Гәло Кʹьтеба Пироз Һәла Һе Тә Дьгӧһезә?

1-3. а) Паши ньхӧмандьне кʹижан гӧһастьн дькарьн мәрʹа чәтьн бьн? б) Чахе мәрʹа чәтьн ә гӧһастьна бькьн, кʹижан пьрса әм дьбәкә дьдьнә хwә? (Бьньһерʹә шькьле әʹwльн.)

ПАШИ ве йәке чахе Кевин^[1] рʹастийе пеһʹәсийа, әwи гәләк дьхwәст кӧ бьбә досте Йаһоwа. Ле пешийа кӧ әw дәрһәqа рʹастийе пебьһʹәсийа, әw гәләк сала хӧмарбаз бу, щьхарә дькʹьшанд, гәләк ичʹкә вәдьхwар, у наркотика дьда хәбате. Сәва кӧ Кевин qәбулкьрьна Хwәде бьстинә, wирʹа лазьм бу әwан кьред хьраб бьтʹәрькинә. У әwи бь аликʹарийа Йаһоwа у бь Кʹьтеба Пироз әw тьшт тʹәрькандьн (Ибрн. 4:12).

² Чахе Кевин һатә ньхӧмандьне, паше wирʹа лазьм бу диса һьнә хәйсәт-һʹӧнӧред хwә бьгӧһезә, сәва кӧ бьбә Мәсиһийе һе баш (Әфәс. 4:31, 32). Мәсәлә, бәре әw зу һерс дькʹәт. Ле әw әʹщебмайи ма, кӧ чьqас чәтьн ә һерса хwә контрол бькә. Кевин гьли дькә: «Мьнрʹа һе зор бу һин бума һерса хwә контрол кьра, нә кӧ кьред хwәйә хьраб йе бәре бьһишта!» Кевин нав хwәда гӧһастьн кьрьн, бь дӧа у леколинкьрьна Кʹьтеба Пироз.

³ Мина Кевин, мә гәләкарʹа лазьм бу пешийа ньхӧмандьне гӧһастьнед мәзьн бькьн, сәва кӧ бьжин ӧса, чаwа Кʹьтеба Пироз мәрʹа дьбежә. Ле паши ньхӧмандьне, мә фәʹм кьр кӧ әм гәрәке диса нав хwәда гӧһастьна бькьн, сәва кӧ һе зедә чʹәʹв бьдьнә Хwәде у Иса Мәсиһ (Әфәс. 5:1, 2; 1 Пәт. 2:21). Мәсәлә, дьбәкә мә дит кӧ хәйсәтәки мәйи ӧса һәйә кӧ әм дькьнә кӧтә-кӧт, йан гәвәстийе дькьн. Йан жи дьбәкә жь мәрьва дьтьрсьн, у диса кемасийед дьн. Дьqәwьмә wә тʹәхмин кьр кӧ хәйсәт-һʹӧнӧред ӧса нав хwәда дәрхьн һе чәтьн ә, нә кӧ ча һун дьфькьрин. У ләма дьбәкә пьрсед ӧса щәм wә пешда тен: «Чьрʹа мьнрʹа һе һеса бу гӧһастьнед мәзьн бькьн, ле тьштед бьчʹук гәләк чәтьн ә бьгӧһезьм? Әз чь дькарьм бькьм сәва кӧ Кʹьтеба Пироз бәрдәwам кә мьн бьгӧһезә?»

РЕАЛИ СӘР ХWӘ БЬНЬҺЕРʹЬН

4. Чьрʹа әм нькарьн пе һʹәму кьред хwә дьле Йаһоwа ша кьн?

⁴ Әм Йаһоwа гәләк һʹьз дькьн у дьхwазьн бь тʹәмамийа дьле хwә wи ша кьн. Ле йазьх, чьqас жи әм бьхwазьн, әм нькарьн һʹәму тьштида дьле wи ша кьн, чьмки әм гӧнәкʹар ьн. Әм жи хwә мина Паwлосе шанди тʹәхмин дькьн, йе кӧ гот: «Дахwаза мьн һәйә, ле әз нькарьм тьште qәнщ пек биньм» (Рʹом. 7:18, ИМ; Аqуб 3:2).

