Тирмәһ

Иса пе хәбәрдан, кьред хԝә у кʹәрәмәтед кӧ дькьр, чʹәʹв дьда Баве хԝә, у бь ве йәке ньһерʹандьн у һәстед Баве хԝә әʹйан дькьр (Йуһʹәнна 14:9). Әм дькарьн жь кʹәрәмәтед Иса чь һин бьн? Иса у Баве ԝи гәләки мә һʹьз дькьн. Гава Иса бь кʹәрәмәта дәрде мәрьва сьвьк дькьр, әԝи нишан дькьр кӧ әԝ мәрьва гәләк һʹьз дькә. Щарәке, дӧ меред кор жь Иса лава дькьрьн кӧ али ԝан бькә (Мәтта 20:30-34). Дина хԝә бьдьне кӧ бәри пешьн «гӧне Иса ль ԝан һат», у паше әԝи әԝана ԛәнщ кьрьн. Ӧса жи, дьлшәԝатийа ԝи, йа кӧ нишана һʹьзкьрьна ԝи бу, ԝи һелан дькьр, кӧ әԝ кәсед бьрʹчи тʹер бькә у мерәки кʹоти ԛәнщ бькә (Мәтта 15:32; Маркос 1:41). Йаһоԝа, Хԝәдейе рʹәʹм у дьлован у Кӧрʹе ԝи, гәләки мә һʹьз дькьн у бона мә хәм дькьн (Луԛа 1:78; 1 Пәтрус 5:7). Йаһоԝа у Иса һʹьзрәта ԝе рʹоже нә, кӧ һʹәму кӧл-дәрдед мәрьва бьдьнә һьлдане! w23.04 3 ¶4-5

Әм гәрәке ԛәԝате бьдьнә хәбате, ԝәки гӧһ нәдьн у нәхуньн ван тьшта, йед кӧ дьнйа Мире-щьнада бәла буйи нә, сәва кӧ нәкʹәвьнә бьн һʹӧкӧме фькьред хьраб. Гава әм Кʹьтеба Пироз дьхуньн у сәр дьфькьрьн, ви чахи фькьред баш дькʹәвьнә һʹьш у дьле мә. Чуйина сәр щьвата у бәлакьрьна мьзгинийе жи дькарьн фькьред мә бьпʹарезьн. У Йаһоԝа соз дьдә, кӧ әме жь ԛәԝата хԝә дәр нәйенә щерʹьбандьне (1 Корьнтʹи 10:12, 13). Ван рʹожед пашьн у чәтьнда, сәва кӧ әм Йаһоԝарʹа амьн бьминьн, һәр кәс жь мә гәрәке һе зедә дӧа бькә. Йаһоԝа дьхԝазә кӧ «әм дьле хԝә ль бәр ԝи вәкьн» (Зәбур 62:8). Пәсьне Йаһоԝа бьдә у бона һʹәму кьред ԝи рʹазибуна хԝә жерʹа бьдә кʹьфше. Бона бәлакьрьна мьзгинийе, мерхасийе жь ԝи бьхԝазә. Жь Йаһоԝа лава бькә кӧ али тә бькә, сәва кӧ тӧ бькарьби һьмбәри һʹәму чәтьнайа сәбьр ки у һәр щурʹә щерʹьбандьнада амьн бьмини. Бьра тʹӧ тьшт у тʹӧ кәс рʹийа тә нәгьрә, ԝәки һәр рʹож Йаһоԝарʹа дӧа бьки. w23.05 7 ¶17-18

Әм чьрʹа дьчьн сәр щьвата? Йа әʹԝльн, әм пәсьне Йаһоԝа Хԝәде дьдьн (Зәбур 26:12; 111:1). Ӧса жи, әм дьхԝазьн ван рʹожед чәтьнда һәвдӧ һелан кьн (1 Тʹесалоники 5:11). Бәле, гава әм дәсте хԝә бьльнд дькьн у щабәке дьдьн, әм пәсьне Йаһоԝа дьдьн у һәвдӧ ԛәԝи дькьн. Ле дьԛәԝьмә мәрʹа зор ә щаба хԝә бьдьн, дьбәкә әм дьтьрсьн йан жи шәрм дькьн. Йан жи әм жь дьл дьхԝазьн дьһа зедә щаба бьдьн, ле дьԛәԝьмә бьре кӧ щьвате дәрбаз дькә, гәләк щар жь мә напьрсә. Дәрәщед ӧсада әм дькарьн чь бькьн? Паԝлосе шанди гот кӧ гәрәке әм «һелана бьдьнә һәв». Һәрге әм фәʹм бькьн, кӧ әм дькарьн бь гьлийед һеса жи баԝәрийа хԝә бьдьнә кʹьфше у һәвдӧ ԛәԝи кьн, ԝе мәрʹа һеса бә щабед хԝә бьдьн. У һәрге бьре кӧ щьвате дәрбаз дькә, һаԛас щар жь мә напьрсә чьԛас әм дьхԝазьн, диса жи әм дькарьн ша бьн, чьмки мәщал дькʹәвә дәсте кәсед дьн, кӧ щаба хԝә бьдьн (1 Пәтрус 3:8). w23.04 20 ¶1-3

Рʹожа азабуне һат! Паши дилтийа 70 сали Бабилонеда, пʹадша изьн да Щьһуйа вәгәрʹьн ԝәлате хԝә (Әзра 1:2-4). Тʹәне Йаһоԝа дькарьбу тьштәки ӧса мәзьн бькә. Чьмки Империйа Бабилоне диле хԝә бәрʹнәдьдан (Ишайа 14:4, 17). Ле рʹожәке, бажаре Бабилоне алийе сәрԝерәки дьнва һатә зәфткьрьне. Әԝи изьн да Щьһуйа вәгәрʹьн ԝәлате хԝә. Ле лазьм бу, ԝәки һәр Щьһуйәк, илаһи сәред малбәте, сафи кьн һәла жь Бабилоне дәркʹәвьн, йан ԝедәре бьминьн. Бь рʹасти, әв сафикьрьн һеса нибу. Бона кәсед әʹмьрда мәзьн, әв рʹекә дур у гәләки зәʹмәт бу. Һьм жи һʹәчʹи зәʹф Щьһу Бабилонеда һатьбун буйине у ԝана ԝәлатәки дьн нас нәдькьрьн. Бона ԝан, Исраел ԝәлате кал-бавед ԝан бу. Һьнә Щьһу Бабилонеда гәләк дәԝләти бьбун. Ләма жи, дьԛәԝьмә бона ԝан чәтьн бу мал-мьлкʹе хԝә у дькʹанед хԝә бьһельн, у ԝәлатәки хәрибда щи-ԝар бьн. w23.05 14 ¶1-2

