«Һәрʹьн Һʹәму Мьләта Һин кьн»

1, 2. Кʹижан пьрс пешда тен чахе әм Мәттада 24:14-да гьлийед Иса дьхуньн?

ӘМ ЧАWА Шәʹдед Йаһоwа, нав тʹәмамийа дьнйайеда гәләк тенә наскьрьне пе шьхӧле бәлакьрьна мьзгине. Дьqәwьмә хьзмәтийеда һун рʹасти wан мәрьва һатьнә, йед кӧ qәбул накьн баwәрийа мә, ле йәкә qәдьре мә дьгьрьн жь бо шьхӧле кӧ әм дькьн. Әм заньн wәки Иса пʹехәмбәрти кьр, кӧ wе мьзгина дәрһәqа Пʹадшатийе сәр тʹәмамийа дьнйайе бе бәлакьрьне (Мәт. 24:14). Ле әм жь кʹӧ заньн, wәки шьхӧле кӧ әм дькьн пʹехәмбәртийа Иса тинә сери? Wе рʹаст бә кӧ әм бежьн, wәки тʹәне әм әwи шьхӧли дькьн?

² Гәләк мәрьвед жь рʹелигийед дьн дьфькьрьн, wәки әwана жи бәла дькьн wе мьзгине, дәрһәqа кʹижане кӧ Иса дьгот. Ле әwана хьзмәта хwә тиньн сери, тʹәне бь хьзмәта дереда, йан даннасин дькьн бь телевизийоне йан бь интернете. Ле йед дьн дьфькьрьн кӧ әwана хьзмәта хwә тиньн сәри бь wе йәке, чахе аликʹарийе дьдьнә мәрьварʹа, мәсәлә, алийе медисинеда, йан жи сәва мәрьв хwәндьне бьстиньн. Ле пьрс пешда те: Гәло чь кӧ әwана дькьн, те һʹәсабе әw шьхӧл, кʹижан кӧ Иса шагьртарʹа гот кӧ бькьн?

3. Ль гора тʹәмийа Иса кӧ Мәтта 28:19, 20-да ньвисар ә, пәйчуйед Иса кʹижан чар тьшт гәрәке бькьн?

³ Ле гәло шагьртед Иса һивийе бун, кӧ мәрьв хwәха бьһатана щәм wан? Тʹӧ щар на! Иса паши сахбуна хwә, бь сәда шагьртед хwәрʹа гот: «Һәрʹьн һʹәму мьләта һин кьн у wана . . . , бьньхӧминьн у wан һʹәму тʹәмийед кӧ мьн данә wә мьләта һин кьн, wәки әw хwәй кьн» (Мәт. 28:19, 20). Демәк, чаwа шагьртед Иса, әм борщдар ьн чар тьшта бькьн. Әм гәрәке мәрьва бькьнә шагьрт, wана бьньхӧминьн, у һин кьн, ле пешийа wе йәке әм гәрәке чь бькьн? Иса гот: «Һәрʹьн»! Дәрһәqа ве тʹәмийе, зандарәки Кʹьтеба Пироз гьлийед ӧса гот: «‹Һәрʹьн› әw һәйә щабдарийа һәр баwәрмәнда, фьрqи тʹӧнә һәрʹьн кʹучерʹа дәрбаз бьн йан һәрʹьн океанева дәрбаз бьн» (Мәт. 10:7; Луqа 10:3).

4. Чь дьһатә һʹәсабе бьбьнә «нечʹирванед мәрьва»?

