Илон

Хԝәде ԛәԝат дайә Иса, ԝәки әԝ һʹәму проблемед мәрьва бьдә һьлдане. Пе кʹәрәмәтед хԝә, Иса нишан дькьр, кӧ ԛәԝата ԝи һәйә ван проблемед мә сафи кә, йед кӧ мәйе тʹӧ щар нькарьбуйа пе ԛәԝата хԝә сафи кьра. Мәсәлә, ԛәԝата ԝи һәйә, ԝәки мә жь кʹока кӧл-дәрдед мәрьва хьлаз бькә, демәк жь нәхԝәши у мьрьне, кӧ дәрбази сәр мә бунә (Мәтта 9:1-6; Рʹомайи 5:12, 18, 19). Кʹәрәмәтед ԝи бь зәлали нишан дькьрьн, ԝәки әԝ дькарә «һәр щурʹә» нәхԝәшийа ԛәнщ бькә у һәла һе мәрьва жи жь мьрьне рʹакә (Мәтта 4:23; Йуһʹәнна 11:43, 44). Ӧса жи, ԛәԝата ԝи һәйә кӧ фьртона бьдә сәкьнандьне у мәрьва жь һʹӧкӧме щьна хьлаз кә (Маркос 4:37-39; Луԛа 8:2). Әм гәләк ша нә, ԝәки Йаһоԝа ԛәԝатәкә ӧса мәзьн дайә Кӧрʹе хԝә! Әм дькарьн сәд сәләфи баԝәр бьн, кӧ һʹәму созед Йаһоԝа ԝе бь сайа Пʹадшатийа Ԝи бенә сери. Кʹәрәмәтед кӧ Иса сәр әʹрде кьрьбун, мәсәлед ве йәке нә, кӧ ахьрийеда ча Пʹадше әʹзмана, әԝе кʹәрәмәтед һе мәзьн бькә. w23.04 3 ¶5-7

Һәрге щьвата тәда гәләк мьзгинван һәнә, у дәсте тә гәләк щар нәйе дитьне, дьбәкә тӧ бьфькьри ида дәсте хԝә һьлнәбьрʹи. Ле дьлтәнг нәбә, бәрдәԝам кә дәсте хԝә һьлбьрʹә. Тӧ дькари бона һәр щьвинәке, чәнд щаба һазьр ки. Һәрге тә дәстпека щьватеда щаб нәда, диса жи ве мәщала тә һәбә кӧ щаба хԝә бьди. Чахе тӧ хԝә бона лекʹолина Бьрща Ԛәрәԝьлийе һазьр дьки, бьфькьрә кӧ һәр абзасәк чаԝа тʹема сәрәкәва гьредайи йә. Һәрге тӧ ӧса бьки, тӧйе бькарьби щьватеда щабед баш бьди. Ӧса жи, тӧ дькари щабед дәрһәԛа ԝан һинкьрьнед Кʹьтеба Пироз һазьр ки, шьровәкьрьна кʹижана һеса нинә. Гәло чьрʹа? Чьмки гәләк кәс бона абзасед ӧса дәсте хԝә бьльнд накьн. Ле һәрге диса жи сәр чәнд щьвата мәщал накʹәвә дәсте тә, кӧ щаба хԝә бьди, тӧ чь дькари бьки? Пешийа щьвате, тӧ дькари һәрʹи щәм бьре кӧ щьвате дәрбаз дькә у жерʹа бежи ԝәки тӧ дьхԝази щаба кʹижан пьрсе бьди. w23.04 21-22 ¶9-10

Усьв тʹьме һазьр бу гӧһ бьдә рʹебәрийа Йаһоԝа. Ләма жи әԝ малхеки баш бу. Кеми-кем әԝи се щара бона малбәта хԝә рʹебәри жь Хԝәде стандьбу. Чьԛас жи ԝирʹа чәтьн бу, Усьв тʹьме дәрберʹа гӧһ дьда Йаһоԝа (Мәтта 1:20; 2:13-15, 19-21). Әԝ пәй рʹебәрийа Йаһоԝа дьчу, ләма жи әԝи Мәрйәм дьпʹараст у бона ԝе хәм дькьр. Дә бьдьнә бәр чʹәʹве хԝә, кӧ Мәрйәме чьԛас ԛәдьре Усьв дьгьрт у ԝи һʹьз дькьр! Мерно, һун дькарьн чʹәʹв бьдьнә Усьв у бона хԝәйкьрьна малбәта хԝә рʹебәрийед Кʹьтеба Пироз бьгәрʹьн. Һәрге ԝәрʹа һеса нинә ԝан ширәта бьдьнә хәбате, ле диса жи һун ве йәке дькьн, ӧса һун һʹьзкьрьна хԝә һьндава кʹӧлфәта хԝә дьдьнә кʹьфше у дьхԝазьн зәԝаща хԝә ԛәԝи кьн. Хушкәкә жь гьрава Вануату, йа кӧ 20 сала зедәтьр меркьри йә, дьбежә: «Гава мере мьн рʹебәрийа Йаһоԝа дьгәрʹә у хирәт дькә кӧ ль гора ве рʹебәрийе бьжи, әз дьһа зедә ԛәдьре ԝи дьгьрьм. Әз хԝә рʹьһʹәт тʹәхмин дькьм у заньм кӧ сафикьрьнед ԝи гәләк баш ьн». w23.05 21 ¶5