5. Пешийа ньхӧмандьне, чь гӧһастьна мә кьр, ле кʹижан кемаси дькарьн диса нав мәда бьминьн?

⁵ Пешийа кӧ әм һатьнә ньхӧмандьне, мә кьред хьраб һишт, кʹижан кӧ Йаһоwа нәфрʹәт дькә (1 Корн. 6:9, 10). Ле йәкә әм диса жи гӧнәкʹар ьн (Колс. 3:9, 10). Ләма жи, паши ньхӧмандьне у һәла һе паши гәләк сала жи, әм диса жи шашийа бәрдьдьн. Дьqәwьмә щара хwәстьнед нәрʹаст щәм мә дькарьн пешда бен йан һәстед нәбаш, йан жи чәтьн бә сьстбунед хwә контрол кьн. Дьбәкә жи мәрʹа лазьм бә гәләк сала бьхәбьтьн сәр хәйсәт-һʹӧнӧред хwә.

6, 7. а) Рʹаст ә әм гӧнәкʹар ьн, ле бь сайа чь әм дькарьн бьбьнә достед Йаһоwа? б) Чьрʹа әм гәрәке хwә нәгьрьн кӧ жь Йаһоwа бахшандьне бьхwазьн?

⁶ Рʹаст ә әм гӧнәкʹар ьн, ле йәкә әм дькарьн бьбьнә достед Йаһоwа у wирʹа хьзмәт кьн. Чьрʹа әм дькарьн ӧса бежьн? Wәрә бьфькьрьн: Чахе Йаһоwа әм незики хwә кьрьн, әwи заньбу кӧ әме щара шашийа бькьн (Йуһʹн. 6:44). Йаһоwа мә рʹьнд нас дькә у занә дьле мәда чь йә, демәк әwи заньбу кӧ чь сьстбун у кемасийед мә һәнә. Ле йәкә, Йаһоwа хwаст кӧ әм бьбьнә достед wи.

⁷ Йаһоwа мә гәләк һʹьз дькә, у ләма әwи Кӧрʹе хwәйи һʹьзкьри сәва мә кьрә qӧрбан (Йуһʹн. 3:16). Чахе әм шашийа дькьн, бь сайа ве qӧрбане әм дькарьн жь Йаһоwа бахшандьне бьхwазьн. У әм гәрәке дӧдьли нәбьн, кӧ Йаһоwа wе мә бьбахшинә у диса мә һʹәсаб кә достед хwә (Рʹом. 7:24, 25; 1 Йуһʹн. 2:1, 2). Гәло гәрәке әм хwә бьгьрьн кӧ кʹара qӧрбане нәстиньн, чьмки әм гӧнәкʹар ьн у бь qьсур ьн? Һәрге әм хwә дьгьрьн кӧ кʹара qӧрбане нәстиньн, әw мина ве йәке йә, кӧ мәсәлә чахе дәсте мә qьрʹеж ә, ле әм аве нахwазьн сәва кӧ дәстед хwә бьшон. Qӧрбана Иса һатә дайине бона мәрьвед гӧнәкʹар, йед кӧ гӧнед хwә тиньн рʹуйе хwә. Әм гәләк рʹази нә бона ве qӧрбане, чьмки рʹаст ә әм мәрьвнә гӧнәкʹар ьн, ле йәкә әм дькарьн бьбьнә достед Йаһоwа! (Бьхунә 1 Тимотʹейо 1:15.)

8. Чьрʹа әм гәрәке кемасийед хwә пьшт гӧһе хwәва нәвежьн?

⁸ Бәле, әм кемасийед хwә гәрәке пьшт гӧһе хwәва нәвежьн. Һәрге әм дьхwазьн досте Йаһоwа бьн, әм гәрәке сәр хwә бьхәбьтьн, кӧ һе рʹьнд чʹәʹв бьдьнә wи у Кӧрʹе wи. Әм гәрәке мәрьве wи щурʹәйи бьн, чаwа кӧ Йаһоwа дьхwазә (Зәб. 15:1-5). Әм гәрәке бьхәбьтьн кӧ сьстбунед хwә контрол кьн, у чьqас дькарьн wан кемасийа нав хwәда дәрхьн. Фьрqи тʹӧнә әм тʹәзә һатьнә ньхӧмандьне йан ида гәләк сала нава рʹастийеда ньн, әм гәрәке бәрдәwам кьн тʹьме хwә рʹаст кьн (2 Корн. 13:11).

