Щаһьлно, Һун Нетед Рʹöһʹани Датиньн Пешийа Хwә?

1-3. а) Һʹәму щаһьл рʹасти кʹижан чәтьнайе тен, у кʹижан мәсәлә ве йәке дьдә кʹьфше? (Бьньһерʹә шькле әʹwльн.) б) Мәсиһийед щаһьл ча дькарьн ве чәтьнайе рʹаст сафи кьн?

БЬДЬНӘ бәр чʹәʹве хwә һун дьчьнә щийе дур сәр щьвинәкә фәрз у һун гәрәке бькʹәвьнә отобусе сәва бьгьһижьнә wи щийи. Сәр щийе сәкьнандьна отобуса, һун һьнәки тʹәвиһәв ьн, чьмки гәләк мәрьв дор бәре wә нә у гәләк отобус сәкьнинә. Ле чьqас баш ә кö һун сәд сәләфи заньн кö дьхwазьн һәрʹьнә кʹидәре у кʹижан отобус wәрʹа лазьм ә. Фәʹмдари йә һуне нәкʹәвьнә отобусәкә дьн, чьмки һун заньн кö әwе wә бьвә щики дьн.

² Иро щаһьл жи мина wан мәрьва нә, йед кö сәр щийе сәкьнандьна отобусе сәкьнинә нә. Бь рʹасти чахе мәрьв мәзьн дьбә, әʹмьре wи мина рʹеwитийе йә. Щара щаһьл дькарьн тʹәвһәв бьн, чьмки әʹмьрда рʹасти гәләк бьжартьн у сафикьрьна тен. Щаһьлно, һәрге һун заньн кʹижан рʹе бьжберьн, һьнге wәрʹа wе дьһа һеса бә сафикьрьнед рʹаст бькьн. Ле һуне кʹижан рʹе бьжберʹьн?

³ Ве готареда әме щаба ве пьрсе шеwьр кьн, у әw готар wе һелане бьдә щаһьла, wәки әʹмьре хwәда һʹьш-аqьле хwә дайньн сәр ве йәке, кö дьле Йаһоwа ша кьн. Демәк, һʹәму сафикьрьнед хwәда, бәʹса хәбәре һинбунеда, хәбатеда, зәwащеда у сафикьрьнед дьнда, ширәт у рʹебәрийа Йаһоwа һьлдьнә һʹәсаб. Әw öса жи те һʹәсабе wәки нетед рʹöһʹани дайньн пешийа хwә. Щаһьлед кö һʹьш-аqьле хwә датиньн сәр хьзмәтийа Йаһоwарʹа, гәрәке дöдьли нәбьн wәки Йаһоwа wе wана кʹәрәм кә у али wан бькә кö пешдачуйи бьн. (Бьхунә Мәтʹәлок 16:3.)

ЧЬРʹА ЛАЗЬМ Ә НЕТЕД РʹÖҺʹАНИ ДАЙНЬН ПЕШИЙА ХWӘ?

4. Ве готареда әме дәрһәqа чь шеwьр кьн?

⁴ Гәләк баш ә чахе мәрьв щаһьлтийеда нетед рʹöһʹани датинә пешийа хwә. Чьрʹа? Әме ве готареда се мәʹнийа шеwьр кьн. Дö мәʹни нишан дькьн wәки чахе щаһьл сәр хwә дьхәбьтьн сәва бьгьһижьнә нетед рʹöһʹани, әw йәк һәләqәтийа wан тʹәви Йаһоwа һе qәwи дькә; мәʹнийа сьсийа дьдә кʹьфше кö кʹарәкә чьqас мәзьн ә чахе щаһьлтийеда нетед рʹöһʹани дьдьнә пешийа хwә.

5. Кʹижан ә мәʹнийа сәрәкә кö нетед рʹöһʹани дайньн пешийа хwә?