Щьһуйед кӧ жь Бабилоне вәгәрʹийабун ԝәлате хԝә, «мьләтәки бӧһӧрти-жьбарә» бу (Ԛануна Дӧщари 7:6). Ле әв йәк нәдьһатә һʹәсабе, кӧ ԝана гәрәке хԝә нәгӧһаста, сәва кӧ Йаһоԝа жь ԝан рʹази буйа. Һʹәчʹи зәʹф Щьһу Бабилонеда һатьбунә буйине у һини әʹдәт у фькьред Бабилонийа бьбун. Гәләк сал паши ве йәке, кӧ Щьһуйед пешьн вәгәрʹийабун Исраеле, Нәһәмийа Ԝәли дит, ԝәки зарʹед кӧ Исраеледа һатьбун буйине, зьмане Ибрани жи ньзаньбун (Ԛануна Дӧщари 6:6, 7; Нәһәмийа 13:23, 24). Гәло зьмане Ибрани чьрʹа ӧса фәрз бу? Зьмане Ибрани, зьмане сәрәкә бу, сәр кʹижани Хәбәра Хԝәде һатьбу ньвисаре. Ләма жи, сәва кӧ Йаһоԝа һʹьз бькьн у ԝирʹа хьзмәт кьн, лазьм бу кӧ әԝана ви зьмани рʹьнд фәʹм бькьн (Әзра 10:3, 44). Хенщи ве йәке лазьм бу, ԝәки ԝан Щьһуйа гӧһастьнед мәзьн бькьрана. Әв йәк ԝе ԝәлате Исраеледа һеса буйа, чьмки ԝедәре һʹәбандьна Йаһоԝарʹа һеди-һеди дьһатә вәгәрʹандьне (Нәһәмийа 8:8, 9). w23.05 15 ¶6-7

Хԝәстьна мә чьԛас һәбә йан әм чьԛас хирәт бьн жи, дьбә кӧ һьнәк чәтьнайи бенә пешийа мә. Мәсәлә, һьнә тьштед кӧ ньшкева дьԛәԝьмьн, дькарьн ԝәʹдә жь мә бьстиньн, кʹижан мәйе бьда хәбате кӧ бьгьһижьнә нета хԝә (Ԝаиз 9:11). Щарна әм дькарьн жь бо проблема, ԛәԝат у мерхасийа хԝә ӧнда кьн (Мәтʹәлок 24:10). Йан жи дьбәкә жь бо ве йәке, кӧ әм мәрьвнә гӧнәкʹар ьн, мәрʹа чәтьн ә бьгьһижә нета хԝә (Рʹомайи 7:23). Йан жи, дьбәкә әм ԝәстийайи нә (Мәтта 26:43). Ле чь дькарә али мә бькә дьлтәнг нәбьн? Һәрге тьштәк бьԛәԝьмә әв найе һʹәсабе, ԝәки те ида нәгьһижи нета хԝә. Кʹьтеба Пироз дьбежә кӧ гәләк чәтьнайи дькарьн бенә пешийа мә. Ле диса жи, Хәбәра Хԝәде дьбежә кӧ әм дькарьн сәркʹәвьн. Бәле, кәсе кӧ хирәт дькә, ԝәки нава чәтьнайада жи бьгьһижә нета хԝә, избат дькә ԝәки әԝ дьхԝазә дьле Йаһоԝа ша кә. Гава Йаһоԝа хирәта мә дьвинә, әԝ жь мә рʹази йә! w23.05 30 ¶14-15

Хьзмәтийа пешәнгти али хорта дькә, кӧ тʹәви щурʹә-щурʹә мәрьва һәвкʹарийе бькьн. Ӧса жи, әв йәк али ԝан дькә, кӧ пʹәре хԝә бь билани хәрщ кьн (Филипи 4:11-13). Пешийа кӧ бьра дәстпекә ча пешәнг хьзмәт кә, әԝ дькарә ԝәʹдәки ча пешәнге кʹомәкдар хьзмәте кә. Хьзмәтийа пешәнгти дькарә дәри бона гәләк щурʹә хьзмәтийа вәкә, мәсәлә хьзмәтийа Бәйтʹәледа йан жи хьзмәтийа сәр проектед авакьрьне. Гәрәке һәр бьра хԝәрʹа нет дайнә, кӧ бьбә рʹуспи у али хушк-бьра бькә. Ча Кʹьтеба Пироз дьбежә, һәр бьре кӧ дьхԝазә бьгьһижә ве нете, «шьхӧләки ԛәнщ дьхԝазә» (1 Тимотʹейо 3:1). Пешийе бьра гәрәке сәр хԝә бьхәбьтә, ԝәки бьбә бәрдәстийе щьвате. Бәрдәстийед щьвате гәләк алийада пьштгьрийа рʹуспийед щьвате дькьн. Һьм рʹуспи һьм жи бәрдәстийед щьвате, бь мьлукти али хушк-бьра дькьн у бь хирәт мьзгинийе бәла дькьн. w23.12 28 ¶14-16

Мина Йошийа сафикьрьнед баш бькә. Гава Йошийа Пʹадша 16 сали бу, әԝи дәстпекьр Йаһоԝа бьгәрʹә. Әԝи дьхԝәст дәрһәԛа Йаһоԝа пебьһʹәсә у ль гора хԝәстьна ԝи бьжи. Ле әʹмьре ԝи нә һеса бу. Ԝи чахи, һʹәчʹи зәʹф жь щьмәʹте хӧданед ԛәлп дьһʹәбандьн. Ләма жи лазьм бу, ԝәки Йошийа ԛәԝи у сәр хԝә бә, ԝәки бькарьбә һʹәбандьна рʹаст бьпʹарезә. У әԝи һәма ӧса жи кьр! Пешийа 20 салийа хԝә, әԝи дәстпекьр ԝәлате хԝә жь һʹәбандьна ԛәлп паԛьж кә (2 Дирок 34:1, 2). Мина Йошийа, щаһьл жи дькарьн дәрһәԛа Йаһоԝа у һʹӧнӧред ԝийи ԛимәт һе зедә пебьһʹәсьн. Һәрге тӧ ӧса бьки, тӧйе бьхԝази әʹмьре хԝә тʹәсмили Йаһоԝа ки. Әв йәк сәр жийина тә ԝе чаԝа һʹӧкӧм кә? Лука, йе кӧ 14 салийа хԝәда һатә ньхӧмандьне, рʹожа сонда тʹәсмилбуйине ӧса гот: «Ирода әзе әʹмьре хԝәда хьзмәтийа Йаһоԝарʹа дайньм сәр щийе пешьн у һәр тьшти бькьм, ԝәки дьле ԝи ша кьм» (Маркос 12:30). Һәрге тӧ жи ӧса бьки, тӧйе кʹәрәмед мәзьн бьстини! w23.09 11 ¶12-13