⁴ Гәло Иса дьхwәст бьгота кӧ пәйчуйед wи һәр кәс башqә хьзмәт кә? Йан әwи дьхwәст кӧ әwана тʹәвайи бь организә мьзгине бәла кьн? Фәʹмдари йә, мәрьвәк нькарьбу бьчуйа щәм «һʹәму мьләта». Демәк, бона wи шьхӧли лазьм бун гәләк мәрьв. Әw йәк жь гьлийед Иса һатә кʹьфше, чахе әwи шагьртед хwә тʹәглиф кьр кӧ бьбьнә «нечʹирванед мәрьва». (Бьхунә Мәтта 4:18-22.) Иса нәдьгот дәрһәqа нечʹирванийа бь чәнгәле, демәк чахе нечʹирван рʹудьне у һивийе йә, һʹәта кӧ мәʹсик бе бькʹәвә чәнгәле. Ле әwи дьгот дәрһәqа нечʹирванийа бь тʹорʹа. Әw хәбатәкә гьран бу, кʹижанирʹа лазьм бу qәwата гәләка у йәкти (Луqа 5:1-11).

5. Сәр кʹижан чар пьрса лазьм ә щабе бьвиньн, у чьрʹа?

⁵ Сәва кӧ бьзаньбьн һәла кʹе иро мьзгине бәла дькә, у пʹехәмбәртийа Иса тинә сери, мәрʹа лазьм ә щаба wан чар пьрса бьвиньн:

▪ Чь мьзгин гәрәке бе бәлакьрьне?

▪ Нета мә гәрәке чь бә, чахе әве мьзгине бәла дькьн?

▪ Чь щурʹәйи гәрәке әwе мьзгине бәла кьн?

▪ Еw мьзгин гәрәке чьqаси бәла бә у чьqас wәʹдә гәрәке әw бькʹьшинә?

Щабед wан пьрса wе али мә бькьн, кӧ әм тедәрхьн кʹе иро әв шьхӧле фәрз дькә. Хенщи ве йәке, әме һе qәwи бьн, сәва кӧ әwи шьхӧли бәрдәwам кьн бь амьни бькьн (1 Тимтʹ. 4:16).

ЧЬ МЬЗГИН ГӘРӘКЕ БЕ БӘЛАКЬРЬНЕ?

6. Чьрʹа әм дькарьн баwәр бьн кӧ Шәʹдед Йаһоwа бәла дькьн әве мьзгине, кʹижан кӧ Иса гот кӧ бәла кьн?

⁶ Бьхунә Луqа 4:43. Иса «мьзгинийа Пʹадшатийа Хwәде» бәла дькьр, у дьхwаст wәки шагьртед wи жи әве мьзгине бәла кьн. Ле гәло кʹе иро «һʹәму мьләтарʹа» әве мьзгине бәла дькә? Щаб әʹйан ә, тʹәне Шәʹдед Йаһоwа! Һәла һе һьнә жь wан мәрьва жи, йед кӧ мьqабьли мә нә, һʹәсаб дькьн кӧ әw йәк ӧса нә. Мәсәлә, кʹәшише мисйонер щарәке Шәʹде Йаһоwарʹа гот, wәки әw щурʹә-щурʹә wәлатада дьжит, у wан һәр wәлатада жь Шәʹдед Йаһоwа дьпьрси, һәла әwана чь әʹламәтийе бәла дькьн. Ле чь щаб әwи кʹәшиши дьстанд? Әwи гот: «Әwана һаqас бефәʹм ьн, wәки щаба хwә мина һәв дан: ‹Мьзгина дәрһәqа Пʹадшатийа Хwәде›». Ле бь рʹастийе, жь гьлийед кʹәшиш те кʹьфше, wәки әwана ча Мәсиһийед рʹаст йәктийеда ньн, нә кӧ «бефәʹм ьн» (1 Корн. 1:10). Wана һәма әw әʹламәти бәла дькьр, кʹижан кӧ әʹлам дькә журнала бь наве «Бьрща Qәрәwьлийе Дәрһәqа Пʹадшатийа Йаһоwа Әʹлам Дькә». Әв журнал сәр 254 зьмана дәрдькʹәвә, у һәр дәрхьстьна ве wәкә 59 милйон һʹәв те нәшьркьрьне. Нав тʹәмамийа дьнйайеда әв журнал лапи бәлабуйи йә.

