Тʹәбах

Ве рʹезеда, дӧ фькьред фәрз һәнә: (1) Дәрдед мәрьвед рʹаст гәләк ьн. (2) Йаһоԝа мә жь һʹәму тәнгасийа хьлаз дькә. Ле гәло Әԝ чаԝа мә хьлаз дькә? Мәсәлә, Йаһоԝа али мә дькә, ԝәки әм сәр жийина ве дьнеда бь реали бьфькьрьн. Рʹаст ә әԝи соз дайә, кӧ әме хьзмәтийеда шабуне бьвиньн, ле соз нәдайә кӧ әʹмьре мә ԝе бе кӧл-дәрд дәрбаз бә (Ишайа 66:14). Хԝәде мә һелан дькә, ԝәки әм дина хԝә бьдьнә ахьрийе. Зутьрәке әме һʹәта-һʹәтайе ша у бәхтәԝар бьжин (2 Корьнтʹи 4:16-18). Ле иро жи әԝ али мә дькә, ԝәки әм бәрдәԝам кьн һәр рʹож ԝирʹа хьзмәт кьн (Луринед Йерәмйа 3:22-24). Әм жь сәрһатийед хьзмәткʹаред Йаһоԝайә бәре у иро, чь дькарьн һин бьн? Әм дькарьн ньшкева рʹасти проблема бен. Ле һәрге әм хԝә бьсперьн Йаһоԝа, әԝе тʹьме али мә бькә (Зәбур 55:22). w23.04 14-15 ¶3-4

Әм дькарьн жь мәсәла Усьв у Мәрйәме һин бьн. Ԝанрʹа чьԛас чәтьн бу жи, йәкә әԝана һазьр бун гӧһ бьдьнә ԛанунед дәԝләте (Луԛа 2:1-6). Гава Мәрйәм һʹәмләбуна хԝәда незики нәһ мәһа бу, әԝ у Усьв рʹасти щерʹьбандьнәке һатьн. Аԝгусто, йе кӧ сәрԝере Империйа Рʹоме бу, ԛанун дәрхьст, ԝәки һәр кәс һәрʹә бажаре хԝә кӧ бе навньвисаре. Бона ве йәке, Усьв у Мәрйәм кʹәтьнә рʹекә дьреж у чунә Бәйтләһʹме, кʹижан кӧ ԝәкә 150 километр дур бу. Әв рʹийа дур у дьреж, илаһи бона Мәрйәме гәләк зәʹмәт бу. Дьԛәԝьмә ԝана бона сьһʹәт-ԛәԝата Мәрйәме у зарʹа нәбуйи хәм дькьрьн. Һәрге рʹеда санщу ле бьгьрта, гәло ԝана ԝе чь бькьра? Әԝана гәрәке ве зарʹе бьбуна хԝәйи, чьмки әԝ Мәсиһе создайи бу, йе кӧ ԝе жь Мәрйәме бьһата буйине. Гәло ԝана әв йәк кьрә мәʹни, сәва кӧ гӧһ нәдьн сәрԝер? Чьԛас жи хәмед Усьв у Мәрйәме һәбун, ԝана диса жи гӧрʹа ве ԛануне кьр. Йаһоԝа гӧһдарибуна ԝан кʹәрәм кьр. Мәрйәм сах-сьламәт гьһиштә Бәйтләһʹме, әԝе кӧрʹе хԝә хер-сьламәт ани, у бь сайа ве йәке пʹехәмбәртийа Кʹьтеба Пироз һатә сери! (Миха 5:2) w23.10 8 ¶9; 9 ¶11-12

Гәло тӧ дьтьрси йан шәрм дьки кӧ щьватеда щаба хԝә бьди? Тӧ дькари хԝә рʹьнд һазьр ки (Мәтʹәлок 21:5). Тӧ чьԛас баш хԝә һазьр ки, ԝе һаԛас һеса бә ԝәки тӧ щаба хԝә бьди. Ӧса жи, бьра щабед тә кьн бьн (Мәтʹәлок 15:23; 17:27). Щабәкә кьн ԝе али тә бькә, ԝәки тӧ гәләк бәрхԝә нәкʹәви. Һәрге тӧ щабәкә кьн пе гьлийед хԝә бежи, тӧйе нишан ки, ԝәки тә хԝә рʹьнд һазьр кьрийә у готар баш фәʹм кьрийә. Дьԛәԝьмә тә һьнә ширәтед жь ԝан готара дайә хәбате, ле диса жи дьбәкә тәрʹа чәтьн ә щаба хԝә бьди. Тӧ дькари баԝәр би, кӧ Йаһоԝа гәләк хирәта тә ԛимәт дькә (Луԛа 21:1-4). Әԝ тьштәки жь ԛәԝата мә дәр, жь мә дәʹԝа накә (Филипи 4:5). Пешийе бьфькьрә, ԝәки чь тӧ дькари бьки. Хԝәрʹа нетәке дайнә у бона дьлрʹьһʹәтийе дӧа бькә. Мәсәлә, тӧ дькари хԝәрʹа нет дайни, ԝәки ԝәʹде һәр щьвина щаба хԝә бьди. w23.04 21 ¶6-8

Паԝлосе шанди әм бәрамбәри ԝан әскәра кьрьн, йед кӧ чʹәкед хԝә ль хԝә кьрьнә у бона шәрʹ һазьр ьн. Ԝәʹде шәрʹ, жь әскәра те дәʹԝакьрьне кӧ һәр гав бона шәрʹ һазьр бьн. Дәрәща мә жи ӧса йә. Гава әм зьрьһʹа баԝәрийе у һʹьзкьрьне у кʹӧмзьрьһʹе гӧмане хԝә дькьн, әм дьдьнә кʹьфше кӧ бона рʹожа Йаһоԝа һазьр ьн. Чаԝа кӧ зьрьһʹ дьле әскәр дьпараст, баԝәри у һʹьзкьрьн жи дьле мәйи симболик дьпарезьн. Әв йәк али мә дькьн, кӧ әм тʹьме Хԝәдерʹа хьзмәт кьн у пәй Иса һәрʹьн. Бь сайа баԝәрийе, әм заньн ԝәки Йаһоԝа ԝе кәсед кӧ бь дьл у щан дьхԝазьн незики ԝи бьн, хәлат бькә (Ибрани 11:6). Баԝәри дьле мә ԛәԝи дькә, кӧ әм рʹожед чәтьнда жи пәй Рʹебәре хԝә Иса Мәсиһ һәрʹьн. Гәләк хушк-бьред мә, һәла һе ԝәʹде пәйкʹәтьн у проблемед материйали жи амьнийа хԝә хԝәй дькьн. Мәсәлед ԝан дькарьн али мә бькьн, кӧ әм баԝәрийа хԝә ԛәԝи кьн, ԝәки бькарьбьн һьмбәри чәтьнайа сәбьр кьн. Ӧса жи һьнә хушк-бьра жийина хԝә ӧса сьвьк кьрьнә, кӧ бькарьбьн бәри пешьн дина хԝә бьдьнә сәр шьхӧлед Пʹадшатийа Хԝәде. Әм дькарьн чʹәʹв бьдьнә ԝан у пәй һәбуке нәкʹәвьн. w23.06 10 ¶8-9