Гава Паԝлосе шанди нәʹмә Тʹесалоникийарʹа ньвиси, һе саләк жи дәрбаз нәбьбу кӧ әв щьват һатьбу сазкьрьне. Дьԛәԝьмә ве щьватеда бьред щабдар щерʹьбанди нибун у шаши дькьрьн. Йәкә әԝана һежайи пʹайа бун. Чьԛас тәнгасийа мәзьн незик дьбә, һаԛас һе зедә әм гәрәке итʹбарийа хԝә рʹебәрийа рʹуспийа биньн. Дьбәкә ӧса бьԛәԝьмә, кӧ әм нькарьбьн тʹәви Офиса Сәрәкә у Бәйтʹәле текли бьн, ләма жи гәләк фәрз ә, кӧ әм ньһада рʹуспийа һʹьз бькьн у ԛәдьре ԝан бьгьрьн. Чь жи бьԛәԝьмә, ԝәрә әм һаш жь хԝә һәбьн у дина хԝә нәдьн кемасийед рʹуспийа у бира хԝәда хԝәй кьн, кӧ Йаһоԝа бь сайа Иса Мәсиһ рʹебәрийа ван меред амьн дькә. Чаԝа кӧ кʹӧмзьрьһʹ сәре әскәр дьпарезә, һевийа мә жи һʹьше мә дьпарезә у али мә дькә рʹаст бьфькьрьн. Әм тьштед ве дьнйайеда беԛимәт һʹәсаб дькьн (Филипи 3:8). Һевийа мә али мә дькә, кӧ әм рʹьһʹәт у ԛәԝи бьминьн. w23.06 11-12 ¶11-12

Кәсед кӧ тʹәглифа ‹жьна ахмах› дьбьһен, дькарьн ве тʹәглифе йан ԛәбул кьн йан жи инкʹар кьн. Гәләк мәʹнийед фәрз һәнә, кӧ чьрʹа әм бенамусийе накьн. ‹Жьна ахмах› дьбежә: «Ава дьзийе ширьн ә» (Мәтʹәлок 9:17). Гәло «ава дьзийе» чь йә? Кʹьтеба Пироз һәләԛәтийа сексуал ортʹа жьн-мере кӧ бь ԛануни зәԝьщи нә, бәрамбәри ава сар дькә, йа кӧ рʹожәкә гәрмда мәрьва һеньк дькә (Мәтʹәлок 5:15-18). Бәле, әԝана дькарьн жь ве һәләԛәтийе шабуне бьстиньн. Ле «ава дьзийе» щӧдә йә. Әв йәк дәрһәԛа бенамусийе те готьне, йа кӧ Хԝәде ԛәдәхә дькә. Кәсед кӧ бенамусийе дькьн, ве йәке дьзикава дькьн. Гава әԝана дьфькьрьн, ԝәки тʹӧ кәс ԝе ԝана нәвинә у әԝе бе щәза бьминьн, ви чахи «ава дьзийе» ль бәр дьле ԝан гәләк ширьн дьбә. Дәрәԝәкә чьԛас мәзьн ә! Әԝана дькарьн хԝә бьхапиньн, ле нькарьн Йаһоԝа бьхапиньн, чьмки Йаһоԝа һәр тьшти дьвинә. Кәсе кӧ достийа хԝә тʹәви Хԝәде ӧнда дькә, һәр тьшти ӧнда дькә. Жь ве йәке хьрабтьр тьштәк тʹӧнә (1 Корьнтʹи 6:9, 10). w23.06 22 ¶7-9

Һәрге тӧ дьфькьри ԝәки дӧайед тә ида жь дьл ниньн, йан жи һәрге тӧ ида мина бәре жь хьзмәтийе шабуне настини, нәфькьрә кӧ Йаһоԝа бь сайа рʹӧһʹе пироз ида али тә накә. Мина һәр кәси, тӧ жи мәрьвәки ԛьсурдар и, ләма жи һәстед ӧса щарна дькарьн щәм тә пешда бен. Һәрге хирәта тә сар буйә, мәсәла Паԝлосе шанди бьдә бәр чʹәʹве хԝә. Һәмьки әԝи һәр тьшт дькьр ԝәки чʹәʹв бьдә Иса, ле щарна хԝәстьна ԝи дьһатә гӧһастьне. Йәкә Паԝлос бь хирәт хьзмәтийеда кʹар дькьр у фьрԛи тʹӧнә бу, ԝе дәме әԝи хԝә ча тʹәхмин дькьр. Ләма жи, нә тʹәне сәр һʹиме һәстед хԝә сафикьрьна бькә. Тӧ чь жи тʹәхмин бьки, бьра сафикьрьнед тә рʹаст бьн. Ԝәхт шунда кьред тә ԝе ль сәр һәстед тә һʹӧкӧм бькьн (1 Корьнтʹи 9:16). w24.03 11-12 ¶12-13

Әм дькарьн бьбьнә достед хушк-бьра у тʹәви ԝан ԝәʹдә дәрбаз кьн. Бь ви щурʹәйи, әм дькарьн һʹьзкьрьне ԝанрʹа нишан кьн (2 Корьнтʹи 6:11-13). Щьватед мәда, хушк-бьред жь щурʹә-щурʹә мьләта һәнә у жь һәв щӧдә дьбьн. Һәрге әм дина хԝә бьдьнә хәйсәтед ԝанә баш, әме һʹьзкьрьна нав хԝәда дьһа ԛәԝи кьн. Бәле, һәрге әм һин бьн, кӧ мина Йаһоԝа дәрһәԛа кәсед дьн бьфькьрьн, әме избат кьн ԝәки әм ԝана һʹьз дькьн. Ԝәʹде тәнгасийа мәзьн ԝе гәләк фәрз бә кӧ әм һʹьзкьрьне нишан кьн. Гава әв тәнгаси дәстпебә, гәло Йаһоԝа ԝе чаԝа мә бьпʹарезә? Дина хԝә бьдьне кӧ гава ԝәʹде бәре һʹьщуми сәр бажаре Бабилоне кьрьн, Йаһоԝа чь рʹебәри да хьзмәткʹаред хԝә: «Ԝәрә гәле мьн! Бькʹәвә одәйед хԝә йед һӧндӧрʹ у ль пьшт хԝә дәрийа бьгьрә. Дәмәкә кӧрт [кьн] хԝә вәшерә, һʹәта кӧ хәзәб дәрбаз бу» (Ишайа 26:20, ИМ). Ча кʹьфш ә ԝәʹде тәнгасийа мәзьн жи әм гәрәке гӧһ бьдьнә ве рʹебәрийе. w23.07 6-7 ¶14-16

