Әwана Бь Рʹәзәдьли Хьзмәт Дькьн

ГӘЛӘК хушкед азәп хьзмәт дькьн wан wәлатада кʹидәре кö һʹәwщәти һәйә. Һьнәк жь wан, бь дәһа сала хьзмәт дькьн wәлатед хәрибда. Ле гәло чь али wан кьр, wәки wана гәләк сал пешда сафи кьрьн, кö дәрбази wәлате хәриб бьн? Wәʹде хьзмәтийа wан wәлатада, әwана чь хwәрʹа һин бун? Ча әʹмьре wан һатә гöһастьне? Мә жь wан чәнд хушка интервийу һьлда. Һәрге тö хушкәкә азәп и, у тö гәләк дьхwази wәки мина wан хьзмәт ки у шабуне бьстини, әw интервийу дькарьн кʹаре бьдьнә тә. Бь рʹастийе, һәр кәс жь мә дькарә жь сәрһатийа wан кʹаре бьстинә.

ИДА ДÖДЬЛИ НИБУН

Һәрге тö хушкәкә азәп и, дьбәкә тö фькьрийи һәла тöйе бь рʹастийе бькарьби wәлате хәрибда ча пешәнг хьзмәт ки йан на. Анита, кö ньһа 75 сали йә, дöдьли бу кö wе бькарьбә хьзмәт кә wәлате хәрибда. Әw Инглистанеда мәзьн бу у ль wедәре 18 салийа хwәда ча пешәнг хьзмәт дькьр. Әw дьбежә: «Мьн гәләк һʹьз дькьр дәрһәqа Йаһоwа мәрьва һин кьм, ле мьн тʹö щар нә жи баwәр дькьр, wәки әзе бькарьбьм хьзмәт кьм wәлате хәрибда. Әз qә зьмане хәриб һин нәбьбум у әз дьфькьрим, wәки әзе нә жи бькарьбьм һин бьм. Ләма әз гәләк әʹщебмайи мам, чахе мьн тʹәглифи Мәкʹтәба Гиләд кьрьн. Мьн баwәр нәдькьр wәки мәрьве мина мьн wе тʹәглифкьрьнәкә öса бьстинә. Ле йәкә мьн хwәрʹа гот, ‹Һәрге Йаһоwа дьфькьрә кö әз дькарьм, чь жи һәбә әзе бькьм›. Әw йәк 50 сала пешда qәwьми. Һʹәта ньһа әз Жапонйайеда ча мисйонер хьзмәт дькьм». Анита зедә дькә: «Бь чʹәʹвед чʹурьси щара әз хушкед щаһьлрʹа дьбежьм: ‹Һәрге һун дьхwазьн рʹеwитийа гәләк һʹәwас, дә чәнтʹе хwә һьлдьн у тʹәви мьн wәрʹьн›. Әз ша мә wәки гәләка һәма öса жи кьрьн».

ҺАЗЬР ЬН ӘW ГАВ БАВЕЖЬН

Гәләк хушк йед кö хьзмәт дькьн wәлатед хәрибда, пешийе дöдьли дьбун һәла дәрбаз бьн wәлате хәрибда йан на. Ле гәло чь wана һелан кьр нета öса дайньн пешийа хwә?

Маурин кö ньһа 64 сали йә гьли дькә: «Щаһьлтийеда мьн гәләк дьхwәст wәки әʹмьре хwә рʹаст дәрбаз кьм у али мәрьва бькьм». Чахе Маурин бу 20 сали, әw дәрбази Кwебек бу (Канада), кʹидәре кö һе зедә пешәнг лазьм бун. Әw дьбежә: «Паше мьн тʹәглифи Мәкʹтәба Гиләд кьрьн, ле әз дьтьрсийам wәки әзе һәрʹьм щийе нәнас у хәриб, бей һәвалед хwә. Әз öса жи бәрхwә дькʹәтьм кö дийа хwә дьһельм, кʹижан кö мьqати баве мьни нәхwәш дьбу. Гәләк шәв мьн бь һесьра Йаһоwарʹа дöа дькьр бона чуйина хwә. Чахе мьн тʹәви де-баве хwә хәбәрда дәрһәqа хәмед хwә, әwана мьн ширәт кьрьн wәки әз һәрʹьмә Гиләде. Мьн öса жи дьдит wәки щьватеда хушк-бьра ча бь һʹьзкьрьн али де-баве мьн дькьрьн. Чахе мьн дәсте Йаһоwа дьдит, әз qә дöдьли нәдьбум wәки әw wе али мьн бькә у мьqати мьн бә. Wи wәʹдәйи әз ида һазьр бум wәки һәрʹьм!» Дәстпека сала 1979, Маурин ча мисйонер 30 сала зедәтьр хьзмәт дькьр Африкайа Рʹоһьлатеда. Иро, әw Канадайеда мьqати дийа хwә дьбә, у һьн жи ча пешәнге мәхсус хьзмәт дькә. Чахе әw тинә бира хwә хьзмәтийа хwә wәлате хәрибда, әw дьбежә: «Йаһоwа тʹьме дьда мьн ве йәке чь кö мьнрʹа лазьм бу у кʹәнге лазьм бу».

