Һәвалтийа Тʹәви Мәрьвед Билан Кʹар Мьнрʹа Ани

ТЕ БИРА мьн гәләк сал пешда, шәбәqәке, шәһәре Брукингсе (Дакотайа Башуре, Дәwләтед Амәрикайа Йәкбуйи), һәwа гәләк сар бу. Әз тʹәви кʹомәкә бьчʹук гома сарда бум у әм дьрʹьщьфин. Wедәре һʹәwзәки мәзьн һәбу бь ава сар тʹьжә! Пешийа кö бежьм әм чьрʹа wедәре бун, әзе дәрһәqа әʹмьре хwә һьнәки wәрʹа гьли кьм.

МАЛБӘТА МЬН

Әз 7 Адаре сала 1936-да һатьмә буйине. Әм чар зарʹ бун у әз йе лапи бьчʹук бум. Мә алийе рʹоһʹлате, Дакотайа Башуреда фермәкеда дьжит. Рʹаст ә шьхöле ферме бона малбәта мә фәрз бу, ле йәкә әwе щийе пешьн әʹмьре мәда нәдьгьрт. Де-баве мьн һатьбун ньхöмандьне ча Шәʹдед Йаһоwа сала 1934-да. Әwана әʹмьре хwә тʹәсмили Йаһоwа кьрьн у ләма жи бона wан гәләк фәрз бу qьрара wи биньн сери. Дакотайа Башуреда, баве мьн Кларенс у паше жи апе мьн Алфред щьвата мәйә бьчʹукда qöльхкʹаред щьвате бун, (ньһа те навкьрьне кординаторе кʹома рʹуспийа).

Малбәта мә тʹьме дьчу сәр щьвате у һьн жи мал бь мал хьзмәт дькьр. Мә жь Кʹьтеба Пироз дәрһәqа созед баш бона ахьрийе мәрьварʹа гьли дькьр. Мәсәла де-баве мьн у ширәткьрьна wан, әм һелан кьрьн һʹьзкьрьна хwә һьндава Йаһоwа qәwи кьн. Әз у хушка мьн Дороти, бунә мьзгинванед Пʹадшатийе, чахе әм шәш сали бун. Сала 1943-да сәр Мәкʹтәба Даннасинкьрьне әз ида пе дәрса дәрдькʹәтьм. Әw мәкʹтәб щьватада һәма ве сале саз бу.

Щьватед мәзьн бона мә гәләк фәрз бун. Те бира мьн ча сәр щьвата мәзьн сала 1949-да, бьре Грант Сутер, йе кö готарване тʹәглифкьри бу, готар хwәнд бь наве: «Һун Нькарьн Бьдьнә Бәр Чʹәʹве Хwә, Әм Чьqас Незики Хьлазийа wе Дьнйайе нә». Әв готар һʹәта ньһа те бира мьн. Әwи гот wәки әʹмьре һәр Мәсиһида, шьхöле бәлакьрьна мьзгинийа Пʹадшатийа Хwәде гәрәке щийе пешьн бьгьрә. Паши ве йәке, 12 Мьждаре сала 1949, шәһәре Брукингседа әз сәр щьвата мәзьнә йәк рʹожи һатьмә ньхöмандьне. Ләма жи әз гома сарʹда сәкьни бум, чаwа кö мьн ида гьли кьр. Әз у се мәрьвед дьн һʹәwзе һʹәсьнда һатьнә ньхöмандьне.

Паши ньхöмандьне мьн хwәрʹа нет дани кö бьбьмә пешәнг. Йәке Чьлә сала 1952-да, чахе әз 15 сали бум, әз бумә пешәнг. Кʹьтеба Пироз дьбежә: «Һәвале сәрwахта сәрwахт дәрте», у малбәта мьнда гәләк мәрьвед сәрwахт һәбун, йед кö пьштгьрийа хьзмәтийа мьн кьрьн (Мәтʹлк. 13:20). Гәләк щар әз тʹәви апе хwә Щулиос, йе кö 60 сали бу, дәрдькʹәтьмә хьзмәтийе. Рʹаст ә әw гәләк жь мьн мәстьр бу, ле йәкә мә хwәш дьһат тʹәвайи хьзмәт кьн. Әз гәләк тьшт жь wи һин бум. Зутьрәке хушка мьн Дороти жи бу пешәнг.

