Ширьнайи: Һʹöнöр кö пе Гьли у Шьхöла Те Кʹьфше

ЧАХЕ мәрьв һьндава һәвда ширьн ьн, әw йәк wана гәш дькә у дьлбинийе дьдә wан. Әм чахе дьвиньн кö кәсәк бона мә хәм дькә, әм гәләк дьшекьриньн. Бәле, дьле һәр кәси хwәш те чахе һьндава wида ширьн у һʹәйф ьн. Ле гәло әм ча дькарьн әви һʹöнöре бәдәw нав хwәда пешда биньн?

Мәрьве бь wи һʹöнöри дькʹәвә һʹәйра һʹалхwәшийа мәрьва, у әwе йәке пе хәбәрдан у шьхöлед хwә дьдә кʹьфше. Бәле, әw һʹöнöр пе шьхöла те кʹьфше, нә кö тʹәне чахе мәрьв мәʹрифәт ә у бь qәдьр ә тʹәви мәрьва. Һʹьзкьрьна мәзьн у дьлшәwати дькʹәвә нава wи һʹöнöри. У һе зедә, әw һʹöнöр дькʹәвә нава бәре рʹöһʹе Хwәдейи пироз, кʹижан кö Мәсиһи гәрәке нав хwәда пешда биньн (Галт. 5:22, 23). Демәк, әм гәрәке ширьнайе бьдьнә кʹьфше, ләма wәрә әм леколин бькьн кö чаwа Йаһоwа у Кöрʹе wи, әwи һʹöнöри дьдьнә кʹьфше, у чаwа әм дькарьн чʹәʹв бьдьнә wан.

ЙАҺОWА ҺЬНДАВА ҺʹӘМУЙАДА ШИРЬН У QӘНЩ Ә

Ширьнайи qәнщийеваa гьредайи йә, у Йаһоwа һьндава һʹәмуйада qәнщ ә, һьндава «бешекьра» у «нәрʹаста» жи (Луqа 6:35). Бәʹса хәбәре, Йаһоwа «тәʹва хwә дәрдьхә һьн сәр qәнща, һьн жи сәр хьраба у баране дьбаринә һьн сәр рʹаста, һьн жи сәр нәрʹаста» (Мәт. 5:45). Бәле, һәла һе әwед кö Йаһоwа qәбул накьн ча Әʹфьрандаре хwә, пе чекьрьнед дәсте wи дьжин у әʹмьре хwәрʹа ша дьбьн.

Әм дьвиньн кö Йаһоwа әw һʹöнöр да кʹьфше һьндава Адәм у Һеwайеда. Чахе wана гöнә кьр, паши ве йәке «бәлгед һежире дьрутьн у пе хwә сьтʹар кьрьн». Ле Йаһоwа заньбу wәки wанрʹа кʹьнщәкә дьн лазьм ә, чьмки әwана гәрәке жь Щьнәте дәр бьжитана, кʹидәре бь «стьрийа у дьрʹийа» тʹьжә бу. Ләма Йаһоwа жь ширьнайи у дьлованийа хwә, wанрʹа «кʹьнщед чʹәрмин чекьрьн у ль wан кьрьн» (Дәстп. 3:7, 17, 18, 21).

Рʹаст ә Йаһоwа һʹәйф ә һьндава «qәнща, һьн жи . . . хьраба», ле илаһи әw ширьн ә һьндава хьзмәткʹаред хwәйи амьн. Мәсәлә, wәʹде Зәкәрйа пʹехәмбәр, мьлйакʹәтәк бәрхwә дькʹәт чахе дьдит кö авакьрьна пʹарьстгәһа Оршәлиме һатийә сәкьнандьне. Йаһоwа рʹьнд гöһ да wи мьлйакʹәти, у бь «гьлийед ширьн у дьлбини» щаба wи да (Зәкәр. 1:12, 13, ДТʹ). Йаһоwа һьндава Елйас жи ширьнайи да кʹьфше. Wәʹдәки әw пʹехәмбәр öса дьлшькәсти бу, кö һәла һе жи жь Йаһоwа мьрьн хwәст. Йаһоwа хәм кьр бона Елйас, у мьлйакʹәте хwә шандә бал wи сәва wи qәwи кә. Хенщи ве йәке, Хwәде wи шьданд гава гот кö әw тʹәне нинә. Паши ве йәке ча Елйас әw гьлийед ширьн бьһист у аликʹарийа лазьм станд, әwи ида дькарьбу шьхöле хwә бинә сери, кʹижан кö Хwәде дабу wи (1 Пʹадш. 19:1-18). Ле гәло нава хьзмәткʹаред Хwәдеда, кʹе әw һʹöнöр лапә баш да кʹьфше?

