Хәмгини Жь Бо Ԛәзийа

Алона гьли дькә: «Чахе әз дәнге сирена дьбьһем, дьле мьн дькʹӧтә, у әз дьрʹәвьм щики сьтʹар дьбьм, ле йәкә һеса набьм. Ле һе хьраб әԝ ә, чахе әз дәрва мә у тʹӧ щи-сьтʹаре нькарьм бьвиньм. Щарәке әз дәрва бум у дәнге сирена кʹәтә гӧһе мьн. Жь тьрсе мьн дәстпекьр бьгьрим у бина мьн чʹькийа. Чәнд сьһʹәт дәрбаз бу, у әз һьнәки сәр һʹьше хԝәда һатьм, ле ньшкева диса дәнге сирене дәстпебу».

Шәрʹ әԝ тʹәне ԛәзийак ә, ле һәнә диса гәләк ԛәзи. Мәсәлә, һәрге тӧ ньшкева пебьһʹәси кӧ нәхԝәшийа тә йан жи йа мәрьвед тәйи незик һәйә, кʹижан кӧ бәрбь мьрьне дьбә, әԝ йәк бона тә дькарә ӧса бә, чаԝа кӧ бомба жь әʹзман бькʹәвә. Һьнәк жи бәрхԝәдькʹәвьн чьмки дьтьрсьн кӧ ахьри ԝе ча бә. Әԝана хәмгин дьбьн: «Гәло дьбәкә зарʹед мә йан жи нәвийед мә бьжин дьнйа ӧсада, кӧ тʹьжә бә бь шәрʹа, нәһәԛийе, гӧһастьна климате у епидемийа?» Ле әм чь дькарьн бькьн чахе бона тьштед ӧса хәмгин дьбьн?

«Кʹәсе аԛьл дәма хәтайе дьвинә хԝә вәдьшерә», чьмки әԝ нахԝазә бькʹәвә хәтайе (Мәтʹәлок 27:12). Әм чаԝа мьԛати сьһʹәт-ԛәԝата хԝәйә физики дьбьн, әм ӧса жи гәрәке мьԛати пʹьсикʹика хԝә бьн. Бона пʹьсикʹика ԝә у зарʹед ԝә нә баш ә ԝәʹдәдәрбазкьрьна кӧ зорбәти теда һәйә, йан жи чахе һун дьньһерʹьн дәнг у бәʹсед йан нучейед ӧса кӧ тьштед зорбәти нишан дькьн, чьмки әԝ йәк хәмгинийе зедә дькьн. Әм гәрәке хԝә жь ԝан тьшта дур бьгьрьн у нәньһерʹьн. Чахе әм ӧса дькьн, әԝ найе һʹәсабе кӧ әм жь реалистийе дьрʹәвьн. Хԝәде һʹьше мә ӧса ченәкьрийә, сәва кӧ әм бь зӧлмийе у зорбәтийе тʹьжә кьн. Дәԝсе әм гәрәке бьфькьрьн дәрһәԛа «рʹастийе . . . һәԛийе . . . һʹәлалийе . . . у хԝәшийе». Һәрге әм ӧса бькьн, «Хԝәдейе әʹдьлайийе» ԝе әʹдьлайе бьдә мә (Филипи 4:8, 9).

ДӦАКЬРЬН ГӘЛӘК ФӘРЗ Ә

Баԝәрийа ԛәԝи али мә дькә кӧ хәмгин нәбьн. Кʹьтеба Пироз мәрʹа дьбежә: «Сәр хԝә бьн, кӧ бькарьбьн дӧа бькьн» (1 Пәтрус 4:7). Әм дӧакьрьнеда дькарьн биланийе у мерхасийе жь Хԝәде бьхԝазьн, сәва кӧ жь дәрәщед чәтьн дәрен. Ле әм гәрәке баԝәр бьн, кӧ «әԝ һәр тьштед кӧ әм же дьхԝазьн дьбьһе» (1 Йуһʹәнна 5:15).