Бьра сәрԝахтийа тә һʹәмуйарʹа әʹйан бә. Жь хԝә бьпьрсә: «Гәло кәсед дьн мьн ча йәки бәрбьһер у нәрм һʹәсаб дькьн, йан ча йәки сәрт у сәрһʹьшк? Гәло әз тʹьме дьфькьрьм кӧ мәрьвед дьн жи гәрәке ӧса бькьн, чаԝа кӧ әз һʹәсаб дькьм рʹаст ә, йан әз ньһерʹандьна ԝан жи һьлдьдьм һʹәсаб?» Гава әм хирәт дькьн ԝәки бь бәрбьһерийе һәр тьшти бькьн, әм нишан дькьн кӧ әм чʹәʹв дьдьнә Йаһоԝа у Иса. Бәрбьһери те һʹәсабе кӧ гава дәрәща жийина мә те гӧһастьне, әм гәрәке һазьр бьн ль гора дәрәща тʹәзә бьжин. Гӧһастьнед ӧса дькарьн проблемед тʹәзә пешда биньн. Мәсәлә, дьбәкә әм ньшкева ԛайим нәхԝәш кʹәвьн, рʹасти проблемед економики бен, йан жь бо гӧһастьнед политики әʹмьре мә дьһа чәтьн бә (Ԝаиз 9:11). Йан жи, дьбәкә әм тʹәшкиләта Йаһоԝада щабдарикә тʹәзә бьстиньн. Әʹмьре хԝәда әм рʹасти чь жи бен, әв чар тьшт ԝе али мә бькьн: (1) дәрәща тʹәзә ԛәбул кә, (2) дәрһәԛа ахьрийе бьфькьрә, (3) дина хԝә бьдә тьштед баш, у (4) али кәсед дьн бькә. w23.07 21-22 ¶7-8

Чахе Данийел пʹехәмбәр һе хорт бу, Бабилонийа әԝ чаԝа дил бьрьнә Бабилоне, кӧ гәләк дури Оршәлиме бу. Ча кʹьфш ә сәрԝеред Бабилонийа дина хԝә данә Данийел, чьмки әв йәки бәрбьчʹәʹв бу (1 Самуйел 16:7). Әԝ йәки «беԛьсур у льһәвһати» бу у жь малбәтәкә әʹсьлзадә бу. Ләма жи Бабилонийа әԝ һин кьрьн, ԝәки ԛәсьреда хьзмәт кә (Данийел 1:3, 4, 6, ИМ). Йаһоԝа Данийел һʹәз дькьр нә жь бо бәжн-бала ԝи йан жи нав-дәнге ԝи, ле чьмки әԝи хԝә ль рʹастийе дьгьрт у бәр чʹәʹве Хԝәде тьштед рʹаст дькьр. Мәсәлә, чахе Йаһоԝа гот кӧ Данийел мина Нӧһ у Ибо пʹехәмбәр йәки амьн ә, һьнге Данийел дьбәкә ԝәкә 20 сали бу. Ибо у Нӧһ бь дәһа сала бәр Хԝәде навәки баш ԛазанщ кьрьбун (Дәстпебун 5:32; 6:9, 10; Ибо 42:16, 17; Һәзәԛел 14:14). Тʹәмамийа әʹмьре хԝә, Данийел пʹехәмбәр Йаһоԝа һʹәз дькьр (Данийел 10:11, 19). w23.08 2 ¶1-2

Пешийа кӧ тӧ маләке бькʹьрʹи, тәйе бьхԝәста бь чʹәʹве хԝә әв мал у дәр-дора ԝе бьдита. Ӧса жи, тәйе дина хԝә бьда һʹәму отʹаха у һәр ԛӧлчʹед ван. Әм дькарьн һәма бь ԝи щурʹәйи һур бь һур Кʹьтеба Пироз бьхуньн у лекʹолин бькьн. Һәрге әм ләзә-ләз бьхуньн, әме тʹәне «жь готьнед Хԝәде дәрсед пешьнә садә һин бьн», демәк рʹастийед сәрәкә (Ибрани 5:12). Ле чаԝа кӧ мәрьв рʹьнд дина хԝә дьдә һәр ԛӧлчʹед мала тʹәзә, һәма бь ви щурʹәйи әм жи гәрәке Кʹьтеба Пироз кʹур лекʹолин бькьн, ԝәки рʹьнд фәʹм бькьн. Жь бо ве йәке, әм гәрәке бьвиньн кӧ һʹәму рʹастийед Кʹьтеба Пироз чаԝа һәвва гьредайи нә. Ӧса жи, бәс нинә тʹәне бьзаньбьн ван рʹастийа, кʹижана әм баԝәр дькьн, ле әм гәрәке фәʹм бькьн кӧ чьрʹа әм ԝан рʹастийа баԝәр дькьн. Сәва кӧ әм Хәбәра Хԝәде жь һәр алийава фәʹм бькьн, әм гәрәке рʹастийед кʹур жь Кʹьтеба Пироз, пебьһʹәсьн. Паԝлосе шанди хушк-бьрарʹа гот, кӧ әԝана Хәбәра Хԝәде ӧса бьхуньн, ԝәки «бькарьбьн фәʹм бькьн, кӧ бәрайи, дьрежайи, бьльндайи у кʹурайийа» рʹастийе чь йә. Бь сайа ве йәке, ԝе һʹиме баԝәрийа ԝан ԛәԝи буйа (Әфәси 3:14-19). Һәма бь ви щурʹәйи, әм жи гәрәке Кʹьтеба Пироз бьхуньн. w23.10 18 ¶1-3