ИСА МӘСӘЛА ЛАПӘ МӘЗЬН ҺИШТИЙӘ

Чахе Иса сәр әʹрде хьзмәт дькьр, әw бь ширьнайа хwә нас бу у хәм дькьр бона мәрьва. Әw тʹö щар сәрт у һʹöкöмһʹьз нибу. Жь дьлшәwатийа хwә гот: «Wәрьнә щәм мьн һʹәмуйед wәстийайи у баргьран у әзе рʹьһʹәтийе бьдьмә wә. . . . Чьмки нире мьн рʹьһʹәт ә» (Мәт. 11:28-30). Мәрьва жи чахе әw һʹöнöр нав wида дьдитьн, пәй wи дьчун кʹöда жи әw дьчу. Иса гöне хwә wана дьани, хwарьн дьда wан, йед нәхwәш у сәqәт qәнщ дькьрьн у «гәләк тьшт» дәрһәqа Баве хwә wана һин дькьр (Марq. 6:34; Мәт. 14:14; 15:32-38).

Иса жь мәрьва фәʹм дькьр у һәр тьшт һьлдьда һʹәсаб. Әw йәк дьдә кʹьфше, wәки әw һьндава wанда ширьн бу. Фьрqи тʹöнә жерʹа һеса бу йан на, әwи һʹәмушк qәбул дькьрьн, йед кö дьлсах бун у жь wи аликʹари дьхwәстьн (Луqа 9:10, 11). Бәʹса хәбәре, чахе жьнька кö сәр хуне вәбьбу у нәтʹәмьз дьһатә һʹәсабе, дәсте хwә да кʹьнще wи, чьмки дьхwәст qәнщ буйа, Иса бона ве йәке ле сущдар нәкьр (Qан. Кʹаһ. 15:25-28). Гöне wи wе жьньке һат кö 12 сала дьчәрчьри жь нәхwәшийа хwә, у әwи жерʹа гот: «Әʹвде! Баwәрийа тә тö qәнщ кьри. Бь хер у сьламәт һәрʹә у жь еша хwә qәнщ бә» (Марq. 5:25-34). Рʹасти жи әw кьре чьqас дьлованийе дьдә кʹьфше!

ШИРЬНАЙЕ ЛАЗЬМ Ә ПЕ ШЬХÖЛА ӘʹЙАН КЬН

Мә жь мәсәлед жоре дит, wәки ширьнайи пе шьхöла әʹйан дьбә. Иса мәтʹәлока дәрһәqа мәрьве Самәрида, әw йәк зәлал да кʹьфше. Рʹаст ә Самәрийа у Щьһуйа һәв һʹьз нәдькьрьн, ле әw мәрьве Самәри гöне хwә мәрьве Щьһу ани, чьмки qачаха әw тʹалан кьрьбун, кʹöта бун у сәр рʹе wи нивкöшти һиштьбун. Әw Самәри ширьнайи да кʹьфше пе шьхöле хwә. Әwи бьринед wи мерьки дәрман кьр у wи бьрә меванхане. Паше әwи пʹәрә да хwәйе меванхане сәва мьqати wи мерьки бә у гот кö чь жи зедә сәр wи хәрщ кә әwе wан пʹәра бьдә wи (Луqа 10:29-37).