БӘРПЬРСИЙАРЕД МЬҺАЛЕ АЛИКʹАРИ ДАНӘ МЬН

Щаһьлтийа мьнда, де-баве мьн тʹьме бәрпьрсийаред мьһале у жьнед wан тʹәглифи мала мә дькьрьн. Бәрпьрсийарәки мьһале бь наве Щеси у жьна wи Лин Кантwел, гәләк али мьн кьрьн. Wана бона мьн хәм дькьр у öса жи һелане дьданә мьн. Чахе wана сәрледана щьватед незики мала мә дькьрьн, щара гази мьн жи дькьрьн wәки тʹәви wан дәрем хьзмәтийе. Мьнрʹа гәләк һʹәwас бу! Мьн дьхwәст мина wан бь тʹәмами шьхöле Йаһоwава мьжул бьм.

Бәрпьрсийаре мәйи мьһале йе тʹәзә Буд Миллер бу. Әз 18 сали бум чахе әwи тʹәви жьна хwә Щоан сәрледана щьвата мә дькьр. Wи чахи гази мьн кьрьн кö һәрʹьм әскәрийе. Комисйа әскәрийе йа мьһала мьн, дьхwәст wәки әз шьхöләки öса бькьм кö тʹәви политике гьредайи бу. Ле мьн заньбу һәрге әз wи шьхöли бькьм, әзе тʹәмийа Иса нәйньм сери. Ле мьн дьхwәст мьзгинийа Пʹадшатийе бәла кьра (Йуһʹн. 15:19). Ләма жи мьн сафи кьр һәрʹьм комисйа әскәрийе сәва wанрʹа бежьм, кö әз хьзмәткʹар ьм у ләма начьм әскәрийе.

Әз гәләк ша бум чахе Бьре Миллер мьнрʹа гот, wәки әw жи тʹәви мьн wе бе комисйа әскәрийе. Мьн гәләк мерхаси станд, чьмки кʹеләка мьн бьре бетьрс у рʹöһʹани бу! Хьлазийа һавине сала 1954, әз жь әскәрийе аза бум, чьмки әз хьзмәткʹар бум. Әз ида һазьр бум бона Йаһоwа һе зедә бькьм.

Паши ве йәке әз һатьмә тʹәглифкьрьне, wәки Бәйтʹәледа хьзмәт кьм. Әw Бәйтʹәл дь гьрава Стейтенеда бу (Нийу Йорк). Паше әв Бәйтʹәл һатә навкьрьне Ферма Бьрща Qәрәwьлийе. Мьн wедәре wәкә се сала хьзмәт дькьр. Әз тʹәви хушк-бьред билан дьхәбьтим у гәләк тьшт жь wан һин бум.

ХЬЗМӘТКЬРЬН БӘЙТʹӘЛЕДА

Дь wе ферма гьрава Стейтенеда, Радио Стансийа WBBR һәбу. Шәʹдед Йаһоwа WBBR дәстпекьрьн бьдьн хәбате жь сала 1924 һʹәта сала 1957. Тʹәне 15-20 әндәмед Бәйтʹәле һатьбун кʹьфшкьрьне ве фермеда. Гәләк жь мә щаһьл у нәщерʹьбанди бун. Ле тʹәви мә бьраки әʹмьрда мәзьн бь наве Елдон Вудворд дьхәбьти, йе кö бь рʹöһʹе пироз кʹьфшкьри бу. Әw бона мә ча бав бу у гәләк тьштед баш мә һин дькьр. Щар-щара чахе ортʹа мә щаһьлада чәтьнайи пешда дьһатьн, Бьре Вудворд мәрʹа дьгот: «Рʹаст ә Йаһоwа мәрьвед нәqәданди дьдә хәбате, ле йәкә һʹәму шьхöл рʹьнд те кьрьне».

Бьре Фредерик Франс жи али мә дькьр. Әw йәки билан бу у Ньвисаред Пироз рʹьнд заньбу. Öса жи әwи бона мә һәр кәси хәм дькьр. Аспежа мә Һари Петерсон бу. Бь рʹасти мәрʹа дьһа һеса бу наве wи Петерсон һьлдьн, нә кö пашнаве wийи рʹаст Папаргиропоулос кö гәләк чәтьн бу. Әw жи бь рʹöһʹе пироз кʹьфшкьри бу у әwи һʹьз дькьр хьзмәт кә. Бьре Петерсон Бәйтʹәледа шьхöле хwә гәләк рʹьнд дькьр, ле әw öса жи бәлакьрьна мьзгинийеда гәләк хирәт бу. Әw һәр мәһ сәди зедәтьр журнал бәла дькьр. У әwи öса жи Кʹьтеба Пироз гәләк рʹьнд заньбу у щаба гәләк пьрсед мә дьда.

