Чʹәʹв Бьдьнә Йаһоwа Хwәдейе Дьлдайине

1. Паши рʹабәрибуна Әдәнеда, Йаһоwа чь бәрдьли да инсанәте?

ЙАҺОWА Хwәдейе дьлдайине йә. Чахе инсанәт кʹәтә нава гöнә у бунә гöнәкʹар, Хwәде һьнгеда нишан кьр wәки әw һәйә кәсе кö бәрдьлийе дьдә. Паши рʹабәрибуна Әдәнеда, әwи дәрберʹа бь пʹехәмбәртийе мерхаси у баwәри да зöрʹәта Адәм, кʹижан кö wе паше бьһата дьне. Әв пʹехәмбәрти ньвисар ә Дәстпебун 3:15-да, кʹидәре кö Хwәде соз дайә, wәки wе «мәʹре бәре», демәк Шәйтʹан у öса жи һʹәму кьред wийи хьраб кʹöта кә (Әʹйан. 12:9; 1 Йуһʹн. 3:8).

ЙАҺОWА ДЬЛ ДЬДА ХЬЗМӘТКʹАРЕД ХWӘЙИ БӘРЕ

2. Чаwа Йаһоwа дьл да бәр Нöһ?

² Нöһ, хьзмәткʹаре Йаһоwа, дьнйакә зöлмда дьжит, кʹидәре кö тʹәне нәфәред wи Йаһоwа дьһʹәбандьн. Дор бәре wи һʹәму мәрьв зöлм у бенамус бун у ләма әw дькарьбу дьлтәнг буйа (Дәстп. 6:4, 5, 11; Щьһуд. 6). Ле Йаһоwа жерʹа мерхаси да сәва әw бәрдәwам кә «рʹийа Хwәдеда» һәрʹә (Дәстп. 6:9). Йаһоwа готә Нöһ, wәки әw дьхwазә qьрʹа ве дьнйайе бинә, у рʹебәри да wи, кö әw чь бькә сәва нәфәред хwәва хьлаз бә (Дәстп. 6:13-18). Бәле, Йаһоwа бона Нöһ Хwәдейе дьлдайине бу.

3. Йешу ча бәрдьли станд? (Бьньһерʹә шькле әʹwльн.)

³ Йешу щабдарикә мәзьн станд, әwи гәрәке щьмәʹта Хwәде бьвьра Әʹрде Создайи. Әw йәк һеса нибу, чьмки гәрәке тʹәви мьләтед qәwи шәрʹ кьра, сәва әwи әʹрди зәфт кә. Демәк, мәʹни һәбу кö Йешу бәрхwә кʹәта у бьтьрсийа. Йаһоwа әw йәк заньбу, ләма жи Муса ширәт кьр, wәки һәрʹә бәрдьлийе бьдә Йешу. Хwәде гот: «Ль Йешу әʹмьр кә, дьл бьдә ль бәр wи у бьшьдинә, чьмки әwе пешийа ви мьләтива һәрʹә у wи әʹрди кʹижани те бьбини wанрʹа бькә мьлк» (Qан. Дщр. 3:28). Паше Йаһоwа хwәха дьл да Йешу у гот: «Нә мьн тʹәми да тә, кö тö мерхас би у qәwи би? Нәләрьзә у нәтьрсә, чьмки Йаһоwа Хwәдейе тә тʹәви тә йә кʹöда жи һәрʹи» (Йешу 1:1, 9, ДТʹ). Рʹасти жи әw гьли wе чьqас wи дьлгәрм кьра!

4, 5. а) Йаһоwа чь бәрдьли да щьмәʹта хwәйә бәре? б) Йаһоwа ча Иса дьлгәрм кьр?

