Биранин Щьмәʹта Хwәде Дькә Йәктийе

1, 2. Сала 2018-да кʹижан qәwьмандьн wе йәктийе бинә, у чьрʹа? (Бьньһерʹә шькле әʹwльн.)

САЛА 2018, 31 Адаре, чахе рʹо һәрʹә ава, бь милйона мәрьв нав тʹәмамийа дьнйайе wе тʹоп бьн бона щәжьне кö сале щарәке дәрбаз дьбә. Ве еваре Шәʹдед Йаһоwа у гәләк мәрьвед дьн wе бенә сәр Евара Биранина мьрьна Иса. Һәр сал әв щәжьн щьмәʹта Хwәде дькә йәктийе. Тʹö щәжьн сәр әʹрде йәктийа öса найнә!

² Бьдьнә бәр чʹәʹве хwә кö Йаһоwа у Иса чьqас ша дьбьн чахе дина хwә дьдьн, кö ве рʹоже сьһʹәт пәй сьһʹәтерʹа нав тʹәмамийа дьнйайе, бь милйона мәрьв тенә сәр ве qәwьмандьна мәхсус. Кʹьтеба Пироз пешда пʹехәмбәрти кьр кö «әʹлаләтәкә öса мәзьн, кö тʹö кәси [нькарьбуйа] бьжьмарта жь һәр мьләти, жь һәр бәрәке, жь һәр щьмәʹте у жь һәр зьмани», wе бь дәнге бьльнд бькьнә гази: «Хьлазбун жь дәсте Хwәдейе мә йә, Йе кö ль сәр тʹәхт рʹуньшти йә у жь дәсте wи Бәрхи йә» (Әʹйан. 7:9, 10). Чьqас баш ә wәки бь сайа Евара Биранине кö һәр сал дәрбаз дьбә, Йаһоwа у Иса тенә рʹумәткьрьне!

3. Ве готареда әме щаба кʹижан пьрса пебьһʹәсьн?

³ Ве готареда әме щаба wан пьрса пебьһʹәсьн: 1) Әм ча дькарьн бона Биранине хwә һазьр кьн? 2) Чаwа Биранин щьмәʹта Хwәде дькә йәктийе? 3) Чаwа хут әм хwәха дькарьн йәктийе хwәй кьн? 4) Гәло wе һәбә Биранина пашьн?

ЧАWА ХWӘ БОНА БИРАНИНЕ ҺАЗЬР КЬН У КʹАРЕ БЬСТИНЬН

4. Чьрʹа фәрз ә кö әм бенә сәр Евара Биранине?

⁴ Чьрʹа фәрз ә кö әм бенә сәр Евара Биранине? Мәʹник әw ә кö щьвин пʹара һʹәбандьна мә йә. Бешьк, Йаһоwа у Иса дина хwә дьдьнә wан, йед кö алийе хwәда һәр тьшти дькьн сәва бенә сәр ве щьвинәкә лапә фәрз. Бәле, әм дьхwазьн wәки Йаһоwа у Иса бьвиньн кö әме әʹсә бенә сәр Евара Биранине, хенщи ве мәʹнийе һәрге сьһʹәт-qәwата мә wе нәһелә йан жи һәрге дәрәщәкә гьранда бьн. Чахе әм пе кьред хwә нишан дькьн wәки щьвинед сәва һʹәбандьне бона мә фәрз ьн, әм диса мәщал дьдьнә Йаһоwа сәва наве мә кʹьтеба «биранинеда» хwәй кә. Әw кʹьтеб öса жи те навкьрьне «кʹьтеба жийине». Ве кʹьтебеда Йаһоwа наве wан мәрьва дьньвисә, кʹижанарʹа әw дьхwазә жийина һʹәта-һʹәтайе бьдә (Малх. 3:16; Әʹйан. 20:15).

5. Пешийа рʹожа Биранине, ча әм дькарьн баwәрийа хwә бьщерʹьбиньн?

