«Һе Зедә» Дьл Бьдьнә Һәв
«Бьра әм бона һәвдö хәм бькьн, . . . дьл бьдьнә һәв у һе зедә, чьмки әм дьбиньн кö рʹожа ахрәте незик дьбә» (ИБРН. 10:24, 25).
1. Чьрʹа Паwлосе шанди Мәсиһийед Щьһу һелан дькьрьн, wәки «һе зедә» дьл бьдьнә бәр һәв?
ЧЬРʹА лазьм ә әм дьл бьдьнә һәв? Паwлосе шанди нәʹма хwәда Мәсиһийед Ибранирʹа гьлийед öса ньвиси: «Бьра әм бона һәвдö хәм бькьн, wәки һʹьзкьрьне у qәнщикьрьнеда һелана бьдьнә һәв. Бьра әм дәст жь льһәвщьвине нәкʹьшиньн, чаwа кö һьнәка хwәрʹа кьрийә хәйсәт, ле әм дьл бьдьнә һәв у һе зедә, чьмки әм дьбиньн кö рʹожа ахрәте незик дьбә» (Ибрн. 10:24, 25). Һе пенщ сал дәрбаз нәбу, Мәсиһийед Щьһу кö Оршәлимеда дьжитьн, фәʹм кьрьн кö «рʹожа Хöдан» незик ә. Wана нишана Иса тедәрхьст кö әwана гәрәке жь шәһәр бьрʹәвьн сәва әʹмьре хwә хьлаз кьн (Кʹар. Шанд. 2:19, 20; Луqа 21:20-22). Әв рʹожа Хöдан һат сала 70 Д.М., гава Рʹомайа Оршәлим кʹöта кьрьн.
2. Чьрʹа илаһи иро әм гәрәке һе зедә һелана бьдьнә һәв?
2 Иро жи әм дәрәща öсада ньн. Рʹожа Йаһоwа кö «мәзьн у зәʹф тьрсәһез ә», бәр шемике йә (Йоwл. 2:11). Сефанйа пʹехәмбәр гот: «Рʹожа мәзьн йа Хöдан нез ә [незик ә], нез ә у зәʹф бьләзи те» (Сефн. 1:14). Әw пʹехәмбәрти öса жи дәрһәqа рʹожед мә йә. Ләма жи чаwа Паwлос гот, әм гәрәке «бона һәвдö хәм бькьн, wәки һʹьзкьрьне у qәнщикьрьнеда һелана бьдьнә һәв» (Ибрн. 10:24). Бәле, илаһи иро әм гәрә һе зедә бона хушк-бьра хәм бькьн, у гава әwана һʹәwщә бьн, әм бькарьбьн дьл бьдьнә wан.
КʹЕ ҺʹӘWЩЕ ДЬЛДАЙИНЕ ЙӘ?
3. Паwлосе шанди чь гот дәрһәqа дьлдайине? (Бьньһерʹә шькле әʹwльн.)
3 «Кöл-дәрд дьле мерьв . . . дьһʹәлинә, ле готьнәкә qәнщ wи ша дькә» (Мәтʹлк. 12:25). Һәр кәс жь мә щара һʹәwще дьлдайине у гьлийед ширьн ә. Паwлос да кʹьфше, wәки һәла һе жи әwе кö щабдар ә һелана бьдә мәрьва, әw жи һʹәwще дьлдайине йә. Әwи Мәсиһийед Рʹомерʹа ньвиси: «Әз гәләки һʹәйра дитьна wәда мә, wәки пʹешкʹешәкә рʹöһʹани бьгьһиньмә wә, кö һун баwәрийеда бьшьдьн. Аwа готи әз жи тʹәви wә, әм дьл бьдьн бәр һәв, бь wе баwәрийа мьн у wәйә һәр дö алийава» (Рʹом. 1:11, 12). Бәле, Паwлос кö мәсәла мәзьн һишт дьлдайинеда, щара хwәха жи һʹәwще ве йәке бу. (Бьхунә Рʹомайи 15:30-32.)
4, 5. Иро әм дькарьн дьл бьдьнә кʹе, у чьрʹа?
4 Әwед кö сәва хьзмәтийа һәртʹьм qöрбана дькьн, һежайи пʹайа нә. Нава wанда пешәнг ьн. Гәләк жь wан зәʹф qöрбана дькьн сәва кö бькарьбьн ча пешәнг хьзмәт кьн. Öса жи мисйонер, хьзмәткʹаред Бәйтʹәле, бәрпьрсийаред мьһале у жьнед wан, у әwед кö офисед wәлгәрʹандьнеда дьхәбьтьн, әʹмьре хwәда тьшта жь хwә кем дькьн сәва һе зедә Йаһоwарʹа хьзмәт кьн. Ләма жи әм гәрәке дьл бьдьнә wан у пʹайе wан бьдьн. У öса жи әwед кö бәре хьзмәткʹаред һәртʹьм бун, ле ида нькарьн öса хьзмәт кьн, wе ша бьн һәрге әм дьл бьдьнә wан жи.