⁴ Ле Йаһоwа нә кö тʹәне йәк бь йәк дьл дьда мәрьва, ле öса жи дьда щьмәʹта хwә бь тʹәмами һәврʹа. Әwи бь пʹехәмбәртийе дьл да Щьһуйа, йед кö дилтийа Бабилонеда бун. Йаһоwа готә wан: «Тö нәтьрсә, жь бәр кö әз бь тәрʹа мә; ль дора хwә нәньһерʹә, жь бәр кö Хwәдайе тә әз ьм; әзе тә зәхм [хwәй] бькьм; бәле, әзе али тә бькьм; бәле әзе бь дәсте рʹасте дадийа хwә жь тәрʹа бьбьм аликʹар!» (Иша. 41:10). Wәʹдә дәрбаз бу, Йаһоwа öса жи бәрдьли дьда Мәсиһийед qьрʹна йәкеда, у иро жи әw бәр дьле мәда те. (Бьхунә 2 Корьнтʹи 1:3, 4.)

⁵ Йаһоwа öса жи бәрдьли да кöрʹе хwә Иса. Иса wәʹде ньхöмандьна хwә, жь әʹзмана дәнг бьһист: «Әв ә Кöрʹе мьни дәлал, кö әз жь wи рʹази мә» (Мәт. 3:17). Әwан гьлийа гәләк Иса шьдандьн wәʹде хьзмәтийа wийи сәр әʹрде!

ИСА ДЬЛ ДЬДА МӘРЬВА

6. Чаwа мәтʹәлока дәрһәqа тәланта дькарә дьл бьдә бәр мә?

⁶ Иса чʹәʹв дьда мәсәла Баве хwә. Әwи чахе мәтʹәлока тәланта гот, кʹижан кö дәрһәqа ахьрийа дьнйайе бу, бь ве йәке дьл да бәр шагьртед хwә wәки амьнийе хwәй кьн. Әw ахайе мәтʹәлокеда пʹайе һәр хöламәки амьн да бь wан гьлийа: «Әʹфәрьм, хöламе qәнщ у амьн! Тö нав тьштед һьндькида амьн майи, әзе тә дайньмә сәр гәләк тьшта. Бькʹәвә шайийа ахайе хwә!» (Мәт. 25:21, 23). Рʹасти жи йед кö әw гьли бьһистьн, һелан стандьн кö бәрдәwам кьн Йаһоwарʹа амьн бьминьн!

7. Иса ча дьл дьда шандийед хwә, илаһи Пәтрус?

⁷ Шандийед Иса гәләк щар һәврʹа дькʹәтьнә дәʹwе, кö жь wана кʹе мәзьн ә. Ле Иса бь сәбьр бәр дьле wанда дьһат у ширәт дькьр, сәва әwана хwә мьлук кьн у бьбьнә мина бәрдәстийа, нә кö мина аха (Луqа 22:24-26). Пәтрус жи чәнд щара дьле Иса ешанд (Мәт. 16:21-23; 26:31-35, 75). Ле Иса тʹö щар жь wи дур нәкʹәт, дәwсе, әwи дьл да wи у һәла һе жи шьхöл да wи, wәки бьра qәwи кә (Йуһʹн. 21:16).

БӘРДЬЛИ КÖ БӘРЕ ДЬСТАНДЬН

8. Чаwа Һьзqийа дьл да бәр сәрокед әскәра у щьмәʹта жь Щьһудайе?

⁸ Һәла һе жи пешийа кö Иса бьһата сәр әʹрде у мәсәлә бьһишта дәрһәqа дьлдайине, хьзмәткʹаред Йаһоwайи амьн заньбун, wәки гәрәке бәр дьле һәвдöда бен. Бәʹса хәбәре, чахе Асурийа Щьһуйа данә тьрсандьне кö wе тʹәви wан шәрʹ кьн, Һьзqийа Пʹадша сәрокед әскәра у щьмәʹта жь Щьһудайе тʹоп кьр у дьл да бәр wан. Щьмәʹт бь гьлийед wи гәләк qәwи бу. (Бьхунә 2 Дирок 32:6-8.)

9. Кʹьтеба Ибо чь мә һин дькә дәрһәqа бәрдьлийе?

