Бь Тʹәмами Кʹаре Бьстиньн жь Хwарьна Рʹӧһʹани кӧ Йаһоwа Дьдә Мә

1, 2. а) Шәʹдед Йаһоwа ча сәр Кʹьтеба Пироз дьньһерʹьн? б) Кʹижан пʹар жь Кʹьтеба Пироз wә хwәш те?

ШӘʹДЕД ЙАҺОWА Кʹьтеба Пироз һʹьз дькьн. Кʹьтеба Пироз бәрдьлийе у баwәрийа дәрһәqа ахьрийе дьдә. Әw рʹебәрийа рʹаст дьдә мә у мә һин дькә (Рʹом. 15:4). Кʹьтеба Пироз бона мә кʹьтеба мәрьва нинә, ле әw «хәбәра Хwәде» йә (1 Тʹеслн. 2:13).

² Бешьк, щәм мә һәр кәси һәйә пʹаред Кʹьтеба Пироз, кʹижан кӧ әм һʹьз дькьн. Мәсәлә, һьнәка хwәш те чар кʹьтебед пешьнә Мьзгинийе. Чьмки ль wедәре те гьликьрьне кӧ чаwа Иса пе жийина хwә әʹйан кьр, кӧ Йаһоwа Хwәдейе чьqас qәнщ ә (Йуһʹн. 14:9). Һьнәка хwәш те кʹьтебед пʹехәмбәртийе, мәсәлә кʹьтеба Әʹйанти. Чьмки ль wедәре пʹехәмбәрти һәнә, кʹижан кӧ «гәрәке зутьрәке бьqәwьмьн» (Әʹйан. 1:1). Жь мә гәләка хwәш те кʹьтеба Зәбур, чьмки чахе әм әве кʹьтебе дьхуньн, әм бәрдьлийе дьстиньн. Гәләка жи хwәш те кʹьтеба Мәтʹәлок, чьмки ль wедәре әм дәрс у ширәтед керһати дьстиньн. Бь рʹастийе жи, Кʹьтеба Пироз бона һәр кәса йә.

3, 4. а) Һун чь дьфькьрьн дәрһәqа әʹдәбйәтед мә? б) Кʹижан әʹдәбйәт әм дьстиньн кӧ бона щурʹә-щурʹә тенә дәрхьстьне?

³ Әм чаwа кӧ Кʹьтеба Пироз һʹьз дькьн, әм ӧса жи әʹдәбйәтед мә һʹьз дькьн, кʹижан кӧ сәр һʹиме Кʹьтеба Пироз ьн. Мәсәлә, әм дьстиньн кʹьтеба, брошура, журнала, у әʹдәбйәтед дьн. Бәле, әм гәләк qимәт дькьн у рʹази нә бона хwарьна рʹӧһʹани. У әм заньн кӧ әw хwарьна рʹӧһʹани жь Йаһоwа йә. Бь сайа ве хwарьна рʹӧһʹани, әм рʹӧһʹанида һʹьшйар дьминьн у баwәрийа хwә qәwи хwәй дькьн (Тито 2:2).

⁴ Хенщи әʹдәбйәта кӧ тенә дәрхьстьне бона Шәʹдед Йаһоwа, һәнә диса әʹдәбйәтед дьн сәр һʹиме Кʹьтеба Пироз, кʹижан кӧ тенә дәрхьстьне бона щурʹә-щурʹә мәрьва. Мәсәлә, һьнә әʹдәбйәт һатә дәрхьстьне сәва щаһьла, йан жи бона де-бава. Һʹәчʹи зәʹф әʹдәбйәтед нәшьркьри, готар у видеойед сәр малпәра мә, һатьнә дәрхьстьне бона нә Шәʹдед Йаһоwа. Бь рʹастийе жи, чьqас зәʹф у щурʹә-щурʹә хwарьна мәйә рʹӧһʹани һәйә. Әw йәк избат дькә кӧ Йаһоwа хwәйе созе хwә йә, у бона һʹәму мәрьва хәм дькә, сәва кӧ әwана һинкьрьне бьстиньн (Иша. 25:6).

