Пʹадшатийа Хԝәде бона Иса Чь Те Һʹәсабе

Чаԝа готара пешийа ԝеда һатьбу готьне, жийина Исада йа лапә фәрз әԝ бу, ԝәки дәрһәԛа «Мьзгинийа Пʹадшатийа Хԝәде» гьли кә у бәла кә (Луԛа 8:1). Иса тʹәмамийа Исраеледа бь сәда километьра рʹе дьчу, сәва кӧ дәрһәԛа Пʹадшатийа Хԝәде мәрьва һин кә. Чар кʹьтебед пешьнә Инщилда, кʹидәре кӧ ньвисар ә дәрһәԛа хьзмәтийа Иса сәд щар зедәтьр дәрһәԛа Пʹадшатийа Хԝәде те готьне. Жь ԝана гәләк, хәбәрдана Исада һатийә готьне. У әв пʹарәкә бьчʹук ә жь ве йәке, чь кӧ әԝи дәрһәԛа Пʹадшатийа Хԝәде дьгот (Йуһʹәнна 21:25).

Чьрʹа Пʹадшати бона Иса һаԛас фәрз бу, чахе әԝ сәр әʹрде бу? Мәʹник әԝ бу, ԝәки әԝи заньбу, кӧ Хԝәде әԝ кʹьфш кьрийә ча сәрԝер (Ишайа 9:6; Луԛа 22:28-30). Ле Иса пәй һʹӧкӧмәтийе нәдькʹәт у наве хԝә нәдьгәрʹийа (Мәтта 11:29; Марԛос 10:17, 18). Әԝи нә жь бо кʹара хԝә пьштгьрийа Пʹадшатийе дькьр. Иса дькʹәвә һʹәйра Пʹадшатийеa, чьмки занә ԝе чь бькә бона һʹьзкьрийед хԝә, демәк бона Баве хԝәйи әʹзмана у пәйчуйед хԝә.

ПАДШАТИ ԜЕ БОНА БАВЕ ИСА ЧЬ БЬКӘ

Иса Баве хԝәйи әʹзмана гәләк һʹьз дькә (Мәтʹәлок 8:30; Йуһʹәнна 14:31). Әԝ фьрнаԛ дьбә һәстед Баве хԝәрʹа, һʹьзкьрьна ԝирʹа, дьлшәԝатийа ԝирʹа у һәԛийа ԝирʹа (Ԛануна Дӧщари 32:4; Ишайа 49:15; 1 Йуһʹәнна 4:8). Бешьк, Иса нәфрʹәт дькә ԝан дәрәԝа, йед кӧ һатьнә бәлакьрьне дәрһәԛа Баве ԝи. Мәсәлә кӧ Хԝәде һьндава дәрдед мәрьвада бехәм ә у кӧ әԝ дьхԝазә мәрьв бьчәрчьрьн. Мәʹник әԝ ә кӧ Иса чьрʹа ӧса бь хирәт дәрһәԛа «Мьзгинийа Пʹадшатийе» бәла дькьр. Әԝи заньбу, ԝәки ԝәʹдә шунда Пʹадшати ԝе наве Баве ԝи тʹәмьз кә жь дәрәԝа (Мәтта 4:23; 6:9, 10). Ле ԝе чь щурʹәйи әве йәке бькә?

Йаһоԝа ԝе бь сайа Пʹадшатийе бона кʹара инсанәте гӧһастьнед мәзьн бькә. Әԝ ԝе жь чʹәʹвед мәрьвед амьн «һʹәму һесьред ԝан паԛьж кә». Йаһоԝа ԝе мәʹнийа ԝан һесьра бьдә һьлдане, демәк «иди мьрьне тʹӧнәбә, нә шин, нә гьри» (Әʹйанти 21:3, 4). Хԝәде ԝе бь сайа Пʹадшатийе, һʹәму кӧл-дәрдед мәрьва бьдә һьлдане.b

Ньһа фәʹмдари йә, кӧ Иса чьрʹа ӧса дькʹәтә һʹәйра ԝе йәке ԝәки дәрһәԛа Пʹадшатийе мәрьварʹа гьли кә! Әԝи заньбу ԝәки Пʹадшатийа Хԝәде, ԝе бь рʹасти әʹйан кә, кӧ Баве ԝи чьԛас Һьмзор ә у дьлшәԝат ә (Аԛуб 5:11). Иса ӧса жи заньбу, ԝәки Пʹадшатийа Хԝәде ԝе кʹаре бинә ԝан мәрьварʹа, кʹижана кӧ әԝ һʹьз дькә, демәк йед амьнрʹа.