⁵ Мәʹнийа сәрәкә кö чьрʹа әм нетед рʹöһʹани датиньн пешийа хwә, әw ә, кö öса әм рʹазибуна хwә Йаһоwарʹа дьдьнә кʹьфше бона һʹьзкьрьн у кьред wи һьндава мә. Зәбурбеж ньвиси: «Qәнщ ә шькрийе бьдьнә Хöдан . . . Чьмки Тә, Хöдан, әз ша кьрьм бь кьрьнед Хwә, кьрьнед дәсте Тәрʹа әз гöл дьдьм» (Зәб. 92:1, 4). Щаһьлно, бьфькьрьн дәрһәqа һʹәму тьшта кö Йаһоwа дайә wә. Әwи әʹмьр, баwәри, Кʹьтеба Пироз, щьват, у öса жи һевийа жийина һʹәта-һʹәтайе дайә wә. Чахе һун нетед рʹöһʹани датиньн пешийа хwә, һун бь ве йәке нишан дькьн, wәки ван кʹәрәмед Хwәде дьшекьриньн у һун һе незики wи дьбьн.

6. а) Нетед рʹöһʹани ча һʹöкöм дьбьн сәр һәләqәтийа мә тʹәви Йаһоwа? б) Кʹижан нет һун дькарьн щаһьлтийеда дайньн пешийа хwә?

⁶ Мәʹнийа дöда әw ә кö чахе һун дьгьһижнә нетед рʹöһʹани, һун бәр чʹәʹве Йаһоwа шьхöлед баш дькьн. Wи щурʹәйи һун һе незики wи дьбьн. Паwлосе шанди гот: «Хwәде сәр нәһәqийе нинә, wәки кьред wә у әw һʹьзкьрьна кö wә бона наве wи да кʹьфше бир бькә» (Ибрн. 6:10). Сәва нетед рʹöһʹани дайньн пешийа хwә, нәфькьрьн кö һе зу йә. Дина хwә бьдьнә һьнә wан щаһьлед кö нетед рʹöһʹани данинә пешийа хwә. Хушкәкә мә Кристина 10 сали бу чахе нет хwәрʹа дани, wәки тʹьме сәрһатийед хушк-бьред амьн бьхунә. Тоби 12 салийа хwәда нет хwәрʹа дани, wәки пешийа ньхöмандьна хwә бь тʹәмами Кʹьтеба Пироз бьхунә. Максим чахе 11 сали бу у хушка wи Ноеми кö саләке жь wи бьчʹуктьр ә, һатьнә ньхöмандьне. Wана һәрдö жи нет хwәрʹа данин, wәки Бәйтʹәледа хьзмәт кьн. Сәва әве нете бир нәкьн, wана бланка Бәйтʹәле малда сәр диwарәки дардакьрьн. Ле нетед wәйә рʹöһʹани һәнә кö һун дьхwазьн бьгьһижьн? (Бьхунә Филипи 1:10, 11.)

7, 8. а) Чаwа нетед рʹöһʹани али wә дькьн wәки һеса сафикьрьна бькьн? б) Чьрʹа хушкәкә мә сафи кьр wәки нәчә университете?

⁷ Мәʹнийа сьсийа кö чьрʹа баш ә щаһьлтийеда нетед рʹöһʹани дайньн пешийа хwә әw ә, кö һьнге щаһьл бәр гәләк сафикьрьн у бьжартьна нә. Мәсәлә, щаһьл гәрәке сафи кьн кö кʹижан һинбуне бьстиньн, кʹижан хәбате бьжберьн у диса тьштед дьн. Сафикьрьна бькьн әw мина ве йәке йә, кö гәрәке рʹеки бьжберьн нава гәләк рʹийада. Һʹәта кö һун заньн кʹидәре дьхwазьн һәрʹьн, рʹийа рʹаст бьжберьн һеса йә. Öса жи дәрәща wәда щаһьлно, чахе һун заньн нетед wә чь нә, wәрʹа wе һе һеса бә сафикьрьнед аqьлайи бькьн. Мәтʹәлок 21:5-да ньвисар ә: «Тʹьвдира мәрьве хирәт әʹсә кʹаре тинә». Чьqас зу һун нета дайньн пешийа хwә, һаqас зу һуне пешда һәрʹьн. Дина хwә бьдьнә хушкәкә мә бь наве Дамарис, йа кö щаһьлтийеда рʹасти сафикьрьнәкә фәрз һат.