Хԝәгьртьн те һʹәсабе гава кӧ мәрьв һәст у кьред хԝә контрол дькә. Мәрʹа хԝәгьртьн лазьм ә, сәва кӧ әм бьгьһижьнә нета хԝә һәла һе ви чахи жи, гава мәрʹа чәтьн ә йан жи һʹәԝаса мә тʹӧнә. Бир нәкә, хԝәгьртьн бәре рʹӧһʹе пироз ә. Ләма жи бона ве йәке дӧа бькә, ԝәки тӧ бькарьби ви һʹӧнӧри нав хԝәда пешда бини (Луԛа 11:13; Галати 5:22, 23). Һивийа дәрәщед гәләк баш нибә. Ве дьнйайеда, ԝе тʹӧ щар мәщалед гәләк баш нәкʹәвьн дәстед мә. Һәрге әм һивийа ԝан рʹожед хԝәш бьн, дьԛәԝьмә әм тʹӧ щара нәгьһижьнә нета хԝә. Щара хԝәстьна мә тʹӧнә йә, чьмки дьԛәԝьмә мәрʹа ӧса те кʹьфше, кӧ чәтьн ә бьгьһижьнә нета хԝә. Һәрге ӧса нә, тӧ дькари бь гавед бьчʹук дәстпеки? Һәрге нета тә әв ә, кӧ һʹӧнӧрәки хԝә баш ки, хирәт бькә кӧ серида тьштед бьчʹукда ве йәке бьди кʹьфше. Һәрге нета тә әв ә кӧ Кʹьтеба Пироз бь тʹәмами бьхуни, тӧ дькари бь пʹаред бьчʹук дәстпеки бьхуни. w23.05 29 ¶11-13

Ԝан рʹожед пашьн, Йаһоԝа бь сайа тʹәшкиләта хԝә, сьфрәкә тʹер-тʹьжә бь хԝарьна рʹӧһʹани һазьр кьрийә. Әв хԝарьна рʹӧһʹани али мә дькә, ԝәки әм тʹьме сәр «Рʹийа Пироз» бьминьн (Ишайа 35:8; 48:17; 60:17). Һәр кәсе, кӧ дәстпекьрийә Кʹьтеба Пироз һин бә, мәщал кʹәтийә дәсте ԝи ԝәки сәр «Рʹийа Пироз» бьмәшә. Һьнә мәрьв тʹәне ԝәхтәкә кьн сәр ве рʹе нә. Ле һьнә мәрьв жи һʹәта кӧ бьгьһижьн нета хԝә, бь дьл у щан дьхԝазьн сәр ве рʹе бьминьн. Гәло нета ԝан чь йә? «Рʹийа Пироз» кәсед бь рʹӧһʹ кʹьфшкьри дьбә «бӧһьшта» Хԝәдейә сәр әʹзмана (Әʹйанти 2:7). Ле бона кәсед кӧ баԝәр дькьн, ԝәки ԝе һʹәта-һʹәтайе сәр әʹрде, щьнәтеда бьжин, әв рʹе ԝе ԝана хьлазийа Пʹадшатийа Һʹәзарсали бьгьһинә беԛьсуртийе. Һәрге тӧ сәр ве рʹе йи, пьшт хԝә нәньһерʹә. Һʹәта кӧ тӧ бьгьһижи дьнйа тʹәзә, рʹийа хԝә шаш нәкә! w23.05 17 ¶15; 19 ¶16-18

Гава тӧ дәрһәԛа тьштед кӧ Йаһоԝа бона тә кьрьнә дьфькьри, хԝәстьна тә дьһа ԛәԝи дьбә кӧ әʹмьре хԝә тʹәсмили ԝи ки (Зәбур 116:12-14). Кʹьтеба Пирозда те готьне кӧ «һәр дайина ԛәнщ у һәр пʹешкʹеша кʹамьл» жь Йаһоԝа те (Аԛуб 1:17). Пʹешкʹеша лапә мәзьн у ԛимәт, ԛӧрбана Кӧрʹе ԝи Иса йә. Ԝәрә әм дәрһәԛа ве пʹешкʹеша мәзьн бьфькьрьн. Бь сайа ԛӧрбане, тӧ дькари бьби досте Йаһоԝа у һʹәта-һʹәтайе бьжийи (1 Йуһʹәнна 4:9, 10). Щурʹе лапи баш кӧ рʹазибуна хԝә бона һʹәзкьрьн у кʹәрәмед Йаһоԝа бьди кʹьфше әв ә, ԝәки әʹмьре хԝә тʹәсмили ԝи ки (Ԛануна Дӧщари 16:17; 2 Корьнтʹи 5:15). w24.03 5 ¶8

Ве дьнеда, бенамуси нава мәрьвада чьԛас дьчә һаԛас зедә дьбә. Гава әм ван тьшта дьвиньн, әм жи хԝә мина Лут тʹәхмин дькьн. Әԝ «жь бепʹәргалийа нәпʹакайә бенамуси ащьз бьбу», чьмки әԝи заньбу кӧ Хԝәде хьрабийа ԝан нәфрʹәт дькә (2 Пәтрус 2:7, 8). Жь тьрс у һʹьзкьрьна Хԝәде, Лут нәдькʹәтә бәр байе кәсед бенамус. Иро жи гәләк мәрьв ԛәдьре принсипед Хԝәдейә нав-намусийе нагьрьн. Диса жи, һәрге тьрс у һʹьзкьрьна Хԝәде дьле мәда һәбә, әме бькарьбьн нав-намусийе хԝәй кьн. Йаһоԝа бь сайа кʹьтеба Мәтʹәлок ширәтед баш дьдә мә. Фьрԛи тʹӧнә әм чәнд сали нә, әм гьшк жи дькарьн жь ширәтед ве кʹьтебе кʹаре бьстиньн. Һәрге әм Йаһоԝа дьтьрсьн, әме фәсал бьн кӧ хьрабийе нәкьн. w23.06 20 ¶1-2; 21 ¶5