⁵ Һʹәфтийед пешийа Евара Биранине, wе керһати бә кö wәʹдә хwәрʹа башqә кьн, сәва дöа бькьн у кʹур бьфькьрьн дәрһәqа һәләqәтийа хwә тʹәви Йаһоwа. (Бьхунә 2 Корьнтʹи 13:5.) Ле чаwа ве йәке бькьн? Баwәрийа хwә бьщерʹьбиньн. Wе баш бә пьрсед öса бьдьнә хwә: «Гәло әз бь рʹастийе баwәр дькьм кö әз нава ве тʹәшкиләтеда мә, бь сайа кʹижани Йаһоwа qьрара хwә тинә сери? Гәло әз һәр тьшти дькьм сәва мьзгинийе бәла кьм у мәрьва һин кьм? Гәло пе кьред мьн те кʹьфше wәки әз баwәр дькьм кö рʹожед ахьрийеда дьжим, у кö хьлазийа һʹöкöме Шәйтʹан незик ә? Гәло әз иро жи qайим итʹбарийа хwә Йаһоwа у Иса тиньм, чаwа дәстпека хьзмәтийа хwә Хwәдерʹа?» (Мәт. 24:14; 2 Тимтʹ. 3:1; Ибрн. 3:14). Һәрге әм сәр пьрсед wи щурʹәйи бьфькьрьн, әw йәк wе али мә бькә кö дьле хwә бьщерʹьбиньн.

6. а) Ча әм дькарьн жийина һʹәта-һʹәтайе бьстиньн? б) Рʹуспик чаwа һәр сал хwә һазьр дькә бона рʹожа Биранине? Һун жи ча дькарьн мина wи хwә һазьр кьн бона ве рʹоже?

⁶ Диса ча һун дькарьн хwә һазьр кьн бона рʹожа Биранине? Бьхуньн готаред дәрһәqа Евара Биранине, у бьфькьрьн сәр. (Бьхунә Йуһʹәнна 3:16; 17:3.) Жийина һʹәта-һʹәтайе әм дькарьн тʹәне һьнге бьстиньн, һәрге Йаһоwа «нас кьн», у баwәрийа хwә Иса биньн, демәк Кöрʹе Wийи тайе тʹәне. Сәва хwә бона Биранине һазьр кьн, һун дькарьн хwәрʹа готара бьжберьн сәва леколинкьрьне, кʹижан кö али wә бькьн һе незики Йаһоwа у Иса бьн. Дина хwә бьдьнә мәсәла бьраки мә, кö гәләк wәхт рʹуспи йә. Ида гәләк сал ә әw готаред жь «Бьрща Qәрәwьлийе» тʹоп дькә, кʹижан кö хут дәрһәqа Евара Биранине нә, у дәрһәqа һʹьзкьрьна Йаһоwа у Иса һьндава мәда. Һʹәфтийед пешийа рʹожа Биранине, әw бьра әван готара диса дьхунә, у кʹур дьфькьрә кö әв щәжьн чьqас фәрз ә. Wәʹдә дәрбаз дьбә у әw диса готарәк йан дöдö зедә дькә. Әw рʹуспи тедәрхьст wәки һәр сал әw тьштед тʹәзә педьһʹәсә чахе wан готара дьхунә, у öса жи дьфькьрә сәр рʹезед Кʹьтеба Пироз кö Евара Биранинева гьредайи нә. Ле йа лапә фәрз әw ә, кö әw дьвинә wәки чаwа һәр сал һʹьзкьрьна wи һьндава Йаһоwа у Иса һе qәwи дьбә. Һәрге һун жи пешийа рʹожа Биранине wи щурʹәйи леколина бькьн, һʹьзкьрьн у рʹазибуна wә жи һьндава Йаһоwа у Иса wе дьһа qәwи бә, у жь рʹожа Биранине һуне һе зедә кʹаре бьстиньн.

ЕВАРА БИРАНИНЕ АЛИ МӘ ДЬКӘ ЙӘКТИЙЕДА БЬН

7. а) Wәʹде Евара Шива Хöдан йа пешьн, Иса дәрһәqа чь дöа кьр? б) Чь дьдә кʹьфше кö Йаһоwа щаба дöайе Иса да?

⁷ Wәʹде Евара Шива Хöдан йа пешьн, Иса дöа кьр кö һʹәму шагьртед wи wе бьбьнә йәк, чаwа Иса тʹәви Баве хwә йәктийеда нә. (Бьхунә Йуһʹәнна 17:20, 21.) Йаһоwа бь рʹастийе щаба дöайе Кöрʹе хwәйи дәлал да, у ньһа бь милйона мәрьв баwәр дькьн кö Йаһоwа Кöрʹе хwә шандә сәр әʹрде. Евара Биранине әʹйан избат дькә кö Шәʹдед Йаһоwа йәктийеда ньн. Мәрьвед жь щурʹә-щурʹә мьләта, сәр тʹәмамийа әʹрде ве рʹоже тʹоп дьбьн. Һьнә щийада бона гәләка әw тьштәки әʹщеб ә кö мәрьвед жь щурʹә-щурʹә раса тʹәвайи тʹоп бьн, һьнәк мәрьв жи дьфькьрьн кö әw нә лайиq ә. Ле Йаһоwа у Иса öса сәр ве йәке наньһерʹьн. Бәр чʹәʹве wан әw йәкти тьштәки бәдәw у хwәш ә.