5. Йаһоwа чь qимәт дькә?

⁵ Бәле, әм гьшк дьхwазьн кӧ гәләк wәʹде мә һәбә, сәва Кʹьтеба Пироз у әʹдәбйәтед мә бьхуньн. У әм гәрәке дӧдьли нәбьн, кӧ Йаһоwа qимәт дькә, чахе әм wәʹде хwә бь билани хәрщ дькьн, сәва тʹьме Кʹьтеба Пироз бьхуньн у һинбуна шәхси дәрбаз кьн (Әфәс. 5:15, 16). Ле щара wәʹде мә наминә кӧ һʹәму әʹдәбйәта бьхуньн, кʹижан кӧ әм дьстиньн. Ве йәкеда дькарә хоф һәбә, у ләма әм гәрәке фәсал бьн. Гәло әw чь хоф ә?

6. Жь бо чь әм дькарьн кʹаре нәстиньн, жь һьнә хwарьна рʹӧһʹани кӧ Йаһоwа дьдә мә?

⁶ Һәрге әм бьфькьрьн кӧ һьнә пʹаред жь Кʹьтеба Пироз йан һьнә әʹдәбйәтед мә бона мә ниньн, әв йәк гәләк хоф ә. Ле чьрʹа әм дькарьн ӧса бьфькьрьн? Мәсәлә, чахе әм һьнә рʹезед жь Кʹьтеба Пироз дьхуньн, әм дькарьн бьфькьрьн кӧ әw бона дәрәща мә нинә. Йан әм жь wан хwәндәвана ниньн, бона кʹе жи әw әʹдәбйәт һатә дәрхьстьне. Wи чахи әм чь дькьн, тʹәне сәрʹа-бәрʹа дьхуньн, йан һәла һе qә нә жи дьхуньн? Һәрге ӧса нә, әм дькарьн информасийа фәрз бәрʹдьн, кʹижан кӧ wе мәрʹа гәләк кʹар бьанийа. Ле әм ча дькарьн нәкʹәвьнә ве тʹәльке? Әм гәрәке бира хwәда хwәй кьн, кӧ һʹәму хwарьна рʹӧһʹани жь Йаһоwа йә. Йаһоwа бь Ишайа пʹехәмбәр гот: «Әз, Йаһоwа, Хwәдайе тә мә, йе кӧ тә һин дькә бона кʹара тә» (Иша. 48:17, ДТʹ). Ве тʹемайеда, әме шеwьр кьн се ширәта, кʹижан кӧ wе али мә бькьн, wәки әм жь һʹәму пʹаред Кʹьтеба Пироз у жь һʹәму щурʹә хwарьна рʹӧһʹани кʹаре бьстиньн.

ЧАWА ЖЬ ХWӘНДЬНА КʹЬТЕБА ПИРОЗ КʹАРЕ БЬСТИНЬН

7. Чьрʹа әм гәрәке Кʹьтеба Пироз бь нета рʹаст бьхуньн?

⁷ Бь нета рʹаст бьхуньн. Кʹьтеба Пироз әʹйан дьбежә кӧ «тʹәмамийа ньвисаре жь бина бәр Хwәде йә» (2 Тимтʹ. 3:16). Бәле, һьнә пʹаред Кʹьтеба Пироз, серида, конкрет бона кәсәки йан бона кʹомәкә мәрьва бу. Ләма жи лазьм ә әм Кʹьтеба Пироз бь нета рʹаст бьхуньн, у нәфькьрьн кӧ әw йәк бона мә нинә. Бьрак дьбежә: «Wәʹде хwәндьна Кʹьтеба Пироз, әз тʹьме тиньм бира хwә, кӧ жь ве пʹаре кʹижан әз дьхуньм, әз дькарьм чәнд дәрса хwәрʹа һин бьм. Әw йәк али мьн дькә кӧ хwәрʹа wан дәрса бьвиньм, кʹижан кӧ вәшарти нә». Пешийа кӧ әм Кʹьтеба Пироз бьхуньн, әм гәрәке жь Йаһоwа һиви кьн, кӧ али мә бькә әм бь нета рʹаст бьхуньн. Ӧса жи, дӧада әм дькарьн жь Йаһоwа биланийе бьхwазьн, сәва кӧ хwәрʹа дәрса бьвиньн, кʹижан кӧ Йаһоwа дьхwазә әм һин бьн. (Әзр. 7:10; бьхунә Аqуб 1:5.)