Хәбәра Хԝәде мә һелан дькә, кӧ әм сәбьр, дьлшәԝати у һʹьзкьрьнеда һе зедә пешда һәрʹьн. Луԛа 21:19-да те готьне: «Бь сәбьра хԝә һуне рʹӧһʹе хԝә хьлаз кьн». Колоси 3:12 дьбежә: «Дьлшәԝатийе . . . ль хԝә ԝәргьрьн». У 1 Тʹесалоники 4:9, 10-да те готьне: «Һун хԝәха жь Хԝәде һин бунә, кӧ һәв һʹьз бькьн. . . . Ле әм һиви жь ԝә дькьн хушк-бьрано, кӧ һун ԝе йәкеда һе пешда һәрʹьн». Әв рʹез бона шагьртед Иса һатьбунә ньвисаре, кʹижана кӧ ида сәбьр, дьлшәԝати у һʹьзкьрьн дьданә кʹьфше. Ле диса жи лазьм бу кӧ әԝана бәрдәԝам кьн ван һʹӧнӧра пешда биньн. Әм жи гәрәке ве йәке бькьн. Дина хԝә бьдә кӧ ча Мәсиһийед ԛьрʹна йәке әв һʹӧнӧр пешда дьанин. Паше бьфькьрә кӧ ча тӧ дькари чʹәʹв бьди ԝан у бона тәнгасийа мәзьн һазьр би. Паше, гава тәнгасийа мәзьн дәстпебә, тӧйе ида бона ве йәке һазьр би у бькарьби диса жи тәйах ки. w23.07 3 ¶4, 8

Әм гьшк, һьм кәсед бь рʹӧһʹ кʹьфшкьри һьм жи ‹пәзед дьн› гәрәке сәр «Рʹийа Пироз» һәрʹьн. Әв йәк али мә дькә, ԝәки әм тʹьме Йаһоԝарʹа хьзмәт кьн у бьгьһижьнә кʹәрәмен, кӧ Хԝәде ԝе бь сайа Пʹадшатийа хԝә бьдә мә (Йуһʹәнна 10:16). Жь сала 1919 Д.М., бь милйона жьн, мер у зарʹ жь Бабилона Мәзьн, демәк жь религийа ԛәлп дәркʹәтьнә у дәрбази сәр ве рʹийа симболик бунә. Йаһоԝа соз дабу Щьһуйед кӧ жь Бабилоне дәркʹәтьбун, ԝәки Әԝе һʹәму чәтьнайед сәр рʹийа ԝан бьдә һьлдане (Ишайа 57:14). Ле дәԝрана мәда, әм дькарьн дәрһәԛа «Рʹийа Пироз» чь бежьн? Бь ԛьрʹна пешийа сала 1919, Йаһоԝа бь сайа меред амьн рʹе вәкьр, демәк али гәләка кьр, ԝәки жь Бабилона Мәзьн дәрен (Бәрамбәр кә Ишайа 40:3). Бь сайа ве йәке, һʹим һатьбу данине, ԝәки мәрьвед дьлсах жь Бабилона Мәзьн дәркʹәвьн у бькʹәвьнә щьнәта рʹӧһʹани у Йаһоԝарʹа хьзмәт кьн. w23.05 15-16 ¶8-9

Йаһоԝа дьхԝазә ԝәки әм бь шабуне у рʹәзәдьли ԝирʹа хьзмәт кьн (2 Корьнтʹи 9:7). Гава хԝәстьна мә тʹӧнә йә, гәло лазьм ә ԝәки әм хирәт бькьн кӧ бьгьһижьн нета хԝә? Ԝәрә әм дина хԝә бьдьнә мәсәла Паԝлосе шанди. Әԝи гот: «Әз щәфайе дьдьм бәдәна хԝә у ԝе бьн-дәст дькьм» (1 Корьнтʹи 9:25-27). Паԝлосе шанди, һәла һе ви чахи жи сәр хԝә дьхәбьти, кӧ тьштед рʹаст бькә, гава һʹәԝаса ви тʹӧнә бу. Гәло Йаһоԝа жь хьзмәтийа Паԝлос рʹази бу? Бешьк, әре! У Йаһоԝа хирәта ԝи кʹәрәм дькьр (2 Тимотʹейо 4:7, 8). Һәма бь ви щурʹәйи, һәрге хԝәстьна мә тʹӧнә бә, ле әм диса жи хирәт бькьн кӧ бьгьһижьнә нета хԝә, Йаһоԝа ԝе жь мә рʹази бә. Әԝ занә кӧ әм һьнә шьхӧла һʹьз накьн, ле диса жи әм фьлан шьхӧли дькьн чьмки ԝи һʹьз дькьн. Чаԝа кӧ Йаһоԝа Паԝлосе шанди кʹәрәм кьр, әԝе хирәта мә жи кʹәрәм кә (Зәбур 126:5). Гава әм дьвиньн кӧ Йаһоԝа мә кʹәрәм дькә, әм һелане дьстиньн ԝәки дьһа зедә бькьн. w23.05 29 ¶9-10

Паԝлосе шанди кәсед кӧ ԝе ԛьрʹ бьн, бәрамбәри ԝан кьр йед кӧ хәԝеда ньн. Әԝана ньзаньн кӧ дәр-дора ԝан чь дьԛәԝьмә у ԝәхт чаԝа дәрбаз дьбә. Ләма жи, гава тьштәки фәрз дьԛәԝьмә, әԝана пенаһʹәсьн у нькарьн гавед лазьм бавежьн. Иро жи, һʹәчʹи зәʹф мәрьв бь симболик хәԝеда ньн (Рʹомайи 11:8). Әԝана нахԝазьн ԛәбул кьн, кӧ әм рʹожед ахьрийеда дьжин у тәнгасийа мәзьн незик ә (2 Пәтрус 3:3, 4). Әм нә мина ԝан ьн. Әм фәʹм дькьн, ԝәки тʹәмийа Хԝәде кӧ гәрәке әм һʹьшйар бьминьн, чьԛас дьчә һаԛас дьһа фәрз дьбә (1 Тʹесалоники 5:6). Ләма жи әм гәрәке рʹьһʹәт бьминьн у сәр һʹьше хԝә бьн. Гәло чьрʹа? Сәва кӧ әм нәкʹәвьнә нава шьхӧле политики у сосйали. Чьԛас рʹожа Йаһоԝа незик дьбә, һаԛас дьһа чәтьн дьбә пьрсед ӧсада амьнийа хԝә хԝәй кьн. Диса жи, нә лазьм ә кӧ әм хәмгин бьн. Хԝәде ԝе бь сайа рʹӧһʹе пироз али мә бькә, ԝәки әм рʹьһʹәт бьминьн у сафикьрьнед билан бькьн (Луԛа 12:11, 12). w23.06 10 ¶6-7