Ширьнайи пе хәбәрдан у гьлийед дьлдайине жи әʹйан ә. Кʹьтеба Пироз дьбежә, wәки «кöл-дәрд дьле мерьв дьһʹәлинә», ле паше зедә дькә готьнәкә ширьн «wи ша дькә» (Мәтʹлк. 12:25). Бәле, чахе әм һьндава мәрьвада ширьн у һʹәйф ьн, öса әм дькарьн дьл бьдьнә wан у али wан бькьн кö гәш бьн. Гьлийед мәйи ширьн wе нишан кьн, wәки әм бона wан хәм дькьн. Әw йәк wе али wан бькә бәр тәнгасийа тәйах кьн (Мәтʹлк. 16:24).

ЧАWА ӘWИ ҺʹÖНÖРИ НАВ ХWӘДА ПЕШДА БИНЬН?

Әм «дьлqе Хwәдеда» һатьнә әʹфьрандьне, ләма жи һʹәму мәрьв дькарьн әwи һʹöнöри нав хwәда пешда биньн (Дәстп. 1:27). Бәʹса хәбәре, Йулйо кö сәроке ордийа Рʹоме бу, йе кö qәрәwьлийа Паwлос дькьр Рʹомеда, «qәнщи Паwлосрʹа кьр, изьн да кö һәрʹә щәм достед хwә, wәки бона wи хәм бькьн» (Кʹар. Шанд. 27:3). Һьнә wәʹдә шунда, бьнәлийед гьрава Малтайе гәләк qәдьр-һöрмәт данә кʹьфше һьндава Паwлос у йед кö тʹәви wи бун wәʹде гәми һурдәхwәши бу. Бьнәлийед гьраве бона wан «агьр вехьстьн» у бь дьл у щан wана qәбул кьрьн (Кʹар. Шанд. 28:1, 2). Әw кьре wан рʹасти жи һежайи пʹайа йә. Ле әwи һʹöнöри әм гәрәке нә тʹәне щарәке әʹйан кьн, ле һәр гав.

Сәва бь тʹәмами дьле Хwәде ша кьн, әм гәрәке әwи һʹöнöри хwәрʹа бькьнә хәйсәт. Ле әw йәк һеса нинә, у һәнә тьштед öса кö ве йәкеда рʹе мә дьгьрьн. Щара дьбәкә әм хwә дьгьрьн, чьмки шәрмокә нә, йан хwәда баwәр ниньн, йан рʹасти пәйкʹәтьна тен, йан жи хwәһʹьзийе дьдьнә кʹьфше. Ле һәрге әм итʹбарийа хwә рʹöһʹе пироз биньн, у чʹәʹв бьдьнә Йаһоwа, әме дина хwә нәдьнә сәр wан чәтьнайа у һьндава мәрьвада ширьн бьн (1 Корн. 2:12).

Ле һун дькарьн тедәрхьн, кʹидәре wәрʹа лазьм ә һе зедә ширьнайе бьдьнә кʹьфше? Әм гәрәке пьрсед öса бьдьнә хwә: «Гәло әз бь дьлшәwати гöһ дьдьмә мәрьва? Әз зу тʹәхмин дькьм кʹерʹа аликʹари лазьм ә? Кʹәнге щара пашьн әз һьндава кәсәки ширьн бумә, йед кö нәфәред мьн у һәвалед мьни незик ниньн?» Паши ве йәке, әм дькарьн нете хwәрʹа дайньн, мәсәлә һе зедә пебьһʹәсьн дәрһәqа мәрьвед дор бәре хwә, илаһи йед кö щьвата мәда ньн. Wи щурʹәйи әме дина хwә бьдьнә дәрәща wан у тедәрхьн кö әwана чьда һʹәwщә нә. Паше, ида һьндава wанда ширьнайе бьдьнә кʹьфше, öса чаwа кö мәйе хwәха бьхwәста кö һьндава мәда буна (Мәт. 7:12). Һәрге һун аликʹарийе жь Йаһоwа дьхwазьн сәва әви һʹöнöри бьдьнә кʹьфше, ахьрийеда, әw wе әʹсә wә кʹәрәм кә (Луqа 11:13).

