Чь Щурʹә Һʹьзкьрьн бь Рʹасти Бәхтәwарийе Тинә?

1. Чьрʹа әм wәʹдәки мәхсусда дьжин?

НАВА тʹәрихийа инсанәтеда, әм wәʹдәки гәләк мәхсусда дьжин. Чаwа Кʹьтеба Пироз пʹехәмбәрти кьрийә, Йаһоwа «әʹлаләтәкә . . . мәзьн . . . жь һәр мьләти, жь һәр бәрәке, жь һәр щьмәʹте у жь һәр зьмани» тʹоп дькә. Әw «щьмәʹтәкә qәwи йә» кö жь 8 милйон мәрьви зедәтьр ә. Әw мәрьв «шәв у рʹо [Хwәде] дьһʹәбиньн» у бәхтәwар ьн (Әʹйан. 7:9, 15; Иша. 60:22, ДТʹ). Тʹö щар һаqас мәрьв тʹöнә бун ча иро, йед кö һьн Хwәде һьн жи мәрьва һʹьз дькьн.

2. Мәрьвед кö жь Хwәде дур ьн, кʹижан һʹьзкьрьна нәрʹаст дьдьнә кʹьфше? (Бьньһерʹә шькле әʹwльн.)

² Кʹьтеба Пироз öса жи дәрһәqа wәʹде мә пʹехәмбәрти кьрийә, кö һʹьзкьрьна нәрʹаст wе бәлабуйи бә. Әw хwәһʹьзи йә, у һʹьзкьрьна wи щурʹәйи мәрьвед öса дьдьнә кʹьфше йед кö жь Хwәде дур ьн. Паwлосе шанди ньвиси: «Рʹожед ахьрийеда . . . мәрьве бьбьнә хwәһʹьз, пʹәрәһʹьз, . . . рʹьһʹәтиһʹьз, нә кö Хwәдеһʹьз» (2 Тимтʹ. 3:1-4). Әв щурʹә һʹьзкьрьн тʹö щар накʹәвә нава һʹьзкьрьна Мәсиһитида. Мәрьвед хwәһʹьз йед кö тʹәне пәй хwәстьнед хwә дькʹәвьн, дьфькьрьн кö әwана бәхтәwар ьн, ле öса нинә. Бь рʹастийе әв һʹьзкьрьн жийин һе чәтьн дькә.

3. Ве готареда әме дәрһәqа чь шеwьр кьн у чьрʹа?

³ Паwлос заньбу кö хwәһʹьзи wе бәлабуйи бә у кö Мәсиһи жи дькарьн бькʹәвьнә ве тʹәльке. Ләма жи әwи ширәт да wәки хwә жь мәрьвед öса «дур» бьгьрьн, йед кö һʹьзкьрьна нәрʹаст дьдьнә кʹьфше (2 Тимтʹ. 3:5). Әв йәк рʹаст ә кö әм бь тʹәмами нькарьн хwә жь wана бьqәтиньн. Ле гәло чаwа әм дькарьн хwә хwәй кьн wәки нәкʹәвьнә бәр байе ньһерʹандьна ве дьнйайе, у дьле Йаһоwа ша кьн, демәк Хwәдейе һʹьзкьрьне? Wәрә әм һʹьзкьрьна һьндава Хwәде бәрамбәри ве һʹьзкьрьне бькьн, кʹижан кö 2 Тимотʹейо 3:2-4-да те гьликьрьне. Әw йәк wе али мә бькә хwә бьщерʹьбиньн у һʹьзкьрьна рʹаст бьдьнә кʹьфше, кʹижан кö бь рʹастийе мәрьва бәхтәwар дькә.

ХWӘДЕҺʹЬЗИ ЙАН ХWӘҺʹЬЗИ?

4. Чьрʹа хьраб нинә һәрге әм бь щурʹе рʹаст хwә һʹьз дькьн?

