Wәʹде Щерʹьбандьна Амьни Гәләк Кʹәрәма Тинә

ОФИСЕРЕ КГБa сәр мьн кьрә qарини: «Тö бавәки берʹәʹм и. Тә жьна хwәйә гьран тʹәви qиза хwәйә бьчʹук һиштийә. Кʹе wе wана хwәй кә? Бьньвисә кö тö баwәрийа хwә дьһели у һәрʹә мал!» Мьн щаба wи да: «Мьн нәфәред хwә нәһиштийә, әва wә мьн гьртийә! Ле сәва чь?» Офисер жи перʹа-перʹа щаба мьн да: «Һун Шәʹдед Йаһоwа жь һәр qачахи хьрабтьр ьн».

Әв йәк кәледа qәwьми сала 1959-да шәһәре Иркутскеда, (Урьсет). Әз дьхwазьм wәрʹа гьли кьм кö чьрʹа әз у жьна мьн Мариа һазьр бун «бона рʹастийе» щәфе бьвиньн, у чаwа мә сәва амьнийа хwә гәләк кʹәрәм сьтандьн (1 Пәт. 3:13, 14).

Әз wәлате Украинеда һатьмә буйине сала 1933-да, гöнде Золотникида. Сала 1937-да хатийа мьн у мере wе, кö Шәʹдед Йаһоwа бун, жь Франсайе һатьбунә мала мә. Wана мәрʹа кʹьтеба «Сәрwерти» у «Хьлазкьрьн» анибун, кʹижан кö Щьвака Бьрща Qәрәwьлийе нәшьр кьрьбу. Чахе баве мьн әв кʹьтеб хwәндьн, баwәрийа wи һьндава Хwәде ча бежи һʹьшйар бу. Ле йазьх, сала 1939-да баве мьн гәләк нәхwәш кʹәт, у чахе бәр мьрьне бу әwи дийа мьнрʹа гот: «Әw ә рʹасти, у зарʹа жи һин кә».

БӘЛАКЬРЬНА МЬЗГИНИЙЕ СИБИРЙАЙЕДА

Мәһа Нисане сала 1951-да, сәрwеред дәwләте Шәʹдед Йаһоwа аксор дькьрьн дьшандьнә Сибирйайе, жь USSR йа рʹоавайе (USSR әв һәйә Йәктийа Кʹомаред Совйәт йед Сосйалист). Әз, дийа мьн у бьре мьни бьчʹук Григори жь Украине аксор кьрьн. Әм 6 000 км пе трене чунә шәһәре Тулун, (Сибирйа). Ле дö һʹәфте шунда, бьре мьни мәзьн Богдан шандьнә кампе. Әw камп незики шәһәре Ангарске бу, у 25 сал данә wи кö хәбата гьран бькә wедәре.

Дийа мьн, әз у Григори, мә хьзмәт дькьр гöндед дорбәре шәһәре Тулуне, ле әм гәрәке фәсал у сәрwахт буна. Мәсәлә, мә пьрсәкә öса дьда мәрьва: «Qә кәсәк wьра чʹеләка дьфьрошә?» Гава мә кәсәк дьдит кö чʹеләка дьфьрошә, мә wи мәрьвирʹа дьгот кö чʹеләк чьqас әʹщебмайи һатьнә әʹфьрандьне. Паше мә дәстпедькьр дәрһәqа Әʹфьрандар хәбәр дьн. Wи wәʹдәйи, дәрһәqа Шәʹдед Йаһоwа рʹожнәʹмеда һатә ньвисаре кö әwана йанчь чʹеләка дьгәрʹьн, ле бь рʹастийе пәза дьгәрʹьн! У рʹасти жи мә мәрьвед öса дитьн, йед кö рʹасти qәбул кьрьн. Һинбуна Кʹьтеба Пироз тʹәви wан мәрьвед дьлсах у меванһʹьз öса хwәш бу. Иро Тулунеда щьватәк һәйә, кʹижанеда 100 мьзгинвана зедәтьр һәнә.