⁸ Дамарис чахе мәкʹтәб хьлаз кьр, һʹәсабед wе бьльнд бун. Әwе дькарьбу университетеда хwәндьна бьльнд бе пʹәрә бьстинә, wәки бьбә qанунзан. Ле йәкә әwе хәбатәкә дьн бьжарт, кʹижан кö wе пʹәрә кем бьстанда. Гәло чьрʹа әwе бьжартьнәкә öса кьр? Әw гьли дькә: «Мьн бәреда дьле хwәда сафи кьр wәки бьбьмә пешәнг. Әw дьһатә һʹәсабе wәки мьн хәбатәкә öса гәрәке бьжбарта, кö һәр рʹож нәхәбьтийама. Һәрге әз бьчума университете сәва бьбума qанунзан, мьне пʹәрә зәʹф бьстанда, ле нькарьбуйа ча пешәнг хьзмәт кьра». Дамарис ньһа ида 20 сал ә ча пешәнг ә. Гәло әw пʹошман дьбә wәки нетәкә рʹаст да пешийа хwә у щаһьлтийеда сафикьрьнәкә рʹаст кьр? Тʹö щар на. Әw дьбежә: «Щийе хәбата мьнда һʹәчʹи зәʹф шьхöле мьн тʹәви qанунзана йә. Әwана wи шьхöли дькьн кʹижан кö мьне бькьра һәрге университетеда һин бума. Ле гәләк жь wана хәбата хwәда шабуне навиньн у дьлтәнг ьн. Ле сафикьрьна мьн кö бьбьмә пешәнг, әз жь ве дьлтәнгийе хьлаз кьрьм у рʹе мьнрʹа вәкьр кö нава салада әз жь хьзмәтийе шабуне дьстиньм».

9. Чьрʹа щаһьл һежайи пʹайа нә?

⁹ Бь һʹәзара щаһьл нав тʹәмамийа дьнйайеда һежайи пʹайа нә. Әwана әʹмьре хwәда Йаһоwа у нетед рʹöһʹани датиньн щийе пешьн. Әw щаһьл әʹмьре хwәрʹа ша дьбьн у öса жи һин дьбьн һәр тьштида пәй рʹебәрийа Йаһоwа һәрʹьн, мәсәлә кʹижан һинбуне бьстиньн, кʹижан хәбат бьжберьн у зәwащеда. Сьлеман ньвиси: «Бь тʹәмамийа дьле хwә хwә бьсперә Хöдан. . . . Һʹәму рʹийед хwәда тö Хwәде нас кә у Әwе һʹәму шьвәрʹийед тә рʹаст-дуз кә» (Мәтʹлк. 3:5, 6). Щаһьлед щьвата Мәсиһитида бәр чʹәʹве Йаһоwа гәләк qимәт ьн, әw wана һʹьз дькә, хwәй дькә, рʹебәри у кʹәрәма дьдә.

ХWӘ ҺАЗЬР КӘ WӘКИ ШӘʹДӘТИЙЕ БЬДИ

10. а) Чьрʹа хьзмәти гәрәке әʹмьре мәда щийе фәрз бьгьрә? б) Чаwа әм дькарьн һе рʹьнд шәʹдәтийе бьдьн?

¹⁰ Щаһьле кö һʹьш-аqьле хwә дьдә сәр ве йәке, wәки дьле Йаһоwа ша кә, сәр хьзмәтийе гәләк фәрз дьньһерʹә. Иса Мәсиһ гот wәки «гәрәке пешийе мьзгини . . . бе дайине» (Марq. 13:10). Демәк, бәлакьрьна мьзгинийе шьхöләкә гәләк фәрз ә, у әw гәрәке әʹмьре мәда щийе фәрз бьгьрә. Ле тö дькари хwәрʹа нете дайни, wәки һе зедә хьзмәт ки? Йан жи тö дькари бьби пешәнг? Ле һәрге тö хьзмәтийеда шабуне һьндьки дьстини? Чаwа тö дькари һе рʹьнд шәʹдәтийе бьди? Дö гавед фәрз wе али тә бькьн: Хwә рʹьнд һазьр кә у хwә нәгьрә wәки мәрьвед дьнрʹа гьли ки кö тö чь зани. Тöйе ахьрийеда дьбәкә әʹщебмайи жи бьмини кö хьзмәтийеда чьqас шабунәкә мәзьн бьстини.