ӘЗ ЖЬ ХУШКЕД БИЛАН ҺИН БУМ

Нава саләкеда, мә фермеда бона Бәйтʹәле wәкә 45 000 контейнер емиш у щурʹә-щурʹә пʹьнщар һазьр дькьр у дәрданада дадьда. Әз тʹәви Етта Һут дьхәбьтим. Әw хушкәкә гәләк билан бу. Етта щабдар бу wәки мә һин кә чаwа емиш һазьр кьн у дадьн. Чахе хушкед тʹәзә дьһатьн али мә бькьн, Еттайе әwана һин дькьрьн у шьхöл дьда wан. Рʹаст ә Еттайе гәләк рʹьнд шьхöле хwә дькьр, ле диса жи әwе тʹьме qәдьре бьред сәркʹар дьгьрт у гöрʹа wан дькьр. Әw бона мә мәсәләкә баш бу.

Анщела Романо йәк жь wан хушкед щаһьл бу, кʹижан кö дьһатьн ферме али мә бькьн. Еттайе али Анщелайе кьр wәки бе сәр рʹийа рʹастийе. Мәһа Нисане сала 1958-да, мьн Анщела станд. Әм бь шабуне тʹәвайи ида 58 сала Йаһоwарʹа хьзмәт дькьн. Амьнийа Анщелайе һьндава Йаһоwа зәwаща мә qәwи кьр. Әw бь рʹасти жи билан ә у әз дькарьм итʹбарийа хwә wе биньм, фьрqи тʹöнә чь чәтьнайед мә һәнә.

ХЬЗМӘТКЬРЬН ЧАWА МИСЙОНЕР У ШЬХÖЛЕ БӘРПЬРСИЙАРТИЙЕ

Сала 1957-да хан-манед радийойа WBBR һатьбун фьротане у әз дәрбази Бәйтʹәла Бруклине бум. Паше нава wәʹдәки кьнда мьн Анщела станд у әз жь Бәйтʹәле чум. Мә wәкә се сала гьрава Стейтенеда хьзмәт дькьр. Wәʹдәки әз һәла һе щәм wан мәрьва жи хәбьтим, йед кö радйо стансийа мә кʹьрʹин у нав кьрьн ча WPOW.

Әз у Анщела пәй һәбуке нәдькʹәтьн, чьмки мә дьхwәст wәʹде мә һәбә хьзмәт кьн wан щийа кʹидәре һʹәwщәти һәбә. Сала 1961-да, шәһәре Фолс дь Небраскайеда, әм кʹьфш кьрьн ча пешәнгед мәхсус. Ле чахе әм гьһиштьнә щи, әм сәр мәһәке һатьнә тʹәглифкьрьне сәр Мәкʹтәба Хьзмәтийе дь Нийу Йоркеда. Әw һинбун гәләк һʹеwас бу. Әм дьфькьрин кö әме паши һинбуне вәгәрʹьнә Небраскайе, ле әм әʹщебмайи ман чахе мә кʹьфшкьрьнәкә тʹәзә станд. Әм Камбощайеда ча мисйонер һатьнә кʹьфшкьрьне! Дь ви wәлате бәдәwда мә дит, бьһист у тәʹм кьр тьштед кö бона мә ну бун. Мә бь дьл у щан дьхwәст мәрьварʹа мьзгинийа дәрһәqа Пʹадшатийе бәла кьн.

Ле паше, Камбощайеда дәрәщед политикева гьредайи һатьн гöһастьн у әм мәщбур бун дәрбази Вийәтнама Башуре бьн. Паши дö сала әз гьран нәхwәш кʹәтьм у әм вәгәрʹийанә Дәwләтед Йәкбуйи. Мьнрʹа wәʹдә лазьм бу wәки qәнщ бьм. Чахе qәwата мьн ида һәбу, мә диса дәстпекьр ча пешәнг хьзмәт кьн.

