Һʹәзиран

Йаһоԝа кʹәрәм дькьр шагьртед Иса йед кӧ ԛьрʹна йәкеда, гәләк щар рʹасти пәйкʹәтьна дьһатьн. Ԝәрә әм шеԝьр кьн, кӧ чь һатә сәре Барнабас у Паԝлосе шанди, чахе Листрайеда ԝана мьзгини бәла дькьр. Серида мәрьва бь дьлгәрми әԝана ԛәбул кьрьн. Ле паше дьжмьна «әʹлаләт данә алийе хԝә» у һьнә мәрьвед кӧ пешда Паԝлос ԛәбул кьрьбун, ԝи данә бәр кәвьра у ԝедәре һиштьн, чьмки дьфькьрин кӧ әԝ мьрийә (Кʹаред Шандийа 14:19). Ле Барнабас у Паԝлос чунә щики дьн, кӧ мьзгинийе бәла кьн. Ахьри чь бу? Ԝана гәләк мәрьв «кьрьнә шагьрт» у пе мәсәла хԝә гәләк хушк-бьра ԛәԝи кьрьн (Кʹаред Шандийа 14:21, 22). Әԝ йәк кӧ Барнабас у Паԝлос һәла һе ԝәʹде пәйкʹәтьна жи мьзгини бәла дькьрьн, гәләкарʹа кʹар ани. Һәрге әм жи шьхӧле кӧ Йаһоԝа дайә мә бь амьни биньн сери, Әԝе мә жи кʹәрәм кә. w23.04 16-17 ¶13-14

Даԝьд Пʹадша әʹмьре хԝәда рʹасти гәләк дьжмьнед хоф дьһат, у әԝи бона аликʹарийе тʹьме Йаһоԝарʹа дӧа дькьр. Даԝьд Пʹадша баԝәр дькьр, ԝәки Йаһоԝа дӧайед ԝи һьм дьбьһе һьм жи щаба ԝи дьдә. Тӧ жи дькари ве йәкеда баԝәр би. Кʹьтеба Пироз избат дькә, кӧ Йаһоԝа дькарә билани у ԛәԝате бьдә мә, ԝәки әм сәбьр кьн. Дьбәкә әԝ бь сайа хушк-бьра, йан жи бь сайа кәсед нә баԝәрмәнд, али мә бькә. Әм заньн ԝәки Йаһоԝа щаба дӧайед мә дьдә, ле щара нә ӧса чаԝа кӧ әм дьхԝазьн. Тьштед кӧ мәрʹа лазьм ьн, әԝ ԝәхта рʹастда дьдә мә. Ләма жи, һәр гав дӧа бькә у баԝәр бә, кӧ Йаһоԝа дәнге тә дьбьһе. Тӧ дькари баԝәр би, ԝәки Йаһоԝа ԝе тә бьбә хԝәйи у дьнйа тʹәзәда «хԝәстьнед дьле тә бьдә тә» (Зәбур 37:4). w23.05 8 ¶4; 13 ¶17-18

Ԝе баш бә дина хԝә бьди ԝан кʹәрәма, йед кӧ тӧ дьстини гава дьгьһижи нета хԝә. Гәло тӧ дькари дина хԝә бьди кʹижан кʹәрәма? Һәрге нета тә әв ә кӧ Кʹьтеба Пироз бьхуни, йан дӧайед хԝә баш ки, бьфькьрә кӧ әв йәк ԝе ча достийа тә тʹәви Йаһоԝа дьһа ԛәԝи кә (Зәбур 145:18, 19). Ле һәрге нета тә әв бә, ԝәки тӧ сәр һʹӧнӧрәки хԝә бьхәбьти, дина хԝә бьде кӧ әв һʹӧнӧр чаԝа али тә дькә ԝәки һәләԛәтийа хԝә тʹәви кәсед дьн һе баш ки (Колоси 3:14). Хԝәрʹа бьньвисә кӧ тӧйе чь кʹаре бьстини, гава бьгьһижи нета хԝә у тʹьме дина хԝә бьдә ве ньвисаре. Ӧса жи ԝәʹдә тʹәви ван мәрьва дәрбаз кә, йед кӧ тә һелан дькьн (Мәтʹәлок 13:20). Щара хԝәстьна мә тʹӧнә кӧ әм тьштәки бькьн. Гәло әв те һʹәсабе кӧ әм нькарьн сәр хԝә бьхәбьтьн ԝәки бьгьһижьнә нета хԝә? На. Әм жи дькарьн мәщала бьгәрʹьн кӧ бьгьһижьн нета хԝә, һәла һе ви чахи жи гава хԝәстьна мә тʹӧнә йә. Һәмьки әв йәк һеса нинә. Ле гава әм бьгьһижьн нета хԝә, әме гәләк ша бьн. w23.05 27-28 ¶5-8

Занәбуна ве йәке, кӧ әм бона сафикьрьнед хԝә щабдар ьн, али мә дькә ԝәки әм гӧнед хԝә биньн рʹуйе хԝә, шашийед хԝә рʹаст кьн у диса ван шашийа нәкьн. Һәрге әм ӧса бькьн, әме рʹәва жийинеда сәркʹәвьн. Һәрге тә сафикьрьнәкә нәбаш кьрийә, тӧ чь дькари бьки? Тьште чу нәдә ду. Ԝәʹдә у ԛәԝата хԝә сәр ве йәке хәрщ нәкә, ԝәки хԝә һәԛ дәрхи йан жи кәсед дьн сущдар ки. Дәԝса ве йәке, шашийед хԝә ԛәбул кә у ль гора дәрәща хԝә, сафикьрьнед баш бькә. Һәрге тӧ хԝә нәһәԛ дьки, бь мьлукти Йаһоԝарʹа дӧа бькә, шашийа хԝә ԝирʹа бежә у жь ԝи рʹәща бькә, кӧ әԝ бьбахшинә тә (Зәбур 25:11; 51:3, 4). Жь кәсед кӧ тә дьле ԝан ешандийә, бахшандьне бьхԝазә. Һәрге лазьм бә, жь рʹуспийа аликʹарийе бьхԝазә (Аԛуб 5:14, 15). Жь шашийед хԝә һин бә, ԝәки диса ван шашийа нәки. Һәрге тӧ ӧса бьки, тӧ дькари баԝәр би ԝәки Йаһоԝа ԝе һьндава тәда дьлрʹәʹм бә у али тә бькә (Зәбур 103:8-13). w23.08 28-29 ¶8-9