Кʹьтеба Пирозда гәләк сәрһатийед мәрьвед бь сәбьр һәнә. Тӧ дькари ван сәрһатийа кʹур лекʹолин ки. Мәсәлә, гава Даԝьд щаһьлтийеда ча Пʹадше Исраеле һатьбу бьжартьне, лазьм бу ԝәки әԝ гәләк сала һивийе буйа, һʹәта кӧ бьбуйа Пʹадша. Гава Шьмһʹун у Һана һивийа Мәсиһе создайи бун, ԝана бь амьни Йаһоԝарʹа хьзмәт дькьр (Луԛа 2:25, 36-38). Чахе тӧ дәрһәԛа ван сәрһатийа лекʹолин бьки, жь хԝә бьпьрсә: «Чь али ԝи мәрьви дькьр кӧ әԝ сәбьр кә? Сәбьр чь кʹар жерʹа ани? Әз ча дькарьм чʹәʹв бьдьмә ԝи?» Жь сәрһатийед мәрьвед бе сәбьр жи тӧ дькари һьнә тьшта һин би (1 Самуйел 13:8-14). Жь хԝә бьпьрсә: «Сәбьра ԝан чьрʹа тʹӧнә бу? Ахьрийеда чь һатә сәре ԝан?» w23.08 25 ¶15

Пәтрус йәки амьн бу. Әԝи изьн нәдьда тʹӧ тьшти, кӧ рʹийа ԝи бьгьрә пәй Иса һәрʹә. Щарәке, гава Иса тьштәк шагьртед хԝәрʹа гот у ԝана фәʹм нәкьр, ве дәме Пәтрус амьнийа хԝә нишан кьр (Йуһʹәнна 6:68). Гәләк пәйчуйед Иса һивийа шьровәкьрьна гьлийед ԝи нәсәкьнин у пьшта хԝә данә ԝи чун. Ле Пәтрус ӧса нәкьр, чьмки әԝи заньбу, кӧ «готьнед жийина һʹәта-һʹәтайе» щәм Иса нә. Иса заньбу ԝәки Пәтрус у шандийед дьн, ԝе ԝи бьһельн. Ле йәкә әԝ баԝәр бу, кӧ Пәтрус ԝе диса вәгәрʹә у амьн бьминә (Луԛа 22:31, 32). Иса фәʹм дькьр кӧ «рʹӧһʹ рʹази йә, ле бәдән сьст ә» (Маркос 14:38). Ләма жи чахе Пәтрус ле инкʹар кьр, Иса жь ԝи нәхәйди. Паши рʹабуна хԝә, Иса Пәтрусрʹа әʹйан бу у дьԛәԝьмә Пәтрус ԝи чахи тʹәне бу (Маркос 16:7; Луԛа 24:34; 1 Корьнтʹи 15:5). Бь ви щурʹәйи, Иса дьлбини да Пәтрус! w23.09 22 ¶9-10

Хԝәде дьньхӧминә, демәк бь тʹәмами гӧнед ԝан мәрьва дьбахшинә, йед кӧ баԝәрийа хԝә ԝи тиньн (Зәбур 32:1, 2). Жь бо баԝәрийа ԝан, Хԝәде ԝана рʹаст һʹәсаб дькә. Рʹаст ә Бьраһим, Даԝьд у хьзмәткʹаред Хԝәдейә дьн мәрьвед гӧнәкʹар бун, йәкә әԝана ча мәрьвед рʹаст һатьнә һʹәсабе. Ле хьзмәткʹаред Хԝәде у кәсед кӧ ԝи наһʹәбиньн, бәр чʹәʹве Хԝәде мина һәв ниньн. Хьзмәткʹаред ԝи баԝәрийа хԝә ԝи тиньн, ләма жи әԝ ԝана бесущ һʹәсаб дькә (Әфәси 2:12). Чаԝа кӧ Паԝлос нәʹма хԝәда зәлал кьр, мәрьв бе баԝәри нькарә бьбә досте Хԝәде. Бьраһим у Даԝьд достед Хԝәде бун, чьмки ԝана баԝәрийа хԝә Хԝәде дьани. Әм жи дькарьн бь баԝәрийа хԝә бьбьнә достед Хԝәде. w23.12 3 ¶6-7

Иро мә һʹәмуйарʹа ԛәдьр һатийә дайине, ԝәки ԝәхт, ԛәԝат у мәщалед хԝә бона Пʹадшатийа Хԝәде хәрщ кьн. Гава әм һәр тьшти дькьн, ԝәки Йаһоԝарʹа хьзмәте кьн, бь ве йәке әм жь алийе хԝәда йа лапә баш бона ԝи ԛӧрбан дькьн. Паԝлосе шанди хьлазийа нәʹма хԝәйә Ибранийарʹа, дәрһәԛа чәнд тьшта ньвиси, йед кӧ әм гәрәке тʹӧ щар бир нәкьн у биньн сери (Ибрани 10:22-25). Мәсәлә, әм гәрәке һәртʹьм дӧа бькьн, кәсед дьнрʹа дәрһәԛа гӧмана хԝә бежьн, һәрʹьн щьвина, һәвдӧ һелан у ԛәԝи кьн, һʹәта кӧ Рʹожа Хԝәде бе. Хьлазийа кʹьтеба Әʹйанти, мәләке Йаһоԝа дӧ щара гот, ԝәки әм гәрәке Хԝәдерʹа хьзмәт кьн (Әʹйанти 19:10; 22:9). Ԝәрә әм ван рʹастийед кʹур дәрһәԛа пʹарьстгәһа рʹӧһʹани, ԛә бир нәкьн, у бьшекьриньн ԝәки мәщала мә һәйә Хԝәдейе Һьмзоррʹа хьзмәт кьн! w23.10 29 ¶17-18