Сала 1965-да мәһа Адаре мә дәстпекьр шьхöле бәрпьрсийартийе бькьн у сәрледана щурʹәщурʹә щьвата бькьн. Мьн тʹәви Анщелайе 33 сала шабунәкә мәзьн станд жь хьзмәтийа хwә ча бәрпьрсийаре мьһале у бәрпьрсийаре нәһийе. Öса жи мә аликʹари да сәва щьватед мәзьн бенә сазкьрьне. Әwи шьхöли мьнрʹа шабун дьани, чьмки щьватед мәзьн бона мьн гәләк фәрз бун. Нава гәләк салада мә сәрледана щьватед Нийу Йорке у дорбәре wе дькьр. Гәләк щьватед мәзьн дәрбаз дьбун сәр стадийона Йанки.

ӘМ ВӘГӘРʹИЙАНӘ БӘЙТʹӘЛЕ У МӘКʹТӘБЕД ТʹӘШКИЛӘТЕ

Мьн у Анщелайе нава wан салада гәләк кʹьфшкьрьнед тʹәзә у чәтьн дьстандьн. Сала 1995-да мьн дәстпекьр Мәкʹтәба Башкьрьна Хьзмәтийе дәрбаз кьм. Се сал шунда мә тʹәглифи Бәйтʹәле кьрьн. Паши 40 сала әз гәләк ша бум кö вәгәрʹийамә Бәйтʹәле. Нә пешийе мьн хьзмәткьрьна хwәйә һәртʹьм һәма Бәйтʹәледа дәстпекьр. Әз һьнә wәʹдә Идара Хьзмәтийеда бум у паше бумә дәрсдар щурʹә-щурʹә мәкʹтәбада. Сала 2007-да Кʹома Рʹебәрийе, Бәйтʹәледа Идара Мәкʹтәбед Тʹәшкиләте саз кьр, кʹижан кö рʹебәрийе һʹәму мәкʹтәба дькә йед кö тʹәшкиләта мәда һәнә. У нава чәнд сала әз сәркʹаре ве идаре бум.

Нав wан салед пашwәхтийеда, гәләк гöһастьн һәбун бона мәкʹтәбед Бәйтʹәле. Мәкʹтәба бона Рʹуспийед Щьвате сала 2008-да дәстпебу. У нава дö салада 12 000 зедәтьр рʹуспи һатьн һинкьрьне Бәйтʹәла Патерсоне у Бруклинеда. Әw мәкʹтәб ньһа щийед майинда жи дәрбаз дьбә. Сала 2010-да наве Мәкʹтәба Башкьрьна Хьзмәтийе һатә гöһастьне, бу Мәкʹтәба сәва Бьред Азәп. Öса жи мәкʹтәба тʹәзә һатьбу сазкьрьне бь наве Мәкʹтәба сәва Жьн-Меред Мәсиһи.

Сала 2015-да мәһа Илоне, әw дö мәкʹтәб бунә йәк у һатә навкьрьне ча Мәкʹтәба сәва Мьзгинванед Пʹадшатийе. Ньһа щотед зәwащеда, у öса жи хушк у бьред азәп дькарьн тʹәвайи әwе мәкʹтәбе дәрбаз бьн. Гәләк хушк-бьра ша бун чахе пеһʹәсийан кö әв мәкʹтәб wе öса жи wәлате wанда дәрбаз бә. Бь сайа ве йәке, гәләк хушк у бьра дькарьн ве мәкʹтәбеда һин бьн у әw рʹасти жи гәләк баш ә. Әз гәләк рʹази мә кö рʹасти мәрьвед öса һатьм, йед кö әʹмьре хwәда гöһастьн кьрьнә, сәва кö бенә тʹәглифкьрьне сәр ве мәкʹтәбе.

Чахе әз дәрһәqа әʹмьре хwә дьфькьрьм, әз жь Йаһоwа рʹази мә сәва wан мәрьвед билан, йед кö рʹасти мьн һатьн. Әwана али мьн кьрьн wәки Йаһоwа һе рʹьнд нас кьм у wирʹа хьзмәт кьм. Һьнә жь wан мәрьва щаһьл бун, йед дьн әʹмьрда мәзьн бун. Әʹйд-qәйдед wан жи, жь йе мьн щöдә дьбун. Ле жь рʹабун-рʹуньштьна wан әʹйан бу, wәки әwана qайим Йаһоwа һʹьз дькьн. Әз гәләк рʹази мә, wәки нав щьмәʹта Йаһоwада гәләк һәвалед мьнә билан һәнә, жь кʹижана әз дькарьм һин бьм.