Йәһойада али Йоаш пʹадша кьр, ԝәки әԝ бьбә мәрьвәки баш. Ләма жи щаһьлтийа хԝәда, Йоаш дьхԝәст дьле Йаһоԝа ша кьра. Ле паши мьрьна Йәһойада, Йоаш дәстпекьр гӧрʹа сәрокед рʹабәр бькә (2 Дирок 24:4, 17, 18). Ԝана гӧһ нәдьда пʹехәмбәред Йаһоԝа. Бь ве йәке, ԝана дьле Йаһоԝа дешанд. Йоаш һәла һе гӧһ нәдьда Зәкәрйа жи, кӧрʹе Йәһойада, йе кӧ һьм пʹехәмбәре Йаһоԝа бу һьм жи мәрьве Йоаш бу. Йоаш Пʹадша Зәкәрйа да кӧштьне (2 Дирок 22:11; 24:19-22). Тьрса бәр Хԝәде дьле Йоашда нәмабу. Йаһоԝа готьбу, кӧ кʹе Ԝи нәфрʹәт дькә, ԝе бе нәфрʹәткьрьне (1 Самуйел 2:30). Паше, ордийа бьчʹук йа Сурйайе ордийа мәзьн йа Йоаш алт кьр у ԝи бьриндар кьрьн (2 Дирок 24:24, 25). Хӧламед Йоаш һʹәйфа Зәкәрйа һьлдан у ԝи кӧштьн. w23.06 18-19 ¶16-17

Ԝәкә 10 сал пешда, Әфәседа Паԝлос мьзгини бәла дькьр (Кʹаред Шандийа 19:1, 8-10; 20:20, 21). Әԝи хушк-бьра гәләк һʹәз дькьр у дьхԝәст али ԝан бькә, ԝәки әԝана Йаһоԝарʹа амьн бьминьн. Әфәси, кʹерʹа кӧ Паԝлос нәʹмә ньвиси, бьн һʹӧкӧме баԝәри у әʹдәтед ԛәлпда бун. Рʹабун-рʹуньштьна Әфәсийа, алийе нав-намусийеда гәләк хьраб бу. Театрада у һәла һе ԝәʹде щәжьнед религи жи, хәбәрдан дәрһәԛа тьштед бенамуси дьчу (Әфәси 5:3). Кʹьтеба Пироз дьбежә, ԝәки гәләк мәрьвед кӧ ԝедәре дьжитьн, «шәрма рʹуйе хԝә» ӧнда кьрьбун, демәк әԝана ида жь бенамусийе әʹщьз нәдьбун (Әфәси 4:17-19). Пешийа кӧ әԝана һин бун кӧ чь рʹаст ә у чь на, кьред ԝан сәр исафа ԝан һʹӧкӧм нәдькьр. Ләма жи Паԝлос гот, кӧ «әԝана фәʹмед хԝәда шуна рʹәшва чун у жь жийина Хԝәде дур кʹәтьнә». Ле һьнә мәрьвед кӧ Әфәседа дьжитьн, тәʹрийеда нәман. w24.03 20 ¶2, 4; 21 ¶5-6

Гидәон һʹакьме мьләте Исраеле бу, у сәва кӧ щабдарийа хԝә бьанийа сери, әԝ гәрәке хирәт буйа. Гава шәв әскәред Мьдйани жь шәрʹ рʹәвийан, Гидәон жь Нәԝала Йизреәле һʹәта чʹәме Урдӧне да пәй ԝан (Һʹакьмти 7:22). Гәло, гава Гидәон гьһиштә чʹәме Урдӧне, әԝи ида нәда пәй ԝан? Әԝ у 300 меред тʹәви ԝи чьԛас жи ԝәстийайи бун, дәрбази алийе дьнә чʹәме Урдӧне бун. Ԝана хԝә гиһандә Мьдйана у әԝ алт кьрьн (Һʹакьмти 8:4-12). Гидәон баԝәр бу кӧ Йаһоԝа ԝе ԛәԝате бьдә ԝи, у бь рʹасти жи Хԝәде али ԝи кьр (Һʹакьмти 6:14, 34). Щарәке, Гидәон у әскәред ԝи, ньга дабунә пәй дӧ пʹадшед Мьдйани, йед кӧ дьбәкә пе дәвәйа дьрʹәвийан (Һʹакьмти 8:12, 21). Әԝана бь аликʹарийа Хԝәде сәркʹәтьн. Рʹуспи жи дькарьн хԝә бьсперьн Йаһоԝа, йе кӧ «нә дьԝәстә, нә жи ԛәлс дьбә, ИМ». Бе шьк, Хԝәде ԝе ԛәԝате бьдә ԝан, чахе әԝана һʹәԝщә бьн (Ишайа 40:28, 29). w23.06 6 ¶14, 16

Фьрԛи тʹӧнә әм рʹасти чь чәтьнайа бен йәкә әм дькарьн мерхас бьн. Әм гәрәке итʹбарийа хԝә Йаһоԝа биньн. Ԝәрә әм дина хԝә бьдьнә сәрһатийа Барак. Әԝ йәки пешдачуйи бу, чьмки әԝи итʹбарийа хԝә рʹебәрийа Йаһоԝа дьани. Ԝе дәме, мьләте Исраел бона шәрʹ һазьр нибу. Чʹәкед ԝан жи тʹӧнә бун. Ле Йаһоԝа Баракрʹа гот, кӧ әԝ һәрʹә у мьԛабьли фәрмандаре Кәнанийа Сисәра у ордийа ԝи шәрʹ бькә, йед кӧ гәләк чʹәкед ԝан һәбун (Һʹакьмти 5:8). Жьнькәкә бь наве Дәбора, йа кӧ пʹехәмбәр бу, Баракрʹа гот кӧ әԝ дакʹәвә дәште, ԝәки мьԛабьли Сисәра у 900 әʹрәбед ԝи шәрʹ бькә. Дәштеда, ԝе гәләк чәтьн буйа кӧ Исраелийа мьԛабьли дьжмьнед пе әʹрәба шәрʹ бькьрана. Ле йәкә, Барак гӧһ да рʹебәрийа Йаһоԝа. Гава әскәред Исраели жь Чʹийайе Таборе дакʹәтьн, Йаһоԝа баранәкә ԛәԝи шанд. Әʹрәбед Сисәра һʹәрʹийеда ман, у Йаһоԝа али Барак кьр кӧ әԝ сәркʹәт (Һʹакьмти 4:1-7, 10, 13-16). Һәма бь ви щурʹәйи, һәрге әм итʹбарийа хԝә Йаһоԝа у рʹебәрийа тʹәшкиләта ԝи биньн, әме сәркʹәти бьн. w23.07 19 ¶17-18