ЧАWА БАWӘРИЙА МАРИАЙЕ ҺАТӘ ЩЕРʹЬБАНДЬНЕ

Жьна мьн Мариа, wәʹде Шәрʹе Һʹәмдьнйайе йа дöда рʹастийе педьһʹәсә. Чахе әw 18 сали буйә, офисерәки КГБ дәстпедькә wе әʹщьз кә у дьхwазә бенамусийе тʹәви wе бькә. Ле Мариа qәwи сәр йа хwә дьсәкьнә у qайил набә. Щарәке, чахе Мариа вәдьгәрʹә мал, дьвинә wәки әв мерьк сәр ньвине wе вәләзийайә, әw дәрберʹа дьрʹәвә. Әв офисер бь һерс ле дьдә тьрсандьне кö wе ле бькә кәле, чьмки әв Шәʹде Йаһоwа йә, у öса жи дьбә. Сала 1952-да, Мариа сәр дәһ сала дькьнә кәле. Әwе хwә мина Усьв тʹәхмин кьрьбу, йе кö бона амьнийа хwә кʹәтьбу кәле (Дәстп. 39:12, 20). Ажован, йе кö Мариайе жь диwане бьрьбу кәле, жерʹа готьбу: «Нәтьрсә. Гәләк мәрьв йед кö кʹәтьнә кәле, нав-намус дәркʹәтьнә». Мариа бь wан гьлийа гәләк qәwи бьбу.

Жь сала 1952 һʹәта сала 1956, Мариа Урьсетеда дькʹәвә кампе кö незики шәһәре Горски бу (ньһа Нижни Новгород те навкьрьне). Әw wедәре хәбатәкә гьран дькьр, баха кʹокева дәрдьхьст һәла һе сöрʹ-сәрмеда жи. Сәва ве йәке, сьһʹәт-qәwата wе хьраб бьбу, ле сала 1956-да әwе аза дькьн у әw дәрбази Тулуне дьбә.

ЖЬ ЖЬН-ЗАРʹЕД ХWӘ ДУР ЬМ

Чахе бьраки мә жь Тулуне готә мьн wәки хушкәкә мә те, әз пе бисиклета хwә чумә щийе сәкьнандьна отобуса сәва рʹасти wе бем у али wе бькьм һур-муре wе биньм. Чахе мьн Мариа дит, һәма ве дәме дьле мьн кʹәте. Рʹаст бежьм, нәһеса бу дьле wе бькʹьрʹьм, ле мьн йа хwә кьр. Сала 1957-да мә һәв станд. Саләк шунда мәрʹа qизәк бу, мә наве wе дани Ирина. Ле шабуна мә дьреж нәкʹьшанд. Сала 1959 әз һатьмә гьртьне чьмки мьн әʹдәбйәтед сәр һʹиме Кʹьтеба Пироз нәшьр дькьр. Әз нив сали отʹаха кәледа тʹәне бум. Сәва әʹдьлайи дьле мьнда öнда нәбә, мьн тʹьме дöа дькьр, кʹьламед Пʹадшатийе дьстьра, у дьда бәр чʹәʹве хwә, кö әме ча хьзмәт кьн чахе әз жь кәле дәрем.

Чахе әз кәледа бум, щарәке әwе кö шьхöле мьн леколин дькьр, сәр мьн кьрә qарʹини у гот: «Зутьрәке әме qьрʹа wә һʹәмуйа биньн, чаwа мьшка сәр пола дьпʹәльхиньн!» Ле мьн жерʹа гот: «Иса готийә wәки әв мьзгинийа Пʹадшатийе WЕ һʹәму мьләтарʹа бе бәлакьрьне, у тʹö кәс нькарә әви шьхöли бьдә сәкьнандьне». Паше әwи дьхwәст бь щурʹәки дьн мьн бьдә тьрсандьне у шкенандьне, чахе гот wәки баwәрийа хwә бьһельм, чаwа мьн сәрида гьли кьр. Чахе әwи дит wәки әз сәр йа хwә мә, һʹәфт сал данә мьн кö кампеда хәбата гьран бькьм. Әв камп незики шәһәре Саранске бу. Рʹева әз пеһʹәсийам, wәки qиз мәрʹа бу, мә наве wе дани Олга. Рʹаст ә әз жь жьн-зарʹед хwә дур бум, ле дьле мьн рʹьһʹәт бу, чьмки мьн заньбу wәки әз у Мариа Йаһоwарʹа амьн дьминьн.

