ПЬРСЕД ХԜӘНДӘВАНА

Чаԝа али ԝан хушк у бьра бькьн, йед кӧ жь бина парфӧме хьраб дьбьн?

Әԝед кӧ тәйах накьн жь бина парфӧме рʹасти чәтьнайа тен. Әԝана һәр рʹож рʹасти щурʹә-щурʹә мәрьвед нә нас тен, ләма жи әԝана дьхԝази нәхԝәзи дькʹәвьнә дәрәщед ӧса, кӧ бина парфӧме ԝана әʹщьз дькә. Һьнәк хушк у бьред кӧ проблема ԝанә ӧса һәйә, жь хушк бьред дьн һиви кьрьн, кӧ чахе тенә сәр щьвата у щьватед мәзьн, һәгәр те стандьн парфӧме нәдьнә хәбате.

Фәʹмдари йә кӧ әм ча Мәсиһи нахԝазьн, ԝәки сәр щьвата хушк бьра йан жи кәсәки дьн, жь бо мә әʹщьз бьн. Мәрʹа гьшкарʹа лазьм ә дьлгәрьмкьрьн у ԛәԝикьрьн, у нета щьвата жи һәма ве йәкеда нә (Ибрани 10:24, 25). Ләма жи, һәгәр кәсәк жь бо бина парфӧме ӧса әʹщьз дьбә кӧ чәтьн ә бе щьвате, гәрәке аликʹарийе бьхԝазә жь рʹуспийа. Һәгәр рʹуспи дәрһәԛа хәбьтандьна парфӧме ԛануна чекьн, әԝ нә рʹастә у нә ль сәр һʹиме Кʹьтеба Пироз ә. Ле рʹуспи дькарьн хушк у бьрарʹа дәрһәԛа проблема жь бо бина парфӧме гьли кьн, сәва кӧ әԝана һе рʹьнд ԝан хушк у бьра фәʹм бькьн, йед кӧ жь бо бина парфӧме әʹщьз дьбьн. Демәк һәгәр һʹәԝщә йә, рʹуспийед щьвате дькарьн ԝәʹде щьвата ԛӧльхийе дәрһәԛа ве йәке хәбәрдьн ль сәр һʹиме әʹдәбйәтәкә мә, йан жи бь тактики бона ве йәке әʹлам кьн.a Ле рʹуспи гәрәке әʹламәтийа ӧса гәләк щар нәкьн. Ль сәр щьватед мә ӧса жи һәнә меван у әԝед кӧ һин дьбьн, у әм нахԝазьн ԝана бьдьнә хәйдандьне. Әм ӧса жи нахԝазьн бьдьнә хәйдандьне ԝан мәрийа, йед кӧ парфӧме бь фәсали дьдьнә хәбате.

Һәгәр дь щьватеда һәнә мәрийед ӧса, йед кӧ жь бо парфӧме әʹщьз дьбьн, у дь щьватеда щи һәйә кӧ әԝана башԛә рʹунен, ԝи чахи рʹуспи гәрәке бона ԝан хәм бькьн ԝәки щи бьдьнә ԝан. Мәсәлә, һәгәр дь Ода Щьватеда һәйә отʹах кʹидәре кӧ бәрнама щьвате дькарьн бьбьһен, хушк бьред ӧса дькарьн ль ве дәре рʹунен. Һәгәр әв йәк жи найе стандьн, рʹуспи дькарьн хәм бькьн, ԝәки аудио ньвисандьн йа бәрнама щьвате чекьн у бьдьнә ԝан, йан жи бь телефоне бәрнама щьвате ԝанарʹа бьдьнә бьһистьн. Демәк ӧса али ԝан бькьн, чаԝа кӧ али ԝан дькьн йед кӧ нькарьн мал дәрен.

Һәгәр әм дина хԝә бьдьн сәр «Ԛӧльхкьрьна Мәйә Пʹадшатийе», йед кӧ ԝан пашԝәхтийа дәртен, әме бьвиньн кӧ гәләк щар әм тенә һеланкьрьне ԝәки ль сәр щьватед мәзьнә серʹожи, әм хԝә бьгьрьн жь хәбьтандьна парфӧме. Бь ве йәке, әм хәм дькьн бона ԝан, йед кӧ жь бина парфӧме әʹщьз дьбә. Чьмки щьватед мәзьн һәчʹи зәʹф дь ода дадайида дәрбаз дьбьн у һәԝа жи рʹьнд нализә, ләма жь хушк бьра те һивикьрьн кӧ әԝана чьԛас дькарьн лап кем бьдьнә хәбате парфӧме. Илаһи әв йәк фәрз ә ль сәр щьвата мәзьн ә серʹожи, чьмки одә мәзьн ә у отʹахед башԛә жи тʹӧнәнә, кӧ мәрийед бь проблема парфӧме башԛә бьдьнә рʹуньштандьне. Ле әԝ ԛәйдә дь щьватеда һьндьк те хәбьтандьне, у гәрәке нәбә ԛанун.