Бе сәбьркьрьне әм нькарьн әʹмьре һʹәта-һʹәтайе бьстиньн. Мина хьзмәткʹаред Хԝәдейе бәре, әм жи гәрәке бь сәбьр һивийе бьн, һʹәта кӧ Хԝәде созед хԝә бинә сери (Ибрани 6:11, 12). Кʹьтеба Пироз һʹале мә бәрамбәри һʹале щоткʹарәки дькә (Аԛуб 5:7, 8). Щоткʹар бона чандьн у авдайина тʹохьм, гәләки дьхәбьтә, ле әԝ ньзанә кӧ тʹохьм ԝе кʹәнге шин бә. Әԝ бь сәбьр һивийа бәре әʹрде хԝә дьсәкьнә. Мина ве йәке, рʹаст ә әм «ньзаньн Хӧдане [мә] кʹижан рʹоже бе», диса жи әм шьхӧлед рʹӧһʹанида кʹар дькьн (Мәтта 24:42). Әм бь сәбьр һивийа ве рʹоже нә у баԝәр ьн, кӧ Йаһоԝа ԝе һʹәму созед хԝә ԝәʹдәда бинә сери. Һәрге сәбьра мә нәминә, дьбәкә әм бьԝәстьн у һеди-һеди жь рʹастийе дур кʹәвьн. Ӧса жи дьбәкә әм пәй ԝан тьшта кʹәвьн, кʹижан кӧ тʹәне ԝәʹдәлу дькарьн дьле мә ша кьн. Ле һәрге әм сәбьр кьн, әме һʹәта хьлазийе тәйах кьн у бенә хьлазкьрьне (Миха 7:7). w23.08 22 ¶7

Гава әм готьнед кʹьтеба Данийел 2:41-43 бәрамбәри пʹехәмбәртийед дьн жь кʹьтеба Данийел у Әʹйанти дькьн, әм фәʹм дькьн, ԝәки ньгед һʹәйкәл Империйа Англо-Америкайе йә. Иро әԝ Империйа лапә ԛәԝи йә. Данийел дәрһәԛа Империйа Һʹәмдьнйайе дьбежә, кӧ ԝе пʹарәкә «пʹадшатийе һездар [ԛәԝи] бә, йе дьн жи, ИМ» сьст бә. Гәло чьрʹа? Чьмки щьмәʹта кӧ бь симболик те һʹәсабе һʹәрʹийа сорә нәрм, сәр ԛәԝата ве Империйа Һʹәмдьнйайе һʹӧкӧм дькә у ле сьст дькә. Жь шьровәкьрьна Данийел пʹехәмбәр дәрһәԛа һʹәйкәл у илаһи дәрһәԛа ньгед ԝи, әм чәнд рʹастийед фәрз педьһʹәсьн. Йа пешьн, Империйа Һʹәмдьнйайе, демәк Англо-Америка, ԛәԝата хԝә һьнә дәрәщада нишан кьрийә. Мәсәлә, Шәрʹе Һʹәмдьнйайеда йа I у II, әԝе роләкә сәрәкә листийә. Ле паше ԛәԝата ве сьст бу, чьмки бьнәлийед ԝе дәстпекьрьн һьм мьԛабьли һәв у һьм жи мьԛабьли дәԝләте шәрʹ кьн. Йа дӧда, пешийа кӧ Пʹадшатийа Хԝәде һʹәму сәрԝертийед мәрьва кʹӧта кә, әв Империйа ԝе һе һʹӧкӧм бькә. w23.08 10-11 ¶12-13

Даԝьд щарна жь бо дәрд у проблема хәмгин дьбу (Зәбур 18:4, 5). Диса жи, һʹәзкьрьн у дьлованийа Йаһоԝа дьле ԝи рʹьһʹәт дькьр. Йаһоԝа досте хԝәйи ԝәстийайи дьбьр бәр «мергед шин, ИМ» у «авед нәрмә әʹдьл». Паши ве йәке Даԝьд диса ԛәԝат дьстанд у дькарьбу бь шабуне Йаһоԝарʹа хьзмәт кә (Зәбур 18:28-32; 23:2). Гава әм рʹасти тәнгасийа тен у дьвиньн кӧ «дьлованийа Хӧдан бедаԝи йә, рʹәʹма ԝи ԛәт» хьлаз набә, әм дьшьдьн (Луринед Йерәмйа 3:22, ИМ; Колоси 1:11). Әʹмьре Даԝьд гәләк щар дькʹәтә бьн ԛәзийе у гәләк дьжмьнед ԝи һәбун. Ле жь бо һʹәзкьрьна Йаһоԝа, әԝи хԝә бехофийеда тʹәхмин дькьр. Даԝьд пе чʹәʹве хԝә дьдит, ԝәки Йаһоԝа һʹәму дәрәщада кʹеләка ԝи йә. Ләма жи, әԝи кʹьламәкә хԝәда ӧса гот: «[Йаһоԝа, ДТʹ] әз жь һʹәму хоф-тьрса хьлаз кьрьм» (Зәбур 34:4). Һәмьки, щарна тьрс дькʹәтә дьле Даԝьд, ле һʹәзкьрьна Йаһоԝа жь һʹәму тьрсед ԝи мәзьнтьр бу. w24.01 30 ¶15-17