Сале щарәке, Мариа дьһатә Саранске сәва тʹәсәлийа мьн бькә. Әw рʹекә дьреж бу, 12 сьһʹәт лазьм бу wәки жь Тулуне пе трене бьһата wи шәһәри у пашда бьчуйа. Һәр сал әве мьнрʹа солед тʹәзә дьани. Һöндöрʹе пәʹнийа солада әве копийед «Бьрща Qәрәwьлийе» вәдьшарт. Саләке, чахе Мариа һат шабунәкә мәзьн кʹәтә дьле мьн, чьмки әwе тʹәви хwә дö qизед мәйә бьчʹук ани. Бьдьнә бәр чʹәʹве хwә әз чьqас ша бум гава мьн wана дит.

ЩИЙЕ ТʹӘЗӘ У ЧӘТЬНАЙЕД ТʹӘЗӘ

Сала 1966 әз жь хәбата кампеда аза бум у әз нәфәред хwәва дәрбази шәһәре Армавире бум, кʹижан кö незики Бәʹра Рʹәш ә. Ль wедәре дö кöрʹ мәрʹа һатьнә буйине, Йарослав у Павел.

Һьнә wәʹдә шунда, КГБ дәстпекьр мә әʹщьз кьн, чьмки мала мәда әʹдәбйәт дьгәрʹийан. Әwана һʹәму щийа дьгәрʹийан, һәла һе афьре чʹеләкада жи. Щарәке, чахе офисер кʹәтьнә мала мә, wана жь гәрме худабун, у кʹьнщед ван тʹоз гьртьбу. Гöне Мариайе wан һат, чьмки әwе фәʹм дькьр кö фәрман данә ван офисера, әwана жи тиньн сери. Әwе wанрʹа кампот дагьрт, у чоткә, тʹаседа ав у пʹежгир да wан. Паше, чахе сәроке КГБ һат, әwан офисера жерʹа гьли кьрьн кö әм һьндава wан ча qәнщ бун. Чахе әwана жь мала мә дәрдькʹәтьн, әwи сәроки бь бәшәра хwәш дәсте хwә мәрʹа һәжанд. Әм ша бун, чьмки мә дит кö чахе әм «бь qәнщийе» сәр хьрабийе дькʹәвьн, әм бәред чьqас баш дьстиньн (Рʹом. 12:21).

Рʹаст ә пәй мә дькʹәтьн, ле мә бәрдәwам дькьр Армавиреда мьзгинийе бәла дькьр. Мә öса жи аликʹари дьда кʹомәкә бьчʹук, кö незики шәһәре Курганинске бу. Әз гәләк ша мә wәки иро Армавиреда шәш щьват у Курганинскеда чар щьват һәнә.

Нава wан салада, һәбун wәʹдә кö әм рʹöһʹанида сьст дьбун. Ле әм гәләк жь Йаһоwа рʹази нә кö әwи бь сайа бьред амьн, мә ширәт дькьр у рʹаст дькьр, у рʹöһʹанида мә qәwи дькьр (Зәб. 130:3). Бона мә öса жи щерʹьбандьна мәзьн бу, кö мә нава агентед КГБ-да хьзмәт дькьр, йед кö дьзива кʹәтьбунә нава щьвате. Әwана хирәт дьһатьнә кʹьфше у хьзмәтийеда гәләк кʹар дькьрьн. Һьнәк жь wана тʹәшкиләтеда һәла һе щабдари жи дьстандьн. Ле wәʹдә дәрбаз бу, мә фәʹм кьр бь рʹастийе әwана кʹе нә.