Әм ль ахьрийа ве дьнйайе дьжин, у һе зедә сәр хԝә тʹәхмин дькьн чәтьнайед жь бо нәԛәдандибуне. Ләма жи әм гәләк дьшекьриньн ԝан хушк бьра, йед кӧ һʹәму тьшти дькьн сәва кӧ әʹмьре мәйи ӧса жи чәтьн һьнәки һеса кьн. Әԝана дьбәк жи лап нәдьнә хәбате парфӧме, сәва кӧ әʹщьз нәкьн ԝана кʹе те щьвате. Бәле, һʹьзкьрьна һʹәлал ԝе мә һелан кә һәма ӧса жи бькьн.

Гәло һәнә канийе ве дьнйайе кӧ избат дькьн, ԝәки Пилатойе Понтийо һәбуйә?

Хԝәндәванед Кʹьтеба Пироз, Пилатойе Понтийо нас дькьн чаԝа кәсәки кӧ дь шьхӧле диԝанкьрьн у дардакьрьна Исада, рʹоләкә мәзьн листийә (Мәтта 27:1, 2, 24-26). Ле ӧса жи наве ԝи дь гәләк ньвисаред иройинә дәрһәԛа тʹәрихийа дьнйайеда һәйә. Фәрһәнгәкеда һатийә ньвисаре, ԝәки ньвисаред тʹәрихийе дьһа зәʹф у һур бь һур гьли дькьн дәрһәԛа Пилато, нә кӧ дәрһәԛа сәрԝеред майин йед кӧ сәр Щьһуйа бун (The Anchor Bible Dictionary).

Наве Пилато гәләк щар һатийә ньвисаре бь Усьве Флавиус тʹәрихзане Щьһу, кʹижани кӧ дь дирока хԝәда гьли кьрийә дәрһәԛа се чәтьнайед һʹимли, йед кӧ рʹасти Пилато һатьнә ԝәʹде сәрԝертийа ԝи. Ле дәрһәԛа чәтьнайа чара, кʹижан кӧ рʹасти Пилато һатийә ԝәʹде сәрԝертийа ԝи, гьли дькә тʹәрихзан Филон. Һьн жи, тʹәрихзане рʹоме Татсит, кʹижани кӧ дирока императоред Рʹоме ньвисийә, избат дькә кӧ ԝәʹде сәрԝертийа Тибәриуса, Пилатойе Понтийо фәрмана кӧшьтьна Иса дайә.

Дь сала 1961, Ԛәйсәрйайеда (Исраел) дь театра Рʹомейә кәвьнда, ԝәʹде кʹолане, археолога сәле кәвьр дитьн, кʹижан кӧ йе авайе кәвни Тибериум бу. Ль сәр ви кәвьри наве Пилатойе Понтийо бь һәрфе латини ньвисар бу. Әв ньвисар (жере) пʹарәкә жь ԝе тексте бу, кʹижан кӧ дьбәкә ӧса дьһатә хԝәндьне: «Префекте Щьһу Пилатойе Понтийо, Тибериум тʹәсмили хӧданед хԝәйиԛәдьр кьр». Ча те кʹьфше авайе Тибериум, һатьбу авакьрьне ча парсьтгәһ бона императоре Тибериусе.

Гәло чахе хушк тʹәви кәсәки һинбуна Кʹьтеба Пироз дәрбаз дькә у бьре нәньхӧманди кʹеләка ԝе йә, әԝ гәрәке сәре хԝә гьредә йан на?

Дь «Бьрща Ԛәрәԝьлийеда» йа сала 2002, 15 Тирмәһе, дь рубрика «Пьрсед Хԝәндәванада» һатьбу готьне, кӧ чахе хушк һинбуна Кʹьтеба Пироз дәрбаз дькә у бьре ньхӧманди йан жи нәньхӧманди кʹеләка ԝе йә, әԝ гәрәке сәре хԝә гьредә. Дәрһәԛа ве пьрсе ньһа әме пебьһʹәсьн ԝәки һьнә тьшт һатьнә гӧһастьне.

Һәрге хушк һинбуна Кʹьтеба Пироз дәрбаз дькә у бьре ньхӧманди кʹеләка ԝе йә, әԝ гәрәке сәре хԝә гьредә. Бь ве йәке хушк дьдә кʹьфше ԛәдьр һьндава принсипа сәрԝертийе, кʹижан кӧ Йаһоԝа кʹьфш кьрийә дь щьватеда, чьмки ча ԛәйдә йә, дь щьватеда һинкьрьн борщдарийа бьра йә (1 Корьнтʹи 11:5, 6, 10). Ле һәрге фәрәсәте бьра һәйә у дькарә һинбуна Кʹьтеба Пироз дәрбаз кә, хушк дькарә һиви ԝи бькә кӧ әԝ дәрбаз кә.

Алийе дьнва жи, һәрге хушк һинбуна Кʹьтеба Пироз дәрбаз дькә у кʹеләка ԝе бьре нәньхӧманди йә, у мере ԝе нинә, бь Кʹьтеба Пироз әԝ борщдар нинә кӧ сәре хԝә гьредә. Ле исафа һьнә хушка, ԝан һелан дькә ԝәки ве дәрәщеда жи сәре хԝә гьредьн.