Жь сафикьрьнед нәбаш йед Йоаш һин бә. Паши мьрьна Кʹаһине Мәзьн, Йәһойада, Йоаш хԝәрʹа һәвалед нәбаш бьжарт (2 Дирок 24:17, 18). Әԝи сафи кьр гӧһ бьдә сәрокед Щьһудайе, йед кӧ Йаһоԝа һʹәз нәдькьрьн. Ԝе дьһа баш буйа кӧ Йоаш хԝә дури ԝан хернәхԝаза хьста. Ле сәд һʹәйф, әԝи гӧһ да ширәтед ԝанә нәбаш. Гава пьсмаме Йоаш, Зәкәрийа, хирәт дькьр кӧ ԝи вәгәрʹинә сәр рʹийа рʹаст, Йоаш әԝ да кӧштьне (2 Дирок 24:20, 21; Мәтта 23:35). Әԝи хьрабикә гәләк мәзьн кьр! Йоаш дәстпека жийина хԝәда йәки баш бу, ле паше әԝ бу йәки хԝәсәрихԝә у меркӧж. Ахьрийеда хӧламед ԝи әԝ кӧштьн (2 Дирок 24:22-25). Һәрге әԝи гӧһ бьда Йаһоԝа у кәсед кӧ Йаһоԝа һʹәз дькьрьн, жийина ԝи ԝе щурʹәки майин буйа! w23.09 9 ¶6

Иса һаш жь тьрса ԝи һәбу у заньбу, кӧ Пәтрус диса жи дькарә амьн бьминә. Ләма жи әԝи бь дьловани Пәтрусрʹа гот: «Нәтьрсә!» Готьнед Иса әʹмьре Пәтрус бь тʹәмами гӧһаст. Пәтрус у бьре ԝи Әндраԝьс шьхӧле мәʹсигьрийе һиштьн у пәй Мәсиһ чун (Маркос 1:16-18). Бона ве сафикьрьна хԝә, ԝана кʹәрәмед мәзьн стандьн. Пәтрус ча пәйчуйе Мәсиһ, бу шәʹде гәләк кʹәрәмәта. Әԝи дит, кӧ Иса ча нәхԝәша ԛәнщ дькьр, щьна дәрдьхьст у һәла һе мьрийа жи рʹадькьр (Мәтта 8:14-17; Маркос 5:37, 41, 42). Ӧса жи Пәтрусрʹа хәйаләк һатә дайине, кʹижанеда әԝи дит кӧ Иса ча Пʹадше Пʹадшатийа Хԝәде сәрԝертийе дькә. Пәтрус ве йәке тʹӧ щар бир нәдькьр (Маркос 9:1-8; 2 Пәтрус 1:16-18). Бәле, һәрге Пәтрус нәбуйа шагьрте Иса, әԝи әв тьшт ԝе ԛә нәдита. Бе шьк, Пәтрус гәләк ша бу кӧ әԝи фькьред хԝәйә негатив һьндава хԝәда алт кьр у әв һʹәму кʹәрәм дит! w23.09 21 ¶4-5

Нәʹмә хԝәйә пешьнда, Пәтрусе шанди гот кӧ бьра һʹәзкьрьна ԝә һьндава һәвда «бь дьл у щан бә», демәк әм гәрәке һазьр бьн тʹьме һәвдӧ бьбахшиньн (1 Пәтрус 4:8). Дьԛәԝьмә Пәтрус кьрә бира хԝә, кӧ чәнд сал пешда, Иса дәрһәԛа бахшандьне чәнд ширәт данә ԝи. Ԝи чахи, гава Пәтрус гот кӧ әԝе «һʹәта һʹәфт щара» бьбахшинә бьре хԝә, дьԛәԝьмә әԝи һʹәсаб дькьр, кӧ әԝ йәки гәләк дьлован ә. Ле Иса ԝирʹа гот, кӧ әԝ гәрәке 77 щара бьбахшинә бьре хԝә, демәк тʹьме (Мәтта 18:21). Һәрге тәрʹа чәтьн ә ль гора ве тʹәмийа Иса бьжийи, бәр хԝә нәкʹәвә! Әм мәрьвнә гӧнәкʹар ьн, ләма жи щара мәрʹа һеса нинә һәвдӧ бьбахшиньн. Ле гәләк фәрз ә чь жь дәсте мә те бькьн, ԝәки бьбахшиньнә хушк-бьра у әʹдьлайе тʹәви ԝан хԝәйи кьн. w23.09 29 ¶12

Чахе Уньс зьке мәʹсида бу, әԝ баԝәр бу, ԝәки Йаһоԝа ԝе гӧһ бьдә дӧайе ԝи у әʹсә ԝи хьлаз кә, чьмки әԝи бь мьлукти шашийа хԝә ани рʹуйе хԝә. Чахе мәʹсийа мәзьн Уньс авитә бәр дәве бәʹре, әԝ һазьр бу әв щабдари, кʹижан кӧ Йаһоԝа дабу ԝи, бинә сери (Уньс 2:10–3:4). Гәло щара ӧса дьбә, ԝәки тӧ жь бо чәтьнайа, гәләк бәр хԝә дькʹәви у нькари Йаһоԝарʹа дӧа бьки? Йан жи тӧ ӧса дьԝәсти, кӧ ԛәԝата тә тʹӧнә йә лекʹолине бьки? Бир нәкә, Йаһоԝа һʹале тә гәләк баш фәʹм дькә. Дӧайед тә чьԛас кьн бьн жи, тӧ дькари баԝәр би ԝәки Йаһоԝа ԝе бона тә хәм бькә (Әфәси 3:20). Һәрге тӧ жь бо сьһʹәт-ԛәԝата хԝәйә нәбаш, йан жи жь бо дьлтәнгийе нькарьби бьхуни у лекʹолина бьки, тӧ дькари гӧһ бьди аудиойа Кʹьтеба Пироз йан жи әʹдәбйәтед мә. Тӧ ӧса жи дькари сәр jw.org гӧһ бьди кʹьламед мә, йан жи видео бьньһерʹи. Чахе тӧ Йаһоԝарʹа дӧа дьки у щаба дӧайе хԝә әʹдәбйәтада дьгәрʹи, бь ве йәке тӧ мәщале дьди Йаһоԝа, ԝәки Әԝ тә ԛәԝи кә. w23.10 13 ¶6; 14 ¶9

