ әԝана «жь бо сьрʹа ве хәԝне жь Хԝәдайе Әʹзмана аликʹарийе бьхԝазьн» (Данийел 2:18, ИМ). Йаһоԝа щаба дӧайед ԝан да. Бь аликʹарийа Хԝәде, Данийел хәԝна Нәбукәднәсәр шьровәкьр. Әԝ у һәвалед ԝи жь мьрьне хьлаз бун. w23.08 3 ¶4

Дәрһәԛа кʹара сәбьркьрьне бьфькьрьн. Гава әм бь сәбьр ьн, әм дьһа бәхтәԝар у дьлрʹьһʹәт ьн. Сәбьркьрьн дькарә һьм сәр һәст у фькьред мә, һьм жи сәр сьһʹәт-ԛәԝата мә баш һʹӧкӧм кә. Гава әм һьндава мәрьвада сәбьре дьдьнә кʹьфше, әв йәк һәләԛәтийа мә тʹәви ԝан, дьһа баш дькә. Ӧса жи бь сайа сәбьре, щьвата мәда ԝе дьһа зедә тʹьфаԛи у йәкти һәбә. Һәрге кәсәк мә әʹщьз бькә, ле әм зу һерс нәкʹәвьн, проблем ԝе мәзьн нәбә (Зәбур 37:8; Мәтʹәлок 14:29). Ле йа лапә фәрз әв ә, кӧ әм чʹәʹв дьдьнә Баве хԝәйи әʹзмана у дьһа незики ԝи дьбьн. Сәбьркьрьн һʹӧнӧрәки гәләк ԛимәт у керһати йә! Щарна һеса нинә сәбьре бьдьнә кʹьфше, ле бь аликʹарийа Йаһоԝа, әм дькарьн сәбьра хԝә зедә кьн. Әм бь сәбьр һивийа дьнйа тʹәзә нә. Әм баԝәр ьн, кӧ «чʹәʹве Хӧдан ль сәр хофкʹешед Ԝи нә у ль сәр ԝанә кӧ һивийа һʹӧба Ԝи нә» (Зәбур 33:18). Ԝәрен әм тʹьме һәр тьшти бькьн, ԝәки бәрдәԝам кьн сәбьре бьдьнә кʹьфше! w23.08 22 ¶7; 25 ¶16-17

Чаԝа кӧ Аԛубда те готьне, әв мәрьв дьԛәԝьмә дьбежә, ԝәки баԝәрийа ԝи һәйә, ле кьред ԝи ве йәке нишан накьн (Аԛуб 2:1-5, 9). Аԛуб ӧса жи дәрһәԛа ԝи мәрьви гьли дькә, йе кӧ бьраки йан хушкәкә бе кʹьнщ у бе хԝарьн дьвинә, ле али ԝан накә. Һәрге жи әв кәс бежә кӧ баԝәрийа ԝи һәйә, ле йәкә кьред ԝи ве йәке нишан накьн, баԝәрийа ԝи кери тьштәки найе (Аԛуб 2:14-16). Аԛуб бәʹса Рʹәхабе жи кьр, йа кӧ баԝәрийа хԝә бь кьред хԝә нишан дькьр (Аԛуб 2:25, 26). Әԝе бьһистьбу дәрһәԛа тьштед кӧ Йаһоԝа бона Исраелийа кьрьбу, у заньбу ԝәки Йаһоԝа пьштгьрийа Исраелийа дькә (Йешу 2:9-11). Рʹәхабе баԝәрийа хԝә бь кьред хԝә избат кьр. Гава жийина дӧ щәсусед Исраели кʹәтьбу ԛәзийе, әԝе әԝ вәшартьн. Мина Бьраһим, әԝ жьна нә Исраели жи, рʹаст ә гӧнәкʹар бу у хԝә ль Ԛануна Муса нәдьгьрт, ле әԝ рʹаст һатә һʹәсабе. Жь сәрһатийа Рʹәхабе әм һин дьбьн, кӧ фәрз ә ԝәки әм бь кьред хԝә баԝәрийа хԝә нишан кьн. w23.12 5-6 ¶12-13