9. Әм жь кʹӧ заньн кӧ әм дькарьн тʹьме мәрьве ну ль сәр хwә wәргьрьн?

⁹ Әм гәрәке тʹьме сәр хwә бьхәбьтьн, сәва кӧ тʹьме «мәрьве ну» бьн. Паwлос готә Мәсиһийа: «Дә һун хәйсәте хwәйи бәре жь хwә дур хьн, wи мәрьве кәвьни кӧ бь һавьжийед һʹьләкʹарва дерьсбуйи йә у бь рʹӧһʹ у фькьред хwәда нуйәжийин бьн, мәрьве ну ль сәр хwә wәргьрьн, кӧ кьрасе Хwәдеда бь рʹастийе у һʹәлалийе бе qәлпи хӧльqи йә» (Әфәс. 4:22-24). Гьли «нуйәжийин бьн», дьдә кʹьфше кӧ әм гәрәке һәргав сәр хwә бьхәбьтьн, сәва кӧ мәрьве ну бьн. Демәк, фьрqи тʹӧнә әм чьqас wәхт Йаһоwарʹа хьзмәт дькьн, йәкә әм дькарьн тʹьме һин бьн чʹәʹв бьдьнә һʹӧнӧред Йаһоwа. Бь рʹастийе жи, Кʹьтеба Пироз али мә дькә кӧ әм хәйсәт-һʹӧнӧред хwә һе баш кьн, у нав хwәда гӧһастьнед ӧса бькьн, кӧ һе рʹьнд чʹәʹв бьдьнә Хwәде.

ЧЬРʹА ӦСА ЧӘТЬН Ә ГӦҺАСТЬНА БЬКЬН?

10. Әм чь гәрәке бькьн сәва кӧ бь сайа Кʹьтеба Пироз гӧһастьна бькьн, у кʹижан пьрс дьбәкә әм дьдьнә хwә?

¹⁰ Һәрге әм дьхwазьн кӧ Хәбәра Хwәде бәрдәwам кә мә бьгӧһезә, әм гәрәке гәләк сәр хwә бьхәбьтьн. Ле гәло чьрʹа ӧса чәтьн ә әве йәке бькьн? Һәрге Йаһоwа qәwата мә кʹәрәм дькә, wәки ӧса нә, гәло мәрʹа гәрәке һеса нибә кӧ гӧһастьна бькьн? Гәло Йаһоwа нькарә ӧса бькә, кӧ мәрʹа һеса бә һʹӧнӧред wи нав хwәда пешда биньн?

11-13. Чьрʹа Йаһоwа жь мә һивийе йә, кӧ әм гьран бьхәбьтьн сәва кемаси у сьстбунед хwә алт кьн?

¹¹ Чахе әм дьфькьрьн дәрһәqа гәрдуне, әм әʹщебмайи дьминьн кӧ qәwата Йаһоwа чьqас пʹьрʹ мәзьн ә. Мәсәлә, сәникида, тәʹв гәләк зәʹф рʹонайи у гәрмайе дьдә. Ле сәва кӧ мәрьв бьжин сәр әʹрде, лап һьндьк енергийа тәʹве лазьм ә (Зәб. 74:16; Иша. 40:26). Жь ве йәке те кʹьфше кӧ qәwата Йаһоwа гәләк ә, у әw дькарә qәwате бьдә хьзмәткʹаред хwә жи, чахе wанрʹа лазьм бә (Иша. 40:29). Демәк, Йаһоwа дькарә qәwате бьдә мә, сәва әм һәр кемаси йан сьстбунед хwә алт кьн. Ле гәло чьрʹа әw әwе йәке накә?