Дьԛәԝьмә тӧ жь алийе малбәта хԝә рʹасти пәйкʹәтьна һати, йан жи тә хәбата баш инкʹар кьрийә, сәва кӧ шьхӧле Пʹадшатийа Хԝәде әʹмьре хԝәда дайни сәр щийе пешьн (Мәтта 6:33). Баԝәр бә, кӧ Йаһоԝа амьнийа тә дьвинә (Ибрани 6:10). Дьбәкә тә жи ван гьлийед Иса сәр хԝә тʹәхмин кьрийә: «Әз рʹаст ԝәрʹа дьбежьм, һәр кәсе кӧ бона хатьре наве мьн у мьзгинийе, мал, йан хушк, йан бьра, йан де, йан бав, йан зарʹ, йан әʹрде хԝә һиштийә, әԝе ньһа 100 щари зедәтьр мал, хушк, бьра, де, зарʹ, әʹрд тʹәви зерандьна бьстинә у дьнйа тʹәзәда жийина һʹәта-һʹәтайе» (Маркос 10:29, 30). Рʹасти жи кʹәрәмед кӧ тә стандьнә, жь ԛӧрбанкьрьнед кӧ тә кьрьнә, мәзьнтьр ьн (Зәбур 37:4). w24.03 9 ¶5

Гава Щьһустанеда хәлайикә гьран дәстпебу, хушк-бьред жь щьвата Әнтакйа Сурйайе «ԛьрар кьрьн кӧ жь дәсте кʹева чьԛас те аликʹарийе бона баԝәрмәндед Щьһустане бьшиньн» (Кʹаред Шандийа 11:27-30). Рʹе чьԛас дур бу жи, хушк-бьред ль Әнтакйайе бь дьл у щан дьхԝәстьн али ԝан бькьн (1 Йуһʹәнна 3:17, 18). Иро, гава щики тʹәшԛәләк дьԛәԝьмә, әм жи дькарьн хушк-бьред хԝәрʹа дьлшәԝатийе нишан бькьн у зу һәрʹьн һәԝара ԝан. Әм дькарьн жь рʹуспийа бьпьрсьн һәла әм ча дькарьн али хушк-бьра бькьн. Ӧса жи әм дькарьн бона шьхӧле һʹәмдьнйайе пʹәра ԛӧрбан кьн у бона кәсед зьрардити дӧа бькьн. Дьбәкә хушк-бьрарʹа аликʹари лазьм бә, ԝәки тьштед лазьм ԝанрʹа дәстхьн, чьда әԝана һʹәԝщә нә. Гава Пʹадше мә Иса, диԝана мәрьва бькә, у бьвинә кӧ әм һьндава һәвда дьлшәԝат ьн, әԝе мә тʹәглиф кә кӧ әм Пʹадшатийе «ԝар бьн» (Мәтта 25:34-40). w23.07 4 ¶9-10; 6 ¶12

Иса чʹәʹв дьда сәрԝахтийа Йаһоԝа. Рʹаст ә әԝ «тʹәне бона пәзед мала Исраелейә ӧндабуйи» һатьбу шандьне, ле әԝи кәсед дьнрʹа жи бь бәрбьһерийе мьзгини бәла дькьр. Щарәке жьнькәкә нә Исраели жь ԝи лава кьр, кӧ әԝ ԛиза ԝе ԛәнщ кә, йа кӧ жь алийе щьнада дьһатә чәрчьрандьне. Дьле Иса сәр шәԝьти у әԝи ԛиза ԝе ԛәнщ кьр (Мәтта 15:21-28). Ԝәрә әм дина хԝә бьдьнә мәсәләкә дьн. Щарәке Иса ӧса гот: «Ки кӧ мьн . . . инкʹар кә, әзе жи ԝи . . . инкʹар кьм» (Мәтта 10:33). Ле әԝи Пәтрус инкʹар нәкьр, йе кӧ се щара ԝи инкʹар кьрьбу, чьмки Иса баԝәри у пʹошманбуна ԝи дит. Паши кӧ Иса жь мьрьне рʹабу, әԝи хԝә нишани Пәтрус кьр у жерʹа гот, кӧ бахшандийә ԝи у ле һʹьз дькә (Луԛа 24:33, 34). Йаһоԝа Хԝәде у Иса һәр тьштида сәрԝахти у бәрбьһерийе дьдьнә кʹьфше. Йаһоԝа дьхԝазә кӧ әм жи мәрьвнә бәрбьһер бьн. w23.07 21 ¶6-7

Гәло әм чаԝа дькарьн кәсед дьн бьдьнә баԝәркьрьне, кӧ созе Хԝәде дәрһәԛа Щьнәте ԝе бь рʹасти бе сери? Йа йәке, Йаһоԝа хԝәха ви сози дьдә. Кʹьтеба Әʹйанти дьбежә: «Һьнге әԝи ль сәр тʹәхт рʹуньшти гот: ‹Әз һәр тьшти ну дькьм!›» Ԛәԝат, билани у хԝәстьна Хԝәде һәйә, ԝәки созе хԝә бинә сери. Йа дӧда, Йаһоԝа занә ԝәки чь кӧ әԝи готийә, ԝе әʹсәйи бе сери. Ләма жи әԝ ӧса дьбежә: «Әв хәбәрнә амьн у рʹаст ьн. . . . Һәр тьшт һатә сери!» Йа сьсийа, гава Йаһоԝа тьштәки дәстпедькә, әԝ дьгьһижә нета хԝә. Гьлийед «Әз ьм Алфа у Омега» ве йәке избат дькә (Әʹйанти 21:6). Йаһоԝа ԝе избат кә, кӧ Мире-щьна дәрәԝин ә у нькарә рʹийа Ԝи бьгьрә, кӧ нета хԝә бинә сери. Һәрге тӧ кәсәкирʹа бәʹса гӧмана жь Әʹйанти 21:4 бьки у әԝ бежә, «Әв гьли гәләк хԝәш ьн, ле тʹәне хәԝн у хәйал ьн», тӧ дькари чь бьки? Тӧ дькари рʹезед 5 у 6 бьхуни у шьровәки. Нишан кә, кӧ Йаһоԝа һәртʹьм хԝәйе созе хԝә йә, чьмки Йаһоԝа ча бежи ԛоле хԝә данийә (Ишайа 65:16). w23.11 7 ¶18-19

