Әз дьлбьриндар бум у бумә зöлм

ЖИЙИНА МЬНӘ БӘРЕ:

Әз ль бажаре Манте һатьмә буйине. Әв һәремәкә бәдәw ә дь кʹомара Тамулипасда (Мәксика). Бьнәлийед ви бажари, мәрьвнә qәнщ у мәрʹд ьн. Ле йазьх, жь бо кʹомед qачаха кö wедәре һәнә, әв щи гәләк хоф буйә.

Әм чар бьра бун у әз йе дöда бум. Де-баве мьн әз Дера Католикида ньхöмандьн. Wәʹдә шунда ве дереда әз кʹорда дьстьрийам. Мьн дьхwәст дьле Хwәде ша кьра, чьмки әз жь диwана Хwәде гәләк дьтьрсийам, кö һʹәта-һʹәтайе дь щәньмеда бемә шәwьтандьне.

Чахе әз пенщ сали бум, баве мьн әм һиштьн. Жь бо ве йәке әз пʹьрʹ дьлтәнг бум. Мьн фәʹм нәдькьр, чьма әwи әм һиштьн. Нә мә әw гәләк һʹьз дькьр. Дийа мьн гәләк сьһʹәта дьхәбьти, сәва кö мә хwәй кә.

Щарна әз нәдьчум мәкʹтәбе, ле тʹәви щаһьлед дьн дәстпекьр һәвалтийе бькьм. Әwана әз һин кьрьм, бьдьмә чʹера, щьхаре бькʹьшиньм, дьзийе бькьм, у бь кʹöлма шәрʹа бькьм. Жь бо wе йәке кö мьн һʹьз дькьр хwә сәр мәрийарʹа бьльнд бьгьрьм, әз һин бум бь щурʹә-щурʹә шәрʹ бькьм у чʹәк бьдьмә хәбате. Әз бумә хортәки зöлм. Гәләк щара бь чʹәк әз дькʹәтьмә һʹöщәте. У чәнд щара әз жь бо ве йәке педа хунеда дьмам у һьндьк мабу бьмьрама. Ви һалида мьн нивкöшти давитнә кʹучʹа. Дьле дийа мьн чьqас дьешийа, чахе әwе әз ви һалида дьдитьм. Әwе мьн һьлдькʹьшандә сәр ньга у ләзә-ләз дьбьрьм нәхwәшхане!

Чахе әз 16 сали бум, һәваләки мьн Щорщ, кʹижана кö мьн жь бьчʹуктайе нас дькьр, һатьбу мала мә. Әwи готә мә кö әw Шәʹде Йаһоwа йә у дьхwәст әʹламәтийа фәрз мәрʹа бьгота. Әwи дәстпекьр дәрһәqа баwәрийа хwә мәрʹа хәбәр дә, у Кʹьтеба Пироз жи бьдә хәбате. Мьн тʹö щар Кʹьтеба Пироз нәхwандьбу у гәләк һьзрәт бум дәрһәqа наве Хwәде у qьрара wи пебьһʹәсьм. Щорщ мәрʹа гот кö wе али мә бькә Кʹьтеба Пироз һе рʹьнд фәʹм кьн. У әм qайил бун.

КʹЬТЕБА ПИРОЗ ЧА ЖИЙИНА МЬН ГÖҺАСТ:

Әз гәләк ша бум чахе пеһʹәсийам кö һинкьрьн дәрһәqа щәньме, нә ль сәр һʹиме Кʹьтеба Пироз ә (Зәбур 146:4; Wаиз 9:5). Чахе әз дәрһәqа ве йәке пеһʹәсийам, һьнгева әз нәдьтьрсийам кö Хwәде, wе мьн бавежә щәньме. Дәwсе мьн дьдит кö әw ча Бав, мә һʹьз дькә у qәнщийа мә дьхwазә.

Чахе мьн бәрдәwам дькьр Кʹьтеба Пироз һин бьм, мьн фәʹм кьр кö гәрәке хәйсәте хwә бьгöһезьм. Мьнрʹа лазьм бу мьлуктийе нав хwәда пешда биньм у зöлмийе нәкьм. Ве йәкеда гәләк али мьн кьр ширәта жь 1 Корьнтʹи 15:33, кʹидәре кö те готьне wәки һәвалтийа хьраб «мәрьве хwәйипʹәргал хьраб дькә». Мьн фәʹм кьр кö һәрге әз дьхwазьм бемә гöһастьне, әз гәрәке жь һәвалтийа хьраб хwә дур бьгьрьм, чьмки әwана сәр мьн хьраб һʹöкöм дькьн. Ләма жи мьн һәвалед хwәйә бәре һишт у мьн дәстпекьр тʹәви Мәсиһийед рʹаст һәвалтийе бькьм. Чьмки һәрге чәтьнайед wан жи һәбә, әwана нә кö бь шәрʹ-дәwа әван чәтьнайа сафи дькьн, ле принсипед Кʹьтеба Пироз дьдьнә хәбате.

Диса гьли-готьнәкә жь Ньвисаред Пироз гәләк ль сәр мьн һʹöкöм кьр. Әв дь Рʹомайи 12:17-19-да ньвисар ә: «Жь бәр хьрабийева хьрабийе ль тʹö кәси нәкьн. . . . Чьqас жь дәст wә те, тʹәви һʹәму мәрьва әʹдьлайийеда бьн. Һʹәйфе һьлнәдьн . . . чьмки ньвисар ә: «‹Һʹәйфһьлдан дәсте мьн ә, әзе һʹәйфе һьлиньм, Хöдан дьбежә›». Мьн фәʹм кьр кö Йаһоwа wәʹдәда нәһәqийе бьдә һьлдане. Һеди-һеди мьн хәйсәте хwәйи зöлм тʹәрьканд.