Әм дьхԝазьн тʹьме «һәвдӧ һʹьз бькьн». Ле әм гәрәке бир нәкьн, кӧ Иса гот ԝәки «һʹәзкьрьна гәләка ԝе сар бә» (Мәтта 24:12). Иса нәгот кӧ һʹәзкьрьн ԝе нава һʹәчʹи зәʹф шагьртед ԝида сар бә. Ле диса жи әм гәрәке һʹьшйар бьминьн, ԝәки дьлсарийа мәрьвед ве дьне, сәр һʹәзкьрьна мә һʹӧкӧм нәкә. Ләма жи, ԝәрә әм дина хԝә бьдьнә ве пьрса фәрз: Әм ча дькарьн тедәрхьн, һәла һʹәзкьрьна мә һьндава хушк-бьрада ԛәԝи йә йан на? Һьнә дәрәщед жийина мәда, готьн у кьред мә дьдьнә кʹьфше, ԝәки әм кәсед дьн чьԛас һʹәз дькьн (2 Корьнтʹи 8:8). Пәтрусе шанди дәрһәԛа ве йәке ӧса гот: «Бәри һәр тьшти, һʹьзкьрьна ԝә һьндава һәвда бь дьл у щан бә, чьмки һʹьзкьрьн гәләк гӧна дьньхемә» (1 Пәтрус 4:8). Ле жь бо кемасийед хушк-бьра, һʹәзкьрьна мә дькарә бе щерʹьбандьне. w23.11 10-11 ¶12-13

Һәрге әм щьватеда һʹәзкьрьне тʹәне һьнәкарʹа бьдьнә кʹьфше, әв йәк те һʹәсабе кӧ әм гӧһ надьнә тʹәмийа Иса. Һәмьки, әм жи мина Иса тʹәви һьнә хушк-бьра дьһа незик ьн (Йуһʹәнна 13:23; 20:2). Ле Пәтрус ширәт дьдә мә, кӧ әм гәрәке «хушк-бьра һʹьз бькьн», демәк һʹәзкьрьне һьндава һʹәмуйа бьдьнә кʹьфше, чьмки әм нәфәред малбәтәке нә (1 Пәтрус 2:17). Пәтрус гот, «бь дьле сах һәвдӧ ԛайим һʹьз бькьн» (1 Пәтрус 1:22). Демәк, чьԛас чәтьн бә жи, йәкә әм гәрәке һʹәму хушк-бьра һʹәз бькьн. Мәсәлә, һәрге бьрак дьле мә бешинә, әм гәрәке чь бькьн? Серида дьбәкә әме бьхԝазьн хԝә мина ԝи бьдьнә кʹьфше. Ле Пәтрус жь Иса пеһʹәсийа, кӧ тьштед ӧса Хԝәде хԝәш найе (Йуһʹәнна 18:10, 11). Пәтрус ньвиси: «Жь бәр хьрабийева хьрабийе нәкьн, йан жь бәр беһӧрмәткьрьнева беһӧрмәткьрьне» (1 Пәтрус 3:9). Һʹәзкьрьна жь дьл али мә дькә диса жи дьлрʹәмийе бьдьнә кʹьфше. w23.09 28-29 ¶9-11

Гава әм дьвиньн кӧ зарʹ чьԛас зу мәзьн дьбьн, әм гәләк әʹщебмайи дьминьн. Чахе зарʹ мәзьн дьбә, әԝ бона ве йәке ԛәԝате хәрщ накә. Ле сәва кӧ әԝана бьбьн шагьртед Иса йед гьһишти, ве йәкерʹа хирәт у ԛәԝат лазьм ә (1 Корьнтʹи 13:11; Ибрани 6:1). Бона ве йәке, гәрәке әԝана достийа хԝә тʹәви Йаһоԝа ԛәԝи кьн. Ӧса жи, сәва кӧ әԝана һʹӧнӧред ӧса пешда биньн, йед кӧ Хԝәде хԝәш тен у бькарьбьн щабдарийа бьстиньн, ԝанрʹа аликʹарийа рʹӧһʹе пироз лазьм ә (Мәтʹәлок 1:5). Йаһоԝа чаԝа мер ӧса жи жьн әʹфьрандийә (Дәстпебун 1:27). Жьн у мер һьм жь алийе физики, һьм жи гәләк тьштед дьнда жь һәв щӧдә дьбьн. Мәсәлә, Йаһоԝа жьн у мер ӧса чекьрьнә, кӧ һәр кәс рола хԝә бинә сери. Сәва кӧ әԝана щабдарийед хԝә биньн сери, әԝана гәрәке һʹӧнӧр у фәрәсәтед ӧса нав хԝәда пешда биньн, кʹижан кӧ ве йәкеда ԝе али ԝан бькьн (Дәстпебун 2:18). w23.12 18 ¶1-2

Гәло Иса дьхԝәст кӧ мәрьв наве Баве ԝи бьдьнә хәбате? Бәле. Чахе Иса сәр әʹрде бу, һьнә сәрԝеред религи дьԛәԝьмә дьфькьрин кӧ наве Хԝәде гәләк пироз ә, ләма жи мәрьв гәрәке нәдьнә хәбате. Ле Иса тʹӧ щар изьн нәдьда кӧ әʹрф-әʹдәтед ӧса, йед кӧ мьԛабьли Ньвисаред Пироз ьн, бьбьнә сәбәб кӧ әԝ наве Баве хԝә пироз нәкә. Бинә бира хԝә, гава Иса ль һәрема Гьрасини мерәки щьнакʹәти ԛәнщ кьр, чь ԛәԝьми. Мәрьвед һәреме тьрсийан, у дьхԝәстьн ԝәки Иса жь ԝедәре һәрʹә, у әԝ жи чу (Маркос 5:16, 17). Ле йәкә Иса дьхԝәст кӧ ԝедәре дәрһәԛа наве Йаһоԝа пебьһʹәсьн. Ләма жи әԝи ви мере ԛәнщбуйирʹа гот, ԝәки әԝ хәлԛерʹа бежә кӧ Йаһоԝа жь бо ԝи чь кьр, нә кӧ Иса чь кьр (Маркос 5:19). Иса дьхԝазә кӧ әм жи ӧса бькьн, демәк ԝәки әм сәр тʹәмамийа дьнйайе наве Баве ԝи бьдьнә наскьрьне! (Мәтта 24:14; 28:20) Гава әм ӧса дькьн, әм дьле Пʹадше хԝә, Иса, ша дькьн. w24.02 10 ¶10