Йаһоԝа әв соз да Бьраһим, гава әԝ 75 сали бу у зарʹед ԝи тʹӧнә бун. Гәло Бьраһим бь чʹәʹве хԝә дит, кӧ әв соз чаԝа һатә сери? Нә бь тʹәмами. Чахе Бьраһим Чʹәме Фәратерʹа дәрбаз бу у 25 сала һивийе ма, әԝи дит ԝәки кӧрʹе ԝи Исһаԛ бь кʹәрәмәти һатә буйине. У 60 сал шунда, нәбийед ԝи, Әсаԝ у Аԛуб жерʹа һатьнә буйине (Ибрани 6:15). Ле Бьраһим ԛә нәдит кӧ нәбийед ԝи ча бунә мьләтәки мәзьн у Әʹрде Создайида щиԝар бун. Ле диса жи Бьраһим амьн ма у бу досте Хԝәде (Аԛуб 2:23). У гава Бьраһим жь мьрьне бе рʹакьрьне, әԝе гәләки ша бә кӧ һʹәму мьләтед дьнйайе бь сайа баԝәри у амьнийа ԝи һатьнә кʹәрәмкьрьне! (Дәстпебун 22:18) Әм жь ве йәке чь һин дьбьн? Дьбәкә әме бь чʹәʹве хԝә нәвиньн кӧ ча һʹәму созед Йаһоԝа ԝе бь тʹәмами бенә сери. Ле һәрге әм мина Бьраһим сәбьр кьн, әм дькарьн баԝәр бьн, ԝәки Йаһоԝа ԝе мә һьм ньһа, һьм жи дьнйа тʹәзәда хәлат кә (Маркос 10:29, 30). w23.08 24 ¶14

Узийа Пʹадша щаһьлтийа хԝәда мьлук бу. Әԝи «Хӧдан дьгәрʹийа». Әԝи 68 сал әʹмьр кьр, у һʹәчʹи зәʹф жь тʹәмамийа әʹмьре хԝә, әԝи кʹәрәмед Йаһоԝа дьдит (2 Дирок 26:1-4). Узийа һьмбәри гәләк дьжмьнед мьләте Хԝәде сәркʹәт у пʹарастьна Оршәлиме дьһа ԛәԝи кьр (2 Дирок 26:6-15). Бе шьк, Узийа шекьрдар бу кӧ әԝ бь сайа аликʹарийа Хԝәде пешдачуйи бу (Ԝаиз 3:12, 13). Узийа Пʹадша бу, ләма жи бона ԝи тьштәки нормал бу кӧ фәрмана бьдә кәсед дьн. У дьԛәԝьмә әԝ дьфькьри кӧ әԝ чь бьхԝазә дькарә һәма ӧса жи бькә. Рʹожәке, Узийа ӧса ԛӧрʹә бабах бу, кӧ чу пʹарьстгәһе у хԝәст бьхуре сәр ԛӧрбангәһе бьшәԝьтинә. Ле пʹадшарʹа изьн нәһатьбу дайине ве йәке бькьн (2 Дирок 26:16-18). Кʹаһине Мәзьн, Азарйа, хԝәст рʹийа ԝи бьгьрә, ле Узийа гәләк һерс кʹәт. Узийа амьн нәма у Йаһоԝа әԝ бь кʹотибуне щәза кьр (2 Дирок 26:19-21). Һәрге әԝ мьлук бьма, әԝе нәкʹәта һʹаләки ӧса! w23.09 10 ¶9-10

Чахе Пәтрусе шанди бу хьзмәткʹаре Хԝәде йе бьжарти, һьнге жи әԝи һьмбәри кемасийед хԝә шәрʹ дькьр. Сала 36 Д.М.-да, Хԝәде Пәтрус шандә щәм Корʹнелйо, йе кӧ нә Щьһу бу. Ԝедәре, Хԝәде Корʹнелйо бь рʹӧһʹе хԝәйи пироз бьжарт. Бь ве йәке Пәтрус фәʹм кьр, кӧ мәрьвед жь һʹәму мьләта бәр чʹәʹве Хԝәде йәк ьн, у әԝана жи дькарьн бьбьнә пʹара щьвата Мәсиһити (Кʹаред Шандийа 10:34, 44, 45). Паши ве йәке, Пәтрус тʹәви мәрьвед жь мьләтед дьн жи хԝарьн дьхԝар. Ле пешийа ве йәке, Пәтрус ԝе тьштәки ӧса ԛә нәкьра. Ԝи чахи, һьнә Мәсиһийед Щьһу дьфькьрин, ԝәки хушк-бьред Щьһу у йед жь мьләтед дьн, гәрәке тʹәвайи хԝарьне нәхԝьн. Гава һьнә жь ԝан Щьһуйа һатьнә Әнтакйайе, Пәтрус ида тʹәви хушк-бьред кӧ нә Щьһу бун, хԝарьн нәдьхԝар, чьмки нәдьхԝәст дьле Мәсиһийед Щьһу бешинә. Паԝлосе шанди әв дӧрʹутийа ԝи дит у бәр һʹәму мәрьва ширәт да ԝи (Галати 2:13, 14). Паши ви шашийе жи, Пәтрус бәрдәԝам дькьр бь хирәт хьзмәт кә. w23.09 22 ¶8