Кʹьтеба Пироз дьбежә кӧ «сәрԝере ве дьнйайе» Шәйтʹан ә, нә кӧ Хԝәде. У һьн жи Кʹьтеба Пирозда те готьне кӧ «дьнйайе бьн һʹӧкӧме Йе Хьрабда йә» (Йуһʹәнна 12:31; 1 Йуһʹәнна 5:19). Ләма жи Иса пәйчуйед хԝә һин кьр кӧ ӧса дӧа бькьн: «Мә жь йе хьраб хьлаз кә» (Мәтта 6:13). Алона дьбежә: «Чахе әз дәнге сирена дьбьһем, әз жь Йаһоԝа һиви дькьм кӧ али мьн бькә, сәва кӧ әз хԝә контрол кьм. Ӧса жи малхе мьн мьнрʹа тʹеле дьхә, у тʹәви мьн пе тʹеле дӧа дькә. Дӧакьрьн бь рʹастийе жи али мьн дькә». Кʹьтеба Пироз жи әԝе йәке дьбежә: «Хӧдан незики ԝан һʹәмуйан ә, кӧ банг [гази] дькьне, әԝ йед кӧ, жь дьл банг дькьне» (Зәбур 145:18, ИМ).

ГӦМАН БОНА АХЬРИЙЕ

Сәр чʹийайе Сәрмоне, Иса пәйчуйед хԝә һин кьр, кӧ ӧса дӧа бькьн: «Пʹадшатийа тә бе» (Мәтта 6:10). Пʹадшатийа Хԝәде ԝе һʹәму мәʹнийед, кӧ хәмгинийе тинә, кʹӧта кә һʹәта-һʹәтайе. Хԝәде ԝе бь Иса һʹәму шәрʹа бьдә һьлдане (Ишайа 9:6; Зәбур 46:9). Хԝәде «ԝе дь нава гәләк нәтәԝанда [щьмәʹтада] сәрԝерийе бажо . . . Ԝе гәл [мьләт] ль дьжи [мьԛабьли] гәли шур рʹанәкә у иди һини щәнге нәбьн . . . у йе кӧ ԝан бьтьрсинә тʹӧнә бә» (Миха 4:3, 4). Малбәтед бәхтәԝар «ԝе ханийан ава бькьн у рʹунен у рʹәзан дайньн у меԝа ԝе бьхԝьн» (Ишайа 65:21). У тʹӧ кәс ԝе нәбежә: «Әз нәхԝәш ьм» (Ишайа 33:24).

Иро, рʹаст ә әм һʹәму тьшти дькьн сәва кӧ нәкʹәвьнә ԛәзийа, ле һәнә «ԝәхт у дәм» кӧ әм нькарьн же бьрʹәвьн. Демәк, әм нькарьн хԝә хԝәй кьн жь ԝан һʹәму дәрәща йан щийа, кʹидәре кӧ ԛәзи дькарә бе (Ԝаиз 9:11). Гәләк ԛьрʹнә йә кӧ жь бо шәрʹа, зорбәтийе у нәхԝәшийа, гәләк мәрьвед баш дьмьрьн. Ле гәло чь гӧман һәйә бона ԝан мәрьва?

Гәләк мәрьв, һәжмара кʹижана кӧ тʹәне Хԝәде занә, ԝе диса вәгәрʹьнә жийине. Ле ньһа әԝана хәԝа мьрьнеда ньн, у бира Хԝәдеда дьминьн, һʹәта һьнге, чахе «һʹәмуйед тʹьрбада ԝе . . . рʹабьн» (Йуһʹәнна 5:28, 29). Кʹьтеба Пироз дәрһәԛа гӧмана сахкьрьне дьбежә: «Әва гӧмана бона жийина мә дьбә ләнгәрәкә һʹимгьрти у амьн» (Ибрани 6:19). Ле Хԝәде «әв йәкана һʹәмуйарʹа данә избаткьрьне, гава әԝ [Иса] . . . жь мьрьне рʹакьр» (Кʹаред Шандийа 17:31).

Иро, һәла һе әԝ мәрьв жи хәмгин дьбьн, йед кӧ дьхәбьтьн дьле Хԝәде ша кьн. Паул, Щанет, у Алона зәʹф хәмгин набьн бь сайа биланийе, дӧакьрьне, у бь баԝәрийа ԛәԝи һьндава гӧмана ахьрийе, кӧ Кʹьтеба Пироз дьдә. Ӧса жи «бьра Хԝәдейе гӧмане дьле ԝә бь шабуне у әʹдьлайийева бькʹьмкʹьминә, бона ԝе баԝәрийа ԝә» (Рʹомайи 15:13).