8, 9. а) Чахе әм Кʹьтеба Пироз дьхуньн, әм кʹижан пьрса дькарьн бьдьнә хwә? б) Әм чь педьһʹәсьн дәрһәqа Йаһоwа, жь ве йәке кӧ әw кʹижан һʹӧнӧр жь рʹуспийа дәʹwа дькә?

⁸ Wәʹде хwәндьне, пьрса бьдә хwә. Чахе тӧ Кʹьтеба Пироз дьхуни, бьсәкьнә у пьрсед ӧса бьдә хwә: «Ль wьр әз чь педьһʹәсьм дәрһәqа Йаһоwа? Әз ча дькарьм әве информасйайе жийина хwәда бьдьмә хәбате? Әз ча дькарьм бь сайа ве информасйайе, али йед дьн бькьм?» Чахе әм бьфькьрьн сәр пьрсед wи щурʹәйи, әме жь хwәндьна Кʹьтеба Пироз һе зәʹф кʹаре бьстиньн. Wәрә мәсәле шеwьр кьн. Кʹьтеба Пирозда те готьне кӧ чь те дәʹwакьрьне жь рʹуспийа. (Бьхунә 1 Тимотʹейо 3:2-7.) Бәле, гәләк жь мә рʹуспи ниньн, ләма пешийе әм дькарьн бьфькьрьн, кӧ әw рʹез бона мә ниньн, у бона мә керһати ниньн. Ле wәрә әм ньһа әw се пьрс шеwьр кьн, у бьвиньн кӧ әм жь wан дәʹwакьрьнед бона рʹуспийа, чь кʹаре дькарьн бьстиньн.

⁹ Ль wьр әз чь педьһʹәсьм дәрһәqа Йаһоwа? Йаһоwа Кʹьтеба Пирозда кʹьфш кьр, кӧ рʹуспи гәрәке чь щурʹәйи бьн. Демәк Йаһоwа жь wан бьра, йед кӧ бона щьвате хәм дькьн, һе зедә дәʹwа дькә. Әw жь wан һивийе йә кӧ әwана мәсәла баш бьн. Хенщи ве йәке, әwана щабдар ьн бәр Йаһоwа бона щьвате, кʹижан кӧ әwи «бь хуна Кӧрʹе хwә» qазанщ кьрийә. Жь ве йәке әм дьвиньн, кӧ бона Йаһоwа щьват гәләк qимәт ә (Кʹар. Шанд. 20:28). Йаһоwа дьхwазә кӧ бь сайа хәмкьрьна рʹуспийа, әм хwә хwәйкьри тʹәхмин кьн (Иша. 32:1, 2). Чахе әм Кʹьтеба Пирозда дьхуньн дәʹwакьрьнед сәва рʹуспийа, әм дьвиньн кӧ Йаһоwа чьqас зәʹф бона мә хәм дькә.

10, 11. а) Чахе әм дьхуньн дәʹwакьрьнед бона рʹуспийа, әм ча дькарьн әве информасйайе жийина хwәда бьдьнә хәбате? б) Әм ча дькарьн әве информасйайе бьдьнә хәбате сәва али йед дьн бькьн?