11, 12. а) Щаһьл чь дькарьн бькьн сәва хwә һазьр кьн шәʹдәтийе бьдьн? б) Чаwа щаһьләки мәщал да хәбате сәва мәкʹтәбеда шәʹдәтийе бьдә?

¹¹ Мәсәлә, тö дькари хwәрʹа щаба ве пьрсе леколин бьки, кʹижан кö дьбәкә һәвалдәрсханед тә гәләк щар дьдьн, бәʹса хәбәре: «Чьрʹа тö баwәр дьки кö Хwәде һәйә?». Сәр малпәра мә һәнә готар кö бона щаһьла һатьнә дәрхьстьне, сәва әwана леколин бькьн кö чаwа щаба ве пьрсе бьдьн. Бьньһерʹьн сәр малпәра jw.org ҺИНКЬРЬНЕД КʹЬТЕБА ПИРОЗ > ЩАҺЬЛ. Wедәре һәйә схема хәбате бь наве «Әз Чьма Баwәр Дькьм кö Хwәде Һәйә?». Әв схема wе али тә бькә хwә рʹьнд һазьр ки бона щаба ве пьрсе. Wедәре һәнә рʹез кö тö дькари wәʹде шәʹдәтийе бьди хәбате: Ибрани 3:4, Рʹомайи 1:20 у Зәбур 139:14. Чахе тö wан схема леколин бьки у бьди хәбате, тöйе бона щурʹә-щурʹә пьрса һазьр би рʹьнд щаба хwә бьди. (Бьхунә 1 Пәтрус 3:15.)

¹² Чахе мәщал чедьбә, бежә һәвалдәрсханед хwәрʹа, wәки бькʹәвьнә малпәра jw.org. Бьраки мә бь наве Лука һәма öса кьр. Дәрсхана wида шеwьр дькьрьн дәрһәqа щурʹә-щурʹә рʹелигийа, у Лука дина хwә дайе wәки кʹьтебәкә мәкʹтәбеда, дәрһәqа Шәʹдед Йаһоwа информасийа нәрʹаст ньвисар ә. Рʹаст ә әwи һьнәки шәрм дькьр, ле әwи жь дәрсдар изьн хwәст, wәки шьровәкә кö әв информасийа qәлп ә, у дәрсдар qайил бу. Лука нә кö тʹәне дәрһәqа баwәрийа хwә шьровәкьр, ле әwи öса жи малпәра мә нишани шагьрта кьр. Дәрсдар шагьртарʹа дәрс да, wәки малда сәр малпәра мә бьньһерʹьн видео бь наве «Бе Шәрʹ-Дәʹwа Мьqабьли Һәвалед Хьраб Бьсәкьнә». Лука гәләк ша бу, кö әwи шәʹдәтикә öса баш да.

13. Чьрʹа әм гәрәке бәрхwә нәкʹәвьн чахе рʹасти чәтьнайа тен?