⁴ Паwлос ньвиси: «Мәрьве бьбьнә хwәһʹьз». Ле гәло әw хьраб ә wәки хwә һʹьз бькьн? На, әw тьштәки тʹәбийәти йә, у һәла һе жи лазьм ә. Йаһоwа әм öса әʹфьрандьнә. Иса гот: «Һәвале хwә wәкә хwә һʹьз бькә» (Марq. 12:31). Бь рʹастийе öса нә, һәрге әм хwә һʹьз нәкьн, әме нькарьбьн мәрьва һʹьз бькьн. Кʹьтеба Пироз öса жи дьбежә: «Гәрәке мер жьна хwә һʹьз бькә, чаwа бәдәна хwә. Йе кö жьна хwә һʹьз дькә, әw хwә һʹьз дькә. Чьмки бәдәна тʹö кәси бәр чʹәʹве wи нә рʹәш ә, ле wе тʹер дькә у хwәй дькә» (Әфәс. 5:28, 29). Демәк, әм дьвиньн wәки чахе әм хwә һʹьз дькьн у әв һʹьзкьрьн жь синора дәрнайе, ве йәкеда тьштәки хьраб тʹöнә.

5. Гьли кьн кö мәрьвед хwәһʹьз чь щурʹәйи нә.

⁵ Хwәһʹьзи дәрһәqа кʹижани 2 Тимотʹейо 3:2-да те готьне, әв һʹьзкьрьна нәрʹаст ә. Мәрьвед кö хwә гәләк һʹьз дькьн, жь ве зедәтьр сәр хwә дьфькьрьн, нә кö чьqас жь wан дькʹәвә. (Бьхунә Рʹомайи 12:3.) Әʹмьре хwәда әwана тʹәне дәрһәqа хwә дьфькьрьн, ле дәрһәqа мәрьвед дьн qә хәм накьн. Чахе әwана тьштәки нәрʹаст дькьн, әwана гöне хwә дькьнә стуйе кәсәки дьн, чьмки нахwазьн щабдар бьн бона кьред хwә. Леколинкʹарәки Кʹьтеба Пироз мәрьвед хwәһʹьз бәрамбәри жужу кьр, кʹижан кö хwә гьлор дькә, гәрмеда хwә хwәй дькә у хwәха хwәрʹа йә, ле йед дьнрʹа тʹәне стрийед хwә нишан дькә. Бәле, мәрьвед кö тʹәне бона хwә дьфькьрьн, бь рʹастийе бәхтәwар ниньн.

6. Хwәдеһʹьзи кʹижан һʹöнöра пешда тинә?

⁶ Һьнә зандаред Кʹьтеба Пироз дьбежьн кö Паwлос пешийе дәрһәqа хwәһʹьзийе гот, чьмки һәма әв һʹöнöр пешда тинә wан һʹöнöред хьраб, кʹижан кö паше Паwлос рʹез дькә. Ле мәрьвед кö Хwәде һʹьз дькьн, хәйсәт-һʹöнöред дьн нишан дькьн. Кʹьтеба Пироз дьбежә кö һʹьзкьрьн һьндава Хwәде wан һʹöнöра пешда тинә: Шабун, әʹдьлайи, сәбьркьрьн, ширьнайи, qәнщи, амьни, мьлукти у хwәгьртьн (Галт. 5:22, 23). Зәбурбеж ньвиси: «Хwәзи ль wи щьмәʹти, кö Хwәдейе wан Йаһоwа йә» (Зәб. 144:15, ДТʹ). Йаһоwа Хwәдейе бәхтәwар ә, у щьмәʹта wи жи бәхтәwар ә. Хьзмәткʹаред Йаһоwа мина мәрьвед хwәһʹьз ниньн, йед кö тʹәне кʹара хwә дьгәрʹьн, ле әwана шабуне дьстиньн чьмки бона мәрьвед дьн хәм дькьн (Кʹар. Шанд. 20:35).

7. Кʹижан пьрс wе али мә бькьн һʹьзкьрьна хwә һьндава Хwәде бьщерʹьбиньн?