¹⁰ Әз ча дькарьм әве информасйайе жийина хwәда бьдьмә хәбате? Щар-щара, рʹуспийарʹа лазьм ә бьфькьрьн сәр wан рʹеза у тедәрхьн кӧ чьда әwана дькарьн һе пешда һәрʹьн. Һәрге «тәме йәки ль сәрwертийе һәйә», әw гәрәке кʹур бьфькьрә сәр wан дәʹwакьрьна. Ӧса жи әw гәрәке wан тьштада ида пешдачуйи бә (1 Тимтʹ. 3:1). Ле жь wан дәʹwакьрьна, һәр Мәсиһи дькарә кʹаре бьстинә у һин бә. Чьмки Йаһоwа жь мә һәр кәси һивийе йә кӧ әм бәрбьһер бьн у аqьлда гьран бьн (Фили. 4:5; 1 Пәт. 4:7). Чахе рʹуспи «нәхше qәнщ» ьн, әм дькарьн жь wана һин бьн у «чʹәʹв бьдьнә баwәрийа wан» (1 Пәт. 5:3; Ибрн. 13:7).

¹¹ Әз ча дькарьм бь сайа ве информасйайе, али йед дьн бькьм? Әм дькарьн әв дәʹwакьрьнед бона рʹуспийа шеwьр кьн тʹәви wан, йед кӧ Кʹьтеба Пироз һин дьбьн, йан жи тʹәви wан, һʹәwаса кʹе һьндава рʹастийе һәйә. Ӧса әм дькарьн али wан мәрьва бькьн, кӧ бьвиньн фьрqийа ортʹа рʹуспийед Шәʹдед Йаһоwа у сәрwеред рʹелигийед дьн. Бона мә жи кʹар ә, кӧ әм бьфькьрьн сәр ве йәке, кӧ рʹуспийед щьвата мә шьхӧле чьqас гьран сәва мә дькьн. Чахе әм дәрһәqа wан бьфькьрьн, әме һе «qәдьре wан бьгьрьн», йед кӧ рʹебәрийе һьлдьн сәр хwә (1 Тʹеслн. 5:12). У чьqас зәʹф әм һьндава wан qәдьр бьдьнә кʹьфше, һаqас зәʹф әwана wе шьхӧле хwәда шабуне бьстиньн (Ибрн. 13:17).

12, 13. а) Әм ча дькарьн бь һащәтед кӧ щәм мә һәнә, леколина бькьн? б) Биньн мәсәлә, кӧ чаwа әм жь информасийа тʹәрихийе дькарьн дәрса хwәрʹа һьлдьн, кʹижан кӧ дәрберʹа найенә кʹьфше?

¹² Леколин бькьн. Бь һащәтед кӧ щәм мә һәнә, әм дькарьн щабед пьрсед ӧса бьгәрʹьн:

• Кʹе ньвисийә әw пʹара жь Кʹьтеба Пироз?

• Кʹидәре у кʹәнге әw һатийә ньвисаре?

• Чь qәwьмандьнед фәрз qәwьминә чахе әw пʹара Кʹьтеба Пироз һатә ньвисаре?

Әw информасйа зедә дькарә али мә бькә, кӧ хwәрʹа дәрса бьвиньн, кʹижан кӧ дәрберʹа найенә кʹьфше.

¹³ Мәсәлә, шеwьр кьн Һәзәqел 14:13, 14. Йаһоwа гот: «Дәма wәлатәк сущ бькә у ль дьжи мьн хайинтийе бькә у әзе дәсте хwә дьрежи сәр wе бькьм у аликʹарийа wейи нан бьшкиньм у хәлайе бь сәр wева бьшиньм у мьров у һʹәйwан жь ве жебькьм у бавежьм. Нӧһ, Данийел, Ибо, әw һәр се зьлам ль wьр бьн жи, бь рʹастийа хwә wе тʹәне щанед хwә хьлаз бькьн». Һәрге әм һьнәки леколин бькьн, әме пебьһʹәсьн кӧ әw пʹар Һәзәqел незикайа сала 612 Б.Д.М., ньвиси бу. Wи чахи, Нӧһ у Ибо ида сәда сала пешда мьрьбун, ле йәкә амьнийа wан диса бира Йаһоwада бу. Ле Данийел wи чахи һәла һе сах бу. Дьqәwьмә әw wәкә 20 сали бу, чахе Йаһоwа әв гьли гот, кӧ Данийел мина Нӧһ у Ибо мәрьвәки рʹаст ә. Жь ве йәке әм чь педьһʹәсьн? Йаһоwа дьвинә у qимәт дькә амьнийа һәр хьзмәткʹаред хwә, у ӧса жи йед щаһьла (Зәб. 148:12-14).