Гава тӧ наве Шьмшон дьбьһейи, гәло чь те бира тә? Дьԛәԝьмә ԛәԝата ԝийә мәзьн те бира тә. Ле щарәке Шьмшон бона сафикьрьнәкә нәбаш, ешәкә мәзьн кʹьшанд. Диса жи Йаһоԝа дина хԝә дьда амьнийа Шьмшон у сәрһатийа ԝи бона кʹара мә дайә ньвисаре. Йаһоԝа бь сайа Шьмшон аликʹарикә мәзьн да щьмәʹта хԝә Исраелийа. Бь ԛьрʹна паши мьрьна Шьмшон, Йаһоԝа Паԝлосе шанди һелан кьр, ԝәки әԝ наве Шьмшон нава рʹеза меред баԝәрмәндда бьньвисә (Ибрани 11:32-34). Мәсәла Шьмшон дькарә ԛәԝате бьдә мә. Һәла һе дәрәщед чәтьнда жи, әԝи хԝә дьспартә Йаһоԝа. Әм дькарьн жь Шьмшон һин бьн у мәсәла ԝи дькарә дьле мә ԛәԝи бькә. w23.09 2 ¶1-2

Һәрге әм гәләк щар Йаһоԝарʹа дӧа кьн у ԝирʹа бәʹса хәм у дәрдед хԝә бькьн, әме бькарьбьн һе зедә сәбьр кьн (1 Тʹесалоники 5:17). Дьбәкә чәтьнайед тәйә гьран ньһа тʹӧнә нә. Ле диса жи, гава тӧ дьлтәнг у тʹәвльһәв дьби, йан жи ньзани чь бьки, гәло тӧ Йаһоԝарʹа бона аликʹарийе дӧа дьки? Һәрге тӧ ньһада бона чәтьнайед һәррʹожи аликʹарийе жь Хԝәде бьхԝази, тӧйе һин би чәтьнайед мәзьнда жи хԝә бьспери Йаһоԝа. Бь ви щурʹәйи, тӧйе бь тʹәмами баԝәр би, ԝәки әԝ рʹьнд занә, кӧ чаԝа у кʹәнге али тә бькә (Зәбур 27:1, 3). Һәрге әм ньһада һьмбәри проблемед хԝә Йаһоԝарʹа амьн бьминьн, әме тәнгасийа мәзьнда жи сәбьр кьн (Рʹомайи 5:3). Гәло чьрʹа? Гәләк хушк-бьра дьбежьн, кӧ чахе әԝана чәтьнайед гьранда сәбьр дькьн, әв йәк али ԝан дькә, ԝәки һьмбәри дәрдед дьн жи тәйах кьн. Сәбьр али ԝан кьрийә ԝәки баԝәрийа хԝә дьһа ԛәԝи кьн, у баԝәр бьн кӧ Йаһоԝа тʹьме һазьр ә али ԝан бькә. Әв баԝәри али ԝан дькә, кӧ һьмбәри проблемед дьн жи сәркʹәвьн (Аԛуб 1:2-4). w23.07 3 ¶7-8

Мьлукти у дьлованийа Йаһоԝа ԝи һелан кьр, бь сәрԝахти сафикьрьна бькә. Мәсәлә, паши кӧ Йаһоԝа сафи кьр, ԝәки бажаре Содоме ԝеран кә, мьлуктийа ԝи әшкәрә бу. Бь сайа мәләкед хԝә, Йаһоԝа мерәки ԛәнщрʹа бь наве Лут гот, кӧ әԝ бьрʹәвә чʹийе. Ле Лут дьтьрсийа кӧ һәрʹә ԝедәре. Ләма жи, әԝи жь Йаһоԝа рʹәща кьр, кӧ әԝ изьне бьдә ԝи у малбәта ԝи, кӧ әԝана һәрʹьн бажаре Соһаре, ле Йаһоԝа сафи кьрьбу кӧ әв бажаре бьчʹук жи ԝеран кә. Йаһоԝа дькарьбу Лутрʹа бьгота кӧ гәрәке әԝ хут ль гора рʹебәрийа ԝи бькә. Дәԝса ве йәке, Йаһоԝа хԝәстьна Лут ԛәбул кьр у бажаре Соһаре ԝеран нәкьр (Дәстпебун 19:18-22). Паши чәнд ԛьрʹна, Йаһоԝа дьлрʹәʹмийа хԝә нишани щьмәʹта Нинәԝайе кьр. Әԝи бь сайа Уньс пʹехәмбәр әʹлам кьр, кӧ Әԝе ԝи бажари у мәрьвед хьраб ԛьрʹ кә. Ле гава ԝана тʹобә кьр, Йаһоԝа рʹәʹма хԝә һьндава ԝанда да кʹьфше у бажаре ԝан ԝеран нәкьр (Уньс 3:1, 10; 4:10, 11). w23.07 21 ¶5

Әм жь мәсәла Йоаш чь дькарьн һин бьн? Чаԝа кӧ дарәкә бе кʹока ԛәԝи, һʹәԝщә шьдандьне йә, Йоаш жи һʹәԝще аликʹарийе бу. Гава Йәһойада, йе кӧ аликʹари дьда ԝи, мьр, Йоаш кʹәтә бәр байе кәсед кӧ жь рʹийа Хԝәде дәркʹәтьбун. Мәсәла ԝи нишан дькә, кӧ әм гәрәке нә кӧ бона хатьре малбәта хԝә, нә жи бона хатьре хушк у бьра Йаһоԝа бьтьрсьн, ле чьмки әм ԝи һʹьз дькьн. Сәва кӧ әм рʹӧһʹанида ԛәԝи бьминьн, әм гәрәке һәр тьшти бькьн, ԝәки амьнийа хԝә хԝәй кьн. Бона ве йәке, лазьм ә кӧ әм һәртʹьм лекʹолина шәхси бькьн, сәр тьштед кӧ дьхуньн кʹур бьфькьрьн у дӧа бькьн (Йерәмйа 17:7, 8; Колоси 2:6, 7). Бь рʹасти, Йаһоԝа тьштед жь ԛәԝата мә дәр жь мә дәʹԝа накә. Кʹьтеба Пироз ӧса дьбежә: «Жь Хԝәде бьтьрсә у әʹмред ԝи бьгьрә, ԝәзифәйа һʹәму мәрьва әв ә» (Ԝаиз 12:13, ИМ). Бь сайа тьрса бәр Хԝәде, әме бькарьбьн бәр тәнгасийед ахьрийе сәбьр кьн у амьн бьминьн. Бь ви щурʹәйи тʹӧ тьшт ԝе нькарьбә достийа мә тʹәви Йаһоԝа хьраб кә. w23.06 19 ¶17-19