⁷ Ле ча әм дькарьн тедәрхьн кö әм гәләк хwәһʹьз дьбьн у һʹьзкьрьна мә һьндава Хwәде сьст дьбә? Дина хwә бьдьн кö чь те готьне Филипи 2:3, 4-да: «Тьштәки бь һәврʹькʹийе нәкьн у ль наве хwә нәгәрʹьн, ле жь wә һәр йәк бь мьлуктийе һәвале хwә сәр хwәрʹа бьгьрә. Тʹәне ль кʹара хwә нәгәрʹьн, ле бьра һәр кәс ль кʹара һәвале хwә жи бьгәрʹә». Wе керһати бә әм пьрсед öса бьдьнә хwә: «Гәло әз әве ширәте әʹмьре хwәда дьдьмә хәбате? Гәло әз бь дьле хwә дьхwазьм qьрара Хwәде биньм сери? Гәло әз мәщала дьгәрʹьм сәва али мәрьва бькьм, чаwа щьватеда öса жи хьзмәтийеда?» Һеса нинә тʹьме wәʹдә у qәwата хwә сәр мәрьвед дьн хәрщ кьн, ләма жи лазьм ә әм хwә һьнәки бьдьнә щәфе у тьштәки жь хwә кем кьн. Тʹö тьшт öса мә бәхтәwар накә, чаwа занәбуна ве йәке кö Хwәдейе Һәри Жорьн мә qәбул дькә.

8. Һʹьзкьрьна һьндава Хwәде һьнәка бәрбь чь һелан кьрийә?

⁸ Һʹьзкьрьна һьндава Хwәде, һьнә Мәсиһийа һелан кьрийә wәки хәбатәкә öса бьһельн, кö дькарьбу wана дәwләти кьра. Гәло чьрʹа? Чьмки wана дьхwәст һе зедә Хwәдерʹа хьзмәт кьн. Ерика йа кö Амәрикайеда дьжи, һʹәким ә. Ле дәwса кö ве йәкеда пешда һәрʹә у бьбә йәкә навдар, әw буйә пешәнг у тʹәви мере хwә чәнд wәлатада хьзмәт кьрийә. Дина хwә бьдьн әw чь дьбежә: «Әм аликʹарийе дьдьн дәшта зьманәкә хәрибда, у бал мә гәләк qәwьмандьнед һʹәwас һәнә, һьн жи мә гәләк һәвал хwәрʹа дитьн. Әw һʹәму тьшт бь рʹастийе әʹмьре мә дәwләти кьрийә. Әз һʹәта ньһа ча һʹәким дьхәбьтьм, ле әз дьһа зәʹф wәʹдә у qәwата хwә хәрщ дькьм, wәки мәрьва рʹöһʹанида qәнщ кьм у щьватеда чьда һʹәwщәти һәйә кʹомәке бьдьм. Әw йәк дьле мьн бь шабуне тʹьжә дькә у дьлрʹьһʹәтийе дьдә мьн».

ҺӘБУК ӘʹЗМЕНДА ЙАН ҺӘБУК СӘР ӘʹРДЕ?

9. Чьрʹа пʹәрәһʹьзи мәрьва бәхтәwар накә?

⁹ Паwлос ньвиси wәки мәрьв wе бьбьнә «пʹәрәһʹьз». Чәнд салед пашwәхтийе, бьраки мә жь Ирләнде кö пешәнг ә, тʹәви мерькәки дәрһәqа Хwәде хәбәр да. Әwи мерьки кʹиська хwә һьлда, бәр wи пʹәрә теда дәрхьст у бь qöрʹәбуне готе: «Әв ә хwәдайе мьн!». Рʹаст ә дьбәкә гәләк мәрьв öса әʹйан ве йәке навежьн, ле ве дьнйайеда гәләк мәрьвед öса һәнә, йед кö пʹәра һʹьз дькьн у тьштед кö пе пʹәра дькарьн бькʹьрʹьн. Ле Кʹьтеба Пироз мә ширәт дькә: «Йе кö зив һʹьз дькә тʹери зив у йе кö зедәйийе һʹьз дькә тʹер . . . набә» (Wаиз 5:10). Мәрьвед wи щурʹәйи пе пʹәра wе тʹер нәбьн, чьмки һе зедә у зедә дьхwазьн, у wәʹде хwә хәрщ дькьн сәва һе зедә тʹоп кьн. Ле ахьрийеда әwана дьбьнә хwәйе «кöл-дәрда» (1 Тимтʹ. 6:9, 10).