Һәрге тә хԝә щерʹьбандийә, дьԛәԝьмә тә чәнд кемасийед хԝә дитийә, ле диса жи дьлтәнг нәбә. Бир нәкә, кӧ Пʹадше мә Иса Мәсиһ йәки дьлован ә у әԝе али тә бькә, ԝәки тӧ пешда һәрʹи (1 Пәтрус 2:3). Пәтрусе шанди дьбежә, кӧ Хԝәде «ԝе хԝәха ԝә . . . бьшьдинә». Щарәке, Пәтрус хԝә һежа һʹәсаб нәкьр кӧ кʹеләка Кӧрʹе Хԝәде бә (Луԛа 5:8). Ле бь аликʹарийа Йаһоԝа у Иса Мәсиһ, Пәтрус бәрдәԝам дькьр бь амьни пәй Иса һәрʹә. Ахьрийеда Йаһоԝа изьн да Пәтрус, ԝәки әԝ бькʹәвә «Пʹадшатийа һʹәта-һʹәтайейә Хӧдан у Хьлазкьре мә Иса Мәсиһ» (2 Пәтрус 1:11). Чь хәлатәкә мәзьн ә! Мина Пәтрус, һәрге тӧ бәрдәԝам ки хирәт би у изьн бьди Йаһоԝа кӧ тә һин кә, тӧйе жи әʹмьре һʹәта-һʹәтайе бьстини. Паше те бьгьһижи нета баԝәрийа хԝә, демәк бейи хьлазкьрьне (1 Пәтрус 1:9). w23.09 31 ¶16-17

Ԝәʹде бәре һʹәԝшәкә коне пироз һәбу. Әԝ щики гәләк фьрә бу у дора ԝе суркьри бу. Ԝедәре кʹаһина щабдарийед хԝә дьанинә сери. Һʹәԝшеда ԛӧрбангәһәкә жь сьфьр һәбу. Сәр ве ԛӧрбангәһа мәзьн, ԛӧрбанед шәԝьтанди дьанин. Ӧса жи, пешийа кӧ кʹаһина хьзмәтийа хԝәйә пироз дәстпекьрана, ԝана һʹәԝза сьфьрда дәст-ньгед хԝә дьшуштьн (Дәркʹәтьн 30:17-20; 40:6-8). Иро кәсед бьжарти сәр әʹрде бь амьни һʹәԝша һьндӧрʹда йа пʹарьстгәһа рʹӧһʹанида хьзмәт дькьн. Һʹәԝза мәзьн, чаԝа ԝанрʹа ӧса жи хьзмәткʹаред Хԝәдейә дьнрʹа дьда кʹьфше, кӧ әԝана гәрәке рʹӧһʹанида у нав-намусийеда хԝә тʹәмьз хԝәй кьн. Ле гәло ‹әʹлаләта мәзьн› кʹидәре бь амьни хьзмәт дькә? Йуһʹәннайе шанди дит, кӧ әԝана «ль бәр тʹәхт» сәкьни нә, демәк ль һʹәԝша дәрва. Ԝедәре, әԝана «шәв у рʹо» Хԝәдерʹа хьзмәт дькьн (Әʹйанти 7:9, 13-15). Әм гәләк дьшекьриньн кӧ Йаһоԝа мәщал дайә мә, ԝәки әм пʹарьстгәһа ԝийә рʹӧһʹанида жерʹа хьзмәт кьн! w23.10 28 ¶15-16

Йаһоԝа бь сайа рʹуспийа жи ԛәԝате дьдә мә у мә дьшьдинә (Ишайа 32:1, 2). Чахе тӧ бәр хԝә дькʹәви, дьле хԝә ԝанрʹа вәкә. Аликʹарийа ԝан бь дьл у щан ԛәбул кә. Бь сайа ԝан, Йаһоԝа дькарә тә ԛәԝи кә. Ӧса жи гӧмана мәйә сәр һʹиме Кʹьтеба Пироз, кӧ һʹәта-һʹәтайе йан щьнәтеда сәр әʹрде, йан жи сәр әʹзмана бьжин, мә ԛәԝи дькә (Рʹомайи 4:3, 18, 19). Гӧман али мә дькә, ԝәки әм бәр чәтьнайа сәбьр кьн, мьзгинийе бәла кьн у щабдарийед щьватеда биньн сери (1 Тʹесалоники 1:3). Әԝ гӧман Паԝлосе шанди жи ԛәԝи дькьр. Әԝ «тәʹли-тәнгийада» бу, «дәрәще бегӧманда» бу, рʹасти пәйкʹәтьна дьһат у «ледайи-кʹәти» бу. У щара әʹмьре ԝи һәла һе бьн хофеда бу жи (2 Корьнтʹи 4:8-10). Паԝлос дина хԝә дьда һевийа хԝә у әԝ йәк ԛәԝат дьда ԝи, ԝәки сәбьр кә (2 Корьнтʹи 4:16-18). Паԝлос дәрһәԛа һевийа жийина сәр әʹзмана дьфькьри, ләма жи әԝи тʹәхмин дькьр, ԝәки «рʹож бь рʹож нуйәжийин» дьбә. w23.10 15-16 ¶14-17

Чахе дӧа дьки, бьфькьрә: «Гәло ньһа ԝәʹде рʹаст ә, кӧ Йаһоԝа хԝәстьна мьн бинә сери?» Дьԛәԝьмә әм дьфькьрьн, кӧ әм гәрәке зу щаба дӧайед хԝә бьстиньн, ле бь рʹасти Йаһоԝа ԝәʹде һәри баш али мә дькә (Ибрани 4:16). Һәрге әм щаба дӧайед хԝә зу нәстиньн, дьԛәԝьмә әм бьфькьрьн, кӧ Йаһоԝа дьбежә ‹На›. Ле бь рʹасти әԝ дьбежә ‹Һәла һе на›. Дина хԝә бьдьнә мәсәла бьре нәхԝәш, йе кӧ дьхԝәст ԛәнщ бә, ле әԝ ԛәнщ нәбу. Һәрге Йаһоԝа ԝи бь кʹәрәмәти ԛәнщ кьра, Мире-щьна дькарьбу бьгота, кӧ әԝ бона ԛәнщийа Йаһоԝа, амьнийе хԝәй дькә (Ибо 1:9-11; 2:4). Йаһоԝа ԝәʹдә кʹьфш кьрийә, кӧ һʹәму нәхԝәшийа бьдә һьлдане (Ишайа 33:24; Әʹйанти 21:3, 4). Һʹәта әԝ рʹож бе, әм нькарьн һивийа кʹәрәмәта бьн. Ләма жи бьре мә дькарә жь Йаһоԝа ԛәԝат у дьлрʹьһʹәтийе бьхԝазә, ԝәки әԝ һәр гав сәбьр кә у бь амьни Ԝирʹа хьзмәт кә. w23.11 24 ¶13