8. Йаһоwа бь сайа Һәзәqел пʹехәмбәр дәрһәqа йәктийе кʹижан әʹламәти да?

⁸ Әм щьмәʹта Йаһоwа нә, ләма әм әʹщебмайи наминьн кö йәктийа мә һәйә. Йаһоwа хwәха ве йәке пʹехәмбәрти кьр. Дина хwә бьдьнә әʹламәтийа кö Хwәде бь сайа Һәзәqел пʹехәмбәр да. Йаһоwа готә Һәзәqел кö дö дар тʹәви һәв кә, демәк дара «бона Щьһудайе» у дара «бона Усьв». (Бьхунә Һәзәqел 37:15-17.) «Бьрща Qәрәwьлийеда» йа мәһа Тирмәһе сала 2016-да, дьһатә шьровәкьрьне: «Йаһоwа бь Һәзәqел пʹехәмбәр гот кö щьмәʹта Исраел, wе вәгәрʹьнә Әʹрде Создайи у чаwа щьмәʹтәк диса бьбьнә йәк. Әw пʹехәмбәрти öса жи һатә готьне дәрһәqа йәктийа щьмәʹта Хwәде, wәʹде рʹожед ахьрийеда».

9. Һәр сал wәʹде Евара Биранине пʹехәмбәртийа Һәзәqел дәрһәqа йәктийе ча те сери?

⁹ Дәстпека сала 1919, Йаһоwа Мәсиһийед бьжарти диса тʹәзәда саз кьр у кьрә йәк. Әwана бь симболик дара «бона Щьһудайе» бун. Паше ве йәке, һе зедә у зедә мәрьвед кö һивийа жийина һʹәта-һʹәтайе нә, тʹәви wан бьжартийа бунә йәк. Әwана бь симболик дара «бона Усьв» ьн, у әw һәрдö кʹом бунә «кәрик» (Йуһʹн. 10:16; Зәкәр. 8:23). Йаһоwа пʹехәмбәрти кьр кö әw һәрдö дар wе бькә йәк, у дәсте wида әw бьбьнә дарәк (Һәзqл. 37:19). Иро әw һәрдö кʹом йәктийеда тʹәвайи хьзмәт дькьн бьн рʹебәрийа Пʹадшаки, демәк Иса Мәсиһ, кʹижан кö бь пʹехәмбәрти һатә навкьрьне «Даwьде хьзмәткʹаре» Хwәде (Һәзqл. 37:24, 25, ДТʹ). Һәр сал рʹожа Евара Биранина мьрьна Иса, чахе әм тʹәвайи тʹоп дьбьн, әм ве йәктийе нава ван дö кʹомада пе чʹәʹве хwә дьвиньн, чаwа кö пʹехәмбәртийа Һәзәqелда те готьне. Ле гәло әм алийе хwәда чь дькарьн бькьн wәки йәктийе хwәй кьн?

ҺӘР КӘС ЖЬ МӘ ЧЬ ДЬКАРӘ БЬКӘ СӘВА ЙӘКТИ ХWӘЙ БӘ

10. Нава щьмәʹта Хwәдеда ча әм дькарьн йәктийе хwәй кьн?

¹⁰ Чь щурʹәйи әм дькарьн нава щьмәʹта Хwәдеда йәктийе хwәй кьн? Йа пешьн, әм гәрәке шкәсти бьн. Чахе Иса сәр әʹрде бу, әwи шагьртед хwә ширәт кьр wәки әwана шкәсти бьн (Мәт. 23:12). Һәрге әм дьлда шкәсти у мьлук ьн, әме тʹö щар чʹәʹв нәдьдә мәрьвед ве дьнйайе, йед кö хwә сәр мәрьварʹа дьгьрьн у хwә бьльнд һʹәсаб дькьн. Шкәстибун али мә дькә wәки qәдьре wан бьгьрьн у гöрʹа wанда бьн, йед кö рʹебәрийе дьдьн. Әw йәк щьват йәктийеда хwәй дькә. Хенщи ве йәке, һәрге әм шкәсти нә, бь ве йәке әм дьле Хwәде ша дькьн, чьмки әw «мьqабьли кʹöбар-бабаха йә, ле кʹәрәме дьдә шкәстийа» (1 Пәт. 5:5).