КʹАР ЖЬ ЩУРʹӘ-ЩУРʹӘ ӘʹДӘБЙӘТА

14. Ча әʹдәбйәт кӧ бона щаһьла те дәрхьстьне али wан дькьн, у ча йед дьн жи дькарьн жь wан әʹдәбйәта кʹаре бьстиньн? (Бьньһерʹә шькьле әʹwльн.)

¹⁴ Әм ньһа пеһʹәсийан, кӧ әм чаwа дькарьн кʹаре бьстиньн жь һʹәму пʹаред Кʹьтеба Пироз. Әм ӧса жи дькарьн жь һʹәму әʹдәбйәтед мә кʹаре бьстиньн. Wәрә һьнә мәсәла шеwьр кьн. Әʹдәбйәт бона щаһьла. Wан пашwәхтийа, гәләк әʹдәбйәт һатьнә дәрхьстьне сәва щаһьла.^[1] Һьнә жь wан әʹдәбйәта аликʹарийе дьдьн wан, чахе әwана мәкʹтәбеда рʹасти щерʹьбандьна тен, йан wәʹде чәтьнайед салед хwәйи щаһьлтийе. Ле әм һʹәмушк чь кʹаре дькарьн бьстиньн жь wан әʹдәбйәта? Чахе әм wан әʹдәбйәта бьхуньн, әме пебьһʹәсьн кӧ щаһьл рʹасти кʹижан проблема тен. Паше, әме бькарьбьн һе баш али wан бькьн у wана qәwи кьн.

15. Чьрʹа хенщи щаһьла, Мәсиһийед дьн жи гәрәке әʹдәбйәтед бона щаһьла бьхуньн?

¹⁵ Гәләк проблемед кӧ рʹасти щаһьла тен, рʹасти мәзьна жи тен. Мәсәлә, мә һʹәмушкарʹа лазьм ә баwәрийа хwә хwәй кьн, емосийед хwә контрол бькьн, щерʹьбандьнада тәйах кьн у дур бьн жь һәвалед хьраб у wәʹдәдәрбазкьрьнед нәрʹаст. Бәле, әw әʹдәбйәт һатьнә дәрхьстьне бона щаһьла. Ле гәло Мәсиһийед мәзьн гәрәке бабах бьн у нәхуньн wан әʹдәбйәтед бона щаһьла? На! Чьмки һʹәму әʹдәбйәтед мә сәр һʹиме принсипед Кʹьтеба Пироз ьн, у ләма һәр кәс жь мә дькарә кʹаре бьстинә жь wан әʹдәбйәта.

16. Диса чьда әʹдәбйәтед мә али щаһьла дькьн?

¹⁶ Әʹдәбйәтед мә кӧ бона щаһьла һатьнә дәрхьстьне, дькарьн ви алида жи али wан бькьн, кӧ рʹӧһʹанида һе мәзьн бьн у незики Йаһоwа бьн. (Бьхунә Wаиз 12:1, 13.) У йед мәзьн жи дькарьн кʹаре бьстиньн. Мәсәлә, журнала «Һʹьшйар Бьн!» йа мәһа Нисане сала 2009-да һәбу готар, бь наве «Щаһьл Дьпьрсьн . . . Әз Ча Дькарьм Хwәндьна Кʹьтеба Пироз һе Һʹәwас кьм?» Ве готареда гәләк ширәт һәбун, у ӧса жи чаргошә, кʹижан кӧ дькарьн бьбьрʹьн у хwәй кьн, сәва леколинкьрьна Кʹьтеба Пироз. Ле гәло жь ве готаре йед мәзьн жи кʹар стандьнә? Qизькәке кӧ де йә у зарʹед wе һәнә, гьли дькә: «Мьнрʹа тʹьме чәтьн бу wәʹдә хwәрʹа бьвиньм, сәва кӧ Кʹьтеба Пироз бьхуньм. Ле паше мьн әв готар хwәнд, у дәстпекьр әв чаргошә бьдьмә хәбате. Ньһа әз шабуне дьстиньм, чахе Кʹьтеба Пироз дьхуньм. Әз ида дькарьм бьвиньм, кӧ ча щурʹә-щурʹә кʹьтебед Кʹьтеба Пироз, һәвва гьредайи нә. Хwәндьна Кʹьтеба Пироз тʹӧ щар ӧса мьн хwәш нәдьһат».