Әв рʹеза 5 жь Әʹйанти ӧса дәстпедьбә: «Һьнге әԝи ль сәр тʹәхт рʹуньшти гот» (Әʹйанти 21:5а). Әв гьлийед мәхсус ьн, чьмки әв йәк жь ван се дәрәща йә, гава кʹьтеба Әʹйантида Йаһоԝа хԝәха хәбәр дьдә. Бәле, йе кӧ әв соз дайә, нә мәләк ә, нә жи Иса Мәсиһ йә, ле хԝәха Йаһоԝа йә! Әв йәк рʹастийа ван гьлийа избат дькә, йед кӧ әԝ паше дьбежә. Гәло чьрʹа? Чьмки Йаһоԝа «хԝәйе готьна хԝә» йә (Тито 1:2). Әв йәк нишан дькә, кӧ һежа йә ԝәки әм бь тʹәмами итʹбарийа хԝә гьлийед жь Әʹйанти 21:5, 6 биньн. Паше Йаһоԝа хәбәрәкә ӧса дьбежә: «Ва». Хәбәра Йунани, йа кӧ ча «ва» һатийә ԝәлгәрʹандьне, кʹьтеба Әʹйантида гәләк щар һатийә хәбьтандьне. Паше Хԝәде гот: «Ва әз һәр тьшти ну чедькьм». Йаһоԝа ԝе ван гӧһастьна ахьрийеда бинә сери. Әԝ занә кӧ әԝ созе ԝи ԝе әʹсәйи бе сери, ләма жи әԝ ӧса хәбәр дьдә, те бежи әԝ ида һатийә сери (Ишайа 46:10). w23.11 3-4 ¶7-8

Пәтрусе шанди һьмбәри ԛьсуред хԝә шәрʹ дькьр. Мәсәлә, Иса сәр хԝә гот, кӧ ль гора Ньвисаред Пироз, әԝе еше бькʹьшинә у бьмьрә. Сәр ве йәке Пәтрус жерʹа гот, кӧ әв йәк ԝе тʹӧ щар нәйе сәре ԝи (Маркос 8:31-33). Пәтрус у шагьртед дьн һәврʹа дькʹәтьнә дәʹԝе, кӧ кʹе нав ԝанда йе һәри мәзьн ә (Маркос 9:33, 34). Шәва пешийа мьрьна Иса, Пәтрус бь һерсе гӧһе мерәки жекьр (Йуһʹәнна 18:10). Һәма ве шәве, Пәтрус жь бо тьрса бәр мәрьва се щара гот, кӧ әԝ Иса нас накә (Маркос 14:66-72). Паше әԝ жь ԝедәре чу у кʹәлә-кʹәл гьрийа. Ле Иса пьшта хԝә нәда шагьрте хԝәйә дьлшкәсти. Чахе Иса жь мьрьне рʹабу, әԝи мәщал да Пәтрус, кӧ әԝ һʹәзкьрьна хԝә ԝирʹа бьдә кʹьфше. Иса Пәтрусрʹа гот, кӧ әԝ бь мьлукти мьԛати бәрхед ԝи бә (Йуһʹәнна 21:15-17). Пәтрус әв йәк ԛәбул кьр. Рʹожа Пенщийе Һʹәсаб, әԝ Оршәлимеда бу у нав кәсед пешьнда бу, йед кӧ бь рʹӧһʹе пироз һатьнә кʹьфшкьрьне. w23.09 22 ¶6-7

Пәтрус ширәт да рʹуспийа, кӧ шьвантийе кәрийе пәзе Хԝәде бькьн (1 Пәтрус 5:1-4). Әм заньн кӧ рʹуспи хушк-бьра һʹәз дькьн у дьхԝазьн али ԝан бькьн. Ле щара шьхӧле рʹуспийа ӧса зәʹф ә у әԝана һаԛас дьԝәстьн, кӧ дьфькьрьн ԝәки нькарьн ԝе щабдарийа хԝә биньн сери. Рʹуспи дькарьн чь бькьн? Әԝана дькарьн дьле хԝә Йаһоԝарʹа вәкьн. Пәтрус ньвиси: «Һәгәр йәк хьзмәткʹарийе дькә, бьра бь ԝе ԛәԝате бькә, кӧ Хԝәде дайе» (1 Пәтрус 4:11). Һәмьки проблемед хушк-бьред мә ве дьнйайеда ԝе бь тʹәмами нәйенә сафикьрьне. Ле бир нәкьн, кӧ «Сәрәкшьван», демәк Иса, жь һәр кәси четьр дькарә али ԝан бькә. Әԝ чаԝа ньһа, ӧса дьнйа тʹәзәда дькарә ве йәке бькә. Хԝәде дьхԝазә ԝәки рʹуспи хушк-бьра һʹәз бькьн, шьвантийа ԝан бькьн у бона ԝан бьбьнә мәсәла баш. w23.09 29-30 ¶13-14

Һәрге әм дәстпекьн мина мәрьвед кӧ гӧһ надьн ԛанунед Йаһоԝа бьфькьрьн, дьбәкә әм пьшта хԝә бьдьнә Йаһоԝа у ԛанунед ԝи (1 Корьнтʹи 3:19). «Сәрԝахтийа ве дьнйайе» гәләк щар хԝәстьнед бәдәне пешда тинә. Һьнә хьзмәткʹаред Хԝәде жь Пәргама у Тийатирайе, кʹәтьн бәр байе кәсед пʹутпʹарьст у бенамус. Иса ширәт да һәрдӧ щьвата, чьмки ԝана дьһишт ԝәки нав ԝанда бенамуси һәбә (Әʹйанти 2:14, 20). Иро ньһерʹандьна ве дьнйайе дькарә сәр мә жи һʹӧкӧм кә. Дьбәкә насед мә у мәрьвед мә мәрʹа дьбежьн, кӧ ԛанунед Йаһоԝа гәләк сәрт ьн, ләма жи нә лазьм ә ԝан ԛануна хԝәй кьн. Гәләк щар әԝана дьбежьн, кӧ әʹсәйи нинә ԛанунед Кʹьтеба Пироз дәрһәԛа нав-намусийе хԝәй кьн у мәрьв гәрәке ль гора хԝәстьна дьле хԝә бьжи. Щара дьбәкә әм бьфькьрьн, ԝәки рʹебәрийа кӧ Йаһоԝа дьдә мә, бь тʹәмами зәлал нинә. Дьбәкә әм бенә щерʹьбандьне, кӧ «жь ньвисаре» дәркʹәвьн (1 Корьнтʹи 4:6). w23.07 16 ¶10-11