¹³ Чахе тö рʹасти чәтьнайа тейи, бәрхwә нәкʹәвә у нәтьрсә, ле бәрдәwам кә бьгьһижә нетед хwә (2 Тимтʹ. 4:2). Дина хwә бьдә хушкәкә мә Катарина. Әw чахе 17 сали бу, хwәрʹа нет дани, wәки һәр һәвалхәбатчикирʹа шәʹдәтийе бьдә. Мәрьвәки сәр хәбате Катарина чәнд щара беһöрмәт кьр, ле йәкә әw дьлтәнг нәбу у нета wе диса дьле wеда бу. Әw рʹабун-рʹуньштьна wейә баш, гәләк һʹöкöм бу сәр һәвалхәбатчики дьн, бь наве Һанс. Әwи дәстпекьр әʹдәбйәтед мә бьхунә, һинбуна Кʹьтеба Пироз дәстпекьр, у паше һатә ньхöмандьне. Катаринайе дәрһәqа ве йәке ньзаньбу, чьмки дәрбази щики дьн бьбу. Бьдьнә бәр чʹәʹве хwә кö әw чьqас ша бу гава паши 13 сала әw Ода Щьватеда тʹәви малбәта хwә рʹуньштьбу, у әʹлам кьрьн кö Һанс готарване тʹәглифкьри йә. Рʹасти жи чьqас баш ә wәки Катаринайе нета хwә нә да алики, кö шәʹдәтийе бьдә һәвалхәбатчийед хwә.

НЕТЕД ХWӘ БИР НӘКЬН

14, 15. а) Щаһьл чь гәрәке бир нәкьн чахе щаһьлед дьн wана дькʹьшиньн алийе хwә? б) Чаwа щаһьл дькарьн нәкʹәвьнә бәр байе щаһьлед дьн?

¹⁴ Щаһьлно, әw готар һелане дьдә wә, wәки әʹмьре wәда йа лапә фәрз әw бә, кö дьле Йаһоwа ша кьн у нетед рʹöһʹани дайньн щийе фәрз. Ле гәләк щаһьлед wәкә wә, һʹьш-аqьле хwә датиньн тʹәне сәр рʹьһʹәтийе у wәʹдәдәрбазкьрьне, у дьбәкә wә жи бәрбь ве йәке һелан дькьн. Зу йан дәрәнг, һун гәрәке бьдьнә кʹьфше кö нет у бьжартьнед wә чь нә. Нәкʹәвьнә бәр байе щаһьлед дьн. Биньн бира хwә диса мәсәла отобусе кö мә жоре шеwьр кьр. Фәʹмдари йә, кö һуне нәкʹәвьнә отобусәкә дьн тʹәне бона ве йәке, кö те кʹьфше мәрьвед ве отобуседа wәʹдә рʹьнд дәрбаз дькьн.

¹⁵ Һәнә гәләк тьшт кö дькарьн али wә бькьн нәкʹәвьнә бәр байе щаһьлед дьн. Бәʹса хәбәре, дур бьн жь wан дәрәща кʹидәреда һун дькарьн бенә щерʹьбандьне (Мәтʹлк. 22:3). Öса жи бир нәкьн кö ахьрийа чьqас хьраб мәрьв дьстинә, гава кьред хьрабда чʹәʹв дьдә мәрьвед дьн (Галт. 6:7). Хенщи ве йәке, бь мьлукти биньн сәр хwә, wәки wәрʹа ширәт лазьм ьн. Әw мьлукти wе али wә бькә гöһ бьдьнә ширәтед де-бава у öса жи хушк-бьред рʹöһʹани. (Бьхунә 1 Пәтрус 5:5, 6.)

16. Мәсәла гьли кьн кö нишан дькә wәки мьлукти гәләк фәрз ә.

¹⁶ Мьлукти али бьраки мә бь наве Кристоф кьр, кö ширәтәкә баш qәбул кә. Һьнә wәʹдә паши ньхöмандьна хwә, әwи дәстпекьр һәрʹә сәр фитнесе. Wедәре щаһьла wи һелан дькьрьн, wәки бькʹәвә кʹома спорте. Кристоф дәрһәqа ве йәке тʹәви рʹуспики хәбәр да, йе кö жерʹа ширәт да, wәки бьфькьрә дәрһәqа чәнд хофа, пешийа кö сафикьрьне бькә. Мәсәлә, әwи гот кö хоф әw ә, wәки мәрьв дькарә бьбә һәвсуд у бькʹәвә һʹöщәте. Йәкә Кристоф кʹәтә нава ве кʹома спорте. Ле wәʹдә дәрбаз бу, әwи фәʹм кьр wәки ве спортеда зорбәти һәбу у һәла һе жи хоф бу. Әwи диса тʹәви чәнд рʹуспийа хәбәр да, у wан һʹәмушка жи жь Кʹьтеба Пироз wирʹа ширәт дан. Кристоф дьбежә: «Йаһоwа ширәткʹаред баш мьнрʹа шанд, у рʹаст ә wәʹдә дәрбаз бу, ле мьн гöһ да Wи». Ле тö öса мьлук и, wәки ширәтед баш qәбул ки?