ПʹАДШАТИ ԜЕ БОНА МӘРЬВЕД ХԜӘДЕРʹА АМЬН ЧЬ БЬКӘ

Иса пешийа кӧ бьһата сәр әʹрде, гәләк ԝәʹдә тʹәви Баве хԝә ль әʹзмен дьжит. Бав тʹәви Кӧрʹе хԝә һʹәму тьшт чекьрийә. Мәсәлә, әʹзмане бәдәԝ кӧ бь стәйрка у галактика тʹьжә йә. У ӧса жи планета мәйә бәдәԝ, сәр кʹижани тʹьжә бинбәр у шинкайи нә (Колоси 1:15, 16). Ле дьһа зәʹф Иса мәрьварʹа ша дьбу (Мәтʹәлок 8:31).

Иса ԝәʹде хьзмәтийа хԝәйә сәр әʹрде жи һьндава мәрьвада һʹьзкьрьн дьда кʹьфше. Иса жь дәстпека хьзмәтийа хԝәйә сәр әʹрде, әʹйан нишан кьр, ԝәки һатийә сәр әʹрде сәва кӧ мьзгинийе бьдә фәԛира у һесира (Луԛа 4:18). Иса дәрһәԛа аликʹарийе нә кӧ тʹәне хәбәр дьда, ле һе зедә тьшт дькьр. Әԝи диса у диса һьндава мәрьвада һʹьзкьрьн дьда кʹьфше. Мәсәлә чахе әʹлаләта мәзьн тʹоп бу, ԝәки гӧһ бьдьнә ԝи, «гӧне ԝи ль ԝан һат, у нәхԝәшед ԝан ԛәнщ кьрьн» (Мәтта 14:14). Чахе мерәк кӧ жь нәхԝәшийа гьран дьчәрчьри, баԝәрийа хԝә әʹйан кьр, ԝәки Иса һәрге бьхԝазә ԝе бькарьбә ԝи ԛәнщ кә, дьле Иса сәр ԝи шәԝьти. Иса ԝи мерькирʹа гот: «Әз дьхԝазьм. Паԛьж бә!» (Луԛа 5:12, 13). Ле чахе Иса дит, ԝәки Мәрйәм шина бьре хԝә Лазар дькә, «кʹәсәра кʹур һате у дьле ԝи ешийа», һьм жи «Иса гьрийа» (Йуһʹәнна 11:32-36). Паше әԝи тьштәки әʹщебмайи кьр. Әԝи Лазаре кӧ ида чар рʹож бу мьрьбу, жь мьрьне рʹакьр (Йуһʹәнна 11:38-44).

Бешьк Иса заньбу, ԝәки әԝ кʹара кӧ әԝи дьани ԝәʹдәлу йә. Әԝи фәʹм дькьр ԝәки зу йан дәрәнг, әԝ һʹәмушкед кӧ әԝи ԛәнщ дькьр, ԝе диса нәхԝәш кʹәвьн у әԝед кӧ әԝи жь мьрьне рʹадькьр, ԝе диса бьмьрьн. Ле Иса ӧса жи заньбу, ԝәки Пʹадшатийа Хԝәде ԝе сәр һʹәта-һʹәтайе нәхԝәшийа у мьрьне бьдә һьлдане. Ләма жи Иса нә кӧ тʹәне кʹәрәмәт дькьрьн, ле «Мьзгинийа Пʹадшатийе» бь хирәт бәла дькьр (Мәтта 9:35). Кʹәрәмәтед ԝи дьданә кʹьфше ԝәки зутьрәке, Пʹадшатийа Хԝәде ԝе чь бькә сәр тʹәмамийа әʹрде. Дина хԝә бьдьне, Кʹьтеба Пироз чь соз дьдә дәрһәԛа ԝи ԝәʹдәйи.

• 

  Нәхԝәши ԝе ида тʹӧнә бьн.