⁹ Жь Ибо әм дькарьн һин бьн кö чаwа бәр дьле мәрьвада бен. Рʹаст ә әw хwәха һʹәwще бәрдьлийе бу, ле әwи дәрһәqа дьлдайине дәрс да се һәвалед хwә, йед кö йанчь бәр дьле wида дьһатьн. Ибо готә wан, кö һәрге әw дәwса wан буйа, әw wе бь гьлийа wана qәwи кьра у бәр дьле wанда бьһата (Иб. 16:1-5). Ахьрийеда, Ибо бәрдьли жь Әлиһу станд у паше Йаһоwа хwәха жи wи дьлгәрм кьр (Иб. 33:24, 25; 36:1, 11; 42:7, 10).

10, 11. а) Чьрʹа qиза Йәфтаһрʹа дьлдайин лазьм бу? б) Кʹе иро һежайи дьлдайинәкә öса йә?

¹⁰ Диса мәсәләкә дьнә бәре qиза Йәфтаһ йә, кʹижанерʹа дьлдайин лазьм бу. Чахе баве wе Йәфтаһ гәрәке бьчуйа тʹәви Амонийа шәрʹ кьра, әwи сонд хwар бәр Йаһоwа, кö һәрге әw сәркʹәвә, жь мала wи кʹижан мәрьв пешийе дәре у бе пешийа wи, әwе wи мәрьви бона хьзмәтийа пироз тʹәсмили Хwәде кә. Чахе баве wе бь сәркʹәтьне жь шәрʹ һат, öса qәwьми кö пешийе qиза wи, зарʹа wийә тайе тʹәне дәркʹәт. Һьнге рʹаст ә дьле Йәфтаһ шкәст, ле йәкә әwи сонда хwә ани сери у qиза хwә шандә коне пироз, сәва әw тʹәмамийа әʹмьре хwә wедәре хьзмәт кә (Һʹакьм. 11:30-35).

¹¹ Бәле, Йәфтаһрʹа чәтьн бу, ле qиза wирʹа һе чәтьн бу. Ле йәкә әwе пьштгьрийа созе баве хwә кьр (Һʹакьм. 11:36, 37). Әw һазьр бу сәва ве qöрбане, кö мер нәкә, зарʹед wе тʹöнә бьн, у рʹькʹьнийата малбәта wан жи дьреж нәбә. Һьнге жерʹа бь рʹасти бәрдьли у qәwикьрьн лазьм бу. Кʹьтеба Пироз дьбежә: «Исраеледа бу qәйдә: Һәр сал, сале чар рʹожа кәчʹькед Исраеле дьчун сәва пʹайе qиза Йәфтаһе Гиләади бьдьн» (Һʹакьм. 11:39, 40, ДТʹ). Иро жи гәләк щаһьлед кö азәп дьминьн у һʹьш-аqьле хwә датиньн сәр кьред кö «ль Хöдан хwәш» тен, һежайи пʹайа у дьлдайине нә (1 Корн. 7:32-35).

ШАНДИЙА ДЬЛ ДЬДАНӘ ХУШК-БЬРА

12, 13. Пәтрус ча хушк-бьра qәwи дькьрьн?

¹² Иса шәв пешийа мьрьна хwә, готә Пәтрус: «Шьмһʹун! Шьмһʹун! Ва йә Мирещьн хwәст wәки wә мина гәньм бежьнге хә. Ле мьн бона тә дöа кьр, wәки баwәрийа тә кем нәбә у гава тö вәгәрʹи, дьл бьди бәр бьрайед хwә» (Луqа 22:31, 32).

