Wә Заньбу?

Чаwа Стәйфан әʹдьлайи хwәй кьр гава дьһатә зерʹандьне?

КʹОМӘКӘ мәрьвед берʹәʹм пәй Стәйфан кʹәт. Әw щьвина гьрәгьра бу, демәк диwана һәри мәзьн Исраеледа, жь 71 һʹакьма бу, һʹöкöме кʹижана сәр щьмәʹте зәʹф бу. Әwана бал Qәйафайе Сәрәккʹаһин тʹоп бьбун, йе кö чәнд мәһа пешда рʹебәрийа диwана Иса дькьр. Wедәре һатә әʹламкьрьне, wәки Иса гәрәке бе кöштьне (Мәт. 26:57, 59; Кʹар. Шанд. 6:8-12). Чахе wана йәк пәй йәкерʹа бöхдан дьавитьнә Стәйфан, әwана мәтʹал ман, гава дина хwә дане, wәки рʹәнг-рʹуйе Стәйфан «мина рʹәнг-рʹуйе мьлйакʹәта бу» (Кʹар. Шанд. 6:13-15).

Ле гәло чаwа wи һʹале хофда, әw рʹьһʹәт у qәwи ма? Пешийа кö щьвина гьрәгьра wи гьрт, әw пе рʹебәрийа рʹöһʹе Хwәдейи пироз, бь тʹәмами нав шьхöле бәлакьрьна мьзгинийеда бу (Кʹар. Шанд. 6:3-7). У чахе әw ида бәр диwане бу, рʹöһʹе Хwәде дьле wи рʹьһʹәт дькьр у рʹезед жь Ньвисаред Пироз дьани бира wи (Йуһʹн. 14:16). Кʹаред Шандийа сәре 7-да, те гьликьрьне кö чахе Стәйфан бь мерхаси шәʹдәти дьда, рʹöһʹе пироз wәкә 20 рʹез йан һе зедә жь Ньвисаред Ибрани ани бира wи (Йуһʹн. 14:26). Ле паше баwәрийа Стәйфан һе шьдийа, гава әwи хәwн-хәйаледа Иса дит кö ль мьле Хwәдейи рʹасте сәкьни бу (Кар. Шанд. 7:54-56, 59, 60).

Рʹожәке дьбәкә әм жи рʹасти зерʹандьне у пәйкʹәтьна бен (Йуһʹн. 15:20). Һәрге әм иро тʹьме Хәбәра Хwәде леколин дькьн у хьзмәтийеда хирәт ьн, әме рʹе бьдьнә рʹöһʹе Йаһоwайи пироз сәва сәр мә һʹöкöм кә. Әме öса жи qәwате бьстиньн, wәки qәwи бьминьн, тәйах кьн бәр мьqабьлибуне у дьлрʹьһʹәтийе хwәй кьн (1 Пәт. 4:12-14).