Бәс нинә кӧ әм тʹәне рʹастийед сәрәкә йед Кʹьтеба Пироз фәʹм кьн. Әм жь дьл дьхԝазьн бь аликʹарийа рʹӧһʹе пироз «нет-мәрәмед Хԝәдейә кʹур жи» һин бьн (1 Корьнтʹи 2:9, 10). Тӧ дькари тʹемәкә ӧса лекʹолин бьки, йа кӧ ԝе тә дьһа незики Йаһоԝа кә. Мәсәлә, әв тʹема һежайи лекʹолине нә: Чаԝа Хԝәде һʹәзкьрьна хԝә хьзмәткʹаред хԝәйә бәрерʹа дьда кʹьфше? Әв йәк чаԝа избат дькә, ԝәки әԝ тә жи һʹәз дькә? Ӧса жи, тӧ дькари лекʹолин ки, кӧ Йаһоԝа дьхԝәст ԝәки Исраели чаԝа Ԝи бьһʹәбиньн, у бәрамбәр кә, кӧ Әԝ чаԝа дьхԝазә ԝәки әм иро жерʹа хьзмәт кьн. Йан жи, тьштед кӧ пʹехәмбәра пешда дәрһәԛа Иса Мәсиһ готьбун, чаԝа ԝәʹде жийин у хьзмәтийа ԝи сәр әʹрде, һатьнә сери? Тӧ дькари бь аликʹарийа Индекса Әʹдәбйәта Бьрща Ԛәрәԝьлийе, йан жи бь сайа Рʹебәрийа Лекʹолинкьрьне бона Шәʹдед Йаһоԝа, кʹур лекʹолина бьки у жь ве йәке шабуне бьстини. Һәрге тӧ Кʹьтеба Пироз кʹур лекʹолин ки, баԝәрийа тә ԝе дьһа ԛәԝи бә у тӧйе дьһа баш Хԝәде нас бьки (Мәтʹәлок 2:4, 5). w23.10 18-19 ¶3-5

Пәтрусе шанди гот, кӧ һʹәзкьрьна мә гәрәке «бь дьл у щан бә». Ле пʹара дӧда йа ве рʹезеда те готьне кӧ әв һʹәзкьрьн ча сәр мә һʹӧкӧм дькә. Әв мә һелан дькә чʹәʹве хԝә сәр шашийед хушк-бьра дадьн. Әм дькарьн ве йәке бәрамбәри мәсәләке бькьн. Бьдьнә бәр чʹәʹве хԝә кӧ сьфрәк гәләк һʹәрьши йә у ләкʹә сәр ьн. Һәрге пʹарчʹе сьфьре бавежьнә сәр, ԝе нә кӧ тʹәне ләкʹәк йан дӧдӧ бе вәшартьне, ле гәләк ԛьсуред сьфьре. Һәма бь ԝи щурʹәйи, һәрге һʹәзкьрьна мә һьндава хушк-бьра бь дьл у щан бә, әме бькарьбьн нә кӧ тʹәне шашик йан дӧда бьбахшиньнә ԝан, ле «гәләк гӧна». Һʹәзкьрьна мә һьндава хушк-бьрада гәрәке ӧса ԛәԝи бә, ԝәки әм бькарьбьн бь дьл у щан һәла һе шашийед ԝанә мәзьн жи бьбахшиньн (Колоси 3:13). Гава әм ӧса дькьн, бь ве йәке әм дьдьнә кʹьфше, кӧ һʹәзкьрьна мә ԛәԝи йә у әм дьле Йаһоԝа ша дькьн. w23.11 11-12 ¶13-15

Гава Йошийа Пʹадша 26 сали бу, әԝи дәстпекьр пʹарьстгәһе тʹәзә кә. Ԝи чахи, кʹьтеба Ԛануна Йаһоԝа һатә дитьне, йа кӧ Хԝәде бь сайа Муса дабу щьмәʹта хԝә. Чахе пʹадша бьһист кӧ чь һатийә ньвисаре, әԝи дәрберʹа хԝәст һәр тьшти ль гора ван ньвисара бькә (2 Дирок 34:14, 19-21). Тӧ һʹәз дьки тʹьме Кʹьтеба Пироз бьхуни? Гәло тӧ һәр тьшти дьки, ԝәки һәр рʹож Кʹьтеба Пироз бьхуни? Ле жь ве йәке тӧ ләзәте дьстини? Гава Йошийа ԝәкә 39 сали бу, шашикә ԝи бу сәбәбе мьрьна ԝи. Дәԝса кӧ жь Йаһоԝа рʹебәрийе бьхԝазә, әԝи хԝәха сафи кьр чь бькә (2 Дирок 35:20-25). Жь ве йәке, әм дькарьн дәрсәке хԝәрʹа һьлдьн. Гәрәке әм һәртʹьм рʹебәрийа Йаһоԝа бьгәрʹьн, фьрԛи тʹӧнә әм чәнд сали нә йан жи чьԛас ԝәхт Кʹьтеба Пироз лекʹолин дькьн. Әв те һʹәсабе, кӧ әм гәрәке һәр рʹож бона рʹебәрийа Йаһоԝа дӧа бькьн, Хәбәра ԝи бьхуньн, сәр ԝе кʹур бьфькьрьн у гӧһ бьдьн ширәтед хушк-бьред рʹӧһʹанида гьһишти. Бь ви щурʹәйи, әме дьһа кем шашийед гьран бькьн у дьһа зедә шабуне бьстиньн (Аԛуб 1:25). w23.09 12 ¶15-16