Мәрйәме дийа Исарʹа, ԛәԝат лазьм бу. Әԝ һе меркьри нибу, ле мәләке Хԝәде, Щьбрайил, жерʹа гот кӧ әԝе һʹәмлә дәркʹәвә. Дә бьдьнә һʹәсабе хԝә, кӧ жерʹа чьԛас чәтьн бу. Рʹаст ә Мәрйәм ԛә зарʹ мәзьн нәкьрьбу, ле әԝе гәрәке бона кӧрʹәки хәм кьра, кʹижан кӧ ԝе бьбуйа Мәсиһ. Хенщи ве йәке, Мәрйәм бькʹьр бу, у әԝе гәрәке дәргистийе хԝә, Усьврʹа бьгота, кӧ зарʹ ԝе жерʹа бе буйине. Әв йәк бь рʹасти жи һеса нибу (Луԛа 1:26-33). Гәло Мәрйәме жь кʹе ԛәԝат станд? Әԝе жь кәсед дьн аликʹари станд. Мәсәлә, әԝе бона ве щабдарийе рʹебәри жь Щьбрайил хԝәст (Луԛа 1:34). Паши ԝәʹдәки кьн, әԝ чу дәшта чʹийайе Щьһудайе, сәва кӧ мәрьва хԝә, Елизабете бьвинә. Елизабете пʹайе Мәрйәме да у жь бина бәр Йаһоԝа, дәрһәԛа ахьрийа кӧрʹе ԝейә нәбуйи, пʹехәмбәртикә хԝәш гот (Луԛа 1:39-45). Мәрйәме гот, кӧ Йаһоԝа «ԛәԝата дәсте хԝә» жерʹа да кʹьфше (Луԛа 1:46-51). Бәле, Йаһоԝа бь сайа Щьбрайил мәләк у Елизабете, Мәрйәме ԛәԝи кьр. w23.10 14-15 ¶10-12

Тʹәне 144 000 мәрьв, жь нава Мәсиһийа бь сайа рʹӧһʹе пироз һатьнә бьжартьне. Әԝана бона һәләԛәтийа хԝәйә мәхсус тʹәви Йаһоԝа, гәләк ша дьбьн, у әԝана ԝе сәр әʹзмана тʹәви Иса ча кʹаһин хьзмәт бькьн (Әʹйанти 14:1). Коне пирозда, Щийе Пироз те һʹәсабе һʹале кӧрʹед Хԝәде йед бьжарти, һʹәта кӧ әԝана сәр әʹрде нә (Рʹомайи 8:15-17). Ле Щийе Һәри Пироз коне пирозда, те һʹәсабе әʹзманед кʹидәре кӧ Йаһоԝа дьминә. Пʹәрʹда кӧ Щийе Пироз жь Щийе Һәри Пироз вәдьԛәтанд, те һʹәсабе бәдәна Иса Мәсиһ. Һʹәта кӧ бәдәна ԝийә физики һәбуйа, әԝ нькарьбу дәрбази әʹзмана буйа у пʹарьстгәһа рʹӧһʹанида бьбуйа Кʹаһине Мәзьн. Чахе Иса бәдәна хԝә бона һʹәму мәрьва бәрва да, әԝи бона хьзмәткʹаред Хԝәдейә бьжарти рʹийа жийина сәр әʹзмана вәкьр. Сәва кӧ әԝана хәлата хԝәйә әʹзмана ԝар бьн, әԝана гәрәке бәдәна хԝәйә физики бьһельн (Ибрани 10:19, 20; 1 Корьнтʹи 15:50). w23.10 28 ¶13

Гава Әʹфрайимийа әԝ сущдар кьрьн, Гидәон нә кӧ бь һерс, ле бь нәрми щаба ԝан да (Һʹакьмти 8:1-3). Әԝи бь мьлукти гӧһ да дәрд у хәмед ԝан у бь мәʹрифәти щаба ԝан да. Иро жи рʹуспийед билан дькарьн чʹәʹв бьдьнә Гидәон у рʹьнд гӧһ бьдьнә кәсед кӧ ԝана сущдар дькьн у бь нәрми щаба ԝан бьдьн (Аԛуб 3:13). Бь ви щурʹәйи әԝана ԝе щьватеда әʹдьлайе хԝәй кьн. Гава щьмәʹте бона сәркʹәтьна һьмбәри Мьдйана, рʹумәт данә Гидәон, әԝи дина ԝан кʹьшандә сәр Йаһоԝа Хԝәде (Һʹакьмти 8:22, 23). Гәло рʹуспи чаԝа дькарьн чʹәʹв бьдьнә Гидәон? Әԝана гәрәке бона пешдачуйина хԝә пәсьна бьдьнә Йаһоԝа (1 Корьнтʹи 4:6, 7). Мәсәлә, гава хушк у бьра бона һинкьрьна баш пʹайе рʹуспики бьдьн, әԝ дькарә дина ԝан бькʹьшинә сәр Хәбәра Хԝәде, йан жи сәр һинкьрьна тʹәшкиләта Йаһоԝа. w23.06 4 ¶7-8

Һәрге әм щаба дӧайе хԝә настиньн, әм дькарьн пьрсе бьдьнә хԝә: «Гәло әз бона тьштед рʹаст дӧа дькьм?» Гәләк щар, әм дьфькьрьн кӧ әм заньн тьште һәри баш бона мә чь йә. Ле дьԛәԝьмә әв хԝәстьна мә бона кʹара мә нинә. Дьбәкә әм дьфькьрьн кӧ әм сафикьрьна проблемәке заньн у бона ԝе йәке дӧа дькьн. У дьԛәԝьмә һьнә тьштед кӧ әм дьхԝазьн, нә ль гора нета Йаһоԝа нә (1 Йуһʹәнна 5:14). Ԝәрә әм дина хԝә бьдьнә мәсәла де у бавәки. Ԝана жь Йаһоԝа лава дькьр, кӧ зарʹед ԝан хԝә ль рʹастийе бьгьрьн. Рʹаст ә әв хԝәстьнәкә баш ә, ле Йаһоԝа зоре тʹӧ кәси накә, ԝәки жерʹа хьзмәт кә. Әԝ дьхԝазә ԝәки һәр кәс, һәла һе зарʹед мә жи, жь дьл ԝирʹа хьзмәт кьн (Ԛануна Дӧщари 10:12, 13; 30:19, 20). Ләма жи де-бав дькарьн жь Йаһоԝа лава кьн, ԝәки хәбәра Ԝи бьгьһижә дьлед зарʹед ԝан. Бь ви щурʹәйи, әԝана дькарьн али зарʹед хԝә бькьн, кӧ Йаһоԝа һʹәз бькьн у бьбьнә достед ԝи (Мәтʹәлок 22:6; Әфәси 6:4). w23.11 21 ¶5; 23 ¶12

