Хәмгини ДәрһәԚа Малбәте

Щанет гьли дькә: «Паши мьрьна баве мьн, малхе мьн мьнрʹа гот кӧ әԝи жьнәкә дьн хԝәрʹа дитийә. Паше, әԝи мәрʹа пешда нәгот ԝәки дьчә у ньшкева кʹьнще хԝә тʹоп кьр, ԛә хатре хԝә жи жь мә нәхԝаст, у ӧса әз тʹәви дӧ зарʹа һиштьм у чу». Щанете дәстпекьр бьхәбьтә, ле һәԛе ԝе тʹера кредита мале нәдькьр. Хенщи хәмгинийа бона пʹәра, әԝ рʹасти проблемед дьн жи һат. Щанет гьли дькә: «Әз гәләк дьлтәнг дьбум жь бо щабдарийед хԝәйә тʹәзә, кʹижан кӧ мьн гәрәке тʹәне бькьра. Мьн хԝә нәһәԛ дькьр, чьмки мьн һаԛас нькарьбу бона зарʹед хԝә бькьра, чаԝа кӧ де-бавед дьн дькьрьн. У һʹәта ньһа әз бәрхԝәдькʹәвьм жь бо ԝе йәке, кӧ мәрьв ча сәр мьн у зарʹед мьн дьньһерʹьн. Дьбәк әԝана дьфькьрьн, кӧ мьн һʹәму тьшт нәкьр, сәва кӧ зәԝаща хԝә хԝәй кьм?».

Дӧакьрьне али Щанете кьр, кӧ хԝә дәсте хԝәда бьгьрә у һәләԛәтийа хԝә тʹәви Хԝәде хԝәй кә. «Шәв мьнрʹа гәләк чәтьн ә, чахе дәнг тʹӧнә әз дькʹәвьмә мьтала у ащьз дьбьм. Сәва кӧ рʹьһʹәт рʹазем, дӧакьрьн у хԝәндьна Кʹьтеба Пироз али мьн дькьн. Әз зәʹф һʹьз дькьм рʹезед жь Филипи 4:6, 7, кʹидәре кӧ те готьне: ‹Бона тʹӧ тьшти хәм нәкьн, ле хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә. У әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә . . . хԝәй кә›. Мьн гәләк шәв бь дӧакьрьне дәрбаз кьрьнә у мьн тʹәхмин дькьр, кӧ чаԝа әʹдьлайа кӧ Йаһоԝа мьнрʹа дьдә, мьн дьлгәрм дькә».

Бона һʹәму щурʹә хәмгинйа, али мә дькә гьлийед кӧ Иса сәр чʹийайе Сәрмоне готьбу: «Бәри хԝәстьна ԝә, Баве ԝә занә чь ԝәрʹа лазьм ә» (Мәтта 6:8). Тʹәне лазьм ә кӧ аликʹарийе жь ԝи бьхԝазьн. Дӧакьрьн гәләк фәрз ә, чьмки бь ԝе әм дькарьн незики Хԝәде бьн, у әԝ жи незики мә дьбә (Аԛуб 4:8).

Рʹаст ә әм бь дӧакьрьне дьлрʹьһʹәт дьбьн, чьмки әм хәмгинийа хԝә Йаһоԝарʹа гьли дькьн, ле дӧакьрьн диса кʹарәкә мәзьн тинә. Йаһоԝа Хԝәдайе кӧ «дӧайа дьбьһизә», али ԝан дькә кʹе баԝәрийа хԝә ԝи тинә (Зәбур 65:2, ИМ). Ләма жи Иса пәйчуйед хԝә һин дькьр кӧ «һәр гав дӧа бькьн у ащьз нәбьн» (Луԛа 18:1). Әм гәрәке тʹьме жь Хԝәде рʹебәрийе у аликʹарийе бьхԝазьн, у итʹбарийа хԝә ԝи биньн, кӧ әԝ жь бо баԝәрийа мә ԝе мә кʹәрәм кә. Әм тʹӧ щар гәрәке дӧдьли нәбьн, кӧ Хԝәде дьхԝазә у ԛәԝата ԝи жи һәйә сәва кӧ али мә бькә. У чахе әм «һәр гав дӧа» дькьн, әԝ йәк әʹйан дькә кӧ баԝәрийа мәйә ԛәԝи һәйә (1 Тʹесалоники 5:17).

ЧЬ ТЕ ҺʹӘСАБЕ БАԜӘРИЙА МӘ ҺӘБӘ?