Сала 1978-да, чахе Мариа 45 сали бу, әw гьран дәркʹәт. Нәхwәшийа wейә дьльк һәбу, у һʹәким дьтьрсийан кö әwе бьмьрә һәрге зарʹе бинә. Ләма wана жерʹа тʹьме дьготьн, wәки әw әʹсә зарʹе бәр хwә бькә. Ле Мариа qайил нәбу у бона ве йәке һʹәкима нәхwәшханеда пе дәрзи һәма пәй wе дьгәрʹийан, сәва wе дәрзи кьн, wәки зарʹ бәр һәрʹә. Мариа жь нәхwәшхане рʹәви сәва зарʹа хwә хwәй кә.

КГБ мәрʹа фәрман да wәки жь wи шәһәри дәрен. Әм дәрбази гöнде незики Талин бун, кʹижан кö Естонйайеда йә. Әw жи дькʹәтә нава USSR. Талинеда, Мариайе кöрʹәки сьһʹәт-qәwат ани. Мә наве wи дани Витали. Бәле, гьлийед һʹәкима нәһатьнә сери.

Паше, әм жь Естонйайе дәрбази Незлобнайайе бун, кö Урьсета башуреда йә. Мә гәләк фәсал хьзмәт дькьр wан шәһәрада кö незики мә бун. Ль wедәре жь щурʹә-щурʹә wәлата мәрьв дьһатьн сәва һеса бьн у хwә qәнщ кьн. Рʹаст ә әwана һатьн сәва сьһʹәт-qәwата хwә баш кьн, ле һьнәк жь wан чун пе ве баwәрийе кö wе жийина һʹәта-һʹәтайе бьстиньн!

ЗАРʹЕД ХWӘ ÖСА МӘЗЬН ДЬКЬН СӘВА ЙАҺОWА ҺʹЬЗ БЬКЬН

Мә алийе хwәда һәр тьшт дькьр сәва кöрʹ у qизед мә Йаһоwа һʹьз бькьн у бьхwазьн жерʹа хьзмәт кьн. Мә гәләк щар хушк-бьред öса тʹәглифи мала хwә дькьр, йед кö сәр зарʹед мә баш һʹöкöм дьбун. Мәсәлә, бьре мьн Григори тʹьме дьһатә щәм мә, йе кö жь сала 1970 һʹәта 1995 хьзмәт дькьр ча бәрпьрсийаре рʹеwи. Малда әм гьшк ша дьбун чахе әw дьһатә мала мә, чьмки әw йәки бәшәрхwәш у һәнәкчи бу. Чахе меванед мә дьһатьн, мә гәләк щар листькед Кʹьтеба Пирозва гьредайи дьлист, у сәва ве йәке зарʹед мә чьqас мәзьн дьбун һаqас зәʹф сәрһатийед Кʹьтеба Пироз һʹьз дькьрьн.

Сала 1987-да, кöрʹе мә Йарослав дәрбази шәһәре Ригайе (Латвйа) бу. Ль wедәре әwи аза хьзмәт дькьр, чьмки пәйкʹәтьн тʹöнә бу. Ле чахе әw нәчу әскәрийе, wи сәр сал у нивәки кьрьнә кәле, у нава wи wәʹдәйида әw кʹәтә нәһә кәла. Пешда мьн жерʹа гьли дькьр чаwа әз кәледа амьн мам, у әве йәке али wи кьр кö әw кәледа qәwи ма. Паше, әwи дәстпекьр хьзмәт кә ча пешәнг. Сала 1990-да, кöрʹе мә Павел кö 19 сали бу дьхwәст бьбә пешәнг у хьзмәт кә гьрава Сахалинеда кö Жапонйайа бакʹуреда йә. Пешийе мә нәдьхwәст әw һәрʹә. Тʹәмамийа гьраведа тʹәне 20 мьзгинван һәбун, у һьн жи әв гьрав 9 000 км жь мә дур бу. Ле ахьрийеда әм qайил бун әw һәрʹә, у әв сафикьрьн баш бу. Ль wедәре мәрьва рʹьнд гöһ дьданә мьзгинийе. Нава чәнд салада, ль wедәре ида 8 щьват һәбун. Павел һʹәта сала 1995 ль wедәре хьзмәт дькьр. Wи wәʹдәйида кöрʹе мәйи бьчʹук Витали малда тʹәви мә бу. Жь бьчʹуктайе әwи һʹьз дькьр Кʹьтеба Пироз бьхунә. Чахе әw 14 сали бу, әwи пешәнгти дәстпекьр, мьн жи тʹәви wи 2 сала хьзмәт дькьр ча пешәнг. Әw wәʹдә гәләк хwәш бу. Чахе Витали бу 19 сали жь мал чу, чьмки пешәнгтийа мәхсус дәстпекьр.