Wенди, кö ньһа 65 сали йә, чахе 14 сали бу дәстпекьр ча пешәнг хьзмәт кә Австралйайеда. Әw тинә бира хwә: «Әз гәләк шәрмокә бум у мьнрʹа чәтьн бу тʹәви мәрьвед нәнас хәбәр дьм. Ле чахе әз бумә пешәнг, әз һин бум wәки тʹәви щурʹә-щурʹә мәрьва хәбәр дьм, у ләма мьн ида һеса тʹәви мәрьва хәбәр дьда. Әз öса жи һин бумә кö итʹбарийа хwә Йаһоwа биньм, у ида мьнрʹа чәтьн нибу һәрʹьм wәлате хәрибда хьзмәт кьм. Öса жи хушкәкә азәп, кʹижан кö бәре 30 сала зедәтьр ча мисйонер Жапонйайеда хьзмәт дькьр, мьн тʹәглиф кьр wәки тʹәви wе һәрʹьм сәр се мәһа wедәре хьзмәт кьм. Чахе мьн тʹәви wе хьзмәт дькьр, әз һелан бум wәки wәлате хәрибда хьзмәт кьм». Сала 1986-да, Wенди дәрбази Вануату бу, кʹижан кö жь Австралйа рʹоһьлате 1 770 км дур ә.

Wенди һʹәта ньһа Вануатуйеда йә у хьзмәт дькә офиса wәлгәрʹандьнеда. Әw дьбежә: «Чахе әз дьвиньм wәки ча кʹом у щьватед тʹәзә саз бун щийед кö жь шәһәр дур ьн, әз гәләк ша дьбьм. Бона мьн qәдьрәки гәләк мәзьн ә, wәки әз wан гьравада жи дькарьм шьхöле Йаһоwа пешда бьвьм».

Кумико, кö ньһа 65 сали йә, хьзмәт дькьр ча пешәнге мәхсус Жапонйайеда. Паше һәвала wе жерʹа гот wәки һәрʹьн дәрбази Нәпале бьн. Кумико дьбежә: «Әwе тʹьме мьнрʹа дьгот wәки әм дәрбаз бьн, ле әз диса жи qайил нәдьбум. Әз бәрхwә дькʹәтьм wәки әз гәрәке зьмане тʹәзә һин бьм у гәрәке һини тьштед тʹәзә бьм. Öса жи нәһеса бу пʹәра дәстхьм, сәва кö дәрбази wәлате хәриб бьм. Wи wәʹдәйи чахе мьн дәрһәqа wан тьшта хәм дькьр, әз кʹәтьмә аварийе у әз бьрьмә нәхwәшхане. Wедәре әз дьфькьрим: ‹Кʹе занә паше диса wе чь бе сәре мьн? Дьбәкә әз нәхwәшийа гьран кʹәвьм у ида нькарьбьм wәлате хәрибда хьзмәт кьм. Ләма жи wе баш бә wәки әз һәма саләке хьзмәт кьм wәлате хәрибда›. Мьн бь кʹәла дьле хwә дöа дькьр Йаһоwарʹа кö али мьн бькә, wәки әз сафикьрьна рʹаст бькьм». Чахе Кумико дәркʹәт жь нәхwәшхане, әw сәр wәʹдәки кьн чу Нәпале. У паше жи әw тʹәви һәвал-хьзмәткʹаре хwә кö пешәнг бу, ида дәрбази wи wәлати бу.