5 Хушк-бьред кö азәп дьминьн чьмки гöрʹа ве тʹәмийе дькьн кö «тʹәне баwәрмәнде Хöдан» бьстиньн, әwана жи һежайи дьлдайине нә (1 Корн. 7:39). Öса жи, жьн гәш дьбьн у дьшьдьн чахе мере wан пʹайа дьдьнә wан бона шьхöле кö әwана дькьн (Мәтʹлк. 31:28, 31). Һьн жи хушк-бьред кö wәʹде пәйкʹәтьнада йан жи чахе нәхwәш ьн, Хwәдерʹа амьн дьминьн, һʹәwще дьлдайине нә (2 Тʹеслн. 1:3-5). Йаһоwа у Мәсиһ жи бәр дьле wан һʹәму хьзмәткʹаред амьнда тен. (Бьхунә 2 Тʹесалоники 2:16, 17.)
РʹУСПИ ДЬКАРЬН ДЬЛ БЬДЬНӘ МӘ
6. Ль гора Ишайа 32:1, 2, шьхöле рʹуспийа чь йә?
6 Бьхунә Ишайа 32:1, 2. Бь сайа «сәрока», демәк рʹуспийед жь Мәсиһийед бьжарти у пәзед дьн, Иса Мәсиһ бәрдьли у рʹебәрийе дьдә wан, йед кö дьлшкәсти нә у дьлтәнг ьн. Әw рʹуспи «һʹöкöми» сәр баwәрийа хушк-бьра накьн, ле тʹәви wан дьхәбьтьн wәки әwана баwәрийеда шьдийайи бьн (2 Корн. 1:24).
7, 8. Хенщи гьлийед дьлдайине, диса ча рʹуспи дькарьн хушк-бьра бьшьдиньн?
7 Паwлосе шанди мәсәләкә мәзьн һишт дьлдайинеда. Әwи Мәсиһийед Тʹесалоникирʹа йед кö рʹасти зерандьне дьһатьн, ньвиси: «Дьле мә сәр wә дьшәwьти, һʹәта кö мә дьхwәст нә кö тʹәне Мьзгинийа Хwәде бьда wә, ле әʹмьре хwә жи, чьмки һун бьбунә дәлалийед мә» (1 Тʹеслн. 2:8).
8 Щара тʹәне пе гьлийа дьл бьдьнә кәсәки бәс нинә. Чьрʹа? Паwлос рʹуспийед щьвата Әфәсирʹа ньвиси: «Гәрәке бьхәбьтьн кʹомәке бьдьнә кʹәтийа у хәбәра Хöдан Иса бир биньн кö дьгот: ‹Хwәзи ль дайийа, нә кö ль стандийа›» (Кʹар. Шанд. 20:35). Бәле, Паwлос һазьр бу нә кö тʹәне дьл бьдә хушк-бьра, ле öса жи «хwә жи у мал-һʹале хwә жи» бьдә (2 Корн. 12:15). Öса жи рʹуспи гәрәке нә кö тʹәне пе гьлийа хушк-бьра бьшьдиньн, ле пе кьред хwә. Әw йәк дьдә кʹьфше wәки әwана бь рʹасти бона хушк-бьра хәм дькьн (1 Корн. 14:3).
9. Чаwа рʹуспи дькарьн öса ширәта бьдьн wәки бьшьдиньн?
9 Щара бона һәвшьдандьне ширәт лазьм ьн. Ле һьнге рʹуспи гәрәке гöһ бьдьнә Кʹьтеба Пироз кö öса ширәт кьн, wәки wана qәwи кьн. Иса ве йәкеда мәсәләкә мәзьн һишт. Иса паши рʹабуна хwә ширәтед сәрт да һьнә щьватед Асйа Бьчʹукда. Ле дина хwә бьдьне, Иса әw йәк ча кьр. Пешийа ширәткьрьне, әwи бь дьл у щан пʹайи да щьвата Әфәси, Пәргамайе у Тийатирайе (Әʹйан. 2:1-5, 12, 13, 18, 19). Әwи щьвата Лаwдькйайерʹа гот: «Әз кʹижана һʹьз дькьм ль wан һьлтем у wан ширәт дькьм. Бона ве йәке хирәт кә у жь гöнәкьрьне вәгәрʹә!» (Әʹйан. 3:19). Wе баш бә һәрге рʹуспи чʹәʹв бьдьнә Иса чахе ширәта дьдьнә хушк-бьра.
