ТʹЕМА ЖЬ РʹУЙЕ ЖУРНАЛЕ | ЧЬРʹА ЛАЗЬМ Ә РʹАСТ У НӘQӘЛП БЬН?
Гәло Мәрьвед Иройинрʹа Лазьм ә кö Рʹаст у Нәqәлп бьн?
Һитоши офисәкә дь Жапонйайеда чаwа һʹәсабдар дьхәбьти. Чахе әwи тʹәви мәзьне хәбата хwә дәрһәqа һʹәсабед пʹәра шеwьр дькьр, мәзьне wи wирʹа гот кö әw гәрәке һʹәсабед qәлп бькә. Ле Һитоши гот кö исафа wи изьне надә wи, кö qәлпийе бькә. Һитоши данә тьрсандьне кö wе wи жь хәбате дәрхьн, у ахьрийеда бь рʹастийе жи әwи хәбата хwә öнда кьр.
Паше Һитоши бь мәһа хәбат хwәрʹа дьгәрийа, ле нькарьбу бьдита у дьлтәнг дьбу. Wәʹде qьсәкьрьнәкә бона хәбате, Һитоши гот кö әw нькарә хәбатеда qәлпийе бькә. Әw мәрьве кö qьсәкьрьн жь wи һьлдьда wирʹа гот: «Ньһерʹандьна тә гәләк әʹщеб ә!» Малбәт у һәвалед Һитоши әw һелан дькьрьн кö әw диса жи öса тʹәмьз бьминә у qәлпийе нәкә. Ле Һитоши һьнәки дöдьли дьбу у дьфькьри: «Гәло qә кʹар һәйә wәки әз баwәрийа хwәрʹа амьн дьминьн».
Мәсәла Һитоши рʹьнд әʹйан дькә, кö нә һәр кәс рʹастийе у беqәлпийе qимәт дькә. У бь рʹастийе, һьнәк беqәлпийе һʹәсаб дькьн ча тьштәки баргьрани, илаһи бизнеседа. Жьнькәк кö дьхәбьтә дь Африкайа Башуреда, гьлийе öса дьбежә: «Дәр доре мьн мәрьвед öса ньн кö qәлпийе дькьн, у щара гәләк чәтьн ә кö чʹәʹв нәдьмә wан».
Иро щурʹәки qәлпийе гәләк бәлабуйи йә. Әw һәйә дәрәw. Һьнә салед пашwәхтийе, бь леколинкьрьна Роберт Фелдмане псиколожист, һатә әʹйанкьрьне кö 60 сәләф мәрьвед мәзьн, wәʹде хәбәрдане лап кем 10 дәqа щарәке дәрәwа дькьн. Фелдман дьбежә: «Әw йәк әʹщебмайи йә. Мә нә жи карьбу бьда бәр чʹәʹве хwә, кö дәрәwи wе дь жийина мәйә һәррʹожида öса тʹәбийәти бә». Рʹаст ә, һʹәчʹи зәʹф мәрьв нәфрʹәт дькьн әве йәке кö тенә хапандьне, ле йәкә гәләк мәрьв дәрәwа дькьн.
Чьрʹа щурʹә-щурʹә qәлпи, мәсәлә дәрәwи, дьзи у диса тьштед дьн иро öса гәләк бәлабуйи нә? Ча нәрʹасти у qәлпи сәр мәрьва һʹöкöм дьбә? У әм ча дькарьн хwә хwәй кьн кö шьхöлед qәлп у нәрʹаст нәкьн?