  «Ԝе гаве ԝе чʹәʹвед корʹа вәбьн, гӧһед кәра жи вәбьн. Ԝе гаве ԝе зьламе кӧләк ԝәк хәзале бьпәнгьзә. Зьмане лал бь шаһи бьԛирʹә». Хенщи ԝе йәке, «ԝе тʹӧ рʹуньштийе ль ԝьр нәбежә: ‘Әз нәхԝәш ьм!’» (Ишайа 33:24; 35:5, 6, ИМ).

• 

  Мьрьн ида ԝе тʹӧнә бә.

  «Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29).

  «Бәле ԝе мьрьне һәр у һәр даԛӧртинә. Ԝе Рәб Хӧдан һесьред чʹәʹва, жь һʹәму рʹуйа паԛьж бькә» (Ишайа 25:8, ИМ).

• Мьри ԝе жь мьрьне рʹабьн.

  «Һʹәмуйед тʹьрбада ԝе дәнге ԝи бьбьһен . . . рʹабьн» (Йуһʹәнна 5:28, 29).

  «Һʹәму һәԛ у нәһәԛе жь мьрьне рʹабьн» (Кʹаред Шандийа 24:15).

• 

  Иди мәрьв ԝе бе щи-сьтʹар у бе хәбат нибьн.

  «Ԝе мала чекьн у ле рʹунен, ԝе рʹеза дайньн у фекийе ԝан бьхԝьн. Ԝе кәсед дьн ль малед кӧ ԝан чекьрьнә рʹунәнен. Ԝе кәсед дьн жь рʹезед кӧ ԝан данийә нәхԝьн. . . . Кәсед мьн һьлбьжартьн, ԝе бь тʹәваһи кʹефа кʹаред дәсте хԝә бькьн» (Ишайа 65:21, 22, ИМ).

• 

  Шәрʹ-дәʹԝ ида ԝе тʹӧнә бьн.

  «Шәрʹа дьдә сәкьнандьне, һәр чар ԛӧлбед дьнйайе» (Зәбур 46:9).

  «Мьләт ԝе шур һьлнәкʹшинә сәр мьләт у әԝана тʹӧ щар ԝе һин нәбьн кӧ шәрʹ кьн» (Ишайа 2:4, ДТ).

• 

  Кемасийа хԝарьне ԝе тʹӧнә бә.

  «Бьра әʹрд бәʹре хԝә бьдә. Хԝәде дӧа ль мә бькә, Хԝәдейе мә» (Зәбур 67:6).

  «Бьра гәньме ԝәлет бьбә бьрʹ-бәʹр, дәрәмәтед ԝи сәре чʹийа бьһʹәжьн» (Зәбур 72:16).

• Кʹәсиббун ԝе тʹӧнә бә.

  «Чьмки фәԛире һʹәта хьлазийе нәйе биркьрьне» (Зәбур 9:18).

  «Әԝ йе кʹәсиб хьлаз дькә, кӧ гази дьке у йе бәләнгаз кӧ кʹомәкдаре ԝи тʹӧнә йә. Дьле ԝи ль бетʹаԛәт у кʹәсиба дьшәԝьтә у нәфса бәләнгаза хьлаз дькә» (Зәбур 72:12, 13).

Гава әм ван соза дьхуньн, әм фәʹм дькьн ԝәки чьрʹа Пʹадшатийа Хԝәде бона Иса ӧса фәрз ә. Чахе Иса сәр әʹрде бу, әԝи бь хирәт дәрһәԛа Пʹадшатийа Хԝәде һʹәмушкарʹа гьли дькьр, чьмки заньбу ԝәки тʹәне Пʹадшатийа Хԝәде дькарә һʹәму проблема жь бо чь инсанәт дьчәрчьрә, бьдә һьлдане.

Созед кӧ Пʹадшатийа Хԝәдева гьредайи нә, дьле ԝә дьгьрьн? Һәрге әре, һун ча дькарьн дәрһәԛа Пʹадшатийе һе зедә пебьһʹәсьн? У һун чь дькарьн бькьн, ԝәки ԝан кʹәрәма бьстиньн, йед кӧ әв Пʹадшати тинә. Готара пашьнә ве рʹеза готаре, ве щаба ве пьрсе бьдә.