НӘ ТʹӘНЕ РʹУСПИ ЩАБДАР ЬН ДЬЛ БЬДЬН
Де-бавно, һун заʹред хwә һин дькьн кö дьл бьдьнә хушк-бьра? (Бьньһерʹә абзаса 10)
10. Ча әм һʹәмушк дькарьн һәвдö бьшьдиньн?
10 Бь рʹасти тʹәне рʹуспи борщдар ниньн кö дьл бьдьнә хушк-бьра у wана qәwи кьн. Паwлос һʹәму Мәсиһи һелан дькьрьн, wәки хәбәр дьн дәрһәqа «тьштед кö кери гöһдара тен у кʹаре дьдьнә wан» (Әфәс. 4:29). Һәр кәс жь мә гәрәке дина хwә бьдә һʹәwщед хушк-бьра. Паwлос ширәт да Мәсиһийед Ибрани: «Мьлед хwәйә сьстбуйи у qöдуме чокед хwәйә бе тʹаqәт бьшьдиньн у ньгед хwә рʹийа рʹастда бавежьн, кö йе дькöлә һол нәбә, ле сәрда qәнщ бә» (Ибрн. 12:12, 13). Һәр кәс жь мә, öса жи щаһьл дькарьн пе гьлийа һәвдö qәwи кьн у бьшьдиньн.
11. Чаwа хушкәкә мә аликʹари станд чахе депресийеда бу?
11 Хушкәкә мә гьли дькә кö wәʹдәки әw кʹәтьбу депресийе. Әwе гот: «Рʹожәке чахе мьн дöа кьр, wәки дьлдайине бьстиньм, әз рʹасти хушкәкә әʹмьрда мәзьн һатьм. Әw бәр дьле мьнда һат у әз дьлгәрм кьрьм. Һьнге һәма әw йәк мьнрʹа гәләк лазьм бу. Әwе öса жи дәрһәqа щерʹьбандьна хwә мьнрʹа гьли кьр, кö мина йа мьн бу у мьн ида хwә тʹәне тʹәхмин нәдькьр». Дьqәwьмә әw хушка әʹмьрда мәзьн нә жи тедәрхьст, wәки әwе пе гьлийед хwә әw хушк гәләк qәwи кьр.
12, 13. Чаwа әм дькарьн ширәта жь Филипи 2:1-4 бьдьнә хәбате?
12 Паwлос ширәтәкә öса да Мәсиһийед Филипи: «Аwа һәгәр тʹәвбуна wәйә тʹәви Мәсиһ бина бәр wә йә, һәгәр һʹьзкьрьна wи дьл дьдә бәр wә, һәгәр рʹöһʹе пироз wә дькә йәк, һәгәр дьлшәwати у рʹәʹма wә һәйә, әшqа дьле мьн бь тʹьфаqа хwә һун бьгьһиньнә сери: Бьра әw һʹьзкьрьна нава wәда бә у сәр нет у фькьрәке бьн. Тьштәки бь һәврʹькʹийе нәкьн у ль наве хwә нәгәрʹьн, ле жь wә һәр йәк бь мьлуктийе һәвале хwә сәр хwәрʹа бьгьрә. Тʹәне ль кʹара хwә нәгәрʹьн, ле бьра һәр кәс ль кʹара һәвале хwә жи бьгәрʹә» (Фили. 2:1-4).
13 Бәле, һәр кәс жь мә гәрәке алийе хwәда һәр тьшти бькә, wәки бь һʹьзкьрьне, дьлшәwатийе у рʹәʹме, дьл бьдә бәр хушк-бьра у бона wан хәм бькә.
ЧАWА БӘР ДЬЛЕ ХУШК-БЬРАДА БЕН?
14. Чаwа әм дькарьн дьл бьдьнә хьзмәткʹаред һәртʹьм?
14 Әм гәләк ша дьбьн чахе педьһʹәсьн, wәки әw мәрьвед кö мә али wан кьрийә, амьн дьминьн. Йуһʹәннайе шанди ньвиси: «Шабуна мьнә жь ве мәстьр тʹöнә, чахе дьбьһем кö зарʹед мьн нава рʹастийеда дьжин» (3 Йуһʹн. 4). Гәләк пешәнг зәʹф qәwи дьбьн, чахе педьһʹәсьн кö әw мәрьв, кʹижанарʹа wана аликʹари дайә кö бенә сәр рʹийа рʹаст, бәрдәwам дькьн амьн бьминьн у дьбәкә бунә пешәнг жи. Ләма жи чахе әм дьвиньн кö пешәнг дьлтәнг ә, әм дькарьн кьред wийи баш биньн бира wи, кö әwи аликʹари дайә йед майин.