¹³ Пәтрус стуна щьвата Мәсиһити бу (Галт. 2:9). Әwи wәʹде Рʹожа Пенщийе һʹәсабе у паши ве йәке жи пе мерхасийа хwә дьл дьда бьра. Незики хьлазийа хьзмәтийа хwәйә дьреж, әwи хушк-бьрарʹа ньвиси: «Мьн . . . wәрʹа ньвиси, дьл дьдьмә wә у шәʹдәтийе дьдьм, кö әв ә кʹәрәма Хwәдейә рʹаст. Веда һун qәwин бьсәкьньн» (1 Пәт. 5:12). Нәʹмед Пәтрус бь qьрʹна дьл дьдьнә Мәсиһийа һʹәта рʹожа иройин. Рʹасти жи әм чьqас һʹәwще ве дьлдайине нә, чьмки әм һивийа созед Йаһоwа нә (2 Пәт. 3:13).

14, 15. Чаwа кʹьтебед кö Йуһʹәнна ньвиси дьл дьдьнә бәр мә?

¹⁴ Йуһʹәннайе шанди жи стуна щьвата Мәсиһити бу. Әwи ньвиси дәрһәqа хьзмәтийа Иса, у кʹьтеба wи дьл дьда Мәсиһийед һьнге, öса жи мә дьшьдинә у qәwи дькә. Мәсәлә, тʹәне кʹьтеба wида әм дьхуньн гьлийед Иса, чахе әwи гот кö шагьртед wийи рʹаст, wе пе һʹьзкьрьне әʹйан бьн. (Бьхунә Йуһʹәнна 13:34, 35.)

¹⁵ Хьзнед рʹастийе се нәʹмед Йуһʹәннада жи гәләк qимәт ьн. Чахе әм бона шашийед хwә дьлшкәсти дьбьн, у гава әм дьхуньн кö «хуна Иса . . . мә жь һʹәму гöна паqьж» дькә, әм гәләк дьлрʹьһʹәт дьбьн (1 Йуһʹн. 1:7). Ле дьqәwьмә дьле мә бәрдәwам дькә мә сущдар дькә, ле чахе әм дьхуньн кö «Хwәде жь дьле мә мәстьр ә», жь рʹазибуне кʹәла мә тʹьжә дьбә у чʹәʹвед мә тʹьжә һесьр дьбьн (1 Йуһʹн. 3:20). Кʹьтеба Пирозда тʹәне Йуһʹәнна ньвисийә кö «Хwәде һʹьзкьрьн ә» (1 Йуһʹн. 4:8, 16). Нәʹма wийә дöда у сьсийада пʹайе wан Мәсиһийа те дайине, йед кö бәрдәwам дькьн «нава рʹастийеда дьжин» (2 Йуһʹн. 4; 3 Йуһʹн. 3, 4).

16, 17. Чаwа Паwлос дьл дьда Мәсиһийед qьрʹна йәке?

¹⁶ Qьрʹна йәкеда, Паwлосе шанди мәсәләкә мәзьн һишт, чьмки дьл дьда бәр хушк-бьра. Һьнә wәʹдә шунда паши мьрьна Иса, шанди Оршәлимеда ман, кʹидәре кö кʹома рʹебәрийе бу (Кʹар. Шанд. 8:14; 15:2). Мәсиһийед Щьһустанеда Щьһуйарʹа, йед кö Хwәдек дьһʹәбандьн, дәрһәqа Иса гьли дькьрьн. Ле Паwлос пе рʹöһʹе пироз мьзгини бәла дькьр Йунанийарʹа, Рʹомайарʹа у мәрьвед дьнрʹа, йед кö гәләк хöданед qәлп дьһʹәбандьн (Галт. 2:7-9; 1 Тимтʹ. 2:7).