11. Чахе әм дьфькьрьн дәрһәqа симболед рʹожа Биранине, әw йәк ча али мә дькә йәктийе хwәй кьн?

¹¹ Йа дöда, кö чаwа әм дькарьн йәктийе хwәй кьн, әw һәйә фькьрандьна сәр симбола, кʹижан кö wәʹде Биранине тенә хәбьтандьне. Wе баш бә әм ве йәке бькьн пешийа Биранине у илаһи рʹожа Биранине. Симбол әw һәнә нане шкәва у шәрава сор (1 Корн. 11:23-25). Нан бь симболик те һʹәсабе бәдәна Исайә бегöнә, кʹижан кö әwи ча qöрбан бәрва да. Шәрав те һʹәсабе хуна wи кö һатә рʹетьне. Ле бәс нинә тʹәне фәʹм кьн әв симбол чь тенә һʹәсабе. Бир нәкьн кö qöрбана Мәсиһ дö щурʹе һʹьзкьрьна мәзьн әʹйан дькә. Әw һәйә һʹьзкьрьна Йаһоwа кö әwи Кöрʹе хwә бона мә qöрбан кьр, у һʹьзкьрьна Иса кö әw бь рʹәзәдьли әʹмьре хwә да бона мә. Һәрге әм бьфькьрьн сәр һʹьзкьрьна wан, дьле мә жи wе һьндава wан бь һʹьзкьрьне тʹьжә бә. Һʹьзкьрьна мә һәр кәси һьндава Йаһоwа, чаwа тʹел мә тʹәвайи гьредьдә у йәктийа мә qәwи дькә.

12. Чаwа Иса мәсәледа дәрһәqа пʹадша у хöламед wи әʹйан кьр, wәки Йаһоwа дьхwазә кö әм бьбахшиньнә мәрьва?

¹² Йа сьсийа, чаwа әм дькарьн йәктийе хwәй кьн, әw һәйә чахе әм бь дьл дьбахшиньн мәрьва. Чахе әм дьбахшиньнә wан, йед кö мә данә хәйидандьне, әм нишан дькьн wәки qимәт дькьн бахшандьна гöнед мә, кö бь сайа qöрбана Мәсиһ мә стандийә. Дина хwә бьдьнә мәсәла Иса кö Мәтта 18:23-34-да ньвисийә. Пьрсед öса бьдьнә хwә: «Гәло әз дьхwазьм әw ширәта Иса биньм сери? Әз бь сәбьр ьм у бь фәʹмдарийе мә тʹәви хушк-бьред хwә? Әз һазьр ьм бьбахшиньмә wан, йед кö һьндава мьнда гöнә кьрьнә?». Щара мәрʹа ча мәрьвед гöнәкʹаррʹа гәләк чәтьн ә бьбахшиньн. Ле йәкә әw мәсәла Иса рʹьнд нишан дькә, wәки Йаһоwа дьхwазә әм ве йәке бькьн. (Бьхунә Мәтта 18:35.) Иса әшкәрә дьдә кʹьфше кö Йаһоwа wе нәбахшинә мә, һәрге әм нәбахшиньнә хушк-бьред хwә чахе әwана гöне хwә тиньн рʹуйе хwә. Әwе йәке әм гәрәке бир нәкьн. Чахе әм дьбахшиньнә мәрьва чаwа Иса мә һин кьр, әм йәктийа хwәйә qимәт хwәй дькьн.

13. Һәрге әм әʹдьлайе дькьн, ча әw йәк йәктийа мә хwәй дькә?

¹³ Чахе әм дьбахшиньнә йед дьн, әм нишан дькьн кö әм әʹдьлайе дькьн. Биньн бира хwә ширәта Паwлосе шанди, әwи гот: «Бьщәʹдиньн, кö йәктийа рʹöһʹ пе һәвгьредана әʹдьлайийе хwәй кьн» (Әфәс. 4:3). Пешийа Евара Биранине у рʹожа Биранине, кʹур бьфькьрьн кö һун ча ньн һьндава мәрьва. Жь хwә бьпьрсьн: «Гәло мьн нас дькьн ча мәрьве кö зу һерс накʹәвә у хәйде хwәй накә? Гәло мәрьв дькарьн бьвиньн кö әз алийе хwәда һәр тьшти дькьм, сәва әʹдьлайе у йәктийе хwәй кьм?». Бәле, гәләк фәрз ә кö әм сәр wан пьрса кʹур бьфькьрьн.

14. Чаwа әм дькарьн «һʹьзкьрьнеда ль бәр һәв дахьн»?