Кʹәрәмәкә чьԛас мәзьн ә, кӧ әм ван рʹожед хьлазийеда пʹара тʹәшкиләта Йаһоԝа нә! Һʹале дьнйайе чьԛас дьчә хьраб дьбә, ле Йаһоԝа гәләк хушк-бьред әʹзиз дайә мә, йед кӧ али мә дькьн (Зәбур 133:1). Әԝ али мә дькә ԝәки малбәта мә ԛәԝи у бәхтәԝар бә (Әфәси 5:33–6:1). У әԝ биланийе дьдә мә, ԝәки әм бәр чәтьнайа сәбьр кьн у шабуна хԝә ӧнда нәкьн. Әм гәрәке хирәт бьн, ԝәки бәрдәԝам кьн бь амьни Йаһоԝарʹа хьзмәт кьн. Гәло чьрʹа? Чьмки кемасийед кәсед дьн щара дькарьн мә әʹщьз кьн. Дьбәкә әм жь бо кемасийед хԝә жи әʹщьз дьбьн, илаһи чахе әм һьнә шашийа диса у диса дькьн. Бәле, әм гәрәке бәрдәԝам кьн бь амьни Йаһоԝарʹа хьзмәт кьн, (1) гава хушк йан бьрак дьле мә дешинә, (2) гава әм жь бо проблемед зәԝащеда әʹщьз дьбьн у (3) гава әм жь бо шашийед хԝә дьлтәнг дьбьн. w24.03 14 ¶1-2

Щара тӧйе дәрһәԛа сәрһатийед ԝан хушк-бьра бьбьһейи, йед кӧ сафи кьрьнә һе зедә Йаһоԝарʹа хьзмәт кьн. Һьнә жь ԝан дьбәкә чунә Мәкʹтәба бона Мьзгинванед Пʹадшатийе, йан жи дәрбази щики ӧса бунә, кʹидәре кӧ мьзгинван һьндьк ьн. Ле тӧ дькари хԝәрʹа нетәкә ӧса дайни? Гәләк хьзмәткʹаред Йаһоԝа һазьр ьн һе зедә хьзмәт кьн (Кʹаред Шандийа 16:9). Ле һәрге ньһа дәрәща тә дәст надә ве йәке бьки, нәфькьрә ԝәки тӧ жь ԝана кемтьр и. Лапә фәрз әв ә, ԝәки тӧ һʹәта хьлазийе амьн бьмини (Мәтта 10:22). Тӧ гәрәке ль гора дәрәща хԝә Йаһоԝарʹа хьзмәт ки у бь ви щурʹәйи бәрдәԝам ки пәй Иса һәрʹи (Зәбур 26:1). w24.03 10 ¶11

Баве мәйи әʹзмана соз дайә кӧ һәрге әм тʹобә бькьн, әԝе бьбахшинә мә (Зәбур 86:5). Ләма жи һәрге әм бона гӧнед хԝәйә бәре жь дьл пʹошман бунә, әм дькарьн баԝәр бьн кӧ Хԝәде бахшандийә мә. Ӧса жи бир нәкә ԝәки Йаһоԝа сәрт нинә у тʹӧ щара тьштед кӧ жь ԛәԝата мә дәр ә жь мә дәʹԝа накә. Гава әм бь дьл у щан ԝирʹа хьзмәт дькьн, әԝ рʹази йә. Ӧса жи, дина хԝә бьдә мәсәла хьзмәткʹаред Йаһоԝайә бәре. Мәсәлә, Паԝлосе шанди гәләк сал бь хирәт хьзмәт дькьр, гәләк рʹеԝити дькьр у гәләк щьват саз кьрьн. Ле гава дәрәща ԝи һатә гӧһастьне у әԝи ида нькарьбу мьзгинийе мина бәре бәла бькә, гәло Йаһоԝа ча сәр ԝи дьньһерʹи? Паԝлосе шанди чь жь дәсте ԝи дьһат дькьр, у Йаһоԝа ԝи кʹәрәм дькьр у жь ԝи рʹази бу (Кʹаред Шандийа 28:30, 31). Мина ве йәке, дәрәщед мә жи дькарьн бенә гӧһастьне, у әме ида нькарьбьн Йаһоԝарʹа ча бәре хьзмәт бькьн. Ле бона Йаһоԝа, тьште фәрз әв ә кӧ әм бь чь нете ԝирʹа хьзмәт дькьн. w24.03 27 ¶7, 9

Иса мәсәләкә баш шагьртед хԝәрʹа һишт, кӧ чаԝа дӧа бькьн. Әԝи гәләк щар дӧа дькьр. Иса ԛә бәтал нәдьма, чьмки гәләк мәрьв дьһатьн щәм ԝи, у ләма жи лазьм бу, кӧ әԝ бона дӧакьрьне ԝәʹдә бьвинә (Маркос 6:31, 45, 46). Мәсәлә, әԝ бәрбанге рʹадьбу, ԝәки башԛә дӧа бькә. Щарәке, пешийа кӧ сафикьрьнәкә фәрз бькә, әԝи тʹәмамийа шәве дӧа дькьр (Луԛа 6:12, 13). Ӧса жи, шәва пешийа мьрьна хԝә Иса гәләк щара дӧа дькьр, сәва кӧ щабдарийа хԝәйә һәрә фәрз бинә сери (Мәтта 26:39, 42, 44). Мәсәла Иса нишан дькә, кӧ чьԛас жи шьхӧлед мә һәбьн, әм гәрәке бона дӧакьрьне ԝәʹдә бьвиньн. Мина Иса, әм жи дькарьн бона дӧакьрьне мәщала бьвиньн. Мәсәлә, әм дькарьн шәбәԛе һьнәки зу рʹабьн, йан жи пешийа рʹазане ԝәʹдә бона дӧакьрьне вәԛәтиньн. Ӧса әме Йаһоԝарʹа бьдьнә кʹьфше, кӧ әм мәщала дӧакьрьне ԛимәт дькьн. w23.05 3 ¶4-5