Коне пироз у пʹарьстгәһед кӧ паше Оршәлимеда һатьнә авакьрьне, мина һәв бун. Һьндӧрʹда дӧ одә һәбун, «Щийе Пироз» у «Щийе Һәри Пироз», у ортʹа ԝанда пʹәрʹдәк һәбу (Ибрани 9:2-5; Дәркʹәтьн 26:31-33). Һьндӧрʹе Щийе Пирозда шәмдана зерʹин, ԛӧрбангәһа бона бьхуре у сьфрәкә бона нане ԛӧрбанкьри һәбу. Тʹәне изьна кʹаһинед бьжарти һәбу, кӧ бькʹәвьнә Щийе Пироз, ԝәки хьзмәтийа пироз биньн сери (Жьмар 3:3, 7, 10). Щийе Һәри Пирозда сьндоԛа пәймане һәбу, кӧ дьда кʹьфше ԝәки Йаһоԝа ԝедәре йә (Дәркʹәтьн 25:21, 22). Тʹәне изьна кʹаһине мәзьн һәбу, кӧ һәр сал Рʹожа Кʹәԝандьне пьшт пʹәрʹдева бькʹәвә Щийе Һәри Пироз (Ԛануна Кʹаһинтийе 16:2, 17). Әԝи хуна һʹәйԝанед ԛӧрбанкьри бона гӧнед хԝә у йед щьмәʹте дьани. Паше, Йаһоԝа зәлал кьр, кӧ әв һәр тьшт бь рʹасти чь те һʹәсабе (Ибрани 9:6, 7). w23.10 27 ¶12

Хәбәра Хԝәдеда гәләк щар тʹәми һатийә дайине, кӧ «һәвдӧ һʹьз бькьн» (Йуһʹәнна 15:12; Рʹомайи 13:8; 1 Тʹесалоники 4:9; 1 Пәтрус 1:22; 1 Йуһʹәнна 4:11). Һʹәзкьрьн жь дьл те, у тʹӧ кәс нькарә дьле мә бьвинә. Ле мәрьв ча дькарьн тедәрхьн, кӧ әм бь дьл у щан ԝана һʹәз дькьн? Һʹәзкьрьна мә ԝе пе готьн у кьред мә бе кʹьфше. Щурʹә-щурʹә метод һәнә, кӧ ча әм дькарьн һʹәзкьрьна хԝә хушк-бьрарʹа бьдьнә кʹьфше. Мәсәлә, Кʹьтеба Пирозда те готьне ԝәки һәвдӧрʹа «рʹастийе бежьн» (Зәкәрйа 8:16). «Һәврʹа әʹдьлайийеда бьжин» (Маркос 9:50). «Ԛәдьркьрьнеда жь һәвдӧ дәрбазтьр бьн» (Рʹомайи 12:10). «Һәвдӧ ԛәбул кьн» (Рʹомайи 15:7). Бәрдәԝам кьн «бьбахшиньнә һәв» (Колоси 3:13). «Баред һәвдӧ һьлдьн» (Галати 6:2). «Бәр дьле һәвда ԝәрьн» (1 Тʹесалоники 4:18). «Аликʹарийа һәвдӧ бькьн» (1 Тʹесалоники 5:11). «Бона һәв дӧа бькьн» (Аԛуб 5:16). w23.11 9 ¶7-8

Әм һәр рʹож сафикьрьна дькьн у бона ԝе йәке мәрʹа баԝәрийа ԛәԝи лазьм ә. Мәсәлә, әм сафикьрьнед ӧса дькьн ча бьжартьна һәвала, ԝәʹдәдәрбазкьрьне, һинбуне, зәԝаще, зарʹа у хәбате. Әм дькарьн жь хԝә бьпьрсьн: «Гәло сафикьрьнед мьн дьдьнә кʹьфше, кӧ хьлазийа ве дьнйа хьраб гәләк незик ә у зутьрәке Хԝәде ԝе тʹәмамийа әʹрде бькә щьнәт? Гәло әз мина ԝан мәрьва сафикьрьна дькьм, йед кӧ баԝәр накьн ԝәки әʹмьре һʹәта-һʹәтайе һәйә?» (Мәтта 6:19, 20; Луԛа 12:16-21). Әме бькарьбьн сафикьрьнед баш бькьн, һәрге баԝәр кьн, кӧ дьнйа тʹәзә гәләк незик ә. Ӧса жи әм рʹасти чәтьнайа тен, кʹижанада баԝәрийа ԛәԝи лазьм ә. Мәсәлә, пәйкʹәтьн, нәхԝәшийед гьран йан жи тәнгасийед дьн, дькарьн бьбьнә мәʹни кӧ әм дьлтәнг бьн. Чахе әм рʹасти тәнгасике тен, серида дьбәкә әм тәйах кьн. Ле һәрге әв тәнгаси дьреж бькʹьшинә, ԝи чахи ида баԝәрийа ԛәԝи ԝе мәрʹа лазьм бә, ԝәки әм сәбьр кьн у бь дьле ша бәрдәԝам кьн Йаһоԝарʹа хьзмәт кьн (1 Пәтрус 1:6, 7). w23.04 27 ¶4-5

Йаһоԝа дьхԝазә кӧ әм ль гора дӧайед хԝә кʹар бькьн. Мәсәлә, бьраки мә Йаһоԝарʹа дӧа дькә, ԝәки сәркʹаре хәбате изьне бьдә ԝи, кӧ һәрʹә сәр щьвата мәзьн. Йаһоԝа чаԝа дькарә щаба дӧайе ԝи бьдә? Әԝ дькарә мерхасийе бьдә бьре мә, кӧ сәркʹаре хԝәрʹа дәрһәԛа ве йәке хәбәр дә, ле бьре мә гәрәке хԝәха һәрʹә щәм сәркʹаре хԝә у хԝәстьна хԝә жерʹа бежә. Дьԛәԝьмә лазьм бә, ԝәки әԝ гәләк щар изьне жь ԝи бьхԝазә. Дьбәкә бьре мә сәркʹаре хԝәрʹа бежә, ԝәки әԝ дькарә рʹожәкә дьн бьхәбьтә, йан жи әԝ дькарә ԝи ԝәʹдәйи гава һәрʹә сәр щьвата мәзьн, һәԛе хԝә нәстинә. Йаһоԝа дьхԝазә кӧ әм бәрдәԝам кьн бона хәмед хԝә дӧа бькьн. Жь гьлийед Иса те кʹьфше, кӧ дьбәкә һьнә хԝәстьнед мә зу нәйенә сери (Луԛа 11:9). Ләма жи хирәта хԝә ӧнда нәкә! Тʹьме жь дьл дӧа бькә (Луԛа 18:1-7). Һәрге әм ӧса бькьн, Йаһоԝа ԝе бьвинә кӧ әв йәк бона мә гәләк фәрз ә. Ӧса жи әме избат кьн, кӧ әм хԝә дьсперьн аликʹарийа Йаһоԝа. w23.11 22 ¶10-11