Шьмшон шашикә гьран кьр, ле диса жи әԝи пьшта хԝә нәда Йаһоԝа. Әԝи мәщал дьгәрʹийа ԝәки мьԛабьли Фьльстийа шәрʹ бькә, чьмки Йаһоԝа әв шьхӧл дабу дәсте ԝи (Һʹакьмти 16:28-30). Шьмшон жь Йаһоԝа лава кьр кӧ ԝи ԛәԝи кә, ԝәки әԝ жь Фьльстийа һʹәйфе һьлдә. Йаһоԝа дӧайе ԝи ԛәбул кьр у ԛәԝатәкә мәзьн да ԝи. У ве щаре Шьмшон дьһа зедә Фьльсти кӧшт, нә кӧ бәре. Рʹаст ә Шьмшон сәва шашийа хԝә гәләк еш у дәрд кʹьшанд, ле әԝи диса жи ԛьрара Йаһоԝа дьани сери. Һәрге әм шашике бькьн у бенә ширәткьрьне, йан жи щабдарикә хԝә щьватеда ӧнда кьн, әм гәрәке хьзмәтийа хԝә нәдьнә сәкьнандьне. Бир нәкьн, Йаһоԝа һазьр ә бьбахшинә мә (Зәбур 103:8, 9). Чахе әм шашийа дькьн, чаԝа дәрәща Шьмшонда, Йаһоԝа дькарә ԛәԝате бьдә мә жи, ԝәки әм ԛьрара ԝи биньн сери. w23.09 6 ¶15-16

Гава баԝәрийа мә те щерʹьбандьне у әм амьн дьминьн, әм ԛәбулкьрьна Йаһоԝа ԛазанщ дькьн. Әв йәк найе һʹәсабе, кӧ Йаһоԝа ша дьбә чахе әм рʹасти тәнгасийа тен. Дәԝсе, гава Йаһоԝа дьвинә кӧ әм тәйах дькьн, әԝ мәрʹа фьрнаԛ дьбә. Рʹасти жи әв йәк кʹәрәмәкә гәләк мәзьн ә! (Зәбур 5:12) Бьраһим жи бь амьни тәнгасийада сәбьр дькьр у дьле Йаһоԝа ша дькьр. Йаһоԝа әԝ ча досте Хԝә у мәрьвәки рʹаст һʹәсаб дькьр (Дәстпебун 15:6; Рʹомайи 4:13, 22). Йаһоԝа мә жи ӧса һʹәсаб дькә. Әԝ мә ԛәбул дькә, нә жь бо ве йәке, кӧ әм чь шьхӧли дькьн, йан чь щабдарийед мә һәнә, ле әв йәк амьнийа мәва гьредайи йә. Фьрԛи тʹӧнә әм чәнд сали нә, чь һʹалида ньн, йан жи чь фәрәсәтед мә һәнә, әм дькарьн сәбьр кьн. Гәло ньһа тӧ бь амьни тәнгасийада тәйах дьки? Һәрге әре, бир нәкә кӧ Хԝәде жь тә рʹази йә. Гава әм дьвиньн кӧ Хԝәде жь мә рʹази йә, әв йәк гӧмана мә дьһа ԛәԝи дькә. w23.12 11 ¶13-14

Гәләк фәрз ә, ԝәки бьра бьзаньбьн кӧ ча тʹәви мәрьва бькʹәвьнә хәбәрдане. Сәва кӧ бьра фькьр у ньһерʹандьна кәсед дьн дьһа баш фәʹм кә, әԝ гәрәке рʹьнд гӧһ бьдә ԝан (Мәтʹәлок 20:5). Әԝ дькарә жь дәнге мәрьв, бәшәра ԝи у жестед ԝи, гәләк тьшт дәрһәԛа ԝи пебьһʹәсә. Бона ве йәке, тӧ гәрәке ԝәʹдә тʹәви ԝан дәрбаз ки. Һәрге тӧ бона хәбәрдане тʹьме һащәтед әләктроник, мәсәлә нәʹма у емайла дьди хәбате, ԝәхт шунда ԝе тәрʹа чәтьн бә тʹәви мәрьва бькʹәви хәбәрдане. Ләма жи мәщала бьгәрʹә, ԝәки рʹу бь рʹу тʹәви мәрьва хәбәр ди (2 Йуһʹәнна 12). Бьред гьһишти гәрәке әʹбура хԝә у малбәта хԝә бькьн (1 Тимотʹейо 5:8) Ве йәке һин бә, чь кӧ ԝе али тә бькә хԝәрʹа хәбатәкә баш бьвини (Кʹаред Шандийа 18:2, 3; 20:34; Әфәси 4:28). Шьхӧлда сәр хԝә бә у шьхӧле хԝә нивида нәһелә. Ӧса кәсед дьн ԝе бьвиньн, ԝәки тӧ йәки хәбатһʹәз и. Һәрге тӧ ӧса бьки, тӧйе һеса хԝәрʹа хәбате бьвини у ӧнда нәки. w23.12 27 ¶12-13

Ль гора Кʹьтеба Пироз, рʹожа Йаһоԝа те һʹәсабе дәма кӧ Йаһоԝа ԝе дьжмьнед хԝә ԛьрʹ бькә у щьмәʹта хԝә хьлаз кә. Бәре, Йаһоԝа щара дьжмьнед хԝә щәза дькьрьн (Ишайа 13:1, 6; Һәзәԛел 13:5; Сефанйа 1:8). Ԝәʹде мәда, рʹожа Йаһоԝа ԝе бь һʹьщумкьрьна сәр Бабилона Мәзьн дәстпебә у бь шәрʹе Һармәгәдоне хьлаз бә. Сәва кӧ әм ԝәʹде рʹожа Йаһоԝа сах бьминьн, гәрәке әм хԝә ньһада һазьр кьн. Иса әшкәрә готьбу, кӧ гәрәке әм һәртʹьм бона тәнгасийа мәзьн «һазьр бьн» (Мәтта 24:21; Луԛа 12:40). Паԝлосе шанди нәʹма 1 Тʹесалоникида бь сайа мәсәла зәлал кьрьбу, кӧ хьзмәткʹаред Хԝәде чаԝа дькарьн хԝә бона рʹожа диԝана Хԝәде һазьр кьн. Ԝе дәме Паԝлос заньбу, кӧ рʹожа Йаһоԝа һе дур ә (2 Тʹесалоники 2:1-3). Ле диса жи әԝи хушк-бьра һелан дькьрьн, ԝәки хԝә ӧса һазьр бькьн, кӧ ча бежи әԝ рʹож ԝе сьбе бе. Ԝәрә әм жи ль гора ве ширәте һәрәкʹәт бькьн! w23.06 8 ¶1-2