7. Әм жь кʹӧ заньн wәки Мәсиһийед ве дьнйайе мьзгина, кӧ Иса гот бәла накьн?

⁷ Мәсиһийед ве дьнйайе, мьзгина дәрһәqа Пʹадшатийа Хwәде бәла накьн. Һәрге жи әwана хәбәрдьдьн дәрһәqа Пʹадшатийе, гәләк жь wан дьбежьн wәки әw Пʹадшати дьле Мәсиһида йә (Луqа 17:21). Әwана мәрьва һин накьн wәки Пʹадшатийа Хwәде әw һәйә сәрwертийа әʹзмана, кʹидәреда Иса Мәсиһ сәрwертийе дькә. У нә жи һин дькьн кӧ әw Пʹадшати wе һʹәму проблемед инсанәте сафи кә, у ӧса жи кӧ әw wе зутьрәке һʹәму зӧлмийе сәр әʹрде кʹӧта кә (Әʹйан. 19:11-21). Әwана Иса тиньн бира хwә тʹәне сәр щәжьна Рʹожа Буйина Иса у сәр Рʹожа Дәрбазбуне (Пасхә). Әwана нә жи заньн Иса wе чь бькә сәр әʹрде чаwа Сәрwере тʹәзә. Һьн жи әwана ньзаньн чь мьзгине гәрәке бәла кьн, ләма жи фәʹм накьн чьрʹа гәрәке әве йәке бькьн.

НЕТА МӘ ГӘРӘКЕ ЧЬ БӘ, ЧАХЕ МЬЗГИНЕ БӘЛА ДЬКЬН?

8. Кʹижан нета нәрʹаст дькарә һәбә чахе мьзгине бәла дькьн?

⁸ Нета мә гәрәке чь бә чахе мьзгине бәла дькьн? Нет гәрәке әw нибә кӧ пʹәрә qазанщ кьн у авайед мәхсус ава кьн. Чьмки Иса гот: «Wә беһәq стандийә, беһәq жи бьдьн» (Мәт. 10:8). Бәлакьрьна хәбәра Хwәде гәрәке бизнес нибә (2 Корн. 2:17). Әwед кӧ мьзгине бәла дькьн, бона ви шьхӧли гәрәке кʹара хwә нәгәрʹьн. (Бьхунә Кʹаред Шандийа 20:33-35.) Рʹаст ә Иса әʹйан дәрһәqа ве йәке гот, ле йазьх дер һʹәчʹи зәʹф пәй пʹәра дькʹәвьн, сәва кӧ деред хwә хwәй кьн. Чьмки кʹәшиш у хәбаткʹаред дьн йе дера, һәqе хьзмәтийа хwә дьстиньн. Ләма жи, гәләк сәрwеред Мәсиһийед ве дьнйайе, пʹьрʹ дәwләти бунә (Әʹйан. 17:4, 5).

9. Шәʹдед Йаһоwа ча данә кʹьфше wәки әwана бь нета рʹаст мьзгине бәла дькьн?

⁹ Ле чь дькарьн бежьн дәрһәqа Шәʹдед Йаһоwа? Шьхӧле wан пе пʹәре qӧрбанкьрьна рʹәзәдьли пешда дьчә (2 Корн. 9:7). Нә Ода Щьватада, нә жи щьватед мәзьнда, пʹәрә найе тʹопкьрьне. Сала пар, Шәʹдед Йаһоwа wәкә 2 милиард сьһʹәт хәрщ кьрьнә сәр бәлакьрьна мьзгине, у һәр мәһ 9 милйона зедәтьр һинкьрьна Кʹьтеба Пироз дәрбаз кьрьнә. Рʹасти жи әʹщебмайи йә, wәки әwана нә кӧ тʹәне беһәq әwи шьхӧли дькьн, ле хенщи ве йәке әwана хәрще хwә кʹиси хwә дадьдьн. Леколинкʹарәки дәрһәqа шьхӧле Шәʹдед Йаһоwа ӧса гот: «Нета wанә сәрәкә әw ә кӧ мьзгине бәла кьн у һин кьн. . . . Кʹәшишед wан тʹӧнә нә, ләма хәрще wан һьндьк ә». Wәки ӧса нә, нета мә чь йә кӧ мьзгине бәла дькьн? Һәрге кьн бежьн, әм әwи шьхӧли бь рʹәзәдьли дькьн, чьмки әм Йаһоwа у мәрьва һʹьз дькьн. Әw һазьрбуна мә, тинә сери пʹехәмбәртийа жь Зәбур 110:3. (Бьхунә.)