Йаһоԝа соз дабу досте хԝә Бьраһим, кӧ әԝе һʹәму мьләтед дьнйайе бь сайа зӧрʹәта ԝи кʹәрәм кә (Дәстпебун 15:5; 22:18). Баԝәрийа Бьраһим ԛәԝи бу у әԝ дӧдьли нәдьбу, кӧ созе Хԝәде ԝе бе сери. Ле гава Бьраһим 100 сали у жьна ԝи 90 сали бу, кӧрʹе ԝан һе тʹӧнә бу (Дәстпебун 21:1-7). Диса жи Кʹьтеба Пирозда те готьне: «Бьраһим бь гӧман баԝәр кьр, кӧ әԝе бьбә баве гәләк мьләта, чаԝа һатьбу готьне» (Рʹомайи 4:18). Ахьрийеда гӧмана Бьраһим һатә сери. Әԝ бу баве Исһаԛ, кӧрʹе кӧ әԝ бь һʹьзрәт һивийе бу. Бьраһим чьрʹа баԝәр бу, кӧ Йаһоԝа ԝе созе хԝә бинә сери? Достийа Бьраһим тʹәви Йаһоԝа гәләк ԛәԝи бу. Ләма жи әԝ «ԝе йәкеда баԝәр бу, кӧ [Хԝәде] соз дайә ԝе бинә сери жи» (Рʹомайи 4:21). Йаһоԝа жь Бьраһим рʹази бу. Жь бо баԝәрийа ԝи, Хԝәде әԝ ча мәрьвәки рʹаст һʹәсаб кьр (Аԛуб 2:23). w23.12 8 ¶1-2

Хорте бь итʹбар һʹәму щабдарийед хԝә тинә сери. Иса мәсәләкә беԛьсур мәрʹа һиштийә. Әԝ йәки хирәт бу у тʹьме щабдарийед хԝә дьанин сери. Әԝ һазьр бу ԝи чахи жи щабдарийед кӧ Йаһоԝа дабу ԝи, бинә сери, гава ԝирʹа чәтьн бу. Әԝи мәрьва у илаһи шагьртед хԝә ӧса һʹәз дькьр, кӧ һазьр бу әʹмьре хԝә жи бона ԝан бьдә (Йуһʹәнна 13:1). Мина Иса хирәт бә, ԝәки һәр щабдарийед хԝә, кӧ тә стандийә, бини сери. Һәрге тӧ ньзани чь щурʹәйи щабдарийа хԝә бини сери, мьлук бә у жь бьред гьһишти аликʹарийе бьхԝазә. Щабдарийа хԝә ча лазьм ә бинә сери (Рʹомайи 12:11). Ве йәке бь дьл у щан бькә, «чаԝа бона Хӧдан, нә кӧ бона мәрьва» (Колоси 3:23). Һәмьки тӧ беԛьсур нини, ләма жи мьлук бә у шашийед хԝә ԛәбул кә (Мәтʹәлок 11:2). w23.12 26 ¶8

Гава әм тенә ньхӧмандьне у дьбьнә пʹара малбәта Йаһоԝа, әм гәләк ша дьбьн. Чаԝа Даԝьд Пʹадша готьбу: «Хԝәзи ль ԝи кӧ Тӧ [Йаһоԝа, ДТʹ] дьбьжери у незики Хԝә дьки, кӧ әԝ һʹәԝшед Тәда бьминә» (Зәбур 65:4). Сәва кӧ тӧ бьби досте Йаһоԝа, гәрәке тӧ жь дьл бьхԝази незики ԝи би (Аԛуб 4:8). Гава тӧ әʹмьре хԝә тʹәсмили Йаһоԝа дьки у тейи ньхӧмандьне баԝәр бә кӧ паши ньхӧмандьне, әԝе гәләк кʹәрәма сәр тәда бьбаринә (Малахи 3:10; Йерәмйа 17:8). Ньхӧмандьн тʹәне дәстпека хьзмәтийе йә. Тӧ гәрәке хирәт бьки ԝәки ԝәʹде тәнгаси у щерʹьбандьна жи сонда хԝә бини сери (Ԝаиз 5:4, 5). Ча шагьрте Иса, ԝе баш бә ԝәки тӧ һәр тьшти бьки, кӧ чʹәʹв бьди ԝи у гӧһ бьди тʹәмийед ԝи (Мәтта 28:19, 20; 1 Пәтрус 2:21). w24.03 8 ¶1-3

Һәрге һун у һәвалзәԝаще ԝә һʹьз накьн ԝәʹде хԝә тʹәвайи дәрбаз кьн, һун дькарьн чь бькьн? Мәсәла агьр бьдьн бәр чʹәʹве хԝә. Бона агьр ԛьршьк лазьм ьн, паше жи сәва кӧ агьр гӧрʹ бә, лазьм ә дара бавежьне. Мина ве йәке, серида һун жи дькарьн рʹоже һәма чәнд дәԛа тʹәвайи дәрбаз кьн. Тʹәвайи тьштед ӧсава мьжул бьн, чь кӧ ԝә һәрда хԝәш те (Аԛуб 3:18). Чаԝа кӧ агьр һеди-һеди гӧрʹ дьбә, һʹьзкьрьн жи дькарә гав бь гав ԛәԝи бә. Чаԝа кӧ бона агьрәки гӧрʹ у ԛәԝи оксижән лазьм ә, сәва кӧ зәԝащ жи ԛәԝи бә, ԛәдьргьртьн лазьм ә. Агьр бе оксижән дьтәмьрә. Мина ве йәке, һәрге жьн-мер ԛәдьре һәв нәгьрьн, һʹьзкьрьна нав ԝанда ԝе сар бә. Жь алийе дьнва жи, һәрге жьн-мер хирәт бькьн кӧ ԛәдьре һәв бьгьрьн, һʹьзкьрьна ԝан ԝе тʹьме ԛәԝи бә. Дьԛәԝьмә тӧ дьфькьри, ԝәки тӧ ча лазьм ә ԛәдьре жьн йан мере хԝә дьгьри. Ле фәрз әв ә, кӧ һәвалзәԝаще тә ве йәке тʹәхмин кә. w23.05 22 ¶9; 24 ¶14-15