Бь рʹастийе чь те һʹәсабе баԝәри? Чахе әм Хԝәде нас дькьн чаԝа кәс, әԝ йәк дькʹәвә нава баԝәрийе (Йуһʹәнна 17:3). Әм жь Кʹьтеба Пироз дькарьн Хԝәде нас кьн, чьмки теда фькьред ԝи ньвисар ьн. Әм ӧса жи жь Кʹьтеба Пироз педьһʹәсьн, кӧ Хԝәде мә һәр кәси дьвинә, у дьхԝазә али мә бькә. Ле баԝәрийа рʹаст әԝ һе зедә йә, нә кӧ тʹәне занәбуна дәрһәԛа Хԝәде. Баԝәрийа рʹаст әԝ ә, чахе һәләԛәтийа мә тʹәви ԝи незик ә, чаԝа тʹәви дост. Ле чаԝа әм нькарьн рʹожәкеда тʹәви мәрьва бьбьнә дост, ӧса жи әм нькарьн рʹожәкеда бьбьнә досте Хԝәде. Баԝәрийа мә һьндава Хԝәде ԛәԝи дьбә ԝи чахи, чахе әм һе зедә дәрһәԛа ԝи педьһʹәсьн. Ӧса жи чахе әм «һәр гав кьрьнед кӧ ԝи хԝәш тен» дькьн, әм дьвиньн кӧ әԝ ча али мә дькә (2 Корьнтʹи 10:15; Йуһʹәнна 8:29). Баԝәрийа Щанете һәма ӧса бу, у әве йәке али ԝе дькьр, кӧ пʹьрʹ хәмгин нәбә.

Щанет дьбежә: «Баԝәрийа мьн бь ԝе йәке ԛәԝи дьбу, чахе мьн һʹәму дәрәщада дәсте Йаһоԝа дьдит. Әз тʹәви зарʹед хԝә гәләк щар рʹасти нәһәԛийа дьһатьм, у мә ньзаньбу чаԝа сафи кьн. Ле чахе мьн тʹьме Йаһоԝарʹа дӧа дькьр, әԝи рʹекә ӧса мәрʹа вәдькьр, кӧ ԛә һʹьше мәрʹа дәрбаз нәбьбу. Чахе әз ԝирʹа дӧа дькьм, у рʹазибуна хԝә ԝирʹа дьдьмә кʹьфше, тʹьме дькʹәвә бира мьн кӧ әԝи бона мьн чьԛас зәʹф кьрийә. Хԝәде тʹьме ԝәʹдәда али мә дькьр. Әԝи пʹешкʹеш дайә мьн һәвалед рʹаст, демәк хушк-бьред Мәсиһи, кʹижан кӧ тʹьме һазьр ьн али мьн бькьн у һьн жи мәсәлед баш ьн бона зарʹед мьн».a (Бьньһерʹә спартьн.)

«Әз ньһа һе рʹьнд фәʹм дькьм, кӧ чьрʹа Йаһоԝа Малахи 2:16-да дьбежә кӧ әԝ һәвԛәтандьне нәфрʹәт дькә. Чахе мер йан жьн нәмамийе дькә, әԝ йәк ешәкә мәзьн тинә. Рʹаст ә ида гәләк ԝәʹдә дәрбаз буйә кӧ малхе мьн жь мьн ԛәтийайә, ле һʹәта ньһа әз хԝә тʹәне тʹәхмин дькьм у мьн тʹьре әз кери тьштәки найем. Чахе фькьред ӧса тенә һʹьше мьн, әз дьхәбьтьм кӧ али кәсәки бькьм, у паше бь ве йәке әз хԝә баш тʹәхмин дькьм». Щанет принсипа жь Кʹьтеба Пироз дьдә хәбате, демәк әԝ хԝә жь мәрьва дур нагьрә, у бь ԝе йәке әԝ пʹьрʹ хәмгин набә.b (Бьньһерʹә спартьн.) (Мәтʹәлок 18:1).

«Дьлбиникә гәләк мәзьн ә бона мьн, кӧ әз заньм ԝәки Хԝәде баве етʹима йә у сьтʹара жьнәбийа йә. Әԝ тʹӧ щар ԝе мә нәһелә, ча кӧ малхе мьн әм һиштьн» (Зәбур 68:5). Щанет занә кӧ Хԝәде хьрабийеда мәрьва нащерʹьбинә. Ле дәԝсе, әԝ «бь мәрʹдани» биланийе у «ԛәԝате» дьдә мә гьшка, сәва али мә бькә кӧ хәмгин нәбьн (Аԛуб 1:5, 13; 2 Корьнтʹи 4:7).

Ле һәрге әм жь бо ԛәзийа хәмгин дьбьн?