ЧЬ ЩУРʹӘЙИ ӘВ МЬЗГИН ГӘРӘКЕ БӘЛА БУЙА?

10. Иса у шагьртед wи чь щурʹәйи мьзгин бәла дькьрьн?

¹⁰ Ле Иса у шагьртед wи чь щурʹәйи мьзгин бәла дькьрьн? Әwана дьчунә һʹәму щийа, кʹидәре кӧ мәрьв һәбун, мәсәлә, щийед кӧ гәләк мәрьв тʹоп дьбун, у малед мәрьвада. Әwана мал бь мал мьзгине бәла дькьрьн, сәва мәрьвед һежа бьгәрʹьн (Мәт. 10:11; Луqа 8:1; Кʹар. Шанд. 5:42; 20:20). Әw те һʹәсабе кӧ әwана фьрqи нәдькьрьнә ортʹа мәрьва, у гьшкарʹа дәрһәqа мьзгине гьли дькьрьн.

11, 12. Чь фьрqи һәйә ортʹа Мәсиһийед ве дьнйайе у щьмәʹта Йаһоwа, ве йәкеда кӧ әwана ча мьзгине бәла дькьн?

¹¹ Ле әм чь дькарьн бежьн дәрһәqа деред Мәсиһийед ве дьнйайе? Һʹәчʹи зәʹф кʹаһинед дера йед кӧ пʹәра дьстиньн, дәрһәqа Хwәде гьли дькьн, тʹәне wанрʹа кʹе те дера wан. Ча әʹйан ә, әwана «нечʹирванед мәрьва» ниньн, ле хәма wан тʹәне әw «мәʹси» йә, кʹижан кӧ әwана ида дитьнә. Щара, кʹәшиш һелан дькьн мәрьва, кӧ ча бежи мьзгине бәла кьн. Мәсәлә, сала 2001, Поп Щон Поле II, ньвиси: «Нава гәләк сала, мьн тʹьме һелан дькьр мьзгине бәла кьн. Әз һʹәта ньһа әве йәке дькьм, . . . Әм гәрәке мина Паwлосе шанди бьн, йе кӧ гот: ‹Wәй ль мьн һәгәр әз мьзгинийе даннасин нәкьм!›» Паше, әwи кʹәшиши бәрдәwам кьр у гот, кӧ әwи шьхӧли «нә кӧ тʹәне мәрьвед ‹щерʹьбанди› гәрәке бькьн, ле һʹәму мәрьв кʹе Хwәде баwәр дькьн». Ле гәло кәсәк пәй wе һеланкьрьне чу?

¹² Ле чь дькарьн бежьн дәрһәqа Шәʹдед Йаһоwа? Тʹәне әwана мәрьварʹа гьли дькьн, кӧ Иса сала 1914 да сәрwертийе дькә ча Пʹадша. Чаwа кӧ Иса һин дькьр, жийина wанда бәлакьрьна мьзгине щийе пешьн дьгьрә (Марq. 13:10). Кʹьтебәкеда һатийә готьне: «Бона Шәʹдед Йаһоwа хьзмәткьрьн жь һʹәму тьшти фәрзтьр ә. Чахе әwана рʹасти мәрьвед бьрʹчи, нәхwәш, у йед тʹәне манә тен, аликʹарийе дьдьнә wан, . . . ле йәкә әwана диса жи тʹӧ щар бир накьн, кӧ шьхӧле wанә сәрәкә әw ә, wәки әʹламәтийе бәла кьн дәрһәqа незикайа хьлазийа ве дьнйайе у дәрһәqа хьлазбуне». (Pillars of Faith—Amеrican Congrеgations and Thеir Partnеrs statеs.) Шәʹдед Йаһоwа бәрдәwам дькьн әве әʹламәтийе бәла кьн, чаwа кӧ Иса у шагьртед wи дькьрьн.