Сала 1978, Жапонйайеда ль бажаре Токйойе авайикә 60 ԛати һатә авакьрьне. Ԝедәре гәләк әʹрдһʹәж дьԛәԝьмин, ләма жи мәрьв дьфькьрин кӧ әв авайи ԝе чаԝа бәр әʹрдһʹәжа тәйах кә. Ле инжинера әв авайа бьльнд ӧса данә чекьрьне, кӧ әԝ бькарьбә ԝәʹде әʹрдһʹәжед ԛайим жи һьлнәше. Хьзмәткʹаред Хԝәде мина ве авайе нә. Гәло чьда? Хьзмәткʹаред Хԝәде гәрәке һьм ԛәԝи бьминьн, һьм жи бона гӧһастьна һазьр бьн. Әԝана рʹьнд гӧһ дьдьнә ԛанун у принсипед Йаһоԝа. Әԝана гәрәке гӧһдар бьн у ль гора баԝәрийа хԝә бьжин. Жь алийе дьнва жи, лазьм ә кӧ әм «мьлук» бьн, у чахе дәрәщә те гӧһастьне, ль гора ве йәке кʹар бькьн (Аԛуб 3:17). Хьзмәткʹаред Хԝәде, йед кӧ һин бунә ньһерʹандьна рʹаст хԝәй кьн, нә гәләк сәрт ьн, нә жи бе тʹалаш ьн. w23.07 14 ¶1-2

Чахе Иса рʹасти щерʹьбандьнед Мире-щьна һат, әԝ Йаһоԝарʹа амьн ма (Мәтта 4:1-11). Мире-щьна гәләк дьхԝәст ԝәки Иса гӧнә бькә, кӧ нькарьбә әʹмьре хԝә ча ԛӧрбан бәрва бьдә. Гава Иса сәр әʹрде бу, әԝ рʹасти гәләк чәтьнайед дьн жи һат. Мәсәлә, дьжмьнед ԝи пәй ԝи дькʹәтьн у дьхԝәстьн ԝи бькӧжьн (Луԛа 4:28, 29; 13:31). Әԝи гәрәке һьмбәри кемасийед шагьртед хԝә сәбьр кьра (Маркос 9:33, 34). Чахе әԝ бәр диԝане дьсәкьни, мәрьва бӧхдан давитьне у ԛәрфед хԝә ԝи дькьрьн. Паше әԝ ча мәрьвәки нәһәԛ, бь зӧлми һатә кӧштьне (Ибрани 12:1-3). Ахьрийеда лазьм бу ԝәки әԝ хԝәха, демәк бейи аликʹарийа Йаһоԝа, сәбьр кә (Мәтта 27:46). Әшкәрә йә, ԝәки бона Иса һеса нибу әʹмьре хԝә ча ԛӧрбан бәрва бьдә. Гәло жь бо ве йәке кӧ Иса ԛӧрбанәкә ӧса мәзьн бона мә да, һежа нинә кӧ әм һʹәзкьрьна мәзьн һьндава ԝида бьдьнә кʹьфше? w24.01 10-11 ¶7-9

Сәбьркьрьн али мә дькә, кӧ әм һьндава мәрьвада ԛәнщ бьн у чахе кәсәк тʹәви мә хәбәр дьдә, рʹьнд гӧһ бьдьнә хәбәрдана ԝан (Аԛуб 1:19). Сәбьркьрьн ӧса жи әʹдьлайе пешда тинә. Һәрге сәбьра мә тʹӧнә бә, әме зу һерс кʹәвьн. Ле һәрге сәбьра мә һәбә, гава кәсәк дьле мә бешинә, әме зу нәхәйидьн. Дәԝса кӧ әм һʹәйфе һьлдьн, әме «ль һәв сәбьр кьн у ль һәв бьбахшиньн» (Колоси 3:12, 13). Ӧса жи сәбьркьрьн дькарә али мә кә, ԝәки әм сафикьрьнед дьһа баш бькьн. Дәԝса кӧ әм бь емосийа, ләзә-ләз тьштәки бькьн, әме кʹур лекʹолина бькьн у паше сафикьрьна лапә баш бькьн. Мәсәлә, гава әм хԝәрʹа хәбатәке дьгәрʹьн, дьбәкә әм һәма кʹижан хәбате бьдьнә мә, перʹа-перʹа ԛәбул кьн. Ле һәрге әм бь сәбьр бьн, әме рʹьнд бьфькьрьн кӧ хәбата тʹәзә ԝе сәр малбәта мә у достийа мә тʹәви Йаһоԝа чаԝа һʹӧкӧм кә. Сәбьркьрьн дькарә мә жь сафикьрьнед нәбаш бьпʹарезә. w23.08 22 ¶8-9

Һәрге тӧ жь бо кемасийед хԝә дьлтәнг дьби, бинә бира хԝә, кӧ чахе тә хԝә тʹәсмили Хԝәде кьр, тә чь соз да ԝи. Гава тӧ әʹмьре хԝә тʹәсмили Йаһоԝа дьки, әв те һʹәсабе, ԝәки тӧ хԝәстьн у нетед хԝә инкʹар дьки (Мәтта 16:24). Ләма жи гава тӧ тейи щерʹьбандьне, нәлазьм ә ԝәки тӧ гәләк бьфькьри һәла тӧйе чь бьки. Тә пешда сафи кьрийә, Йаһоԝарʹа амьн бьмини у һәр тьшти бьки, ԝәки дьле Ԝи ша ки. Бь ве йәке тӧ чʹәʹв дьди Ибо, йе кӧ ӧса готьбу: «Һʹәта мьрьне беԛьсуртийа хԝә наһельм!» (Ибо 27:5, ДТʹ). w24.03 9 ¶6-7