Сәрһатийед гәләк кʹӧлфәтед кӧ Йаһоԝа һʹәз дькьрьн у жерʹа хьзмәт дькьрьн, Кʹьтеба Пирозда һатьнә ньвисаре. Ԝана хԝәгьртьн дьда кʹьфше у һәр тьштида амьн бун (1 Тимотʹейо 3:11). Иро щьватед мәда жи хушкед ӧса һәнә, йед кӧ жь дьл Йаһоԝа һʹәз дькьн у бунә Мәсиһийед гьһишти. Хушкед щаһьл дькарьн жь ԝана гәләк тьшт һин бьн. Хушкед щаһьл, бьфькьрьн кӧ һун дькарьн жь хушкед гьһишти чь һин бьн. Дина хԝә бьдьнә һʹӧнӧред ԝанә баш. Мьлукти бона хьзмәткʹаред Хԝәде йед гьһишти гәләк фәрз ә. Һәрге кʹӧлфәт мьлук бә, достийа ԝе тʹәви Йаһоԝа у кәсед дьн ԝе баш бә. Мәсәлә, кʹӧлфәта кӧ Йаһоԝа һʹәз дькә, әԝ бь мьлукти принсипа сәрԝертийе тинә сери, йа кӧ Хԝәде дайә (1 Корьнтʹи 11:3). Әв принсипа кӧ Баве мәйи әʹзмана данийә, гәрәке һьм щьватеда һьм жи малбәтеда бе хәбьтандьне. w23.12 18-19 ¶3-5

Йаһоԝа дьхԝазә, ԝәки мер жьна хԝә һʹәз бькә, һʹәму һʹәԝщед ԝе һьлдә һʹәсаб, жерʹа бьбә һәваләки баш у али ԝе бькә, кӧ әԝ дьһа незики Йаһоԝа бә. Фькьрандьна кʹур, ԛәдьргьртьна жьна у хирәт, гәләк фәрз ьн. Әв тьшт ԝе али тә бькьн, ԝәки тӧ зәԝащеда бьби һәваләки баш. Паши зәԝаще, дьбәкә тӧ бьби бав. Тӧ дькари жь Йаһоԝа һин би, ԝәки бьби бавәки баш (Әфәси 6:4). Йаһоԝа әшкәрә Кӧрʹе хԝә Исарʹа гот, кӧ әԝ ле һʹәз дькә у жь ԝи рʹази йә (Мәтта 3:17). Һәрге тӧ бьби бав, һәр рʹож зарʹед хԝәрʹа бежә, ԝәки тӧ ԝана һʹәз дьки. Бона кьред ԝанә баш пʹайе ԝан бьдә. Бавед кӧ чʹәʹв дьдьнә Йаһоԝа, али зарʹед хԝә дькьн, кӧ әԝана бьбьнә Мәсиһийед гьһишти. Тӧ чаԝа дькари ньһада бона ве щабдарийе хԝә һазьр ки? Мәсәлә, бь дьл у щан бона малбәта хԝә у хушк-бьра хәм бькә, ӧса жи һʹәзкьрьн у рʹазибуна хԝә ԝанрʹа бьдә кʹьфше (Йуһʹәнна 15:9). w23.12 28-29 ¶17-18

Мина һәр кәси, хьзмәткʹаред Йаһоԝа жи рʹасти тәнгасийа тен у нәхԝәш дькʹәвьн. Сәрда жи, Шәʹдед Йаһоԝа жь дәсте кәсед кӧ ԝана һʹәз накьн рʹасти зӧлми у зерандьне тен. Һәмьки Йаһоԝа һʹәму чәтьнайа жь мә дур нахә, ле әԝи соз дайә кӧ ԝе али мә бькә (Ишайа 41:10). Бь аликʹарийа ԝи әм дькарьн шабуна хԝә ӧнда нәкьн, сафикьрьнед баш бькьн у нав чәтьнайада жи ԝирʹа амьн бьминьн. Ль гора Кʹьтеба Пироз, әме «әʹдьлайийа Хԝәде» бьстиньн (Филипи 4:6, 7). Әв те һʹәсабе кӧ әʹдьлайи ԝе бькʹәвә дьле мә, чьмки әм достед Йаһоԝа нә. «Әʹдьлайийа Хԝәде кӧ жь һәр һʹьш-аԛьли дәрбазтьр ә» у жь һәр тьшти кӧ әм дькарьн бьдьн бәр чʹәʹве хԝә, баштьр ә. Бәле, чахе әм жь дьл дӧа дькьн, рʹьһʹәтийа мәзьн кӧ дькʹәвә дьле мә, әв һәйә «әʹдьлайийа Хԝәде». w24.01 20 ¶2; 21 ¶4