10. Кʹьтеба Пироз дәрһәqа кʹәсибийе у дәwләтийе чь дьбежә?

¹⁰ Мә һәр кәсирʹа пʹәрә лазьм ә. Пʹәрә һьнә тьштада мә хwәй дькьн (Wаиз 7:12). Ле гәло мәрьв дькарә бь рʹасти бәхтәwар бә, һәрге пʹәре wи тʹәне тʹера һʹәwще wи дькә? Бәле дькарә! (Бьхунә Wаиз 5:12.) Зәбурбеж бь наве Агур, кöрʹе Йаqәһе, дöа кьр: «Нә мьн бәләнгаз кә, нә жи дәwләти кә, пе нане рʹоже Тö мьн тʹер кә». Әм дькарьн фәʹм кьн чьрʹа әwи гот кö нахwазә гәләк кʹәсиб бә. Паши wан гьлийа әwи шьровәкьр кö әw нәдьхwәст дьзийе бькә у бь ве йәке наве Хwәде беһöрмәт кә. Ле чьрʹа әwи дöа кьр wәки нахwазә дәwләти бә? Әwи ньвиси: «Нәбә кö әз тʹер бьм, Тә инкʹар кьм у бежьм: ‹Хöдан кʹи йә?›» (Мәтʹлк. 30:8, 9). Дьбәкә wә хwәха мәрьвед öса дитийә, бона кʹижана һәбук хwәйихöдан ә, нә кö Хwәде.

11. Дәрһәqа пʹәра Иса чь ширәт да?

¹¹ Әwед кö пʹәрә һʹьз дькьн, нькарьн Хwәде хwәш бен. Иса гот: «Тö кәс нькарә дö ахарʹа хöламтийе бькә, чьмки йан wе һʹиле wи жь йәки һәрʹә у йе дьне һʹьз бькә, йан жи wе qәдьре йәки бьгьрә у йе дьне беһöрмәт кә. Һун нькарьн һьн Хwәдерʹа, һьн жи һәбукерʹа хöламтийе бькьн». Иса öса жи гот: «Ль сәр дьне хьзне хwәрʹа нәщьвиньн. Ль ве дәре зәнг у бьзуз хьраб дькьн у дьз дәрәвәдькьн дьдьзьн. Ле хьзне хwәрʹа ль әʹзмен бьщьвиньн. Ль wе дәре зәнг у бьзуз хьраб накьн у дьз жи дәрәвәнакьн надьзьн» (Мәт. 6:19, 20, 24).

12. Әʹмьре һеса хьзмәтийа Йаһоwада чьда аликʹарийе дьдә? Мәсәле биньн.

¹² Гәләк хьзмәткʹаред Хwәде бь әʹмьрәки һеса дьжин. Wана фәʹм кьр кö әw йәк wана нә кö тʹәне бәхтәwар дькә, ле һьн жи һе зедә wәʹде wан дьминә бона хьзмәткьрьна Йаһоwарʹа. Бьраки мә бь наве Жак йе кö Амәрикайеда дьжи, ханийа хwәйә мәзьн у бизнеса хwә фьрот, чьмки заньбу wәки öса әwе бькарьбә мина жьна хwә ча пешәнг хьзмәт кә. Әw гьли дькә: «Öса чәтьн бу мала хwә у әʹрде хwә бьфьрошьм, кʹижан кö щики гәләк бәдәw у хwәшда бу. Ле бь сала әз сәва проблемед хәбатеда, дьлтәнг дьһатьмә мал. Ле жьна мьн кö пешәнг ә, тʹьме йәкә ша бу. Әwе мьнрʹа дьгот: ‹Мәзьне хәбата мьн, кәсе һәри бьльнд ә!› Ньһа әз у жьна мьн ча пешәнг хьзмәт дькьн, у әм һәрдö жи бона Йаһоwа дьхәбьтьн».

13. Ча әм дькарьн ньһерʹандьна хwә сәр пʹәра бьщерʹьбиньн?