15. Диса чь щурʹә әм дькарьн дьлгәрм кьн wана, йед кö бь амьни хьзмәт дькьн?
15 Гәләк бәрпьрсийаред мьһале дьбежьн, кö әwана у жьнед wан гәләк дьлгәрм дьбьн, чахе нәʹмед рʹазибуне дьстиньн жь хушк-бьра паши тʹәсәлийа щьвате. Рʹуспи, мисйонер, пешәнг у хьзмәткʹаред Бәйтʹәле жи гәләк ша дьбьн у qәwи дьбьн чахе хушк-бьра пе гьлийа рʹазибуна хwә wанрʹа дьдьнә кʹьфше.
ЧАWА ҺӘР КӘС ЖЬ МӘ ДЬКАРӘ ДЬЛ БЬДӘ БӘР ҺӘВ
16. Диса чь дькʹәвә нава дьлдайине?
16 Дьqәwьмә мәрʹа чәтьн ә бәр дьле кәсәкида бен у wи qәwи кьн, ле бь рʹасти гәләк тьшт нәлазьм ә сәва ве йәке. Мәсәлә, әм дькарьн бь бәшәра хwәш кәсәки сьлав кьн. Ле һәрге әw мәрьв мәрʹа накʹәнә, дьqәwьмә проблемед wи һәнә, у жерʹа лазьм ә гöһ бьдьне, öса әме бәр дьле wида бен (Аqуб 1:19).
17. Бьраки мәйи щаһьл чаwа аликʹари станд чахе дьлтәнг бу?
17 Һенри, бьраки мәйи щаһьл, гәләк дьлтәнг бу чахе мәрьвед wийи незик у баве wи кö рʹуспи бу, рʹасти һиштьн. Бәрпьрсийаре мьһале чахе әw йәк дит, wи тʹәглифи кафе кьр сәва тʹәви wи хәбәр дә. Әwи мәщал да кö Һенри дьле хwә жерʹа вәкә у хәмед хwә жерʹа гьли кә. Һенри фәʹм кьр, wәки әw дькарә али малбәта хwә бькә кö диса вәгәрʹьн рʹастийе, һәрге әw бәрдәwам кә бь амьни Хwәдерʹа хьзмәт кә. Әw гәләк дьлгәрм бу чахе хwәнд рʹезед жь Зәбур 46; Сефанйа 3:17; у Марqос 10:29, 30.
Һәр кәс жь мә дькарә дьл бьдә хушк-бьра у wана бьшьдинә (Бьньһерʹә абзаса 18)
18. а) Сьлеман Пʹадша чь ньвиси дәрһәqа дьлдайине? б) Кʹижан ширәта Паwлос әм дькарьн бьдьнә хәбате?
18 Мәсәла хушка мә бәʹса кʹижане мә жоре кьр у öса жи йа Һенри, нишан дькьн, wәки һәр кәс жь мә дькарә бәр дьле мәрьвада бе. Сьлеман Пʹадша ньвиси: «Чьqас хwәшә һәр хәбәр wәхте хwәда! Рʹонайа чʹәʹва дьл ша дькә, мьзгинийа хер жи һәстуйа дьшьдинә» (Мәтʹлк. 15:23, 30). Әм дькарьн әwед кö дьлшкәсти нә бьшьдиньн, мәсәлә һәрге жь «Бьрща Qәрәwьлийе», йан жи жь малпәра мә тьштәки wанрʹа бьхуньн. Паwлос гот кö чахе әм тʹәвайи кʹьламед Пʹадшатийе дьстьрен, öса әм һәвдö дьлгәрм дькьн. Әwи ньвиси: «Бь һʹәму сәрwахтийе ль һәв һин кьн у ширәт кьн, зәбура у һәр щурʹә стьранед рʹöһʹани бь шькьрдари дьле хwәда бона Хwәде бьстьрен» (Колс. 3:16; Кʹар. Шанд. 16:25).
19. Чьрʹа мәрʹа wе һе лазьм бә дьл бьдьнә бәр һәв?
19 Әм дьвиньн кö рʹожа Йаһоwа гәләк «незик дьбә», мәрʹа wе һе зедә лазьм бә дьл бьдьнә һәвду у һәв бьшьдиньн (Ибрн. 10:25). Ләма жи wәрә әм ве ширәта Паwлос бьдьнә хәбате: «Дьл бьдьнә һәв у аликʹарийа һәвдö бькьн, чаwа һун дькьн жи» (1 Тʹеслн. 5:11).