Әԝед кӧ Йаһоԝа һʹәз дькьн, бь дьл у щан дьхԝазьн пәсьне наве ԝи бьдьн. Даԝьд Пʹадша заньбу кӧ гава мәрьв пәсьне наве Йаһоԝа дьдә, әԝ бь рʹасти пәсьне Йаһоԝа дьдә. Чахе әм наве Йаһоԝа дьбьһен, һьнге хәйсәт, һʹӧнӧр у кьред ԝи тенә бәр чʹәʹве мә. Даԝьд дьхԝәст бь «һʹәму һәбуна» хԝә, демәк бь тʹәмамийа дьле хԝә пәсьне наве Хԝәде бьдә у ԝи пироз кә. Бона Леԝийа жи пирозкьрьна наве Йаһоԝа тьштәки зәʹф фәрз бу. Ԝана бь мьлукти фәʹм дькьр, кӧ ԝе нькарьбьн тʹәне пе гьлийа бь тʹәмами пәсьне наве Йаһоԝа бьдьн (Нәһәмийа 9:5). Бе шьк, дьле Йаһоԝа гәләк ша дьбу, гава ԝана бь дьл-щан у мьлукти пәсьн дьданә ԝи. w24.02 9 ¶6

Һәрге тӧ нәгьһижи нетәкә хԝә, нәфькьрә кӧ Йаһоԝа тә ча йәки бекер һʹәсаб дькә (2 Корьнтʹи 8:12). Жь ве йәке хԝәрʹа дәрса һин бә, у бир нәкә ԝәки тӧ ида гьһишти чь. Кʹьтеба Пироз дьбежә, кӧ «Хԝәде сәр нәһәԛийе нинә, ԝәки кьред ԝә у әԝ һʹьзкьрьна кӧ ԝә бона наве ԝи да кʹьфше бир бькә» (Ибрани 6:10). Ләма жи дәрһәԛа ԝан тьшта бьфькьрә чь кӧ бал тә ида һатийә стандьне, мәсәлә кӧ тӧ буйи досте Йаһоԝа, бәлакьрьна мьзгинийеда кʹар дьки у һати ньхӧмандьне. Чаԝа кӧ бәре тӧ гьһиштьбуйи нетед хԝәйә рʹӧһʹани, тӧ дькари бәрдәԝам ки пешда һәри у бьгьһижи нетед хԝәйә дьн жи. Бь аликʹарийа Йаһоԝа, тӧ дькари бьгьһижи нета хԝә. Гава тӧ хирәт дьки ԝәки бьгьһижи нета хԝә, бир нәкә кӧ һʹәта ньһа, Йаһоԝа ча али тә кьрийә у хирәта тә кʹәрәм кьрийә (2 Корьнтʹи 4:7). Һәрге тӧ сьст нәби у дәсте хԝә бәржер нәки, тӧйе кʹәрәмед мәзьн бьстини! (Галати 6:9) w23.05 31 ¶16-18

Йаһоԝа мәщала дьгәрʹә кӧ нишани хьзмәткʹаред хԝә бькә, ԝәки әԝ ԝана һʹәз дькә у жь ԝан рʹази йә. Кʹьтеба Пирозда дӧ щара те готьне, кӧ Хԝәде дәрһәԛа Иса ӧса гот: «Әв ә Кӧрʹе мьни дәлал, йе кӧ дьле мьн ша дькә» (Мәтта 3:17; 17:5). Гәло тәйе нәхԝәста, кӧ Йаһоԝа тәрʹа жи бьгота ԝәки әԝ жь тә рʹази йә? Һәмьки Йаһоԝа рʹастә-рʹаст мәрʹа хәбәр надә, ле әԝ бь сайа Кʹьтеба Пироз мәрʹа хәбәр дьдә. Гава әм чар кʹьтебед Мьзгинийә пешьн дьхуньн, әм ча бежи дәнге Йаһоԝа дьбьһен. Шагьртед Иса мәрьвед ԛьсурдар бун, ле диса жи, әԝи ԝана һʹәз дькьр. Ньһерʹандьнед Иса у ньһерʹандьнед Баве ԝи мина һәв ьн. Ләма жи, гава әм гьлийед Иса дьхуньн, ԝәрә әм бьдьн бәр чʹәʹве хԝә кӧ Йаһоԝа тʹәви мә хәбәр дьдә (Йуһʹәнна 15:9, 15). Чахе әм рʹасти чәтьнайа тен әв йәк найе һʹәсабе кӧ Хԝәде мә ԛәбул накә. Бь рʹасти, чәтьнайи мәщале дьдә мә кӧ әм избат бькьн ԝәки әм Хԝәде гәләки һʹәз дькьн у итʹбарийа хԝә ԝи тиньн (Аԛуб 1:12). w24.03 28 ¶10-11