ҺʹÖНÖР ШИРЬНАЙИ МӘРЬВА ДЬКʹЬШИНӘ

Чахе Паwлосе шанди рʹез кьр, кö чь wи әʹйан дькә ча хьзмәткʹаре Хwәде, әwи һьнге бәʹса «ширьнайе» жи кьр (2 Корн. 6:3-6). Мәрьва дьхwастьн тʹәви Паwлос незик буна, чьмки wана дьдит кö әw бона wана хәм дькә, у әw йәк әwи пе хәбәрдан у кьред хwә дьда кʹьфше (Кʹар. Шанд. 28:30, 31). Һәрге әм жи әwи һʹöнöри бьдьнә кʹьфше, мәрьв wе бьхwазьн тʹәви мә һәвалтийе бькьн. Һьн жи һәрге әм һьндава wан жи йед кö мьqабьли мә дәртен, һʹәйф ьн, әме бь ве йәке дьле wан нәрм кьн у әwана wе кем һерс кʹәвьн (Рʹом. 12:20). У wәʹдә дәрбаз бә дьбәкә әwана бьхwазьн дәрһәqа мьзгинийа жь Кʹьтеба Пироз пебьһʹәсьн.

Чахе әʹрд бьбә щьнәт, беһʹәсаб мьри wе жь мьрьне рʹабьн. Бешьк, әwана wе гәләк ша бьн гава һьндава хwәда, дьбәкә щара пешьн, qәнщи у ширьнайа һʹәлал тʹәхмин кьн. Жь рʹазибуне әwана жи wе бьхwазьн һьндава йед майинда öса бьн. Ле һәр кәсе кö нәхwазьбә әви һʹöнöри бьдә кʹьфше у рʹе йед майин жи бьгьрә, wе бьн сәрwертийа Пʹадшатийа Хwәдеда һʹәта-һʹәтайе нәжи. Ле әwед кö һьндава һәвдöда бь һʹьзкьрьн у ширьн ьн, wе алийе Хwәдеда бенә qәбулкьрьне у жийина һʹәта-һʹәтайе бьстиньн (Зәб. 37:9-11). Рʹасти жи һьнге әʹмьр wе чьqас хwәш, бехоф у рʹьһʹәт бә! Ле һʹәта әw wәʹдә бе, әм ча дькарьн иро кʹаре бьстиньн, һәрге әwи һʹöнöри хwәрʹа бькьнә хәйсәте хwә?

ӘМЕ ЧЬ КʹАРЕ БЬСТИНЬН ҺӘРГЕ ҺЬНДАВА МӘРЬВАДА ШИРЬН БЬН?

«Мәрьве рʹәʹм qәнщийе ль хwә дькә» (Мәтʹлк. 11:17). Бәле, мәрьв дьхwазьн незики wан бьн, йед кö һьндава мәрьвада ширьн у рʹәʹм ьн. Иса гот: «Бь чь чапе һун бьпивьн, бь wе жи wәрʹа wе бе пиване» (Луqа 6:38). Бәле, мәрьве бь ви хәйсәт-һʹöнöри һеса дькарә һәвала хwәрʹа бьвинә у һәвалтийе хwәй кә.

Паwлосе шанди ширәт да хушк-бьред щьвата Әфәсида, wәки «һәврʹа ширьн у дьлшәwат бьн, ль һәв бьбахшиньн» (Әфәс. 4:32). Рʹасти жи щьват кʹарәкә мәзьн дьстинә чахе гьшк һьндава һәвда дьлшәwат ьн у аликʹарийе дьдьнә һәвдö. Мәрьвед wи щурʹәйи wе гьлийед сәрт, беһöрмәт, у гьлийед кö дьле мәрьва дешиньн, нәбежьн. Әw мәрьв wе тʹö щар гәвәстийе бәла нәкьн, ле дәwсе пе гьлийед хwә али хушк-бьра бькьн (Мәтʹлк. 12:18). Бь сайа ве йәке, щьват рʹöһʹанида гәш дьбә.

Бәле, ширьнайи пе гьли у шьхöла әʹйан дьбә. Чахе әм һьндава мәрьвада ширьн ьн, әм чʹәʹв дьдьнә хәйсәте Йаһоwа Хwәде (Әфәс. 5:1). Wи щурʹәйи әме щьвата хwә qәwи кьн у мәрьва бәрбь рʹастийе бькʹьшиньн. Wәрә әм гьшк öса нас бьн, ча мәрьве ширьн!