¹³ Сәва әм хwә бьщерʹьбиньн кö һьндава пʹәрада әм чаwа ньн, әм гәрәке һʹәлал хwә бьщерʹьбиньн у пьрсед öса бьдьнә хwә: «Гәло пе әʹмьре мьн те кʹьфше wәки әз тиньм сери гьлийед Кʹьтеба пироз дәрһәqа пʹәра? Гәло әʹмьре мьнда пʹәрә щийе пешьн дьгьрә? Гәло бона мьн тьштед материали дьһа qимәт ьн, йан һәләqәтийа мьн тʹәви Йаһоwа у мәрьва? Гәло әз бь рʹастийе итʹбарийа хwә Йаһоwа тиньм, wәки әw бона һʹәwщед мьн wе хәм бькә?» Әм дькарьн дöдьли нәбьн wәки Йаһоwа wе тʹö щар wана наһелә, йед кö баwәрийа хwә wи тиньн (Мәт. 6:33).

ӘМ ХWӘДЕҺʹЬЗ ЬН ЙАН РʹЬҺʹӘТИҺʹЬЗ ЬН?

14. Кʹижан ә ньһерʹандьна рʹаст дәрһәqа рʹьһʹәтийе?

¹⁴ Ча һатьбу пʹехәмбәртикьрьне, гәләк мәрьв иро «рʹьһʹәтиһʹьз» ьн. Бь рʹастийе тьштәки хьраб wе йәкеда тʹöнә, wәки әʹмьре хwәрʹа ша бьн у рʹьһʹәт бьн. Ле фәрз ә рʹаст сәр wе йәке бьньһерʹьн. Йаһоwа нахwазә wәки әм һәр тьшти жь хwә кем кьн, һеса нәбьн, у хwәрʹа wәʹдә дәрбаз нәкьн. Кʹьтеба Пироз хьзмәткʹаред амьнрʹа дьбежә: «Һәрʹә бь кʹефхwәшийе нане хwә бьхwә у бь дьле qәнщ хәмрʹа хwә вәхwә» (Wаиз 9:7).

15. Дәрһәqа кʹижан щурʹе һʹьзкьрьне 2 Тимотʹейо 3:4-да те готьне?

¹⁵ Тимотʹейо дöда 3:4-да, те готьне дәрһәqа мәрьвед рʹьһʹәтиһʹьз, әʹмьре кʹижанада бона Хwәде щи тʹöнә. Дина хwә бьдьн кö ве рʹезеда найе готьне, wәки әw мәрьв, жь Хwәде зедәтьр wе рʹьһʹәтийе һʹьз бькьн. Ле рʹезеда те готьне кö мәрьв wе рʹьһʹәтиһʹьз бьн, «нә кö Хwәдеһʹьз». Зандарәки ньвиси: «Әв [рʹез] найе һʹәсабе wәки һʹьзкьрьна wан һьндава Хwәде һьнәки һәйә. Әw те һʹәсабе wәки әwана qә Хwәде һʹьз накьн». Рʹасти жи әw йәк бона мәрьвед рʹьһʹәтиһʹьз ширәтәкә фәрз ә сәва һʹаш жь хwә һәбьн. Кʹьтеба Пироз дьбежә кö мәрьвед рʹьһʹәтиһʹьз, «шабуна ви әʹмьрива мьжул дьбьн» (Луqа 8:14).

16, 17. Дәрһәqа рʹьһʹәтийе Иса чь мәсәлә һишт?

¹⁶ Иса ньһерʹандьна рʹаст нишан кьр һьндава рʹьһʹәтийе. Әw чу «дәʹwате» у öса жи ча меван дьчу сәр нанхwарьне (Йуһʹн. 2:1-10; Луqа 5:29). Дәʹwатеда әwи бь кʹәрәмәт ав кьрә шәрав. Щарәке жи, чахе щьмәʹт wи сущдар кьр бона хwарьн-вәхwарьне, Иса ньһерʹандьна wани нәрʹаст wанрʹа әшкәрә кьр (Луqа 7:33-36).