Гәло чьрʹа фәрз ә, кӧ әм бәр дьле һәвда бен, у әв йәк ча һʹәзкьрьна мә дьдә кʹьфше? Ль гора каники, хәбәред «бәр дьле һәвда ԝәрьн», кӧ Паԝлосе шанди ве рʹезеда да хәбате, те һʹәсабе кӧ мәрьв «ԝәʹде гәләк чәтьнда кʹеләка кәсәки дьсәкьнә у бәрдьлийе дьдә ԝи». Чахе әм бәрдьлийе дьдьнә хушк йан бьраки, әм али ԝи дькьн ԝәки әԝ диса бәрдәԝам кә бь амьни Йаһоԝарʹа хьзмәт кә. Һәр щар чахе әм бәр дьле кәсәкида тен, әм һʹәзкьрьна хԝә һьндава ԝида дьдьнә кʹьфше (2 Корьнтʹи 7:6, 7, 13). Дьлшәԝати у бәрдьли һәвва гьредайи нә. Гәло чьда? Мәрьве дьлшәԝат дьхԝазә бәрдьлийе бьдә мәрьва у дәрдед ԝан сьвьк кә. Демәк, пешийе дьле мә бона кәсәки дьшәԝьтә у паше әм бәр дьле ԝида дьчьн. Дина хԝә бьдьне, кӧ ча Паԝлосе шанди дьдә кʹьфше, ԝәки дьлшәԝатийа Йаһоԝа, Ԝи һелан дькә бәрдьлийе бьдә кʹьфше. Паԝлос Йаһоԝа нав кьр ча «Баве дьлшәԝатийе у Хԝәдейе һʹәму бәрдьлийе» (2 Корьнтʹи 1:3). w23.11 9-10 ¶8-10

Паԝлос гот кӧ гава әм рʹасти тәнгасийа тен, һевийа мә дькарә дьһа ԛәԝи бә. Дьԛәԝьмә әв йәк бона мә әʹщебмайи йә. Бь рʹасти, һʹәму шагьртед Иса дькарьн рʹасти чәтьнайа бен. Ԝәрә әм дина хԝә бьдьнә сәрһатийа Паԝлосе шанди. Әԝи Тʹесалоникийарʹа ӧса готьбу: «Гава әм щәм ԝә бун, мә һе һьнгеда ԝәрʹа дьгот, кӧ әме рʹасти тәнгасийа бен у ӧса жи бу, чаԝа һун заньн» (1 Тʹесалоники 3:4). У Паԝлос Корьнтʹийарʹа ӧса ньвиси: «Әм нахԝазьн кӧ һун һаш жь ԝан тәʹли-тәнгийа тʹӧнәбьн хушк-бьрано, . . . һʹәта кӧ мә дәсте хԝә жь әʹмьре хԝә жи кʹьшанд» (2 Корьнтʹи 1:8; 11:23-27). Иро хьзмәткʹаред Хԝәде жи дькарьн рʹасти чәтьнайа бен (2 Тимотʹейо 3:12). Жь бо ве йәке тӧ баԝәрийа хԝә Иса тини у пәй ԝи дьчи, дьԛәԝьмә һәвал у мәрьвед тә ԛәрфед хԝә тә бькьн, йан жи мьԛабьли тә дәрен. Жь бо ве йәке кӧ тӧ дьхԝази һәр тьштида рʹаст у һәԛ би, гәло һәвалхәбатчи йан сәркʹаре тә мьԛабьли тә начьн? (Ибрани 13:18) Жь бо ве йәке кӧ тә кәсед дьнрʹа бәʹса һевийа хԝә кьрийә, гәло жь алийе сәрԝеред дәԝләте, тӧ рʹасти пәйкʹәтьна һати? Фьрԛи тʹӧнә әм рʹасти чь тәнгасийа тен, Паԝлос дьбежә кӧ әм гәрәке ша бьн. w23.12 10-11 ¶9-10

Аԛуб һьмбәри гәләк тәнгасийа сәбьр дькьр. Кӧрʹед Аԛуб, Шьмһʹун у Леԝи, наве малбәта хԝә у наве Йаһоԝа бәр чʹәʹве хәлԛе рʹәш кьрьн. Ӧса жи кʹӧлфәта ԝийә дәлал Рʹаһел, чахе зарʹа дӧда дьани, мьр. У жь бо хәлайикә мәзьн, Аԛуб мәщбур бу, әʹмьре хԝәйи мәзьнда дәрбази Мьсьре бә (Дәстпебун 35:16-19; 37:28; 45:9-11, 28). Нава ван тәнгасийада жи, Аԛуб тʹӧ щар баԝәрийа хԝә һьндава Йаһоԝа у созед ԝи ӧнда нәдькьр. У Йаһоԝа Аԛубрʹа дьда кʹьфше, ԝәки жь ԝи рʹази йә. Гәло чаԝа? Рʹаст ә Лабан һьндава Аԛубда ԛәлп бу, ле Йаһоԝа гәләк мал у мьлкʹ да Аԛуб. Ӧса жи, гава Аԛуб кӧрʹе хԝә Усьв диса дит, әԝ Йаһоԝарʹа гәләк шекьрдар бу, чьмки әԝи тʹьре кӧрʹе ԝи мьрийә. Достийа Аԛуб тʹәви Йаһоԝа али ԝи дькьр, кӧ әԝ тәнгасийада тәйах кә (Дәстпебун 30:43; 32:9, 10; 46:28-30). Һәрге достийа мә тʹәви Йаһоԝа ԛәԝи бьминә, әме жи бькарьбьн тәнгасийада тәйах кьн. w23.04 15 ¶6-7