Әзе тʹö щар бир нәкьм чь һатә сәре мьн, чахе еварәке әз вәдьгәрʹийам мал. Кʹомәкә щаһьла, йе кö бәре кʹома qачахийеда бун, һöщуми сәр мьн кьрьн. Мәзьне wан пьшта мьн хьст у кьрә qужини: «Дә хwә хьлаз кә!» Һьнге мьн кьн Йаһоwарʹа дöа кьр у хwәст кö али мьн бькә тәйах кьм. Рʹаст ә мьн гәләк хwәст щаба wан бьдьм у wана хьм, ле әз жь wана рʹәвим. Рʹожәкә дьн ньшкева әз рʹасти ви мәзьне кʹома qачаха һатьм. Һерса мьн рʹабу у мьн хwәст щаба wи бьдьм, ле диса жи мьн лавайа Йаһоwа кьр кö али мьн бькә хwә бьгьрьм. Әз гәләк әʹщебмайи мам, чахе әw гәдә незики мьн бу у гот: «Бьбахшинә сәва qәwьмандьна дö. Бь рʹасти бежьм, әз дьхwазьм мина тә бьм. Әз жи дьхwазьм Кʹьтеба Пироз һин бьм». Әз чьqас ша бум, кö пешда мьн карьбу һерса хwә дахьм! У паше чахе Шәʹдед Йаһоwа дьһатьнә щәм мьн кö мьн һин кьн, әв гәдә жи дьһатә сәр һинбуне.

Йазьх, ле тʹәмамийа малбәта мьн wи чахи бәрдәwам нәкьрьн Кʹьтеба Пироз һин бьн. Ле мьн сәва хwә сафи кьрьбу кö чь жи һәбә, бәрдәwам кьм һин бьм у изне нәдьмә тʹö кәси у тʹö тьшти кö мьн вәгәрʹьньнә шьхöле мьнә бәре. Мьн заньбу кö һәрге әз һәргав тʹәви щьмәʹта Хwәде бьм, әв йәк wе бьринед дьле мьн qәнщ кә у әwана wе бона мьн бьбьн ча малбәт. Әз рʹöһʹанида пешда дьчум у сала 1991-да әз һатьмә ньхöмандьне у бумә Шәʹде Йаһоwа.

ЧЬ КʹАР МЬН СТАНД:

Әз дьлбьриндар бум у бумә зöлм. Ле Хәбәра Хwәде педа жийина мьн гöһаст. Ньһа әз һʹәмуйарʹа гьли дькьм дәрһәqа мьзгинийа жь Кʹьтеба Пироз, йа кö әʹдьлайе тинә. Әз гәләк дьлша мә кö нава 23 салада әз ча пешәнге һәртʹьм хьзмәт дькьм.

Мьн öса жи бь рʹәзәдьли аликʹари дьда авакьрьна офиса Шәʹдед Йаһоwа дь Мәксикайеда. Һәма wе дәре жи әз рʹасти Клаудийа һатьм. Әw Шәʹде Йаһоwа йә у кʹöлфәтәкә сәрхwә. Дь сала 1999-да мә һәв станд. Әз чьqас Йаһоwарʹа рʹази мә, кö бь жьнәкә öса амьн әз кʹәрәм кьрьн!

Мә тʹәвай дь щьвата Мәксики йа Кәр-Лалада хьзмәт дькьр, у али wан мәрийа дькьрьн дәрһәqа Йаһоwа Хwәде пебьһʹәсьн. Һьнә wәʹдә шунда мә дәрбази wәлате Белизе кьрьн, сәва кö wе дәре али мәрийа бькьн Кʹьтеба Пироз һин бьн у фәʹм бькьн. Вьра әм öса дьжин кö щәм мә тʹәне һәбә әw тьшт чьда әм һʹәwщә нә у жь wи зедәтьр әм qәзанщ накьн. У әм бәхтәwар ьн. Әме жийина хwәйә öса ль сәр тʹö тьшти нәгöһезьн.

Wәʹдә шунда дийа мьн диса дәстпекьр Кʹьтеба Пироз һин бә у һатә ньхöмандьне. Бьре мьни мәзьн тʹәви жьн зарʹед хwә ньһа Шәʹдед Йаһоwа нә. Öса жи һьнә жь һәвалед мьнә бәре, кʹижанирʹа кö мьн мьзгинийа Пʹадшатийе әʹлам кьр, ньһа Йаһоwарʹа хьзмәт дькьн.

Сәд һәйф, ле һьнә жь нәфәред мала мьн мьрьн, чьмки жийина хwәйә зöлм нәгöһастьн. Һәрге мьн жи жийина хwә нәгöһаста, дьбәкә ахьрийа мьн жи мина йа wан буйа. Әз гәләк спасдар ьм Йаһоwарʹа, кö әwи әз незики хwә кьрьм. Әз öса жи спасдар ьм хьзмәткʹаред wирʹа, йед кö бь сәбьр у qәнщийе әз һин дькьрьм принсипед Кʹьтеба Пироз жийина хwәда бьдьмә хәбате.