МЬЗГИН ГӘРӘКЕ ЧЬQАСИ БӘЛА БУЙА У ЧЬQАС WӘʹДӘ БЬКʹЬШАНДА?

13. Мьзгин гәрәке чьqаси бәла буйа?

¹³ Иса гот кӧ мьзгин гәрәке бе бәлакьрьне «нав тʹәмамийа дьнйайе» (Мәт. 24:14). Ләма жи шагьртед wи гәрәке «һʹәму мьләтарʹа» мьзгин бәлакьрана (Мәт. 28:19, 20). Демәк, әw те һʹәсабе wәки мьзгин һʹәму щийа гәрәке бьһата бәлакьрьне.

14, 15. Чь избат дькә кӧ Шәʹдед Йаһоwа пʹехәмбәртийа Иса тиньнә сери, кӧ мьзгин гәрәке чьqаси бәла бә? (Бьньһерʹә шькьле әʹwльн.)

¹⁴ Тʹәне Шәʹдед Йаһоwа пʹехәмбәртийа Иса тиньн сери, демәк мьзгине нав тʹәмамийа дьнйайеда бәла дькьн. Чьрʹа әм дькарьн ӧса бежьн? Wәрә һьнә һʹәсаба шеwьр кьн. Дәwләтед Йәкбуйида wәкә 600 000 кʹәшишед жь щурʹә-щурʹә религийа һәнә, ле Шәʹдед Йаһоwа wәкә 1 200 000 ьн. Тʹәмамийа дьнйайеда, Дера Рʹомайа Католикида wәкә 400 000 кʹәшиш һәнә. Ньһа дина хwә бьдьн сәр һәжмара Шәʹдед Йаһоwа, йед кӧ мьзгина Пʹадшатийа Хwәде бәла дькьн. Нав тʹәмамийа дьнйайеда, 240 wәлатада, wәкә 8 милйон Шәʹдед Йаһоwа мьзгина дәрһәqа Пʹадшатийе бәла дькьн. Бәле, нав тʹәмамийа дьнйайеда шьхӧләки мәзьн те кьрьне, сәва рʹумәт у һӧрмәткьрьна Йаһоwа (Зәб. 34:1; 51:15).

¹⁵ Һʹәта кӧ хьлази бе, әм ча Шәʹдед Йаһоwа, дьхwазьн чьqас дькарьн гәләк мәрьварʹа мьзгине гьли кьн. Ләма әм гәләк әʹйан ьн пе шьхӧле хwәйи wәлгәрʹандьне у дәрхьстьна әʹдәбйәтед сәр һʹиме Кʹьтеба Пироз. Милйон кʹьтеб, журнал, буклет, у ӧса жи тʹәглифа сәр Биранине у сәр щьватед мәзьн, әм бе пʹәра бәла дькьн. Әм щурʹә-щурʹә әʹдәбйәт сәр 700 зьмана зедәтьр дәрдьхьн. Кʹьтеба Пироз йа «Wәлгәрʹандьна Дьнйа Тʹәзә», , 200 милйон һʹәв һатә нәшьркьрьне, сәр 130 зьмана зедәтьр. Сала пашwәхтийеда, мә wәкә 4.5 милиард әʹдәбйәт нәшьр кьр. Информасийа сәр малпәра мә, сәр 750 зьмана зедәтьр дәст дькʹәвә. Һәнә рʹелигийед дьн, кʹижан кӧ шьхӧле ӧса дькьн?