¹⁴ Йа чара, кö чаwа әм дькарьн йәктийе хwәй кьн, әw ә кö һʹьзкьрьнеда чʹәʹв бьдьнә Йаһоwа, йе кö Хwәдейе һʹьзкьрьне йә (1 Йуһʹн. 4:8). Әм тʹö щар нахwазьн бежьн сәр хушк-бьра гьлийед öса: «Әз гәрә wана сәбьр кьм, чьмки хушк-бьред мьн ьн, ле әʹсә нинә әз wана һʹьз бькьм!». Бьфькьрьн сәр ширәта Паwлос, йе кö гот «һʹьзкьрьнеда ль бәр һәв дахьн» (Әфәс. 4:2). Дина хwә бьдьн, әwи нә гот тʹәне «ль бәр һәв дахьн», демәк һәв сәбьр кьн, ле әwи гот кö «һʹьзкьрьнеда» ве йәке бькьн. Демәк фьрqи һәйә. Щьвата мәда һʹәму щурʹә мәрьв һәнә кʹижана Йаһоwа незики хwә кьрийә (Йуһʹн. 6:44). Әwана дьле wи һатьн, ләма әwи wана незики хwә кьр. Wәки öса нә, чь изьна мә һәйә кö лома хушк-бьред хwә бькьн, у бежьн кö әwана һежайи һʹьзкьрьна мә ниньн? Дәwсе, әм гәрәке тʹö щар хwә паш нәхьн һʹьзкьрьне бьдьнә кʹьфше, чьмки Йаһоwа ве йәке жь мә дәʹwа дькә (1 Йуһʹн. 4:20, 21).

ЕВАРА БИРАНИНА ПАШЬН WЕ КʹӘНГЕ БӘ?

15. Әм жь кʹö заньн wәки Евара Биранина пашьн wе һәбә?

¹⁵ Щарәке wе бе әw рʹож, чахе Евара Биранине щара пашьн бе дәрбазкьрьне. Ле әм жь кʹö ве йәке заньн? Паwлос Мәсиһийед бьжартирʹа ньвиси кö һәр сал бь дәрбазкьрьна Биранина мьрьна Иса, әwана wе «мьрьна Хöдан бькьнә дәнги, һʹәта һатьна wи» (1 Корн. 11:26). Иса жи дьгот бона ве «һатьна» хwә, чахе пʹехәмбәртийа дәрһәqа рʹожед ахьрийе гьли дькьр. Дәрһәqа тәнгасийа мәзьн кö пешийа мә йә, Иса гот: «Нишана Кöрʹе Инсан wе ль әʹзмен хöйа бә у һʹәму мьләтед дьнйайе wе шине бькьн, гава бьбиньн Кöрʹе Инсан ль сәр әʹwред әʹзмен бь qәwат у рʹумәта мәзьн те. Әwе [Иса] мьлйакʹәтед хwә бь борʹийа дәнге бьльнд бьшинә у wе бьжартийед wи жь һәр чар qöлба бәрәв кьн, жь пʹәрʹәки әʹзмана һʹәта пʹәрʹе дьн» (Мәт. 24:29-31). Щьвандьна йед бьжартийа wе һьнге бә, чахе һʹәму Мәсиһийед бьжарти йед кö сәр әʹрде манә, хәлата хwәйә әʹзмани бьстиньн. Әw йәк wе бьqәwьмә wәʹде дәстпека тәнгасийа мәзьн, ле пешийа Һармәгәдоне. Паше Иса у 144 000, wе тʹәви пʹадшед дьнйайе шәрʹ бькьн (Әʹйан. 17:12-14). Евара Биранине wе щара пашьн дәрбаз бә, пешийа кö Иса бьжартийа бьщьвинә.

16. Чьрʹа һун дьхwазьн бенә сәр Евара Биранине?

¹⁶ Дә wәрә әм хwәрʹа нете дайньн wәки бенә сәр Евара Биранине кö wе 31 Адаре бә, сала 2018-да. У wәрә әм Йаһоwарʹа дöа бькьн сәва нава щьмәʹта wида йәкти бе хwәйкьрьне. (Бьхунә Зәбур 133:1.) Бир нәкьн, wе бе рʹожәкә öса кö әме щара пашьн бенә сәр Евара Биранине. Ле һʹәта әw рʹож бе, wәрә әм алийе хwәда һʹәму тьшти бькьн, сәва кö бенә сәр ве щьвине у йәктийа хwәрʹа ша бьн wәʹде Евара Биранине.