¹² Йаһоwа азайа бьжартьне дайә мә. Ләма чахе әм гӧрʹа Хwәде дькьн у qьрара wи тиньн сери, әм дьдьнә кʹьфше кӧ әм Йаһоwа гәләк һʹьз дькьн у дьхwазьн дьле wи ша кьн. Хенщи ве йәке, әм дьдьнә кʹьфше кӧ әм пьштгьрийа һʹӧкӧмәтийа wи дькьн, чьмки Шәйтʹан изьна һʹӧкӧмәтийа Йаһоwа кьрә бьн шьке. У ләма чахе әм гәләк дьхәбьтьн сәва гӧрʹа Йаһоwа бькьн, әм дьдьнә кʹьфше кӧ әм дьхwазьн wәки әw Сәрwере мә бә. Әм гәрәке дӧдьли нәбьн кӧ Йаһоwа гәләк qимәт дькә, чахе әм бь дьл qәwата хwә дьдьнә хәбате, сәва гӧрʹа wи бькьн (Иб. 2:3-5; Мәтʹлк. 27:11). Ле һәгәр Йаһоwа әм аза кьрана жь ве йәке кӧ әм шәрʹ кьн тʹәви кемаси у хәйсәтед хwәйә нәбаш, сәва кӧ әм wи хwәш бен, wи чахи амьнийа мә у пьштгьрийа мә һьндава сәрwертийа Хwәде, wе qәwата хwә ӧнда кьра.

¹³ Йаһоwа дьбежә мә, кӧ әм «һәр алийава» qәwата хwә бьдьнә хәбате, сәва кӧ чʹәʹв бьдьнә һʹӧнӧред wи (Бьхунә 2 Пәтрус 1:5-7; Колс. 3:12). Әw дьхwазә кӧ әм фькьр у һәстед хwә контрол кьн (Рʹом. 8:5; 12:9). Чахе әм гәләк дьхәбьтьн кӧ әве йәкеда гӧһастьна бькьн, әм бәхтәwар дьбьн, чьмки дьвиньн кӧ Кʹьтеба Пироз мә дьгӧһезә.

БЬРА КʹЬТЕБА ПИРОЗ БӘРДӘWАМ КӘ ТӘ БЬГӦҺЕЗӘ

14, 15. Әм чь дькарьн бькьн сәва чʹәʹв бьдьнә һʹӧнӧред Йаһоwа? (Бьньһерʹә чаргошә «Кʹьтеба Пироз у Дӧа, Әʹмьре Wан Гӧһаст».)

¹⁴ Әм чь дькарьн бькьн сәва чʹәʹв бьдьнә һʹӧнӧред Йаһоwа у дьле wи ша кьн? Бәс нинә хwәрʹа сафи кьн, кӧ әм чьда гәрәке хwә бьгӧһезьн. Сәва әм хwә бьгӧһезьн, әм гәрәке ширәтед Хwәде бьдьнә хәбате. Рʹомайи 12:2-да те готьне: «У нәкʹәвьнә кьрасе бәнде ве дьнйайе, ле сәр һʹьше хwәда wәрьн, нет-фькьред wә бьра ну бьн, wәки бьзаньбьн чь йә qьрара Хwәде, кӧ qәнщи, хwәши у кʹамьли йә». Йаһоwа бь сайа Хәбәра хwә у рʹӧһʹе хwәйи пироз, али мә дькә кӧ әм qьрара wи фәʹм бькьн, биньн сери у әʹмьре хwә ӧса бьгӧһезьн, чаwа Хwәде хwәш те. Әм гәрәке һәр рʹож Кʹьтеба Пироз бьхуньн у сәр бьфькьрьн. Хенщи ве йәке, әм гәрәке Хwәдерʹа дӧа бькьн, кӧ рʹӧһʹе хwәйи пироз бьдә мә (Луqа 11:13; Галт. 5:22, 23). Чахе әм wан һʹәму тьшта бькьн, әме фькьр, хәбәрдан, у кьред хwәда һе рʹьнд чʹәʹв бьдьнә Йаһоwа. Ле йәкә, паши ве йәке жи әм гәрәке диса бәрдәwам кьн сәр кемасийед хwә бьхәбьтьн (Мәтʹлк. 4:23).