¹⁷ Паwлос дьчу щийед дур хьзмәт дькьр, кʹидәре кö иро Тʹьркʹийа йә, öса жи әw дьчу Йунаньстане у Италйайе. Әwи wедәре нәщьһуйарʹа мьзгини бәла дькьр у щьватед Мәсиһи саз кьр. Әw Мәсиһийед тʹәзә, «щәфа дәсте мьләте хwәда кʹьшандьн» у ләма wанрʹа дьлдайин лазьм бу (1 Тʹеслн. 2:14). Незики сала 50 Д.М., Паwлос щьвата Тʹесалоникирʹа кʹижан кö тʹәзә саз бу, ньвиси: «Әм һәр гав бона wә һʹәмуйа рʹазибуна хwә дьдьнә Хwәде, нава дöайед хwәда тʹьме wә бир тиньн. Әм кьред баwәрийа wә, хәбата wәйә жь һʹьзкьрьне у сәбьра [wә] . . . тиньнә бира хwә» (1 Тʹеслн. 1:2, 3). Әwи öса жи wана ширәт кьр кö һәвдö qәwи кьн у бьшьдиньн у готә wан: «Дьл бьдьнә һәв у аликʹарийа һәвдö бькьн» (1 Тʹеслн. 5:11).

ДЬЛДАЙИН АЛИЙЕ КʹОМА РʹЕБӘРИЙЕДА

18. Qьрʹна йәкеда кʹома рʹебәрийе ча дьл да Филипо?

¹⁸ Кʹома рʹебәрийе йа qьрʹна йәке, канийа дьлдайинәкә мәзьн бу чаwа бона бьред щабдар, öса жи бона Мәсиһийа бь тʹәмами. Чахе Филипо Самәрийарʹа мьзгинийа дәрһәqа Мәсиһ бәла дькьр, кʹома рʹебәрийе пьштгьрийа wи дькьр. Wана Пәтрус у Йуһʹәнна шандьн, wәки бона баwәрмәндед тʹәзә дöа бькьн, сәва әwана рʹöһʹе пироз бьстиньн (Кʹар. Шанд. 8:5, 14-17). Филипо у әw хушк-бьред тʹәзә гәләк qәwи бун кö кʹома рʹебәрийе пьштгьрийа wан кьр.

19. Нәʹмә кö кʹома рʹебәрийе Мәсиһийарʹа шанд, ча һʹöкöм бу сәр хушк-бьра?

¹⁹ Паше, кʹома рʹебәрийе гәрәке сафикьрьна мәзьн бькьра дәрһәqа сьнәткьрьне. Wана гәрәке сафи кьра, кö лазьм ә мьләтед дьн йед кö бунә Мәсиһи, бенә сьнәткьрьне йан на, чьмки пе Qануна Муса Щьһу дьһатьнә сьнәткьрьне (Кʹар. Шанд. 15:1, 2). Пе рʹебәрийа рʹöһʹе пироз у паши леколинкьрьна Ньвисаред Пироз, бьред щабдар сафи кьрьн кö сьнәткьрьн ида нәлазьм ә. Дәрһәqа ве сафикьрьне wана щьватарʹа нәʹмә ньвисин. Wәкʹилед кʹома рʹебәрийе һатьнә шандьнә, wәки щьватарʹа әве нәʹме бьвьн. Ахьрийа ве йәке чь бу? «Гава хwәндьн, бона wе дьлдайине пʹьрʹ ша бун» (Кʹар. Шанд. 15:27-32).

20. а) Кʹома Рʹебәрийейә иройин ча дьл дьдә бьратийа һʹәмдьнйайе? б) Готара дьнда әме щаба кʹижан пьрсе пебьһʹәсьн?

²⁰ Иро, Кʹома Рʹебәрийе дьл дьдә бәр әндәмед Бәйтʹәле, бәр хьзмәткʹаред һәртʹьм, у öса жи бь тʹәмами бьратийа һʹәмдьнйайе. Ча qьрʹна йәкеда Мәсиһи ша дьбун, öса жи иро әм ша дьбьн бона ве дьлдайине! Хенщи ве йәке, сала 2015-да Кʹома Рʹебәрийе брошура бь наве «Вәгәрʹә щәм Йаһоwа» дәрхьстьн, кʹижан кö нав тʹәмамийа дьнйайе бь рʹасти дьлдайинәкә мәзьн да гәләка. Ле гәло тʹәне әw бьред щабдар гәрәке чʹәʹв бьдьнә Йаһоwа дьлдайинеда? Щаба ве пьрсе әме готара дьнда пебьһʹәсьн.