Һьнә хьзмәткʹаред Хԝәде йед бәре жи щарна жь бо дьжмьна, йан жь бо чәтьнайа тьрс дькʹәтә дьле ԝан (Зәбур 18:4; 55:1, 5). Бь ви щурʹәйи, әм жи дькарьн мәкʹтәбеда, сәр хәбате, жь алийе малбәта хԝә, йан жь алийе дәԝләте рʹасти пәйкʹәтьна бен. Йан жи дьбәкә әм жь бо нәхԝәшикә гьран бәр мьрьне бьн. Ләма жи, дьԛәԝьмә әм хԝә бечʹарә тʹәхмин кьн. Дәрәщед ӧсада, гәло Йаһоԝа чаԝа али мә дькә? Әм гәрәке тʹьме дӧа бькьн у Кʹьтеба Пироз бьхуньн. Ӧса әме бькарьбьн дьһа зедә һәләԛәтийа хԝә тʹәви Йаһоԝа ԛәԝи кьн (Зәбур 77:1, 12-14). Һәрге әм дӧа у хԝәндьна Кʹьтеба Пироз хԝәрʹа бькьнә хәйсәт, әме рʹожед чәтьнда жи хԝә бьсперьн Йаһоԝа. Ԝәрә әм Йаһоԝарʹа бәʹса тьрс у хәмед хԝә бькьн у мәщале бьдьнә ԝи, кӧ әԝ бь сайа Ньвисаред Пироз тʹәви мә хәбәр дә у бәр дьле мәда бе (Зәбур 119:28). w24.01 24-25 ¶14-16

Сәва кӧ әм бьгьһижьн нетед рʹӧһʹани, хԝәстьн гәләк фәрз ә. Чьмки гава хԝәстьна мәйә мәзьн һәйә, әм һәр тьшти дькьн ԝәки бьгьһижьнә нета хԝә. Хԝәстьна дьле мә чьԛас мәзьн бә, һаԛас мәщал дьһа зедә дьбә, кӧ әме бьгьһижьнә нета хԝә. Ле тӧ чь дькари бьки ԝәки хԝәстьна тә зедә бә? Бона хԝәстьне дӧа бькә. Бь сайа рʹӧһʹе пироз, Йаһоԝа дькарә дьле тә ԛәԝи кә, ԝәки тӧ бьгьһижи нета хԝә. Щара әм нетәке датиньн пешийа хԝә, чьмки әм заньн кӧ гәрәке ве йәке бькьн. Ле дьбәкә хԝәстьна мә тʹӧнә йә кӧ әм бьгьһижьнә ве нете. Кʹур бьфькьрә кӧ Йаһоԝа бона тә чь кьрийә (Зәбур 143:5). Паԝлосе шанди сәр кʹәрәмед Йаһоԝа кʹур дьфькьри. Әв йәк ле һелан дькьр, ԝәки дьһа зедә Йаһоԝарʹа хьзмәт кә (1 Корьнтʹи 15:9, 10; 1 Тимотʹейо 1:12-14). Һәрге тӧ жи кʹур бьфькьри, кӧ Йаһоԝа бона тә чь кьрийә, хԝәстьна тә ԝе һе зедә бә, ԝәки бьгьһижи нета хԝә (Зәбур 116:12). w23.05 27 ¶3-5

Гава әм пәсьне наве Йаһоԝа дьдьн, әм дьле ԝи ша дькьн (Зәбур 119:108). Мәрьвед гӧнәкʹар дьхԝазьн, ԝәки кәсед дьн пәсьне ԝан бьдьн, чьмки әԝана жь ве йәке мерхасийе дьстиньн. Гәло Хԝәде жи мина ԝан һʹәԝще пәсьна йә? Һәмьки на. Гава әм пәсьне Баве хԝәйи әʹзмана дьдьн, әм избат дькьн кӧ Мире-щьна дәрәԝин ә. Мире-щьна дьбежә кӧ һәрге әм бькʹәвьнә тәнгасийе, әме Хԝәдерʹа амьн нәминьн. Хенщи ве йәке, әԝ дьбежә кӧ әм тʹәне бона кʹара хԝә Йаһоԝарʹа хьзмәт дькьн (Ибо 1:9-11; 2:4). Ле Ибо амьн ма Йаһоԝарʹа у избат кьр, кӧ Мире-щьна дәрәԝин ә. Тӧ жи дьхԝази Йаһоԝарʹа амьн бьмини? Әм гьшк жи дькарьн бь кьред хԝә наве Хԝәде пироз кьн, бь амьни ԝирʹа хьзмәт кьн у ӧса дьле ԝи ша кьн (Мәтʹәлок 27:11). Ԛәдьрәки чьԛас мәзьн ә! w24.02 8-9 ¶3-5