Йаһоԝа «Хԝәдейе һʹьзкьрьне у әʹдьлайийе» тʹәви мә йә (2 Корьнтʹи 13:11). Әԝ бона мә һәр кәси хәм дькә. Әм баԝәр ьн, кӧ «һʹӧба амьн ԝе бьгьрә дора ԝан, кʹижана гӧмана хԝә данә сәр Хӧдан» (Зәбур 32:10). Чьԛас әм дьдьнә бәр чʹәʹве хԝә кӧ әԝ мә һʹәз дькә, һаԛас әм хԝә незики ԝи тʹәхмин дькьн. Әм дькарьн аза дьле хԝә ԝирʹа вәкьн у бежьн, ԝәки әм гәләк һʹәԝще һʹәзкьрьна ԝи нә. Әм дькарьн жерʹа бәʹса һʹәму кӧл-дәрдед хԝә бькьн у баԝәр бьн, кӧ әԝ һʹале мә фәʹм дькә у һазьр ә али мә бькә (Зәбур 145:19). Чаԝа кӧ агьр рʹожәкә сарда мә гәрм дькә, һʹәзкьрьна Йаһоԝа жи ӧса дьле мә гәрм дькә. Һʹәзкьрьна Йаһоԝа һьм ԛәԝи йә, һьм жи назьк ә. Шабуна хԝә ӧнда нәкә, чьмки Йаһоԝа тә һʹәз дькә. Ләма ԝәрә әм жи бь дьл у щан бежьн: «Әз Йаһоԝа һʹәз дькьм!» (Зәбур 116:1). w24.01 31 ¶19-20

Иса нә тʹәне мәрьварʹа дьгот, кӧ наве Хԝәде чь йә, ле һе зедә. Щьһуйед кӧ Иса ԝана һин дькьр, заньбун кӧ наве Хԝәде Йаһоԝа йә. Ле Иса Әԝ ԝанрʹа «да әʹйанкьрьне» (Йуһʹәнна 1:17, 18). Мәсәлә, Ньвисаред Пирозә Ибрани нишан дькьн, кӧ Йаһоԝа йәки дьлрʹәʹм у дьлшәԝат ә (Дәркʹәтьн 34:5-7). Чахе Иса мәтʹәлока дәрһәԛа кӧрʹе ӧндабуйи у баве ԝи гьли кьр, әԝи дина мәрьва кʹьшандә сәр ван һʹӧнӧред Хԝәде. Мәтʹәлокеда, гава бав кӧрʹе хԝәйи кӧ тʹобә кьр «һе дурва» дит, бәрбь ԝи бәзи, әԝ һʹәмез кьр у жь дьл бахшандә ԝи. Әв мәтʹәлок нишани мә дькә, кӧ дьлрʹәʹми у дьлшәԝатийа Йаһоԝа чьԛас мәзьн ә (Луԛа 15:11-32). Бәле, Иса зәлал нишан кьрийә кӧ Баве ԝи бь рʹасти йәки чаԝа йә. w24.02 10 ¶8-9

жи рʹожед чәтьнда бәр дьле мәда те у дьле мә һеса дькә. Ле әм ча дькарьн чʹәʹв бьдьнә Йаһоԝа, демәк һьндава мәрьвада дьлшәԝат бьн у бәрдьлийе бьдьнә ԝан? Мәщаләк кӧ әм ча дькарьн ве йәке бькьн әв ә, ԝәки һʹӧнӧред ӧса нав хԝәда пешда биньн, кʹижан кӧ ԝе али мә бькьн дьлшәԝатийе у бәрдьлийе бьдьнә кʹьфше. Гәло әԝ чь һʹӧнӧр ьн? Гәло чь ԝе али мә бькә бәрдәԝам кьн һәр рʹож һʹәзкьрьне бьдьнә кʹьфше у бәр дьле һәвда бен? (1 Тʹесалоники 4:18) Әм гәрәке бәрдьли, һʹәзкьрьна бьратийе у дьлшәԝати нав хԝәда пешда биньн (Колоси 3:12; 1 Пәтрус 3:8). Әԝ һʹӧнӧр ча ԝе али мә бькьн? Һәрге әм һьндава хушк-бьрада дьлшәԝат бьн у бона ԝан хәм бькьн, хԝәстьна мә ԝе ԛәԝи бә бәр дьле ԝанда бен, чахе әԝана рʹасти кӧл-дәрда бен. Чаԝа кӧ Иса гот, «дьл бь чь тʹьжә йә, зьман әве жи дьбежә. Мәрьве ԛәнщ тьштед ԛәнщ дьбежә, чьмки дьле ԝи бь тьштед ԛәнщ тʹьжә йә. Ле мәрьве хьраб тьштед хьраб дьбежә, чьмки дьле ԝи бь тьштед хьраб тʹьжә йә» (Мәтта 12:34, 35). Бәле, гава әм бәр дьле хушк-бьрада тен, әм нишан дькьн кӧ әм бь рʹасти жи ԝана һʹәз дькьн. w23.11 10 ¶10-11

Бона фәʹмкьрьна пʹехәмбәртийед Кʹьтеба Пироз мәрʹа аликʹари лазьм ә. Дина хԝә бьдьнә ве мәсәле: Тӧ дьчи щики нәнас, ле һәваләки тә, йе кӧ ԝи щийи рʹьнд нас дькә, тʹәви тә те. Әԝ сәд сәләфи занә кӧ һун кʹидәре нә у әв рʹе бәрбь чь дьбә. Бе шьк, тӧ гәләк ша йи кӧ һәвале тә кʹеләка тә йә! Мина ви һәвали, Йаһоԝа жи дьхԝазә али мә бькә. Әԝ рʹьнд занә кӧ сьбе-дӧспа ԝе чь бьԛәԝьмә. Ләма жи бона фәʹмкьрьна пʹехәмбәртийед Кʹьтеба Пироз, гәрәке әм бь мьлукти жь Йаһоԝа аликʹарийе бьхԝазьн (Данийел 2:28; 2 Пәтрус 1:19, 20). Мина һʹәму де-бавед ԛәнщ, Йаһоԝа жи дьхԝазә ԝәки ахьрийа зарʹед ԝи баш бә (Йерәмйа 29:11). Йаһоԝа пешда дькарә бежә, кӧ ахьрийеда чь ԝе бьԛәԝьмә, у гьлийед ԝи бь тʹәмами тенә сери. Сәва кӧ әм бьзаньбьн ԝәки кʹижан тьштед фәрз ԝе бьԛәԝьмьн, Хԝәде пʹехәмбәртийед хԝә Кʹьтеба Пирозда дайә ньвисаре (Ишайа 46:10). w23.08 8 ¶3-4