Зәбура 23, кʹьлама дәрһәԛа итʹбарийа һьндава һʹәзкьрьн у хәмкьрьна Йаһоԝа йә. Ве зәбуреда, Даԝьд бәʹса достийа ортʹа хԝә у Шьване хԝә Йаһоԝа кьр. Даԝьд хԝә бь тʹәмами дьспартә рʹебәрийа Йаһоԝа. Әԝи заньбу, кӧ Йаһоԝа ԝе һәр рʹож һʹәзкьрьна хԝә жерʹа бьдә кʹьфше. Гәло Даԝьд чьрʹа ве йәкеда ӧса баԝәр бу? Даԝьд баԝәр бу, кӧ Йаһоԝа ле дьбә хԝәйи, чьмки Йаһоԝа һәртʹьм һʹәԝщед ԝи рʹази дькьр. Ӧса жи Даԝьд заньбу, ԝәки Йаһоԝа досте ԝи йә у жь ԝи рʹази йә. Ләма жи, әԝ баԝәр бу, кӧ Йаһоԝа ԝе тʹьме ле бьбә хԝәйи. Даԝьд баԝәрийа хԝә һʹәзкьрьна Йаһоԝа дьани, ләма жи әԝ бь зедәйи хәмгин нәдьбу, ле бәхтәԝар бу у дьле ԝи рʹьһʹәт бу (Зәбур 16:11). w24.01 29 ¶12-13

Жь хьлазийа Шәрʹе Һʹәмдьнйайейә II у паше, Шәʹдед Йаһоԝа аза мьзгини гәләк ԝәлатада бәла дькьрьн. Ахьрийеда, шьхӧле бәлакьрьна мьзгинийе пешда чу, у гәләк мәрьв Йаһоԝа нас дькьн. Иро әндәмед Кʹома Рʹебәрийе хԝә дьсперьн рʹебәрийа Иса Мәсиһ. Әԝана хирәт дькьн ԝәки әв рʹебәрийед кӧ әԝана дьдьнә хушк-бьра, ль гора хԝәстьна Хԝәде бьн. Бь сайа бәрпьрсийаред мьһале у рʹуспийа, әԝана рʹебәрийе щьвата дькьн. Рʹуспийед бь рʹӧһʹ кʹьфшкьри, дәсте Исайи рʹастеда ньн (Әʹйанти 2:1). Әв рʹуспи һәмьки гӧнәкʹар ьн у щарна шашийа дькьн. Муса, Йешу у шандийед Иса жи щарна шаши дькьрьн (Жьмар 20:12; Йешу 9:14, 15; Рʹомайи 3:23). Ле әʹйан ә кӧ Иса ньһа рʹебәрийе «хӧламе амьн» у рʹуспийед кʹьфшкьри дькә, у әԝ ԝе бәрдәԝам кә ӧса бькә. Ләма жи мәʹнийед баш һәнә кӧ әм итʹбарийа хԝә ве рʹебәрийе биньн, кӧ Иса бь сайа бьред кʹьфшкьри дьдә мә. w24.02 23-24 ¶13-14

Чахе әм хәбәрданеда мәрьварʹа дьдьнә кʹьфше, кӧ әм чьԛас Йаһоԝа һʹәз дькьн у ԝирʹа шекьрдар ьн, ӧса әм дьле ԝи ша дькьн. Гава әм хьзмәт дькьн, нета мәйә сәрәкә әԝ ә, кӧ әм али мәрьва бькьн, ԝәки әԝана жи незики Йаһоԝа бьн (Аԛуб 4:8). Әм гәләк һʹәз дькьн пе Кʹьтеба Пироз мәрьварʹа әʹйан кьн, кӧ Йаһоԝа йәки чаԝа йә, у әм ԝанрʹа дәрһәԛа һʹәзкьрьн, һәԛи, билани у ԛәԝата ԝи гьли дькьн. Ӧса жи, әм һьнге пәсьне Йаһоԝа дьдьн у дьле ԝи ша дькьн, гава чʹәʹв дьдьнә ԝи. Чахе әм ӧса дькьн, мәрьв дьвиньн, ԝәки әм жь мәрьвед ве дьнйа хьраб, щӧдә дьбьн (Мәтта 5:14-16). Чахе әм жийина һәррʹожида тʹәви мәрьва хәбәр дьдьн, әм дькарьн ԝанрʹа зәлал кьн, кӧ әм чьма ль гора Кʹьтеба Пироз дьжин. Әв йәк дькарә али мәрьвед дьлсах бькә, кӧ незики Йаһоԝа бьн. Гава әм ви щурʹәйи пәсьне Йаһоԝа дьдьн, дьле ԝи ша дьбә (1 Тимотʹейо 2:3, 4). w24.02 10 ¶7

Сәва кӧ тӧ бьби йәки гьһишти, гәрәке тӧ фәрәсәтед керһати ԛазанщ ки. Әв йәк ԝе али тә бькә, ԝәки тӧ щьватеда щабдарийа ԛәбул ки, хәбате дәст хи кӧ әʹбура малбәта хԝә бьки у һәләԛәтийа тә тʹәви кәсед дьн баш бә. Мәсәлә, хԝәндьн у ньвисандьне рʹьнд һин бә. Кʹьтеба Пироз дьбежә, кӧ мерәки бәхтәԝар у пешдачуйи, һәр рʹож Хәбәра Хԝәде дьхунә у кʹур сәр дьфькьрә (Зәбур 1:1-3). Һәрге бьра ӧса бькә, әԝе ньһерʹандьна Йаһоԝа дьһа баш фәʹм кә у һин бә, кӧ бь зәлали бьфькьрә у сафикьрьнед баш бькә (Мәтʹәлок 1:3, 4). Хушк-бьред мә һʹәԝще бьред гьһишти нә, йед кӧ дькарьн ль гора Кʹьтеба Пироз рʹебәри у ширәта бьдьн. Һәрге хԝәндьн у ньвисандьна тә баш бә, тӧйе бькарьби щабед баш бьди у готаред керһати һазьр ки. Әв йәк ԝе баԝәрийа хушк-бьра дьһа ԛәԝи кә. Ӧса жи тӧ дькари хԝәрʹа фькьред керһати бьньвиси. Әв йәк ԝе али тә бькә, ԝәки тӧ баԝәрийа хԝә һе ԛәԝи ки у мәрьвед дьн бьшьдини. w23.12 26-27 ¶9-11