16. Чьрʹа әм дькарьн бежьн кӧ рʹӧһʹе Хwәдейи пироз сәр Шәʹдед Йаһоwа йә?

¹⁶ Гәло чьqас wәʹдә гәрәке бькʹьшинә шьхӧле бәлакьрьна мьзгине? Иса гот кӧ һʹәта «хьлази wе бе», әw шьхӧле һʹәмдьнйайе wе бәрдәwам бә (Мәт. 24:14). Qә һәнә рʹелигийед дьн, йед кӧ wан рʹожед ахьрийеда мьзгине бәла дькьн? Һьнәк мәрьвед баwәрмәнд дьбежьн кӧ рʹӧһʹе пироз сәр wана йә. Ле шьхӧле бәлакьрьна мьзгине тʹәне әм бәрдәwам дькьн. Гәло әw йәк избат накә кӧ рʹӧһʹе Хwәдейи пироз сәр мә йә? (Кʹар. Шанд. 1:8; 1 Пәт. 4:14) Щара, рʹелигийед дьн дәстпедькьрьн мина Шәʹдед Йаһоwа хьзмәт кьн, ле шьхӧле wан пешда нәчу. Һьнәк жи, йанчь мисйонертийе дькьн, ле тʹәне сәр һьнә wәʹдә у паше диса вәдьгәрʹьн бь жийина хwәйә бәре дьжин. Һьнәк, дәстпедькьн мал бь мал хьзмәт кьн, ле әwана мьзгина Пʹадшатийе бәла накьн. Демәк, әʹйан ә кӧ әwана әwи шьхӧли накьн, кʹижан кӧ Иса дәстпекьр.

КʹИ БЬ РʹАСТИЙЕ ИРО МЬЗГИНЕ БӘЛА ДЬКӘ?

17, 18. а) Әм чьрʹа дькарьн баwәр бьн кӧ тʹәне Шәʹдед Йаһоwа мьзгина Пʹадшатийе бәла дькьн? б) Чь али мә дькә кӧ әм әwи шьхӧли бәрдәwам дькьн?

¹⁷ Кʹи бь рʹастийе иро мьзгина Пʹадшатийе бәла дькә? Әм дькарьн дӧдьли нәбьн у бежьн: «Шәʹдед Йаһоwа!» Ле чьрʹа әм дькарьн ве йәкеда баwәр бьн? Чьмки әм мьзгина рʹаст бәла дькьн, демәк мьзгина дәрһәqа Пʹадшатийе. Ӧса жи, әм хwәха дьчьн мәрьва дьгәрʹьн, у әw рʹаст ә әм ӧса дькьн. Һьн жи, әм бь нета рʹаст мьзгине бәла дькьн. Әм пәй пʹәра накʹәвьн, ле әм Хwәде у мәрьва һʹьз дькьн, ләма әwи шьхӧли дькьн. Әм әwи шьхӧли нав тʹәмамийа дьнйайеда бәла дькьн, демәк әм жь һʹәму мьләта у зьмана мәрьва дьгәрʹьн. У әме әwи шьхӧли бәрдәwам кьн бькьн беәгләкьрьн, һʹәта кӧ хьлази бе.

¹⁸ Рʹасти жи әʹщеб ә, кӧ щьмәʹта Йаһоwа wан рʹожед ахьрийеда, шьхӧләки чьqас мәзьн дькьн. Ле чь щурʹәйи әw шьхӧл ӧса пешда дьчә? Паwлосе шанди шьровәдькә: «Чьмки Хwәде хwәха ве йәке дькә дьле wә, кӧ һун дьхwазьн у дькьн, чаwа ль wи хwәш те» (Фили. 2:13). Дә wәрә әм пе qәwата Баве мә Йаһоwа, бәрдәwам кьн бь дьл у щан мьзгине бәла кьн (2 Тимтʹ. 4:5).