¹⁵ Хенщи хwәндьна Кʹьтеба Пироз һәр рʹож, әм гәрәке пе әʹдәбйәтед мә Хәбәра Хwәде леколин бькьн. Ӧса әме бькарьбьн чʹәʹв бьдьнә һʹӧнӧред Йаһоwа. Мәсәлә, һьнәк хwәрʹа дьжберьн у тʹоп дькьн тʹемед жь «Бьрща Qәрәwьлийе» йан «Һʹьшйар Бьн!», йан щара башqә хwәрʹа рʹезед Кʹьтеба Пироз дьньвисьн, кʹижан кӧ али wан дькьн һʹӧнӧред Мәсиһити нав хwәда пешда биньн. Мәрʹа жи wе гәләк керһати бә кӧ ӧса бькьн, у паше щар-щара хwәрʹа бьхуньн. Әw йәк wе али мә бькә чʹәʹв бьдьнә һʹӧнӧред Йаһоwа у сьстбунед хwә алт кьн.

16. Чьрʹа әм гәрәке бәрхwә нәкʹәвьн, һәрге әм зу гӧһастьна накьн?

¹⁶ Һәрге тӧ тʹәхмин дьки, кӧ тӧ рʹӧһʹанида һеди пешда дьчи, бира хwәда хwәй кә кӧ wәʹдә лазьм ә сәва wе йәке. Чьмки әм гәрәке тʹьме сәр хwә бьхәбьтьн, wәки чʹәʹв бьдьнә һʹӧнӧред Хwәде. У әм гәрәке сәбьр бьн, чахе дьхwазьн кӧ Кʹьтеба Пироз нав мәда гӧһастьна бькә. Пешийе, әм гәрәке хwә һин кьн кӧ ль гора һинкьрьнед Кʹьтеба Пироз бьжин. Паше, wе мәрʹа дьһа һеса бә кӧ мина Йаһоwа бьфькьрьн, у кьред ӧса бькьн, кʹижан wи хwәш тен (Зәб. 37:31; Мәтʹлк. 23:12; Галт. 5:16, 17).

БЬФЬКЬРЬН КӦ ЧЬ АХЬРИЙА БАШ ҺИВИЙА МӘ ЙӘ

17. Чь ахьрийа баш әм дькарьн qазанщ кьн, һәрге әм Йаһоwарʹа амьн ьн?

¹⁷ Әм һивийа wи wәʹдәйи нә, чахе әме беqьсур бьн у һʹәта-һʹәтайе Йаһоwарʹа хьзмәт бькьн. Wи чахи, мәрʹа ида wе нәлазьм бә, кӧ qәwате хәрщ кьн сәва кемаси у сьстбунед хwә алт кьн. Мәрʹа wе дьһа һеса бә, кӧ чʹәʹв бьдьнә Йаһоwа. Ле бь сайа qӧрбана Иса әм ньһа жи дькарьн Йаһоwарʹа хьзмәт кьн. Рʹаст ә әм гӧнәкʹар ьн, ле йәкә дькарьн дьле Хwәде ша кьн, һәрге бәрдәwам кьн бь сайа Хәбәра wи нав хwәда гӧһастьна бькьн.

18, 19. Чьрʹа әм дькарьн баwәр бьн, кӧ Кʹьтеба Пироз дькарә тʹьме мә бьгӧһезә?

¹⁸ Кевин, дәрһәqа кʹижани жоре һатә готьне, һин бу һерса хwә контрол бькә. Әw дьфькьри сәр Кʹьтеба Пироз у чь кӧ педьһʹәсийа дьда хәбате. Әwи ӧса жи ширәт һьлдьда жь хушк-бьред щьватеда. У паши һьнә сала, Кевин хәйсәте хwә алийе башда гӧһаст. Ахьрийе, әw һатә кʹьфшкьрьне ча бәрдәстийе щьвате, у ида 20 сал ә кӧ әw рʹуспи йә. Ле әw занә кӧ һʹәта ньһа жи wирʹа лазьм ә сәр хwә бьхәбьтә, у сьстбунед хwә алт кә.

¹⁹ Әм жи мина Кевин дькарьн нав хwәда гӧһастьна бькьн. Ләма, wәрә тʹӧ щар нәсәкьньн у бь сайа Кʹьтеба Пироз бәрдәwам кьн бьбьнә мәрьве ну. Ӧса әме һе незики Йаһоwа бьн (Зәб. 25:14). У чахе әм дьвиньн кӧ Йаһоwа ча мә кʹәрәм дькә, әме дьһа избат бьн, кӧ Кʹьтеба Пироз дькарә бәрдәwам кә әʹмьре мә бьгӧһезә (Зәб. 34:8).