Зьмане орижиналеда, ве рʹезеда фькьрәкә ӧса те дайине, кӧ һʹәзкьрьна Йаһоԝа һьндава кәсед бь рʹӧһʹ кʹьфшкьри ӧса мәзьн ә, ԝәки бәрамбәри ава чʹәм дьбә. Кәсед бь рʹӧһʹ кʹьфшкьри баԝәр ьн, кӧ әԝана жь алийе «Хԝәдеда һʹьзкьри» нә (Щьһуда 1). Йуһʹәннайе шанди бь ван гьлийа һәстед ԝан әʹйан кьр: «Бьньһерʹьн, Баве әм чаԝа һʹьз кьрьн, ԝәки әм зарʹед Хԝәде бенә готьне» (1 Йуһʹәнна 3:1). Гәло Йаһоԝа тʹәне кәсед бь рʹӧһʹ кʹьфшкьри һʹәз дькә? На. Йаһоԝа избат кьрийә, ԝәки әԝ мә һʹәмуйа һʹәз дькә. Гәло избатийа лапә мәзьн йа һʹәзкьрьна Йаһоԝа чь йә? Һәмьки кʹьрʹин, демәк ԛӧрбана Иса Мәсиһ! Бь сайа ԛӧрбане, Йаһоԝа нишан кьр, ԝәки әԝ мә чьԛас һʹәз дькә (Йуһʹәнна 3:16; Рʹомайи 5:8). w24.01 28 ¶9-10

Әв рʹез дина мә дькʹьшинә сәр тьштәкә дьн, йа кӧ али Даԝьд кьр, кӧ әԝ жь тьрсед хԝә хьлаз бә. Рʹаст ә әʹмьре ԝи бьн хофеда бу, әԝи дьда бәр чʹәʹве хԝә кӧ ахьрийеда, Йаһоԝа ԝе бона ԝи чь бькә. Даԝьд заньбу, ԝәки ԝәхта рʹастда, Йаһоԝа ԝе ԝи хьлаз кә. Йаһоԝа хԝәха готьбу, ԝәки Даԝьд ԝе бьбә пʹадше Исраеле (1 Самуйел 16:1, 13). Даԝьд баԝәр бу, ԝәки һәр созед Йаһоԝа ԝе бенә сери. Гәло Йаһоԝа чь соз дайә мә? Һәмьки әм заньн, ԝәки иро Йаһоԝа мә жь һʹәму тәнгасийа хьлаз накә. Ле әԝи соз дайә, кӧ дьнйа тʹәзәда әԝе мә жь һʹәму кӧл-дәрда хьлаз кә (Ишайа 25:7-9). Әм баԝәр ьн, кӧ Хԝәде ԝе мьрийа рʹакә, мә жь нәхԝәшийа ԛәнщ кә у жь дьжмьн-нәйара хьлаз кә (1 Йуһʹәнна 4:4). w24.01 6 ¶12-13

Дәрһәԛа сонда тʹәсмилбуйине у ньхӧмандьне кʹур бьфькьрә. Тә әв гав авитьн, чьмки тә дьхԝәст алийе Йаһоԝа бьгьри. Гәло чь али тә кьрийә кӧ тӧ баԝәр ки, ԝәки тә рʹийа рʹаст дитийә? Тә Йаһоԝа Хԝәде рʹьнд нас кьр, тә дәстпекьр ԝи ԛимәт ки у һʹьз ки. Баԝәрийа тә дьһа ԛәԝи бу у тә гӧнед хԝә тʹобә кьр. Тә тʹәрка кьред хԝәйә нәрʹаст да у жийина хԝә ль гора хԝәстьна Хԝәде гӧһаст. У тӧ гәләк ша буйи гава пеһʹәсийайи, ԝәки Хԝәде гӧне тә бахшандийә (Зәбур 32:2). Тӧ чуйи щьвина у тә кәсед дьнрʹа бәʹса рʹастийед Кʹьтеба Пироз кьр. Ньһа тӧ ча хьзмәткʹарәки Хԝәдейи ньхӧманди, сәр рʹийа кӧ дьбә бәрбь жийине дьмәши у һәр тьшти дьки, ԝәки жь ве рʹе дәрнәкʹәви (Мәтта 7:13, 14). Тʹьме Йаһоԝарʹа амьн бә у гӧһ бьдә тʹәмийед ԝи. w23.07 17 ¶14; 19 ¶19

Сәва кӧ тӧ бькарьби щерʹьбандьнада амьн бьмини, бинә бира хԝә кӧ тә чаԝа дӧайед хԝәда соз дабу Йаһоԝа, ԝәки тӧ ида пʹара ԝи йи. Мәсәлә, гәло тәйе изьн бьда, ԝәки дьле тә бькʹәта кәсәки зәԝьщи? Һәмьки на, чьмки тә сафи кьрьбу кӧ тӧйе тьштәки ӧса нәки. Һәрге тӧ изьн нәди кӧ хԝәстьнед хьраб бькʹәвьнә дьле тә, ԝе нәлазьм бә ԝәки тӧ хԝәстьнед ӧса жь дьле хԝә дәрхи. Тӧйе гӧһ бьди ве ширәте: «Рʹийа хьрабада нәгәрʹә» (Мәтʹәлок 4:14, 15). Бинә бира хԝә кӧ Иса дьхԝәст һәр тьштида дьле Баве хԝә ша кә. Мина ԝи, һәр тьштед кӧ дькарә дьле Хԝәде бешинә, инкʹар кә (Мәтта 4:10; Йуһʹәнна 8:29). Чахе тӧ рʹасти тәнгаси у щерʹьбандьна тейи, тӧ дькари нишан ки, ԝәки тӧ жь дьл дьхԝази бәрдәԝам ки пәй Иса һәрʹи. Һәрге тӧ ӧса бьки, баԝәр бә кӧ Йаһоԝа ԝе али тә бькә. w24.03 9-10 ¶8-10