¹⁷ Ле әʹмьре Исада рʹьһʹәти тʹö щар щийе пешьн нәдьгьрт. Бона wи Йаһоwа сәр щийе пешьн бу, у әwи бона мәрьва һʹәйфа хwә wәʹдә у qәwата хwә нәдьани. Сәва инсанәте хьлаз кә, әw бь рʹәзәдьли чәрчьри у сәр стуна щәфайе мьр. Әwед кö дьхwәстьн пәй Иса һәрʹьн, Иса wанрʹа гот: «Хwәзи ль wә, гава бона наве мьн wә беһöрмәт кьн, бьзериньн у һәр щурʹә бöхдан ль wә бькьн. Әшq у ша бьн, чьмки һәqе wә ль әʹзмана гәләк ә. Бь ви щурʹәйи пʹехәмбәред кö бәри wә һәбун, зерандьн» (Мәт. 5:11, 12).

18. Кʹижан пьрса әм дькарьн бьдьнә хwә сәва ньһерʹандьна хwә һьндава рʹьһʹәтийе бьщерʹьбиньн?

¹⁸ Ле әм ча дькарьн ньһерʹандьна хwә дәрһәqа рʹьһʹәтийе бьщерʹьбиньн? Wе керһати бә пьрсед öса бьдьнә хwә: «Гәло бона мьн wәʹдәдәрбазкьрьн щийе пешьн дьгьрә, йан щьват у хьзмәти? Гәло әз һазьр ьм хwә жь һьнә тьшта кем кьм, сәва Хwәдерʹа хьзмәт кьм? Чахе әз дьжберьм кö чаwа wәʹде хwә дәрбаз кьм, гәло әз дьфькьрьм кö Йаһоwа ча дьньһерʹә сәр бьжартьна мьн?» Һәрге әм бь рʹастийе Хwәде һʹьз дькьн, әме фәсал бьн у хwә нә кö тʹәне жь wан тьшта дур бьгьрьн кʹижан кö wи хwәш найен, ле öса жи жь wан тьшта кö әм дьфькьрьн wәки дькарьн wи хwәш нәйен. (Бьхунә Мәтта 22:37, 38.)

БӘХТӘWАРИЙА РʹАСТ

19. Кʹижан мәрьв нькарьн бь рʹастийе бәхтәwар бьн?

¹⁹ Паши 6 000 салед тʹәрихийа инсанәте, дьнйа Шәйтʹан незики хьлазийе буйә. Әʹрд бь мәрьвед хwәһʹьз, пʹәрәһʹьз у рʹьһʹәтиһʹьз тʹьжә йә. Әʹмьре wан мәрьвада хwәстьнед wан щийе пешьн дьгьрьн у әwана тʹәне кʹара хwә дьгәрʹьн. Мәрьвед wи щурʹәйи нькарьн бь рʹастийе бәхтәwар бьн. Зәбурбеж ньвиси: «Хwәзи бь wан кö аликʹаре wан Хwәдайе Аqуб ә, һевийа wан бь Хwәдайе wан Хöдан ә» (Зәб. 146:5, ИМ).

20. Һʹьзкьрьна һьндава Хwәде ча тә бәхтәwар дькә?

²⁰ Һʹьзкьрьн һьндава Хwәде нава щьмәʹта Йаһоwада дьһа мәзьн у мәзьн дьбә, у мәрьвед ви щурʹәйи жи һәр сал зедә дьбьн. Әw йәк избат дькә wәки Пʹадшатийа Хwәде сәрwертийе дькә, у кö әw wе зутьрәке сәр әʹрде гәләк кʹәрәма бьбаринә, кʹижан кö әм нә жи дькарьн бьдьнә бәр чʹәʹве хwә. Шабуна рʹаст у дьреж әм һьнге дьстиньн, чахе qьрара Хwәде тиньн сери, у заньн кö әм дьле йе Һәри Жорьн ша дькьн. Әwед кö Йаһоwа һʹьз дькьн wе һʹәта-һʹәтайе ша бьн! Готара дьнда әме шеwьр кьн дәрһәqа һьнә һʹöнöра кʹижан кö жь хwәһʹьзийе пешда тен, у әме бьвиньн wәки чаwа әw һʹöнöр щöдә дьбьн жь һʹöнöред хьзмәткʹаред Йаһоwа.