Чахе Кумико дькә бира хwә дәһ салед хwәйә дәрбазбуйи кö әwе хьзмәт дькьр Нәпаледа, әw дьбежә: «Әw чәтьнайед дәрһәqа чь жи әз бәрхwә дькʹәтьм, дәрбаз бун, чаwа Исраели Бәʹра Соррʹа дәрбаз бун. Әз гәләк ша мә кö мьн хьзмәт дькьр wи wәлатида кʹидәре кö һʹәwщәти һәбу. Гәләк щар чахе әз малбәтәкеда дәрһәqа мьзгинийа жь Кʹьтеба Пироз гьли дькьм, һьнге пенщ йан шәш щинар жи тен у тʹәви мә дьбьн, wәки әwана жи гöһе хwә бьдьнә мә. Һәла һе зарʹа жи жь мьн һиви дькьрьн, wәки бәлавока дәрһәqа Кʹьтеба Пироз бьдьмә wан. Әз гәләк шабуне дьстиньм, wәки хьзмәт дькьм wе територйайеда кö мәрьв дьбьһен».

САФИКЬРЬНА ЧӘТЬНАЙА

Әʹщебмайи нинә wәки әw хушкед мерхас рʹасти чәтьнайа жи һатьн. Ле гәло ча wана әw чәтьнайи дәрбаз кьрьн?

Диан кö жь Канадайе йә, дьбежә: «Пешийе, мьнрʹа чәтьн бу кö әз жь малбәта хwә гәләк дур бум». Ньһа әw 62 сали йә, әwе 20 сала хьзмәт дькьр ча мисйонер Кот Девуареда. Әw гьли дькә: «Мьн Йаһоwарʹа дöа дькьр, wәки әw али мьн бькә сәва әз әwе щьмәʹте һʹьз бькьм, кʹидәре кö әз хьзмәт дькьм. Дәрсдарәки жь Мәкʹтәба Гиләде, Щек Редфорд, мәрʹа гот кö чахе әм һʹале мәрьва бьвиньн територйа хwәда, пешийе дьбәкә тʹәвһәв бьн, у һәла һе әʹщебмайи жи бьминьн, илаһи чахе кʹәсиббуне бьвиньн. Ле паше әwи гот: ‹Дина хwә нәдьн кö әwана кʹәсиб ьн. Дина хwә бьдьн, wәки әwана чь тʹәхмин дькьн чахе рʹастийед жь Кʹьтеба Пироз педьһʹәсьн›. Мьн һәма öса жи кьр, у әwе йәке кʹәрәмәкә мәзьн мьнрʹа ани! Чахе мьн мьзгинийа дәрһәqа Пʹадшатийе мәрьварʹа гьли дькьр, мьн дьдит, wәки чʹәʹве wана ча дьчʹурьсьн!» Ле диса чь али Диан кьр, wәки һини хьзмәтийа wәлате хәрибда бә? «Һәләqәтийа мьн тʹәви wан, кʹе жи мьн Кʹьтеба Пироз һин дькьр, qәwи бу у әз гәләк ша дьбум чахе мьн дьдит wәки әwана ча дьбьнә хьзмәткʹаред Йаһоwайи амьн. Мисйонерти бона мьн бу ча мал. Мьн де у бав, хушк у бьред рʹöһʹани qазанщ кьр, ча кö Иса соз да» (Марq. 10:29, 30).

Ан, кö ньһа 46 сали йә, Асйайеда хьзмәт дькә, кʹидәре кö шьхöле мә qәдәхәкьри йә. Әw гьли дькә: «Нава гәләк салада мьн wәлате хәрибда щурʹә-щурʹә щийада хьзмәт дькьр, у әз тʹәви хушка дьмам, йед кö жь щурʹә-щурʹә мьләта бун у хәйсәттда жи щурʹә-щурʹә бун. Щара, жь бо ве йәке мә һәв фәʹм нәдькьр у дьле һәвдö дьешанд. Чахе öса дьqәwьми, мьн һʹәму тьшт дькьр кö дьһа незики wан бьм, сәва һе рʹьнд фәʹм бькьм култура wан. Öса жи әз һин бум, wәки һе бь һʹьзкьрьн бьм тʹәви wан у wана фәʹм бькьм. Әз гәләк ша мә, wәки әw йәк бәред баш ани у мьн һәвалед незик хwәрʹа дит, кʹижан кö али мьн кьрьн wәки әз кʹьфшкьрьна хwәда бьминьм».