Пешда, сала 1952-да офисерәки КГБ Мариайерʹа готьбу: «Баwәрийа хwә бьһелә, йане на тöйе сәр дәһ сала бькʹәви кәле. Чахе тö жь кәле дәркʹәви, тöйе ида пир би у тʹәне бьмини». Ле гьлийед wи нәһатьнә сери. Мә тʹьме сәр хwә тʹәхмин дькьр һʹьзкьрьна Йаһоwа Хwәде, зарʹед хwә у һʹьзкьрьна әwед кö мә али wан кьр бенә сәр рʹийа рʹаст. Мьн у Мариайе шабунәкә мәзьн дьстанд чахе мә тʹәсәлийа зарʹед хwә дькьр кʹидәре кö wана хьзмәт дькьр. Мә öса жи дьдит рʹазибуна wан мәрьва, йед кö зарʹед мә али wан кьрьбун кö дәрһәqа Йаһоwа пебьһʹәсьн.

ӘМ ГӘЛӘК РʹАЗИ НӘ СӘВА QӘНЩИЙА ЙАҺОWА ҺЬНДАВА МӘ

Сала 1991-да, Шәʹдед Йаһоwа бь qануни изьн сьтандьн кö хьзмәт кьн. Әве сафикьрьне qәwата мә вәгәрʹанд у әм хьзмәтийеда һе зедә хирәт бун. Щьвата мә һәла һе жи отобус кʹьрʹи, сәва әм һәр Шәми у Ләʹд шәһәр у гöндед незики мәда хьзмәт кьн.

Әз бәхтәwар ьм wәки Йарослав тʹәви жьна хwә Алионайе у Павел тʹәви жьна хwә Райайе Бәйтʹәледа хьзмәт дькьн. Витали жи тʹәви жьна хwә Светланайе шьхöле бәрпьрсийарида хьзмәт дькә. Qиза мәйә мәзьн Ирина тʹәви малбәта хwә дьжи Алманйайеда. Мере wе Владимир у се кöрʹед wан һʹәмушк жи рʹуспи нә. Qиза мә Олга Естонйайеда дьжи у тʹьме мьнрʹа тʹеле дьхә. Ле йазьх жьна мьнә дәлал Мариа сала 2014-да мьр. Әз гәләк һивийа wи wәʹдәйи мә, чахе әw жь мьрьне рʹабә у әз ле бьвиньм! Ньһа әз дьжим шәһәре Белгородеда у хушк-бьред wьра аликʹарийа мәзьн дьдьнә мьн.

Рʹаст ә амьнийе хwәй кьн чәтьн ә, ле салед мьнә хьзмәтийа Йаһоwада әз һин кьрьм кö һежа йә амьнийе хwәй кьн, чьмки Йаһоwа тʹьме дьлрʹьһʹәтийе дьдә, кʹижан кö беһʹәсаб qимәт ә. Мьн у Мариайе сәва амьнийа хwә öса гәләк кʹәрәм стандьн, кö мьн пешда нә жи дьда бәр чʹәʹве хwә. Пешийа һьлшандьна USSR кö сала 1991-да бу, wедәре тʹәне 40 000 мьзгинван һәбун. Ле иро, нава wан wәлатада кʹижан кö бәре нава Йәктийа Совйәтеда бун, 400 000 мьзгинвана зедәтьр һәнә. Ньһа әз 83 сали мә, у диса ча рʹуспи хьзмәт дькьм. Аликʹарийа Йаһоwа тʹьме qәwат дьда мьн кö сәбьр кьм у qәwи бьминьм. Бәле, Йаһоwа мьн гәләк кʹәрәм кьр (Зәб. 13:5, 6).