17, 18. а) Йаһоwа бона щаһьла чь дьхwазә? б) Чахе мәрьв мәзьн дьбә чьрʹа әw дькарә дьлшкәсти бә, ле чаwа нәһельн wәки әw йәк бьqәwьмә? Мәсәле биньн.

¹⁷ «Йа зьламе щьwан [щаһьл], дь щьwантийа хwәда ша бьбә у дь рʹожед щьwанийа хwәда бьла дьле тә, тә кʹефхwәш бькә, дь рʹейед дьле хwәда у дь дитьна чʹәʹве хwәда бьмәшә» (Wаиз 11:9). Щаһьлно, Йаһоwа дьхwазә һун дьлша бьн. Ве готареда һун пеһʹәсийан wәки сәва дьлша бьн öса жи лазьм ә нетед рʹöһʹани дайньн пешийа хwә у һʹәму нет-мәрәм у сафикьрьнада, ширәтед Йаһоwа һьлдьнә һʹәсаб. Чьqас зу һун дәстпекьн ве йәке бькьн, һаqас зу һуне рʹебәри, хwәйкьрьн у кʹәрәмед Йаһоwа бьвиньн. Бьфькьрьн дәрһәqа һʹәму ширәтед wи кö Кʹьтеба Пирозда һәнә у дьле хwәда хwәй кьн әве ширәте: «Әʹфьрандаре хwәйи Һьмзор щаһьлтийа хwәда бинә бира хwә» (Wаиз 12:1, ДТʹ).

¹⁸ Щаһьл зу мәзьн дьбьн. Йазьх, ле гәләк жь wана ахьрийеда пʹошман у дьлшкәсти дьбьн, чьмки щаһьлтийеда нетед нәрʹаст данинә пешийа хwә, йан жи qә нетед wан тʹöнә бун. Ле щаһьлед кö нетед рʹöһʹани датиньн пешийа хwә, wе әʹсә дьлрʹьһʹәт у бәхтәwар бьн чахе мәзьн бьн. Әw йәк тʹәви хушкәкә мә бь наве Мириана qәwьми, йа кö щаһьлтийа хwәда спортеда зен бу. Жерʹа готьн wәки бькʹәвә нава Листькед Олимпида, ле әwе бьжарт wәки дәстпекә хьзмәтийа һәртʹьм. Паши wәкә 30 сала, Мириана һʹәта ньһа тʹәви мере хwә хьзмәткʹара һәртʹьм ә. Әw дьбежә: «Навдари, һöрмәт, qәwат у һәбук, әʹмьре мәрьвада нетед wәʹдәлу нә у бәхтәwарийе найньн. Бь рʹасти нетед лапә баш әw ьн, кö Хwәдерʹа хьзмәт кьн у рʹöһʹанида аликʹарийе бьдьнә мәрьвед дьн».

19. Чь кʹар ә һәрге әм һʹьш-аqьле хwә датиньн сәр нетед рʹöһʹани?

¹⁹ Щаһьлед щьватеда һежайи пʹайа нә, чьмки нава чәтьнайада әwана диса жи һʹьш-аqьле хwә дьдьнә сәр хьзмәтийа Йаһоwарʹа. Әwана нетед рʹöһʹани датиньн пешийа хwә у хьзмәти әʹмьре wанда щийе гәләк фәрз дьгьрә. Хенщи ве йәке, әwана накʹәвьнә бәр байе ве дьнйайе. Әw щәфе wан пʹучʹ нинә. Әwана аликʹарийе жь хушк-бьра дьстиньн, у чахе әwана шьхöлед хwә дьдьнә дәсте Йаһоwа, дьгьһижнә нет-мәрәме хwә.