Паши рʹожед Муса у Йешу, Йаһоԝа һʹакьм кʹьфш кьрьн, ԝәки рʹебәрийе щьмәʹта ԝи бькьн. Паше, рʹожед пʹадшада, Йаһоԝа пʹехәмбәр кʹьфш кьрьн, ԝәки рʹебәрийе щьмәʹта ԝи бькьн. Пʹадшед амьн гӧһ дьдан ширәтед пʹехәмбәра. Мәсәлә, гава Даԝьд Пʹадша жь алийе Натʹан пʹехәмбәрда һатә ширәткьрьне, әԝи ширәта пʹехәмбәр бь мьлукти ԛәбул кьр (2 Самуйел 12:7, 13; 1 Дирок 17:3, 4). Йәһошәфат Пʹадша хԝә дьспартә рʹебәрийа Йаһазиел пʹехәмбәр, у әԝи щьмәʹта Щьһудайерʹа гот, ԝәки итʹбарийа хԝә пʹехәмбәред Хԝәде биньн (2 Дирок 20:14, 15). Гава Һьзԛийа Пʹадша кʹәтә бәлайе, әԝи жь Ишайа пʹехәмбәр аликʹари хԝәст (Ишайа 37:1-6). Чахе пʹадша пәй рʹебәрийа Йаһоԝа дьчун, ԝана кʹәрәм дьстанд, у щьмәʹт жи хԝәйкьри бу (2 Дирок 20:29, 30; 32:22). Әшкәрә бу кӧ Йаһоԝа бь сайа пʹехәмбәред хԝә рʹебәрийе щьмәʹта хԝә дькә. Ле диса жи, һʹәчʹи зәʹф пʹадша у ӧса жи гәләк Исраелийа пʹехәмбәред Йаһоԝа инкʹар дькьрьн. w24.02 21 ¶8

Мире-щьна дьхԝазә, ԝәки әм тʹәви ван мәрьва һәвалтийе бькьн, йед кӧ ԛәдьре ԛанунед Йаһоԝа нагьрьн, ԝәки әм ԛанунед Йаһоԝа бьтʹәрьбиньн. Әм гәрәке дьһа зедә фәсал бьн, чьмки иро мәрьв дькарә нә тʹәне рʹу бь рʹу, ле бь сайа интернете жи тʹәви кәсед дьн һәвалтийе бькә. Дьнйа Мире-щьна бенамусийе ча тьштәки нормал һʹәсаб дькә, ле әм заньн кӧ әв йәк ӧса нинә (Әфәси 4:19, 20). Ԝәрә әм жь хԝә бьпьрсьн: «Гәло әз хирәт дькьм кӧ бь зедәйи ԝәʹде хԝә дәрбаз нәкьм тʹәви һәвалхәбатчийед хԝә, һәвалдәрсханед хԝә йан жи тʹәви кәсед дьн, йед кӧ ԛәдьре ԛанунед Йаһоԝа нагьрьн? Һәрге һьнә мәрьв мьн ча фанатик һʹәсаб кьн жи, гәло әз диса жи һәр тьшти дькьм, ԝәки ль гора ԛанунед Йаһоԝа бьжим?» Чаԝа әм 2 Тимотʹейо 2:20-22-да дьхуньн, әм гәрәке щьватеда жи һәвала хԝәрʹа бьжберьн, чьмки һәвалед нәбаш дькарьн достийа мә тʹәви Йаһоԝа хьраб кьн. w24.03 22-23 ¶11-12

Гәло тә ԛә дайә бәр чʹәʹве хԝә, кӧ Йаһоԝа йәки чаԝа йә? Рʹаст ә, әм нькарьн Йаһоԝа пе чʹәʹве хԝә бьвиньн, ле Кʹьтеба Пироз дьбежә, кӧ әԝ мина агьр, рʹож у мәртʹале йә (Зәбур 84:11; Ибрани 12:29). Хәйала Һәзәԛел пʹехәмбәрда, һазьрийа Йаһоԝа Хԝәде мина сафире, металәкә бьрьԛок у кʹәскәсорәкә бәдәԝ те әʹйанкьрьне (Һәзәԛел 1:26-28). Йаһоԝа найе дитьне, ләма жи һьнәкарʹа зор ә баԝәр кьн, кӧ әԝ ԝана һʹәз дькә. Һьнәк жи әʹмьре хԝәда рʹасти гәләк кӧл-дәрда һатьнә, ләма жи дьфькьрьн кӧ Хԝәде ԝана һʹәз накә. Йаһоԝа һәстед ӧса фәʹм дькә у занә кӧ һьнә мәрьварʹа чьрʹа чәтьн ә незики ԝи бьн. Ләма жи, Йаһоԝа бь сайа Кʹьтеба Пироз нишан дькә, кӧ әԝ Хԝәдеки чьԛас дьлован ә. Һʹәзкьрьн һʹӧнӧре Йаһоԝайи сәрәкә йә. Ләма жи Кʹьтеба Пироз дьбежә, кӧ «Хԝәде һʹьзкьрьн ә» (1 Йуһʹәнна 4:8). Йаһоԝа һәр тьшти жь бо һʹәзкьрьне дькә. Һʹәзкьрьна Ԝи ӧса мәзьн ә, кӧ әԝ һәла һе ԝан мәрьва жи һʹәз дькә, йед кӧ ԝи һʹәз накьн (Мәтта 5:44, 45). w24.01 26 ¶1-3

Йаһоԝа хьзмәткʹаре хԝә Муса кʹьфш кьрьбу, ԝәки Исраелийа жь ԝәлате Мьсьре дәрхә. Әԝи рʹож пе «стунәкә әʹԝр» у шәв пе «стунәкә агьр» рʹебәри ԝан дькьр (Дәркʹәтьн 13:21). Муса пәй стуне дьчу, кʹижане әԝ у Исраелийа дьбьрьнә бәрбь Бәрʹа Сор. Сәр рʹе, гава щьмәʹт ида бәр бәре бу у ордийа Мьсьре пәй ԝан кʹәтьбу, әԝана тьрсийан кӧ кʹәтьнә тʹәльке. Ле әв йәк шаши нибу! Йаһоԝа бь нет әԝана пе Муса анибу ԝедәре (Дәркʹәтьн 14:2). Паше, Хԝәде әԝана бь кʹәрәмәтәкә мәзьн жь дәсте дьжмьна хьлаз кьрьн (Дәркʹәтьн 14:26-28). Паши 40 сала жи, Муса пәй стуна әʹԝр дьчу, ԝәки бәрʹийеда рʹебәрийе щьмәʹта Хԝәде бькә (Дәркʹәтьн 33:7, 9, 10). Йаһоԝа жь стуне Мусарʹа хәбәр дьда, у әԝи жи гьли у рʹебәрийед Хԝәде щьмәʹтерʹа дьготьн. Бәле, гәләк избаткьрьн һәбун кӧ Йаһоԝа пе Муса рʹебәри Исраелийа дькьр. w24.02 21 ¶4-5