Уте жь Алманйайе, кö ньһа 53 сали йә, сала 1993 һатә кʹьфшкьрьне ча мисйонер Мадагәскареда. Әw гьли дькә: «Пешийе, мьнрʹа чәтьн бу, wәки зьмане тʹәзә һин бьм, öса жи һини һәwайе бьм, у хwә жь нәхwәшийа маләриа, амоеба у кöрмед парасит хwәй кьм. Ле мьн аликʹарийа гәләк мәзьн станд. Хушкед wе мьһаледа, зарʹед wан у әw мәрьвед кʹе жи мьн Кʹьтеба Пироз һин дькьр, бь сәбьр али мьн кьрьн, wәки зьман һин бьн. Һәвал-хьзмәткʹаре мьн дьл-әшq мьqати мьн дьбу чахе әз нәхwәш дькʹәтьм. Ле лап зәʹф Йаһоwа али мьн кьр. Мьн тʹьме дöада дьле хwә жерʹа вәдькьр. Паше, әз һивийа щаба дöайед хwә дьбум, щара чәнд рʹожа, щара жи бь мәһа һивийе бум. Бь рʹастийе Йаһоwа һәр чәтьнайе мьн сафи кьр». Ида 23 сал ә кö Уте хьзмәт дькә Мадагәскареда.

ЖИЙИН КÖ БЬ КʹӘРӘМА ТʹЬЖӘ ЙӘ

Мина wан хушк-бьра йед кö хьзмәт дькьн щийед кö һʹәwщәти һәйә, хушкед азәп жи йед кö wәлате хәрибда хьзмәт дькьн дьбежьн wәки әw хьзмәткьрьн гәләк кʹәрәма тинә. Ле гәло wана чь кʹәрәм стандьн?

Һиде, жь Алманйайе, кö ньһа 73 сали йә, жь сала 1968 Кот Девуареда мисйонер ә. Әw гьли дькә: «Шабунәкә мьнә мәзьн әw ә, wәки әз дьвиньм кö чаwа зарʹед мьнә рʹöһʹани ‹бәрдәwам дькьн сәр рʹийа рʹастийе дьчьн›. Һьнәк жь wан кʹижана кö мьн Кʹьтеба Пироз һин дькьр, ньһа пешәнг у рʹуспи нә. Гәләк жь wан мьн нав дькьн Дайе йан жи Пирке. Йәк жь wан рʹуспийа, тʹәви жьна хwә у зарʹед хwә, мьн һʹәсаб дькьн ча нәфәре мала хwә. Демәк, Йаһоwа мьнрʹа дайә кöрʹ, бук, у се нәби» (3 Йуһʹн. 4).

Карен жь Канадайе, кö ньһа 72 сали йә, 20 сала зедәтьр хьзмәт дькьр Африкайа Рʹоһлатеда. Әw дьбежә: «Хьзмәтийа мисйонерти мьн һин кьр, wәки әз һе зедә бькьм бона шьхöле Хwәде, бь һʹьзкьрьн у бь сәбьр бьм. Öса жи, әз һе һеса мәрьва фәʹм дькьм, чьмки мьн тʹәви хушк-бьред жь щурʹә-щурʹә мьләта һәвкʹари дькьр. Мьн фәʹм кьр, wәки гәләк тьшта әз дькарьм бь щурʹәки майин жи бькьм. У чьqас кʹәрәмәкә баш ә, wәки ньһа һәвалед мьн һәнә, йед кö жь щурʹә-щурʹә wәлата нә. Рʹаст ә әʹмьре мә у кʹьфшкьрьнед мә тенә гöһастьн, ле йәкә һәвалти дьминә».

Маргарет, жь Инглистане, кö ньһа 79 сали йә, Лаоседа ча мисйонер хьзмәт дькьр. Әw дьбежә: «Йа пешьн, хьзмәткьрьна wәлате хәрибда чʹәʹве мьн вәкьр, кö Йаһоwа ча һʹәму мьләта незики тʹәшкиләта хwә дькә. Әw йәк баwәрийа мьн гәләк qәwи кьр. Әз һе qайим итʹбарийа хwә Йаһоwа тиньм, wәки әw рʹебәрийа тʹәшкиләта хwә дькә у кö әw wе qьрара хwә бинә сери».

Бәле, хушкед азәп кö wәлате хәрибда хьзмәт дькьн, шьхöләки мәзьн дькьн бона шьхöле Хwәде. Әwана рʹасти жи һежайи пʹайа нә (Һʹакьм. 11:40). Һәжмара wан һе зедә дьбә, у әw йәк гәләк баш ә (Зәб. 68:11). Ле һун дькарьн дәрәща хwә бьгöһезьн, у чʹәʹв бьдьнә wан хушкед хирәт йед кö интервийу да? Һәрге һун öса бькьн, һуне әʹсә «тәʹм кьн у бьзаньбьн кö Хöдан ча qәнщ ә!» (Зәб. 34:8)