17, 18. Әм чь кʹаре дькарьн бьстиньн жь әʹдәбйәтед кӧ бона бәлакьрьне нә? Мәсәла биньн.

¹⁷ Әʹдәбйәт бона бәлакьрьне. Жь сала 2008, әм дьстиньн журнала «Бьрща Qәрәwьлийе» бона һинбуне, кʹижан кӧ пешийе бона Шәʹдед Йаһоwа те дәрхьстьне. Ле диса һәйә щәм мә әʹдәбйәт, кӧ бона нә Шәʹдед Йаһоwа тенә дәрхьстьне. Гәло әм дькарьн жь wан әʹдәбйәта жи кʹаре бьстиньн? Wәрә пе мәсәла пебьһʹәсьн. Бьдә бәр чʹәʹве хwә кӧ щарәке, пешийа кӧ готар щьватеда дәстпебә, тӧ дьвини кӧ мәрьве кʹижан кӧ тә тʹәглиф кьрийә, дькʹәвә Ода Щьвате. Бешьк, тӧ гәләк ша дьби. Wәʹде готаре, тӧ дьфькьри дәрһәqа wи мәрьви. Тӧ хwә датини дәwса wи, һәла әw мәрьв wе чь бьфькьрә дәрһәqа ве готаре. Ахьрийе, әw готар дьле тә дьгьрә у тӧ гәләк рʹази йи сәва ве готаре.

¹⁸ Әм жи тьштәки ӧса дькарьн сәр хwә тʹәхмин кьн. Мәсәлә, «Бьрща Qәрәwьлийе» йа бона бәлакьрьне, тʹемед Кʹьтеба Пироз һеса шьровәдькә, сәва мәрьвед кӧ Шәʹдед Йаһоwа ниньн фәʹм бькьн. Ӧса жи готаред сәр малпәра jw.org жи, һеса һатьнә ньвисаре, мәсәлә готаред «Пьрсед Кʹьтеба Пирозва Гьредайи» у «Пьрсед Гәләк Мәрийа». Чахе әм wан готара дьхуньн, әм һе кʹур фәʹм дькьн у рʹази нә бона рʹастийед жь Кʹьтеба Пироз. Хенщи ве йәке, әм педьһʹәсьн кӧ ча wәʹде хьзмәтийе, бь щурʹе тʹәзә дәрһәqа баwәрийа хwә мәрьварʹа шьровәкьн. Ӧса жи, журнала «Һʹьшйар Бьн!» али мә дькә, кӧ әм баwәрийа хwә qәwи кьн, кӧ Хwәдайе рʹаст һәйә. Ӧса жи, әw журнал али мә дькә кӧ әм мәрьварʹа баwәрийа хwә избат кьн. (Бьхунә 1 Пәтрус 3:15.)

19. Әм ча дькарьн сәва хwарьна рʹӧһʹани, Йаһоwарʹа рʹазибуне бьдьнә кʹьфше?

¹⁹ Бәле, рʹасти жи Йаһоwа чьqас гәләк тьшт дьдә мә, сәва әм рʹӧһʹанида бәләнгаз нибьн (Мәт. 5:3). Дә wәрә әм тʹьме бьхуньн у бьдьнә хәбате һʹәму әʹдәбйәт кӧ щәм мә һәнә. Ӧса әме гәләк кʹаре бьстиньн, у рʹазибуна хwә бьдьнә кʹьфше һьндава Йаһоwа, кʹижан кӧ мә һин дькә бона кʹара мә (Иша. 48:17).