Гава тьрс дькʹәвә дьле тә, кʹур бьфькьрә кӧ Йаһоԝа ԝе ахьрийеда чь бькә. Мире-щьна у мәрьвед хьраб ԝе ида тʹӧнә бьн. Дә бьдә бәр чʹәʹве хԝә, кӧ әме чьԛас ша бьн! Сәр щьвата серʹожи йа сала 2014, мә дит кӧ чаԝа тʹәмашәкеда, бавәки тʹәви малбәта хԝә дәрһәԛа ве йәке хәбәр да, кӧ һәрге 2 Тимотʹейо 3:1-5 дәрһәԛа жийина Щьнәтеда бьһата ньвисаре, рʹез ԝе ӧса буна: «Дьнйа тʹәзәда, ԝәʹдәки хԝәш ԝе бе. Чьмки мәрьв ԝе һәвдӧ һʹәз бькьн, хьзна рʹӧһʹани һʹәз бькьн, бьбьнә мәрьвед мьлук, пәсьне Хԝәде бьдьн, гӧрʹа де-баве хԝә бькьн, бьбьнә мәрьвед шекьрдар у амьн, малбәтед хԝә һʹәз бькьн, бьбьнә әʹдьлайиһʹәз, һәртʹьм дәрһәԛа кәсед дьн баш хәбәр дьн, хԝәгьрти бьн, бьбьнә мәрьвед шкәсти, херхԝаз, амьн, маԛул у мьлук, дьһа зедә Хԝәде һʹәз бькьн, нә кӧ рʹьһʹәтийе у жь дьл Хԝәдерʹа хьзмәт кьн; хԝә незики мәрьвед ӧса бьгьрә». Гәло тӧ щара дәрһәԛа жийина дьнйа тʹәзә тʹәви малбәта хԝә, йан тʹәви хушк-бьра хәбәр дьди? w24.01 6 ¶13-14

Бәрдьликә чьԛас мәзьн ә, ԝәки Йаһоԝа щьмәʹта хԝә ча кʹом ԛәбул дькә! Кʹьтеба Пироз дьбежә, кӧ Хԝәде жь щьмәʹта хԝә «рʹази йә» (Зәбур 149:4, ИМ). Ле һьнә кәс жь хԝә дьпьрсьн: «Гәло Йаһоԝа жь мьн жи рʹази йә?» Бәре жи, һьнә хьзмәткʹаред Йаһоԝа дӧдьли дьбун кӧ Йаһоԝа жь ԝан рʹази йә, йан на (1 Самуйел 1:6-10; Ибо 29:2, 4; Зәбур 51:11). Кʹьтеба Пироз әшкәрә нишан дькә, ԝәки мәрьвед ԛьсурдар дькарьн ԛәбулкьрьна Йаһоԝа бьстиньн. Гәло чь щурʹәйи? Әм гәрәке баԝәрийа хԝә Иса биньн у бенә ньхӧмандьне (Йуһʹәнна 3:16). Бь ви щурʹәйи, әм бәр мәрьва дьдьнә кʹьфше, кӧ мә гӧнед хԝә тʹобә кьрийә у соз дайә Хԝәде, кӧ әме хԝәстьна ԝи биньн сери (Кʹаред Шандийа 2:38; 3:19). Гава әм ӧса дькьн, Йаһоԝа гәләк ша дьбә. Һәрге әм хирәт бькьн кӧ хԝәйе созе хԝә бьн, Йаһоԝа ԝе жь мә рʹази бә у мә ча достед хԝә ԛәбул бькә (Зәбур 25:14). w24.03 26 ¶1-2

Һәрге дәԝләт жь мә дәʹԝа кә, ԝәки әм бәлакьрьна мьзгинийе бьдьнә сәкьнандьне, гәрәке әм мина шагьртед ԛьрʹна йәке, бәрдәԝам кьн мьзгинийе бәла кьн. Әм дькарьн баԝәр бьн, кӧ Йаһоԝа ԝе али мә бькә хьзмәтийа хԝә биньн сери. Ләма жи бона мерхаси у биланийе дӧа бькә, у ӧса жи аликʹарийе жь Йаһоԝа бьхԝазә, ԝәки һьмбәри проблема сәбьр ки. Гәләк жь мә щурʹә-щурʹә дәрда дькʹьшиньн, мәсәлә нәхԝәши, дьлтәнги, мьрьна кәсе незик, дәрдед малбәте, зӧлм, пәйкʹәтьн у чәтьнайед дьн. У тьштед ӧса ча пандәмийа у шәрʹ, дәрдед мә дьһа гьран кьрьн. Дәрәщед ӧсада Йаһоԝарʹа дӧа бькә у дьле хԝә ԝирʹа вәкә. Чаԝа тӧ һәваләки хԝәйи незикрʹа бәʹса хәм у дәрдед хԝә дьки, бь ви щурʹәйи Хԝәдерʹа жи бәʹса хәм у дәрдед хԝә бькә. Тӧ дькари баԝәр би, ԝәки Йаһоԝа Хԝәде бона тә хәм дькә (1 Пәтрус 5:6, 7). Һәрге әм тʹьме дӧа бькьн, әме «тәнгасийада сәбьр кьн» (Рʹомайи 12:12). Йаһоԝа рʹьнд занә, ԝәки хьзмәткʹаред ԝи чьԛас дәрда дькʹьшиньн, Әԝ «заринийа ԝан дьбьһе» (Зәбур 145:18, 19). w23.05 5-6 ¶12-15

Чахе әм гәрәке сафикьрьнед фәрз бькьн, әм гәрәке «бьзаньбьн кӧ чь ль Хӧдан хԝәш те» у ль гора ве йәке тьшта сафи кьн (Әфәс. 5:17). Гава әм лекʹолин дькьн, кӧ кʹижан принсипед Кʹьтеба Пироз дәрәща мәва гьредайи нә, әм нишан дькьн, кӧ әм дьхԝазьн ль гора ньһерʹандьна Хԝәде сафикьрьна бькьн. Чьԛас әм принсипед Хԝәде бьдьнә хәбате, һаԛас әме сафикьрьнед баш бькьн. Дьжмьне мә Мире-щьна дьхԝазә, ԝәки әм шьхӧлед ве дьнйайева һаԛас мьжул бьн, кӧ бона хьзмәтийа Хԝәде ида ԝәʹде мә нәминә (1 Йуһʹәнна 5:19). Һәрге әм фәсал нибьн, фькьред ве дьнйайе дькарьн сәр мә һʹӧкӧм кьн. Ахьрийеда дьбәкә әм дьһа зедә дина хԝә бьдьнә һәбуке, һинбуне, йан жи хәбата хԝә, нә кӧ хьзмәтийе. Әм гәрәке фәсал бьн ԝәки әв һʹәму тьшт жийина мәда тʹӧ щар нәбьнә тьштед һәри фәрз. w24.03 24 ¶16-17